Close Rolls, March 1262

Calendar of Close Rolls, Henry III: Volume 12, 1261-1264. Originally published by His Majesty's Stationery Office, London, 1936.

This premium content was digitised by double rekeying. All rights reserved.

'Close Rolls, March 1262', in Calendar of Close Rolls, Henry III: Volume 12, 1261-1264, (London, 1936) pp. 29-37. British History Online https://www.british-history.ac.uk/cal-close-rolls/hen3/vol12/pp29-37 [accessed 28 March 2024]

Image
Image
Image
Image
Image
Image
Image
Image
Image

Close Rolls, March 1262

De quercubus datis.—Mandatum est custodi foreste de Windes' quod in predicta forest a faciat habere Nicholao persone ecclesie de Cluywar, clerico regine, quatuor quercus de dono regis. Teste rege apud Windes' primo die Marcii.

De plantis infra murum Turris London' et Westmon'.— Rex Edwardo de Westmonasterio salutem. Mandamus vobis quod plantas pirorum de Caylowel' et aliorum emi faciatis London' et eas in placea illa quam extra Turrim nostram London' infra murum ejusdem civitatis nuper includi fecimus plantari faciatis. Et in parvo herbario nostro incluso quod est apud Westmonasterium juxta appenticium plumbatum inter cameram nostram et ecclesiam Westmonasterii sex plantas pirorum de Cailhou vel amplius, scilicet ad quot locum illum sufficere videritis, similiter plantari faciatis. Et, cum sciverimus etc. nos breve nostrum de Liberate etc. Teste ut supra.

De roboribus datis.—Rex Aymoni Thurbert, custodi foreste sue de Wynd', salutem. Precipimus tibi quod in predicta foresta nostra facias habere dilecto et fideli nostro Roberto Walerand' quatuor robora ad focum suum de dono regis. Teste rege apud Wynd' iiij. die Marcii.

Pro Johanne de Britannia.—Rex Johanni de Britannia salutem. Sciatis quod in partem solucionis duorum milium marcarum in quibus ei rex tenetur assignavit jam ei custodiam terrarum quas Thomas Gresl' nuper defunctus de rege tenuit in baroniam, quatenus scilicet valor terrarum illarum racionabiliter se extendere poterit, cujus certitudinem, cum terras illas rex extendi fecerit, sibi absque (sic) scire faciet. Teste rege apud (sic) iij. die Marcii.

De plantis infra murum Turris et Westm'.—Cum rex nuper mandaverit Edwardo de Westmonasterio quod in placea illa, quam juxta Turrim regis Lond' infra murum ejusdem civitatis regis nuper includi fecit, plantas pirorum de Cailhou et aliorum faceret plantari, mandatum est Ricardo de Tillebir', constabulario Turris regis London', quod nisi hoc fecerit ipse sine dilacione id fieri faciat. Teste ut supra.
Et custum etc. rex sibi faciet allocari.

Pro Ricardo de Herliston'.—Rex vicecomiti Norhamt' salutem. Quia per literas patentes magistri Willelmi de Sutwell', officialis venerabilis patris R. Lincolniensis episcopi, testimoniales accepimus quod, cum Ricardus de Herliston' capellanus Lincolniensis diocesis irretitus esset super crimine homicidii et in prisona nostra apud Norhamt' detentus et postmodum a prefato episcopo per privilegium clericale esset requisitus et ei liberatus, idem Ricardus coram prefato officiali canonica purgacione ei secundum morem ecclesie indicta innocenciam suam super dicto crimine canonice et legitime purgavit, (nullo contra ipsum aliquod crimen prosequente. Et ideo cancelled), tibi precipimus quod eidem Ricardo terras et catalla sua in balliva tua que occasione dicte diffamacionis capta sunt in manum nostram sine dilacione restituas. Teste rege apud Windes' v. die Marcii.

