Close Rolls, February 1232

Close Rolls, February 1232

De respectu loqucle.—Mandatum est vicecomiti Sumers' quod loquelam, que est in comitatu suo, per breve regis de recto, inter Thomam de Stok' petentem et Rannulfum de Hurnle tenentem, de duabus partibus unius hide terre cum pertinentiis in Ingelescumb', ponat in respectum usque in unum mensem a die Pasche anno etc. xvj. Teste rege apud Westmonasterium, iij. die Februarii, anno eodem.

Pro Margareta Biset.—Mandatum est W. Carleolensi episcopo, thesaurario regis, quod fieri faciat ad opus Margerete Byset quandam culcitram de nigro cendalo, et quoddam coopertorium cum russo grisio. Teste rege apud Lamh', xxiij. die Januarii, anno ut supra.

Pro Andrea Bukerel.—Mandatum est vicecomiti Kancie quod de terra, quam Robertus de Cyriton' dimisit ad firmam Andree Bukerel in Delce, et quam idem vicecomes cepit in manum domini regis per preceptum suum, talem saisinam eidem Andree habere faciat, qualem inde habuit antequam capta fuit in manu domini regis per preceptum domini regis; et si quid inde amotum fuerit, id ei sine dilatione reddi faciat. Teste ut supra.

Mandatum est Vincentio de Hasting' et probis hominibus de Wincheles' quod liberari faciant presentium latori deferenti literas H. de Burgo etc. magnam galiam regis ad opus ipsius H. etc. cum remis ejusdem galie et aliis armamentis ad ejusdem galie gubernationem necessariis. Teste rege apud Westmonasterium, iiij. die Februarii.

De vinis liberandis.—Mandatum est custodibus vinorum regis Suhamt' quod de vinis regis, que sunt in custodia sua, liberent baillivis Suhamt' duo dolia vini de prisa regis, et quatuor dolia de empto, carianda usque Merleberg'.

Pro abbatissa de Wherewell'.—Mandatum est justiciariis qui proximo itineraturi sunt in comitatu Suhamt', quod assisam nove dissaisine, quam abbatissa de Wherewell' aramiavit versus homines regis de Andevr' de tenemento in Middelton', et que remansit per preceptum regis in ultimo itinere justiciariorum itinerantium in comitatu predicto, eo quod assisa illa tetigit dominicum regis de Andevr', ut dicebatur, capiant in itinere suo, non obstante predicto precepto regis prefatis justiciariis alias facto de assisa illa non capienda. Teste ut supra.

Pro Rogero pincerna justiciarii.—Mandatum est Johanni de Monem' quod illas xl. marcas, per quas Nicholaus le Seculer finem fecit cum eo pro maritagio filii et heredis Ricardi de Maworthm, et quas ipse Nicholaus ei liberavit, sine omni dilatione reddat, de dono regis, Rogero pincerne H. de Burgo etc., cui rex prius concesserat custodiam et maritagium predicti heredis. Teste rege apud Westmonasterium, v. die Februarii.

De damis datis.—Mandatum est Ricardo de Muntfichet quod habere faciat Hugoni de Nevill' viij. damas et duos damos in bosco de Hadfeld' extra parcum, ad parcum suum de Halingebir' instaurandum, de dono regis. Teste ut supra.
Mandatum est justiciariis itinerantibus in comitatu Kancie quod nullam occasionem (fn. 1)

Pro priore de Cumwell'.—Rex per cartam suam concessit priori et canonicis de Cumwell' quod ipsi et eorum successores habeant inperpetuum unum mercatum apud Cumwell' singulis septimanis per diem Veneris. Et mandatum est vicecomiti Kancie quod predictum mercatum per totam ballivam suam clamari faciat et teneri, sicut predictum est. Teste rege apud Westmonasterium, vj. die Februarii.
Eodem modo scribitur vicecomiti Sussex', hoc verbo 'teneri' excepto.

Pro Rannulfo de Hurle.—Mandatum est vicecomiti Sumerset' quod habere faciat Rannulfo de Hurle talem saisinam de terra illa cum pertinentiis in Norton', de qua rex ipsum per voluntatem suam disseisivit, et quam rex postea commisit Roberto de Turvill', qualem idem Rannulfus inde habuit antequam per preceptum regis inde fuisset disseisitus. Teste ut supra.

