Extracts From the Records of the Burgh of Edinburgh, 1403-1528. Originally published by Scottish Burgh Records Society, Edinburgh, 1869.
This free content was digitised by double rekeying. All rights reserved.
The quhilk day, the provest, baillies and counsall decernis and ordanis Adame Hopper dene of gild, James Prestoun, Nicholl Cairnecros, Jhone Adamesoun younger, Michaell Makquhem, Jhone Marioribankis, and Williame Adamsoun younger, till forgather ilk Fryday, and sitt in the Tolbuith or any vther place quhair thai pleis, ane hour, vpoun the materis concerning the commoun weill of thair kirk, and avys and mak fremen and gild brether, and to compone with thame as thai think caus, and till do all vther thingis concernyng the commoun weill of the said kirk and toun as efferis.
The quhilk day, the provest baillies and counsall ordanis the officeris of the toun till pass poynd and distrenye George Henrisoun and Andro Vddart, ilk ane of thame for xl s., for the selling of thair wyne for xijd. the pynt; failyeand that the saidis officeris poynd nocht for the samyn, thai to pay the saidis soumes of thair awin pursis, to be applyit efter the forme of the actis maid thairvpoun of befoir, viz. the ane half to Sanct Gelis wark and the vther half to Sanct Anthonis altar.
The quhilk day, the provest baillies and counsall sittand in jugement, wairnit and requirit Robert Mortoun and his spous, at the command of our Souerane Lordis lettres, being personalie present, till analie for the toun for the commoun weill thaif xxiiij futtis of the north pairt of thair yaird vpoun to ane competent pryce, conform to the saidis lettres, and maid intimatioun to thame that gif thai wald nocht analie the saymn as said is that thai wald proceid and apprys the saidis landis efter the forme of the saidis lettres, and in presens foirsaid the said Robert and his spous ansuirit and refusit and said thai wald nocht analie the said land na maner of way; quhairfor the saidis provest and baillies, at the command of the saidis lettres direct to him thairvpoun, namit and chesit thir personis, vix=z. James Prestoun, Gilbert Lauder, Nicholl Carncros, Jhone Marioribankis, Robert Brus, and Edward KIncaid, quhilk personis thai ordaint to be wairnit till compeir vpoun the ground of the said land to morne efter none till apprys the samyn, and ordanys the said Robert and his wyf personalie present till compeir to morne as said is vpoun the said land, till heir and se the saidis persones sworne till apprys the saidis landis instantlie to the maist availl, conforme to our said Souerane Lordis lettres direct thairvpoun.