The Historical Collections of a Citizen of London in the Fifteenth Century. Originally published by Camden Society, London, 1876.
This free content was digitised by double rekeying. All rights reserved.
1461 – 1469
As for the sege of the Towre, hyt ys com (fn. 1) and opyn i-knowe, I passe ovyr. But sone aftyr the ende of the sege the Lorde Schalys, that notabylle warryoure, was slayne at Synt Mary Overeyes with water men, and laye there dyspoyly nakyd as a worme. But the lordys were fulle sory of hys dethe.
Alle so Edwarde Erle of Marche, the Duke of Yorke ys sone and heyre, hadde a gre jornaye at Mortymer ys Crosse in Walys the secunde day of Februar nexte soo folowynge, and there he put to flyght the Erle of Penbroke, the Erle of Wylteschyre. And there he toke and slowe of knyghtys and squyers, and of the, (fn. 2) to the nomber of iij Ml., &c.
Ande in that jornay was Owyn Tetyr i-take and brought unto Herforde este, (fn. 3) an he was be heddyde at the market place, and hys hedde sette a-pone the hygheyste gryce of the market crosse, and a madde woman kembyd hys here and wysche a way the blode of hys face, and she gate candellys and sette a-boute hym brennynge, moo then a C. Thys Owyne Tytyr was fadyr unto the Erle of Penbroke, and hadde weddyd Quene Kateryn, Kyng Harry the VI. ys modyr, wenyng and trustyng all eway that he shulde not be hedyd tylle he sawe the axe and the blocke, and whenn that he was in hys dobelet he trustyd on pardon and grace tylle the coler of hys redde vellvet dobbelet was ryppyd of. Then he sayde, "That hede shalle ly on the stocke that was wonte to ly on Quene Kateryns lappe," and put hys herte and mynde holy unto God, and fulle mekely toke hys dethe.
Alle soo the same day that the Erle of Marche shulde take hys jornaye towarde Mortymer ys Crosse fro Herforde este, (fn. 3) he mousterd hys many with owte the towne wallys in a mersche that ys callyd Wyg mersche. And ovyr hym men say (fn. 4) iij sonnys schynyng.
Ande the xvij day nexte folowynge Kyng Harry roode to Synt Albonys, and the Duke of Northefolke with hym, the Erle of Warwycke, the Erle of Arundelle, the Lorde Bouser, the Lorde Bonvyle, with many grete lordys, knyghtys, and squyers, and commyns of an C Mlmen. And there they hadde a grete batayle whythe the Quene, for she come ever on fro the jornaye of Wackefylde tylle sche come to Synt Albonys, with alle the lordys a fore sayde; and hyr mayny and every lorde ys men bare hyr lordys leverey, that every man myghte knowe hys owne feleschippe by hys lyverey. And be-syde alle that, every man and lorde bare the Pryncys levery, that was a bende of crymesyn and blacke with esteryge ys fetherys. The substance that gate that fylde were howseholde men and feyd men. I wene there were not v Mlmen that fought in the Quenys party, for [t]emoste parte of Northeryn men fledde a-way, and sum were take and spoylyd owte of hyr harnysse by the way as they fledde. And sum of them robbyd evyr as they yede, a petyffulle thynge hit ys to hyre hit. But the day before that batayle there was a jornay at Dunstapyl; but the kyngys mayny lackyd good gydyng, for sum were but newe men of warre, for the chevyste captayne was a boucher of the same towne; and there were the kyngys mayny ovyr throughe only by the Northeryn men. And sone aftyr the bocher, for schame of hys sympylle gydynge and loste of the men, the nombyr of viij C, for very sorowe as hyt ys sayde, hynge hym selfe; and sum men sayde that hyt was for loste of hys goode, but dede he ys—God knowythe the trought.
And in the myddys of the batayle Kynge Harry wente unto hys Quene and for-soke alle hys lordys, ande truste better to hyr party thenne unto hys owne lordys. And thenn thoroughe grete labur the Duke of Northefolke and the Erle of Warwycke a schapyd a-waye; the Byschoppe of Exceter, that tyme Chaunceler of Ingelond, and brother unto the Erle of Warwycke, the Lorde Bouser, whythe many othyr knyghtys, squyers, and comyns fledde, and many men slayne in bothe partys. And the Lorde Bonevyle was be-heddyd, the comyn sayynge that hys longage causyd hym to dye. The Prynce was jugge ys owne sylfe. Ande ther was slayne that manly knyght Syr Thomas Keryel. The nomber of ded men was xxxv C an moo [t]at were slayne. The lordys in Kyng Harrys party pycchyd a fylde and fortefyd hyt fulle stronge, and lyke unwyse men brake hyr raye and fyld and toke a-nothyr, and or that they were alle sette a buskyd to batayle, the Quenys parte was at hond whythe hem in towne of Synt Albonys, and then alle [t]yng was to seke and owte of ordyr, for hyr pryckyers come not home to bryng no tydyng howe ny that the Quene was, save one come and sayd that she was ix myle of. And ar the goners and borgeners couthe levylle hyr gonnys they were besely fyghtyng, and many a gynne of wer was ordaynyd that stode in lytylle a-vayle or nought; for the burgeners hadde suche instrumentys that wolde schute bothe pellettys of ledde and arowys of an elle of lenghthe with vj fetherys, iij in myddys and iij at the othyr ende, with a grete myghty hedde of yryn at the othyr ende, and wylde fyre with alle. Alle thes iij thyngys they myght schute welle and esely at onys, but in tyme of nede they couthe not schut not one of thes, but the fyre turnyd backe a-pon them that wold schute thys iij thyngys. Also they hadde nettys made of grete cordys of iiij fethem of lengthe and of iiij fote brode, lyke unto an haye, and at every ij knott there was an nayl stondyng uppe ryght, that there couthe no man passe ovyr hyt by lyckely hode but he shulde be hurte. Alle so they hadde pavysse bore as a dore i-made with a staffe foldynge uppe and downe to sette the pavys where the lykyd, and loupys with schyttyng wyndowys to schute owte at, they stondyng by hynde [t]e pavys, and the pavys as fulle of iijdnayle aftyr ordyr as they myght stonde. And whenn hyr schotte was spende and done they caste the pavysse by-fore hem, thenn there myght noo man come unto them ovyr the pavysse for the naylys that stode up-ryghte, but yf he wolde myschyffe hym sylfe. Alle so they hadde a thynge made lyke unto a latysse fulle of naylys as the net was, but hit wolde be mevyd as a man wolde; a man myght bryse hyt to-gedyr that the lengythe wolde be more then ij yerdys long, and yf he wolde he myght hale hyt a brode, thenn hit wolde be iiij square. And that servyd to lye at gappys there at horsemen wolde entyr yn, and many a caltrappe. And as the substaunce of men of worschyppe that wylle not glose nor cory favyl for no parcyallyte, they cowthe not undyrstond that alle thys ordenaunce dyd any goode or harme but yf hyt were a mong us in owre parte with Kyng Harry. There fore hyt ys moche lefte, and men take hem to mallys of ledde, bowys, swyrdys, gleyvys, and axys. As for speremen they ben good to ryde be-fore the foote men and ete and drynke uppe hyr vetayle, and many moo suche prety thyngys they doo, holde me excusyd thoughe I say the beste, for in the fote men ys alle the tryste.
