2 July 1585.
Leyth, men of Air, merkat.
Fynds it maist expedient for mayntenance of the liberteis of this
burgh that the guids of the men of Air presentlie in Leyth be brocht
up and pakkit within this burgh and nocht in Leyth, and als hes agreit
all to pas doun to Leyth for staying of the merkets haldin thair on
8 July 1585.
For guid ordour in the mwre, staying of the infectioun, and keping
of the clene fra the fowle, fynds it maist expedient that all the fowle
lugeis, fowle folk, and fowle geir be placeit be eist the greitt fowle luge,
quhilk is at Purvessis Acres, and the clene folk, thair lugeis and geir
to be west the samyn; and swa sone as any infectioun aryses in the
clene mwre the separatioun to be maid incontinent, the seik and
thair guids to be had to the fowle mwre, the haill with thair luge to be
clengeit immediatlie. Attour, fynds expedient inrespect of the greit
charges that the town is put to in the drynk quhilk is of les necessitie,
that the samyn be browin thynner as cumis to threttie twa gallouns the
boll, and according thairto agreit presentlie with James Scot, Patrik
Thomsoun and Issobell Ry for brewing of the samyn to the said quantite,
and thai to haif of the town ten schillings for the brewing of ilk boll.
9 July 1585.
Sclater, maister of wark to the college, pensioun.
The foresaids bailyeis, counsall and deykins, calling to mynd the
greitt expenssis and chairges maid be thame vpon thair College besyde
the Kirk of Feild, as alswa foirseing the greitt commoditie and proffeitt
that be Gods grace sall insew of that guid wark, nocht onelie to the
inhabitants of this burgh bot alswa to the haill kingdome, be the flwrissing of lettres and instructioun of the yowth, now far decayet within the
rest of this realme, thinks it mete and maist necessar thairfore that sum
honest, wyse, and discreitt nichtbour of this burgh be appoyntit maister of
wark and owersear of the effairis of the said College, quha sall be
comptabill to the provest, bailyeis, counsall and deykins of this burgh
for the dewteis and proffeits that is or sall happin heirafter be fund
pertening to the said College; and thairfore all in ane voice names and
appoynts Androw Sclater, burges of this burgh, to the said office during
all the dayes of his lyfetyme, for the quhilks paynis and travellis he sall
haif yeirlie ane pensioun of the sowme of ane hundreth merks . . . .
provyding alwayes it sall nocht be lesum to the said Androw to refuse
any vther office or burding laid to his chairge be the guid toun for the
glorie of God, the Kings Maiesties seruice and the weilfair of this burgh.
14 July 1585.
Imbassadouris of Denmark.
Ordanis lettres to be sent to my lord provest, to Alexander Clerk,
and to the towne of Dundie to travell that for the weill of the estait of
burrowes and honour of the realme the imbassadouris of Denmark may
be mair honerablie interteneit and better luiket vpoun.
16 July 1585.
Proclamatioanent the tred in Leyth.
Forswamekill as it appertenis properlie to the priveleges of frie
burghis to haif the topping, selling, and vseing and exerceing of merchandice and to nane vtheris, lykeas it is speciallie be acts of parliament
and speciall priveleges of this burgh provydet that na maner of staipill
guids suld be howset, pakket, peillet, ventit, toppit or sawld within the
vnfrie tonn of Leyth, nochttheles dyuers persouns, burgessis of this
burgh, inhabitants of Leyth and vthers, vnder cullour of the present
visitatioun and seiknes, hes tayne vpoun thame to do and attempt incontrar the saidis acts and priveleges, thairfore ordanis proclamatioun to
be maid throw this schore and toun of Leyth inhibiting and dischairgeing
all maner of persouns, burgessis of this burgh, or vtheris, frie or vnfrie, to
tak vpoun hand to howse, pak, peill top, vent or sell any maner of staipill
guids and merchandice within the said toun of Leyth, or vse the liberteis
belanging to ane frie burgh, or vsing of any handie craft or tred preiudiciall to the liberties of this burgh, vnder the payne of escheitt of the
guids and pvnisement of the persouns awners thairof at the will and
discretioun of the provest, bailyeis, and counsell of this burgh.
21 July 1585.
Bureing in the mwre.
Ordanis that nane be bureit in the mwre bot be the beir and nocht
careit vpoun mennis bakis or sledis for sweirnes of the buriares.
23 July 1585.
Smythtie and the rest of the seruands in the mwre.
For the offences committet be Smythtie, fowle hangman, ordanis
him to be layet in the irins in the mwre and bund to the gibbet thairof
quhill forther ordour be tayne with him, and appoyntis William Harvie,
bailyie, William Fairly, George Smyth and the dene of gild, to pas and
sie the samyn done; and als to discharge all the rest of the seruands in
the mwre that will nocht serue as thai ar commandet be the bailyeis, and
ordanis that na stipend be payet thame quhill compt be tayne of thair
bygane seruice gif thai haif meritet the samyn.