Pro magistro Petro Lemovic'.—Mandatum est abbati de Burgo Sancti Petri, thesaurario regis, quod sine dilacione provideri faciat quod Mainettus Spyne vel Reynerius Mandet, mercatores Florentini, habere faciant per aliquos de sociis suis mercatoribus Parisius commorantibus magistro Petro Lemovic', qui nuper adiit partes transmarinas et Parisius moratur pro negociis regis, viginti marcas ad expensas suas. Et hoc nullo modo omittat. Teste ut supra per reginam. (Cancelled.) Vacat. Per breve de Liberate.

De quercubus datis.—Mandatum est Alano la Zuche, justiciario foreste citra Trentam, quod in foresta regis de Pamber' faciat habere Fratribus Predicatoribus Wintonie quinque quercus et in foresta regis de Porcestr' alias quinque quercus aptas ad maeremium de dono regis. Teste rege apud Windes' vj. die Marcii per regem.
Mandatum est Waltero de Burges et Ade filio Pagani, custodibus episcopatus Wintoniensis, quod in bosco predicti episcopatus de la Strode, ubi ad minus dampnum ejusdem bosci fieri poterit, faciant habere Ricardo persone ecclesie de Cumpton' quatuor quercus ad reparacionem ejusdem ecclesie de dono regis. Teste ut supra.

De bremiis capiendis ad opus regis et cariandis.—Mandatum est constabulario castri regis de Marleberg quod in vivariis regis de Marleberg' sine dilacione piscari et quatuor bremas et quatuor grossos lucios capi et bremas illas in pane poni et dictos lucios coqui et in bono galingallo poni faciat. Et eosdem lucios et bremas sic paratos ad regem usque Windes' sub qua festinacione fieri poterit per latorem presentium mittat. Et rex custum quod ad hoc posuerit cum illud sciverit sibi allocari faciet. Teste ut supra.

De quercubus datis.—Mandatum est eidem constabulario quod in foresta de Den' faciat habere Galfrido persone ecclesie de Blechesdon' tres quercus ad reparacionem ejusdem ecclesie de dono regis. Teste ut supra.

Pro Thoma de Mulberton', cive Norwici.—Rex Ricardo de Norwico, Johanni Nade, Willelmo de Dunwic', Alexandro de Refham et Hugoni le Tundur salutem. Cum catalla Gilberti le Waider occasione felonie quam fecit se ipsum submergendo, ut dicitur, nuper capi fecerimus in manum nostram, ac nos per finem quem nobiscum fecistis eadem catalla vobis postea dimiserimus; cumque per inquisicionem quam per vicecomitem nostrum Norff' nuper fieri fecimus jam intellexerimus quod Thomas de Mulberton', civis de Norwico, quondam socius dicti Gilberti, habuit in participacione eorundem catallorum usque ad summam decem et novem marcarum die quo idem Gilbertus se submersit; nolentes quod predictus Thomas occasione infortunii supradicti pecunia sua minus juste defraudetur, vobis mandamus quod de catallis predictis decem et novem marcas eidem Thome habere faciatis; et eas vobis faciemus allocari. Teste me ipso apud Windes' vij. die Marcii.

Pro magistro Thoma de Weseham cirugico regis.—Rex Willelmo de Weilond', escaetori suo citra Trentam salutem. Cum magistro Thome de Weseham cyrugico nostro nuper commiserimus septem libratas quindecim solidatas et tres denaratas et unam obolatam redditus quas Radulphus de Somery filius Rogeri de Somery dudum defunctus de nobis tenuit in capite in Wadinton', Beltesford', Donigton' et Hauteberg' tenendas eidem Thome ad suam sustentacionem in servicio nostro ad voluntatem nostram, ac de predicto redditu tantummodo sint in locis predictis quatuor librate quindecim solidate tres denarate et una obolata redditus et non amplius et residue sexaginta solidate redditus pertinentes ad rem predictam sint in Rependon' ut idem Thomas asserit; nos pro eo quod nostre fuit intencionis ut prefatus Thomas dictas septem libratas, quindecim solidatas, tres denaratas et unam obolatam redditus, in quibuscunque locis essent, integre optineret ut predictum est, vobis mandamus quod, si ita est, tunc de illis sexaginta solidatis redditus in Rependon' eidem Thome plenam seisinam habere faciatis, tenendis una cum predictis quatuor libratis quindecim solidatis tribus denaratis et una obolata redditus sicut predictum est. Teste ut supra.