Ande at the nyght aftyr the batayle the kynge blessyd hys sone the Prynce, and Doctor Morton brought forthe a boke that was fulle of orysons, and there the boke was oppenyd, and blessyd that yong chylde cum pinguedine terre et cum rore celi, and made hym knyght. And the yong knyght weryd a payre of bregant yerys i-coveryd with purpylle velvyt i-bete with golde-smythe ys worke. And the Prynce made many knyghtys. The fryste that he made was Androwe Trolloppe, for he was hurte and myght not goo for a calletrappe in hys fote; and he sayde, "My lorde, I have not deservyd hit for I slowe but xv men, for I stode stylle in oo place and they come unto me, but they bode stylle with me." And then come Whytyngam, Tresham, and many moo othyr, and were made knyghtys that same tyme.
Ande the Kynge and the Quene toke hyr jornay unto Yorke wardys, for they demyde that the Northeryn men wolde have ben to creuelle in robbyng yf they hadde come to London. But by the a-vyse of Docter Morton they sende certayne knyghtys and men unto London and to Westemyster, but they myght not be sufferde to entery in to the towne. Ande sum of hyr mayny were slayne for hyr cursyd longege. Ande the mayre ordaynyd bothe brede and vytayle to be sende unto the quene, and a certayne sum of money with alle. But whenn men of London and comyns wyste that the cartysse shulde goo to the Quene, they toke the cartys and departyde [t]e brede and vytayle a-monge the comyns. And on John Byschoppe was a grete doer of thys mater, for he was chyffe coke to the knyght Syr John Wenlocke. But as for the mony, I wot not howe hit was departyd; I trowe the pursse stale the mony.
Then come tydyngys of the comynge of [t]e (fn. 5) Erle of Marche unto
London; thenn alle the cytte were fayne, and thonkyd God, and
He that had Londyn for sake
Wolde no more to hem take,
and sayde, "Lette us walke in a newe wyne yerde, and lette us make us a gay gardon in the monythe of Marche with thys fayre whyte ros and herbe, the Erle of Marche." And the Erle of Warwycke mette with the Erle of Marche by-syde Oxforde, x myle owte of hit, at a towne of hys owne i-namyd Burford a-pon the Wolde; for the Erle of Marche come fro Walys, and was fulle sore a-ferde of the loste of the ij fyldys that were loste by-fore, Wakefylde that one, and Synt Albonys that othyr, and he sorowde sore for hys fadyr the Duke of Yorke, and for hys good brother the Erle of Rutlond, and for alle othyr lordys and comyns, &c.
There the Erle of Warwycke informyd hym of the gydynge and dysposyscyon of Kyng Harry, and of the Quene, and of the love and favyr that the comyns hadde unto hym, and by ryght to occupy the crowne of Inglonde, and soo hys hert was sum what made gladde and comfortyd. But he was sory that he was soo pore, for he hadde no mony, but the substance of hys mayny come at hyr owne coste.
Alle soo the xxvj day of Februer nexte folowyng Edwarde Erle of Marche com to London owt of Walys and the Erle of Warwycke with hym, and xl Mlmen with hem bothe, and they enteryd unto the cytte of London, and there he toke uppon hym the crowne of Inglond by the avysse of the lordys spyrytual and temporalle, and by the elexyon of the comyns. And so he be-gan hys rayne the iiij day of Marche, in the yere of oure Lorde God MlCCCC lxj, the Sondy letter D as for that yere.
Nowe gon messyngers by twyne contraye and contraye, and harowdys were fulle schante, for they ne wyste what was beste to done, but sufferens and fayr speche dyd them moche ese. And bothe [t]enewe kynge and the olde were fulle besyd to make hyr party stronge, &c.
The xiij day of Marche the kynge, owre newe Kynge Edwarde, toke hys jornaye unto the Northe, and the Duke of Northefolke with hym. The Erle of Warwycke and the Lorde Fauconbrygge, with many knyghtes, squyers, and comyns, to the nombyr of ii c Mlmen.
And the xxviij day of Marche, that was [t]ePalme Sunday evyn, the Lorde Fewater was slayne at Ferybryge, and many with (fn. 6) hym was slayne and drownyd. And the Erle of Warwycke was hurte yn hys legge with an arowe at the same jornaye.
Ande the xxix day of the same monythe of Marche, that was
Palme Sunday, the kyng mette with the lordys of the Northe at
Schyrborne. And there was on Harrys party that was kynge—
Prynce Edwarde, Kyng Harrys son.
The Duke of Exceter.
The Duke of Somersett.
The Erle of Northehumberlond.
The Erle of Devynschyre.
The Lorde Roos.
The Lorde Bemound.
The Lorde Clyfforde.
The Lorde Nevyle.
The Lorde Wellys.
The Lorde Wylby.
The Lorde Harry of Bokyngham.
The Lorde Ryvers.
The Lorde Schalys.
The Lorde Maule. (fn. 7)
The Lorde Ferys of Groby.
The Lorde Foschewe. (fn. 8)
The Lorde Lovelle.
Syr Thomas Hammys, captayne of alle the fote men.
Syr Androwe Thorlloppe.
Syr Thomas Tressam.
Syr Robert Whytyngham.
Syr John Dawne.
Here ben the namys of the lordys that were slayne in the felde
in Kynge Harrys party.
The Erle of Northehumberlond,
The Lorde Clyfforde,
The Lorde Nevyle,
The Lorde Wellys,
The Lorde Maules, (fn. 7)
And many moo then I can reherse; but whythe [t]es and othyr that were slayne in the fylde ys a grete nombyr, by syde xlij knyghtys that were slayne aftyr; the hoole nombyr ys xxxv Mlof comeners. Jhesu be [t]ou marcyfulle unto hyr soulys. Amen.
And the lordys before wretyn fledde, the substance in to Schotlond with the Kynge Harry and Quene Margarete, and sone the Prynce with hym, fulle of sorowe and hevynys, no wondyr. God knowythe, but every man deme the beste tylle the trought be tryde owte. For many a lady lost hyr beste be lovyd in that batayle.
The Erle of Devynschyre was seke, and myght not voyde a waye, and was take and be heddyd. And the Erle of Wylte schyre was take and brought unto Newe Castell to the Kynge. And there hys hedde was smete of, and send unto London to be sette uppon London Brygge. And Docter Morton, the Prynces chaunceler, was take with hym and put in the Towre, but he schapyd a way longe tyme aftyr, and ys by yonde the see with the Quene, &c.