Wikkers, fowlemen. Wikkers, fowlemen.
Ordanis that the fowle clengers in the mwre haif ilk ane ane stafe with a
wikker at the heid, and the stafe to be ane elne abone thair heid, and
appoynts William Fairly to sie the samyn done.
28 July 1585.
Pont, Trinitie College.
Ordanis William Fairly to caus send to Henry Nesbet, bailyie to
Saynctandrois the procuratioun for dimissioun of the provestrie of the
Trinitie college in favouris of the guid town, that the said Henry may
gett the rychtis thairof past and owtred; and ordanis James Ros,
thesaurer, to pay to the said maister Robert Pont the sowme of thrie
hundreth merkis promittet to him for the said dimissioun according to the
contract maid betuix him and the guid towne.
4 August 1585.
Fynds it expedient, statutes and ordanes that quhen any persoun is
brocht in of the mwre and resaues the key of his howse that he sall
remayne thairin amangs his geir and handill the samyn the space of
xv dayes befoir he haif libertie to pas in the hie streits.
10 August 1585.
The foresaid bailyeis and a pairt of the counsall ordanis proclamatioun to be maid throw this burgh chairgeing that na maner of persouns
induring the tyme of this present pestilence, aither men or wemen, tak
vpoun hand to hald any conventiouns at the close heids, Kowgaitt, and
hie streits, be evin or be day, as thai commonelie do, quhairby infectioun
daylie aryses, dischairgeing all conventioun of huseis and wemen in
speciall and all sic vther idill persouns quha hes nocht chairge or licence
of the bailyeis, bot onelie to convene at kirk and merket and to na
vthair places and tymes, vnder the payne to be incloset in thair howssis
vpoun thair awin charges for the space of ane moneth and forther pvnist
in thair boddis and guids at the will of the magestrats.
18 August 1585.
Thesaurer, Trinity College.
Ordanis James Ros, thesaurer, to caus sett vp the ruif of the beidmenis howse of the Trinitie College, repair and theik the samyn and
intromett with the daillis being thairin quhilk ar xxvij in number, as the
said thesaurer declairet, and with all vther materialles and to put in
fir geists within the samyn.
Robesoun, Flemyng pvnist.
Patrik Robiesoun and Allane Flemyng, fleschoures, accuset for selling
of suspect flesche and misvsing ane honest woman quha fand falt with
thair evill flesche, com in will thairof, and thairfoir ar ordanet to put
to the croce and a paper in thair heid and oblist nocht to do the lyke
vnder the payne of banisement.
25 August 1585.
Fynds it expedient that Thomas West, George Wyllie, James
Ramsay and Jhonn Kessen be resauet for aucht dayes or thairby to
serue in the place of the officeris that ar seik, incloset or inlaiket.
Appoyntis William Littill to pas and speik with maister Jhonn Craig,
minister, to sie gif he will tak vpoun him to teach twyse in the owlk
inrespect the toun is presentlie destitute of ministers.
27 August 1585.
Grantis that it sall be lesum to any honest nychtbour quha is habill
to mak guid for his guid behaviour to transport himselff to ane vnsuspect and clene howse careing nathing with thame, the seik and suspect
guids alwayes passand to the mwre.
Commissio, Williamsoun, Myller.
Fynds it expedient that Thomas Myller and Dauid Williamsoun be
direct to the Kings Grace to impetrat lettres for calling in of the counsall
and deykins agane the tyme of the electioun of the new counsall and
3 September 1585.
Boxe in the clerkis chalmer.
Fynds it expedient that the boxe of the clerkis chalmer be oppinit
and sichtit, and inrespect of the necessitie of the puir in the hospitall
that the money thairof be tayne furth and imployet for thair support,
and appoyntis William Harvie, bailyie, and Androw Sclater to pas to
the same, and the said bailyie to resaue the money thairof and gif ane
pairt thairof owlklie to Jhonn Stevinsoun, wobster, to be distributet
to the bedrellis quhilk had the kirks almous.
10 September 1585.
Buriall translatet, precept, gild.
The foresaid bailyeis and counsall, with the dene of gild and
thesaurer, and Thomas Bruce, deykin of the cordiners, Jhonn Stevinsoun, deykin of the wobsteris, being convenit, considerand the evill bruit
of ane misbehaviour toward the deid committet daylie be the buriares,
quhome the bailyies can nocht owersie without greitt daynger, thairfore
the maist pairt fynds that the buriall be transportet to the nether yaird
of the Hie Kirk for a seasoun, and ordanis the dene of gild to caus mak
ane dure and entres in the kirkhewch to the samyn.
