6 July 1582.
Precept, thesaurer, well in the castell bank.
[The provost, bailies, and council] ordanis William Littill, Andro
Sclater, and the thesaurer, Jhone Robertsoun, to caus big, clenge, and
repair the well in the castell bank, and the thesaurer to mak the expenssis
thairof, and to avance the sowm of threttie li. to the said William and
Andro for doing thairof.
Commissioneris with the kirk to Sanct Jhonestoun.
Ordanis Jhone Aichesoun, and Jhone Adamsoun to pas to Sanct
Jhonestoun to the Kingis Grace, with James Lowsoun, to travell and concur with him in the effairis of the kirk, and thai lykwayes to haif power to
travell anent the downgitting of the justice air.
1 August 1582.
Commissio, Ramsay to tak vp men of weir.
Comperit capitane Henry Ramsay quha producet the commissioun
vnderwrittin, of the quhilk the tenour followes:—James be the Grace
of God, King of Scottis, to all and sindry our lieges and subiectis
quhome it efferis, to quhais knawlege thir present lettres sall cum greting.
Witt ye ws to haif gevin and grantit and committit, and be the tenour of
thir present lettres with avyse of the lordis of our secreitt counsall, gevis,
grantis, and committis our power and commissioun to our weilbelouet
Henry Ramsay, to levie and tak vp within our realm ane band of twa hundreth futemen of weir, and to pas with the sam furth of the sam realm to
the pairties beyond sey for seruing of our freindis and confederatis,
ower the quhilkis we mak and constitute him cheif capitane and commander, with power to him to caus strik ane drumin quhatsumeuir pairt of
our realm, and to elect lieutennent and vther officiaris and memberis of his
said band neidfull, and generallie all vther thingis to do and vse that for executioun of the premissis is necessarlie requyret to be done, for the quhilk
we will and grantis that the said Henry Ramsay sall incur na paynes,
skayth, or daynger in his persoun, landis, or guidis be ony maner of way in
tyme cuming, nochtwithstanding ony our actis, statutes, or constitutiounis
quhatsumeuir maid or to be maid in the contrair, anent the quhilkis and
paynis contenit thairinto we dispense be thir presentis, dischairgeing heirfore all and sindry our juges and ministeris of lawes, and specially our
prouest and baillies of burrowes, thair deputis and officiaris, of all stopping,
trubling, impediment making to the said Henry in leveing and transporting
of the said men of weir in maner and to the effect foresaid, as thai will
ansuer to ws vpoun thair obedience and of thair offices in that pairt. Gevin
vnder our signett and subscryuet with our hand at Perth the xxvj day of
July, and of our regne the fyftein year 1582. James R. Lennox, Crawfurd; and on the bak thairof, apud Perth xxvj July, anno etc. lxxxij.
Sederunt:—Lennox, Crawfurd, Montroyis, Downe, comptroller, Clerk of
Register, Justice Clerk. Red, past, and allowet in counsall. James
Androw. In respect quhairof the saidis prouest, baillies, and counsall
grantis and permittis the said capitaine to raise the said men of weir
within the fredom of this burgh and strik his drum throw the sam, conform
to the said commission quhilk thay ordanit to be registrat in thair buikis
for the townis warrand.
Dispositioun of the office of the maister of the Sang Schole to Henrysoun.
The foresaidis prouest, baillies, and counsall and * * deykinis of
craftis, grantis, gevis, and disponis to James Henrysoun, lawfull sone to
vmquhill Edward Henrysoun, the office of the maister of the sang schole
of the said burgh and taikin vp of the psalmes in the kirk, now vacand in
thair handis and at thair dispositioun be the dimissioun of maister Androw
Buchane last maister thairof, to be peaceblie bruiket and sysit be the said
James induring thair guid willis allanerly, with all proffeittis, dewteis, and
casualteis belanging thairto, siclyke as the said vmquhill Andro had the
sam of before, saiffand that thai gif and assignis to the said James the
sowm of ten pund onely for his stipend, and to be payit to him be thair
thesaureris present and to cum, and to haif the occupatioun of the hous
and land besyde Sanct Paules wark presently occupeit be him and that
mail frie in contentatioun of his scholehous maill, sa lang as it sall pleis
the guid town to suffer him to occupy the sam, and quhen thai sall remoue
him thairfra to augment his stipend for the sam.
10 August 1582.
Precept, thesaurer, schore of Leyth.
