Close Rolls, October 1249

Close Rolls, October 1249

Pro N. quondam Dunolmensi episcopo.—Quia per litteras patentes venerabilium patrum W. Eboracensis archiepiscopi F. Londoniensis et W. Bathoniensis et Wellensis episcoporum, rex intellexit evidenter socas de Weleton', de Clif' et de Rikenhal' ad manerium de Haueden, et Herdewic' ad manerium de Stocton', et Shotton' ad manerium de Esinton', tamquam men bra eorundem, pertinere, et eadem maneria cum eisdem men bris et pertinenciis suis per eosdem archiepiscopum et episcopos N. Dunolmensi episcopo in taxacione moderate provisionis ac congrue pro ejus sustentacione assignata fuisse; mandatum est custodi episcopatus Dunolmensis quod eidem episcopo de predictis sokis et menbris sine dilacione plenam seisinam habere faciat, et si quid inde ceperit, id ei reddat plene. Teste rege apud Wind' primo die Octobris.

Pro Simone Potyn.—Mandatum est baronibus de Scaccario quod Simonem Potin, detentum in prisona regis Roffe pro eo quod una cum sociis suis permisit quendam latronem, qui Scaccarium regis fregerat et bisancios regis asportaverat, abire, sine dilacione ab eadem prisona deliberari faciat quietum. Teste ut supra.

Pro W. Sarisburiensi episcopo.—Quia rex cepit per inquisicionem quam fieri fecit, quod Robertus bone memorie quondam Sarisburiensis episcopus obiit seisitus de una carucata terre cum pertinenciis in Bissopeston', et una carucata terre cum pertinenciis in Beydon', tanquam de jure ad ecclesiam suam spectantibus, quas post mortem predicti episcopi contulerat rex Willelmo Chubbe, rex eam reddidit W. Sarisburiensi episcopo, successori dicti Roberti, tamquam jus suum et ecclesie sue; et mandatum est vicecomiti Wyltes' quod eidem episcopo de predicta terra plenam seisinam habere faciat. Teste ut supra.

Pro comite Cornubie.—Cum rex jamdudum concesserit R. comiti Cornubie fines et ammerciamenta de ultimo itinere justiciariorum regis in comitatibus Sumers' et Dors', in partem solucionis debitorum, in quibus rex eidem comiti tenetur, mandatum est baronibus de Scaccario quod sine dilacione summonicionem Scaccarii regis fieri faciant pro finibus et ammerciamentis predictis, ut vicecomes regis eorundem comitatuum fines et ammerciamenta predicta liberari faciat sine dilacione eidem comiti, sicut predictum est. Teste ut supra.

Pro Petro de Ryvall'.—Mandatum est Johanni de Venuz, custodi foreste de Axiholt, quod in eadem foresta faciat habere Petro de Ryvall' vj. robora ad focum suum, de dono regis. Teste ut supra.

Pro Elya de Geytinton'.—Mandatum est vicecomiti Norht' quod sine dilacione significet regi ob quam causam Elyas de Geytinton' qui per ipsum ejectus est de terra sua, ut dicitur. Teste rege apud Wind' iij° die Octobris.

Pro Henrico piscatore.—Mandatum est Johanni filio Nigelli quod Henricum piscatorem, quem atachiari fecit pro venacione, non occasionet vel molestet aut gravet, set ipsum et plegios suos quietos inde esse permittat, quia Ademarus de Lezignan, frater regis, advocavit coram rege se dictam venacionem prefato Henrico dedisse apud Brehull' in vigilia Sancti Laurencii. Teste ut supra.

Pro Petro de Sabaudia de austurco dato.—Mandatum est Roberto de Radinghal' quod aucipitrem regis, quem habet in custodia sua, liberet latori presencium ad opus Petri de Sabaudia, de dono regis. Teste ut supra.

Pro Ademaro de Lezignan'.—Rex pro cc. marcis, per quas Ademarus de Lezignan' finem fecit cum rege, concessit ei custodiam terrarum que fuerunt Thurstani Dispensatoris, habendam et tenendam usque ad legitimam etatem heredis predicti Thurstani. Et mandatum est Henrico de Wengham et coescaetoribus suis in comitatibus Wyltes', Surr', Glouc', Oxonie, Wygornie quod ei de predicta custodia plenam seisinam habere faciant. Teste ut supra.

