Close Rolls, August 1258

Close Rolls, August 1258

Wasconia.—Rex majori et juratis et civibus Baion' salutem. Super eo quod nobis per litteras vestras significastis de auquilatis faciendis et currendis in civitate vestra sciatis quod in proximo mittemus senescallum in Wasconiam qui de consilio vestro faciet in hac parte quicquid sine juris injuria fieri possit. Et circa nostra et Edwardi filii nostri sicut hactenus habuistis. Teste rege apud Westmonasterium iiij. die Augusti.

De terra replegianda.—Edmundus de Bedinton' venit coram rege die Lune proxima post festum Sancti Petri ad Vincula et petiit terram suam in Glapethorn', que capta etc. propter defaltam etc. versus Willelmum filium Rogeri ut dicitur, coram justiciariis de banco.
Johannes de Eston' venit coram rege die Mercurii proxima post festum Sancti Petri ad Vincula et petiit terram suam et terram Oliveri de Eston, Ricardi de Therstewod' et magistri hospitalis Sancte Katerine de Eston' in Eston' eis replegiari, que capta etc. propter defaltam etc. versus Sibillam de Morton', ut dicitur, coram justiciariis de banco.

Littera directa Lewelino.—Rex Lewelino filio Griffini salutem. Litteras vestras recipimus continentes quod Patricius de Chaorth' et constabularius de Kermerdyn et eorum homines, contra formam treugarum inter nos et vos nuper apud Oxoniam captarum, Mareduth filium Res' a vestra fidelitate subtraxerunt, qui postmodum terram vestram de Devet contra formam treugarum ipsarum, mediante dicto Patricio et ejus posse, hostiliter invasit prout in eisdem litteris continebatur. Ad quod scire vos volumus quod predictus Mareduth tempore predictarum treugarum inter vos et nos apud Oxoniam captarum et diu ante ad nostram fidelitatem et servicium fuit reversus, sicut vestris nunciis treugas ipsas nobiscum ineuntibus expressimus manifeste. Verum, quia treugas ipsas, prout eas in animam nostram jurari fecimus, plene cupimus observari, volumus quod, si quid per homines nostros in his aut aliis contra treugas predictas interceptum fuerit aut transgressum, per dictatores earundem ad hoc deputatos, de quibus vobis nuper significavimus, plenius emendetur ex parte nostra, dum tamen id idem fiat ex parte vestra. Teste me ipso apud Westmonasterium iiij. die Augusti.

[m. 4d.]

Memorandum quod omnes iste littere subscripte, tam clause quam patentes, de negociis Romane Curie confecte fuerunt per magistrum Rostandum qui illas secum portavit ad Curiam et hoc totum factum est de consilio S. comitis Leyc', R. comitis Marscalli, P. de Sabaudia, J. comitis Warr', Johannis Maunsell' thesaurarii Ebor', Johannis filii Galfridi, Petri de Monte Forti et aliorum de consilio regis.

De negociis missis ad Curiam Romanam.—Rex P. Sancti Georgii ad Velum Aureum diacono cardinali salutem. Cum pro arduis negociis que regnum nostrum et nos respiciunt venerabiles patres Ebredunensem et Taratasiensem archiepiscopos et discretum virum magistrum Rustandum, domini Pape capellanum, ad Romanam Curiam destinemus, dileccionem vestram rogamus, affectu quo possumus ampliori, quatenus dictis nunciis super hiis que ex parte vobis exponent fidem indubitatam adhibere velitis, ipsos solita benevolencia in promovendis nostris negociis adjuvantes. Teste rege apud Westmonasterium primo die Augusti.
Consimilis littera dirigitur unicuique cardinali per se et singulis procuratoribus et ceteris amicis regis in Curia Romana, et iste littere sunt clause.

Venerabilibus patribus sacrosancte Romane ecclesie cardinalibus H. Rex Anglie etc. salutem cum omni reverencia et honore. Scimus multis et infallabilibus documentis quod sacrosancta Romana ecclesia, piissima mater nostra, vigilanti studio et perpensiore cura considerat ea que incolumitatem respiciunt regni nostri, quod ostendit evidentissime hiis diebus. Nam nuper (fn. 1) religiosum virum fratrem Mansuetum, domini Pape penitenciarium et capellanum, sedes Apostolica de quiete nostra sollicita nos multipliciter monuit et induxit ut cum illustri rege Francie pacis federa iniremus; Nos igitur, attendentes quod ex parte ista toti Christianitati non nulla commoda per Dei graciam poterunt provenire, una cum dicto fratre nuncios nostros sollempnes in Franciam curavimus destinare, qui post tractatus varios certam formam pacis cum sepedicto rege Francie ordinarunt. In qua, licet in quibusdam nostra condicio aggravetur, tamen ratum habemus et gratum quod est super hoc ordinatum. Cum igitur toto mentis desiderio affectemus ut per providenciam sedis apostolice tractatus hujusmodi compleatur, sinceritati vestre omni affectu quo possumus supplicamus, quatinus quod circa tractatum pacis tam pie, quam laudabiliter inchoastis, feliciter consummare velitis, nobis concedentes cardinalem quem nuncii nostri nominaverint in legatum, ut per ipsius industriam dicta pax ad honorem Dei et ecclesie Romane firmetur. Ex hoc enim honori sacrosancte Romane ecclesie accrescet plurimum si per ipsam pax ista a cunctis devotis ecclesie affectata proveniat, ut per istius pacis exitum nobis pacem tribuat que exsuperat omnem sensum. Teste ut supra.