The baillies and counsall ordanis Jhonne Robertsoun, thesaurer, to
cause repair and mend the ringis and makfastis on the schore of Leyth for
seruing and halding of the schipis.
24 August 1582.
Watche in the stepill, gild.
[The provost, bailies, and council] in respect of the apperand trubill
and commotioun in the cuntrie and amangis the nobilitie, ordanis the dene
of gild to fie four habill men and place them in the stepill for gairding and
keping thairof, tua of thame to serue for the day, and twa for the nycht,
and to agre for thair wadges.
Watche, proclamatioun, men of weir, hostilleris.
The prouest, baillies, and counsall, with ane greitt pairt of the
deykinis, ordanes ane scailt watche to be kepit bayth day and nycht in the
town, ane quarter euery xxiiij houris, and that ilk persoun that is haill and
present watche in his awin persoun, and als that proclamatioun be maid
chargeing all men of weir to pas of the town, and that all hostilleris gif vp
to the baillies the names of the persounis ludgeand with thame, vnder the
payne of [blank] to be tane of thame that failyeis.
25 August 1582.
Duik of Lenenox demandis of the towne, and ansuer thairto.
In presens of [the provost, bailies, council, and deacons of crafts,]
comperit Esme, Duik of Lenenox, with certane of the nobility and
barones of Louthian quhair the said Duik, be maister Dauid M'Gill his
interpretour, after declaratioun of his guid will and mynd to the Kingis
Grace, relligioun and haill body of the realme schew and allegeit that the
Kingis Grace was tane and detenit agane his will be certan of the nobility,
to witt, the Erles of Gowrie, Mar, and Maister of Glammis, and vtheris,
quhairvpoun thair wes apperant trublis to aryse, for the quhilk caus he
desyrit the guid toun to concur with him and writt to the barones heirabout to convene in this burgh and gif thair avyse in this mater, nixt
desyrit that he mycht mak publicatioun be oppin proclamatioun of his
procedings in this realm sen his first cuming thairto, last that gif his aduersares suld purches charges fra the Kingis Grace to the town for his hurt or
to tak and apprehend him, quhat wald be the townes pairt; quhilk being
declarit, the saidis prouest, baillies, and counsall tuik thame to thair avysement thairwith, and the said Duik being depairtit to his lugeing with his
compane, the saidis prouest, baillies, counsall, and deykinis after deliberatioun
concludit to ansuer to the first heid that thai culd nocht writt to the
barones becaus thai wer nocht in vse thairof, and, gif his grace wrott to
thame or ony vtheris, to desyre that na greitt forces suld repair to the
town, and ilk nobillman or gentilman to cum with his awin houshald
allanerly; to the nixt heid, that quhen the Duik had schawin to thame in
writt the forme of his declaratioun, thai wald gif him ansuer thairto;
as to the last, thai culd nocht be resoluet thairwith before thai knew of the
estaitt of the Kingis Maiestie, and it beand knawin that his Maiestie is at
libertie thai man obey his will and plesour, gif he be detenit thai will
acknawlege na chairges: and this ansuer thai appoyntet my lord prouest
and sum vtheris to pas and schaw to his lordship.
27 August 1582.
Proclamatio, statute, watche, men of weir, strayngeris, airmour.
The foresaidis prouest, baillies, counsall, and dekynis maid and sett
furth the statute vnderwrittin, and ordanet the sam to be proclamet be
sound of trumpett at the mercat croce of this burgh, to witt:— Forswamekill
as our Souerane Lord the Kingis Maiestie, vpoun occasioun of this apperand
trubill and vnquyetnes within the realm, hes gevin speciall directioun and
command to the prouest and baillies of this burgh to tak ordour for the
suir keping of the towne and placeing of sic watche at euery port thairof
and vther places neidfull, bayth day and nicht, as may assure the sam fra
the surpryse of ony forane powers, and in the mean tyme to suffer na
hakbuteris or vther men of weir to be, ather oppinly be sound of drum, or
privatlie, leveit and tane vp to ony mannis behufe within the sam, and to
refuis entrie or acces to quhatsumeuir extraordinar poweris and greitt
cumpaneis of men in airmis that thai may nocht command; for the quhilk
caus the saidis prouest, baillies, and counsall hes appoyntit ane stark watche
to be had and keipit fra this tyme furth of the nichtbouris of this burgh, ane
quarter thairof ilk xxiiij houris, begynnand this nicht at the south west
quarter to be sett at sex houris at evin, and swa furth throw the rest of
the town, to convene and keip gaird at the flesche mercatt, and ane pairt
to be putt to the portis and vther places neidfull: Quhairfore I command
and chairge in our Souerane Lordis name, and in name and behalf of the
prouest and baillies of the said burgh, that all the nichtbouris of the samyn,
burgessis and friemen and vtheris, be reddy to convene be thair quarteris
at the said houris, as thai sall be wairnet be sound of swesche to the said
watches, the persounis present and haill in body to watche in propir
persounis, sic as ar sik or absent to send in thair place ane habill man
weil airmit, vnder the payne of xviij s. vnforgevin ilk persoun swa oft as
thai failyie, and that thai obey the command and directiounis of the
maiestratis, or sic as thai sall appoynt ower the watche, siclyke that all
that ar nocht on the watche haif thair armour in reddynes in thair houssis
and foirbuithis, lang wappounis or hakbutis, and that ilk persoun weir his
sword about him and schaw himselff willing and reddy in defence of the
town and stayncheing of tumultis, vnder the said payne.
