The Historical Collections of A Citizen of London in the Fifteenth Century. Originally published by Camden Society, London, 1876.
This free content was digitised by double rekeying. All rights reserved.
1403 – 1419
And that yere, the yere of our Lorde Ml cccc iiij, was the batylle of Shrouysbury, that was uppon Mary Mawdelyn Evyn, in the whyche bataylle Syr Harry Percy was sayle, (fn. 1) and Thomas Percy was i-takynne and kept iij dayes aftyr, and thenne he was drawe, hanggyd, quarteryd, and be-heddyd; and the quarters was sende one unto London Brygge. And in the same bataylle was the Prynce shotte thorowe the hedde with an arowe, and the Erle of Stafforde was i-slayne in the kyngys cote armure undyr his baner, and many mo lordys and knyghtes lost there lyvys, and squyers and many a goode yemon. For hit was one of the wyrste bataylys that evyr came to Inglonde, and unkyndyst, for there was the fadyr a-yenst the sone and the sone ayenste the fadyr, and brother and cosyn a-yenste eche othyr.
|William Askam, Mayre of London||Thomas Faukener||Anno v°.|
|John Hynde, Mayre of London||William Lowthe||Anno vj°.|
Ande that yere Syr Thomas the kyngys sone was Amerelle of the See, and he wente unto Flaundrys and brent bothe in Cachante and in Flaundrys, ande londyd at Scluse and gaffe there to a stronge sawte. Alle so he toke carrekys of Jene and brought them unto Wynchylse, and they were brent thorowe mysse governaunce and moche of the goode ther ynne. Alle so the same yere Syr Richard Schroppe, Archebyschoppe of Yorke, and the Lorde Mombray, were be-heddyd at Yorke.
|John Woodecocke, Mayre of London||Wylliam Crowmer||A° vij°.|
Ande that yere alle the werys bytwyne London and Mydway were drawe downe by the conselle of the kynge and of the mayre of London, and of the comyns of the same cytte, for they dyd moche harme in the ryver of Themys, for they dystroyed moche yonge frye, for the pepylle gaffe hit hir hoggys, and soo uncomely devouryd hyt.
|Rychard Wytyngdon, Mayre of London||Nicholaus Wotton||A° viij°.|
|Geffray Booke (fn. 2)|
Ande that yere the Erle of Kent weddyd the Erlys doughter of Mylayne, at Synt Mary Overeys in Sowtheworke, the xiiij day of Juylle. And that yere deyd Syr Robert Knollys, and ys byryd at the Whytte Freers at London.
|Wylliam Stawndon, Mayre of London||Harry Pomfrett||Anno ix°.|
Ande that yere the Erle of Northehumberlond ande the Lorde Bardoffe were take in the Northe countre ande be-heddyd and quarteryd; and the hedde of the erle and the quartyr of the lorde were brought unto Londyn Brygge. And that yere was a grete froste, and that duryd xxv wekys and more. Alle so the same yere the Erle of Kentt was slayne at the castelle of Bryake whythe a stone.
|Drewe Barentyne, Mayre of London||William Norton||A° x°.|
Ande that yere was the grette playe at Skynners Welle in London. Ande that yere there were grete justys in Smethefylde by twyne the Erle of Somersett and the Synyschalle of Henowde, and Syr John Corwayle and Syr Rycharde of Arundelle, and the sone of Syr John Chenye, and othyr Fraynysche men dede the dedys of armys there.
|Richardus Merlowe, Mayre of London||John Lane||A° xj°.|
And that yere ther was an heretyke, that was callyd John of Badby, that be-levyd nought in the Sacrament of the Auter, and he was brought unt[o] Smethefylde for to be brent, and bownde unto a stake; and Syr Harry Percy (fn. 3) of Walys conselyd hym to holde the very ryght beleve of Hooly Chyrche, and he shulde faylle nothyr lacke noo goode. Al so the Chaunceler of Oxynford, on Mayster Corteney, informyd hym in the faythe of Holy Chyrche, and the Pryour of Syn Bartholomewys brought the hooly sacrament with xij torchys and brought hyt before hym. And hyt was askyd howe that he be-levyde. Ande he answeryd and sayde that he wyste welle that hit was hooly brede, and nought Goodys oune blessyde body. And thenne was the tonne putt ovyr hym ande fyre put unto hym; and whenne he felde fyre he cryde marcy. And a-non the prynce commaundyd to take a wey the fyre, and hit was don soo anon. And then the prynce askyd hym yf that he wolde for-sake hys heresy and be-leve on the faythe of alle Hooly Chyrche, and he wolde gyffe hym hys lyffe and goode i-nowe whyle he levyd; but he wolde nought, but contynuyde forthe in hys heresye. And thenne the prynce commaundyd hym up to be brende at onys, and soo he was. And John Gylott, vynter, he made ij wevers to be take, the whyche folowyd the same waye of heresy.
|Versus||Hereticus credat ne (fn. 4) perustus ab orbe recedat;|
|Ne fides (fn. 5) ledat [Satel] (fn. 6) hunc baratro sibi predat.|
|Thomas Knollys, Mayre of London||Thomas Pyke||A° xij°.|
Ande that same yere there com inbassetours to the kynge from the Duke of Burgeyne for to have men sowdyd whithe hym ayenst the Duke of Orlyauns, but the kynge wolde not graunte hym non. And they spake unto the prynce, and he sende thedyr the Erle of Arundelle and Syr John Oldecastelle, Lorde of Cobham, and many mo knygtys and squyers of thys londe.