Ande the Kynge taryd in the Northe a grette whyle, a made grete inquerens of the rebellyens a-gayne hys fadyr. And toke downe hys fadyrs hedde fro the walle of Yorke. And made alle the contray to ben sworne unt hym and to hys lawys. And then he returnyd unto Lundon agayne. And there he made xviij knyghtys and many lordys. And then he rode to Westemyster. And there he was crounyd the xxviij day of June, and the yere of oure Lorde MlCCCC lxj, blessyd be God of hys grete grace, etc.
And thys same yere the Erle of Oxforde, the Lord Abbry, the Lorde of Oxforde ys sone, Syr Thomas Todenham knyght, John Mongomery, and William Terelle squyer, were takyn in Esex, and brought unto Lundon to the Towre. Ande thenne they were ledde to Westemyster to the Kynges palys, and there they were attaynte of hyghe and myghthy treson that they ymagenyd agayne [t]e Kynge. And thenn they were drawe to the Towre from Westemyster. And at the Towre hylle was made a schaffolde for them, and there hyr heddys were smetyn on, and hyr bodys beryd, as hyt plesyd them to be qwethe hyr bodys.
Thys yere Quene Margarete com owt of Frauns with lij schyppys, with Freynysche men and sum Engelysche men in the schyppys. And they londyd in Northe Humberlonde, hyt was vij dayes be-fore Alle Halwyn tyde. And there sche toke the castelle of Anwyke and put hyt fulle of Fraynyschemen. And thenn she retornyd in to Schotlonde by water. And there rosse suche a tempaste uppon hyr that she for soke hyr schippe, and a schapyd with the bote of [t]e schyppe. And the schyppe was drownyd with moche of hyr stuffe and iij grete schippys moo. And iiij c and vj Fraynysche men were take in the chyrche of Hooly Ylond. Thenn Kyng Edward hyrde telle of thys, and made hym redy towarde the Northe with many lordys, gentellys, and comyns with hym. And there he layde a sege to Anwyke Castelle, and to the castelle of Bamborowe, and to Dunsterborowe. Bamborowe and Dunsterborowe was kepte by Syr Raffe Persy and Syr Harry Bewforde, late Duke of Somersett, and the castelle of Anwyke with the Lorde Hungerforde. And Bamborowe and Dunsterborowe were yoldyn be Syr Raffe Percy and Syr Harry Beuford, late Duke of Somersett, to the Kyngys wylle, whythe the condyscyons that the sayde Raffe Percy schulde have the kepynge of the ij castellys, Bamborowe and Dunstarborowe. The sayde Syr Raffe Percy and Syr Harry Beuforde, late Duke of Somersett, were sworne to be trewe and faythefulle as trewe lege men unto owre kynge and soverayne lorde Edwarde the iiijthe. And they com to Derham, and there they were sworne byfore owre kynge. And the kynge gaffe hem hys levery and grete rewardys.
Ande thenn the for sayde Raffe Percys retornyde a-gayne in to Northehumberlond, and hadde the kepynge of the sayde ij castellys accordynge unto the poyntment. And the sayde Syr Harry Beuforde a-bode stylle whithe the kynge, and roode with hym to Lundon. And the Kynge made fulle moche of hym; in soo moche that he loggyd whythe the kynge in hys owne bedde many nyghtys, and sum tyme rode a huntynge be hynde the kynge, the kynge havynge a boute hym not passynge vj hors at the moste, and yet iij were of the Dukys men of Somersett. The kyng lovyd hym welle, but the duke thought treson undyr fayre chere and wordys, as hyt apperyd. And for a grete love the kyng made a grete justys at Westemyster, that he shuld se sum maner sporte of chevalry aftyr hys grete labur and hevynys. And with grete instans the kynge made hym to take harnys uppon hym, and rode in the place, but he wolde nevyr cope whithe no man and no man myght not cope whythe hym, tylle the kynge prayd hym to be mery and sende hym a tokyn, and thenn he ranne fulle justely and merely, and hys helme was a sory hatte of strawe. And thenn every man markyd hym welle.
But within schorte tyme aftyr the sayde Syr Raffe Percy by fals colysyon and treson he lete the Fraynysche men take the castelle of Bamborowe fro hym nolens volo. As for the castelle of Anwyke alle the men of werre that were of worschip brake owte of the castelle by fors and warre and rescuyd Syr Perys de Brasylle (fn. 8) on xij day by [v] (fn. 9) the morne, and they that were with yn the castelle gaffe hit uppe by a-poyntement, &c. And then Kyng Edwar made Syr John Ascheley, the knyght that fought so manly in Smethefylde with an alyon that calengyd, he was made captayne of the castelle, and Syr Raffe Gray constabylle of the sayde castelle of Anwycke. And withyn iij or iiij monythys aftyr that fals knyght and traytoure, Syr Raffe Graye, by fals treson toke the sayde Syr John Ascheley presoner, and delyveryd hym to Quene Margarete, and thenn delyveryde the castelle to the Lorde Hungerforde and unto the Fraynysche men accompanyd whythe hym; and by thys mene he put the kyng owre soverayne lorde owte of possessyon. And thenne aftyr that come Kyng Harry that was, and the Quene to the Kynge of Schottys, Syr Perys de Brasylle, (fn. 8) with iiijxxMl Schottys, and layde a sege unto the castelle of Norham, and lay there xviij dayes. And thenn my Lorde of Warwycke and hys brother the Lorde Montegewe put them in devyr to rescewe [t]e sayde castelle of Norham, and soo they dyd, and put bothe Kynge Harry and the Kyng of Schotys to flyghte. And Quene Margarete whythe alle hir consayle, and Syr Perys de Brasey whythe the Fraynysche men, fledde a-wey by water with iiij balynggarys; and they londyd at the Scluse in Flaundyrs, and lefte Kyng Harry that was be hynde hem, and alle hyr hors and hyr harneys, they were so hastyd by my Lorde of Warwycke, and hys brother the Lorde Mountegewe, and by hyr feleschippe with them accompanyde. And at the departynge of Syr Perys de Brasyl and hys feleschippe was on manly man that purposyd to mete with my Lorde of Warwycke, that was a taberette, for he stode a-pon an hylle with hys tabyr and hys pype, taberyng and pyping as merely as any man myght, stondyng by hym selfe, tylle my lorde come unto hym he wold not lesse hys grownd; and there he be-come my lordys man; ande yet he ys with hym fulle good and to hys lorde.
Thenn the Kynge Edwarde the iiij purposyd to make an arme into Schotlonde by londe and by water, that the grete rebellyous Harry ande the Quene Margarete shulde not passe a way by water. And the kyng made the Erle of Worseter captayne by water. And thenn there was ordaynyd a grete navy and a grete armye bothe by watyr and by lond. And alle was loste and in vayne, and cam too noo purposse, neyther by water ne by londe.