Pro priore de Cumwell.—Mandatum est Thome de Muleton' et Willelmo de Ralegh et sociis suis justiciariis itinerantibus in comitatu Kancie, quod nullam occasionem querant erga priorem de Cumwell' occasione furcharum quarundam, quas levari fecit in terra quam habet de dono Stephani de Thurneham in Cumwell'; qui quidem prior habet infangenethef et utfangenethef secundum libertates contentas in carta R. regis avunculi regis, quam eidem Stephano fieri fecit, occasione cujus libertatis idem prior predictas furchas habere debet in predicta terra. Teste ut supra.

De vinis arestandis.—Rex baillivis suis Suthant' salutem. Precipimus vobis quod de melioribus vinis, que nuper venerunt in villam vestram, sine dilatione faciatis arestari ad opus nostrum triginta dolia vini Wasconiensis, cujuscunque fuerint vina illa, sive de terra nostra Anglie sive aliunde. Et si bona inveneritis vina Andegavensia, ibidem arestetis ad opus nostrum decem dolia; nec alicui parcatis, quin vina predicta eligatis ad opus nostrum, sicut inde indempnes esse volueritis. Teste ut supra.

De damis datis.—Mandatum est Hugoni de Nevill' quod habere faciat Willelmo comiti Albemarl' duos damos et sex damas in foresta de Rokingham ponendas in parco suo de Stratton', de dono regis. Teste ut supra.

De magna nave liberanda Johanni Blancboilly.—Rex commisit Johanni Blancboilly magnam navem suam que extitit in custodia Vincentii de Hasting', custodiendam ad totam vitam suam. Et mandatum est eidem Vincentio de Hasting' quod vocatis ad se ballivis et probis hominibus de Portesm', coram ipsis navem predictam eidem Johanni liberet, et per visum ipsorum distincte et aperte inbreviari faciat quot cordas, quot anchoras et cujusmodi alia armamenta per singula ad hujusmodi naves pertinentia cum predicta nave eidem Johanni liberaverit; et super omnibus predictis aperte et distincte in scriptum redactis sub sigillo suo et sigillis ballivorum et proborum hominum de Portesm' regem certificet. Teste ut supra.
Et mandatum est predictis ballivis et probis hominibus de Portesm' quod ad mandatum ejusdem Vincentii conveniant coram eo, et una cum eo videri faciant et distincte inbreviari quot cordas etc, ut supra, idem Johannes receperit cum predicta nave, et regem inde per singula distincte et aperte certificent. Teste ut supra.

De maeremio ad domos regis Westmonasterii.—Mandatum est ballivis foreste de Windles' quod permittant carpentarios regis, quos rex ad eos mittit, c. quercus in foresta regis de Windles' sparsim per loca ubi possint prosterni ad minus nocumentum foreste illius, ad reparationem domorum regis de Westmonasterio; retentis ad opus regis cooperonibus ad buscam faciendam ad opus regis.

Pro uxore Radulfi le Flecher.—Quia non pertinet ad regem custodia habenda de terris quas Radulfus le Flecher de rege tenuit ad firmam in Bradele, sed potius ad Hugelinam, que fuit uxor ipsius Radulfi, que est propinquior heres (fn. 2) ejusdem Radulfi; mandatum est vicecomiti Linc' quod de custodia predictarum terrarum ipsi Hugeline plenam saisinam habere faciat, retenta in manu Ade Esturmy, cui rex prius concesserat custodiam predictarum terrarum, custodia illarum terrarum, quas ipse Radulfus de rege tenuit per serjantiam reddendi regi flechias per annum. Teste ut supra.

Pro Simone Hurtaud.—Rex concessit Simoni Hurtaud, servienti suo, quod ducat in uxorem Dulciam filiam et heredem Willelmi de la Bollenland', cujus donatio ad regem pertinet. Et mandatum est ballivis de Havering' quod predictam Dulciam eidem Simoni habere faciat. Teste rege apud Westmonasterium, vij. die Februarii.