|Robert Checheley, Mayre of London||John Raynewelle||A° xiij°.|
And that yere, the xij day of October, the yere of oure Lord Ml cccc and xj, ther was in Temys iij flodys in oo day. And that yere the Lorde Thomas, the kyngys sone, was made Duke of Clarence, and that yere there com inbassetours fro the Duke of Orlyaunce unto the kyng for to wage men ayenst the Duke of Burgayne, and [th]e kyng sende thedyr the Duke of Clarence and othyr certayne lordys; and at the feste of Synt Laurence they londyd at Hoggys. And the same yere the kyng let make to be smetyn newe nowblys, but they were of lasse wyght thenne was the olde nobylle by the paysse of an halpeny wyght, soo that a nobylle shuld wey but iiij d. and halfe a peny, and that l. nowblys shulde make a pounde of Troye wyght.
|Wylliam Walderne, Mayre of London||Raffe Lubnaham||A° xiiij°.|
Ande that same yere the kyng dyde at Westemyster, the xx day of Marche, the yere of oure Lorde Ml CCCC and xij; and he ys byryde at Cauntyrbury be-syde the schryne. And that same yere Syr John Olde Castelle was a restyde at Wynsore and sende to the Toure of London for poyntys of heresy that he was accusyd of; and at the Frere Prechourys he was examnyd by fore alle the clargy of thys realme, spyritualle and temporalle and relygyous, and he was sent unto the Toure a-yenne; and sone aftyr he brake owt of the Towre and wentte in to Walys; and aftyr he was take ayen by the Lorde Powes in the tyme of Rychard Merlowe, as ye shalle hyre aftyr.
Walderne, mayor, the same xiiij yere of his (fn. 7) fadyr and the fyrste yere of the sone, ande thys ys rekynde but for oone yere.
Thes ben the namys of Mayrys of London and of the Sherevys of the same for-sayde cytte in the tyme of Kyng Harry the v, that was crownyd the ix day of Aprylle at Westemyster, the yere of oure Lorde MlCCCC xiij. And hyt was apon Passyon Sonday, and that was a fulle wete day of rayne.
|William Walderne, Mayre of London||Raffe Lubnaham||Anno primo.|
Ande that yere the kyng made to be brought the bonys of Kyng Rychard to Westemyster, and they were beryd and put in his owne sepulture, that he let make hym selfe with Quene Anne his wyfe. (fn. 8) [th]is was the laste yere (fn. 8) of raygne of the fadyr, and the fyrste yere of the raygne of the sone, Kyng Harry the v.
|William Crowmer, Mayre of London||John Sutton||Anno ij°.|
Ande that same yere, on the Twelfe the nyght, were a-restyd certayne personys, called Lollers, atte the sygne of the Ax, whithe owte Byschoppe ys gate, the whyche Lollers hadde caste to have made a mommynge at Eltham, and undyr coloure of the mommynge to have dystryte the kyng and Hooly Chyrche. And they hadde ordaynyde to have hadde the fylde be-syde Syn Gylys. But, thonkyd be God Almyghty, owre kyng hadde warnyng thereof, and he come unto London and toke the felde be syde Syn Jonys in Clerkynwelle; and as they come the kyng toke them, and many othyr. And there was a knyght take that was namy[d] Syr Roger of Acton, and he was drawe and hanggyd be syde Syn Gyly, for the kynge let to be made iiij payre of galowys, the whiche that were i-callyd the Lollers galowys. Al so a preste that hyght Syr John Bevyrlay, and a squyer that hyght John Browne of Oldecastellys, they were hanggyd; and many moo were hanggyd and brent, to the nomber of xxxviij personys and moo. And that yere was Tebayne Breste, (fn. 9) a preste, slayne in London by a squyer that was callyd Yownser and hys men; wherefore the same Yownser with iij of his men for-swore the lond. And that yere was the Parlyment at Layceter.
|Thomas Faukener, Mayre of London||John Michell||Anno iij°.|
Ande that same yere was brent in Smethefild John Claydon, schynner, and Rychard Turmyn, baker, for heresye that they were convycte a-pon. Al so the same yere the kyng toke his jornay and wagyd (fn. 10) in to Normandy; and the xv day of Juny the kyng roode thorowe London (fn. 11) whithe sherevys, aldermen, and alle the comeners brought the kynge at Blacke Hethe; and there the mayre ande alle hys aldermen with alle the comyns toke there leve of [th]e kynge, and the kyng bade the mayre goo home and kepe welle hys chambyr in hys absens, and [yave hym] (fn. 12) Crystysse blessyng and hys, and he sayde "Cryste save London." And he roode forthe hys way tylle he cam to Hampton, and there he mosteryd hys mayne. And there were certayne personys that had caste to slayne oure kynge, but God that knewe alle trougthe, he sende warnynge to oure kyng; and hys enmys, the whiche namys folowythe aftyr, Syr Richarde Camborowe, (fn. 13) Erle of Cambryge, Syr Harry, Lorde Scrope, ande Syr Thomas Gray, knyght, with moo of hyr assent, [th]e whiche personys were a-restyde and put in the preson, ande do to dethe. And the xij day of Auguste the kyng saylyd towarde Arflewe, whythe Ml Ml sperys and moo; and the xvj day of the same monythe he londyd at Kytkawys, and the Satyrday he leyde sege unto the towne of Arflewe, and that was the Satyrday nexte aftyr of the Assompsyon of oure Lady; and the sege contynuyd unto the Sonday nexte be fore the feste of Synt Mychelle, on the whiche Sonday the towne of Arflewe was delyveryd uppe to the kyng, that was xxij day of Septembre. But hit ys to wyte that the Tewysday before, that ys to saye the xvj day of the same monythe, at xij of the clocke whytheynne nyght, the lordys that were the capytaynys and governowrys of the towne, that ys to wete the Lorde Gawcorte, (fn. 14) the Lorde Tutvyle, and moo othyr lordys, sende owte herodys of armys unto the Duke of Clarens, prayng hym at the reverens of God that he wolde of hys hyghe lordeschippe that he wolde graunte them lyve and leve for to trete whythe what personys that the kyng wolde a-sygne unto hem; and the kyng at the reverens of God and at hyre requeste he assygnyde the Duke of Exceter, the Lorde Fehewe, and Syr Thomas Erpyngham, to hyre whatt they wolde say and desyre. And they desyryd that the kyng wolde nought warre on