Alle so the kynge sone aftyr dysposyd hym, and was purposyd to ryde into Yorke schyre and to the contray a boute, to see and understonde the dysposyscyon of the pepylle of the Northe. And toke with hym the Duke of Somersett, and ij C of hys men welle horsyd and welle i-harnaysyd. Ande the sayde Duke, Harry of Somersett, ande his men were made the Kyngys garde, for the Kyng hadde that duke in moche favyr and trustyd hym welle. But [t]e garde of hym was as men shulde put a lombe a monge wolvysse of malyscyus bestys; but Alle myghty God was the scheparde. And whenn the kynge departyd from London he toke hys way to Northehampton, and thedyr the kynge com a Syn Jamys day the Apostylle, (fn. 10) ande that fals duke with hym. And the comyns of the towne of Northehampton and of the schyre a-boute sawe that the fals duke and traytoure was so nyghe the Kyngys presens and was made hys garde. The comyns a rosse uppon that fals traytur thee Duke of Somersett, and wolde have slayne hym with yn the kyngys palys. And thenn the kynge with fayre speche and grete defeculte savyde hys lyffe for that tyme, and that was pytte, for the savynge of hys lyffe at that tyme causyd mony mannys dethys son aftyr, as ye shalle heyre. And then the Duke (fn. 11) sende that fals Duke of Somersett in to a castelle of hys owne fulle secretly, for save garde of hys the dukys lyffe, and the dukys men unto Newe Castelle, to kepe the towne, and gave hem goode wages fulle treuly payde. And the Kyng fulle lovyngly gave the comyns of Northehampton a tonne of wyne that they shulde drynke and make mery. And [t]e wyne was drunkyn merely in the market place, for they hadde many fayre pecys of sylvyr. I darsay ther ys no taverne that hathe not so moche of stuffe as they occupyde in hys (fn. 12) hyr tavernys. For sum fette wyne in basynnys, and sum in caudryns, and sum in bollys, and sum in pannys and sum in dyschys. Loo, the grete tresoure that they scheuyd [t]at tyme.
Thys yere, a-bute Mydsomyr, a the ryalle feste of the Sargantys of the Coyfe, the Mayre of London was desyryde to be at that feste. And at denyr tyme he come to the feste with his offecers, a-greyng and a-cordyng unto hys degre. For with yn London he ys next unto the kyng in alle maner thynge. And in tyme of waschynge the Erle of Worseter was take be-fore the mayre and sette downe in the myddys of the hy tabylle. And the mayre seynge that hys place was occupyd hylde hym contente, and went home a gayne with owt mete or drynke or any thonke, but rewarde hym he dyd as hys dygnyte requyryd of the cytte. And toke with hym the substance of hys bretheryn the aldyrmen to his place, and were sette and servyd also sone as any man couthe devyse, bothe of sygnet and of othyr delycatys i-nowe, that alle the howse mervelyd howe welle alle tynge was done in soo schorte a tyme, and prayde alle men to be mery and gladde, hit shulde be a mendyd a nothyr tyme.
Thenn the offesers of the feste, fulle evylle a schamyd, informyd the maysters of the feste of thys mysse happe that ys be-falle. And they consyderynge the grete dygnyte and costys and charge that longgyd unto the cytte, and a-non sende unto the mayre a present of mete, brede, wyne, and many dyvers sotelteys. But whenn they that come with the presentys say (fn. 13) alle the gyftys, and the sarvyse that was at the borde, he was fulle sore a schamyd that shulde doo [t]e massage, for the present was not better thenn the servyse of metys was by fore the mayre, and thoroughe owte the hyghe tabylle. But hys demenynge was soo that he hadde love and thonke for hys massage, and a grette rewarde with alle. And thys the worschippe of the cytte was kepte, and not loste for hym. And I truste that nevyr hyt shalle, by the grace of God.
Ande thys same yere a-boute Crystysmas that fals Duke of Somersett, with owte any leve of the kyng, stale owte of Walys with a prevy mayny towarde the Newecastelle, for he and hys men were confeteryde for to have be-trayde the sayde Newecastelle. And in [t]ewey thedyrwarde he was aspyde, and lyke to have ben takyn be syde Dereham in hys bedde. Notwithstondynge he a schapyde a-way in hys schyrt and barefote, and ij of hys men were take. And they toke with hem that fals dukys caskette and hys harneys. And whenn that hys men knewe that he was aschapyd, and hys fals treson aspyde, hys men stale from the Newecastelle as very fals traytourys, and sum of hem were take and loste hyr heddys for hyr labur, &c.
Ande thenn the kynge, owre soverayne lorde Edwar the iiij, hadde knowleche of hys fals dysposyscyon of thys fals Duke Harry of Somersett. The kynge sende a grete feleschippe of hys housolde men to kepe the towne of Newecastelle, and made the Lorde Scrope of Bolton captayne of the towne; and soo they kepte hyt surely alle that wyntyr. Ande a-boute Ester nexte aftyr the Schottys sewyd unto oure soverayne lorde the kynge for pes. And the kynge ordaynyde Commyssourys to mete whythe [t]e Schottys. The names of the Commyssyonourys be wretyn here aftyr folowyng:
|The Chaunceler of Ingelond,||And many othyr for the Eng lysche partye, to brynge hyt to a conclusyon.|
|The Lorde Montegewe,|
|The Erle of Warwycke,|
The poyntement was that they Schottys and [t]ey shulde mete at Yorke. And thenn was my Lorde of Mountegewe assygnyd to fecche yn the Schottys pesseabylly, for he was Wardon of the Marchys. And then my Lorde of Mountegewe toke hys jornaye towarde the Newe castelle. And by the waye was fulle falsely i-purvyde that fals Duke Harry of Somersett and Percy, with hyr feleschyppe assocyat unto them, that there was layde by the waye, a lytylle from the Newecastel, in a woode, that fals traytoure Syr Umfray Nevyle, with iiij schore sperys, and the bowys there too. And they shulde have falle on the Lorde Mountegeue sodenly, and slayne hym sodenly, but, God be thonkyd, hyr fals treson was aspyde and knowe. And thenne the Lorde Montegewe toke a nothyr waye, and made to be gaderyd a grete feleschippe, and went to the Newecastelle, and soo toke hys jornaye unto Norham warde. Ande in the wey thedyrwarde there met with hym that fals Duke of Somersette, Syr Raffe Percy, the Lorde Hungerforde, and the Lorde Roos, whythe alle hyr company, to the nombyr of v Ml men of armys. And thys metynge was a pon Synte Markys day; (fn. 14) and that same day was Syr Raffe Percy slayne. And whenn that he was dede alle [t]eparty was schomfytyd and put to rebuke. Ande every man avoydyd and toke hys way with fulle sory hertys. And thenn my Lorde of Mountegeue toke hys hors and roode to Norham, and fecchyd yn the Schottys, and brought hem unto the Lordys Commyssyonourys. And there was concludyd a pes for xv yere with the Schottys. And the Schottys ben trewe hyt moste nedys contynu so longe, but hit ys harde for to tryste unto hem, for they byn evyr founde fulle of gyle and dyssayte.
