Close Rolls, May 1230

Close Rolls, May 1230

Hic incepit currere Sigillum de Scaccario.

[m. 6.]

Pro uxore Roberti de Veteri Ponte.—Monstravit regi Idonea que fuit uxor Roberti de Veteri Ponte, quod cum ipsa et homines sui de Esenden' quieti sint de sectis comitatus et hundredi, vicecomes Rotel' illos, una cum aliis qui hujusmodi sectas faciunt, distringis (sic), ad reddendum finem quem milites comitatus sui fecerunt coram justiciariis ultimo itinerantibus in eodem comitatu pro transgressione eorum qui sectam faciunt ad comitatum. Et mandatum est vicecomiti Rotel' quod, si predicta Idonea et homines sui quieti sint de sectis comitatus et hundredi, ut predictum est, et finis ille factus fuerit pro transgressione eorum qui sectam faciunt ad comitatum, tunc eis pacem inde habere permittat. Teste S. de Sedgrave apud Westmonasterium, viij die Maii.

De nave permittenda abire.—Mandatum est ballivis Bristoll' quod non obstante mandato regis eis facto de navibus in portu suo arestandis contra transfretationem regis, navem Thurfini le Paumer ibidem arestatam occasione transfretationis regis sine dilatione abire permittant. Teste S. de Sedgrave apud Westmonasterium, viij die Maii.

De quodam prisone replegiando.—Mandatum est B. de Insula quod si Johannes de Brehull', captus et inprisonatus apud Aylesbir' pro transgressione foreste regis, invenerit ei bonos et salvos plegios de stando recto coram justiciariis foreste cum primo ad partes illas venerint ad placita foreste tenenda, tunc ipsum ita replegiari faciat. Teste ut supra.

Hibernia. Pro Radulfo de Trublevill'.—Rex R. de Burgo, justiciario Hibernie, salutem. Bene reducimus ad memoriam quod manerium de Balimadun', quod Robertus Ruffus tenuit de ballio domini J. regis, patris nostri, et quod dilecto et fideli nostro Radulfo de Trublevill' per cartam nostram concessimus, in manum nostram capi precepimus eo quod decepti fuimus in concessione quam eidem Radulfo inde fecimus. Et quia Johannes le Cordewaner, cui predictus Radulfus manerium illud commiserat ad feodi firmam pro x marcis ei annuatim reddendis, eidem Radulfo liberavit x li. pre manibus; eidem Johanni de denariis nostris liberari precepimus x marcas et uxori ejus v marcas, dantes vobis in mandatis quod eidem Radulfo redditum illius manerii de termino Sancti Johannis Baptiste, anno etc. xij, et blada et catalla sua usque ad festum Sancti Michaelis anno eodem, et similiter uxori ejusdem Johannis catalla et blada sua seminata in terra ejusdem manerii que ei assignata fuit nomine dotis sue, habere permitteretis; postea vero concedentes eidem Radulfo predictum manerium de Balymadun' cum pertinentiis tenendum ad vitam suam, ei inde saisinam fieri precepimus. Quo comperto, quia predicta uxor predicti Johannis saisita fuerat de terra in eodem manerio ei assignata nomine dotis, que quidem terra capta fuit in manum nostram, et cum manerium illud in manum nostram captum fuisset per preceptum nostrum, conquerens de predicto Radulfo et hominibus suis quod eam inde disseisivissent injuste et sine judicio; tulit super eos breve nove disseisine; super quo facto, per literas vestras ad nos inde destinatas nos duxistis consulendos; et nos vobis respondentes mandavimus quod secundum legem et consuetudinem terre nostre Hibernie faceretis quod inde fuisset faciendum. Cum etiam perventum esset ad recognicionem illius assise faciendam, recognoverunt juratores illius assise quod idem Radulfus, cui videbatur in hoc non deliquisse, amitteret saisinam dicti tenementi et dampnatus esset ad xx marcas eidem uxori dicti Johannis reddendas occasione illius dissaisine pro dampnis suis. Et ideo vobis mandamus quod convocatis recognitoribus dicte assise, diligenter ab eis inquiratis sub debito prius prestiti sacramenti si predictus Radulfus et homines sui nominati in brevi nove dissaisine aliter quam per preceptum nostrum ingressi fuerunt predictam terram, de qua predicta mulier questa est se injuste et sine judicio fuisse dissaisitam; et si, facta inde inquisicione diligenti per eosdem, constiterit vobis ipsum Radulfum et homines suos non aliter quam per predictum preceptum nostrum ingressos fuisse saisinam dicte terre, tunc de predictis xx marcis ipsum quietum esse faciatis. Si vero per inquisicionem predictam certificati fueritis ipsum Radulfum et homines suos predictos aliter quam per predictum preceptum nostrum terram illam fuisse ingressos; vobis relinquimus faciendum quod de jure et secundum legem et consuetudinem terre nostre Hibernie videritis faciendum. Teste S. de Sedgrave ut supra.