them fro that oure of mydnyght unto the Sonday nexte aftyr the feste of Synt Mychell, and but hyt were rescwyd by batayle by that day by the Frenysche kyng or by the Dolfynne, ellys at that daye to delyver the towne unto the kynge, and they to have hyr lyvys and hyr goodys. Ande the kyng sende hem worde yf that they wolde delivery the towne on the morne aftyr, be the oure of mydnyght a bove sayde, with owte any condyscyon, he wolde accepte hyt, and in non othyr wyse he bade hem for to trete. Ande yette the Fraynysche lordys prayde our lordys that they wolde fochesave to be-seche the kynge at the reverens of God and of oure Lady that he wolde graunte them respyte fro the same Twysday at nyght unto the Sonday nexte aftyr tylle one owre aftyr none; and in the mayne tyme the lordys that were captaynys of the towne to come to the kynge whithe xxiiij knyghtys and squyers with hem, of the moste suffycyent men whithe in the towne, and they to be sworne on Goddys body opynly before alle the pepylle. But yf (fn. 15) hit soo were that the Fraynysche kynge or the Dolfynne rescwyde hem by that Sonday by the owre of none, othyr ellys a-non aftyr none, they for to delyvery the towne to the kyng and alle hyr bodys and goodys to don whythe hem what so hem evyr lyste, whythe (fn. 16) any condiscyon. Whythe that the kynge sufferde hem to sende unto Frauns viij personys owte of the towne lettyng hym wytte in what plytte that they stode yn, and the kyng grauntyd hem; and uppe the Wanysday by [th]e mone the lordys come owte, and xxij knyghtys and squyers whythe hem; and thenne come the prosessyon solempny and stately, whithe xxiiij copys of clothe of golde by-fore Goddys body, whythe many worschipfulle lordys, knyhtis, and squyers, and othyr multytude of pepylle from [th]e kyngys tente, solempny and stately as evyr was done suche a thyng be-for tyme. But the kyng was nott here present. And the Franysche lordys made thare hyr othys a-pon the sacrament; and, the othys done, the Fraynysche lordys were brought unto the kyngys tente, and there they dynyd in the kyngys halle, but in alle thys tyme they sawe nought the kynge. And whanne that they hadde etyn they departyd and delyveryd to sartayne for to kepe yn ostage tylle the Sonday on none, as hyt was a cordyment i-made before tyme whenne that they toke hyr othys. And the Sonday at the same owre a-signyd the kyng hadde a tente phyght a-pone a hylle be-fore the towne, and there he sate in his estate, ryally, and alle hys lordys aboute hym. And thenne come the Fraynysche lordys, with lxiiij whythe hem of the moste suffycyentt men that were whythe yn the towne, to the kyngys owne propyr person, and delyveryd uppe the keyes of the towne and hyr boodys and hyr goodys to the kynges grace, whithe owte any condyscyon. And thys was the xxij day of Septembre, the yere of our Lorde Ml cccc xv. And thenne sone aftyr the kynge and hys mayne ostyde from thens xxj dayes thorowe the realme of Fraunce towarde Caleys. And the Fraynysche men hyrde telle of his comyng that way, and they brake the bryggys there that the kyng shulde passe ovyr, and in so moche that (fn. 17) he myght not passe noo way but he moste nedys mete with the Fraynysche oste. And a-pon the Fryday, that ys to saye, the day of Syn Cryspyn and Cryspynyany, alle the ryalle pouer of Fraunce come by-fore oure kynge and hys lytylle blessyd mayne. And thenne they sawe the Dolfynne whythe alle the lordys of France were by-fore oure good kynge enbatellyd in iij batellys the nomber of iij schore Ml men of armys. And that was the fayryste syght of armyde men that evyr any man saye in any place. And the kyng sawe he myght not passe whythe out batayle, and thenne he sayde unto hys lytylle mayne, "Serys and felowys, yendyr maynye wylle lette us of oure waye, and they wylle not come unto us. But nowe lette every man preve hym-selfe a goode man thys day and a-vance hys baner in the beste tyme of the day and yere." Ande the kyng roode ande hys basnet in hys hede, and alle othyr men wente on hyr foote a-passe in hyr hoole araye and (fn. 18) Englysche myle or that they assemblyde. And thorowe Goddys grace the kynge made hys way thoroughe the thyckyste of alle the batayle; and ther was slayne on the kyngys syde the Duke of Yorke, the Erle Southeffolke, and ij knyghtys, and Davy Gam, and of the gentylle men no moo, and of alle maner of Englysche men hyt passyd not xxviij personys. And on the Fraynysche syde was slayne the Duke of Launsonne, the Duke of Barre, the Duke of Braban, ande vij erlys, and the Constabylle of Fraunce, and the Senschalle of Henowde, and the Mayster Alblester, (fn. 19) and many moo lordys, and knygtys and squyers v Ml and moo. And there was take the Duke of Orlyaunce, the Duke of Burbon, the Counte of Rychemounde, and the Counte of Ewe, [th]e Marchalle of Fraunsce, Syr Bursegaunte, and many moo othyr knyghtys and squyers. And whanne thys was done the kyng bode alle nyghte in a vyllage faste be-syde ther that the batelle was done. And on the morowe he toke hys waye unto Calys whythe hys lordys and hys presoners, whythe hys owne mayne. And the xxiij day of November the kyng come unto London whythe alle hys presoners a bove sayd. And there he was ressayvyd worthely and ryally, for the mayre, with alle the aldermen, whythe alle good comyners, roode and fette hym ynne. And whythe a ryalle processyon he was brought ynne; and there was mad, stondyng apone the brygge, Syn Gorge ryally armyd, and at the Crosse in Cheppe was made a castelle, and there yn was moche solempnyte of angelys and virgenys syngyng merely. And soo he roode unttylle that he came to Powlys, and there mette whithe hym xvj byschoppys and abbattys whithe processyon and sensyd hym, and brought hym uppe in to [th]e qwere whythe devoute songe, and there he offerde and the Franysche lordys alle soo. And thenne he rode forthe unto Westemyster; and the mayre and hys bretheryn brought hym there.