De damis datis.—Mandatum est Hugoni de Nevill' quod habere faciat Ioldani de Doe iij. damas in foresta de Broehull', de dono regis. Teste rege apud Westmonasterium, ix. die Februarii.

Pro Rogero pincerna justiciarii.—Rex, quadraginta marcas, per quas Nicholaus le Seculer finem fecit cum Johanne de Monem' pro custodia terre et heredis Radulfi de Maworthin, qui de rege tenuit, et quam Rex concesserat Rogero pincerne H. de Burgo etc., et quas ipse Johannes cognovit coram predicto justiciario se recepisse, dedit eidem Rogero; et mandavit rex ipsi quod predictas xl. marcas ipsi Rogero sine dilatione liberet. Et mandatum est vicecomiti Glouc' quod, nisi ipse Johannes ad mandatum regis incontinenti prefato Rogero dictam pecuniam habere faciat, ipse de catallis predicti Johannis in balliva sua eidem Rogero dictos denarios sine dilatione habere faciat. Teste rege apud Westmonasterium, xj. die Februarii.

Pro hominibus Salopie.—Rex perdonavit probis Salopie l. marcas de tallagio suo assiso in villa Salopie ad opus regis. Et mandatum est baronibus de Scaccario quod de illis 1. marcis ipsos quietos esse faciant. Teste ut supra.

De quercubus datis.—Mandatum est Johanni de Venuz quod habere faciat W. Exoniensi episcopo v. quercus in foresta de Axiholt ad parcum suum de Farendon' claudendum, de dono regis. Teste ut supra.

Pro Henrico de Aldithel'.—Rex perdonavit Henrico de Alditheleg' xl. marcas de debitis que idem Henricus regi debet ad Scaccarium suum. Et mandatum est baronibus de Scaccario quod ipsum de predictis xl. marcis quietum esse faciant. Teste ut supra.

Pro Bertram de Crioil.—Mandatum est vicecomiti Berk' quod Bertramo de Crioil talem saisinam habere faciat de manerio de Moleford' cum pertinentiis, quod Nicholaus de Carriho de rege tenuit in capite, et quod rex eidem Bertram commisit habendum usque ad etatem heredum predicti Nicholai, qualem idem Bertram inde habuit die, quo rex eum inde disseisiri precepit pro voluntate regis. Teste ut supra. Per justiciarium.

Pro canonicis de Mikelham.—Rex per cartam suam concessit pro se et heredibus suis priori et canonicis de Mikelham, quod ipsi et successores sui et homines sui de maneriis sui (sic) de Mikelham et de Chilting' quieti sint inperpetuum de shiris et hundredis, et sectis shire et hundredi, et de auxilio vicecomitis. Et mandatum est vicecomiti Sussex' quod in pleno comitatu suo predictam cartam legi et firmiter teneri faciat, sicut predictum est. Teste ut supra.

Capitula Regardi.

[m. 15.]
Schedule.

Videnda sunt omnia essarta facta in foresta domini regis post principium secundi anni prime coronacionis domini H. regis, filii Johannis regis, et estimanda per numerum acrarum, et inquirendum quis ea fecerit et quis modo ea teneat, et quo blado inbladata fuerint; et, si modo inbladata non fuerint, inquirendum quo blado inbladata fuerint post principium secundi anni prime coronacionis predicti regis, sive post ultimum regardum post predictum tempus factum; et inbladacio ivernagii scribatur per se, et inbladacio tremisii per se; et inquirendum de cujus feodo fuerint et ad quam villam pertineant; et essarta que facta fuerunt ante ultimum regardum factum post principium secundi anni prime coronacionis dicti regis Henrici, scribantur per se; et illa que postea facta fuerunt, scribantur per se.

Item, vidende sunt omnes purpresture veteres et nove facte post principium secundi anni prime coronacionis predicti regis Henrici, ubicunque facte fuerint, sive in bosco sive extra boscum, in landis, brueris, mariscis, turbariis et glebis, qualicunque modo occupati fuerint, nisi sit molendinum, vivarium, stangnum, marlera vel fossatum extra coopertum foreste, que facta fuerunt post confectionem carte domini regis H. de libertatibus foreste; et veteres scribantur per se et nove per se.

