Extracts From the Records of the Burgh of Glasgow Vol. 1, 1573-1642. Originally published by Scottish Burgh Records Society, Edinburgh, 1914.
This free content was digitised by double rekeying. All rights reserved.
EXTRACTS FROM THE RECORDS OF THE BURGH OF GLASGOW.
19 January 1573–4.
The Heid Court, eftir Yule, of the burght and citie of Glasgw, haldin in the tolbuith thairof, be ane noble and michtie lord, Robert lord Boyde prouest, George Elphinstoun, Archibald Lyoun, and James Flemyng, baillies of the samyn, the xix daye of Januare, the yeir of God, jmvc lx threttene yeiris; the sutis callit; the court confermit; dempstare, James Speir.
James Andersone, millare, hes thre scabbit hors; Johne Gammyll hes ane; Thomas Scott hes ane; and Thomas Will hes ane scabbit hors. Quhilkis persones ar ordanit to be warnit to the nixt court to heir thame decernit to be handillit conforme to the auld statutis maid anent scab and fairsy, and to be sichtit be Archibald Muir and Thomas Watterston.
Marioun Gardiner, dochtir to Steyne Gardiner; Jonet Grhame, Jonet Steward, Robert (blank), fleschour. Quhilkis persounes ar dilatit as lepir, and ordanit to be viseit; and gif thai be fund sua, to be secludit of the toun to the hospitall at the Brigend.
The quhilk daye, Margaret Andro, spous to Johne Andersone, cordiner, is fund in the wrang and amerchiament of court, for trublance done be hir to Jonet Tailyour dochtir to James Tailyour, in stryking of hir and rugging furth of hir hair, vpone the hiegait of Glasgw, vpon Sondaye the viij daye of Januare instant, within the tyme callit of auld the proclamatioun of Yule girtht, and now of abstinence, and dwme gevin thairupone; and thairfor is decernit to mak the said Jonet ane amendis, be the sicht of tua nychtbouris; and William Andersone, maltman, is becumin cautioner for makyng of the said amendis.
The quhilk daye, Patrik Spreull, being persewit be Johne Boill, chepman, for trublance done be him, vpon the xi of Januare instant, within the tyme of the proclamatioun of feriat tyme and abstinence, in invadyng of him, and stryking of him with ane quhinger, and schutyng him on the wallis, throuch the quhilk the said Johnes neis wes voundit to the effusioun of his blude; grantit the premissis, and become in the prouest and baillies willis thairfore.
22 January 1573–4.
The court of the burght and cietie of Glasgw, haldin in the tolbuytht thairof, be honorable men, George Elphinstoun, Archibald Lione, and James Flemyng, baillies thairof; the sutis callit; the court confermit; dempstare, James Speir.
The quhilk daye, comperit Felane Johnesoun and maid fayth that he dred Johne Campbell, burges of Glasgw, of bodely harme, and desyrit lawsouertie, quhom for Dauid Howe, litster, become cautiouner that the said Felane suld be skathles of bodely harme of the said Johne and all that he may lett, vnder the panes contenit in actis of Parliament; and siclik, the said Johne maid fayth that he dred the said Felane of bodely harme, desyring souertie in likmaner, quha fand Williame Andersoun, cowper, lawsouertie that the said Johne suld be skaythles of bodelie harme of him and all that he may lett, vnder the said panes.
Johne Craufurd, tailyoure, is decernit, the allegatiounes of parteis being hard, to content and paye to Isabell Robesoun xvj s. restand for the fostering of ane barne, within xv dayis, with viij d. of expensis.
26 January 1573–4.
Alexander Scott, baxter, is fund in the wrang and amerchiament of court for stopping of George Young, dekyn, fra entering in his buyth to exerce the statute anentis the weying of his breid; and als Williame Neilsoun is fund in the wrang in likmaner for iniuryng of the said George his dekyn; and the said George is fund in the wrang for stryking of the said Williame Neilsoun; and als Williame Andersone and Thomas Glen ar fund in the wrang for baiking and haveing insufficient breid, contrar the statutis of the towne; and dwme gevin heirupon.
29 January 1573–4.
Alexander Scot, baxtare, is fund in the wrang and amerchiament of court for trublance done be him to George Young, baxter, in settyng of the quheit mylne thrys, and nocht suffering the said George to grynd, he haveand his stuff thairon and licence thairto, and dwme gevin thairon.
Thomas Browne, tailyour, is maid burges and freman of the burght and citie of Glasgw, and hes gevin his ayth of fidelite to the towne, quhais fynes wes remittit to him gratis at the requeist of maister Andro Haye, persone of Renfrew and commissionare of the kirk in west pairtis.
9 February 1573–4.
William Browne is fund in the wrang and amerchiament of court for trublance done be him to Bartilmo Symsone in manassyng him and invading him with ane drawin quhynger vpone the hiegait, vpone Sondaye last, and dwme gevin thairupon.
19 February 1573–4.
The court of the burght and cetie of Glasgw, haldin in the tolbuith of the samyn, be ane noble lord, Robert lord Boyde, prouest; George Elphinstoun, Archibald Lyone, and James Flemyng, baillies thairof; the sutis callit; the court confermit; dempstare, James Speir.
Steyne Robertoun, merchand, is maid burges and freman of the burght and citie of Glasgw, and hes gevin his aitht of fidelite to the townn; souertie for his fynes Thomas Miller, merchand, in the thesauraris handis.
Peter Bar, fischer, is maid burges and freman of the burght and citie of Glasgw, and hes gevin his aitht of fidelite to the towne, quhais fynes wes remittit to him gratis at the requeist of my lord archibischop of Glasgw.
23 February 1573–4.
The court of the burght and ciete of Glasgw, haldin in the tolbuyth of the samyn, be honorable men, George Elphinstoun, Archibald Lione and James Flemyng, baillies thairof; the sutis callit; the court confermit; dempstare, James Speir.
Inquisitio: Johne Flemyng [and fourteen others.] Comperit Archibald Stene, attornaye and procuratour for James Blakburne, eldest lachfull son to vmquhill Archibald Blakburne, burges of Glasgw, producit ane breif of my lord of Glasgowis chancleary, deulie execute and indorsit and the executioun werefeit, togidder with ane clame desyring the said James to be seruit as nerrest and lachfull burges aire to the said vmquhill Archibald to all movable airschip that pertenit to him as burges air; quhilk beyng proclamit at the tolbuyth windo nane comperit except maister Petir Blakburn, alsua sone to the said vmquhill Archibald, quha allegit becaus the said James wes duelland in strange cuntrey and aliene aucht nocht to be seruit, quhilk wes repellit; and nochtwithstandyng the clame wes applyit to the inqueist foirsaid, quha being suorne and admittit, removit furth of jugement and in enterand agane, all in ane voce seruit and enterit the said James Blakburn as nerrest of lyne and blude and eldest lachfull son to the said vmquhill Archibald and air gottin betuix him and vmquhill [blank] Mayne, spoussis, and haveand onlie rycht to his movable airschip guddis had be him the tyme of his deceis; and dwme gevin thairon; vpon the quhilkis the said Archibald, attornaye, askit actis of court.
26 February 1573–4.
George Pollok, cowpar, is maid burges and freman of the burght and citie of Glasgw, and hes gevin his aitht of fidelite to the toun; quhais fynes wes gevin to Thomas Downy, be vertew of ane rolmont, for making of ane commone drwme gevin to the common menstrale to playe with.
Anent the mater movit be Michael Barde, commone procuratour, aganis Margaret Grhame, relict of vmquhill Matho Heriot, for non delyuering of the hewcht irne chenyeis had in keping of the toun be hir and hir said spous, the said Margaret allegit John Fowlar hir warrand, and desyrit ane terme to call him, quhilk wes grantit and assignit thairto the v of Merche nixt, partibus citatis.
