Close Rolls, October 1258

Close Rolls, October 1258

43 HENRY III.

Clause de anno regni regis H. filii regis Johannis xliij°.

1258.

[m. 15.]

Pro Michaele de Fednes.—Cum rex concesserit dilecto clerico suo Michaeli de Fednes per litteras suas patentes quod toto tempore vite sue habeat hanc libertatem videlicet quod ipse et propria familia sua tam in veniendo in Angliam quam in redeundo ad partes suas quieti sint pro se et personis suis in portu regis Dovor' de theoloniis sive paagio ad regem pertinentibus in eodem portu, mandatum est Ricardo de Grey, constabulario regis Dovor', quod ipsum Michaelem et propriam familiam suam libertate illa in portu predicto plene gaudere faciat secundum tenorem litterarum regis predictarum, et contra tenorem ipsarum litterarum ipsos vexari nullatenus permittat. Teste rege apud Westmonasterium xxix. die Octobris anno etc. xliij°.

De homagio capto.—Rex cepit homagium Willelmi Comyn, filii et heredis Isabelle de Valeynes, de omnibus terris et tenementis que predicta Isabella tenuit de rege in capite, que fuerunt in custodia Willelmi de Valenc', fratris regis, de dono regis; et ei rex reddidit terras et tenementa predicta. Et mandatum est vicecomiti Norf' quod de omnibus terris et tenementis que predicta Isabella tenuit de rege in capite in balliva sua et de quibus fuit seisita in dominico suo ut de feodo die quo obiit et que occasione mortis predicte Isabelle capta fuerunt in manum regis, plenam seisinam eidem Willelmo habere faciat. Teste rege ut supra.
Eodem modo mandatum est vicecomiti Suff'.
Eodem modo mandatum est vicecomiti Essex'.
Eodem modo mandatum est vicecomiti Hertford'.

Pro Hoelo filio Madoci.—Rex Hoelo filio Madoci de Brumfeld salutem. Sciatis quod, si terras vobis ablatas et occupatas a Walensibus debito vel honesto modo recuperare possitis, multum nobis gratum erit et acceptum dum tamen hoc fieri possit sine interrupcione vel infraccione treugarum inter nos et predictos Walenses initarum. Teste rege apud Westmonasterium xxix. die Octobris.

De parco de Haveryng' agistando.—Mandatum est Ricardo de Muntfichet quod parcum regis de Haveryng' sine dilacione agistari faciat quantumcumque poterit sine dampno ferarum regis ejusdem parci, ita quod agistatores dicti parci regi respondeant ad scaccarium regis de exitibus ejusdem agistamenti. Teste etc. ut supra.

Mandatum est constabulario de Sancto Briavello quod in foresta de Den' faciat habere R. comiti Glouc' quinque apros et decem layas de dono regis. Teste rege apud Westmonasterium xxx. die Octobris.

Pro priore North'.—Cum Johannes prior de Caritate prioratum Sancti Andree de Norhampt' vacantem, cujus ordinancio ad ipsum pertinet, commiserit fratri Ivoni latori presencium, rex commissionem dicti prioris dicto Ivoni inde factam acceptans mandat vicecomiti Norhampt' quod de dicto prioratu Norhampt' cum omnibus ad dictum prioratum pertinentibus ipsi Ivoni plenam seisinam habere faciat. Teste rege apud Westmonasterium xxxj. die Octobris. Per consilium regis. (In margin) Et, quia W. quondam prior North' nunc prior Lewen' nondum est certus de prioratu Lewen', rex vult quod, si contingat cum destitui prioratu Lewen', salva sit ei sua vendicacio quam habet in prioratu North' predicto.

Pro Roberto de Wileweby'.—Rex de l^a. marcis que regi restant reddende ad scaccarium regis de fine c. marcarum quem Robertus de Wilgheby fecit coram Rogero de Turkelby et sociis suis, justiciariis regis ultimo itinerantibus in comitatu Ebor', pro transgressione ei et hominibus suis imposita, rex concessit eidem Roberto quod reddat regi per annum ad idem scaccarium x. marcas, videlicet ad scaccarium Pasche anno etc. xliij°. v. marcas, et ad scaccarium Sancti Michaelis proximo sequens v. marcas, et sic de anno in annum ad eosdem terminos x. marcas donec predicte l^a. marce regi persolvantur. Et mandatum est baronibus de scaccario quod predictos terminos ei habere et sic fieri et inrotulari faciant. Teste ut supra.

Pro electo Eboracensi.—Cum magister Gottefridus electus Eboracensis, munus consecracionis sue a papa optineat et pro negociis suis moretur in Curia Romana ut rex accepit, rex concessit ei de gracia speciali quod dominicas terras maneriorum archiepiscopatus Eboracensis excoli et seminari faciat salvis regi aliis exitibus ejusdem archiepiscopatus quousque temporalia dicti archiepiscopatus eidem reddiderit. Et mandatum est magistro Johanni Mansell' et Ade de Hilton' custodibus dicti archiepiscopatus quod ballivos dicti archiepiscopi predictas dominicas terras excolere et seminare permittant sicut predictum est. Teste rege apud Westmonasterium xxxj. die Octobris. Per magnates de consilio.