Pro abbate Cestrie.—Mandatum est Fulconi de Orrebi quod de bonis abbacie Cestrie, cujus custodiam rex ei commisit, nichil omnino amoveat aut amoveri permittat, set ea salvo et ipsam abbaciam custodiatis (sic), sicut consuevit custodiri tempore Rannulfi, quondam comitis Cestrie, quando vacavit et fuit in manu sua. Teste etc. ut supra.

De sale regi annuatim debito.—Rex miratur quam plurimum et movetur quod triginta et duo quarteria salis, que singulis annis de balliva Johannis de Munemuth' mitti debent usque Clarendon, hoc anno non misit, sicut rex ei precepit; et mandatum est ballivo ejusdem Johannis de Munemuth' de Nova Foresta quod, sicut se et dominum suum indempnes velit conservare, illa ibidem venire faciat sine mora. Teste ut supra.

[m. 2.]

Pro Petro Abusun.—Mandatum est Rogero le Taylur quod de garderoba regis faciat habere Petro de Abuzun et magistro suo robas et cappas furratas, de dono regis. Teste rege apud Wind' iiij^to die Octobris.

De prisonibus recipiendis.—Mandatum est vicecomiti Surr' quod omnes prisones, quos Godefridus de Liston' ei liberabit, ab eo recipiat et in prisona regis de Guldeford' salvo custodiat, donec aliud rex inde preceperit. Teste ut supra.

De foresta de Clarendon' agistanda.—Mandatum est Roberto de Stopham, custodi foreste de Clarendon', quod agistari faciat racionabiliter predictam forestam regis de porcis, ita quod porci anulos habeant in naribus, ne possint pasturam effodere bestiarum. Teste rege apud Westmonasterium viij. die Octobris.

Pro magistro et fratribus hospitalis Sancti Petri Eboraci.—Quia rex concessit magistro et fratribus hospitalis Sancti Petri Eboraci quod Galfridus de Cumpton' det eis sexaginta acras more in Lexemer' juxta Esingwald', et tres acras terre cum pertinenciis in Hoppeweyt, quas idem Galfridus habuit de dono regis, reddendo inde per annum ad Scaccarium regis unam marcam, mandatum est baronibus de Scaccario quod ab eisdem magistro et fratribus predictam marcam recipiant ad idem Scaccarium singulis annis, sicut illam prius ab eodem Galfrido recipere consueverunt. Teste ut supra.

Pro priore de Coventr'.—Prior de Coventr' liberavit in garderobam regis P. Chaceporc', custodi ejusdem garderobe, lxiiij. marcas et xij. denarios die Veneris proxima ante festum Sancti Dionisii apud Westmonasterium per preceptum regis [de exitibus prioratus Coventr' dum vacans fuit et in manu regis cancelled], videlicet l. marcas de tallagio quod assideri fecit super tenentes ejusdem prioratus in vacacione ejusdem prioratus, et xiiij. marcas et xij. denarios de exitibus ejusdem de tempore predicto; mandatum est baronibus de Scaccario quod ipsum priorem de predictis lxiiij. marcis et xij. denariis quietum esse faciant. Teste ut supra.
Eodem modo mandatum est Henrico de Wengham et coescaetori suo in comitatu Warr' ut infra. [In margin.]

Pro priore Sancti Petri de Gyppewico.—Rex ea, que ad regem spectabant de prioratu Sancti Petri de Gyppewico tempore quo nuper vacabat, remisit priori ejusdem loci, et mandatum est Henrico de Wengham quod ei inde pacem habere permittat. Teste [unfinished].

Pro Johanne de Frethorn'.—Mandatum est custodibus vinorum regis de Rading' quod de vinis regis que sunt in custodia sua faciant habere Johanni de Frethorn' unum dolium vini, de dono regis.

De ponenda per ballium.—Cecilia de Strafford', capta et detenta in prisona regis Lanc' pro morte Thome de Strafford', unde rettata est, habet litteras regis vicecomiti Lanc' quod ponatur per ballium. Teste ut supra.