5 March 1573–4.
Thir persones vnderwrittin, viz., Johne Reid, James Frebarne, Johne Clwne, Andro Carmychell, James Bar, Niniane Syare, Thomas Syar, youngar, and Michael Gurlaw, ar fund in the wrang and amerchiament of court, for contravenyng of the statutis of the toun and disobeying of the watter baillie, in perforce at thair awin handis taking of killyng furth of the boytis, and dwme gevin thairon.
Margaret Alderstoun, spous to James Anderson is fund in the wrang and amerchiament of court, for trublans done be hir to Jonet Legat and Margaret Mwling, in stryking of thame with ane staff and hir neifis, vpone the ferd of Merche instant, and chasyng of thame diuers tymes, and dwme gevin thairupon.
9 March 1573–4.
Jonet Rillik is fund in the wrang and amerchiament of court for forstalling of the mercat and contravenyng of the statutis in bying of beir in houssis or the presenting thairof to the mercat, and dwme gevin thairupoun.
16 March 1573–4.
Johne Roger, fischer, is fund in the wrang and amerchiament of court, for contrauenyng of the statutis, in nocht presentyng of his salmond to the mercat and sellyng of the samyn in houssis, nocht beyng presentit to the mercat; and als Alexander Rankene and Patrick Graynger ar fund in the wrang for foirstalling of the mercat in bying of salmont within houssis in greit, or thai wer presentit to the mercat, and dwme gevin heirupone.
Johne Blakwod is fund in the wrang and amerchiament of court, for delvyng doun of the erd besyde St. Tenewis Woll, quhilk is commown, purposyng to appropriat the samyn to himself, and dwme gevin heirupon.
23 March 1573–4.
William Andersone, youngar, maltman, is fund in the wrang and amerchiament of court for stryking of Marione Graye, and the said Marione is lywkys fund in the wrang for iniuring and blasphemyng the said William be wordis, and dwme gevin thairon.
James Andersoune, millare, is decernit and ordanit to content and paye to maister Thomas Jak the sowme of xviij merkis money for the few male of the place in Drygate of the termes of Witsoundaye and Mertimes in the lxxiij yeir, and that becaus the said James failyeit in prevyng of payment of the samyn, it beying referrit to his probatioun to this daye and comperit nocht, within xv dayis nixt.
26 March 1574.
William Glen, sone to Johne Glen, is fund in the wrang for casting of ane stane at Robert Rank and hitting him thairwith abone the ey to the effusione of his blude; and als Johne Glen, youngar, and Johne Glen, brethir to the said William, ar fund in the wrang for stryking of the said Robert and casting him doun violentlie to the erd; and als Laurens Hoge for trublans done to Johne Glen, youngar, in thrawing of his neis, and invadyng of the said Laurens with ane drawin quhinger, eftir the first tumult cesyng; and als George Layng for invadyng of Johne Glen with ane drawin suord; and dwme gevin thairon respectiue.
Johne Wilsoun is maid nethir towne hird for this present yeir, and Thomas Arscoun is maid overtoun hird in lykmaner, to be equall in proffett; souerte for the said Johne Wilsoun, Johne Wilsone, pewderare, and Michael Barde; souertie for the said Thomas, Dauid Lyoune, for thair gude service.
The baillies and counsale ordanis Thomas Craig to be callit for removyng of the gallows furth of the Loyne sett be him at his awin hand. And ordanis and deputis thir persones underwrittin to visie the lonys, that the samyn be nocht diminisit, viz., the baillies, William Conyghame, Johne Wilsoun, William Watt, Johne Flemyng, and Michael Barde. And als ordanit the inhabitantis of the baronie to be warnit to bryng in thair furlotis and mesouris to be justit and selit.
2 April 1574.
Marione Jamesone, Jonet Maxuell, Marione Maxuell and Jonet Maxuell, hir dochteris, ar fund in the wrang and amerchiament of court for trublance done be thame to Marione Stene, spous to James Andersone, carter, in stryking of hir, scartyng of hir and dynging hir to the erd, vpone the last daye of Marche; and the said Marione is fund in the wrang, for stryking of Jonet Maxuell, yonger; and als the said James Andersone is fund in the wrang for stryking of Jonet Maxuell, spous to George Wilsoun; and siclik, the said George is fund in the wrang for invadyng of the said James with ane drawin quhyngar, and dwme gevin thairupone.
The quhilk daye, Thomas Craig, cordiner, is fund in the wrang for non-comperance; and als for the transportyng of the gallows at his awin hand furtht of the auld accustomat place sa neir hand the towne; and is ordanit to repone the samyn agane.
6 April 1574.
The quhilk daye, the baillies and counsale depute for modificatione of the entre siluer of the buythis vnder the tolbuyth, all in ane voce declarit, modifeit, and decernit ilk buyth to paye of entres siluer for ane lyferent tak, to the thesaurare xxti lib., quhilk salbe bestowit vpone the mendyng and reparyng of the tolbuyth and to na vther vse.
7 April 1574.
The quhilk daye, Margaret Hammiltoun is fund in the wrang for casting of stanes at Jonet Cowane and chasyng and manassyng of hir, on the ferd of Aprile instant, and als the said Margaret, and Robert Browne and Jonet Broun hir barnys, in the wrang in stryking and rugging of the said Jonet Cowanes hair and castyng her to the erd; and siclik, the said Margaret Hammiltoun in the wrang for invadyng of Jonet Moresone, spous to Johne Browne, and casting stanes at hir, and als for blaspheming be iniurious wordis and sclander the saidis spoussis, and dwme gevin thairon.
9 April 1574.
James Brysoun, Johne Thomsone, Robert Thomsone, and John Reid, fleschouris, ar fund in the wrang for contravenyng of the statutis in bredyng of swyne presentit to the mercat yisterday, and dwme gevin thairon.
23 April 1574.
Inquisitio:—James Boyde, chancellare, maister Adame Walles, William Maxuell, Robert Steward, Andro Baillie, Johne Flemyng, merchand, Robert Mure, merchand, Johne Arbuckill, Robert Flemyng, Johne Wilsone, Nicol Andro, James Braidwood, Peter Lymburner.
William Wilsoun is fund be the inqueist in the wrang for bludyng of Richart Woddrop on the heid, on Cropnesto; and the said Richart Woddrop, and Andro Woddrop his brother, ar fund in the wrang for occasione and bludvyte thairof; and also Johne Woddrop, cowper, andAndro Woddrop his brother ar fund in the wrang be the inqueist for hurtyng and wondyng of the said William Wilson to the greit effusionne of his blude, in the Gallogate, on the morne thaireftir; and siclik the saidis Richart and Johne Woddroppis ar fund in the wrang for onsettyng and invadyng of the said William with drawin suerdis and pistolatis in the mercate, on Skyrfurisdaye last; and dwme gevin heiron.
Marione Alderstone, spous to George Elphinstoun, is fund in the wrang for castyng downe of wesche, and putting furth of Margaret Park furth of hir hous, and dwme gevin thairon, and the amendis referrit to the counsale.
24 April 1574.
The quhilk daye, it is statute, thocht gude and ordanit, be the prouest, baillies and counsale, that the westir ruinous gavill of the Blackfreir kirk and the stanes thairof be tane doun, and be the skellat precedyng rowpit and sauld to the maist avale, and the price thairof conuertit and applying to the mendyng of the wyndois and ministeris sait in the said kirk; and to that effect appointit for performyng thairof thir persones, viz., Johne Wilsone, William Watt, William Strutheris, with ane baillie. Als thai ordanit the commoun procuratour to persew for the siluer work of the new kirk, Margaret Rankyn.
30 April 1574.
The quhilk daye, Marione Govane and Marione Wilsoun ar fund in the wrang, for the wrangus cumming throw Duncane Finlayis yard and trampyng downe of the gers, makand oppin passage, but his licence; and dwme gevin thairupon; and als Johne Patwones wyf is inlykmaner decernit, and for the iniuring of him.