Item, vidende sunt omnes purpresture de terra arabili extra coopertum foreste in terra arabili, facte post confectionem carte domini regis de libertatibus foreste, et estimande per numerum acrarum, et videndum quo blado modo inbladate fuerint; et si modo inbladate non fuerint, inquirendum quo blado inbladate fuerint post tempus predictum, et quis ea teneat, et ad quam villam pertineant; et scribantur per se.

Item, videnda sunt omnia vasta boscorum, tam nova quam vetera, facta post principium secundi anni prime coronacionis dicti regis H.; et inquirendum quis ea fecerit, et quis ea modo teneat, et de cujus feodo sint, et quorum bosci fuerint, et ad quam villam pertineant; et vetera scribantur per se et nova per se.

Item, videndi sunt dominici bosci domini regis; et quilibet ceppus de quercu et de fago factus post principium secundi anni prime coronacionis dicti regis H. sive post ultimum regardum factum, si quod postea factum fuerit, debet diligenter numerari et per se scribi; et inquirendum utrum bosci deteriorati fuerint de subbosco et de exbrancatura; et deterioracio subbosci et exbrancature scribatur per se.

Item, simili modo vidende sunt dominice haye et chacie domini regis ubi nemo communicat, utrum fuerint custodite de herbargio et aliis, sicut debent custodiri; et scribatur per se.

Item, omnes purpresture et omnia essarta et omnia vasta facta in dominicis domini regis, videantur et inbrevientur eodem modo quo solebat fieri ante confectionem carte domini regis de libertatibus foreste concessis probis hominibus suis Anglie.

Item, vidende sunt aerie esturorum, espervariorum et falconum, in quibus boscis fuerint, et quis eas habuerit et de jure habere debuerit et consueverit, et ex quo tempore incepte fuerint. Et scribantur per se.

Item, vidende sunt forgie et minerie, in cujus feodo fuerint, in foresta sive in dominico domini regis, sive extra dominicum. Et inquirendum quales consuetudines et redditus reddant; et quis eas habuerit et de jure habere debuerit et consueverit; et ex quo tempore incepte fuerint. Et scribantur per se.

Item, vidende sunt portus maris, in quibus applicant naves vel batelli ad exportandum maeremium vel buscam de forestis, si quis fuerit de novo qui non fuerit tempore regis H. primi; et quis eum fecerit, vel maeremium vel buscam asportaverit; et per quem et in cujus feodo fuerit. Et scribantur per se.

Item, videndum est de melle si fuerit in foresta, quis illud habuerit et de jure habere debuerit, an dominus rex, an alius.

Item, milites debent attente inquirere in itinere suo, quis habuerit arcus vel sagittas, vel canes vel leporarios, vel aliquod aliud ingenium ad maleficiendum domino regi de feris suis.

Capitula sigillentur cum scripto regardi, et reserventur usque ad placita foreste.

[m. 15.]
Dorse of Schedule.

H. Dei gracia rex Anglie etc. vicecomiti Lancastr' salutem. Precipimus tibi quod sine dilatione convenire facias omnes forestarios et regardores loco et die nominato, ad regardum faciendum de balliva tua ante adventum justiciariorum nostrorum de foresta, et loco regardorum, qui mortui sunt, aut infirmi, alios eligi facias, ita quod xij. sint in quolibet regardo; et nomina illorum inbrevientur. Et forestarii debent jurare quod ducent xij. milites electos per totam ballivam suam ad videndum omnes transgressiones, que exprimuntur in scripto capitulorum, que tibi mittimus; et quod non dimittent pro aliqua rei. Debent etiam milites jurare quod facient regardum sicut solet et debet fieri, et quod ibunt sicut forestarii illos ducent ad predicta videnda; et si forestarii noluerint vel nescierint eos ducere, vel aliquod forisfactum concelare voluerint, ipsi milites non dimittent pro illo quin forisfactum illud videant et inbreviari faciant, et quod hoc pro nulla re dimittent. Et hoc breve et capitula predicta contrascribantur et mittantur in quolibet regardo, ita quod regardores secundum formam capitulorum predictorum possint operari; et quod regardum fiat infra quindenam Pasce anno regni nostri xvj. Teste me ipso apud Westmonasterium, xxij. die Januarii, anno eodem.