Pro priore de Coventr'.—Eodem modo ut supra continetur, mandatum est Henrico de Wengham et coescaetori suo in comitatu Warr' pro priore de Coventr' cum hac adjeccione, quod si quam obligacionem a predicto priore receperint, eidem priori sine dilacione restituant. Teste ut supra.

De ponendo per ballium.—Petrus de Locsted, captus et detentus in prisona regis Linc' pro morte Roberti Crok', unde rettatus est, habet litteras regis vicecomiti Linc' directas quod ponatur per ballium. Teste ut supra.

Pro Waltero Ferebraz.—Rex concessit Waltero Ferebraz quod quandocumque contigerit tallagium assideri in civitate Lond' non tallietur ultra dimidiam marcam sine speciali precepto regis. Et mandatum est maiori et vicecomitibus London' quod predictum Walterum ultra dimidiam marcam non tallient vel talliari permittant. Teste rege apud Westmonasterium, xxviij° die Decembris anno etc. xxxij°.

De prioratu Merton' commisso.—Rex commisit Willelmo de Axemuth' prioratum de Merton', custodiendum quamdiu regi placuerit. Et mandatum est Henrico de Wengham et coescaetori suo in comitatu Surr' quod de predicta custodia in nullo se intromittant. Teste apud Westmonasterium xij. die Octobris.

Pro Galfrido de Baggepuz et Emmecina uxore ejus.—Quia rex accepit per inquisicionem, quam per vicecomitem Notingh' fieri precepit, quod Willelmus de London' tantum tenuit de socagio regis de Mamefeud' quatuor bovatas terre, et custos honoris de Tikehull', occasione illarum quatuor bovatarum terre, cepit in manum regis totam aliam terram, quam idem Willelmus tenuit per servicium militare de Galfrido de Bagepuz et Emmecina uxore ejus, mandatum est predicto custodi quod de omnibus terris et tenementis, que idem Willelmus tenuit de predictis Galfrido et Emmecina, eisdem sine dilacione plenam seisinam habere faciat, et si quid inde ceperit, id eis restitui faciat. Teste ut supra.

Pro Petronilla et Agnete nutricibus Edmundi filii regis et Beatricis sororis ejus.—Rex de ix. marcis et xx. denariis, quos Elena, nutrix regis, percipere consuevit singulis annis per manum vicecomitis Essex' de elemosina regis constituta, concessit Petronille, nutrici Edmundi filii regis, et Clementi Folyot, viro suo, octo marcas et xx. denarios, percipiendos toto tempore vite ipsius Petronille, et unam marcam residuam concessit Agnete, nutrici Beatricis filie regis, et Bartholomeo de Everesl', viro suo, habendam eisdem Petronille et Clementi toto tempore vite ipsius Petronille, et eisdem Agnete et Bartholomeo toto tempore vite eorum, sicut predicta Elena eos percipere consuevit, sicut predictum est. Et mandatum est predicto vicecomiti quod de predictis ix. marcis et xx. denariis predictis Petronille et Clementi, viij. marcas et xx. denarios, et predictis Agnete et Bartholomeo unam marcam residuam singulis annis liberari faciat. Teste rege apud Westmonasterium xiiij. die Octobris.
Rex concessit Agnete, nutrici Beatricis filie regis, et Bartholomeo de Eversl', viro suo, illas ix. marcas et xx. denarios, quos Elena, nutrix nostra, percipere consuevit singulis annis per manum vicecomitis Surr' de elemosina regis constituta, habendos eisdem Agnete et Bartholomeo toto tempore vite eorum, sicut predicta Elena illas percipere consuevit. Et mandatum est predicto vicecomiti quod illas ix. marcas et xx. denarios eisdem Agnete et Bartholomeo singulis annis liberari faciat. Teste ut supra.

De ponendo per ballium.—Alexander Kake, captus et detentus in prisona Cantuariensis archiepiscopi pro morte Ricardi de Capella, unde rettatus est, habet litteras regis vicecomiti Kancie directas quod ponatur per ballium. Teste ut supra.

Pro priore de Shelford.—Mandatum est Isabelle de Everingeham quod in foresta regis de Sirewud' faciat habere priori de Schelford x. quercus ad maremium ad fabricam ecclesie sue, de dono regis. Teste ut supra.