Domino Pape rex Anglie salutem cum reverencia et honore. Regi glorie et gracie largitori ac vestre sanctitatis clemencie graciarum refundimus actiones, qui pacem faciens in sublimibus suis animum vestrum erga nos excitare dignatus est, divinitus vobis inspirans ut illa antiqua et vetus controversia inter nos et illustrem regem Francie longis temporibus agitata, que innumerabilium provinciarum populos traxit in exterminium et ruinam, per mansuetudinis vestre graciam dissolvatur. Unde cum jocunditate animi ac cordis jubilo dicere possumus vos, qui locum Dei tenetis in terris, portare pacem et illuminare patriam, populis vobis subditis procurare quietem, ut per vos Altissimus glorificetur in celis, pax ministretur in terris hominibus benevole voluntatis. Ecce enim, pater clementissime, quod nuper per religiosum virum, fratrem Mansuetum, penetenciarium et capellanum vestrum, cujus mansuetudo et providencia apud nos et regni nostri majores grata est plurimum et accepta, qui sibi commisso negocio diligenter et fideliter institit et prudenter, quasi per angelum pacis nos multipliciter monuistis, ut cum serenissimo rege Francie pacis federa iniremus; cujus exortacionibus salutiferis et honestis adquiescentes omnino cum predicto fratre in Franciam sollempnes nuncios curavimus destinare, qui post tractatus varios certam formam pacis cum sepedicto rege Francie ordinarunt. In qua, licet non nullis articulis condicio nostra gravari quodammodo videatur, tamen nobis acceptabile et gratum existit quicquid celestis dispensacio super hoc duxerit providendum. Sperantes exinde ut per ipsius pacis proventum ecclesia Dei de variis laboribus respirabit ad pacem, et annunciabit Dominus annum placabilem ut mirabiles elevaciones maris, quibus Petri navicula fluctuare videtur, mirabilis in altis, Dominus cessare faciet, statuens procellam in auram.
Cum igitur totis medullis anime affectemus ut per sedis apostolice providenciam questionis prefate scrupulus complanetur, Sanctitati vestre cum affectione qua possumus suplicamus quatinus quod circa tractatum pacis tam pie tam laudabiliter inchoastis, feliciter consummare curetis; nobis concedentes legatum quem nuncii nostri duxerint nominandum, ut per ipsius industriam dicta pax ad honorem Dei et ecclesie Romane firmetur. Ex hoc enim sacrosancte Romane ecclesie accrescet plurimum, si per ipsam pax ista a cunctis devotis ecclesie affectata proveniat ut per istius pacis exitum auctor pacis nobis pacem tribuat que exsuperat omnem sensum. Teste ut supra.