|Nicholaus Wotton, Mayre of London||William Cambryge||A° iiij°.|
And in that same yere, onne the morne aftyr Syn Symonnys day and Jude, that the mayre shulde ryde to Westemyster for to take hys othe, come tydyngys to London of the batayle a-bove sayde by the Byschoppe of Worseter, (fn. 20) that tyme beyng Chaunceler, for he come to London erly in the mornynge, and warnyd the mayre. And thenne thorowe London they lette rynge the bellys in every chyrche and song Te Deum; and at Powlys, at ix of the clocke, the tydyngys were oppynly proclaymyd to alle the comeners of [th]e cytte and to alle othyr strangerys. And thenne the Quene, (fn. 21) and alle hyr byschoppys and alle the lordys [th]at were in London that tyme, wentte to Westemyster on hyr fete a prosessyon to Synt Edwarde ys schryne, whythe alle the prestys, and clerkys, and fryers, and alle othyr relygyous men, devoutely syngynge ande saynge the letanye. And whenne they hadde offerde, the mayre com home rydynge merely whythe alle hys aldermen and comeners as they were i-wounte for to doo.
Ande thys yere com the Emperowre of Almayne (fn. 22) in to London be-fore the Feste of Synt Gorge. Ande the feste was deferryde unto hys commynge, and that was done solempny at the castylle of Wyndesore. And at the prosessyon the kynge went a-pone the upper-moste syde of the emperowre, and soo alle the masse tyme he stode a-bove the emperoure. Ande at the mete the kyng sate on the ryght syde of the emperoure, and the Duke of Bedforde sate on the lefte syde, and the Chaunceler of Inglonde and the Byschoppe of Devylyn sate on the left syde, and the Duke of Bryga and a-nothyr duke of the emperours sate on the kyng ys syde; and alle thosse vij satte on oo syde of [th]e table. And the fyrste sotellete of the fyrste cours was howe Oure Lady armyd Syn Gorge and a aungylle doyng on hys sporys. And the secunde sotellete was Syn Gorge rydynge and fyghtyng whythe a dragon whythe hys spere in hys honde. And the iij sotellete was a castelle, and Syn Gorge and the kynges doughter ledyng the lambe in at the castelle gatys. And all thes sotelleteys were servyd be-fore the emperoure and the kyng and noo ferther; ande othyr lordys were servyd with sotelleteys aftyr hyr astate and degre. And that same yere come the Duke of Holand into London, but he was nought at the feste a-fore sayde. And the emperoure lay at Westmyster alle the wyle that he was here for the moste party, and the Duke William of Holand in the byschope ys place of Ely; and sone aftyr Mydsomer the kyng went to Caleys whythe the emperoure, and the duke saylyd home ayenne and mette whythe kyng at Caleys. And the Duke of Burgayne and the Counte of Charlys sone come to Gravelynge; and the kynge sende thedyr the Duke of Glouceter hys brother and the Erle of Marche to abyde there in ostage, wylys that the Duke of Burgayne come to Calys to speke with the kynge; and in the myddys of the ryver the lordys mette togedyr. And the dukys sone of Burgayn ressayvyd oure lordys and led hem in to Fraunce, and the Erle of Warwyke ressayvyd the Duke of Burgayne ande brought hym to Calys, and there they hadde a conselle twyne hem two; and thenne he toke hys leve of the kyng. And the Erle of Warwyke brought hym unto Gravelyng water and in to the same place there as they mette at the fyrste metynge; and there every party toke hyr leve of othyr. And thenne the kynge retornyd ayenne into Inglonde and the emperoure saylyde unto Holande and so passyd forthe in to Constaunce.
Alle so that same yere the Duke of Bedforde and the Erle of Marche, on oure Lady Day the Assumpsyon, they fought whythe viij grete carykys of Jene and whythe l. othyr shyppys, and they toke hem whythe hyr patronys and drownyde a grette hulke of the contre of Flaundrys.
|Harry Barton, Mayre of London||Robert Wedyngton||Anno v°.|
Ande the same yere, on Syn Petrys eve and Poule, the Erle of Huntyngdon whythe o[th]yr certayne lordys faughtyn whithe carykys of Gene, and dyscomfyte hem, and toke iiij of [th]e grettyste of them and hyr patronys. And the amerelle of hem was the Duke of Burbone, and he was take whithe hem whythe alle the tresoure that sholde have wagyd hem for halfe a yere. Al so the same yere the kynge saylyd unto Normandye the second tyme, ande he londyd on Lammas day by-syde Tooke in Normandye. And the same tyme the kyng wanne the towne of Tooke and assaylyd the castelle, the whyche castelle on Syn Lauerens evynne was yolde unto the kynge, and he gave hyt unto hys brother the Duke of Clarens whithe alle the lorschippys dependaunt there too; and thenne the Duke of Clarens roode forthe to Cane whythe othyr lordys whythe hym. And one oure Lady evyn, the Assumpcyon, he mustryd hys men by-fore the towne of Cane; and the xij day of August the kyng layde sege to Cane, and that contynuyd tylle the day of the Natyvyte of oure Lady nexte folowynge; uppon the same day the towne whythe grete sawte was yoldyd and wonne. And thenne the kyng layde sege unto the castelle, and that in shorte tyme was yoldyn unto the kynge; and whylys the kyng boode in Cane, the Duke of Clarens roode to Bayeux and wanne that. And the same yere the kyng wanne Argentyne, bothe the towne and the castelle. And the kyng wanne Alansonne and many moo stronge castellys and townys and stronge abbeyes.