De assensu regis in eleccionem.—Rex electioni facte de fratre Eustachio, canonico de Merton', in priorem ejusdem domus, regium assensum adhibuit et favorem; et mandatum est Willelmo de Axemuth' quod de predicto prioratu et omnibus ad ipsum pertinentibus eidem priori plenam seisinam habere faciat. Teste rege apud Westmonasterium xiiij. die Octobris.

De ponendo per ballium.—Willelmus le Serjant, captus et detentus in prisona regis Roffe pro morte Ricardi de Capella, unde rettatus est, habet breve vicecomiti Kancie quod ponatur in ballium. Teste ut supra.

Memorandum quod die Veneris proxima post festum Sancti Edwardi anno etc. xxxiij° suscepit J. de Lexinton' custodiam sigilli.

Pro executoribus Hugonis de Vivon'.—Quia executores testamenti Hugonis de Vivon' fecerunt regi securitatem per Petrum Chaceporc et Willelmum de Fortibus quod satisfacient regi de debitis, si qua prefatus Hugo regi debebat, mandatum est Henrico de Wengham quod de omnibus bonis que fuerunt prefati defuncti eosdem executores liberam administracionem habere permittat. Teste rege apud Westmonasterium xvj. die Octobris.

Pro comite Cornubie.—Rex concessit Ricardo, comiti Cornubie, fratri suo, in recompensacionem partis debitorum in quibus rex ei tenetur, omnes exitus comitatuum Sumerset' et Dors' de itinere justiciariorum regis ultimo itinerantium in eisdem comitatibus. Et mandatum est vicecomiti predictorum comitatuum quod predictos exitus colligat quamcito poterit, et eos integre predicto fratri regis, vel ejus certo attornato, habere faciat, sicut alias eidem vicecomiti preceptum fuit; et summam predictorum exituum per talliam et per litteras regi fideliter scire faciat. Teste ut supra.

Pro Willelmo le Rus, capellano.—Quia venerabilis pater P. Herefordensis episcopus manucepit habere coram rege Willelmum le Rus, capellanum, quem rex capi precepit ad standum recto, si quis versus eum loqui voluerit, mandatum est vicecomiti Midd' quod prefatum Willelmum liberet episcopo memorato. Teste rege apud Westmonasterium xvij. die Octobris.

Pro Alicia que fuit uxor Roberti Tuschet.—Mandatum est Henrico de Wengham et coescaetori suo in comitatu Salopie quod de omnibus terris et tenementis, que Robertus Tuschet tenuit de rege in capite in comitatu predicto, et de quibus fuit seisitus ut de feodo die quo obiit, Alicie que fuit uxor ipsius Roberti racionabilem dotem faciant habere. Teste ut supra.
Eodem modo mandatum est Fulconi de Orreby, de omnibus terris et tenementis que fuerunt ipsius Roberti in balliva sua. Teste ut supra.

Pro Amicia de Ripariis.—Mandatum est vicecomiti Suht' quod faciat habere Amicie de Ripariis, custodi terrarum que fuerunt Baldewini, quondam comitis Devonie, retorna brevium regis de Insula de Whit, ad faciendum summoniciones et attachiamenta brevium eorundem, salvis regi placitis de eisdem brevibus provenientibus. Teste ut supra.

Mandatum est baronibus de Scaccario quod habere faciant R. Lincolniensi episcopo denarios subscriptos, ad quos homines sui de Lidinton' amerciati fuerunt coram justiciariis regis ultimo itinerantibus in comitatu Roteland' ad placita foreste pro defalta, videlicet, de Willelmo filio Johannis de Lidinton' dimidiam marcam; de Willelmo de Presteley et Ricardo fratre ejus, dimidiam marcam; de Galfrido de Presteley, dimidiam marcam; de Galfrido filio Alexandri de Lidinton' dimidiam marcam; de Willelmo forestario de Lidinton' dimidiam marcam; de Willelmo, clerico de Kaldecot', unam marcam; de Petro fratre ejus xx. solidos. Teste ut supra. [Cancelled] Quia aliter inferius.