Ande the xiiij daye of May nexte aftyr, my Lorde of Mountegeue toke hys jornaye toward Hexham from the Newecastelle. And there he toke [t]at fals Duke Harry Beuford of Somersett, the Lord Roos, the Lorde Hungerforde, Syr Pylyppe Wenteworthe, Syr Thomas Fyndorne, whythe many o[t]yr; loo, soo manly a man ys thys good Erle Mountegewe, for he sparyd not hyr malysse, nor hyr falssenysse, nor gyle, nor treson, and toke meny of men and slowe many one in that jornaye.
|Summa v.||The Dukys hedde of Somersett,|
|Edmon Fysche, knyght,|
|Summa v.||Fyrste, the hedde of the Lorde Hungerforde,|
|The Lorde Roos,|
|Syr Thomas Fyndorne,|
|Barnarde de la Mare,|
Ande the xviij day of May he let to be smyte of (fn. 15) at Mydlam the hedys of thes men that hyr namys folowyn here in wrytynge:
|Summa vij.||Syr Phylippe Wentworthe, knyght,|
|Warde of Copclyffe, (fn. 16)|
|John Senyer, of Yorke,|
|Thomas Hunte, foote man.|
Ande be syde Newecastelle, the same monythe, [t]er was i-take Taylbosse (fn. 17) in a cole pyt, and he hadde moche mony with hym, bothe golde and sylvyr, that schulde have gon unto Kyng Harry: and yf [it] (fn. 18) had come to Harry, lat Kynge of Ingelonde, hyt wolde have causyd moche sory sorowe, for he had ordaynyd harneys and ordenance i-nowe, but the men wolde not go one fote with hym tylle they had mony. And they waytyd dayly and howrely for mony that thys Taylebosse shulde have send unto hem or brought hyt; the summa was iij Mlmarke. And the lordys mayny of Montegewe were sore hurte and seke, and many of hys men wer slayne by for in the grete jornays, but thys mony was departyd a-monge hem, and was a very holsum salfe for hem. And in the day folowyng Taylebosse loste hys hedde at Newecastelle.
That same yere, the fyrste day of May be fore sayde or wrete, oure soverayne lorde the Kynge, Edwarde the iiij, was weddyd to the Lorde Ryvers doughter; hyr name ys Dame Elyzabethe, that was wyffe unto Syr John Grey, sone and heyre unto the Lady Ferys of Groby. And thys maryage was kepte fulle secretely longe and many a day, that no man knewe hyt; but men mervelyd that oure soverayne lorde was so longe with owte any wyffe, and were evyr ferde that he had be not chaste of hys levynge. But on Alle Halowe day at Redyng there it was knowe, for there the kynge kepte hys comyn counselle, and the lordys mevyd hym and exortyd hym in Goddys name to ben weddyd and to lyffe undyr the lawe of God and Chyrche, and they wold sente in too sum stronge lond to inquere a quene good of byrthe, a-cordyng unto hys dygnyte. And thenn our soverayne myght not no longer hyde hys maryage, and tolde hem howe he hadde done, and made that the maryage shuld be oppynde unto hys lordys.
Alle so the same somer my Lorde of Warwycke and hys brether the Lorde Mountegewe, that was made Erle of Northehumberlond by the kynge, they ij layde a sege unto the castelle of Anwyke a gate hyt by a-poyntement. And in the same wyse and forme they gate the castelle of Dunsterborowe by the same mene. And thenne they layd sege to the castelle of Bamborowe, and layde grete ordynans and gonnys there too. And manly they gate hyt by fors, and toke there yn that fals traytur Syr Raffe Gray, and brought hym unto the kynge to the castelle of Pomfrete. And fro thens he was ladde to Dankester, and there hys hedde was smete of and sent to London, and hyt was sette a-pon Londyn Bryge.
And thys yere was hyt ordaynyd that the noubylle of vj s. viij d. shulde goo for viij s. iiij d. And a newe cune was made. Fyrste they made an Angylle and hit went for vj s. viij d., and halfe ande Angyl for xl d.; but they made non farthyngys (fn. 19) of that gold. And thenne they made a gretter cune and namyd hyt a ryalle, and that wentte for xs., and halfe the ryalle for vs., and the farthynge for ij s. vj d. And they made newe grotys not soo goode as the olde, but they were worthe iiij d. And then sylvyr rosse to a grytter pryce, for an unce of sylvyr was sette at iij s., and better of sum sylvyr. But at the be-gynnynge of thys mony men grogyd passynge sore, for they couthe not rekyn that gold not so quyckely as they dyd the olde golde. And men myght goo thoroughe owte a strete or thoroughe a hoole parysche or that he myght chonge hit. And sum men sayd that the newe golde was not soo good as the olde golde was, for it was alayyd.
Alle soo in thys yere in the monythe of May was Quene Elyzabet
crownyd at Westemyster. And many knyghtys were made of the
Bathe, of the whyche the were v aldyrmen of the cytte of London
i-made with hem. Thes v aldyrmen were made knyghtys of the
Syr Hewe Wyche, mercer,
Thomas Coke, draper,
Raffe Gosselyn, draper,
Syr John Plomer,
Syr Harry Whafyr.
Alle soo that yere be-ganne a gre cyssym by twyne fryers and prystys, but the Fryer Charmys, that ys to saye the Whyte Freers, be-ganne hyt fryste at Poules Crosse. He that be-ganne thys matyr was borne in Flete Strete, a skyner ys sone, and hys name ys Syr Harry Parker; he blamyd men for there grete copy of hyr goodys, and in specyalle he blamy[d] benefysyd men that had grete benyficys and prestys that had temporalle lyffelod. For he sayd and affermyd that non of the xij Apostolys nor Cryste hadde no thyng in propyr but alle in comyn, and sayd and affyrmyd by hys connyng, as strong as he cowthe, that Cryste was a begger and had nought but by way of almys. And that made men to groge and to muse passyng soore.
