Close Rolls, January 1262

Close Rolls, January 1262

1262.

Domino pape rex Anglie cum reverencia et honore. Cum ecclesia Romana veluti pia mater devotis filiis et nobis pre ceteris sui gracia in nostris et regni nostri negociis materne pietatis viscera clementer aperiens multa beneficia ad nostri conservacionem honoris jugiter exhibuerit et jam pro quibusdam urgentibus negociis nos et statum nostrum contingentibus opus habeamus apostolice sedis graciam implorare, nos, de consueta dicte sedis benignitate confisi, ad ejus suffragia recurrimus confidenter rogantes et precibus postulantes intentis quatinus, cum tempore felicis recordacionis domini A. predecessoris vestri apostolice sedis literas optinuerimus super reformacione status nostri et absolucione juramenti pro observandis quibusdam ordinacionibus, colligacionibus et statutis prestiti, que in diminucionem et depressionem potestatis regie cedunt manifeste, cumque impetraciones predicte ante obitum predecessoris vestri memorati ad usum minime pervenire potuissent, easdem, tam in hiis que personam nostram specialiter contingunt quam in illis que dissolucionem colligacionum predictarum et juramenti predicti in aliis respiciunt, jubeatis de vestre benignitatis gracia innovari peticiones in vestro conspectu pro optinenda confirmacione statutorum hujusmodi ac aliorum jam ut dicitur exhibitas, que in depressionem libertatis regie seu eciam juris nostri cedunt lesionem, ad exaudicionem si placet nequaquam admittentes. Rogamus insuper ut dilectos nobis magistrum Johannem de Hemmigford' et magistrum Rogerum Luvel, clericos ac procuratores nostros, una cum negociis nostris habere velit vestra sanctitas propensius commendatos. Et, cum nuper dum nostrum sigillum in potestate foret aliena quamplures alii constituti fuerint procuratores nomine nostro quod non approbamus, ipsorum potestatem omnino revocamus presertim cum ipsi ea magis que nobis obesse possent quam prodesse agere moliantur. Teste rege apud Westmonasterium primo die Januarii.

Rex venerabili in Christo patri Ottobono Sancti Adriani diacono cardinali salutem et sincere dileccionis affectum. Cum ecclesia Romana veluti pia mater devotis filiis et nobis pre ceteris sui gracia in nostris et regni nostri negociis materne pietatis viscera clementer aperiens multa beneficia ad nostri conservacionem honoris jugiter exhibuerit, et jam pro quibusdam urgentibus negociis nos et statum nostrum contingentibus opus habeamus apostolice sedis graciam implorare, nos de vestra dileccionis prerogativa confisi ad vos recurrimus confidenter rogantes et precibus postulantes intentis quatinus cum tempore felicis recordacionis domini A. quondam summi pontificis apostolice sedis literas optinuerimus super reformacione status nostri et absolucione juramenti pro observandis quibusdam ordinacionibus, colligacionibus et statutis prestiti, que in diminucionem et depressionem potestatis regie cedunt manifeste, cumque impetraciones predicte ante obitum predicti domini A. ad usum minime pervenire potuissent, easdem, tam in hiis que personam nostram specialiter contingunt quam in illis que dissolucionem colligacionum predictarum et juramenti predicti in aliis respiciunt, procuretis efficaciter a summo pontifice solito (sic) vestre benignitatis gracia innovari procurantes eciam si placet ne peticiones in conspectu ejusdem summi pontificis pro optinenda confirmacione statutorum hujusmodi ac aliorum jam ut dicitur exhibitas, que in depressionem libertatis regie seu eciam juris nostri cedunt lesionem, ad exaudicionem admittantur. Rogamus insuper ut dilectos nobis magistros Johannem de Hemingford' et Rogerum Luvel, clericos ac procuratores nostros, una cum nostris negociis habere velitis specialiter commendatos. Teste ut supra.
Eodem modo scribitur singulis cardinalibus per se.

Rogerus filius Reginaldi venit etc. die Martis proxima ante festum Sancti Hillarii et petiit terram suam et Thome, Walteri et Willelmi fratrum suorum in Shorham sibi et eis replegiari, que capta etc. propter defaltam etc. versus Aliciam filiam Ricardi de London', ut dicitur.

[m. 16d.]

Rex Lewelino filio Griffini salutem. Super eo quod per vestras litteras nos rogastis de certo die vobis assignando, quo possetis sollempnes nuncios ad nos mittere pro consummacione negocii pacis inter nos et vos prolocute, scire vos volumus quod sine Edwardo filio nostro primogenito, cui terras quas in partibus vestris habebamus dudum contulimus sicut nostis, negocium illud fieri non posset nec deceret, verum, licet idem filius noster ad nos venisse debuisset in Anglia in hoc festo Natalis Domini jam preterito sicut nobis significavit, ipse tamen suis negociis in Vasconia, que jam sicut intelleximus laudabiliter expedivit, prepeditus ad nos nondum est reversus, verumptamen ipsius adventum de die in diem expectamus, et, quia nollemus sicut nec deceret aliquam pacem inter nos et vos sine predicto filio nostro fieri per quod aliqua causa contencionis seu male voluntatis inter ipsum et vos relinqueretur, vobis significamus quod, quamcitius idem filius noster venerit seu de adventu suo plenam certitudinem habuerimus, hoc vobis constare faciemus ut sollempnes nuncios ad nos mittere possitis pro felici expedicione negocii supradicti, scituri pro certo quod promptam habemus voluntatem pacem ineundi vobiscum et eo libentius quod, cum nuper de communi turbacione regni nostri suspicio haberetur, laudabiliter vos gessistis erga nos ac insuper sollicitastis nos de pace nobiscum ineunda, quamquam essetis in contrarium ut audivimus excitati, super quo vos habemus specialius commendatos. Teste rege apud Westmonasterium viij^o. die Januarii.