In comitatibus subscriptis mittitur breve prescriptum, et comitatu predicto, cum capitulis ex altera parte; scilicet, Norhumberl', Cumberl', Eboraci, Notingh', Dereb', Leyc', Roteland', Oxonie, Buk', Norhamton', Hunted', Essex'.

Johannes de Monem' habet consimiles literas de regardo faciendo a die Pasche in xv. dies in comitatibus Glouc', Devonie, Dors', Wigornie, Sumerset', Berk'.

[m. 14.]

Pro quibusdam hominibus de comitatu Kancie.—Rex concessit per cartam suam pro se et heredibus suis hominibus de comitatu Kancie quod de tenementis que tenentur in gavelikind' in eodem comitatu, decetero non teneantur magne assise per xij. milites sicut alibi capiuntur in regno nostro, sed loco magnarum assisarum illarum capiantur jurate per xij. homines tenentes in gavelikynd' in forma et eisdem locis, secundum quod magne assise prius inde capiebantur; ita quod quatuor tenentes in gavelikinde eligant xij. tenentes in gavelikunde juratores, sicut quatuor milites eligere consueverunt xij. milites in magna assisa. Et si forte contingat quod predicti xij. juratores convinci debeant, convincantur per viginti quatuor milites de eodem comitatu et infra eundem comitatum, coram justiciariis nostris itinerantibus in adventu eorum. Et mandatum est vicecomiti Kancie quod predictam cartam in comitatu suo legi et firmiter teneri faciat, secundum quod carta illa continet. Teste ut supra.

De roboribus datis.—Mandatum est H. de Nevill' quod habere faciat fratribus minoribus de Stamford' v. robora in foresta de Clive ad focum suum, de dono regis. Teste rege apud Windles', xvj. die Februarii.

Pro Radulfo filio Nicholai.—Rex concessit Radulfo filio Nicholai quod terram suam de Wilkenefeld', que est infra forestam regis, excolere possit et claudere fossato et bassa haia, ita quod fere bestie intrare possint et exire. Et mandatum est B. de Insula quod hoc libere et sine inpedimento fieri permittat, sicut predictum est.

De quercubus datis.—Mandatum est B. de Insula quod habere faciat G. Spigurnel x. quercus in foresta de Shirewod' de dono regis, ad quoddam molendinum faciendum. Teste ut supra.

Pro forestariis de foresta de Windles'.—Mandatum est ballivis foreste de Windles' quod non obstante precepto regis, quod habere facerent carpentariis regis, quos ad eos mitteret, c. quercus in foresta de Windles' ad reparationem domorum regis Westmonasterii cum coperonibus earundem quercuum, habere faciant forestariis regis de feodo ejusdem foreste coperones predictos, ad quos pertinent ratione baillie sue. Teste ut supra.

De terris que fuerunt Gileberti de Aquila.—Rex antequam providisset quod duo milites assignarentur in singulis comitatibus Anglie ad escaetas regis decetero custodiendas, et quod eis fieret saisina de escaetis predictis, cum acciderint, ad respondendum inde ad Scaccarium regis, commisit Johanni de Gatesden', vicecomiti Sussex', totam terram, que fuit Gileberti de Aquila, custodiendam ad opus regis quamdiu regi placuerit. Et mandatum est vicecomiti Surr' quod de tota terra que fuit ipsius Gileberti in balliva sua, non obstante provisione predicta, predicto Johanni vicecomiti Sussex' plenam saisinam habere faciat, sicut predictum est. Non omittat etiam quin ad (fn. 3) diem et locum quos predictus vicecomes ei scire faciet, ei et sociis suis occurrat, ad extensionem predicte terre faciendam simul cum ipsis, sicut rex alias ei precepit. Teste ut supra.

Eodem modo scribitur vicecomiti Suhamt'.
Et mandatum est eidem vicecomiti Sussex' et sociis suis extensoribus quod, licet vicecomites Surr' et Suhamt' non occurrant eis in balliva sua ad terras que fuerunt predicti Gileberti de Aquila extendendas, sicut rex precepit, nihilominus sine ipsis in forma quam eis prius signavit rex, extentam predictam fieri faciant. Teste ut supra.