17 September 1585.
Lyttis of the deykins electit.
Henry Nesbet and William Nesbet, bailyeis, Nicoll Vddert, dene of
gild, James Ros, thesaurer, William Littill, Androw Sclater, George
Smyth, tailyeour, of the counsall, and Jhonn Stevinsoun, deykin of the
wobsteris, remembring that sen the begynning of this present pestilence
thay haif remanet within this burgh constantlie, sustenand the burding
of the offices laid vpoun thame vnto this hour, with the lose and deyth
for the maist pairt of dyuers of thair childrein, seruands, and familie,
and nocht without the extreyme daynger of thair awin lyffes, maist
eminentlie knawin vnto all men, the rest of thair brether of the counsall
and deykins, quha wer na les astrictet, oblist, and sworne to assist and
tak cair of this commoun weill, having desertet thair places and forsaikin
thair offices, contrair to thair aythis and allegeance maid and gevin, and
yitt continuand hes nocht repairet to this burgh at this maist necessar
tyme approcheand and appoyntit to convene and surrogat vtheris in
thair rowm, quhairby the haill estaitt of this burgh is apperand to fall in
confusioun, thairfore the said bailyeis, dene of gild, thesaurer and counsall,
considerand that this day is appoyntet to the nominatioun of the lytes of
the deykins of crafts for the yeir to cum, fynds it maist expedient, nochtwithstanding the absence of the rest of the counsall and deykins, to obserue
the tyme appoyntet, and for thair pairt to dischairge thair dewteis and proceed to the said nominatioun, and thairfore hes nominatet and electit the
persouns followand to be lytes of the deykins of crafts, to witt, . . .
Fynds it expedient that the foure Flemyngs clengeoures and
cureris of the pest sall be sustenit vpoun the townis expenssis for the
space of xv dayes, begynnand yisterday, to gif pruif of thair knawlege
and airt, to the effect the towne may be forther perswadet of thair help
and support of this contagious seiknes, and ordanis Henry Nesbet to
deburse thair necessars during that tyme, and James Aikman to be caitour
and furnesar to thame, and the towne to consider him for his paynis,
and Mungo Braidies howse to be maid patent to thame with the guids
thairin and oppin duris to be maid to that effect.
22 September 1585.
Laird of Braid, Littill Egipt.
The said bailyeis and counsall and deykins quha were present,
vnderstanding that Robert Fairlie of Braid, for the favour and luif he beris
to the guid toun and of his awin guid will, hes frelie grantet and consentit
to len his howssis callit Littill Egipt besyde the commoun mwre for
brewing thairin of the drink to the folkis in the mwre and sic necessar
vsis as the toun hes found guid to imploy the samyn, thairfore the said
bailyeis, counsall and deykins, acknawlegeing this his guid will as ane
singulare guid benefite schawin and done to the commoun weill in tyme
of necessitie, amangs many vther stedabill plesures, freindschips and guid
nychtbourheids, and willing that this sall nocht turn to his hurt and
preiudice, hes promist, bund and oblist, lykeas thai be thir presents promissis and faythfullie binds and oblissis thame and thair successoures to
thankfullie rander and delyuer to the said Robert Fairly of Braid, his
aires and successoures, the saidis howssis at quhat tyme soeuir he or thai
sall requyre the same, in als guid estaitt and conditioun as thai wer at the
resaving of thame.
Henrysoun, extent frie.
For the guid and thankfull seruice done and schawin to the guid
towne be James Henrysoun, chirurgeane, at this tyme of pestilence, in
visitatioun of the seik at all tymes be day or be nycht, and geving his
guid counsall, assistance and fortificatioun thairinto, in samekill that
throw his guid care and diligence he spairet nocht the hasard of his awin
lyfe and contracted the said seiknes in his awin body with the lose and
deyth of his wyfe in the sam diseise of pestilence, and to the effect that
he may haif the better occasioun to continew in schawin of his guid will
and seruice to the guid towne in tymes cuming, and that vthers by his
guid exampill may be provoket to do the lyke heirafter, thay ar mouet to
be thankfull vnto him, and thairfore be thir presents thai haif exemit and
exemis him for all the dayes of his lyfe fra all payment of any pairt of
the extents, taxatiouns, impositiouns, or contributiouns to be sett, imposet,
or rayset vpoun this burgh and the inhabitants thairof any maner of way.
24 September 1585.
Guthre, clerkis depute.
Maister Alexander Guthre, commoun clerk of this burgh, with avyse
and consent of the said bailyeis and counsall, namet and constitute
maister Dauid Guthre his depute in the said office quhill he be dischairget, and dischairget all vther deputes maid of before except William
Stewart, younger, and the said maister Dauid acceptet and gaf his ayth.