Domino Pape rex Anglie salutem. Quotiens recolimus immensas et infinitas gracias quas non nostris exigentibus meritis set sue liberalitatis instinctu sedes apostolica nobis fecit et indefessa vicissitudine sollicitudine jugiter faciens gracias graciis superaddit. Nos pro tantis beneficiis recognoscimus debitores. Ecce enim quod nuper venerabilem virum magistrum Arlotum subdiachonum et notarium vestrum ad nos misistis pro negocio regni Apulie, qui sub certa forma reformacionem secum attulit condicionum quarundam in privilegio apostolico confecto super hoc contentarum, petens in primis quod cum illustri rege Francie pacem reformaremus omnino, ita quod ex illa pace mille milites per annum vel quingenti per biennium nobis in subsidium dicti negocii provenirent, super quo per Dei graciam taliter est processum quod non restat nisi ut per favorem sedis apostolice iste articulus debitum sortiatur effectum; sicut religiosus vir, frater Mansuetus, qui istis interfuit, vestre clemencie plenius explicabit.
Secundo petiit ut liberaremus ecclesiam in quadam pecunie quantitate, quod aliter nequimus facere nisi sicut nuncii nostri vobis exponent, scilicet decimam, quam prelati regni Anglie, templarii et hospitalarii pro triennio preterito nobis debent, dando ecclesie in solutum daturi opem et operam efficacem ut dicta quantitas exigatur.
Tercio quoque dictus magister Arlotus petiit quod usque ad certam summam de regno nostro commune subsidium haberemus. Super quo magnates et proceres nostros instanter et diligenter requisivimus, qui post multos tractatus nobis unanimiter responderunt quod, si de ipsorum consilio regnum nostrum vellemus in melius reformare et vos condiciones in privilegio vestro contentas, quas nimis difficiles reputant, mitigare velletis, ipsi nos ad prosequcionem dicti negocii adjuvarent. Super quo nos et filius noster primogenitus ipsorum ordinacioni statum regni nostri et nostrum submisimus, volentes ut circa regnum nostrum ordinent quiquid viderint expedire; et jam in multis procedere laudabiliter inceperunt, propter quod firmiter credimus et tenemus quod dummodo mansuetudo vestra condiciones ipsas temperet sicut nuncii nostri vobis exponent dictum negocium per magnatum nostrorum et totius communitatis auxilium ad finem perveniet exoptatum.
Unde sanctitati vestre cum devocione qua possumus supplicamus quatenus attendentes quod ex sincera affectione istud negocium assumpimus, condiciones predictas, sicut nuncii nostri petent, dingnemini mitigare. Teste ut supra.

Domino Pape rex Anglie salutem cum reverencia et honore. Cum ad prosequcionem negocii regni Sicilie modis omnibus intendamus, parati circa hoc congerere vires nostras, Sanctitati vestre supplicamus quatinus, pensantes que nuncii nostri vobis exponent ex parte nostra, condiciones in privilegio vestro contentas mitigare velitis, et si, quod absit, que per dictos nuncios offerimus ad prosequcionem dicti negocii sufficere non credatis, venerabilibus patribus H. et R. Ebredunensi et Tarentasiensi archiepiscopis et viro religioso fratri J. milicie Templi in Anglia, magistro Johanni Clarel et nobilibus viris Petro Braunche et Willelmo de Hotentoft, militibus nostris, plenam et liberam concedimus potestatem ac speciale mandatum nomine nostro et Edmundi nati nostri illustris regis Sicilie tractandi vobiscum de componendo super negocio memorato occasione cujuscunque juris nobis et dicto filio nostro competentis in regno predicto secundum quod eis videbitur expedire. Ratum habituri et firmum quicquid ipsi vel major pars eorum super hoc duxerint faciendum, nos et dictus E. filius noster sigilla nostra presentibus duximus apponenda. Teste me ipso apud Westmonasterium, primo die Augusti.

Domino Pape rex Anglie pedum (fn. 2) oscula beatorum. Sanctitati vestre notum facimus quod nos constituimus venerabiles patres Ebredunensem et Tarentasiensem archiepiscopos et discretum virum magistrum Rostandum, domini Pape subdiaconum et capellanum, procuratores nostros et nuncios speciales, dantes eis potestatem et speciale mandatum tractandi vobiscum nomine nostro et Edmundi nati nostri, regis Sicilie, de condicionibus meliorandis et mitigandis contentis in privilegio apostolico confecto super concessione regni Sicilie ac obligandi nos et dictum Edmundum regnumque nostrum sub quibuscunque pactis et penis ac jurandi in animas nostras de ipsis servandis; ratum habituri et firmum quicquid per ipsos actum fuerit seu eciam procuratum. In cujus etc. ut supra.
Consimilis littera emanavit sub nominibus religiosi viri fratris J. milicie Templi in Anglia et discretorum virorum magistri Johannis Clarel', clerici, Petri Braunche et Willelmi de Hastentot, militum. In cujus etc. ut supra.

Domino Pape rex Anglie pedum oscula beatorum. Sanctitati vestre notum facimus quod venerabiles patres H. Dei gracia Ebredunensem archiepiscopum et G. electum Eboracensem et dilectum clericum nostrum magistrum J. Clarel nostros constituimus procuratores et nuncios ad petendum prorogacionem terminorum in privilegio confecto super concessione regni Sicilie contentorum et ad petendum reformacionem et melioracionem condicionum in dicto privilegio contentarum; Dantes eisdem plenam potestatem et speciale mandatum obligandi nos et regnum nostrum sub quibusdam pactis et penis ac jurandi in animam nostram de ipsis servandis; Ratum habituri et gratum quicquid per ipsos tres vel duos ex ipsis super hoc actum fuerit vel eciam procuratum. In cujus rei testimonium sigillum nostrum presentibus duximus apponendum. Teste ut supra.