Pro Ricardo de Grey.—Quia rex talliari fecit dominica sua per Angliam, mandatum est vicecomiti Kancie quod Ricardo de Grey faciat habere racionabilem tallagium de hominibus suis de eo tenentibus in maneriis de Elleford' et Ho, que aliquando fuerunt dominicum regis. Teste ut supra.

Pro Lincolniensi episcopo et hominibus suis.—Quia rex accepit per inspeccionem rotulorum suorum de Scaccario, et per libertates quas venerabilis pater R. Lincolniensis episcopus habet per cartas predecessorum regis, regum Anglie, et confirmacionem suam, quod predictus episcopus et homines sui quieti esse debent de communi summonicione coram justiciariis itinerantibus ad placita foreste, mandatum est baronibus de Scaccario quod defaltam quam idem episcopus fecit coram justiciariis ultimo itinerantibus ad placita foreste in comitatu Roteland', et similiter demandam quam iidem barones faciunt per summonicionem Scaccarii hominibus ipsius episcopi de Lydinton', videlicet de Willelmo filio Johannis de Lydinton', de dimidia marca; de Willelmo de Presteley et Ricardo fratre ejus, de dimidia marca; de Galfrido de Presteley, de dimidia marca; de Galfrido filio Alexandri de Lydinton', de dimidia marca; de Willelmo forestario de Lydinton', de dimidia marca; de Willelmo, clerico de Caldecot', de una marca; et de Petro fratre ejus, de xx. solidis, penitus relaxent; et tam ipsum episcopum quam predictos homines suos inde quietos esse facient. Teste rege apud Westmonasterium xvij. die Octobris.
Quia rex accepit per testimonium justiciariorum suorum ultimo itinerancium ad omnia placita in comitatu Oxonie quod decem marce de catallis Ade le Bedel, qui se ipsum submersit, et que exiguntur per summonicionem Scaccarii ab episcopo Lincolniensi, devenerunt ad manus Magistri Johannis de Reygate, tunc cancellarii Oxonie, et non ad manus ipsius episcopi; et similiter octo solidi de catallis cujusdam hominis, qui occidit Magistrum Willelmum de Drocheda, devenerunt ad manus magistri Willelmi de Lymes' (Gilberti de Byham cancelled), tunc cancellarii Oxonie, mandatum est baronibus de Scaccario quod predictum episcopum de demanda predictorum catallorum quietum esse faciant, et districcionem fieri faciant super ipsos Johannem et Willelmum (Gilbertum cancelled), ad quos predicta catalla devenerunt. Teste ut supra.

Pro Hugone filio Rannulfi de Sabir'.—Quia Hugo filius Rannulfi de Sabir', quem pro redisseisina rex capi precepit et incarcerari, satis punitus est pro delicto, mandatum est vicecomiti Lanc' quod ipsum Hugonem a carcere deliberet, et averia sua, si qua ceperit hac occasione, ei sine dilacione reddi faciat. Teste ut supra.

Pro Predicatoribus Bristolli.—Mandatum est custodi foreste regis de Dene quod in eadem foresta faciat habere Fratribus Predicatoribus Bristolli sex quercus ad operaciones ecclesie sue (inde faciendas cancelled), de dono regis. Teste rege apud Westmonasterium xvij. die Octobris.

Pro monialibus Strafford'.—Mandatum est (custodi foreste regis de Essex' quod in eadem foresta cancelled) ballivo regis de Havering' quod in forinseco bosco regis de Havering' faciat habere monialibus de Strafford' sex robora ad focum suum, de dono regis, ubi ad minus nocumentum ejusdem bosci (foreste cancelled) et ad majus commodum ipsarum monialium capi poterunt. Teste ut supra.

Mandatum est vicecomitibus London' [unfinished].

De novis vinis capiendis.—Mandatum est Ernaldo Geraudon' quod de novis vinis, que nuper venerunt usque London', de singulis navibus capiat ad opus regis de prisa sua ij. dolia, et ea liberet vicecomitibus London', carianda usque Westmonasterium. Teste ut supra.

De clerico capto deliberando.—Mandatum est vicecomiti Devonie quod Robertum de Porta, clericum, quem captum tenet ut falsarium, liberet R. Exoniensi episcopo ut quod suum fuerit circa ipsum exequatur. Teste rege apud Westmonasterium xx. die Octobris.