Ande the same yere, a-pon Estyr daye at aftyr none, the Lorde Stronge and Syr John Trusselle, knyght, fylle at debate for hyr wyvys in the chyrche of Syn Donstonys in the Este, evyn at the prechyng tyme. In the same fraye Thomas Pedwardynne, fyschemonger, was slayne as he wolde have lettyde hem of hyr fyghtynge, and many men were i-hurte; and therefore the chyrche was suspendyd. Ande thenne was the Lorde Stronge a-restyde and brought unto the Counter in the Pultrye, and the Sonday nexte aftyr he was cursyde in every chyrche in London, whithe boke, belle, and candelle, in one houre of the day. And aftyr he dyde hys penaunsse opynly thorow London for hys trespas ayenst Hooly Chyrche. And that yere was a dyre yere of whete, for a buschelle was worthe ij s.
|Rycharde Merlowe, Mayre of London||Harry Rede||A° vj°.|
Ande the same yere, scilicet, in anno vto, (fn. 23) the general conselle was endyd, and a unyte made in Hooly Chyrche, and oo pope chosynne at Custaunce on Syn Martyns daye, by comyn assente of alle the generalle counselle, the whyche was callyd Pope Martyn the fyrste. (fn. 24) Alle so the same yere Syr Johnne Oldecastelle was take in the Marche of Walys and brought unto Westemyster in a chare, and there he was juggyde to the dethe; and thys was hys juggement, that he shulde be ladde thorowe London in the same chare unto Towre Hylle, and there to be layde on a hyrdylle and drawe to Syn Gylys galowys, and there to be hanggyd and brent. And so he was hanggyd by a stronge chayne. For there was the Duke of Bedforde, the Duke of Exceter, and alle the lordys of thys londe that were [th]at tyme a-bowte London, tylle that they hadde sene hys juggement.
Ande that same yere the kyng layde sege unto Faleys the fyrste day of Novembre, and that sege contynuyde unto the xx day of Decembre, the yere of grace Mlcccc xvij. Thenne the towne dysendyd for to trete whythe the kynge, and the kyng commyttyd the trety unto Thomas Erle of Saulysbury, and to Harry Lorde Fehewe, and to Syr Johnne Cornewale, and to Syr Wylliam Haryngdon, knyghtes and commyssyoners for hys partye; and as for the party of the towne, Syr Wylliam Molene, (fn. 25) Syr Gylberte Mounstrewys, lorde of Fayete, (fn. 26) capytaynys of men of armys, and of the schotte whythe ynne the towne of Faleys, and whythe [them] (fn. 27) a pon the same trete, the lord of Gamulle; (fn. 28) which (fn. 29) parteys entretid (fn. 30) ande a cordyd uppon the artyculys and poyntmentys aftyr folowyng.
Fryste, that hit ys accordyd that the secunde day of Janyver next folowynge they shulde yelde uppe [th]e towne be-for sayde of Faleys, whythe ynne the houre of terce, into the hondys and power of oure soverayne lorde the kynge, or in to the hondys of hem be hym commyttyde and assygnyde, yf soo be that they be nott rescwyde be batayle of the kynge hyr lorde, or Dolfyn, hys eldyste sone, or by the Constabylle of Fraunce. And on that the kyng [to] (fn. 31) setten or do settynne in the fore sayde towne suche (fn. 32) warde and kepynge as hit schalle lyke hym.
Alle so hit ys accordyd that alle the strongers that benne in the fore sayde towne of Faleys, the whyche before thys tyme hathe ben founde agayne, and in the rystynge of, the kynge in tyme sythe hys fyrste comynge to hys Duche of Normandye, were hyt at Cane, or in any othyr of furtheresser, or that have benn with the kynge, or with any of hys subgettys in hys commaundementys, that alle suche strangerys shulle put hem only in the kyngys grace and mercy of oure soverayne lorde the Kyng of Inglonde.
Alle so hyt ys accordyd that they shalle delyvery and yeldyn uppe (fn. 33) alle the presoners, Englysche or any othyr, holdyng of owre lege lorde the Kyng of Inglonde, the whiche that (fn. 34) have benne presoners be fore (fn. 35) the fyrste daye a fore sayde, ande at the same daye of thys present trete, and [that] (fn. 36) non appechementt ben put up on none of hem by hyr maysterys nowe at that thys tyme [nor in tyme] (fn. 37) to come, be hyt sommaunce (fn. 38) requyrynge or askyng in any maner [matier] (fn. 39) what soo evyr hyt be, but fynallye the for sayde maysterys shalle aquyntyn, renownsyn, and relessyn to hyr presoners hyr troughthys, hyr behestys, and hyre othysse, whyche that [the seid presoners mowen have made to heir maisters in eny maner, and that] (fn. 37) whythe owte fraude or malyngyne.
Alle so hyt ys accordyd that the fore sayde capytaynys shulde delyvery owte of the towne of Faleys in to the hondys of the commyssenaryours of oure soverayne lorde the Kyng of Inglonde, al thoo that were borne in Inglonde, Walys, and Yrlonde, or Gascoyne, whiche be-fore thys tyme have holde whythe the party of Inglonde, and for thys presentt tyme ben in thys sayde towne of Faleys contrarye ayenste the kyng and hys parteyes.
Alle so hyt ys accordyd that non of the captaynys, nor burgessys, nor non othyr of the towne, shalle geve nor suffer for to be gevyn to hem of the castelle of Faleys any strengthe of men, of armys, or of schotte, nor maner of socoure of armyrowrysse or artury, schottys, powder, gonnys, or any othyr comfort durynge the for sayde trete.