But the Sonday aftyr there was a docter of devynyte, Maystyr Wylliam Ive, the mayster of Whytyngdon ys College, sayde agayne the fryer, and prevyd that Cryste was poore and kepte noo grete tresoure, but as for beggyng he utterly denyde hyt, and by hooly scrypture prevyd hit soo that men undyrstode that the fryer erryd sore agayne Hooly Chyrche; ande thenne the fryers gan malyngne a gayne thys docter. Thenne in Advente they prevyde a docter of the Whyte Fryers, Mastyr Thomas Haldon, (fn. 20) and that he schulde preche agayne [t]eMayster Wylliam Ive before sayd, and there he talkyd moke of the beggyng of Cryste, and put the pepylle (fn. 21) that the same mater schulde ben determenyd in there scholys by twyne hym and a Grey Fryer at the White Fryers in Flete Strete the Wanysdaye vij nyght aftyr. And the Sonday folowyng, a docter of devynyte, Mayster Edwarde Story, person of Alle Halowys the More in London, and aftyr confessor unto the Quene, and aftyr that Byschoppe of Carlylle, (fn. 22) prechyd at Poulys Crosse, and as moche as he myghtwolde have passefyde the mater, and sayde that hyt [was (fn. 23) ] blasphemy soo to reherse and say by oure Lord Cryste. But that same Sonday the fryers set uppe byllys at every chyrche dore that the docter sayde nott trought, but the trought shulde be schewyd ande sayd by Docter Mayster John Mylverton, the pryor of the same place, and he was provyncyalle of the same ordyr. And that aftyr noone in hys sarmon he raylyd soore and grevysly to fortefy hys bretheryn ys sayyngys, that sum laye men were wrothe with the fryers and whythedrewe hyr almys from them; and sum men were not plesyd with hyr curettes, and sayde that they hadde noo ryght to have any offerynge but lyffe by almys as Cryste dyde; ande thys men were devydyd, sum welle and sum ylle.
But the Wanysday the docter, Mayster Halden, kepte the scholys with in the Fryers and dysputyd a gayne a Gray Fryer as he promysyd; and at that scholys were many grete docters and clerkys to geve hym audyens. And they thought he yode soo farre that Mayster Alcocke, (fn. 24) a docter of lawe and commyssary unto the Dene of Synt Martyns in the Graunte, assytyd the fryer that he shulde appere by fore the Arche Byschoppe of Cauntylbury at Lambeffe. And the fryer sayde he wold not obbey his cytacyon, for alle fryers ben exempte for alle the byschoppe ys power, but hit were for eresy; and the docter of lawe sytyd hym for eresy.
Thenne at the begynnyng of the terme aftyr Estyr the fryer apperyd by fore Mayster Docter Wynterborne, my lordys offycer and juge in suche causys and othyr as for spyrytualte. And [t]er were many worthy docters a gayne the fryer, but he lenyd evyr unto hys prevelege, but he schewyd non but a bylle unselyd. Thenne the mater was put to my Lorde of London, by so moche that alle thys trobylle was done in hys dyossy, and the Chaunceler of Inglond, that was my Lorde of Warwycke ys brother, (fn. 25) toke party a-gayne the fryers; and the day folowynge the provyncyalle and Docter Haldon come to Poulys by fore my Lorde of London and brought hyr prevelegys with hem, but [t]eprevelege wolde not serve that tyme for noo cause of eresy. And my lorde lawfully a-sytyd them to appere by fore hym that same aftyr non, but they come not, for the provyncyalle toke hys way a-non towarde Rome. And Docter Haldon toke noo leve of the byschoppe. And thenn my Lord Chaunceler hyrde that they were gone, and send for the yong fryer Harry Parker and commaundyd hym to preson. And he was take from preson and sende unto my Lorde of London. And the Sonday aftyr the same fryer, Harry Parker, objuryd that he sayd, and sayde as we saye, that Cryste ys lorde of ovyr alle thynge, and he confessyd alle so that very nede causyd them to saye that Cryste beggyd, by cause that men shulde take the ordyr of fryers moste parfytyste of alle orders.
But one fryer couthe not be ware by a nother, for with a whyle in the vacacyon tyme a Blake Fryer prechyd alle moste the same. And he was exampnyd by fore my Lorde of London, and was made to preche agayne and revokyd. Thenne my Lord of London cursyd thes ij docters, Mayster John Mylverton and Docter Thomas Halden, at Poulys Crosse for there contymacy, and hyt happyd that Docter Ive dyde the execucyon of the curse, and [t]at grevyd the fryers soore, and sayde that he was sette alle in malys; but thys Docter Ive myght not chese.
Ande be fore thys (fn. 26) tyme the fore sayde Docter Ive kepte the scolys at Poulys (fn. 27) [t]at ys undyr the chapter house, and there he radde many fulle nobylle lessonnys to preve that Cryste was lorde of alle and noo begger, and he dyde hyt aftyr the forme of scholys, for he hadde hys abyte and hys pelyon, and a vyrger with a sylvyr rodde waytynge uppon hym. And the same fryer of Menors that answeryd the Whyte Fryer answeryd hym onys, and many tymys he dyspute and radde in that scholys; he kepte hyt more then ij yere. Thenn the fryers straynyd curtesy whoo sholde answery hym. And ssum fryers desyryd to answerye hym, but at the day of hyr desyre [t]ey apperyd not. And thenn men layde grete wagers the Provyncyalle wolde come home and doo many thyngys, and causyd that a fryer of Rome made a tretysse of the beggyng of Cryste, that welle was hym that myght have a copy of hyt, and they were to sylle at many placys in Rome, and sum were sende home to the Whyte Freers, but yet hit happyd that they come to thys Docter Ive, that he undyr stode the consayte welle i-nowe and sayde fulle lytylle or nought.
Thenn the Pope (fn. 28) havyng woundyr of the complaynt of thys fryer, and inqueryde of suche men as come late owte of Inglonde of the mater; and whenne he undyrstode the mater, he wrote downe to the Arche Byschoppe of Cauntyrbury and to the Byschoppe of London, and thonkyd hem that they were so trewe to Cryste and Hooly Chyrche, and desyryd to have alle the hoole mater and proscesse i-sende unto hym by wrytynge. And so hyt was, every thyng as ny as they couthe ymageny, puttyng alle favyr and parcyallyte and malysce a syde.
But the very trewe processe thys nobylle Docter Ive wrote unto the Pope (fn. 29) the maner, sayyng, and prechyng in hyr (fn. 30) sermonys, bothe hys doyng and sayyng, as welle as the fryers, and the actys of bothe scholys. And ix docters of devynyte and bachelers of devynyte subscrybyd hyr namys with hyr owne hondys, and testefyde that alle was trewe that thys sayde Docter Ive hadde wretyn, for hyt was exampnyd and radde by fore alle [t]e byschoppys that tyme beyng at London, and by the same docters and clerkys that subscrybyd. And that large and grete letter was sende with the byschoppys letters. And yf that Docter Ivys letter hadde ben i-selyd with sum lordys sele spyrytualle, or an notarys syne there on, the freer had ben brende in shorte tyme; hit hadde non othyr sele but hys owne sygnett.
Ande the kynge toke a grete party on thys mater, for thes fryers hadde causyd moche trobylle a monge hys pepylle, and therefore he desyryd that holy fadyr the Pope (fn. 31) to chastysse suche trespasserrys and brekers of the pesse, and send forthe a letter with the othyr letters.