Mandatum est Ade Gurdon', custodi vivarii regis de Wulvemar', quod in predicto vivario regis faciat habere Johanni Maunsell', thesaurario Ebor', triginta bremas; et quod faciat habere Waltero de Merton' decem bremas, de dono regis. Teste rege apud Wynd' ix. die Marcii. (Cancelled.) Vacat quia eas non habuerunt et aliter inferius.

De braemiis et rochiis datis.—Mandatum est Waltero de Burg' et Ade filio Pagani, custodibus episcopatus Wintoniensis, quod in vivario predicti episcopatus de Taunton' faciant habere Willelmo la Zuche decem matrices bremas vivas et ducentas rochias vivas ad vivarium suum de Newenton' inde instaurandum de dono regis. Teste ut supra.

De kidellis et pucheis per aquam Sabrine comburendis.— Mandatum est Mathie Bezill', constabulario castri Glouc', quod assumpto secum constabulario castri regis de Sancto Briavello personaliter eant per aquam Sabrine in comitatu Glouc' et omnes kidellos et pucheas quas per aquam illam se invenire contigerit tam infra libertates quam extra sine dilacione conburi, et omnes gurgites per eandem aquam amensurari et artari faciant eodem modo quo fieri debet et fieri consuevit. Teste ut supra.

De copulis datis.—Mandatum est Alano la Zuche, justiciario foreste citra Trentam, quod in foresta de Savernak' faciat habere Henrico Huse sex copulas de quercu de dono regis. Teste ut supra.

De peciis datis.—Mandatum est eidem Alano quod omnes pecias que adhuc remanent in foresta regis de Pamber' de maeremio prostrato ibidem et escapeliato ad operaciones nostras de Frigido Mantello faciat habere Reginaldo filio Petri de dono regis. Teste ut supra.

Pro Guidone de Rocheford'.—Cum rex assignaverit Guidoni de Rochef' firmam ville de Kyngiston' ad suam sustentacionem donec rex alibi providerit eidem, mandatum est ballivis de Kingeston' quod ei firmam suam de termino Pasche proximo futuro ad quedam negocia sua inde expedienda sine dilacione liberent. Et firmam illam, vel quantum inde sibi liberaverint, eis allocari faciet. Teste.

[m. 13.]

De vinis reccandis et cariandis.—Mandatum est custodibus vinorum regis apud Wintoniam quod de vinis regis que sunt in custodia sua sine dilacione reccari faciant duo dolia et ea una cum aliis duobus doliis vinorum predictorum liberent ballivis regis Winton' carianda ad regem usque Windes' prout rex eis injunxit. Teste.

Pro Henrico de Brame.—Rex vicecomiti Ebor' salutem. Quia accepimus per recordum, quod per custodes placitorum corone nostre in comitatu tuo et per inquisicionem quam per te ipsum fieri fecimus, quod Henricus de Bram' nuncquam fuit utlagatus in comitatu predicto pro falsacione sigilli nostri sibi imposita, et eciam quod de falsacione illa non est culpabilis, tibi precipimus quod terram ejusdem Henrici in Bram' et Spofford' ea occasione captam in manum nostram, si adhuc sit in manu nostra. ei sine dilacione restituas, nisi alia causa subfuerit quare ei restitui non debeat. Teste rege apud Windes' viij. die Marcii.

De luciis et bremiis datis.—Mandatum est Waltero de Burges, custodi episcopatus Wyntoniensis, quod in vivariis predicti episcopatus de Allerford' et Merewell' faciat habere Willelmo de Valenc' viginti lucios et viginti bremas de dono regis. Teste rege apud Wynd' xiiij. die Marcii.

Pro Imberto Pugeis.—Rex dedit Imberto Pugeis quoddam debitum viginti librarum in quo Ricardus de Muscegros tenebatur Salomoni le Evesk' Judeo per cartam suam que est in thesauraria regis ad scaccarium regis, cujus quidem Judei debita et catalla ad manus nostras devenerunt racione felonie quam idem Salomon fecit pro qua utlagatus fuit a regno nostro. Et mandatum est thesaurario et baronibus de scaccario quod cartam illam extrahi et eidem Imberto liberari faciant. Teste ut supra.

