Close Rolls, August 1234

Close Rolls, August 1234

[m. 9d.]

Littere directe Lewelino.—Rex dilecto fratri et fideli suo L. principi de Abberfrau, domino de Snaudon', salutem. Datum est nobis intelligi quod Morganus Kam, Hoelus Ermerduc et Resus Griffini, quibus R. Marescallus, comes quondam Penbr', commisit terras que fuerunt G. quondam comitis Glouc' in Glamorgan post guerram quam idem R. nobis movit, et que in initio ejusdem guerre fuerunt in manu nostra, non permittunt quod juxta formam treugarum inter nos captarum talem de terris predictis seisinam habeamus qualem inde habuimus in initio guerre predicte, impedientes quod homines de terris eisdem ad pacem et fidelitatem nostram venire non possunt. Morganus etiam de Karliun qui terras quasdam, que fuerunt predicti G. comitis Glouc', videlicet de Deuelac, tenet de ballio nostro, non permittit homines de terris ipsis nec etiam de quibusdam aliis quas tenet in feodo, videlicet de Boz, ad curiam nostram venire ad justiciam in eadem curia faciendam et recipiendam, nec quod tractentur ibidem secundum consuetudinem curie nostre in partibus eisdem, immo asserit et jactat se terras illas et homines in nullo per nos set omnino auctoritate vestra possidere. Cum igitur constare vobis possit et debeat manifeste quod in predictis contrarii sunt treugis predictis captis inter nos per venerabiles patres E. Cantuariensem archiepiscopum, H. Roffensem et A. Coventrensem et Lichefeldensem episcopos et quosdam (fn. 1) alios, et injuriose se gerunt erga nos, licet per nos ad hoc manum apponere possemus, si voluissemus, sicut ipsi contra treugas ipsas venire, rogandos vos duximus quatinus terras predictas et homines nobis sine difficultate reddi faciatis eodem modo quo inde saisiti fuimus initio guerre supradicte, injungentes predictis detentoribus nostris quod de terris vel hominibus predictis nichil attemptare presumant, unde occasionem sumere possimus aliquid intercipiendi contra treugas predictas, quod inviti faceremus, nisi per injurias per vos aut vestros nobis illatas provocaremur. Ut autem plenius instruamini de injuriis predictis, quas nobis petimus emendari, mittimus ad vos dilectum nobis Walterum de Langeport, clericum, qui inde vos plenius poterit certificare, quibus tam maturum apponere velitis consilium, eas, ut predictum est, nobis facientes emendari, quod treuge predicte inter nos capte in suo permaneant vigore, et ne faciente injuria nostra vel nostrorum ipsas contingat per vos et vestros infirmari. Noluimus quidem antequam de predictis vos certificassemus, et de voluntate vestra postea nobis constaret, aliud ad predicta consilium vel manum apponere, licet ad hoc justa ratione moveremur. Teste rege apud Rading', xxij. die Augusti.
Item, tota narratio predicta usque ad clausulam illam, 'Cum igitur,' significata est domino Cantuariensi archiepiscopo, et in conclusione litterarum ipsi archiepiscopo directarum dicitur sic;—Ut igitur paternitati vestre constare faciamus, qualiter in observatione treugarum predictarum se habent Walenses predicti, inde vos duximus certificandos, rogantes attentius quatinus vobiscum deliberare velitis qualiter contra predictas injurias sit procedendum, predicto Lewelino per litteras nostras quales videritis expedire, dantes in mandantes (fn. 2) quod terras et homines predictos sine difficultate nobis reddi faciat, et quod in hac parte vel alia a forma treugarum predictarum non recedat. Teste ut supra.
Rex M. filio Geroldi, justiciario suo Hibernie, salutem. Mandamus vobis quod in presentia venerabilis patris L. Dublinensis archiepiscopi vel in presentia aliquorum de ballivis suis quos ad hoc loco suo deputaverit, per sacramentum proborum et legalium hominum per quos rei veritas melius sciri poterit, et qui sint tam de feodo ipsius archiepiscopi quam nostro, diligenter inquiri faciatis que dampna et cujusmodi jacturas idem archiepiscopus et homines sui sustinuerunt et in quanto dampnificati fuerint per ballivos nostros occasione guerre quam R. Marscallus quondam comes Penbr' nuper nobis movit in Hibernia, et quibus bona illa de quibus dampnificati sunt idem archiepiscopus et homines sui, ut dicitur, cesserunt ad comodum, sive nostrum sive alienum, et in quorum usus aut quo devenerunt. Faciatis etiam diligenter inquiri per sacramentum proborum et legalium hominum per quos rei veritas melius sciri poterit, presente eodem archiepiscopo vel presentibus aliquibus ballivis suis quos ad hoc similiter deputaverit, que bona ut in denariis, jocalibus, catallis et aliis rebus quibuscumque capta fuerunt nomine nostro in ecclesia Dublin' et aliis ecclesiis et monasteriis provincie sue et inde asportata occasione guerre predicte, et per quos, sive per ballivos nostros vel alios, et ad quorum usus bona illa remanserunt, et utrum cesserunt in commodum nostrum vel aliorum, et si in commodum aliorum, in quorum, et quantum bona illa in ecclesiis et monasteriis predictis capta et asportata valuerint tempore captionis et amotionis eorundem. Et inquisitionem inde distincte et aperte factam sub sigillo vestro et sigillis eorum per quos facta fuerit, nobis sine dilatione mittatis, et hoc breve. Teste ut supra.
Mandatum est vicecomiti Linc' quod utlagariam que promulganda est in comitatu Linc' die Lune proxima post octabas Assumptionis Beate Marie, anno etc. xviij. in Milonem Basset et Ricardum de Essendon' pro morte Rogeri de Moubray, unde Mazelina que fuit uxor ipsius Rogeri, Rogerus de Hanewurth', Robertus clericus, Rogerus de Esseby, Henricus de Welburn' eos appellant, ponat in respectum usque ad octabas Exaltationis Sancte Crucis anno eodem coram justiciariis nostris ad primam assisam, cum in partes illas venerint. Teste ut supra.
Et mandatum est justiciariis proximo itineraturis quod appellum illud audiant, et audito processu illius appelli tam de precepto facto quam forcia, et coram eis recognito, recordum inde domino regi scire faciant; et interim nec de judicio inde faciendo nec de promulgando utlagariam in predictos appellatos aliquid faciant, donec dominus rex aliud eis inde preceperit. Teste ut (fn. 3) supra.
Rex vicecomiti Norht' salutem. Si Willelmus filius Bartholomei fecerit te securum de clamio suo prosequendo, tunc summoneas per bonos summonitores Galfridum de Alewalton' quod sit coram justiciariis nostris ad primam assisam, cum in partes illas venerint, ostensurus quare deforciat predicto Willelmo dimidiam acram terre cum pertinentiis in Burgo, quam Herveus piscator eidem Willelmo dimisit ad terminum qui nondum preteriit, infra quem terminum predictus Herveus terram illam eidem Galfrido vendidit, occasione cujus venditionis predictus Galfridus ipsum Willelmum de terra illa ejecit, ut dicitur. Et habeas ibi summonitores et hoc breve. Teste etc.