Isti habent quietanciam ad placita foreste in comitatu Salop'.
Prior de Wenlok'.
Philippus Marmiun.

Isti habent quietanciam ad placita foreste in comitatu Staff'.
Egidius de Erdinton'.

Isti habent quietanciam communis summonicionis in comitatu Bukingham'.
Abbas de Eynesham.
Abbas de Westmonasterio.
Prior de Bermundissey.
Ricardus Cosyn.
Willelmus Fresefel.
Johannes de Grey.
Nicholaus de Molis.
Robertus de Mariscis decanus Lincolniensis.
Willelmus de Munchenesy.
H. de Ver comes Oxon'.
Ebulo de Montibus.
Jordanus de Sancto Licio.

Rex justiciariis suis de Banco salutem. Sciatis quod Simon de Stanham venit coram nobis apud Westmonasterium die Mercurii proxima post festum Sancti Hillarii et petiit terram suam et Alicie uxoris ejus et Margerie sororis ipsius Alicie sibi et predictis Alicie et Margerie replegiari, que capta est in manum etc. propter defaltam quam iidem Simon, Alicia et Margeria fecerunt coram vobis versus Galienam de Wolkenested' ut dicitur. Et hoc vobis significo. Teste.

Mandatum est magistro et fratribus hospitalis de Ospring' quod Gigoravum de Bekonesfeud', latorem presentium, quondam servientem regine regis, admittant in suis necessariis exhibendum quoad vixerit in hospitali predicto dum tamen bene se gesserit et honeste fuerit conversacionis. Teste.

Rex vicecomiti Oxon' salutem. Quia non habemus escaetorem in comitatu predicto, tibi precipimus quod in presencia Willelmi de Weilond', escaetoris nostri citra Trentam, de legalioribus et discretioribus militibus ejusdem comitatus eligi facias unum escaetorem qui prestito sacramento in pleno comitatu illo et in presencia ejusdem Willelmi extunc faciat et conservet ea que ad officium illud in comitatu illo pertinent. Et talem ad hoc eligi facias qui melius sciat et velit ad hoc intendere, et nomen ejus nobis scire facias. Teste rege apud Westmonasterium xviij. die Januarii.
Eodem modo mandatum est vicecomitibus Lanc' Warr' Suthamt' Glouc' Norhamt' Essex'.

[m. 15d.]

Rex justiciariis proximo itineraturis ad placita foreste in comitatu Wigorn' salutem. Cum S. Norwicensis episcopus et homines sui subscripti, videlicet, Willelmus de Wonecot', Thomas de Caunvill', Robertus de Wonecote, Jacobus filius Melkalli, Adam de Elmbrig', Willelmus le Megre, Adam de Redmarl', Johannes le Despenser, Simon de Belton', Ricardus Gobion, Walterus de Lodinton', Willelmus de Caunvill', Henricus de Parco, Willelmus filius Willelmi, Alexander de Besceford', Thomas de Lye, Walterus de Besceford', Rogerus de Piwelisdon', Ricardus de Pilardeton, Robertus Clerbaud', Reginaldus Deubeny, Gervasius de Wauton', Gervasius le Ku, Hamo le Messager, Gilbertus le Venur et Thomas Lonser, tam ante consecracionem predicti episcopi quam post, ceperint in foresta de Fecham viginti feras sine waranto, nos eidem episcopo graciam facere volentes perdonavimus ei et hominibus suis predictis transgressionem capcionis ferarum predictarum. Et ideo vobis mandamus quod ipsum episcopum et homines suos inde quietos esse faciatis. Teste.

Omnibus Christi fidelibus presens scriptum visuris vel audituris W. miseracione divina abbas Sancti Johannis Colecestr' salutem. Noverit universitas vestra nos ad instanciam et peticionem domini H. Dei gracia illustris regis Anglie ac A. Dei gracia ejusdem regine pro nobis et conventu nostro concessisse Henrico Prat regie elemosinarie servienti unam liberacionem in victu et vestitu, qualem percipit unus de liberis servientibus nostris abbacie nostre, quamdiu vixerit in domo nostra percipiendam. Et ut hec nostra concessio stabilis perseveret hiis literis patentibus sigillum nostrum apposuimus. Datum apud Colecestr' die Sancti Hillarii anno regni regis H. filii regis J. xlvj.

Prior de Kerseye venit in cancellariam regis die Mercurii in vigilia Purificacionis Beate Marie et recognovit se debere Ricardo de Corner' quinquaginta marcas, solvendas ei in festo Sancti Johannis Baptiste proximo futuro viginti et quinque marcas et in festo Nativitatis Beate Marie proximo sequenti alias xxv^que. marcas. Et, nisi fecerit, concessit idem prior quod pecunia predicta levetur de terris et catallis predicti prioratus in comitatu Suff'.

Willelmus de Brademer' recognovit se debere Willelmo de Rading' duas marcas, solvendas ei Dominica proxima post Pascha proximo futurum. Et, nisi fecerit, concessit quod dicta pecunia levetur de terris et catallis suis in comitatu Surr'. Postea, quia prefatus Willelmus de Rading' recognovit se debere Rogero de Danecastr' xx. solidos, idem Willelmus de Brademer' recognovit se de predictis duabus marcis reddere eidem Rogero pro prefato Willelmo viginti solidos Dominica predicta. Et, nisi fecerit, concessit etc. ut supra.