Alle so hyt ys accordyd that noo captayne, ne none sowdyer, burgeys, ner comyner, nor non othyr beynge whythe ynne the sayde towne of Faleys, shalle ressayve or suffer to be ressayved or drawyn owte of the castelle the captayne of the same castelle nor non othyr of the same garysonne thereynne beynge at (fn. 40) thys present tretys. (fn. 41) Ande alle soo they shulle nott drawe any (fn. 42) of hem of the castelle undyr the coloure of thys presentt tretye.
Ande uppon thys our soverayne lorde the kynge of specyalle grace hathe grauntyd unto the forsayde captaynys, sowdyers, and othyr of the sayde towne, hyr horse, harneys, and alle hyr othyr goodys what evyr hyt be, owte-take artury, shotte, powders and gonnys, arblastrys, and bawderykys for arblastrys, whyche that shalle abyde stylle in the same towne, and alle wey for to sen that the straungers of whyche the seconde artycule makythe mensyon, nor shalle not emynucyon (fn. 43) the pryvelegys and the benyfytys of thys presentt artyculys.
Alle the for sayde captaynys have sworne a-pon hyr honowre that durynge the for sayde trete that they shalle not makyn nor suffyr to be made any brekyng, wastynge, nor be putt nor done a waye any of suche artyculys, shotte, or any othyr thyng be-fore sayde.
Alle so hit ys accordyd that durynge the fore sayd trete noo maner of poyntment of the wallys of the towne shalle be made, but the wallys shalle be leve stylle lyke as they ben foundyn the fyrste daye of this present trete.
Alle so hyt hys accordyd that noo sowdyer nor stranger in the towne of Faleys shalle not make noo robory nor pylyage on the burgeysys of the towne of Faleys in noo maner, ande yf any suche evylle doers ben founde, that thenne the captaynys of men of armys and of shotte do ther on justyfyynge and execusion, or ellys that alle suche evylle doers shalle forfete hyre benyfys and hyr saffecondyte.
Alle so hyt [is] (fn. 44) accordyd that the sayde captaynys nor non othyr of the same towne shalle nought bere away, nor purlayne, nor suffer to ben i-purlaynyd or doo a-waye, any ornamentys, jewellys, or relyqwys of Hooly Chyrche, be they of the same towne or of any othyr relygyous owte of [th]e towne, that perchaunce were brought unto the towne for dowte of warre or othyr wyse i-brought unto the towne.
Alle so hit ys accordyde that the for sayde captaynys nor non othyr of hyr feleschyppe shalle nought ledyn nor bere, nor suffer for to be borne nor lede, owte of the townye of Faleys, noo maner of goodys undyr the colowre of appyontementt, but oonly hyr owne propyr goode.
Alle so hyt ys accordyd that alle the capitaynys whythe hem of alle hyr company shalle a-voyde the towne of Faleys the secunde day of Janyver abovyn sayde by the sonne goynge downe, but yf that they were rescwyd as hyt ys a-fore sayde. And oure soverayne lorde the Kynge of Inglond of hys specyalle grace hathe grauntyd to alle and to every burgeys of the towne of Faleys, that wylle dwelle and abyde stylle in the fore sayde towne, there to a-byde and dwelle, sykerly and surely and fully, whythe owte any enpechyment uppon hem to putte in body or in goodys, mevabylle or unmevabylle, as herytagys nor possessyons whythe ynne the fore sayde towne, but pessabylly rejoysynne as hyr propyr goodys at thys tyme and in tyme to come, as they myght done before the yelding upe of the same towne; be so alle way that they so wyllynge to dwelle and byde in the same towne be come legys and obedyaunte to oure soverayne lorde the Kyng of Inglonde and hys ayrys.
(fn. 45)Alle so hyt ys accordyd that noo captayne, sowdyer, nor burgeys, nor comyner, nor non othyr whithe ynne the sayde towne of Faleys, shalle nought ressayvynne, nor suffer to ressayvynne, nor drawyn of the castelle of Faleys the captayne ther of, nor non of there garysons, nor non at thys tyme there abydynge [in] (fn. 46) the for sayde chastelle, nor noo maner of goodys to hem longyng undyr colowre and shadowe of goodys of the towne, nothyr undy[r] coloure of thys presente trete.
Alle so hyt ys accordyd that hangyng thys presentte trety and appoyntement noo maner of warre shalle be made by-twyne hem ande the oste of oure soverayne lorde the Kyng of Inglonde and hem of the towne of Faleys. (fn. 47)
Alle so hyt ys accordyd that the forsayde lordys and capytaynys of the towne of Faleys shalle take and delyvery xij of the jentyllyste knyghtys and squyers notablys in ostage, the whiche shalle be delyveryde a yenne at the daye that the forsayde lordys and capytaynys havyng fully hyr poyntys. (fn. 48) And for thys trete and appoyntment welle and trewly [to] (fn. 49) ben holdyn on oure parte, the forsaide Thomas Erle of Salysbury, Harry Lorde Feehewe, John Cornewale and Wylliam Haryngdon, knyghtys, unto thys sedylle (id est a bylle) of poyntmentt have sette to oure selys for the grete (fn. 50) affyrmacyon of trought. Gevynne be-fore the towne of Faleys, the xx day of the monythe of December and the yere a-fore sayde.
The whyche towne in maner and forme as hyt ys be-fore sayde was yoldynne to our soverayne lorde the kynge of Inglonde [th]e seconde daye of Janyver as hyt was before lemytyd, ande the castelle be lefte stylle un-y[o]ldon unto the fyrste daye of Fevyrer; (fn. 51) the whyche castelle was yoldynne the seconde daye of the monythe a-bove sayde, and delyveryd in maner and forme a-fore-sayde, &c.