De rettatis apud Kemeseye deliberandis et utlagandis.—Mandatum est vicecomiti Wygornie quod omnes illos qui sunt in prisona regis Wigornie, rettatos de morte illorum qui nuper submersi fuerunt et interfecti apud Kemeseye, et inde non sunt culpabiles secundum inquisicionem inde nuper factam apud Wigorniam, et etiam illos, qui se subtraxerunt pro morte predictorum, si ad pacem nostram venire, et se voluerint in prisona nostra ponere, et inde non sint culpabiles, tradat in ballium usque ad proximum adventum justiciariorum ad partes illas; illos autem qui fugerunt pro morte illorum qui ibidem submersi fuerunt et interfecti, interrogari faciat de comitatu in comitatum, et si ad pacem regis redire noluerint, secundum legem et consuetudinem regni utlagari faciat. Teste ut supra.

Pro Waltero de Kirch', Dunolmensi episcopo.—Rex electioni facte de Waltero de Kirkham, quondam decano Eboraci, in episcopum Dunolmensem, regium adhibuit assensum et favorem. Et mandatum est P. Chaceporc et Thome de Newerc, custodibus episcopatus Dunolmensis, quod de predicto episcopatu, et terris, castris et possessionibus ad predictum episcopatum spectantibus, plenam ei seisinam habere faciant. Teste ut supra.
Et habet litteras patentes baronibus, militibus et omnibus aliis de episcopatu predicto, quod ei tamquam domino suo intendentes sint et respondentes. Teste ut supra.

Pro Ebulone de Montibus.—Rex concessit Ebuloni de Montibus totam terram illam cum pertinenciis in Waleton' et Ewell', quam Imbertus de Salinis tenuit ad vitam suam de ballio nostro, habendam et tenendam eidem Ebuloni ad sustentacionem suam quamdiu nobis placuerit, pro x. libratis xvij^cem solidatis et tribus denariatis terre, sicut terra illa extenta fuit; ita tamen quod tantum inde decidat predicto Ebuloni de annuo feodo suo xl. marcarum, quod percipit ad Scaccarium regis. Et mandatum est Henrico de Wengham et coescaetori suo in comitatu Surr' quod de predicta terra plenam ei seisinam habere faciant, sicut predictum est. Teste ut supra.

[Pro] Willelmo le Rus, canonico Herefordensi.—Quia P. Herefordensis episcopus manucepit habere coram rege in curia sua Willelmum le Rus, canonicum Herefordensem, ad mandatum regis, mandatum est vicecomiti Heref' quod eundem Willelmum predicto episcopo liberet, sicut predictum est. Teste rege apud Westmonasterium xxj. die Octobris.

[De] attachiando Willelmum Blundum et fratrem ejus.—Quia rex audivit quod Willelmus Blundus et Willelmus filius ejus latrones sunt et receptatores latronum, mandatum est vicecomiti Cumb' quod predictos Willelmum et Thomam (sic) ponat per vadium et salvos plegios quod sint coram justiciariis regis ad primam assisam, cum in partes illas venerint, ad standum recto. Teste ut supra.

[m. 1.]

[Pro] Stephano de Spineto.—Rex concessit Stephano de Spineto totam terram que fuit Edrici le Butiler in Colton', que est escaeta regis de terris Normannorum, habendam et tenendam eidem Stephano, quamdiu regi placuerit, ad se sustentandum in servicio regis, pro sex libratis vij. solidatis quinque denariatis et una quadrantata terre, sicut terra illa extenta fuit per preceptum regis, ita tamen quod tantum decidat predicto Stephano de annuo feodo suo xx. marcarum quod percipit ad Scaccarium. Et mandatum est vicecomiti Ebor' quod de predicta terra eidem Stephano plenam seisinam habere faciat, sicut predictum est. Teste rege apud Westmonasterium xx. die Octobris.

Pro fratribus hospitalis Sancti Johannis Oxonie.—Rex concessit magistro et fratribus hospitalis Sancti Johannis extra portam orientalem Oxonie quasdam libertates et quietancias per cartam suam, quam rex nuper eis fieri fecit; et mandatum est vicecomiti Warr' quod cartam illam in pleno comitatu legi, et libertates et quietancias in ea contentas eis firmiter per totam ballivam suam observari, faciat. Teste ut supra.

