Close Rolls, November 1262

Close Rolls, November 1262

Pro abbate Sancti Edmundi.—Rex thesaurario et baronibus suis de scaccario, salutem. Cum quedam libertates quas abbas et monachi de Sancto Edmundo sibi vendicant et a nobis petunt confirmari adhuc sint in demanda ad scaccarium nostrum, ut dicunt, nec ad presens propter absenciam nostram et defectum consilii nostri aliquid certum statuere vel ordinare possimus in hac parte, vobis mandamus quod demandam quam eis facitis de libertatibus predictis ponatis in respectum (fn. 1) nostrum in Anglia ut tunc de consilio nostro super hoc fieri faciamus quod de jure fuerit faciendum. Teste rege apud Castrum Terrici iij. die Novembris.

Pro Galfrido de Burlemint.—Mandatum est W. de Merton', cancellario, quod scrutatis rotulis cancellarie faciat habere Galfrido de Burlemont breve suum de Liberate de feodo suo de termino Sancti Michaelis proximo preterito sicut aliis bachelariis rex nuper fieri precepit. Teste ut supra.

Mandatum est Ricardo de Ewell', emptori garderobe regis, quod faciat habere familiaribus bachelariis et servientibus regis ad arma in Anglia existentibus robas suas ad instans festum Sancti Nicholai de termino Natalis Domini proximo venturo sicut eas habere debent et habere consueverunt. Teste rege apud Fere in Tardeneys vj. die Novembris. (Cancelled) Vacat.

Pro rege.—Mandatum est Ricardo de Ewell', emptori garderobe regis, quod modis omnibus provideat quod pannos habeat ad opus regis et familie sue ad liberacionem regis tempestive faciendas omnibus bachelariis nostris contra instans festum Natalis Domini, quia rex intendat festum illud celebrare apud Westmonasterium, Domino concedente. Rex enim mandavit P. Basset, justiciario, abbati de Burgo, thesaurario, et W. de Merton', cancellario quod illas septingentas marcas quas nuper ad regem misisse debuerunt ad partes Francie contra instans festum Sancti Martini ad robas inde emendas dicto Ricardo habere faciant et ampliores si necesse fuerit ad empciones garderobe per ipsum factas inde acquietandas. Teste rege apud Fere in Tardeneys vij. die Novembris.

Pro Hugone de Troye.—Mandatum est W. de Merton', cancellario, quod scrutatis rotulis cancellarie regis faciat habere Hugoni de Troie breve suum de Liberate de feodo suo de termino Sancti Michaelis proximo preterito. Teste ut supra.

Pro Imberto de Muntferant.—Mandatum est Willelmo de Weland', escaetori regis citra Trentam, quod, cum rex nuper concesserit dilecto et fideli suo Imberto de Muntferaunt custodiam terrarum et heredum Philippi de Columbariis qui de rege tenuit in capite, rex eidem Imberto graciam facere volens uberiorem concessit ei omnes exitus inde perceptos ad opus regis postquam predictam custodiam in manu regis cepit et (fn. 2) eidem Imberto exitus illos habere faciat. Teste rege apud Rem' xij. die Novembris.

Pro Radulpho de Gorges'.—Mandatum est W. de Merton', cancellario, quod scrutatis rotulis cancellarie faciat habere Radulpho de Gorges', valetto regis, feodum suum de termino Sancti Michaelis proximo preterito. Teste ut supra.

Pro Baldewino Wak'.—Mandatum est Alano la Zuche, justiciario foreste regis citra Trentam, quod in foresta regis de Wauberg' faciat habere dilecto regis Baldewino Wak' quatuor damas de dono regis. Teste ut supra.

Pro Reginaldo filio Petri.—Rex concessit dilecto et fideli suo Reginaldo filio Petri quod riveare possit in ripariis regis que sunt in defenso in comitatu Suthampt' hac vice de gracia regis speciali. Teste rege apud Rem' xiij. die Novembris.

De terris P. de Nevill'.—Mandatum est thesaurario et baronibus de scaccario quod distringi faciant Petrum de Nevill' per omnes terras et catalla sua ad debita que regi debet ad scaccarium regis sine dilacione reddenda. Teste ut supra.

Hic recepit magister J. de Chyshull' sigillum et sigillavit brevia.

