Close Rolls, June 1251

Close Rolls, June 1251

Mandatum est baronibus de Scaccario quod cartam [libertatem cancelled] quam rex de novo fieri fecit abbati de Loco Sancti Eduuardi legi et inrotulari, et libertates et quietancias in ea contentas decetero teneri et observari faciant. Teste rege apud Wintoniam iiij. die Junii. Per P. de Rivall'.
Eodem modo mandatum est G. de Langel', justiciario foreste.

Mandatum est baronibus de Scaccario quod audito compoto Hugonis Passel', quondam ballivi regis Gillingh', Shaftebur', Suht', et de Nova Foresta et terrarum B. quondam comitis Devonie, quod ei superest allocandum pro se et ministris suis, secundum quod justum fuerit et clarum, ei sine difficultate allocari faciant. Teste rege apud Clarend' vij. die Junii.

Quia rex non permittit W. de Tinehid', vicecomiti Wiltes', a latere suo discedere, mandatum est baronibus de Scaccario quod compotum ipsius vicecomitis audiendum prorogent usque in crastinum Sancti Michaelis. Teste ut supra.
Eodem modo mandatum est justiciariis ad custodiam Judeorum assignatis pro eodem vicecomite. Teste ut supra.

Mandatum est baronibus de Scaccario quod Willelmo filio et heredi Willelmi de Uphavering' certum diem statuant ad reddendum compotum suum de tempore quo idem Willelmus senior fuit ballivus regis de Havering' et custos operacionum regis ibidem, et districcionem, si quam fecerint super ipsum propter hoc, interim relaxent. Teste ut supra.

Wigornia.—Abbas de Evesham' ponit loco suo Godefridum le Messager et Willelmum le Tailur, vel alterum eorum, ad lucrandum etc. in recordo et falso judicio facto in hundredis ipsius abbatis de Fecham' et Slofton' revocato coram rege in quindena Sancti Michaelis.

Rex R. de Thurkelby, salutem. Suggestum est nobis certa quorundem relacione quod cum pridem coram vobis apud Oxoniam capta esset quedam assisa xxiiij. militum de visneto de Landebech' inter Johannem de Elynton' et Elenam de Becch' ad convincendum juratores assise nove disseisine que inter eos summonita fuit et capta per preceptum nostrum coram Henrico de Bathonia et sociis suis, justiciariis nostris ad hoc assignatis apud Novum Mercatum de tenemento in Landebech'; et per preceptum nostrum fuisset judicium predicte assise coram vobis capte coram nobis atterminatum et factum secundum recordum rotulorum vestrorum, ita quod predictus Johannes, tam in assisa predicta xxiiij. militum quam in priori xij. liberorum et legalium hominum, remansit in misericordia nostra per judicia curie nostre, idem Johannes, subprimens totum predictum processum, inpetravit a nobis iterum assisam xxiiij. militum ad reconvincendum juratores assise nove disseisine predicte; et quia non tantum insolitum est set inauditum ut iterum capiatur eadem assisa xxiiij., que prescripto modo capta est prius et alterminata secundum legem et consuetudinem regni nostri, sicut nobis relatum est, vobis mandamus quod predictam assisam capiendam in respectum ponatis, donec per rotulos nostros tam capcionem ejusdem assise quam judicium inde sequens continentes certificemur de facto predicto. Teste rege apud Clarend' ix. die Junii.

Quia rex vult quod cuppa aurea quam emit ab Elia episcopo, Judeo Lond', pro cc. et l. marcis regi remaneat ex dono ipsius Judei, eandem pecuniam rex ab eo restitui faciet; et ipsum et omnes alios Judeos sine dilacione distringi faciet pro tallagio suo regi reddendo festinanter; et rex vult quod nec eidem Elie et Aaron filio Abrahe nec aliis Judeis aliqua fiat allocacio de auro quod dederint seu promiserint pro aliqua gracia a rege optenta vel optinenda de certa summa pecunie regi solvende per annum pro tallagio suo, set respondeant de tallagio suo cum communitate Judeorum Anglie. Teste ut supra.