Thenne the Pope (fn. 32) ressayvyd thes letters, and undyrstode alle the hoole processe, and made hys cardynallys to exampne the fryer, and by hys answerynge they found ix moo poyntys that he erryd on, and sone aftyr he was put into the castylle of Angylle in stronge preson, and laye there yn alle moste iij yere. And evyr hys frendys and the fryers lokyd aftyr hys comyng home, but he may not, for he hathe bund hym sylfe unto the Pope (fn. 32) by an yryn oblyacyn faste i-selyd a-boute hys ij helys. And [t]en he lackyd mony and frende schyppe, submyttyd hym to the Pope; (fn. 32) but whenn he shalle cum hom I wotte not, but for sothe hys artyculys ben dampnyd, whether he be or nought I wot ner; I truste ye shalle knowe aftyr in tyme comyng by Goddys grace, hoo have us alle in hys blessyd kepyng. Amen for cheryte.
That yere the mayr had a pesabylle yere and a plentefulle of alle Goddys goode. And he festyd the kyng, the quene, and the quene ys modyr, the lady of Bedford, and many othyr lordys. And whenn they had done and dynyd the offesers [had] (fn. 33) to there reward the clothe of state that was ovyr the tabylle, honggyng ovyr hit. And the substance of napery was gyffe with dyvers men of offyce.
Alle so that yere Kyng Harry that was come in to Lonkesschyre owte of Schotlond; tylle he com in to Forneysse Fellys he was nevyr i-knowe, but there he was knowe and take, and a pon Syn Jamys eve he was brought to the Towre of London, and iij moo with hym; ij were hys chapelaynys, Mayster Docter Bydon, Docter of Devynyte, and Mayster Thomas Mannynge, Bacheler of Lawe, and sum tyme Dene of Wyndesore and secretary unto the Quene. But he was sone delyveryd owte of preson by cause [t]at he was agyd and infecte with a whyte lepyr. But Docter Bydon was in preson long tyme, and hys frendys laboryd for hym soore and payde moche mony for hys delyverans. But he couthe not kepe hys tounge, but in schorte tyme he was put yn a gayne, and was there more thenne a quarter of a yere. and [t]en uppon hys othe he was delyveryd and ys owte of donger, &c.
That yere the mayre beryd [his] (fn. 34) lady, and hys scheryffe and hys swyrdeberer. And thenn Stocketon [t]e mercer was chose for Harry Bryce, the scheryffe that was, and he was made scheryffe fro that tyme tylle Mychellemasse, and no lenger.
Alle soo thys same yere there was an herryke i-brende at the Towre Hylle, for he dyspysyd the sacrament of the auter; hys name was Wylliam Balowe, and he dwellyd at Walden. And he and hys wyffe were abjuryd longe tyme be-fore. And my Lorde of London kepte hym in preson longe tyme, and he wolde not make noo confessyon unto noo pryste, but oonly unto God, and sayde that no pryste had noo more pouer to hyre confessyon thenn Jacke Hare. And he had no consyence to ete flesche aftyr Estyr, as welle as thoo that were bothe schryffe and houselyd.
At the tyme of hys brennynge a Docter, Mayster Hewe Damelet, person of Syn Petrys in the Cornehylle, laboryd hym to be-leve in the hooly sacrament of the auter. And thys was the herytyke ys sayyng: "Bawe! bawe! bawe! What menythe thys pryste? Thys I wotte welle, [t]at on Goode Fryday ye make many goddys to be putte in the sepukyr, but at Ester day they can not a ryse them selfe, but that ye moste lyfte them uppe and bere them forthe, or ellys they wylle ly stylle yn hyr gravys." Thys was that tyme of hys departyng from [t]at worschipfulle docter.
Alle soo that same yere there were many chyrchys robbyd in the cytte of London only of the boxys with the sacrament. And men had moche wondyr of thys, and sad men demyd that there had ben sum felyschippe of heretykys assocyat to gederys. But hyt was knowe aftyr that it was done of very nede that they robbyd, wenyng unto the thevys that the boxys hadde ben sylvyr ovyr gylt, but was but copyr. And by a copyr smythe hit was a spyde of hyr longe contynuans in hyr robbory. At a tyme, alle the hole feleschippe of thevys sat at sopyr to gedyr, and had be fore hem fulle goode metys. But that copyr smythe sayde, "I wolde have a more deynty mosselle of mete, for I am wery of capon, conynge, and chekyns, and suche smalle metes. And I mervyl I have ete ix goddys at my sopyr that were in the boxys." And that schamyd sum of them in hyr hertys. Ande a smythe of lokyers crafte, that made hyr instrumentes to opyn lockys, was [t]er that tyme, for hit was sayde at the sopyr in hys howse. And in the mornynge he went to chyrche to hyre a masse, and prayde God of marcy; but whenn the pryste was at the levacyon of the masse he myght not see that blessyd sacrament of the auter. Thenn he was sory, and a bode tylle a nothyr pryste wente to masse and helpyd the same pryste to masse, and say (fn. 35) howe the oste lay a-pon the auter and alle the tokyns and sygnys that the pryste made; but whenn the pryste hylde uppe that hooly sacrament at the tyme of levacyon he myght se no thynge of that blessyd body of Cryste at noo tyme of the masse, not somoche at Agnus Dei; and thenn he demyd that hit had ben for febyllenys of hys brayne. And he went unto the ale howse and dranke a ob. (fn. 36) of goode alle, and went to chyrche agayne, and he helpyd iij moo prystys to masse, and in no maner a wyse he ne myght se that blessyd sacrament; but [t]en bothe he and hys feleschyppe lackyd grace. And in schorte tyme aftyr iiij of hem were take, and the same lokyer was one of [t]eiiij, and they were put in Newegate. And by processe they were dampnyd for that trespas and othyr to he hangyd and to be drawe fro Newegate to Tyborne, and soo they were. And the same daye that they shulde dy they were confessyd. And thes iiij docters were hyr confessourys, Mayster Thomas Eberalle, Maystyr Hewe Damylett, Mayster Wylliam Ive, and Mayster Wylliam Wryxham. Thenn Mayster Thomas Eberalle wente to masse, and that lokyer aftyr hys confessyon myght see that blessyd sacrament welle i-nowe, and thenne rejoysyd and was gladde, and made an opyn confessyon by fore the iiij sayde docters of devynyte. And I truste that hyr soulys ben savyd.
Lo, ye obstinat herytykys that holdythe a-gayn confessyon, here ys an exampylle grete i-nowe to converte you yf ye have any grace withyn you, for the boke saythe that non est verior probacio quam oculorum demonstracio. But ye ben soo i-blyndyd that thoughe ye hyre of suche men that have sene suche thyngys ye wylle not be leve but ye hit see, and thenn ye lese your demeryte; for scripture saythe, Fides non habet meritum ubi humana racio habet experimentum. God geve you to a mende. Amen.