1 May 1574.
Comperit William Maxuell, merchand, in name of the merchandis, and sax dekynnis of craftis in name of the haill craftis and haill communite, and disassentit fra the geving furth or delyng of ony pairt of the commone muris to James Boyde, or to ony wtheris mair nor is ellis delt,and protestit that the partis thairof ellis delt and gevin furtht, by thair consentis in tymes bigane, suld nocht prejuge tham, bot that thai may have tym and place for recallyng and remeid thairof.
4 May 1574.
The baillies ordanis ane coit of mailye and ane hatt, laid in wod be Jonet Pattersoun, spous to Gilbert Scherinlaw, to Marione Henwell, spous to Thomas Bogill, vpone the sowme of xxxviij s. iiij d. money, to be rowpit be the officeris and thame to paye the said sowme to hir, and the rest to the said Jonet; and that becaus the said Jonet being thrys warnit to compeir and lows the samyn, be payment of the said sowme, or ellis to heir it rowpit, comperit nocht nor schew na caus in the contrar, with iij s. of expensis.
Petir Lymburnare is becumin actit of his awin propir confessioun, as cautioner for Sir Johne Masoun, for vphalding of ane tenement at the Graye freir wynd pretening heritablie to Johne Wynzett, in lyk estaite as is now at the deceis of Jonet Masoun, moder to the said Johne, conforme to the sichting thairof maid be the lyneris of the towne; and Johne Steward of Bowhous is decernit to relief and keip skaithles the said Petir of the premissis.
7 May 1574.
Anent the mater movit be Archibald Stene, as factour and commissionare for James Blakburne, aganis Johne [Steyne] cordiner, for nocht delyuerance of ane pair walker scheris beyng in his handis, pertenyng to vmquhill Archibald Blakburne, and now to the said James as ane part of his movable airschip guddis contenit in bill; the said Johne comperand, nocht grantand the premissis, allegit that the scheris can nocht be airschip, as nocht vsit be the deid, bot ar ane part of his movable guddis; thairto answerit the said Archibald, that insafer as thai wer sett in hyring thai aucht to be airschip guddis; and to avise heirwith the baillies assignit the xiiij daye of Maij instant, partibus citatis.
Williame Kyle is fund in the wrang for the taking and intrometting with at his awin hand, but ordour, ane kow gevin be him at Alhallovmeslast to Jonet Baxtare as tyde for the first calf and milk and being in hir possessione sensyne, and thairfore is decernit to delyuer to hir ane tyde kow, and to satisfe hir for the proffett of calf and milk thairof incontinent, and dwme gevin thairupon.
14 May 1574.
Eduard Pollok, skynner, is maid burges and freman of the burght and citie of Glasgu, and hes gevin his aitht of fidelite to the toun; quhais fynes wes gevin be the baillies and counsale be thair rolmont to Johne Moresone, in satisfactione of his hors tane fra him the tym of the truble, and for releving of travellouris hors tane be him thairfor lowsit be him at the townes requeist.
The quhilk daye, Archibald Legate, cordiner, is maid burges and freman of the burght and citie of Glasgu, and hes gevin his aith of fidelite to the towne; quhais fynes wes gevin be the baillies, counsale and dekynnis to George Burell, merchand, for his support, to releve his pouertie in tyneyng of his pack be the sey.
18 May 1574.
Jonet Dunlop is fund in the wrang for trublance done be hir to Agnes Martene, in castyng of dirt at hir wyndo and fyling hir stuff sett thair, viz., breid, cheis and buttir; and als the said Agnes is fund in the wrang for castyng furth of wesche at the said Jonet, and dwme gevin.
28 May 1574.
Anent the actioun persewit be the baillies aganis Johne Caulduell, custumer, for non payment of xiij s. yerly as pertenyng to tham; as ane dewite of the trone vsit and wont, the said Johne denyit the vse, and for previnge thairof the xxix of Maij is assignit.
Comperit James Boyde, chalmerlane of Glasgw, and Matho Boyde, takisman to my Lord Archbischop of Glasgw of the troyne, and requirit the baillies to caus Johne Caulduell, personaly present, to deliuer to himthe mettis, mesouris, and wechtis of the trone; comperit the said Johne and desyrit the copie of the clame; allegit the persewaris, that he aucht to have na copie, becaus the actioun is commone and aucht nocht to have delaye; thaireftir the said Johne wes content to delyuer sa mony wechtis, weyis, balkis, and messouris, as he ressauit fra Robert Millar his predecessour; the chalmerlane and takisman acceptis the confessione, and desyris the baillies decreit, accordyng to the confessioun; the baillies continewit thair pronunciatioun to the xxix of Maij instant, partibus citatis.
29 May 1574.
30 May 1574.
The thre baillies and ane parte of the counsale past to vise and decyde the questione of lyneyng and nychtbourheid betuix Thomas Crawfurd of Jurdanhill, fewar of the persone of Glasgwis mans, on that ane part, and maister Dauid Conyghame, fewar of the subdeynes mans, on that wther part; and eftir the sichting thairof, with consent of bayth the saidis parteis, ordanis the said Thomas to big wp the pece mantale wall wpone the said maister Dauidis ground, and the samyn wall witht the ground to appertene to the said maister Dauid in tymes cumyng, the said maister Dauid fyndand stanes thairto; and that the said Thomas stank to be maid rys na hichtar nor the said maister Dauidis seller flure, quhairthrocht the said maister Dauidis tenement and houssis be nocht damnefeit be the watter or wtherwyis in tymis cumyng, and the droppis and eismentis that the said maister Dauidis hous had of before, to be reserwit and kepit intymes cuming; and als ordanis the commone synk to haue fre passage, for the commone wele of the haill towne, as passit of befoir; and ordanis the said maister Dauid to tak awaye the erd abone the mantle wall; and als thai fynd the castyng of the stank be the said Thomas on na wyis to be hurtfull to the dounfallyng of the said maister Dauidis turnepyk.
1 June 1574.
The Court of Perambulatioun of the merchis of the burght and citie of Glasgw, haldyn at the mylnedam be ane noble and potent lord, Robert lord Boyde, prouest, George Elphinstoun, Archibald Lyoun, and James Flemyng, baillies thairof, vpon Witsonetysdaye, the first daye of Junii the yeir of God jm vc lx fourtene yeiris; the sutis callit; the court confermit; dempstare, James Speir.
Item, ane marche stane tane awaye at the burne, vnder the hird hous of Wodsyde, sumtyme ane hawthorne grew thair; item, ane wder marche stane tane away at the nuk of Cayttis dyik betuix and Sanct Mungois tre; item, twa lous marche stanes liand betuix the reid mos and hird hous of the Keppocht; item, ane marche stane tane awaye at the nuik of the Keppocht wpone the north syde; item, ane lous stane lyand vpone the hiecht of the hill fornent the Keppocht; item, ane marchestane vp at the eist end of the Balgray medo and castin in the mos in our awne commone, hid vnder the erd.
Item, the haill passage of the Deynsyde well is stoppit throw oure casting of the erd and stanes of the yardis nixt adiacent thairto; item, the commone well callit Gleghornis well besyd Andro Sympleis hous vnder Robert Bareis hous is fillit vp [with] stanes contrar the commone weill.
Item, the brwme ward occupeit be Jeyne Conyghame, the dyikis at hir heid landis is castin down; the marche stanes vndermynit thairthrow at the eist nwik of the myldame; at the heid of the landis betuix the landis of Stewin Glasgw and Archibald Stewin the marche stane tane awaye.
Item, Johne Crawford, vnfreman, hes castin four daye work turris and sax daye work peittis, and syndry wther fremen and vnfre, by the statutis of the towne, flais vp the haill muir by ordour, sua that na bestiall maye haue na pasturall thairvpone.