Mandatum est vicecomiti Suht' quod illas c. marcas per quas Henricus le Macecrer de Winton' finivit cum rege pro transgressione pillor' venire faciat in garderobam regis cum festinacione quam poterit liberandas P. Chacep', custodi ejusdem garderobe. Teste ut supra.

Mandatum est abbati et conventui Sancti Edmundi quod de xl. marcis quas rex eis dederat ad maeremium cariandum de foresta de Englewod', de eisdem denariis emant maeremium ubi melius viderint expedire ad turrim supra chorum ecclesie sue reficiendum. Teste etc.

Suht'.—Thomas Grenlef venit coram rege apud Clarend' die Martis proxima post Trinitatem, et petiit terram suam et terram Michaelis de Drayton' in Drayton' sibi replegiari, que capta fuit in manum regis pro defalta quam fecerunt versus regem in loquela que est coram rege inter ipsum regem et dictos Thomam et Michaelem de tenemento in Drayton', quod est escaeta regis.

Suht'.—Isabella, que fuit uxor Rogeri de Merlay, Henricus de la Wad', et Julia, mater ejus, et Michaelis filius Elwini venerunt coram rege in vigilia Sancte Trinitatis, et petierunt per J. de Basing' terram suam in Drayton' sibi replegiari, que capta fuit in manum regis per defaltam quam fecerunt versus regem et R. de Sandford'.

[m. 11d.]

Memorandum quod prior de Ferlegh' ponit loco suo Henricum de Malo Lacu ad recipiendum cyrographum inter W. de Valencia, fratrem regis, et ipsum de placito terre.
Et idem Willelmus attornavit loco suo Galfridum de Norhampt', clericum, ad predictum cyrographum recipiendum.

Rex justiciariis ad custodiam Judeorum assignatis, salutem. Mandamus vobis quod, si non allocastis Aaron filio Abrahe, Judeo, xxv. marcas auri, et Elie episcopo x. marcas, quas regi dederunt per sic quod ponerentur ad certam summam pecunie solvendam per annum per quatuor annos a festo Sancti Michaelis anno etc. xxxiiij., tunc predictum aurum eisdem Judeis allocari faciatis in primis terminis tallagii sui. Et quia Aaron de Eboraco, Judeus, affirmavit coram nobis quod predictum aurum prefatis Aaron et Elie alia vice per mandatum nostrum, de quo non recolimus, fuit allocatum, vobis districte precipimus quod super hoc nos sine dilacione certificetis, scituri quod dictus Aaron de Eboraco cc. marcas argenti nobis promisit nisi predicta summa auri predictis Judeis per nos prius fuerit allocata in tallagio suo. Teste rege apud Clarendon' xij. die Junii. Per ipsum regem.

Berkes'.—Memorandum quod abbas Glastonie attornavit loco suo Willelmum Huppewel et Johannem atte Wythye, vel alterum ipsorum, in loquela que est coram rege inter ipsum abbatem et Robertum filium Hamonis de quadam convencione inter eos facta de una virgata et quinque acris terre cum pertinenciis in Essebir'.

Rex baronibus suis de Scaccario, salutem. Quia testificatum est coram nobis per H. de Wengh', escaetorem nostrum, quod Godefridus de Escudemor et Radulfus de Baskervill', qui sunt de comitatu Wiltes', post mortem Ricardi de Anesye constituerunt se plegios pro predicto Ricardo coram eodem H., ad reddendum nobis debita in quibus idem Ricardus nobis tenebatur, vobis mandamus quod distringi faciatis predictos Godefridum et Radulfum pro debitis predictis, et Walterum de Avenebur', cui vendidimus custodiam terre et heredis predicti Ricardi, de debitis predictis pacem decetero habere permittatis. Teste etc. Consimiles litteras habuit Mabilla que fuit uxor predicti Ricardi.