Pro Petro de Abezun et hominibus suis de Walton'.—Rex thesaurario et baronibus suis de scaccario, salutem. Sciatis quod perdonavimus dilecto consanguineo nostro Petro de Abezun canonico de Brugg' et hominibus suis de Walton' quadraginta solidos ad quos ipse et homines sui predicti amerciati fuerunt coram dilecto et fideli nostro Alano la Zuche et sociis suis, justiciariis nostris ultimo itinerantibus ad placita foreste nostre in comitatu Staff', pro communi summonicione facta coram prefatis justiciariis. Et ideo vobis mandamus quod predictum Petrum et homines suos predictos de predictis quadraginta solidis quietos esse faciatis. Teste rege apud Rem' xiiij. die Novembris.

Pro rege. De lecto.—Mandatum est Ricardo de Ewell' emptori garderobe regis quod fieri faciat unum bonum et decentem lectum ad opus regis, ita quod rex illum promptum habeat et paratum in adventu suo in Anglia contra instans festum Natalis Domini. Teste rege apud Rem' xv. die Novembris.

Pro Willelmo de Cestr'.—Rex thesaurario et baronibus suis de scaccario, salutum. Cum Robertus le Treur', quondam serviens noster, nuper defunctus, percipere consuevit per diem ad sustentacionem suam tres denarios per manum vicecomitis nostri Surr' qui pro tempore fuerit et tres obolos de villa nostra de Bedeford' de elemosina nostra constituta, sicut per litteras vestras nobis transmissas intelleximus, nos optentu diutini obsequii quod Willelmus de Cestr', serviens noster, nobis impendit, concessimus ei predictos quatuor denarios et obolum, quoad vixerit percipiendos, ad sustentacionem suam eo modo quo predictus Robertus eos percipere consuevit. Et ideo vobis mandamus quod eidem Willelmo predictos quatuor denarios et obolum diurnos habere faciatis percipiendos quoad vixerit, sicut predictus Robertus eos percipere consuevit, una cum arreragiis eorundem a tempore mortis predicti Roberti. Teste ut supra.

[Schedule]

H. Dei gracia rex Anglie, dominus Hibernie, et dux Aquitannie egregio principi H. eadem gracia regi Norwagie illustri salutem et felices ad vota successus. Literas vestras nobis transmissas benigne recepimus, ut decebat, ex quarum tenore perpendimus quod vestre non exstitit voluntatis excercitum ducere in regnum Scocie vel aliquam guerram movere regi Scocie affini nostro karissimo, nec eciam nuncii ejusdem regis in terra vestra arrestati contra honestatem regiam tractati fuerunt sicut ex gravi querela quorundam nobis exstitit plenius intimatum, super quo mansuetudinem regiam plurimum commendamus. De eo etiam quod eosdem nuncios ad partes ipsius regis liberari fecistis liberaliter et benigne, sicut in predictis literis vestris perpendimus contineri, serenitati vestre graciarum referimus actiones. Et, quia nollemus, sicut nec deceret, aliquam dissencionis materiam inter vos et prefatum regem suboriri, sed potius pristine dilectionis federa inter progenitores vestros et suos dudum inita ad honorem Dei necnon et utriusque regni comodum et quietem inposterum feliciter continuari, prefatum regem Scocie rogabimus et diligenter inducemus quod, si per ipsum vel suos dampnum vel injuria vobis vel vestris fuerit illata, vobis ea qua convenit amicicia et vicinitate faciat emendari. Quapropter serenitatem vestram rogandam duximus cum affectu quatinus erga prefatum regem et gentem suam tam curialiter et modeste vos habere velitis quod mutuo honori vestro conveniat et circumspectionem vestram pacificam merito commendare possimus. Teste me ipso apud Rem' xv. die Novembris anno regni nostri xlvij^o.

Pro rege.—Mandatum est Philippo Basset, justiciario Anglie, et abbati de Burgo, thesaurario, quod omnes denarios quos receperunt de Rogero de la Leye et socio suo, custodibus cambii regis Londonie, pro negocio Wallie et aliis negociis regis post ultimum regis ab Anglia (sic) eis restitui faciant, ut de exitibus cambii predicti per manum suam propriam regi valeant respondere. Et omnes denarios provenientes de exitibus episcopatus Lond' salvo reponi faciant ad opus regis in Turri regis Lond', sicut rex alias eis mandavit. Teste rege apud Rem' xvij. die Novembris.

Pro rege.—Mandatum est Galfrido de Cauz, custodi episcopatus London', quod omnes denarios provenientes de episcopatu predicto colligi et salvo reponi faciat ad opus regis in Turri London', ita quod in adventu regis inde ad plenum valeat respondere. Teste rege apud Rem' xx. die Novembris.