Ande thenne the Kyng of Inglonde lette parte his oste to prynces thens on dyversse wayes; that ys to saye, on party toke my lorde the Duke of Clarens whythe many fulle worthy lordys whythe hym, and he gate many townys and castellys and stronge abbeys. And the Duke of Glouceter toke a nothyr partye of the oste, and whythe hym the Erle of Marche, the Lorde Graye, the Lorde Clyfforde, Syr Watyr Hongerford, stywarde of the kyngys howse, whythe many othyr knyghtys and squyers; and he gate, or he layde sege to Chyrborowe, xxiiij townys and castellys. And sone aftyr Ester he layde sege to the towne of Chyrborowe, and contynowyde unto Mychelmasse, and thenne the towne and the castelle was yolde unto hym. Ande the iij party of the oste the kynge delyveryde unto the Erle of Warwyke and othyr lordys whythe hym. And they gate many stronge townys and castellys and abbeys.
Ande aftyr Ester the kyng layde sege unto Lovers ande wanne hyt, and aftyr that he wanne Pountte Large. And the kynge layde sege unto the cytte of Reyne, (fn. 52) and that contynuyd tylle the xxiiij (fn. 53) day of Janyver nexte aftyr.
|Wylliam Sevenoke, Mayre of London||John Bryon||A° vij.|
The same John Bryan scheryve unto the ix day of Octobre, and thenne he dyde; and thenne John Pernys was chose sheryve for the yere. And fro that day of Saynt Edwarde contynuyd the sege of Rone unto the xxiiij (fn. 53) day of Janyver, as hyt ys by-fore sayde; at the whiche day they of the cytte desyryd to trete. And the kynge commaundyd the Erle of Warwyke, and the Erle of Salysbury, the Lorde Fehewe, Syr Watyr Hungerforde, Gylbert Houmfryvyle, John Vasquyes de Almada, and Robert (fn. 54) Knyght, to trete whythe hem. And for the party of Roone [these folowyng]: (fn. 55)
Fyrste, hyt ys accordyd that Syr Gy Butler, captayne of the cytte of Roone, with the consentte of the nobylle cyttezyns and of othyr dwellynge and beyng in the same cytte and castelle a-bove sayde, whythe owt fraude or malyngnynge, what tyme aftyr the myddys of the xix day of thys present monythe of Janyver, oure sayde lorde the kynge wylle that the cytte and the castelle too hym or to hys be delyveryd undyr maner and in forme whythe ynne wrytte.
Alle so hyt ys accordyd that the day and the howre (fn. 56) of that of the nobylle cyttezyns and othyr whatt soo evyr they be dwellynge and beynge in the fore sayde cytte and castelle shalle submyt hem in alle thyngys to the grace of oure excellent lorde the kyng.
Alle so hyt ys accordyd that fro thys howre (fn. 57) unto the reale and effectualle [yeldyng] (fn. 58) of the sayde cytte and castelle, none of forsayde noble cyttezyns othyr othyr (fn. 59) being in the same cytte and castelle shalle nought goo owte of the sayde cytte and castelle with owte specyalle lyscens of oure excellente lorde the kynge. (fn. 60)
Alle so hyt ys accordyd that fro thys howre (fn. 57) unto the delyverans of the cytte any (fn. 61) of [th]e parteys shalle abstayne hem from alle goodys (fn. 62) of werre to make a yenste the othyr partys of hem. Alle so hyt ys accordyde that the noble cyttezeyns and othyr beynge in the cytte and castelle shalle paye to oure fore sayde lorde the kynge CCC Ml scwtys of golde, where of alle way ij of hem shalle be worthe an Englysche noble, or in stede of every scwte xxx grete blankys wyte, or xv grotys; of the whyche CCC Ml scwtys that one parte shalle be payde unto oure soverayne lorde the kynge, or unto hys deputys, whythe ynne the cytte of Roone be-fore sayde, the xxij day of thys present mony[th]e of Janyver, and the othyr halfe payde to oure sayde lorde or to hys deputys in the feste of Syn Mathie the Apostylle nexte to come, that shalle be the xxiij (fn. 63) day of Feverer, whythe owte any delay i-hadde, &c. (fn. 64)
Alle so hyt ys accordyde that every subgett of oure sayde lorde the kynge that nowe ben or were presoners to any person in the sayde cytte or castelle, and hyr pleggys, shall be utterly fre as a-yens thes personnys, and the summys that they ar boundyn ynne, at the day of thys present trete and accorde.
Alle so hyt ys accordyde that alle and every soudyer and stranger beynge in the sayde citte and castelle shalle swere on the Evaungelys of God be-fore there departyng, that they shall not bere armys a-gayne oure sayde lorde the kynge or any of hys, unto the fyrste day of Janyver nexte to come, for no maner maundement [th]at to hem of any maner person in contrary may be done or ennyode. (fn. 65)
Alle so hyt ys accordyde that alle and every jewelle, relykys, and othyr goodys longgyng to the abbaye of Synt Kateryne, whythe ynne the same cytte and castelle, beyng alle hoolly, shalle be delyveryd unto hym whom that the Kyng of Inglonde deputyn or ordeyn hem to ressayve aftyr the delyveraunce of the sayd cytte.
Alle so hyt ys accordyde that the fore sayde noble cyttezyns and othyr whythe in the sayde cytte and castelle beyng, shalle make the same cytte and castelle be-fore the sayde xix daye of this present monythe of Janyver suffycyantly and honestely to be made clene, and alle so honestly and diligently that alle the dede bodys newe dede or to ben dede in to that daye of delyveraunce of the cytte honestely and dylygently shalle ben beryd.