Rex R. de Thurkilby et sociis suis, salutem. Bene occurrit tam memorie nostre quam nostrorum consiiiariorum quod tam vobis quam omnibus aliis justiciariis nostris inhibuimus ne de terris que sunt de serjantiis nostris placitum aliquod teneretis, quia omnia hujusmodi placita commisimus dilectis et fidelibus nostris R. Passel', archidiacono Lewensi, et Henrico de Wengham' terminanda, et cum dilectus et fidelis noster Egidius de Erdint' ante predictam inhibicionem per Willelmum de Benetlegh' super quadam serjantia in Wednesfeld' traheretur in placitum coram vobis occasione ipsius inhibicionis prius facte coram vobis, non comparuit ad se defendendum in placito predicto, propter quod adjudicastis ipsum defaltam fecisse, quam minime facere potuit racione memorata; et ideo vobis mandamus quod idem Egidius propter hoc in nullo sit perdens, quia defaltam illam, quam ipsum in hoc fecisse dicitis, warantizamus eidem. Teste rege apud Clarendon' xxiiij. die Junii.

Quia rex non potest ad presens pro negociis suis aliquem specialium suorum dimittere a latere suo, qui cum Rogero de Thurkelby judicio reddendo in attincta quam Thomas de Muleton' prosequitur versus H. de Bath' valeat interesse, mandatum est eidem Rogero quod de die in diem judicium illud proroget usque ad xv. Beati Johannis Baptiste, eundem diem prefigens partibus et juratoribus assise nove disseisine inter eos capte de tenemento in Holebech et Quappel' sub ballio in quo iidem juratores fuerunt antea quod sint tunc coram rege apud Wodest' recordum illius attincte audituri et judicium suum inde recepturi. Et idem R. non omittat quin eo die sit ibidem coram rege cum recordo predicto et aliis aminiculis attinctam illam tangentibus, et habeat ibi hoc breve. Teste ut supra. Per J. de Lexinton'.

Monstravit regi Nicholaus de Cantilupo quod cum teneat quandam partem terrarum que fuerunt Thome Escoteny, qui de rege tenuit in capite, et idem Thomas terras illas distraxerit et pluribus aliis de eisdem terris dimiserit, vicecomes Lincolnie ipsum Nicholaum distringit pro toto relevio et servicio regi debitis de terris predictis tamquam teneret omnes terras que fuerunt ejusdem Thome; et mandatum est eidem vicecomiti quod, si ita est, tunc ipsum N. non distringat nisi tantum pro porcione ipsum contingente de predictis relevio et servicio secundum quantitatem tenementi sui quam habet de terris predictis; reliquos autem tenentes de eisdem terris distringat pro porcione ipsos tangente de eisdem terris. Teste ut supra.

Rex vicecomiti Wiltes, salutem. Quia perambulacio quam fieri precepimus inter J. Mansel et Johannem de Munem', Johannam de Nevill', et Albredam de Boterell' in la Frankemor', in qua iidem Johannes, Johannes, Johanna, et Albreda posuerunt se coram nobis minus rite et insufficienter facta fuit, sicut accepimus, tum quia idem J. Mansel presens ad illam faciendam, sicut debuit, non fuit, nec clamium legitimum quod sibi competebat in ea apposuit, nec apponere potuit, tum quia milites qui fuerunt in ea assumpserunt sibi quosdam rurales ad illam faciendam contra legem et consuetudinem regni nostri; tibi precipimus quod die Martis in crastino Sancti Kenelmi occurras ibidem vicecomiti nostro Suht', cui idem mandavimus, et perambulacionem illam fieri facias, per sacramentum legalium militum, per quos rei veritas melius sciri poterit, tam per milites de comitatu tuo quam per milites de comitatu Suht', qui nulla affinitate partes contingunt vel eisdem sint suspecti; ita quod perambulacio illa fiat per certas metas et divisas secundum formam et tenorem prioris precepti nostri, provisurus quod milites tot et tales ibidem habeas quod perambulacio illa tunc non remaneat infecta pro defectu militum, et partibus scire facias quod ad diem illum intersint perambulacioni illi. Teste ut supra. Postmodo, quia J. Mansell' dicto die interesse non potuit, prorogatus est dies ille usque in crastinum Sancti Jacobi; et mandatum est dictis vicecomitibus.