Domino Pape rex Anglie salutem. Cum de fidelitate et industria nobilis viri Rogeri de Lintyn, militis nostri, plenius confidamus, ipsum associamus nunciis et procuratoribus nostris quos pro negocio regni Apulie ad Sanctitatis vestre presenciam destinamus, volentes ut super omnibus dictum negocium contingentibus parem et plenam cum aliis procuratoribus habeat potestatem. Teste me ipso apud Westmonasterium primo die Augusti.

Domino Pape rex Anglie salutem. Cum pro bono statu regni nostri et pro pace inter nos et illustrem regem Francie firmanda legato cardinali plurimum egeamus, Sanctitati vestre cum affectu quo possumus supplicamus quatinus aliquem de fratribus vestris cardinalibus nobis in legatum concedatis. Nos enim ad hoc speciales procuratores et nuncios constituimus venerabiles patres Ebredunensem et Tarantasiensem archiepiscopos et discretum virum magistrum Rostandum capellanum vestrum; ratum habituri et firmum quicquid per ipsos tres vel duos ex ipsis actum fuerit seu eciam procuratum. In cujus etc. Teste ut supra.
Consimilis littera emanavit sub nominibus religiosi viri fratris J. Milicie Templi in Anglia, magistri Johannis Clarel et nobilium virorum Petri Branche et Willelmi de Hastentot, militum regis, nulla tamen facta distinctione in hac clausula. Ratum etc. sic hoc modo; ratum habituri et firmum quicquid per ipsos super hoc actum fuerit seu eciam procuratum. In cujus etc. Teste ut supra.

Domino Pape rex Anglie salutem. Cum pro bono statu regni nostri ac pro pace firmanda inter nos et illustrem regem Francie legato cardinali plurimum egeamus, venerabiles patres H. Ebredunensem archiepiscopum et G. electum Eboracensem et discretum virum magistrum Johannem Clarel nostros constituimus procuratores ad petendum legatum; ratum habituri quicquid per ipsos tres, vel duos ex ipsis, super hoc actum fuerit seu eciam procuratum. In cujus etc. Teste ut supra.

Domino Pape rex Anglie salutem. Cum venerabiles patres archiepiscopi et episcopi ac religiosi viri templarii et hospitalarii regni nostri decimam triennii preteriti nobis ab apostolica sede concessam non solverint et nos ecclesie Romane occasione regni Sicilie in nonnullis pecuniarum summis teneamur astricti, predictam decimam nobis debitam usque ad summam triginta milium marcarum vobis et ecclesie Romane concedimus in solutum promittentes quod in exactione ipsius vos juvabimus bona fide. In cujus etc. Teste ut supra.

Domino Pape rex Anglie salutem. Scriptum esse audivimus quod illa civitas ordinatissima dicitur in qua quisque proprios nescit affectus. Hoc hodie in reformacione et ordinacione regni nostri apertissime comprobatur. Nam nostri proceres et magnates sua postponentes negocia propter nostra, suis spretis negociis, nostris et regni nostri invigilant toto posse, unde cum ordinacionem ipsorum nobis et heredibus nostris plurimum fructuosam habeamus, gratam non inmerito et acceptam Sanctitati vestre, cum omni affeccione qua possumus supplicamus quatinus favorem sedis apostolice hujusmodi ordinatum dignemini impartiri fulcientes eandem vestre auctoritatis robore et consensu. In cujus etc. Teste ut supra.

Scotia.—Rex regi Scocie salutem. Cum pro multiplici confederacionis vinculo quo adinvicem sumus annexi nostre fuerit et sit intencionis salubre consilium et auxilium in reformacione status regni vestri ad vestrum et ejusdem regni honorem et utilitatem apponere, et ad hoc nuper ad vos destinaverimus dilectos et fideles nostros Simonem de Monte Forti, comitem Leyc', Petrum de Sabaudia et Johannem Maunsel, thesaurarium Ebor', miramur quam plurimum super quibusdam que discreti viri abbas de Dumfermelyn et Willelmus de Haya, ad presenciam nostram cum litteris vestris de credencia nuper accedentes, nobis ex parte vestra exposuerunt. Et in reversione predictorum fidelium nostrorum de consilio eorum et aliorum procerum de consilio nostro vobis super premissis respondebimus solliciti circa ea que honoris vestri et commodi respiciunt incrementum. Teste apud Geytinton' xxvij. die Augusti.

[Schedule].

Petrus Cocus ponit loco suo Rolandum de Anvers ad lucrandum etc. versus Nicholaum le Masun et Margeriam uxorem ejus de assisa mortis antecessoris.
Abbas de Rading' ponit loco suo Robertum le Forester et Thomam de Benetfeud versus Robertum Danvers de quodam fossato levato in Stratfeld Morton' (sic) ad nocumentum liberi tenementi ipsius abbatis in eadem villa.
Idem abbas ponit loco suo predictos Robertum et Thomam versus Sarram de Suleham de placito transgressionis.