Attour, I command and charge in our Souerane Lordis name, and in
name and behalf foresaid, that na maner of persounis by and attour the
nychtbouris of the burgh, weir jakis or vther airmour, beir pistulis,
hakbutis or ony vther fyre wark, and that na capitanes or vtheris presum
or attempt in tyme cuming to levie or raise ony men of weir priuatlie or
oppinlie within the fredome of this burgh to the behuif of ony man, without
speciall licence of the Kingis Maiestie to be obtenit and grantit after the
daitt heirof, and without the speciall knawlege of the maiestratis of the
said burgh, vnder the payne of imprisounment of thair persounis, bayth
capitanis and sowldiouris, quhill the Kingis Maiestie declair his will vpoun
thame. Last, that na strayngeris, gentilmen or vtheris, be fund walkand
throw the hie streitis or owtwith thair lugeingis after ix houris at evin,
vnder the payne of imprisonment and pvnissing of thair persounis at the
will of the maiestratis.
Kingis Maiesteis lettre anent his customes, to Gourlaw, customer.
William Littill, commissioner direct to Sanct Jhoneston to the
Kingis Maiestie, producet his Hienes lettre to the town, togidder with ane
lettre anent the customes, quhilk the saidis prouest, baillies, and counsall
ordanit to be registrat in thair buikis, of the quhilk the tenour followes:—Followes the tenour of the said lettre anent the customes:—Rex. Robert
Gourlaw, customer of Edinburgh and clerk of the coquett thairof, we greitt
yow weill. It is our will and we command yow that ye resaue custome
pas coquettis to all our subiectis offerand to custome thair guidis within
the fredome of our said burgh according to the vse and wont obseuret
thir xx yeiris bygane and mair, ay and quhill thair be ane finall and resolute ordour appoyntit be sic as we sall direct to accord with the commissioneris of our burrowes thairanent, nochtwithstanding ony directioun
gevin be the auditouris of our Chekker, dispensand thairwith in the meane
tyme quhill the tent day of Nouember nixtocum, agane the quhilk day we
will the commissioneris of burrowes nominat for this effect to convene at
our burgh of Edinburgh, and to proceid in conference and taking of the
said fynall ordour. Subscryuet with our hand at Perth the xxv. day of
August 1582, and of our regne the xvj yeir, James R. Lenox, Gowry.
Kingis Maiesteis lettre anent the keping of the town, etc.
Followes the Kingis Grace lettre missiue anent the keping of the
towne. Trest freindis, we greitt yow weill. We haue tane gude occasioun of this apparent trouble and vnquyetnes within our realme to
desyre yow richt affectiouslie as our guid subiectis, of quhais affectioun to
our seruice and obedience we have had speciall pruif at all tymes sen our
coronatioun, that ye contene yow peaceblie and quyett at this tyme, vnmovit or perswadit be ony man of quhat estaitt saeuir he be, to ryse in
airmes or joyn your selffis in ony sort with him to the furtherance or
hinder of quhatsoeuir actioun or querrell, bot addres yow to tak ordour for
the suir keping of your burgh and placeing of sic watche at euerie port
thairof and vther places neidfull bayth day and nicht as may assuir yow
fra the surpryse of ony foreyne poweris, and in the meane tyme that ye
suffer nor permitt na hakbuteris nor vther men of weir to be, ather opinlie be
sound of drum, or priuelie, sa far as ye can learne and vnderstand, be levied
and tane vp to ony manis behove within your towne without our speciall
commissioun and warrand daittit after this, refuising entrie or acces to
quhatsumeuir extraordinare poweris and greitt companeis of men in
airmes that ye may nocht command, and keping the ferry port and passage of Leith opin and patent to all our peaceble and quyett subiectis to
gang and cum as thai sall haif occasioun, as ye will ansuer to us vpoun
the contrarie, swa lippynning to your guid attendance heiranent we committ yow to God. Frome Perth this xxv of August, 1582. James R. To
our trest freindis, the prouest, baillies, and counsall of our burgh of
Precept, thesaurer, town wall.