The casualiteis of the mercat callit the Ladill is sett to Robert Millare, meleman, quhill Witsonetysday nixtocum, for the sowme of nyne scoir merkis money, to be payit at the termes vsit and wont; souertie for payment thairof, Johne Wilsoun, merchand; the termes are thrid in hand, thrid at myd terme, and the rest at Beltane.
The new gift gevin to the brig, and small casualiteis grantit thairto, ar sett to Nicol Snodgers, for the sowme of four scoir merks money, to be payit at thre termes visit and wont, viz., Michaelmes, Candilmes and Beltane.
Lytis for the thesaurare:—Robert Flemyng, Andro Baillie, James Bowe, Andro Riche, Patrik Glen, Robert Fawlis, James Andersoun Wilsoun, Dauid Andersoun, Johne Gilmour, George Young. Thesaurare for this present yeir, Andro Riche, merchand.
4 June 1574.
The quhilk daye, Johne Pollok of that ilk being persewit be James Andersoun, officer, for trublans done be him vpone Monundaye the last daye of Maij last wes, in presentyng and offering to have schot him with ane pistolat, manassyng and doyng that in him laye to have slane and schot him; and als Andro Steward being accusit for trublance done be him to the haill tounschip, prouest, baillies, and communite, thai exerceing thair office in brynging the said Johne to the hous of justice, schutand, strykand, and trubland all maner of persones being in that cumpany to that effect; the saidis Johne and Andro bayth personalie present become in the said prouest and baillies willis for the premissis, and Johne Wilsoun, pewderar, is becumin cautioner for the said Johne, and Gavine Grhame cautioner for the said Andro Steward, that thai respectiue sall fulfill and vnderly the said prouest and baillies willis, and the saidis Johne and Andro ar becumin actit to releve thair saidis securiteis respectiue of the premissis.
5 June 1574.
Johne Andersone, minister, Jonet Quhyte, Jonet Neilsoun, Helene Donaldsoun and Marione Donaldsone, ar decernit to red and remove thameselfis, seruandis and guddis, furth of the houssis liand in the Drygate pertenyng to ane noble and potent lord Hew erle Eglyntoun respectiue occupeit be thame, as thai quha wer lauchfullie warnit to remove thairfra befoir Witsonday last and schew na reasonable caus quhy.
11 June 1574.
Johne Pollok, cowper, Eduard Pollok, skynner, and Hectour Dunlop, wrycht, burgessis of Glasgw, ar fund be probatioun of famous witnes in the wrang for cuming in armes contrar the provest, baillies, and haill tovnschip, vsand the executione of thair office, cumand aganis thair aithis maid be thame the tyme thai wer maid burgessis, concurrand with Johne Pollok of that ilk, rebelland contrar the tovn, doand that in thame lay (quhilk wes nathing to be reknyt) to stop him fra cuming or brynging him to the tolbuyth for trublance of the toun; and thairfore the baillies and counsale ordanis the saidis persones fredomes to be cryit doun be ane officiar vpone ane mercate daye on the cors; and als ar ordanit to be retenit in firmance in the heych tolbuyth, aye and quhill thai fynd cautione to mak amendis and repentance to the kirk for breking of thair aithis, and to fulfill sick iniunctiones as the kirk will devys for the samyn.
20 June 1574.
The court of perambulatioun of marches of the burght and citie of Glasgw, haldin at the Symmerhill be honorable men, George Elphinstoun, Archibald Lyone, and James Flemyng, baillies, vpoun Sondaye the xx daye of Junii, quhilk suld have bene the xiij of Junii, the yeir of God jm vc lxxiiij yeris.
The quhilk daye, anent the complaynt tueching the deid flesche of the mwrehill presentit to the mercate and sauld be Dauid Pady and Johne Millare, fleschouris, the baillies, counsale and communite ordains the said flesche to be tane and erdit, and the saidis fleschouris that bocht the samyn and presentit it to the mercat to be punist according to the auld statutis.
Anent the complaynt maid be the communite, that certane induellaris of the town castis the muir and flayis vp the samyn as thai pleis, and als mekle as thai think, nocht regardand the incommodite that sallcum thairto in tyme cuming gif remeid be nocht prouidit, thairfore it is statute and ordanit be the baillies, counsale and haill communite present, that it sall nocht be lesum to ony freman to cast in the yeir mair nor twa daywerk of turfis, and ilk vnfre persoun ane daywerk, vnder the pane of xl s. ilk falt; and that vnfre folk, seruandis nor wtheris, cast turfis or peytis on the commone, without thai be conducit of befoir be fremen, vndir the pane of xx s. the first falt, and the nixt banisment; and ordanis the contraveneris of this haill statute to be callit thairfore.
Item, it is statute and ordanit be the baillies, counsale and communite, for evadyng eyting and destruction of cornes, that gif ony hors or wther bestiall beis fund all nycht furtht of houssis in ony persones scaytht on thair stuff, and beis apprehendit sa befoir the sone rysing, the awnare of the beist sall paye of vnlaw xx s. by the skaytht sustenit be the pairteis. And that na wyfe, hussy, nor wther persoun, gang amang growand stuff to scheir ony or gers amang stuff; for the first falt, the contravenar salbe haldin in the thevis hoill viij dayis, and the secund falt to be baneist the toun during the prouest, baillies and counsales willis.
Item, it is statute and ordanit be the baillies, counsale, dekynnis and haill communite present, that forsamekle as thai, considerand the greit inconvenient done to the toun throucht the multitude of strangeris cumand to be burgessis, and sum be sick requeistis as may nocht gudlie be denyit, and sum throucht the small fynes, geving far les nor wther townis takis for thair fredome, that ilk persoun that beis burges, or desyris to be burges and freman of this gude toun, sall paye for thair fynes to the thesaurar of the toun, to the commone weale thairof, the sowme of ten pundis money, in tymes cuming.
The quhilk daye, Archibald Bordland and Robert Duncane ar admittit to be menstrales to the towne for this instant yeir, and to haif fra ilk freman allanerlie, but meyt, twa schillingis money at the leist, with the mair at the gevaris plesour.
25 June 1574.
The quhilk daye, Johne Gilmour, cordiner, is fund in the wrang and amerchiament of court in brekyng of the statutis maid anentis the pete bog of auld, in holyng wp of the samyn, and dwme gevin thairupone, and Johne Allan souertie for his vnlaw, conforme to the auld statutis.
6 July 1574.
The court of the burght and citie of Glasgw, haldin at Craigmak, vpone the fayr ewin, be honorable men George Elphinstoun, Archibald Lyone, and James Flemyng, baillies, the saxt daye of Julii the yeir of God, jm vc lxxiiij yeiris; the suttis callit; the court confermit; dempstare, Thomas Carrutheris.
The baillies, counsale and communite present, ordanis euerilk buytht halder to have in reddines within the buytht ane halbert, jak and steilbonet, for eschewyng of sick inconuenientis that may happin, conforme to the auld statute maid thairanent, vnder the panes contenit in the samyn.
16 July 1574.
The court of the burght and citie of Glasgw, haldin in the Blakfreir kirk, sumtym callit sua, be honorable men, George Elphinstoun and Archibald Lyone, baillies; the sutis callit; the court confermit; dempstare, James Speir.
James Neilsoun, tailyour, is decernit in the wrang and amerchiament of court for trublance done be him to Johne Monky, in dumpyng of him on the breist and invadyng theireftir him with ane drawin quhynger; and dwme gevin thairupon.
23 July 1574.
Johne Barry, menstrale, of his awin confessioun, is decernit and ordanit to content and paye to maister Archibald Craufurd, persone of Egleschem, the sowme of five lib. money, viz., four merkis in hand and the rests betuix and Mertymes nixtocum.