De allece emendo ad elemosinam regis.—Rex preter vij. lestas allecis, quas precepit dari pauperibus hospitalibus circa London', providit et vult quod alie vij. leste allecis dentur certis domibus religionis prope Lond', sicut injunxit fratri Galfrido elemosinario suo. Et mandatum est W. Carleolensi episcopo quod septem lestas emi faciat et predicto Galfrido elemosinario liberari dictis domibus distribuendas. Teste ut supra.

De tradendis in ballium.—Ricardus atte Dene, Symon et Gillebertus filii ejus, quos Robertus Maresc' appellat de combustione domorum suarum odio et atia, ut constat per inquisitionem etc. et non eo etc. habent litteras regis vicecomiti Buk' quod tradantur in ballia xij. etc.

De viridariis.—Rex Johanni de Monem' salutem. Monstravit nobis Thomas de Langel' forestarius noster de feodo in comitatu Oxonie, quod pro defectu viridariorum in baillia sua non fiunt ibidem attachiamenta de viridi et venacione sicut debet et consuevit fieri. Et ideo vobis mandamus quod in propria persona vestra accedatis ad partes illas et, secundum quod fieri debet et consuevit, eligi faciatis viridarios in baillia predicta, qui prestito sacramento extunc faciant et conservent ea que ad officium illud pertinent in eadem baillia. Et tales eligi faciatis qui ad hoc velint et sciant fideliter et diligenter intendere. Teste rege apud Windles', xvij. die Februarii, anno ut supra.

Pro Willelmo de Beure.—Mandatum est W. Carleolensi episcopo quod omni occasione et dilatione postpositis, persolvi faciat Willelmo de Beure omnes denarios qui ei debentur, et de quibus ei liberandis literas regis prius recepit. Teste ut supra.

De liberatione providenda.—Mandatum est baronibus de Scaccario quod primam liberationem trium obolorum vel duorum denariorum in die, quamcito vacare contigerit, de elemosina regis constituta, faciat habere Waltero de Brackel' ad opus Elie de Bedef', non obstante aliqua concessione quam rex alii fecerit de hujusmodi liberatione. Teste ut supra.

De roboribus datis.—Mandatum est constabulario de Windles' quod habere faciat uxori Walerandi Teutonici iiij. robora vetera ad focum suum, de dono regis. Teste ut supra.

De quercubus datis.—Mandatum est vicecomiti Sussex' quod in foresta, que fuit Gileberti de Aquila, faciat habere R. Cycestrensi episcopo, cancellario regis, de dono suo lx. quercus bonas ad maeremium, cindulas et latas (fn. 4) inde faciendas ad reparationem domorum suarum episcopatus sui. Teste rege apud Geldeford, xx. die Februarii.

Pro Radulfo filio Nicholai.—Datum est regi intelligi ex parte heredis Hugonis Poinz quod occasione tenementi quod Philippus de Sarmunvill' tenuit de rege in capite per serjantiam, vicecomes Sumerset' et Dors' cepit in manum regis terram quam idem Philippus tenere debet de predicto herede in Langeton', Everwaie et Radeslou per servicium militare. Quia vero ratione tenementi quod de nobis tenetur per hujusmodi serjantiam, non pertinet ad regem custodia tenementi quod de alio tenetur per servicium militare, mandatum est eidem vicecomiti quod, si ita est, tunc de predicta terra Radulfo filio Nicholai, custodi heredis predicti, plenam saisinam habere faciat. Teste ut supra.

De tradendo in ballium.—Alicia que fuit uxor Henrici le Alderman appellat Willelmum le Alderman et Willelmum Thurstan' de morte ejusdem Henrici odio et athia et non etc. ut constat per inquisitionem. Mandatum est vicecomiti Suff' quod, si ipsi Willelmus et Willelmus invenerint xij. etc. tunc tradat eos in ballium etc. Teste ut supra.

De maeremio ad porticum camere regis de Wudestok'.—Mandatum est Thome de Langel' quod habere faciat vicecomiti Oxonie l. quercus in foresta de Wichewod', ubi commodius capi poterunt et ad minus nocumentum foreste regis, ad porchiam magne camere regis de Wudestok' et ad alia edificia que rex ei injunxit facienda. Teste rege apud Keneton, xxj. die Februarii.

