Extracts From the Records of the Burgh of Edinburgh, 1403-1528. Originally published by Scottish Burgh Records Society, Edinburgh, 1869.
This free content was digitised by double rekeying. All rights reserved.
22 January 1527–8.
The quhilk day, the baillies and counsale statutes and ordanis that [blank] Wilsoun, tailyeour, and all vtheris suspect of lipper within this towne devoyde thame of the samyn within xv dayes, and gif the said [blank] Wilsoun will allege that he hes nocht na sic seiknes that he caus the medicinaris to purge him be thair aythis in the meanetyme; and als chairges all maner of lipper folkis that ar in lugeis and hospitales about this towne that thai convers nocht amang clene folks nother in kirk merkat or vther wayes bot hald thame be thame selffis in quyet vnder the payne of banissing the towne. (This amang the lowse leiffes.)
24 January 1527–8.
It is thocht expedient be the baillies and counsale that the pynt stowpe of Dalkeyth be send for, and that wyse and discreitt men mesoure the vther commoun pynts of this towne and of Striueiling with that pynt, swa that ane just mesour may be maid vniuersally throw all this towne. (In the convict buik begynand in Julij 1505.)
1 February 1527–8.
[Decree. Chaplain of St Cristopher's altar.]
(Decreitt gevin decerning Sir Thomas Ewyne chaiplen of St Cristophers alter and brether of the skynners and furrours to be putt in possessioun of the xl s. annuell, viz. xx s. of vmquhill Jhone Hathweis buith, and vther xx s. of his pairt of the land quhilk George Lethe dwellis in on the eist syde of Alexander Cants tenement, and to poynd thairfore.—Tr.)
The pace of breid efter xij s. the boll.
The counsall fyndis and delyueris, be the price of the quheit fundin the last mercatt day at xij s., that the baxteris baik commounlie to all our Souerane Lordis liegis xj vnces j half weill baikin breid and dryit sufficient stuff for j d.; and that thai furneis the tovne with ij d. breid and penny breid, and that thay sell nocht to the tovne vnder the payne of spaining fra the occupatioun yeir and day; and that thay cum to the clerkis buith and tak thair tikket heirvpoun.
22 February 1527–8.
Waist at the West Kirk door.
The quhilk day, the baillies and counsale ordanis the dene of gild or thesaurer till caus the waist land of the townis that thai gat fra Hew Dowglas and his spous, lyand at the west kirk dur, to be fillit vp with red, and to calsay the samyn honestly as efferis.—(Lowse Leiffes.—Tr.)
28 February 1527–8.
Twa buthies to be lowsit.
The quhilk day, the baillies and counsall decernis and ordanis Mungow Tennent, thesaurar of this yeir bygane, till content pay and deliuer till Jhone Purves thesaurare the sowme of twa hundreth markis restand in his handis of the commoun guid of the said last yeir he was thesaurare, and dischairgis him thairof be this present writting now and evir; and als ordanis the said Jhone Purves thesaurar till content and pay incontinent to Michaell M'Quhane for the commoun buithis quhilk he has in wedsett of the guid toun for redemptioun of the samyn the sowme of fyftie pundis, and to Williame Rynd for ane vther buith quhilk he hes in wedsett of threscoir pundis, and to resaue ouer thair said rycht of the saidis twa buithis, with all lettres and euidentis maid to thame thairvpoun; and als ordanis the said Jhone Purves thesaurare till content and pay till Alane Mosman goldsmyth for to perfurneist and end furth the siluer chandler that he hes in his hand to mak, the sowme of xx li till guid compt and recknyng; quhilkis sowmes being payit be the said Jhone Purves thesaurare salbe thankfullie allowit till him in his comptis, kepand this writt and precept for his discharge and warrand.