Pro rege.—Mandatum est Philippo Basset, justiciario Anglie, abbati de Burgo, thesaurario, et W. de Merton', cancellario, quod, quia rex propter debilitatem suam nescit utrum instans festum Natalis celebrare possit apud Westmonasterium sicut nuper rex eis significavit, provideant regi apud Sandwycum de vinis contra sollempnitatem festi predicti carianda usque Cantuariam, si forte contingat regem festum predictum ibidem celebrare et non posse, prout intendat, usque Westmonasterium se transferre. Teste rege apud Rem' xxj. die Novembris.

Pro Fratribus Predicatoribus London'.—Mandatum est J. abbati de Burgo thesaurario quod scrutatis rotulis Scaccarii regis faciat habere Fratribus Predicatoribus London' tantum ad se contra instantem yemem vestiendos quantum anno preterito habuerunt, de dono regis; et hoc nullatenus omittat. Teste rege apud Sessons' xxvij. die Novembris.

Pro Radulpho de Donion.—Mandatum est W. de Merton', cancellario, quod scrutatis rotulis cancellarie faciat habere Radulpho de Donion breve suum de Liberate de eo quod ei aretro est de feodo suo quod percipit ad scaccarium regis de terminis Pasche et Sancti Michaelis proximo preteritis. Teste ut supra.

Pro rege.—Mandatum Philippo Basset, justiciario, quod in forestis parcis propinquis, ubi melius viderit expedire, capi faciat damas, bissas et capriolos contra instans festum Natalis Domini et venacionem illam mitti faciat usque Cantuariam. Teste rege ut supra.

Pro rege. De bachelariis.—Mandatum est Ricardo de Ewell', emptori garderobe, quod faciat habere bachelariis regis quos usque Londoniam venire contigerit robas suas de instanti termino Natalis Domini sicut eas habere debeat et habere consueverunt, et quod provideat modis omnibus quod habeat apud Cantuariam tercio vel quarto die ante festum predictum pannos, pelluram, ceram et alia que garderobe regis noverit necessaria. Et eciam de tribus robis ad opus regis, videlicet una de scarleto, alia de viridi, et tercia de camelino ad equitandum; et similiter de una duodena superpelliciorum ad capellam nostram; et de una duodena pannorum ad aurum, et de una duodena pannorum de aresta ad oblaciones regis inde faciendas; ita quod rex omnia predicta prompta habeat apud Cantuariam in adventu suo ibidem. Et hoc nullatenus omittat. Teste ut supra.

Pro regina.—Mandatum est abbati de Burgo, thesaurario, quod provideat regine de uno firmaculo precii C. solidorum offerendo ad feretrum Beati Thome Martiri in adventu ipsius regine apud Cantuariam, et de quodam alio firmaculo ejusdem precii offerendo ad feretrum Beati Edwardi in adventu suo apud Westmonasterium. Et hoc nullatenus omittat. Teste ut supra.

Pro rege. Demagnacapella.—Mandatum est eidem thesauario et Edwardo de Westmonasterio quod cariari faciant magnam capellam regis et duos cofros cum vasis argenteis usque Cantuariam una cum militibus et equis regis argenteis qui sunt in custodia thesaurarii ecclesie Westmonasterii contra instans festum Natalis Domini; ita quod milites illi carientur per aliquem summarium, et quod predicta omnia sint apud Cantuariam per duos dies ante festum predictum. Teste ut supra.

Pro Gwydone de Lezinnan'. De robis.—Mandatum est Ricardo de Eywell', emptori garderobe, quod faciat habere Gwydoni de Leziniaco, fratri regis, se tercio militum, robas suas de instanti termino Natalis Domini, videlicet dicto fratri regis robam suam integram cum capa et militibus suis robas suas eis competentes. Teste rege apud Sesson' xxviij. die Novembris.

Pro rege. De superpelliciis.—Mandatum est eidem Ricardo quod provideat de duodecim superpelliciis et de panno ad opus pauperum et de quodam lecto ad opus regis de quo sibi alias fuit mandatum mittendis usque Cantuariam contra festum Natalis Domini, ita quod habeat hec omnia prompta in adventu regis ibidem.

Pro rege.—Mandatum est ballivis suis de Cantuaria quod provideant contra instans festum Natalis Domini de centum sexaginta et quinque paribus sotularium ad opus pauperum ad mandatum regis inde faciendis sicut fieri consuevit: et custum quod ad hoc posuerunt, cum dominus rex illud sciverit, sibi allocari faciet; et hoc nullatenus omittant. Teste ut supra.