De perdonatione dimidie marce.—Rex perdonavit Ainulfo filio Willelmi de Kingeston' pro paupertate sua dimidiam marcam, que ab eo exigitur per summonitionem Scaccarii de amerciamento primi itineris justiciariorum tempore regis post guerram. Et mandatum est baronibus de Scaccario quod ipsum de predicta dimidia marca quietum esse faciant. Teste ut supra.

De capreolis datis.—Mandatum est Hugoni de Nevill' quod habere faciat Ricardo de Muntfichet tres capreolos in bosco de Sapele ponendos in parco suo de Stansted', de dono regis. Teste ut supra.

Pro Simone Hurtaud.—Rex concessit Simoni Hurtaud servienti suo, quod ducat in uxorem Dulciam filiam et heredem Willelmi de la Bolleland', cujus donatio ad regem pertinet. Et mandatum est ballivo de Haveringes quod de predicta Dulcia simul cum terra, que eam hereditarie contingit et de qua predictus Willelmus fuit saisitus die qua obiit, eidem Simoni sine dilatione plenam saisinam habere faciat. Teste ut supra.

Pro G. de Craucumbe.—Mandatum est Ricardo de Wrotham quod non inpediat G. de Craucumbe quin libere et sine inpedimento cariari faciat per bailliam suam maremium quod ei dederint, qui boscos habent in foresta regis, ad quandam domum apud Horsleg' erigendam. Teste rege apud Keneton', xxiiij. die Februarii.
Eodem modo scribitur Jacobo de Lye, forestario in comitatu Wilt'.

De quercubus datis.—Mandatum est Hugoni de Nevill' quod in foresta de Brehull (fn. 5) faciat habere fratribus hospitalis Sancti Johannis extra Oxoniam v. quercus, et alias quinque quercus in foresta de Shotovr', ad edificationem ejusdem hospitalis, de dono regis. Teste ut supra.
Eodem modo scribitur Thome de Langel' de iij. quercubus in balliva sua ad opus eorundem fratrum. Teste ut supra.

De piscando ad opus Isabelle sororis regis.—Mandatum est constabulario de Merleberg' quod permittat quod Isabella soror regis piscari faciat ad opus suum ad rochias in vivario et alibi apud Merleberg', quamdiu instans Quadragesima duraverit.

Pro mercatoribus Burdegale contra monachos Sancte Trinitatis Canuarie.—Monstraverunt regi Willelmus Gerald' et socii sui mercatores Burdegalenses quod, cum applicuissent apud Sandwic' cum vinis suis, prior et monachi Sancte Trinitatis Kantuarie exigunt ab eis pro quolibet dolio vini iiij. denarios, ubi dare non debent nec solent nisi duos. Et mandatum est vicecomiti Kancie quod si dicti mercatores dictos duos denarios dare voluerint pro quolibet dolio vini, de residuo pacem eis habere faciat usque ad diem Dominicam proximam ante festum Sancti Gregorii proximo instantis; et tunc apud Lond' rex de consilio fidelium suorum qui ei tunc aderunt, faciat inde quod fuerit faciendum. Et scire faciat dictis priori et monachis quod rex tam eis quam dictis mercatoribus de contentione illa discutienda dictum diem prefixit. Teste ut supra.

Pro domino Carleolensi episcopi.—Rex per cartam suam dedit et concessit W. Carleolensi episcopo homagium et totum servicium Willelmi de Huntercumbe, quod regi fecit et facere debuit de terra sua in Huntercunbe et Bensint', habendum et tenendum inperpetuum eidem episcopo et successoribus suis de rege et heredibus suis in liberam, puram (fn. 6) et perpetuam elemosinam; ita quod predictus Willelmus et heredes sui decetero subsint et respondeant predicto episcopo et successoribus suis, sicut regi subfuerunt et responderunt ante hanc collationem regis. Et mandatum est vicecomiti Oxonie quod predictam cartam regis in pleno comitatu suo legi et teneri faciat. Teste ut supra.