3 August 1574.
Anent the actioun persewit be the commone procuratour aganis George Burell, dekyn of the smythis, for vsurpyng of the prouest and baillies authority and office in cognoscyng of causis betuix parteis, inhabitantis of this toun, geving of his decrete and setting furth of the samyn as ane rolment of court as he had bene judge ordinar, the said George askit ane terme to ansuer peremptourlie, quhilk wes grantit, and assignit thairto the vi of August instant, partibus citatis.
6 August 1574.
Anent the mater movit be Michael Barde, commone procuratour, aganis Sir James Flemyng, desyring him to dimit and leif St. Mungois chaplanrie conforme to his promeis contenit in bill, bayth the pairteis present, the said Sir James producit exceptiones declinaturis quhilkis the provest and baillies repellit, and nochtwithstanding admittit the bill to the preif, and assignit thairto the x of August instant, partibus citatis.
13 August 1574.
Margaret Kynlocht, seruand to James Boyd, and Florence Conyghame, spous to Johne Stirlyng, ar baytht fund in the wrang and amerchiament of court, viz, the said Margaret for the iniuring of the said Florens, calland hir preistis huyr, befoir Vitsonsdaye last; and the said Florens, for the stryking of the said Margaret on the bak with hir nevis, the x of August instant; and dwm gevin thairon.
14 August 1574.
In presens of the baillies and counsale, Walter Graye, writtar and notare, is maid burges and freman of the burght and citie of Glasgw, quhais fynes wes remittit to him gratis be the baillies and counsale for his seruice done and to be done to the commone effaris of the towne.
20 August 1574.
James Andersone, millare, is becumin actit of his awin proper confessioun and consent that in cais he be fund to blaspheme the magistratis or officeris of the towne in ony sorte vnhonestly, or wtherwyse than becumis, in tyme cuming, and beyng convict thairof, that he salbe banist the toun duryng thair willis.
21 August 1574.
The prouest, baillies, and counsale, with the dekynnis of the craftis and diuers wtheris honest men of the toun, convenand in the counsalhous, and haveand respect and consideratioun to the greit dekaye and ruyne that the hie kirk of Glasgw is cum to, throuch taking awaye of the leid, sclait, and wther grayth thairof, in this trublus tyme bygane, sua that sick ane greit monument will alluterlie fall doun and dekey without it be remedit; and becaus the helping thairof is sa greit and will extend to mair nor thai may spair, and that thai ar nocht addettit to the vphaldyng and reparing thairof be the law, yit of thair awin fre willis, vncompellit, and for the zele thai beir to the kirk, of meir almous and liberalite, sua that induce na practik nor preparative in tymes cuming, conforme to ane writting to be maid thairanent, all in ane voce hes consentit to ane taxt and impositioun of twa hundredtht pundis money to be taxt and payit be the townschip and fremen thairof for helping to repair the said kirk and haldyng of it wattirfast; and for castyng and makyng thairof hes appointit thir persones folloving, viz., the dekyn of ilk craft, Johne Arbuckill, Thomas Normont, Matho Vatsoun, fleschour, Patrik Howe, litster, Robert Mure, merchand, William Maxuell, Dauid Lindsaye, elder, Andro Baillie, Robert Stewart, maister Adame Walles, George Herbertsoun, Johne Flemyng, William Hegait, Robert Flemyng, Thomas Spang, and Johne Lyndsaye, and to convene on Tysdaye nixt for endying thairof.
Item, the prouest, baillies, and counsale, at my Lord of Glasgwis requeist, hes supersedit the small custum of the brig, and dischargit the samyn to be tane fra the baronie men of Glasgw beyond the brig, quhill thai be ferther avysit.
Item, for kepyng of the Sondaye, it is statute and ordanit that ilk Sondaye befoir none ane of the baillies, with ane officer, and sum vther honest men, pas throuch the toun to vise tavernis and flesche mercat, and incais ony flesche be fund selland eftir nyne houris the samyn to be eschetit and disponit to the pure and the keparis of tavernis dischargit; and gif thai contempne, to be punist at the sicht of the prouest, baillies and counsale.
24 August 1574.
The prouest, baillies, and counsale, haveand consideratione and respect to the greit and haynous cryme committit be Robert Pirry, tailyoure, in dispersonyng and cruell invading of George Elphinstoun, ane of the baillies of this toun, with ane drawin quhynger within the tolbuytht, stryking him and bludyng him thairwitht, and stryking of the officiares, and contemptious, nocht onely disobeying thame in executioun of thair office bot als iniuryng thame in maner foirsaid, thairfoir thai haue ordanit the said Robertis fredome to be cryit doun and him to be reput vnfre in tyme cumyng, and als to be banist the toun induryng the prouest, baillies and counsales willis, and pas awaye betuix and Sondaye at ewin nixt; and incace he repair within the towne without thair licience obtenit, is content of his awne confessioun to want his rycht hand.
Als, the prouest, baillies and counsale, in respect of the oft and syndry disobedientis done be Johne Walker, fleschoure, in dissobeying the officiares in executioun of thair office, and als in manassing and boisting of thame with ane knyf, sayand he suld stryk thame thairwitht, ordanis his fredome to be cryit doun and he to be repute vnfre in tymes cumyng during the prouest, baillies and counsales willis.
3 September 1574.
Petir Patersoun and Alane Craufurd ar fund in the wrang and amerchiament of court for trublance done be thame to Jonet Lile, in Dauid Cottis borne, vpon the secund of September instant, viz., the said Petir for struglyng and castyng of hir doun; and the said Alane for harlyng of hir be the feit and castyng wp hir taill, and thereftir stryking of hir with ane flaill on the arme makand the samyn blay; and dwme gevin thairupoun.
7 September 1574
Robert Scott, travellour, is maid burges and freman of the burght and citie of Glasgw, quhais fines wes remittit and gevin him gratis be the baillies and counsale, at the requeist of Robert Scott, scrybe to the lordis of Sessioun.
17 September 1574.
In presens of the baillies and counsale, Gilbert Young, cordiner, is maid burges and freman, . . . . quhais fynes wes gevin presentlie to the maister of work for his daylie continewing with the workmen in the tolbuytht, mending awating on thame, and expenssis debursit be him thairupoun.
5 October 1574.
The court of the burght and citie of Glasgw, for creatioun and presenting of lytis for the baillies and prouest, be ane nobill lord Robert lord Boyd, George Elphinstoun, Archibald Lioun, and James Flemyng, auld baillies, haldin in the tolbuytht thairof, the fyft daye of October the yeir of God jm vc lx fourtene yeiris.
The quhilk daye, the auld baillies and counsale ordanit ane commissioun to be maid and selit to ane noble lord Robert lord Boyd, of the office of provestrie of the said burght and citie for this yeir to cum quhill Michaelmes nixtocum, conforme to vse and wont, and that according to my lord archibischop of Glasgwis nominatione of him, contenit in ane writting subscriuit be his hand, quhilk the said lord Boyd producit and desyrit to be registrat in thir buikis; of the quhilk lettir the tenour followis:—We, James, be the mercie of God, archibischop of Glasgw, vnderstandyng the habilite and qualificatioun of ane noble lord Robert lord Boyd, baillie of oure barone of Glasgu, in ministratioun of justice wrychtlie to all persounes, and that the office of prouestre of the burcht and cietie of Glasgw has newir or seyndill bene separatit in sindry persounes handis fra the baillierie of oure baronie foirsaid, thairfore, and for sindry considerationes moving ws, we have nominat and presentit, as be the tenoure heirof nominatis and presentis the said noble lorde Robert lorde Boyd prouest of our said burght and cietie of Glasgw for this instant yeir tocum, and siclyk yeirlie in all tymes cumyng heireftir following, incaise it plese him to accept the samyn on him, during all the dayis of oure lyftime, wissing and desyring the baillies counsale and communite of oure said cietie, present and to cum, to geve, seill, and to deliuer to him thair commissione of the said office of provestrie, conforme to vse and wont, for this instant yeir, and siclik yeirlie at Michaelmes in tymes cumyng duryng oure livetyme, gif he will accept the samyn as said is; and this our present nominatioun, irreuocablie to be obseruit be ws, to all and sindry quhome effeiris we mak knawin be thir presentis subscrywit with oure hand, at Glasgw, the fyft daye of October, the yeir of God jm vc threscoir fourtene yeiris, befoir thir witnes, maister Andro Haye, persoune of Renfrew, maister Williame Scott, and maister Henry Gibsoun, etc. The prouest hes resauit the originale heirof in presens of the baillies and haill counsale.