Ordanis Jhone Robertsoun, thesaurer, or Andro Sclater in his absence,
to caus remoue and tak away the red owtwith the towne wall besyde the
Kowgaitt port, repair and mend the faltis of the said wall.
29 August 1582.
Precept, Ker, collectour, Moresoun.
Ordanis Robert Ker, baillie, collectour of the restis of the townes
comptis, to pay and delyuer to Jhone Moresoun, baillie, the sowm of foure
score pundis debursit be him for making and bying of twa drinkin syluer
peices to be bestowet and disponit to the townis behuif.
3 September 1582.
Lettre from the Kingis Grace and Lordis, and ansner thairto.
In presens of [the provost, bailies, council, and deacons of crafts]
comperit Alexander Vddert, Jhonn Adamsoun, and John Wilky, quha
wes direct to the Kingis Grace, and after declaratioun of thair procedingis
and of the Kingis ansuer and mynd schawin to thame, producet ane
lettre frome his Grace direct to the guid [town] togidder with ane vther
lettre from the Lordis, and ane proclamatioun to be maid anent his
Maiesties libertie, quhilkis lettres thai ordane to be registrat. Followes
the tenour of the Kingis lettre:—Trest freindis, we greitt yow weill. We
haue resauet your lettre, quhairanent for that we vnderstand that sic
seditious bruitis as heirtofore wer spred within your town of our detening
in our burgh of Perth aganis our will, ar now renewet of our remaning
heir of intentioun to charge the nobillmen and vtheris our counsalouris
heir resident with ws with our coptiuitie, and to perswade our lieges and
guid subiectis to enter in opinioun of that quhairof we haif sene yit na
probabilitie, we haif thocht guid to signifie vnto yow the contrarie be the
present, desyring yow to lett the sam be notifeit to all and sindrie the
inhabitantis within your burgh be publicatioun of this our proclamatioun,
quhilk we haue sent yow heirwith to be proclamet at your mercat croce
on Mononday nixt in the mene tyme becaus that our intentioun is to
come to Edinburgh sa sone as we haue tane some ordour with the convoy
quhilk our nobilitie and vtheris present intendis to give ws, we luke that
ye will haue ane resonabill power of your town in redynes to watche ws
sa lang as we sall think expedient to imploy thame, and to that tyme
that ye continew cairfull of the security of our darrest cousingis persoun
quhilk ye haue thair amang your handis, and quhat reasonabill gairde he
sall requyre yow of your nichtbouris and inhabitantis to latt him haue, in
that he may be thairby assuret fra the violence and iniury of quhatsumeuir
his evill willeris that sall repair within the town to do him any harme or
truble, as ye will ansuer to ws thairvpoun. Thus we committ yow to God.
From Stirling castell, this first of September 1582. James R. Followes
the lettre from the Lordis. [The letter is not engrossed, and there is
written on the margin, 'Note.—The prouest hes this lettre quhilk is to be
putt in this blank.']
Thairafter comperit Capitane James Cvninghame as direct fra the
said Lordis, and in thair names declairit that thai menit na vther thing
bot the mentenance of relligioun, reformatioun of the commoun weill, and
mentenance of the Kingis Maiesteis crowne quhilkis all thai saw to be in
greitt hasart and dyuerslie abusit, desyring thairfore the guid toun to
assist for reformatioun thairof, with the quhilk the said prouest, baillies,
counsall, and deykinis being avysit agreit to gif thair concurrence for
mayntenence of the relligioun, Kingis Maiestie, and commoun weill, and
ordanit lettres to be direct to the said Lordis ansuerand to thair said
lettre and declairing that thai will concur as said is.
4 September 1582.
Ros, Galbrayth, commissioneris to the King.