Alle soo hyt ys accordyd that the for sayde noble cyttezyns and alle beynge in the sayde citte and castelle anon shalle receyve (fn. 66) and don entre in to the same cytte and castelle alle and everyche beynge in the dychys (fn. 67) of the sayde cytte that for penurye (fn. 68) went owte of the same cytte whom (fn. 69) they shalle be holde to fede unto the xix day of Janyver above sayde, as they wylle answere unto Gode and the kyng; and owte takyn them they shalle not ressayve non othyr personnys in to the same cytte or castelle unto the forsayde day with owte specyalle lyssens of oure moste dowtfulle lorde the Kyng of Inglonde. But yf hit happe any massyngere or harowde of armys of the adversy party of the kynge to come to the partys of [th]e gatys or dychys of the sayde castelle and cytte . . . . . (fn. 70)
Whiche (fn. 71) artyculys and appoyntmentys, as hyt ys before sayde, alle and every chone in maner as hyt ys accordyd, the forsayde captaynys and the noble cyttezyns ande othyr whythe ynne the sayde castelle and citte being, welle and trewly whythe owte any fraude or malygny (fn. 72) to holdyn ande observe and kepe they be-hote, ande thoo two be kepte and fullefyllyd they bynd them soo, but yf yt be falle oure sayde moste doughtefulle lorde the kynge, that God for bede, to ben ovyr come in the batayle to hym i-made by Charlys hys adversarye of Fraunce or the Duke of Burgayne, be-fore the for-sayde [xix] (fn. 73) day of thys present monythe of Janyver; for to sen (fn. 74) alle way that [if] (fn. 73) hyt be falle the forsayde Charlys adversary, othyr the Duke of Burgayne, or any othyr, to come to the sege of oure kynge to remoeve (fn. 75) fro the forsayde cytte, that nothyr the fore sayde captayne nor non of the cyttezyns, sowdyers, othyr othyr (fn. 76) beyng whythe ynne the for sayde cytte or castelle, shalle goo owte, nor noo maner helpe they shalle delyverye nor lene to hem, so azens oure lorde the kynges comyng in nomaner a wyse.
Alle so, that alle thes maner of poynttementysse, covenauntys, and accordys, and every poynte as hyt ys a fore sayde, welle and trewly and unbrokyn to be kepte; and for the more surete of the same covenauntys and accordys, the for sayde captayne, the noble cyttezyns, and othyr above sayde shalle ben takyn in thys tyme anone into the hondys of oure lorde the kynge iiij schore notable plegys, where of xxty shalle be knyghtys and squyers, ande the remenaunte cyttezyns of the same cytte, att hyr owne coste to be sustaynyd. For the party sothely of oure moste doutefulle lorde ande kynge a-fore sayde, gracyusly and benyngly consederynge the meke submyttynge and yeldynge of the sayde citte and castelle above sayde, he hathe grauntyde that alle and everye person of what a-state or degre that he be of condycyon with ynne the sayde castelle [and cite] (fn. 77) beyng, [excepte] (fn. 77) sartayne personys with ynne expressyde, that wylle be-come legys and subgetys to oure lorde the kynge, and fro hensforthe wylle dwelle undyr his obessauns, they shalle have there herytagys and goodys, mevablis and unmevablys, whythe ynne hys duche of Normandy constitute; and whiche that benne afore the day and date of thys present letters by oure fore sayde lorde the kynge to (fn. 78) othyr personys have nought be yovyn and grauntyde, excepte armours artyrlys a-bove sayd; makyng and doyng [for] (fn. 77) hyr herytagys, and for hyr unmevabylle goodys to oure for sayde lorde the kynge, the services (fn. 79) ther-of dewe and consuete, or to swere to whom suche maner of servyce of the graunte of oure lorde the kynge ought too long.
Alle so hyt ys agrauntyd of oure lorde the kynge ys be-halve, that alle the cyttezyns and dwellers of the cytte of Roone that nowe be, or in tyme to come shalle be, [and] (fn. 80) shall have alle ande every franches, lybertes, and prevelegys [th]e whiche of worthely mynde be progenys of oure lorde the kynge, of kyngys of Inglonde, dukys of Normandye, to hem and to hys sayde cytte were grauntyde, in possessyon where [of] (fn. 81) they were the fyrste day that oure lorde the kynge a-fore sayde come by fore the sayde cytte; and alle so of more large grace of hys benyngnyte hathe grauntyde, that the same cyttezyns and dwellers of the citte shalle have alle the lyberteys, and franches, and prevelegys, where they were in pos sessyons on the fore sayde fyrste day of comynge of oure lorde the kynge before the cytte, of the graunte of hys progenytourys of kyngys of Fraunce that were before tyme of Phylyppe Valeys, adversarye of oure lorde [the kyng]. (fn. 81)
[Also it is grauntid and accordid in our lord] the kyngys behalve, that alle the strangers, sowdyers, and othyr in the fore sayde citte and castelle, beynge at thys tyme nought wyllynge to be come leges of oure lorde the kyng, the for-sayde citte so yoldynne as hit ys before sayde, to departe, levynge to oure sayde lorde the kyng all hyr armowrys, hors, artylyrs, and othyr thyngys, harneysse, and goodys, excepte the Normandys that wylle nought be lyges of oure lorde the kynge, [th]at thoo alle shalle a-byde presoners of oure lorde the kyng.
Alle so hyt ys grauntyd in oure lorde the kynges behalve, that the werre and alle so schrewde speche that duryng the sege the folke and pepylle nemnyd, of what condycyon that they ben, ayens hys ryalle soveraynyte, or whythe defame lyppys have spoke, oure moste soverayne lorde the kyng, of strenyger the day of parte (fn. 82) mekely shalle be forgevynne, owte take the personys that above in specyalle ben exceptyd. (fn. 83)
Alle so hyt ys accordyd in oure lorde the kyngys be halve, that the for sayde soudyers and strongers be-fore thys presentt trete and accorde, wyllyng for to departynne, oure lorde the kyng shalle ordaynne and make a sykyr and saffe condyte in form consuete.
And so the fore sayde cytte was yoldyd to oure soverayne lord the kynge uppon Synt Wolstonys day. (fn. 84) And aftyr that he gatte many townys and castellys, as hyt shalle aftyr thys be wretyn alle the processe.
|Richarde Wytyngdon, Mayre of London||Robert Whytyngham||A° viij°.|