The quhilk daye, my lord prouest requeistit the auld baillies and counsale to suffer certane dekynnis of craftis to be admittit to cum in the counsalhous to stand and heir the lytis of the baillies chosin and nominat this yeir, but preiudice of the priuilegis, liberteis, or vse in votyng, owther of craftis or merchandis, in ony yeir thereftir; at quhais requeist the said baillies and auld counsale hes permittit thre dekynnis of craftis to be present in the counsalhous, to stand by, heir, and see the saidis lytis nominat this yeir onelie, sua that induce na practik in tymes thereftir.
Lytis lytit be the prouest, baillies and auld counsale, to be presentit to my lord archibischop of Glasgw for nemmyng of twa or thre of thame in baillies for this instant yeir to cum, requeisting allwayis my lord to nominat thre in respect of the multitude of the peple and trubles in office:—George Elphinstoun, Archibald Lyoun, James Flemyng, auld baillies; maister Adame Wallace, William Conyghame, Johne Flemyng, merchand, Johne Wilsoun, pewderar, James Braidwood, cordiner. Quhilkis lytis being presentit that samyn instant daye to my lord archibischop of Glasgw, and the requeist foirsaid maid to him, he nominat baillies for this instant yeir, George Elphinstoun, Archibald Lyoun, maister Adam Wallace.
6 October 1574.
The foirsaidis prouest and baillies ressauit thair commissiones, acceptit the samyn on thame, and gaif thair aithe for leill and trew administratione in thair offices durying the tyme thairof, and thaireftir thai, accumpaneit with the auld baillies, chesit the counsale for the yeir to cum, suorne thairto.
Consilium pro presenti anno:—James Flemyng, Dauid Lyone, Williame Conyghame, Andro Baillie, Robert Steward, William Rowat, tailyour, Andro Riche, thesaurare, Dauid Lyndsaye, elder, George Herbertsoun, Johne Flemyng, Johne Wilsoun, pewderar, Johne Gilmour, cordiner, George Young, baxtare, William Watt, maister of work.
Lytis for the officiaris:—James Andersoun, Robert Lettrik, Johne Stobo, Johne Fowlare, Johne Watsoun, youngar, Thomas Robesoun. Officiaris for this present yeir:—James Andersone, Robert Lettrik, Johne Stobo, Johne Watsoune, youngare.
The keiparis of the keyis for this present yeir:—Johne Arbukle, the key of the south lok of the mekle schryne; Robert Mure, the key of the north lok thairof; James Flemyng, the hyngand lokis key of the samyn; Dauid Lyndsaye, ane of the keyis of the litle kist within the schryne; Johne Flemyng, the wther key thairof; Dauid Lyone, the key of the box quhairin the commone seill is.
Statuta pro presenti anno septuagesimo quarto (fn. 1):—
Item, it is statute and ordanit be the baillies and counsale of Glasgw,that thair be na derare aill sauld nor sax penneis the pynt, and that the samyn be kingis aill and werraye guid, vnder the pane of viij s. for the first falt, the second falt delyng of the brewing, the thrid falt breking of the lwmes; and that nane brew except fremen, or the relictis of fremen, vnder pane of delyng of thair brewing and breking of the lwmes.
Item, it is statute and ordanit that the foure pennie laif wey xiiij vnce, guid and sufficient stuff, weill baikin breid, and that ilk baxter haue ane prent on thair breid sua that the samyn maye be knawin, vnder the pane of viij s.; and that the deikin of the craft visie the breid and exerce this statute scherplie, and gif he be fundin negligent he to be pvneist be the baillies and counsale as repugnant to the commoun wealtht.
Item, it is statute and ordanit that thair be na myddynnis laid vpone the foirgate, nor yit on the greyn, and that na fleschouris teyme thair vschawis vpone the foirgate, vnder the pane of viiij s. ilk falt, vnforgewin, and that na stanes nor tymmer ly on the gate langir nor yeir and daye, vnder the pane of escheting of thame.
Item, it is statute and ordanit that thair be na blawin muttoun, nor breding of flesche, vnder the pane of viij s.; that na tallowne be sauld of greit quantitie to pas of the toun quhill Faustrenis ewin, vnder the pane of eschetyng thairof; and that na fleschouris by talloun nor deid flesche to sell agane, vnder the pane of eschetyng of the samyn; and that [baytht] fleschouris [and] fischeris present thair haill flesche and fische that thai bring to the towne all at anis to the mercat, vnder the pane of eschetyng of samekle as beis fund hid in houssis, and siclik all kynd of fischeis be presentit to the mercat togidder.
Item, it is statute and ordanit that thair be na tallowne derare sauld nor xvij s. the stane, and that nane be sauld to outtintownes men, vnder the pane of eschetyng of the samyn, and that na fleschouris by tallowne [in] preiudice of the towne vnder the pane of viij s. ilk falt.
Item, it is statute that the pund of candill be sauld for tuelf penneis the pund, and that the samyn be small wickeit and weill tallownit, vnder the pane of viij s.; and that na vnfre persones mak candillis to sell agane, vnder the pane foirsaid.
Item, it is statute and ordanit that na hukstaris by haye, straye, nor corne to top or sell quhiddir thai be fre or vnfre, without thai hauestabillyng, vnder the pane of viij s.; and that na corne remane in the mercate quhill x houris of the daye, vnder the said pane to be tane of the byar and alsmekle of the seller.
Item, it is statute and ordanit that na maltman by beir in the mercat and send awaye the malt thairof to wther placeis downe the Watter of Clyde, bot that he present the samyn to the mercat of Glasgw, ilk falt viij s., vnforgewin.
Item, the provest, baillies and counsale, vnderstandand the name of God to be blasphemit, and the command thairanent to be maist oppinlie brokin, but pwnischment, in this toun, thairfoir it is statute and ordanit that na maner of persoun or persounes blaspheme Goddis name, owther be bannyng or suering, in tymes cumyng, vnder the pane of vnlawis contenit in the actis of parliament; and ordanis thair officiares to pas throw the towne daylie and tak tryall and pvneiss the samyn, conforme to the actis of parliament.
Item, it is statute and ordanit that thair be na muttoun scoirit on the bak nor na pairt thairof, nor yit lattin doun before, bot ane scoir owder befoir or behynd, wnder the pane of viij s. ilk falt; and that na martes be bowbredit nor lattin doun, vnder the said pane; and that the hydis and skynnis, with tallone, nocht tarladerit, be brocht witht the bouikis togiddir to the mercat, vnder the said pane.
Item, anent the viseyng of the mele mercat, ordanis ane of the counsale, with ane officer awaytand on him, ilk Monondaye and Frydaye ouklie about, se, cers, awayit and atend on the said mercat, vnder the pane of viij s. incais of refuse; and that the baillies visie the rest of the mercatis.
Item, it is statute and ordanit that thir persounes vndervrittin, euery ane within the gaytis quhair yai duell, pas owklie throcht the samyn, and taist the aill brewin within the boundis limitat to thame, to se gif the samyn be sufficient, accordyng to the price taxt thairupon, and quha brewis that are vnfre, and to reporte the samyn owklie to the baillies. For the Rattonraw and Drygate, Johne Dalrumpill, Johne Spreull; fra the Wyndheid to the Blakfreris, Cuthbert Herbertsoun, William Rowat; fra the Blakfreris to the Croce, Archibald Mure, Johne Tailyour; for the Gallogate and Troyngate, Johne Woddrop, Johne Bell; fra the Corss to the Nethir Barasyett, Mathow Wilsoun, James Craig; fra the Barasyett to the Brig and Stokuell, Johne Arbuckill, Johne Gilmour, Gilbert Newlands.