Pro Willelmo de Valenc'.—Rex concessit Willelmo de Valenc' quod centum quater viginti et decem dolia vini que in navi Sancte Crucis de Wincheles' duci facit in Angliam quieta habeat hac vice de prisa regis excepta recta et antiqua prisa regis. Et mandatum est Petro de Gisorc', camerario regis Lond', quod eidem Willelmo quietanciam illam hac vice habere permittat.

De empcionibus garderobe regis acquietandis.—Rex mittit ad instantes nundinas ville Stanford' Ricardum de Ewell' et Hugonem de Turri, emptores garderobe regis, ad empciones regis ibidem faciendas, mandans ballivis Stanford' quod omnes exitus nundinarum predictarum eisdem emptoribus habere faciant ad empciones predictas inde acquietandas. Et, cum rex sciverit quantum eis liberaverint, rex id eis faciet allocari. Teste rege apud Windes' xv. die Marcii.

Mandatum est civibus Linc' quod illas centum libras per quas nuper finem fecerunt cum rege pro quadam carta habenda, et quarum regi unam medietatem solvere tenentur ad festum Pasche proximo futurum et aliam medietatem ad festum Pentecostes proximo sequens, ad eosdem terminos habere faciant mercatoribus quos Ricardus de Ewell' et Hugo de Turri. emptores garderobe regis, eis per litteras suas patentes scire facient ad empciones regis quas per preceptum regis facient in nundinis ville Stanford' inde acquietandas. Et hoc nullatenus omittant. Teste ut supra. (Cancelled.) Vacat quia habent breve de Allocate.

Pro Willelmo de Oseburn' commorante in Turri London'.— Mandatum est vicecomiti Essex' quod de exitibus comitatus tui (sic) faciat habere Willelmo Osbern', commoranti in Turri regis Lond', duas marcas super vadia sua que percipit ad se sustentandum in officio predicto. Et cum rex per rotulos scaccarii sui certitudinem habuerit vadiorum suorum rex dictas duas marcas inter vadia sua tam de tempore predicto quam futuro sibi faciet allocari. Teste ut supra. Per regem et J. Mans'.

De cera capienda ad opus regis.—Quia rex intellexit quod quedam navis cum cera nuper applicuit in villa de Sandwic', mandatum est majori et baronibus de Sandwic' quod quatuor milia cere de navi predicta ad opus regis retineant. Et precium cere predicte regi sine dilacione scire faciant ut rex mercatoribus ejusdem navis inde satisfieri provideat. Teste ut supra.

De quercubus datis.—Mandatum est Ricardo de Munfichet, senescallo foreste sue Essex', quod in predicta foresta extra parcum regis de Havering' faciat habere Fratribus Predicatoribus London' decem quercus ad maeremium de dono regis. Teste rege apud Windes' xx. die Marcii. Per ipsum regem.

Pro Willelmo de Horsinden'.—Cum Willelmus de Horsenden', quondam vicecomes regis Hertford', regi teneatur in pluribus debitis ad scaccarium regis, ac rex teneatur eidem in diversis allocacionibus sibi faciendis ut asserit de tempore quo fuit vicecomes regis predicti comitatus, mandatum est vicecomiti Hertford' (fn. 1) quod demandam quam vicecomes regis Hertford' ei facit de debitis regis predictis per summonicionem scaccarii predicti ponant in respectum usque in quindena Pasche proxime futura ut tunc quod justum fuerit rex sibi fieri faciet in premissis. Teste ut supra.

De quercubus datis.—Mandatum est Alano la Zuche, justiciario foreste citra Trentam, quod in foresta de Wichewode, ubi propinquius et ad minus nocumentum foreste predicte fieri possit, faciat habere abbati de la Bruer' quatuor quercus ad reparacionem domorum suarum de la Bruer' de dono regis. Teste rege apud Windes' xxij. die Marcii.