Pro Ademaro de Lezignan'.—Mandatum est Henrico de Wengham et coescaetori suo in comitatu Oxonie quod omnes exitus terrarum que fuerunt Thurstani le Despenser in comitatu predicto perceptos a tempore quo eedem terre fuerunt in custodia regis, exceptis exitibus manerii de Lewelm', quod Lucia que fuit uxor ipsius Thurstani habet in tenancia, cujus exitus ipsa percipere debet, habere faciat Ademaro de Lezignan', fratri regis. Teste rege apud Westmonasterium xxij. die Octobris.

Eodem modo mandatum est Henrico de Wengham et coescaetoribus suis in comitatibus Glouc', Wygornie, Surr', Suhampt' et Linc'. Teste ut supra.

Pro Elya de Echingham.—Mandatum est Henrico de Wengham et coescaetori suo in comitatu Salop' quod fenum et bladum que creverunt hoc anno in terra que fuit Willelmi Burnel, qui utlagatus est pro homicidio, et quam terram rex dedit Elye de Echingham' ad vitam suam, tamquam escaetam regis, eidem Elye integre habere faciant, de dono regis. Teste ut supra.

De damis cariandis.—Mandatum est Ricardo de Muntfichet quod in balliva sua sine dilacione capiat ad opus regis xv. damas, et eas liberet vicecomiti Essex' cariandas quo rex ei injunxit. Teste ut supra.

Rex inspexit cartam suam, quam Johannes de Hauton' habet de maneriis de Hauton', Clavereworth' et Wytinton', per quam rex plene intellexit quod quietus esse debet de omni seculari servicio, servitute et demanda; et mandatum est baronibus de Scaccario quod de tallagio xl. solidorum et xl. denariorum, ad quos homines predicti Johannis in maneriis predictis rex talliari fecit anno etc. xxxiij°, predictos Johannem et homines suos penitus quietos esse faciant. Teste rege apud Westmonasterium xxiij. die Octobris. [Cancelled] Quia aliter fit inferius.

Pro Johanne Maunsel.—Quia rex dedit dilecto et fideli suo Johanni Maunsel, custodiam terrarum et heredum Johannis le Poer, qui de rege tenuit in capite in Hybernia, et Robertus primogenitus et heres predicti Johannis mortuus est, mandatum est justiciario Hybernie quod fratrem predicti Roberti et heredem predicti Johannis, ubicumque inventus fuerit in Hibernia, eidem Johanni, vel certo assignato suo, sine dilacione faciat habere. Teste ut supra.

Pro Johanne de Boreward'.—Rex in partem solucionis lxxvij. solidorum octo denariorum et oboli, qui debentur Johanni de Boreward' in garderoba regis, relaxavit ei quinque marcas, ad quas ammerciatus fuit coram justiciariis regis ultimo itinerantibus in comitatu Wigornie ad omnia placita pro transgressione; et mandatum est baronibus de Scaccario quod ipsum Johannem de predictis quinque marcis quietum esse faciant. Teste ut supra.

Pro monialibus Sancti Ebroldi et hominibus suis.—Quia abbatissa et moniales de ordine Sancti Ebroldi et homines sui quieti sunt per cartas predecessorum regis, regum Anglie, et hujus de sectis comitatuum et hundredorum, ita quod nunquam consueverunt participare cum aliis de villa sua in communibus finibus vel amerciamentis coram justiciariis itinerantibus, mandatum est ballivis regis de Portesmuth' quod ipsam abbatissam et moniales vel homines suos decetero non distringant ad contribuendum vel participandum cum aliis de villa sua in communibus finibus vel amerciamentis factis coram justiciariis qui ultimo itineraverunt in villa sua, aliter quam facere debent et facere consueverunt. Teste ut supra.

De damis capiendis.—Mandatum est custodi parci regis de Geudeford quod permittat Warnerum Luvel et Benedictum Gernet capere decem damas in parco suo de Geudeford ad opus regis. Teste rege apud Westmonasterium xxv. die Octobris.