Item, the baillies, counsale and dekynnis, consentis to ane statute to be maid be the minister and kirk for the downeputting and dischargeing of ryotus bancatyng at brydallis, baptisyng of barnes, or vpsitting, as thai sall devise thairanent.
29 October 1574.
The prouest, baillies and counsale, vnderstandand the contagious seiknes callit the pest to be newlie rissin within this realme, and for awaye halding and preseruation of this gud town thairfra, hes witht ane consent diuisit and maid thir statutis and ordinances eftirwrittin. In the first, it is statute and expreslie inhibit and forbiddin that na maner of persones, induellaris or that cumis furtht of Leyth, Kirkcaldy, Dysart, Brwnteland, quhilkis ar ellis infectit and suspect of the said pest, nor yit of ony wther townes or placeis that heireftir sall be suspect or fylit, presume to resort and trawell to this town, or vse trafficque witht the inhabitantis thairof; and that nane of the inhabitantis of this town trawell towart ony of the saidis placeis or vse ony kynd trafficque witht thame, vnder the pain of deid.
Item, becaus that Edinburght as yit is nocht suspect of the said pest, except Bellis Wynd, thairfor it is statute and ordanit that na persone inhabitant of this toun to pas to Edinburght without ane testimonial, and that thai report ane fra the baillies of Edinburght that thai haue nocht hantit nor trafficque with suspect persones; and that nane be resauit furtht of Edinburght or wther vnsuspect place but ane sufficient testimoniall specifeand quhairfra thai cum, vnder the pane of ten pundis; and gif ony inhabitantis of this toun trauellis to ony suspect place and bringis hame ony merchandis or wairis quhairthrow ony infectioun salhappin to cum in this toun, thai nocht reportand ane sufficient testimoniall as said is, the saidis persones bringand the said infectioun to suffer the deid, and thair guddis to fall in eschete alsua.
Item, it is statute and ordanit that na maner of persones induellaris in this towne ressait in their houssis ony maner stranger reparand thairto, except that thai cum first to the prouest and baillies, or thair deputtis, and present thair testimoniales, that it maye be knawin quhairfra thai come; and that nane within this towne ressaue ony persone that cumis about the toune or att thair backyardis; and that na induellar of this toune entir bot at the portis and foirgate, vnder the pane of x lib. ilk falt, and that ilk persone clois his awne yard end, as he will ansuer on his lyf; and gif ony beis apprehendit cumand about the toune, the samyn to be tane and presonit and handilit as suspect persoun.
Item, it is statute that na trauelloure be ressauit in this towne fra vnsuspect placeis but ane sufficient testimoniall of the burght quhair he duellis, and gif he duellis in landwert out of burght the testimoniall to be subscryuit be the principall minister of the perrohin quhair he duellis at; that all testimoniales beir the names of, number of the persones, quhairfra thai come, quhat tyme, to quhat purpos, quhat ladinnyng thai bring, how money hors; and gif ony ressaues testimonialles of this towne, that gif ewir he happinis to cum heir agane to report ane testimoniall sufficient on the back of ouris, berand quhen and quhair he sauld his ladinnyng, wtherwys nocht to be ressauit; and that nane be ressauit at the brig to mak merchandice without thai cum first throw the town in at ane of the kepit portis and schaw thair testimoniales to the prouest or baillies, and the samyn recognoscit as said is.
Item, the prouest, baillies and counsale hes depute thir persones to vise the brig and watter daylie at twa tymes, viz., Dauid Lione, Williame Watt, Johne Gilmour, witht Archibald Lioun, baillie; and na persones to ressait hering nor sufferit to mak merchandice thairat quhilkis ar owtintownes men, bot as thai command and promittis allanerlie; and gif onygentill men duelland in landwert is desyrus of hering thai to cum thameselfis, bot in cais gentill men of hiar degre, sick as erle, lord, barrown, desyris, thai to send ane of thair speciall recognoscit houshald seruandis witht thair hand writtis, and sick persones to be ressauit and conwoyit be the portaris and sersaris.
Item, it is statute and ordanit that na pyparis, fidleris, menstrales, or ony wther vagabundis, remane in this toun fra this tyme furtht during the tyme of the pest but speciall leif of the prouest or vnder the pane of scurgeyng and banisment; and alsua that na pure commone beggaris remane in this towne fra this furtht except thai that hes bene borne within burght and parochin or hes bene lang within the samyn, and that thai depart furtht of this towne within xxiiij houris nixt, vnder the pane of burnyng on the cheik; and ordanis tham that is permittit to remane, to cum to the tolbuytht and ressaue thair merkis the morn and gif in thair names, and gif it salbe fund that ony of the beggaris resaueris of the merkis trawell furtht of the burght or parrochin and cum in agane thairinto thair merkis sal be tane fra thame and thai banist for ewir.
Item, it is statute and ordanit that gif ony persone or persones, induellaris in this towne, happinis fra this tyme furtht to fall seik, that the maister of the hous incontinent cum to the visitouris and sercharis of the gait or ony of thame and schaw the samyn that thai maye be sichtit; and gif ony persones happinis to deceis in ony hous within this toun that the maister of the hous sall cum to the visitouris appoyntit for sichting thairof or thai be wyndit, vnder the pane of banisment; and for ferther performyng of this statute, thai haue maid and depute thir persones vnderwrittin to be sersaris of the toun, ilk ane in the gaittis quhair thai duell, quha sall pas twys on the daye throcht the gait apoyntit to thame, viz., in the mornyng and evinnyng, and visie and inquyre of ilk hous that nane be seik, bot it be schawin to thame be the saidis inhabitantis; and to begyn thairto the (blank) ilk twa thair xv dayis about.
Serchearis for the Rattounraw and Drygate and about the Wyndheid, Johne Spreull, Johne Fultoun, Cuthbert Herbertsone, Dauid Wylie; fra the Wyndheid to the Blakfreiris, Johne Darumple, Gilbert Hall, Williame Rowat, Johne Lourie; fra the Blakfreiris to the Cros, Johne Flemyng, Andro Heriot, Archibald Muir, Johne Wys; Troyngait and Gallogate,Dauid Lyndsaye, Johne Wilsoun, Johne Woddrop, Williame Maxuell, Quintene Kay, Thomas Normocht; fra the Cros to the Barrasyett, Mathow Wilsoun, James Braiduod, younger, George Young, Petir Lymburner; fra the Barrasyett to the brig, Patrik Howe, Johne Arbuckle, Johne Luff, Niniane Syare; Stockuell and about, Dauid Moresoun, Johne Johnsoun.
Item, it is statute and ordanit that all the inhabitantis of the toun obey the serchearis forsaidis in executioun of thair office, and incais thai be disobedient to thame thair disobedience to be punist as thai disobeyit the prouest or baillies.
Item, the prouest, baillies and counsale ordanis thir four portis to be kepit daylie continewalie, and at ewin the portaris to deliuer the keyis to ane of the baillies. Item, the Stabilgrene port to be kepit be Johne Fouler, the Gallogate port be Archibald Lettrik, the Troyngate port be James Rob, the Southe port, callit the Nethir Barrasyett, be John Andro.
Item, ordanis the Rattounraw, Drygate, and Grayefreir portis to be maid sure and lokit and stand lokit and the keyis thairof deliuerit to the baillies, and nane to repair thairthroucht without speciall licence of the prouest and baillies, and thai to ansuar thairfoir.