Pro Johanne de la Lynde.—Rex baronibus suis de scaccario. Sciatis quod perdonavimus dilecto et fideli nostro Johanni de la Lynde xx. solidos ad quos amerciatus fuit coram dilecto et fideli nostro Henrico de Bratton' et sociis suis, justiciariis nostris apud Briggewauter', in assisa nove disseisine quam Willelmus de la Lyddeyate arramiavit coram prefato Henrico per breve nostrum versus predictum Johannem de tenemento in Brumpfeld'. Et ideo vobis mandamus quod ipsum Johannem de prefatis xx. solidis quietum esse faciatis. Teste rege apud Wynd' xxij. die Marcii.

Pro Philippo Marmion et diversis Judeis.—Cum rex nuper perdonaverit Philippo Marmyun triginta et quatuor libras et unam marcam quas debuit Hagino filio magistri Mossei, Judeo London', et mandaverit justiciariis regis ad custodiam Judeorum assignatis quod eundem Philippum de predicto debito quietum esse et cartam per quam dicto Judeo tenebatur in debito predicto ei restitui facerent, et eidem Hagino in talliagio suo vel aliis debitis que regi debuit vel debuerit predictum debitum allocari facerent; rex vult quod predicte triginta et quatuor libre et una marca eidem Hagino et Leoni filio Preciose allocentur in parte ipsos contingente de arentamento Judaismi regis termini Pasche proximo futuri, nisi sibi prius fuerint allocate. Et mandatum est Ricardo de Tillebir', constabulario Turris London', quod eisdem Judeis predictas xxxiiij. libras et unam marcam in parte ipsos contingente de arentamento predicto allocari permittat, nisi sibi prius fuerint allocate sicut predictum est. Teste rege apud Windes' xxiij. die Marcii.

De quercubus datis.—Mandatum est Alano la Zusche justiciario foreste regis citra Trentam quod in foresta regis de Wauberg' faciat habere Ade de Cestreton' tres bonas quercus de dono regis. Teste rege apud Windes' xxiij. die Marcii.

De quercu data.—Mandatum est Aymoni Thurumberd', custodi foreste de Windes', quod in eadem foresta faciat habere Alano de la Tyule, hospiti Willelmi de Chauvent, unam quercum aptam ad maeremium de dono regis. Teste ut supra.

Pro Roberto Walerand'.—Rex vicecomiti Linc' salutem. Cum de assensu et voluntate Mossei de Clare, Judei, nuper cepissemus in manum nostram decem libratas annui redditus in quibus Henricus de Wintonia, conversus, et heredes sui eidem Mosseo et heredibus suis per cartam ejusdem Henrici tenebantur, ac nos postea de assensu et voluntate dicti Mossei predictas decem libratas annui redditus dilecto et fideli nostro Roberto Walerand' concesserimus, percipiendas sibi et heredibus suis de terris predicti Henrici imperpetuum ad terminos in predicta carta sua contentos, cumque idem Henricus nuper in presencia nostra constitutus totam terram suam cum pertinenciis quam habuit de dono Ricardi de Hoton' in Hoton' in comitatu predicto nobis ad opus prefati Roberti assignaverit ad perpetuam liberacionem redditus predicti, nos eandem terram cum pertinenciis prefato Roberto loco dictarum decem librarum annuariarum duximus assignandam habendam et tenendam eidem Roberto et heredibus vel assignatis suis de capitalibus dominis ejusdem feodi imperpetuum faciendo inde servicia debita et consueta. Et ideo tibi precipimus quod eidem Roberto de predicta terra cum pertinenciis plenam seisinam sine dilacione habere facias sicut predictum est et ipsum et ballivos suos in eadem seisina manuteneas, protegas et defendas ita quod diligenciam tuam merito commendare possimus. Teste rege apud Windes' xxiij. die Marcii.

De quercubus datis.—Rex custodi foreste sue de Windes' salutem. Mandamus vobis quod in eadem foresta faciatis habere Waltero de Mawordyn tres quercus aptas ad maeremium ubi ad minus dampnum capi poterunt in foresta predicta, de dono nostro. Teste ut supra.