The prouest, baillies, counsall, and deykinis foresaidis vottit and
agreit to send to the Kingis Maiestie, James Ros, merchant, and Edward
Galbrayth, skynner, with lettres frome the town, ansuerand to his Maiesteis
former lettre and last, desyring his Maiestie to tak sic ordour at his cuming that the toun be nocht putt in perell nor yitt suppressit with sic
als with an lettre to the Lordis desyring incais of thair cuming that
assurance mycht be grantet to the Duik during his remaning in the toun,
becaus he is cum vnder thair saifgaird.
5 September 1582.
Precept, thesaurer, javellour.
Ordanis Andro Lindsay, javellour, to caus mak and furneis new tubis
in the tolbuith for seruing the wairdouris, als to caus clenge the
privie thairof, and the thesaurer to refound to him the expenssis.
7 September 1582.
Proclamatio, nicht walking.
Ordanis proclamatioun to be maid throw this burgh for keping of
guid ordour, obedience, quyetnes, and amitie within the said burgh, that
na maner of persounis, strayngeris, remaning in the sam or resorting
thairto, be fund passand vp and down the streittis thairof bot that thai
keip thair lugeningis fra nyne houris at evin furth, and siclyke that na
nichtbouris burgessis, and fremen presume or tak vpoun hand fra the
said hour furth to mak ony conventionis and gadderingis or pas throw
the streittis in companeis, bot that thai in sober and quyet maner reteir
and draw thame selffis to thair houssis and duelling places, making na
prouocatiounis ane to ane vther in countenance, word, or deid, bot behaif
thame selffis as peacebill and loving brethrein, with certificatioun to the
saidis persounis, als weill strayngeris and freind, doand in the contrair
heirof, that thai sall be apprehendit, imprisonit, and accuset as nicht
walkeris, seditious pepill and makeris of convocatiounis, and pvnist in
thair boddis and guidis according to thair demeritis at the will and
plesure of the maiestratis but favour.
Precept, thesaurer, Adamsoun, Vddert, Wilkyn.
Ordanis Jhonne Robertsoun, thesaurer, to pay to Alexander Vddert,
Jhonne Adamsoun, and Jhonne Wilkyn, the sowm of threttein pund,
nynetein schillingis, twa penneis, for thair expenssis in passing to Stirling
to the Kingis Grace in the townis effaires, specially for hame bringing of
Jhonne Dury, minister, and anent the Duik, and for gairding of
Stepill watche dischairget.
Dischairges forther watcheing of the stepill fra this day furth, and
ordanis the dene of gild to brek the persounis appoyntet thairto.
11 September 1582.
Precept, thesaurer, Bynning, boy to Stirling.
[The provost, bailies, and council] ordanis Jhonne Robertsoun,
thesaurer, to pay to Rychert Bynning, messinger, sex schillings, aucht
penneis, for making of the Kingis proclamatioun, als to pay to a boy for
passing twyse to Stirling in the townes effairis with lettres, twa merk.
Gatt in voluntate.
Charles Gatt, in Leyth, come in the townis willis for cutting of ane
tow of a Norway manis schip, and oblist him nocht to do the lyke in tyme
cuming, vnder sic paynes as the town sall lay to his charge.
18 September 1582.
Precept, thesaurer, nichtbouris expenssis in Sanct Jhonestoun.
[The provost, bailies, and council] ordanis Jhonne Robertsoun,
thesaurer, to pay to James Nicoll, merchant, the sowm of ane hundreth
sevin pundis, fourtein schillingis, debursit be him for the expenssis of my
lord prouest, and the nychtbouris quha raid to Sanct Jhonestoun with
his lordship to the Kingis Grace about the ix of Julii last in the effaires
of the town, specially for down getting of the justice and chalmerlane airis,
and remanet thair be the space of aucht dayes with thair hors and
26 September 1582.
Precept, thesaurer, Harwod.
Ordanis Jhonne Robertsoun, thesaurer, to pay to Jhonne Harwod,
dene of gild, the sowm of twenty pund debursit be him in the townes
effairs and at thair command, to witt, for the expenssis and wedges of
certane men putt in the stepill for keping thairof the space of [blank]
dayes, the tyme of this laitt appearance of trubill, and als for sending
away of certane missiues to the burrowes anent the new customes of
France, and for the expenssis of thre hors quhilk wes feyit for Henry Ros,
William Fairlie, and Alexander Owsteane, to haif past to Stirling, conform
to the particulare compt heirof gevin in be the said Jhone.
Kingis bairnis, priuelege of burges and gild.