Rex maiori et civibus Burdegale, salutem. Sciatis quod Robertus filius Henrici tempestate ductus venit usque Portesm' cum navi sua que frettata erat usque Depe per quosdam mercatores vinorum, et ex illa navi capi fecimus prisam nostram; et ideo vobis mandamus quod ipsum vel homines suos ejusdem navis propter hoc non occasionetis nec occasionari permittatis. Teste ut supra.

Abbas de Dora et Johannes de Monem' posuerunt se coram rege in perambulacione facienda inter terram ipsius abbatis de Kingeston' et terram dicti Johannis in Trivel in comitatu Herefordie; et mandatum est eidem vicecomiti quod illam scire faciat justiciariis ad primam assisam.

[m. 10d.]

Mandatum est Eduuardo de Westmonasterio quod die Apostolorum Petri et Pauli atachiari faciat crucefixo apud Westmonasterium xij. obolos de musca, et totidem feretro Sancti Erkenwald' apud Sanctum Paulum, Lond', et in die Translacionis Sancti Thome Martiris, totidem feretro ejusdem sancti apud Cantuariam pro capitaneo nostro. Teste rege apud Clarendon' xxiiij. die Junii.

Mandatum est vicecomiti Salopie quod fieri faciat perambulacionem inter terram abbatis Salopie in Hauekel' et Rocley et terram Willelmi de Gardinis in Hothal', ita etc., et scire faciat [justiciariis ad primam assisam cancelled] regi ubicumque sit a die Sancti Michaelis in unum mensem.

Quia rex vendicat sibi jus in manerio de Dodinton', quod Johannes de Eyncurt tenet, mandatum est vicecomiti Norht' firmiter injungendo quod non permittat ipsum Johannem tenentes de eodem manerio per redempcionem vel alio modo destruere vel inpedire, quominus possint terras suas excolere quousque plenius in curia nostra fuerit discussum de jure regis in manerio predicto, set ipsos tenentes taliter in premissis manuteneat et tueatur, ne pro defectu ejus ampliorem inde clamorem audiat pro quo ad ipsum rex graviter se capere debeat. Teste rege apud Merleberge xxix. die Junii, per consilium H. de Bretton'.

Cum rex assignaverit Willelmum de Landa, Gerardum Salveyn de Pykering', Willelmum Haket et Willelmum de Barton' de Gautris, ad vendendum subboscum regis in omnibus dominicis boscis suis et siccum boscum tam in haiis quam in dominicis boscis regis in comitatu Eboraci, et idem Willelmus de Landa pro quibusdam negociis suis que habet expedienda in curia regis cum ipsis Gerardo, Willelmo et Willelmo ad presens commode interesse non possit provisioni faciende de vendicione predicta, mandatum est predictis Gerardo, Willelmo et Willelmo quod non exspectata presencia ipsius Willelmi de Landa provideant inter se de vendicione illa, prout commodo regis melius viderint expedire, secundum tenorem litterarum regis patencium prius inde eis directarum. Teste rege apud Merleberg' xxx. die Junii. Per ipsum regem.

Mandatum est vicecomiti Eboraci quod non distringat nec distringi permittat Hascuill' de Cleseby ad arma militaria capienda citra proximum futurum festum Pentecostes, quia inde usque ad terminum predictum respectum dedit rex eidem. Teste ut supra. Per R. filium Nicholai.
Eodem modo mandatum est custodi honoris Rychemundie. Teste ut supra. Per R. filium Nicholai.