De exenniis austurcorum vel aliarum avium.—Mandatum est vicecomiti Linc' quod cum aliquod exennium austurcorum, girofalconum vel aliarum avium de Norwegia vel aliunde in partibus suis ad opus regis advenerit, illud recipiat et salvo custodiat donec Henricus de Hauvill', cui rex vult illud liberari, pro eo venerit; cui etiam cum aliquod hujusmodi exhennium ad ipsum vicecomitem perventum fuerit, sine dilatione aliqua scire faciat. Teste S. de Sedgrave apud Norht', xvij die Maii.
Eodem modo scribitur vicecomiti Norf' et Suff'.

De navibus deliberandis.—Mandatum est ballivis portus de Winchel' quod tres naves quas in portu suo arestaverunt, quarum unam ducit Petrus Johannis de Susey et aliam Bernardus de Sancto Johanne et terciam Julianus de Camer', deliberari faciant cum mercandisis in eis contentis, non obstante mandato regis eis directo de hujusmodi navibus arestandis; accepta prius ab eis securitate per sacramentum eorum quod alibi non divertent cum navibus illis quam in terram regis de Burdegala et Baiona. Teste ut supra.

De terris que fuerunt W. de Braos'.—Rex commisit W. comiti Marescallo omnes terras terras (sic) que fuerunt Willelmi de Braos', custodiendas quamdiu regi placuerit. Et mandatum est vicecomiti Devonie quod ballivis ipsius comitis has literas deferentibus sine dilatione plenam saisinam habere faciat de omnibus terris que fuerunt ipsius Willelmi in balliva sua; et si quid inde per ipsum vel suos captum fuerit vel amotum post captionem ipsius Willelmi, id eisdem ballivis reddi faciat. Teste S. de Sedgrave apud Heref', xxv die Maii.

Eodem modo scribitur vicecomitibus Heref', Surr' et ballivo de Kaermerdin' et Waltero de Clifford' de terra que fuit ipsius Willelmi in Sancto Claro.

Patens.—Et mandatum est omnibus militibus et liberis hominibus et aliis de terris, tenementis et feodis que fuerunt ipsius Willelmi, quod eidem comiti et ballivis suis has literas deferentibus in omnibus que ad custodiam illam pertinent, intendentes sint et respondentes. Teste ut supra.
Et mandatum est vicecomitibus Hereford' et Surr' quod nullam districtionem faciant in terris que fuerunt ipsius W. pro debitis que idem W. vel R., pater suus, domino regi debuit, quamdiu terre predicte fuerint in manu domini regis et in custodia predicta. Teste ut supra.

De quarellis mittendis usque Skenefrith'.—Mandatum est constabulario Sancti Briavelli quod habere faciat constabulario de Skenefrith' trescentos quarellos de quarellis regis qui sunt in custodia sua. Teste rege apud Hereford', xxvij die Maii.

Pro abbate de Flexl'.—Mandatum est constabulario Sancti Briavelli quod permittat abbatem de Flexl' habere fabricam suam errantem in foresta nostra de Den', sicut habere consuevit ante transfretationem regis per preceptum suum, et maeremium in eadem foresta sicut prius habere consuevit. Teste rege apud Heref', xxx die Maii.

Pro servientibus de Sancto Briavello.—Mandatum est eidem quod permittat servientes regis de Sancto Briavello habere pasturam suam in foresta Sancti Briavelli, et husbot' et heibot', sicut ea habere debent et habuerunt ante transfretationem domini regis. Teste ut supra.