Pro Willelmo Tuke.—Mandatum est vicecomiti Sumers' quod Willelmo le Tok', qui rettatus est de morte Matillidis, sororis sue, et qui traditus in ballium per preceptum regis, Johanni de Fonte de Assebrig', Willelmo Bunes, Martino Gorewey, Johanni le Draper, Willelmo Cardigan, Jordano de Alkeseye, Waltero Uppedune, Roberto Burgenun, Willelmo Whithune, Petro de Corescumb', Johanni le Oyselur et Ricardo de Raleye, seisinam omnium terrarum suarum habere, et catalla sua, si que habeat in balliva sua, restitui faciat, et ipsum sub ballio predicto usque ad primam assisam, cum justiciarii regis in partes illas venerint, in pace permittat. Teste ut supra.

Pro Johanne de Hauton' et hominibus suis.—Quia rex inspexit cartam suam, quam Johannes de Hauton' habet, de maneriis de Hauton', Clavereworth' et Wytinton', reddendo regi per annum ad Scaccarium suum pro predictis maneriis sex marcas, et faciendo sectam ad comitatum et cornagium pro omni seculari servicio, servitute et demanda, mandatum est baronibus de Scaccario quod de tallagio xl. solidorum et xl. denariorum, ad quos homines predicti Johannis in maneriis predictis rex fecit talliari fecit (sic) anno etc. xxxiij°, predictos Johannem et homines suos penitus quietos esse faciant. Teste ut supra.

Pro executoribus Willelmi de Roffa.—Mandatum est Henrico de Wengham et coescaetoribus suis in comitatibus Hertford' et Essex' et Suff' quod, accepta securitate ab executoribus testamenti Willelmi de Roffa de debitis, si que regi debebat, reddendis, de omnibus bonis que fuerunt ipsius defuncti in eisdem comitatibus eosdem executores liberam permittant habere administracionem, ad execucionem testamenti ipsius Willelmi faciendam. Teste ut supra.

Pro W. Dunolmensi electo.—Mandatum est custodi foreste de Galtris quod in eadem foresta faciat habere W. Dunolmensi electo x. damas ad festum consecracionis sue celebrandum, de dono regis. Teste ut supra.
Mandatum est custodi vivarii regis de Fosse quod in eodem vivario faciat habere W. Dunolmensi electo septem lucios et x. bremias ad festum consecracionis sue celebrandum, de dono regis. Teste ut supra.

Pro Magistro Roberto de Bukingham.—Mandatum est custodibus episcopatus Dunelmensis quod habere faciant Magistro Roberto de Bukingham x. libras, quas debuit recepisse ad Scaccarium Dunolmense ad festum Nativitatis Sancti Johannis Baptiste proximo preteritum de dono Nicholai quondam Dunelmensis episcopi. Teste rege apud Geudeford' xiij. die Septembris.
Et licet idem Magister habuerit litteras regis, tamen remisit regi illas x. libras et quicquid juris habuit ad eas. Teste ut supra.

De galiis regi commissis.—Rex assignavit Willelmum Beaufiz, Henricum Buchard, Bricium le Paumer et Paganum le Paumer ad galias regis, que sunt in custodia Alani Burnel, custodiendas; et mandatum est eis quod galias ipsas recipiant per cirograffum inter ipsos et ipsum factum de armamentis ad easdem galias spectantibus, et salvo custodiant galias illas donec rex aliud inde preceperit. Teste ut supra.

Pro Artaldo de Sancto Romano.—Mandatum est vicecomiti Essex' quod de custodia terrarum que fuerunt Rogeri de Monte Caniso una cum exitibus earundem, qui post mortem Willelmi de Plessetis emerserunt, Artaldo de Sancto Romano, cui rex concessit custodiam predictam plenam seisinam habere faciat. Teste rege apud Westmonasterium xxvj. die Octobris.

Pro Roberto de Munteny.—Mandatum est justiciariis ad custodiam Judeorum assignatis quod per sacramentum proborum et legalium hominum extendi faciant terram Roberti de Munteny in Litlebur', quantum valeat etc., et secundum valorem terre predicte et quantitatem debiti, in quo tenetur Aaron filio Abrahe et Samueli le Blund, Judeis Lond', predicto Roberto racionabilem finem et racionabiles terminos, habere faciat. Teste ut supra.