Close Rolls, September 1240

Calendar of Close Rolls, Henry III: Volume 4, 1237-1242. Originally published by His Majesty's Stationery Office, London, 1911.

This premium content was digitised by double rekeying. All rights reserved.

'Close Rolls, September 1240', in Calendar of Close Rolls, Henry III: Volume 4, 1237-1242, (London, 1911) pp. 241-243. British History Online https://www.british-history.ac.uk/cal-close-rolls/hen3/vol4/pp241-243 [accessed 26 March 2024]

Image
Image
Image

Close Rolls, September 1240

[m. 3d]

Rex M. filio Geroldi, justiciario suo Hybernie, salutem. Mandamus vobis quod duodecim milites qui nuper fecerunt recognitionem magne assise nostre coram justiciariis nostris itinerantibus apud Dublin' inter abbatem Sancti Thome Dublin', petentem, et Nicholaum de la Felde, tenentem, de duabus carucatis terre cum pertinentiis in Kylrethelin, in qua quidem recognitione idem Nicholaus queritur sibi fuisse injuriatum, venire facias coram nobis in proximo adventu nostro ad partes Hybernie ad certificandum nos sine occasione super hiis que a prefatis militibus inquiremus prefatam recognitionem contingentibus. Et summoneatis per bonos summonitores predictum abbatem quod tunc sit coram nobis ad audiendum ea que a predictis militibus inquiremus, taliter vos habentes in executione hujus mandati nostri ne pro defectu vestri remaneat certificatio predicta quam super recognitione predicta inquirere proposuimus. Et habeas ibi summonitores, nomina militum et hoc breve. Teste rege apud Westmonasterium, xviij. die Septembris.

Memorandum quod mandatum est vicecomiti Wigornie quod distringat burgenses Wigornie pro xx. libris regi reddendis de perquisitis mercati ibidem, ita quod rex eos habeat in crastino Sancti Michaelis anno xxiiij., et quod vicecomes predictus tunc sit coram rege auditurus judicium suum de eo quod non habuit dictos denarios in crastino Nativitatis Beate Marie, sicut rex ei precepit.

Eodem modo mandatum est vicecomiti Suhamt' quod distringat Walterum le Flemeng' pro c. libris, et Benedictum Ace pro x. libris, de fine quem fecerunt coram rege apud Merewell', et quod distringat homines Suhamt' quod reddant regi in crastino Sancti Michaelis pro duobus doliis vini de fine facto coram fratre G. et Paulino Peyvre pro quodam judicio relaxando, et distringat Johannem le Flemeng, Henricum Farham, Simonem le Taverner, Willelmum Theobald', Henricum Brian', Hugonem de Porta, Radulfum Dauwe, Walterum de Glouc', Willelmum Reymund, et Michaelem de Ambl', quod tunc sint coram rege ad faciendum finem de misericordiis in quas inciderunt coram iisdem illuc missis, et quod idem vicecomes tunc sit coram rege ostensurus quare primum mandatum suum non est executus.

Mandatum est vicecomiti Hereford' quod, assumptis secum duobus de discretioribus militibus de visnagio Hereford', inquirat si assisa panis et cervisie custodita fuerit in villa Hereford' sicut custodiri debet, et, si invenerit quod non fuerit observata, id sine dilatione faciat emendari, transgressores castigando secundum legem et consuetudinem regni. Teste rege apud Westmonasterium, xvij. die Septembris.

Pro baronibus Quinque Portuum et pro hominibus de Jernem'.—Rex baronibus portus Hasting', salutem. Sciatis quod cum Johannes Page, Johannes Mercator, Andreas Colebraund, Henricus Boydyn, Willelmus Beaufyz, Thomas filius Godefridi, Paulinus de Winchel', Willelmus Alard, et Johannes Alard fuissent nuper in presencia nostra constituti, manceperunt una cum quibusdam aliis de portubus de Rumenal, Heth', Dovr', et Sandwic', quod instantes nundinas de Jernem' hujus anni regni nostri xxiiij. salvo custodient, ita quod si contingat pacem nostram per aliquos de quinque portubus in predictis nundinis perturbari, singuli predictorum qui hoc manuceperunt respondebunt de transgressione eorum qui fuerunt de portu suo proprio et non de alieno. Et ideo vobis mandamus quod singuli vestrum qui ad nundinas predictas accedere proponitis sic caute ibidem vos geratis quod per vos non possit materia dissentionis oriri vel pax nostra debeat in aliquo perturbari, scituri quod si de aliquo vestrum contingat ad nos justam deferri querimoniam pro transgressione in predictis nundinis facienda, non solum ad ipsos qui predictas nundinas custodire manuceperunt set ad vos graviter nos capiemus. Teste rege apud Westmonasterium, xx. die Septembris.

Eodem modo scribitur baronibus Dovr', Sandwic', Heth', Rumenal.

Rex Johanni Extraneo, salutem. Sciatis quod assignavimus vos una cum venerabili patre episcopo de Sancto Asapho et Johanne de Monem' et Waltero de Clifford' ad audiendum contentiones ortas inter G. comitem Mar', ex una parte et Maylgum filium Mailgum ex altera de terris et tenementis hinc inde occupatis et ad inquirendum de rectis divisis inter terram castri de Cardigan' et terram prefati Mailgum, et tam de jure quod prefatus Mar' habet in terris unde contentio orta est quam de jure ipsius Mailgum in forma quam prefato Johanni de Monem' liberari fecimus. Et ideo vobis mandamus quatinus nullatenus omittatis quin, dimisso castro de Muntgumery in salva custodia, prefatis sociis vestris apud Kardigan occurratis a die Sancti Michaelis in unum mensem ad prefatum negocium exequendum. Teste rege apud Westmonasterium, xxij. die Septembris.

Rex vicecomiti Kancie, salutem. Quia xij. legales et discreti homines de hundredis de Calehull', Thenham, et de Bucton', satis sufficiunt ad certificandum nos de recordo judicii quod factum fuit in hundredo E. Cantuariensis archiepiscopi, de Calehull' de iij. hominibus suspensis contra libertatem monachorum Sancte Trinitatis Cantuarie, ut dicunt, una cum militibus qui interfuerunt recordo predicto, tibi precipimus quod plures quam xij. discretos et legales homines una cum predictis militibus cum recordo predicto coram nobis venire non facias ad diem ad hoc prefixum, nec alios de hundredis predictis vexes occasione predicta. Teste rege apud Westmonasterium, xxxj. (sic) die Septembris.

Rex vicecomiti Suff', salutem. Scias quod Johannes de Govel' fecit nos securos per Stephanum de Clamford', Philippum de Cofl' et Johannem de Coff' qui sunt de comitatu Middels', Hugonem de Drimar [et] Rogerum de Scaccario qui sunt de comitatu Oxonie, et Ricardum le Rus qui est de comitatu Sussex', ad standum recto super appello quod Thomas Crawe fecit versus eum in comitatu tuo de pace nostra fracta [. . . . . .] cujus appelli se subtraxit. Et ideo tibi precipimus quod predictum Johannem per predictam securitatem in ballia tua in pace stare permittas usque ad adventum justiciariorum vel donec aliud inde tibi preceperimus. Teste rege ut supra.