Close Rolls, August 1264

Close Rolls, August 1264

Rex vicecomiti Essex' et custodi pacis in eodem comitatu salutem. Cum nuper mandaverimus per totum regnum nostrum quod milites et libere tenentes, qui ad hoc sufficiunt, viriliter et potenter se preparent ad defensionem contra adventum alienigenarum in regnum nostrum, ac vobis preceperimus quod de qualibet villata octo, sex vel quatuor homines venire feceritis ad nos Lond' exinde nobiscum profecturos contra alienigenas predictos; ita quod hominibus illis de communi de expensis suis quadraginta dierum provideretur; vos pretextu mandati illius personas ecclesiasticas ad contribuendum cum villatis predictis et quasdam ad homines armatos inveniendos distringitis ut accepimus. Et quia non fuit nostre intencionis quod persone ecclesiastice racione decimarum seu obvencionum suarum, exceptis terris et tenementis laicalibus que habent, ad hujusmodi contribucionem vel armatorum invencionem distringerentur, presertim cum ab ipsis consilio et assensu prelatorum ac baronum nostrorum competens subsidium occasione predicta habere intendimus; vobis de consilio predictorum baronum precipimus quod districcionem si quam super ecclesiasticas personas dicti comitatus occasione contribucionis antedicte vel armatorum invencione feceritis, ponatis in respectum donec aliud a nobis inde habueritis in mandatis. Teste rege apud Sanctum Paulum Lond' vij. die Augusti.

Rex majori et vicecomitibus London' salutem. Cum nonnulli, occasione turbacionis nuper habite in regno nostro, decimas, fructus et alia bona ecclesiastica devastent, distrahant et consumant, ecclesias et possessiones earundem occupando in subversione ecclesiastice libertatis et quominus prelati earundem ea que ad officium suum pertinent excercere valeant in ecclesiis antedictis; nos honori et indempnitati ecclesiastice libertatis providere volentes, ut tenemur, ad requisicionem venerabilis patris H. Londoniensis episcopi vobis de consilio baronum nostrorum precipimus firmiter injungentes quod omnem vim laicam et eciam armatam que se tenet in prebenda dilecti clerici nostri Walteri de Merton' de Finsbyr', seu in possessionibus ejusdem, ad devastandum, distrahendum, consumendum, seu occupandum bona et possessiones ejusdem, sine dilacione facias amoveri; non permittentes prefatum episcopum ab aliquibus impediri quominus ea que ad officium suum speciale pertinent exercere valeant (sic) in eadem. Teste rege apud Sanctum Paulum Lond' ix. die Augusti. Per ipsum regem, Londoniensi, Wigorniensi, Lincolniensi, Sarrisburiensi, Wyntoniensi, Exoniensi, Cicestrensi et aliis episcopis presentibus et hoc postulantibus. Item presentibus H. le Despenser justiciario, Radulpho de Cameys, Ada de Novo Mercato, Egidio de Argentem'.

Rex archiepiscopo Eboracensi Anglie primati salutem. Cum per prelatos et magnates qui sunt de consilio nostro nobiscum existentes provisum sit et unanimiter concessum quod clerici nostri nobiscum personaliter proficiscentes versus mare contra hostilem adventum alienigenarum in regnum nostrum quieti sint a prestacione decime beneficiorum ecclesiasticorum in regno nostro per nos et prelatos necnon et magnates ejusdem regni nuper provise; vobis de consilio dictorum prelatorum mandamus quatinus dilectum et fidelem clericum nostrum Johannem de Kirkeby, qui non sine magnis laboribus et expensis nobiscum versus mare profectus est, a prestacione decime predicte in diocesi vestra quietum esse permittatis. Et, si quid ea de causa ab ipso capi feceritis, id sine dilacione restitui faciatis eidem. Teste rege apud Cantuariam xxx. die Augusti. Per consilium.
Consimiles litteras habent Adam de Cestreton et Robertus Fulconis directas episcopo Norwicensi.