2 November 1574.
Anent the mater mowit be Michael Barde, commone procuratour of the towne of Glasgw for the tyme, aganis Sir James Flemyng contenit in bill beryng in effect that quhair be the space of thre yeiris lastbipast the said Sir James faythfullie promist that quhat tyme or how sone he obtenit the gift and possessione of Sanct Christopheris chapelanrie, eftir the deceis of vmquhile Syr Andro Walkar, last chaplane thairof, that he suld demitt and ouregewe the chaplanrie that he had of befoir, callit St. Mungois chapelanrie, in the handis of the prouest, baillies and counsale, as patrounes thairof, to be gewin and disponit be thame to sum wtheris at thair plesoure, and albeit it be of veritie that the said Sir James hes obtenit fra the town the gift of the said Sanct Christopheris chaplanerie be the saidis vmquhileSyr Androis deceis, witht full possessione thairof, nochtheles he will nocht ourgeve nor dimit the said wther chaplanrie of Sanct Mungo in the said prouest, baillies and counsales handis, patrounes thairof, to be gewin be thame to sum wther at thair plesoure, without he be compellit, as at mair lengtht is contenit in bill; in the terme assignit be ane warnyng maid be Johne Stobo, officiar, to the said Sir James, to heir decreit pronuncit in the said mater, comperit James Flemyng, now commone procuratour, and desyrit proces, and the said Sir James Flemyng beyng lauchfullie warnit oftymes callit and nocht comperand, the baillies, the rychtis rasones and allegaciones of baytht the said parteis harde sene and considerit and thairwitht ryplie avysit, decernit and ordanit the said Sir James Flemyng to ouregeue and dimit the said chaplanrie of Sanct Mungois in the handis of the said prouest, baillies and counsale, as patrounes thairof, to be gewin and disponit be thame at thair plesoure to sum wtheris, within xv dayis nixtocum; and that becaus the said commone procuratouris bill beyng admittit to his probatioun he prewit the samyn sufficientlie, as wes cleirlie vnderstand to the said baillies quha ordanit executoriales to pas heirvpone in forme as efferis.
12 November 1574.
The prouest, baillies and counsale gave and disponit to Johne Lourie the almous bed last possest be vmquhile John Gibsoun, vacand in thair handis be his deceis, to be brukit be the said Johne Lourie witht all annuellis dewiteis pertenyng thairto, during all the dayis of his lyftyme.
19 November 1574.
Anent the mater mouit be maister Henry Gibsoun, as executour to vmquhile Johne Gibsoun, for non-payment of twa yeiris annuell of the almous bed pertenyng to the said vmquhile Johne contenit in bill, bayth the parteis personaly present, the said Dauid allegit the samyn to be pay it to the said Johne, quhilk allegeans as irrelewant the baillies admittit to the said Dauidis probatioun, and for prewin thairof the baillies assignit the xxvj daye of Nowember instant, partibus citatis.
30 November 1574.
Robert Thomsone is fund in the wrang and amerciament of court for the lifting of the myd tre of the port besyde the Castelyett, it beyng lockit and the portar at his denner, at his awin hand, and entering thairat, it beand lockit, and dwme gevin thairupoune; souertie for his entre quhen he beis requyrit, John Mure, fleschour.
17 December 1574.
Anent the libellit precept rasit at the instance of maister Robert Herbertsoun, persone of Aire, and executoure dative to vmquhill Margaret Craig, his moder, and Helene Craig, hir sister, airis to vmquhile Robert Baxter, burges of Glasgw, aganis Elizabetht Miller, relict of the said vmquhile Robert, summondyng the said Elizabetht to heir and se ane decrete obtenit be the saidis Margaret and Helene aganis the said Elizabetht, in ane court of the toun of Glasgw, haldin be James Hammiltoun of Torrens, prouest of Glasgw for the tyme, maister Johne Hall, Johne Mure, and Andro Mwre, baillies of the samyn, of the dait the xi daye of Marche the yeir of God jm vc xlix yeiris, to be transferrit in the said maister Robert, executour dative to the saidis Margaret and vmquhill Helene, actiue, and in the said Elizabetht, relict of the said umquhil Robert, passiue, and the said Elizabetht to be decernit and adiugit be oure decreit of court to refound and deliuer to the said maister Robert the airschip guddis eftir following, contenit in the said rolmont and decreit of court of the dait foirsaid, that is to saye, ane govne of blak vatit witht veluet and lynit witht blak buge; item, ane lettgant bed furneist witht Flandreis werdour, blancattis, scheittis and coddis, witht all maner of wtheris necessaris, pryce xx lib.; item, ane Flanderis comptir of the greitar bynd, with lok, key and bandis, pryce thairof ten pundis; item, sait langsaddill of carvit work, pryce thre lib. money; item, ane chyre, price thairof xiiij s.; item, ane greit schryne, pryce iij lib.; item, ane aissing, price x s.; item, ane brod, payntit vpone the samyn the image of oure Lady, pryce thairof xvi s.; item, ane meit almery of carvit work, price thairof, vi lib.; item, ane lang meit burd witht furmes effering thairto, price thairof, foure pund; item, ane burd claytht of dorneverk with touellis,pryce thairof xxx s.; item, ane pewdir plait, pryce thairof vi s., callit commonelie ane comptir fute; item, ane greit pewdir chargeour, price thairof xiiij s.; item, ane luggit dische, price thairof thre s.; item, ane brassyn garde, price thairof v s.; item, ane pewdir trunscheoure, price thairof xl d.; item, ane pewdir salser, price thairof, xl d.; item, ane siluer spwne of ane vnce vecht, price thairof xviiij s.; item, ane tyn saltfatt, price thairof iij s.; item, ane greit maser, doubill ouregilt witht gold, veyand xv vnce vecht, price of the vnce xx s.; item, ane siluer pece veyand xvi vnce, pryce of the vnce xx s.; item, ane brassyn chandiller, pryce thairof xvi s.; item, ane tyn quart, pryce thairof xvi s.; item, ane tyn pynt, pryce thairof viij s.; item, ane gret messewing basyng, witht the lawar effering thairto; item, ane brassyn chawfer, pryce thairof xiiij s.; item, ane irne chimnaye witht raxis, weyand aucht stane wecht, pryce of the stane wecht xij s.; item, ane speit, ane cruik, ane tangis, ane ladyll of irne, veyand ane stane wecht, pryce thairof, xij s.; item, ane greit pott of foure gallownes, price thairof thre lib.; item, ane mekill pan, price thairof iij li., ane brewin caldrowne of xvi gallownes, price thairof viij li.; item, ane masking fatt, ane wirt trocht, price of baytht liij s. iiij d.; item, ane levand tracht, price xiiij s.; item, ane boucing tvne, price thairof, xiiij s.; item, ane hogheid, ane barrell, pryce of baytht (blank) item, ane baking burde, pryce thairof xxx s.; item, ane harthorne, pryce thairof xxx s.; item, ane pair kardis, price v s.; item, ane paire of woll kamys, pryce thairof xiiij s.; item, ane licht ax, pryce thairof vi s. viij d. Siclik the said Elizabetht of befoir wes decernit and ordanit be the saidis prouest and baillies to refound and delyuer the foirsaid airschep guddis and geir to the saidis wmpuhill Margaret and Helene, airis foirsaid, conforme to thair said decreit, or ellis to allege ane rassonable caus quhy the samyn suld nocht be done, as at mair lentht is contenit in the said libellit precept; the said maister Robert comperand be Johne Herbertsoun, his procuratour, and the said Elizabetht being personalie present, the baillies decernit and ordanit the said act of the dait foirsaid to be transferrit, as thai be thair decreit transferris the samyn in the said Elizabetht Miller, passiue, and in the said maister Robert, as executoure dative to the said vmquhile Margaret, his moder, and Helene, hir sister, airis to the said vmquhill Robert, actiue; and als decernis and ordanis the said Elizabetht Millerto refound content and deliuer to the said maister Robert the airschip guddis abonewrittin. . . . .