In considderatioun of the guid seruice done to the town be vmquhill
Alexander King, Aduocatt, and sumtyme clerk deputt of this burgh, and
vnderstanding that he wes bayth burges and gild brother nochtwithstanding that his name wes nocht insert in the lokkett buikis, thairfore
gevis and grantis to his airis and bairnes the richt and priuelege of the
bairnis of ane burges and gild brother to be admittit thairto for the sam
dewty, and thair names insert in the gild buik quhen thai requyre the sam.
Lordis lettre and ansuer thairto anent electioun of the maiestratis.
Comperit capitane James Cvninghame, as direct fra the erlis of Mar,
Gowry, Lord Dunfermling, Byde, Lyndsay, Cambuskynneth, of the Kingis
Maiestie secreitt counsall, and producet ane bill subscryuet be the saidis
Lordis quhairin thai in effect desyret that the town suld be war in thair
present electioun to put vpoun the lyttis any sic as hes kythet thame
selffis factious and vnquyet at this tyme, bot to vse the counsall of the
ministeris to quhome the said Lordis hes comunicat thair myndis, desyring
to gif forther care and credite to the berer as to thame selffis, as at
lenth is contenit in the said lettre daittit fra Stirling the xxiiij of September instant; and the said James credit being hard at lenth, he
declairit in effect that the said Lordis meanet nocht to hurt the townis
priueleges bot rather to meaneteyne the sam, and willit that the guid town
for thair plesour and requeist, and in consideratioun of this present
necessitie and vnquyet tyme, suld elect ane of thir persounis, viz: the
capitane of the castell, Lord Lyndsay, laird of Arnestoun, laird of Cleische,
to be prouest for this present yeir, and als to elect Jhonne Adamsoun,
maister Michaell Chisholm, Andro Sclater, Jhonne Arnott, Jhonne Jhonestoun, Robert Bog, or ony four [of] thame to be baillies, and Adame
Fullertoun to be dene of gild; with the quhilk the said prouest, baillies,
and counsall, being avyset, ansuerit that the tyme thairof wes nocht this
day, bot thai suld in thair awin place elect sic as thai mycht fynd maist
meitt for the weill of the town, and as thai wald ansuer to the Kingis
Maiestie, and ordanis ane ansuer to be maid in writt heirvpoun to the
27 September 1582.
Rex, electioun of the magestratis.
In presens of the prouest, baillies, and counsall, and pairt of the
deykinis of craftis, comperit maister George Young, seruitour to the
Kingis Maiestie, and producet ane lettre from his Maiestie direct to the
prouest, baillies, counsall, and deykinis, and all vtheris having vote in
the electioun of the maiestratis for this nixt yeir, of the quhilk lettre
the tenour followes:— Traist freindis, we greitt you weill. For the
better furthsetting of our authoritie and seruice and retening of our guid
subiectis in quyetnes at our conventioun approcheing, and prevening of
all dayngeris amang sic as sall repair thairto, vpoun the occasioun of the
haill trubles quhilk may possiblie fall owt sen we ar vncertane gif the
myndis of all persounis be yitt satled, we haif tane occasioun to direct
this our lettre desyring yow affectuouslie to elect and cheis sic persounis
to bear publict offices within that our burgh for the yeir to cum as feiris
God, ar wyse, honest, discreitt, and cheiflie that hes constantlie avowet
the caus of God and the furthsetting of our authoritie and seruice at all
tymes sen our coronatioun, quhairthrow bayth we and all that sall convene
within your burgh to that effect may be in surtie and gude ordour kepit
amangis all estaittis of persounis, quhairin ye sall do ws acceptabill pleasour
and guid seruice, as we haif the berer our seruand to dilate vnto yow at
gritter lenth quhome ye sall credite. Thus we committ you to God.
Frome Stirling castell, this xxiiij of September, 1582. James R. And the
said maister George credite beand hard, he declarit that his Maiestie
wald nocht hurt the townes priueleges bot rather meaneteyne the sam,
and thairfore left the electioun and nominatioun of the maiestratis in thair
awin handis, thai beand persounis of the qualiteis contenit in the said
lettre; and the said prouest, baillies, and counsall, and deykinis ordanet
ane lettre of maist humbill and hartlie thankis to be writ to his
28 September 1582.
At after none, in presens of the baillies and ane pairt of the counsall,
auld and new, my lord prouest, with thair avyse and consent, becaus his
lordship wes to pas ower the watter, left his twa votes in electioun of the
maiestratis to Robert Ker, baillie, in cais his lordship returnet nocht
befor the said electioun.