Pro abbate et conventu de Loco Sancti Edwardi.—Rex custodibus vinorum suorum apud Suthampt' salutem. Quia concessimus per cartam nostram abbati et conventui Loci Sancti Edwardi singulis annis unum dolium vini de prisa nostra apud Suthampt' ad celebracionem divinorum in domo sua, vobis precipimus quod de vinis nostris de dicta prisa que sunt in custodia vestra eisdem abbati et conventui ad hoc unum dolium vini habere faciatis. Mandavimus enim ballivis nostris Suthampt' quod dictum dolium vini de firma ville vestre acquietent. Teste rege apud Wynd' xxiij. die Marcii.

Pro Roberto Waleraund'.—Rex justiciariis suis ad custodiam Judeorum assignatis salutem. Cum de assensu et voluntate Mossei de Clar', Judei, nuper ceperimus in manum nostram feodum decem librarum annuariarum in quo Henricus de Wintonia, conversus, prefato Mosseo per cartam suam tenebatur, quod quidem feodum Roberto Walerand' postea contulimus; cumque prefatus Henricus nuper in presencia nostra constitutus decem libratas terre cum pertinenciis quas habuit in Hoton' ad perpetuam liberacionem feodi predicti nobis assignaverit ad opus Roberti supradicti habendas et tenendas sibi et heredibus vel assignatis suis imperpetuum; vobis mandamus quod de feodis annuis que Judeis nostris in Anglia debentur feodum decem librarum annuarum in recompensacionem dictarum decem libratarum terre eidem Henrico de dono nostro assignari faciatis, dum tamen Judei quos feodum hujusmodi contigerit assignacionem illam duxerint acceptandam. Teste ut supra. Per regem.

De prisonibus recipiendis et custodiendis.—Mandatum est vicecomiti Rotel' quod Willelmum Chapun et Willelmum de Leycestresir', quos Robertus de Veteri Ponte infra libertatem suam de Isendene capi fecit pro latrocinio cum quo deprehensi fuerunt et quorum alter alterum appellat de latrocinio ut dicitur et quos idem Robertus sibi faciet liberari, recipiat et eos salvo custodiri faciat donec rex aliud inde preceperit. Teste ut supra.

De venacione capienda et carianda.—Mandatum est Waltero de Burges, custodi episcopatus Wintoniensis quod admittat Ricardum Fige, venatorem regis, ad capiendum in warenna dicti episcopatus ad opus regis capriolos quot in eadem warenna capere poterit contra festum Pasche proximo futurum. Teste ut supra.
Eodem modo mandatum est custodi foreste de Wichewud' quod admittat Johannem de Som', Johannem le Naper et Thomam le Ferur, venatores regis, ad capiendum in foresta predicta usque ad duodecim tam brokettos quam damas ad opus regis contra instans festum Pasche. Teste ut supra.

Pro capellano de Guldeford'.—Mandatum est vicecomiti Surr' quod habere faciat capellano commoranti in capella Sancti Thome de Guldeford', qui capit (fn. 2) per annum 1. solidos pro stipendiis suis, stipendia sua a festo Sancti Michaelis anno etc. xl. quinto usque ad festum Sancti Michaelis proximo sequens. Et rex ea sibi faciet allocari. Teste ut supra.

[m. 12.]

De ponendo per ballium.—Mauricius filius Willelmi de Cruce Roesie, detentus in prisona regis de Cruceroesie pro morte Willelmi Curtelose unde rettatus est, habet breve vicecomiti Hertford' quod ponatur per ballium. Teste rege apud Westmonasterium xxx. die Marcii.

Pro David' de Offinton'.—Mandatum est Alano la Zuche, justiciario foreste citra Trentam, quod permittat David de Offinton' capere xxti quercus in bosco suo de Gyngelandry, qui est infra forestam regis Essex', ad reparacionem domorum suarum sine impedimento vel occasione cheminagii. Teste ut supra.

Footnotes

  • 1. apparently error for baronibus de scaccario.
  • 2. MS. 'caperit.'