Thys yere there come many inbasyters into Ingelond fro the Kynge of Fraunce for many dyvers thynges, but they desyryd a perpetualle pesse. And sum inbassyters com fro the Kyng of Spayne. (fn. 37) And a Patryarke come from the Emperoure, (fn. 38) and that Patryarke was of Antyoche. And from Schotlond come inbassyters. And sum com from the Duke of Burgon, (fn. 39) and sum from Bratayne. Also there com inbassyters from the Kynge of Napyllys. (fn. 40) And inbassytors com from the Conte de Ferare.eAnd that same yere come a legatt from the Pope; (fn. 41) and he lay at Syn Bartholomewe the Lasse in a grete place of a Lombardys, and he kepte a goode housholde, and hys men were fulle welle gydyd. That legat wolde nevyr come at noo festys nor dyners with no man, with kyng nor lorde, save with grete instance he rode to More with the Arche Byschoppe of Yorke, and dynyd there and com home to hys bedde. Where fore that he com to thys lond fulle fewe men can say, but he was the best Latyn man that com into Inglond many yerys, and fulle curtesse with alle. Men drede that in tyme comyng hit wylle be knowe that hys comyng hedyr was kept so prevely.
Alle so the same yere there was dede of armys done by fore Mydsomer in Smethefylde by twyne the Lorde Schalys, the Quenys brother, and the Bastarde of Burgoyn, bothe on horsse backe and in fote; but I wot not what I shalle say of hit, whethyr hit was fortune, crafte, or cunnynge, but thys ys a trought, that the Bastarde of Burgayn lay in the fylde bothe hors and man, and hys hors was so brusyd that he dyde with a whyle aftyr. Thenne the nexte tyme they fought on fote fulle welle. I reporte me unto hem that saye (fn. 42) thys: I doo aftyr hyryng. Or ax of em that felde the strokys, they can telle you best.
Alle so that sam tyme there was dede of armys done by twynne ij Gasconys of the kyngys house and other ij men of the Bastarde of Borgayn. And the ij men in the kyngys party ther namys were Thomas Dalalaund, and that othyr Lewys de Brytellys; and that orthyr ij men in the Bastard ys syde there namys were Syr John de Cassy, knyght, and that othyr Botton, squyer. But the kynges men were better thenn they, bothe an hors backe and on foote. And thes dedys of armys was for lyffe and dethe. And soo hyt was by twyne the Lorde Schalys and the Bastarde of Burgayne.
That yere were meny men a pechyd of treson, bothe of the cytte and of othyr townys. Of the cytte Thomas Coke, knyght and aldyrman, and John Plummer, knyght and aldyrman, but the kyng gave hem bothe pardon. And a man of the Lorde Wenlockys, John Haukyns was hys name, was hangyd at Tyburne and be heddyd for treson.
Ande that same yere the Kyngys suster, my Lady Margerete, was weddyd unto the Duke of Burgon; and she was brught thedyr with many worschypfulle lordys, knyghtys, and squyers. And the Byschoppe of Salysbury (fn. 43) resayvyd hyr, for he hadde ben in that londe many dayes before. And sum gentylly men that brought hyr there bare hem soo evylle in hyr gydynge, that they loste hyr heddys at London sone after that they come home. One Rychard Skyrys, squyer, Pounyngys, and Alphey, the iij were by heddyd at the Towre Hylle.
Alle so that yere the Lorde Herberd of Walys gate the castelle of Hardelowe in Walys; that castylle ys so stronge that men sayde that hyt was inpossybylle unto any man to gete hyt, but poyntment hit was gotyn. (fn. 44) And sum of the pety captaynys were be-heddyd at Towre Hylle at London, for that castelle was fortefyd and vytaylyd by suche at lovyd Kyng Harry; one of the men was callyd John Treublode.
Alle soo that yere, a lytylle be-fore the sege of that castelle, the olde Lorde Jesper and sum tyme Erle of Pembroke was in Walys; and he roode ovyr the contraye and helde many cessyons and cysys in Kyng Harrys name. But men wene that he was not owte of Walys whenn that the Lord Herberde come with hys oste; but favyr at sum tyme dothe grete ese, as hit ys prevyd by the hydynge of that lorde sum tyme Erle of Penbroke.
Alle so that same yere the men that come home from Brougayne (fn. 45) at hadde ben at the maryage of my Lady Margarete were purposyd to have myschevyd alle the Flemmyngys in Sowtheworke. And they wolde have take hyr conselle at a crosse be syde Redclyffe; and alsosone as they myght have hadde any botys [t]ey wolde have londyd at Horsey Downe and take the Flemmyngys owte of hyr beddys and slayne them; and many bot men were consentyng unto hem, but they were a spyde and lette of hyr purposse. And tho [t]at were the causers of thys mater were set in preson.
Alle so hit was reportyd by the moste party of thoo men that com from the maryage, that aftyr the dayes that were assygnyd that every man shuld wayte a pon hys owne lord, lady, or mayster, and com noo more at the dukys corte, that the Burgoners shewyd no more favyr unto Englysche men thenn they wolde doo unto a Jewe. For mete and drynke was dyre i-nowe as thoughe hit hadde ben in the londe of warre, for a schuldyr of motyn was solde for xij d. And as for beddyng, Lyard my hors had more ese thenn had sum good yeman, for my hors stode in the howse and the yeman sum tyme lay with owte in the strete, for las and (fn. 46) iiij d a man shulde not have a bedde a nyght. Lo howe sone they couthe play the nygardys!
Alle so that yere the Pope (fn. 47) sende a bulle for the Cordyners, and cursyd thoo that made any longe pykys passynge ij yenchys (fn. 48) of lengthe, and that no Cordyner shuld not sylle no schone a pone the Sonday, ne put no schoo a pon no man ys fote, ne goo to noo fayrys a pon the Sonday uppon payne of cursynge. And the kynge grauntyd in a conselle and in the Parlement that hyt shulde be put in excecussyon, and thys was proclaymyd at Poulys Crosse. And sum men sayd that they wolde were longe pykys whethyr Pope wylle or nylle, for they sayde the Popys curse wolde not kylle a flye. God amend thys. And with in schorte tyme aftyr sum of the Cordyners gate prevy selys and proteccyons to make longe pykys, and causyd tho same men of hyr crafte that laboryd to the Pope for the dystruccyon of longe pykys to be trobelyd and in grete donger.
That same yere in the Lentyn, whyle men were at sarmonys the Sonday aftyr noon, a yong man that was watyng a pon a man of the kyngys house was soore vexyd and bound with the devylle. And that man aftyr tyme that he was unbound by mannys hondys lay specelys long tyme aftyr. And as sone as he myght speke men of worschippe com to hym, and sum grete statys alle so com to hym and desyryd hym to telle hem of hys syghtys that he had sene in hys ferfulle vexacyon. And he tolde them many thyngys that he say, (fn. 49) as ye shalle hyre here aftyr by wrytyng and by confessyon of hym selfe unto the Pryer of Chartyr Howse, and to many dyvers docters. For the Pryer of Chartyrhouse made a grete dyner to the docters,— (fn. 50)