London under Henry V (1413–22)

Henricus Quintus.

The names of the Maires and Shoreffes of London the whiche were in the tyme of the regne off Kynge Henre the v^the, the whiche was crowned at Westmestre the ix^th day of Aprel, the whiche than was Passyon Sonday and a grete raynye daye. (fn. 1) This yere the kynge lete fetche frome Langley the bonys of Kyng Richard the ij^de (fn. 2) to Westmestre in to the tombe that he did make him selffe for hym and his Quene Anne. And the same yere Sir John Oldcaste was a rested in to the Towre, and after brake oute of prison.

This yere Sir John Oldecastell with many oþer lordes and heritikes had emagened the distruccion of the kynge and of Holy Chirche, but the kynge with stode hem and toke many of them, which were drawe and hanged and brentt, galowes and all, to the nombre of xlij^ti persones, but Sir John Oldcastell scapyd.

The Batel Of Agyncorte in Pycardy on the day of Cryispynian beyng Fryday.

This yere was brent in Smythfeld John Claydon, Skynner, and Richarde Gutmyn, Barker, for herytekys. Also the same yere the kynge toke his jorney toward Normandy, and at Southehampton the Erle of Cambryge and the Lorde Scrope and Sir Thomas Graye were be heded for conspirynge of the kynges dethe. And þan the kynge passed the see with iiijc. shippes. And the xvj day of August he landed a litell from Hareflete and lcide a sege to the towne, and conteneued to the xx day of Septembre, and than was the towne yolde to oure kynge. And than the kynge wente towarde Caleys, and on Crispine Crispianis day at Agyncortte all the rialte of Fraunce come be for the kynge to lett him of his wey. And the kynge faughte with hem and discomfid them and slewe many lordis and other peple, and toke many prisoners, Dukes, Erlis, and othir lordes. And on the xxiiij day of Novembre the kynge with his prisoneres came to London.

[E]mperowre of Allmen.

This yere the Empour of Almayne came in to Engelond and was at Seint Georges fest. And at the procession the kynge went a bove him, and at the masse the kynge sate a bove him, and at the mete the kynge sate on the right honde of the emperoure. And the Duke of Bedforde, Chaunsler of Englonde, sate on the lifte side of the Emperour, and the Beshuppe of Dyvelyn and dukys that came with the Emperour sate on the right honde of the Kynge. And the first sotilte that came on the table was our Lady armyng Seint George and an angill doinge on his sporys. The secounde sotilte was Seint George fightynge with the dragon, and the spere in his honde. The therede sotilte was a castell, and Seint George and the kynges doughter ledyng the lambe in to the castell gate. Also this yere Duke William of Holond came in to Engelonde.

This yere the kynge sailed in to Normandy and londed the first day of August be syde Towcke and toke the towne and castell sone after; on our Ladye day the Nativite the kynge wan the towne of Cane, and sonc after the castell. Also the Duke of Clarence beseged the towne of Bayue and wan hit. And the same yere the kynge wan many other townes and castelles and stronge abbeyes longe be for the fest of Seint Edward in Octobre.

This yere the generall counsell was endyde atte Custaunce, and an unyversale pece made in Holy Chirche and a Pope chosyn, whiche was called Martinus quintus. Also Sir John Oldcastell was take and dampned at Westmestre, drawen and brentt, galows and all. Also the same yere the kynge besegide the towne and castell of Falloyes and gate hem bothe; also the towne and castell of Shirebrough yelden to the Duke of Glowcester. And after the kynge gatte Pountelarge and many other streynthes. And a boute Lammas the kynge layde sege to Rone.

This yere on Seint Wolstones day the towne and castell of Rone was yolde to oure kynge.

This yere the kynge came to Troyes in Champayne where he was worthely resseyved of all the lordys spirituall and temporall. And on the morowe the kynge mett withe the Quene of Fraunce and Dame Kateryne hir doughter and the Duke of Boyrgoyne in the body of Scint Petris churche; and after they went up to the auter and there the articles of the pees were redde and othes made on eyther syde. And then was the kynge and Dame Kateryne ensured togeder. And on the morowe after Trinite Sondaye, that is to sey the iij day of June, he spoused Dame Kateryne in the seide chirche of Seint Peter in Troyes, and the kynge was made Regent and Eyre of Fraunce.

The Coronacyon of Quene Kateryne.

This yere the ix day of Feverell the kynge and the Quene Kateryne came to London, and the xxj daye of the same mo[n]the she was crowned at Westmester, and the fest was holden in the grete hall.

Off the Feste of þ^e Cronacioun of Quene Kateryne and of Service. Fyrst, the quene sate in hir astate, and the Erchebysshoppe of Caunterbury and the Bysshoppe of Wynchester satte upon the righ[t] honde of the quene, and the Kynge of Scottis sate in his estate upon þe lyfte hand of the quene. And the Duches of York and the Countes of Huntyngdon sate upon the same side. And att every course nexte the quene the Bysshoppis were servid, covered as the quene, and than the Kynge of Scottis and other lordis. And the Duke of Glowcester was Surveour, and the Erle Marchall knelyd in the right side of the quene holdyng in his honde upryght a septure, and the Knyght Marchall holdyng a noþer septure on the lifte syde of the quene. And the Countesse of Kente sittinge on the right fote of the quene. And the Countesso Marchall sytting on the lifte fote of the quene.

Also this same yere sone after Wytsonday the kynge sayled in to Fraunce and laide a sege to the Cite of Mewes Embrye (fn. 4) and contenewed forthe. This yere was a new wedercok set u[p] on Powles stepyl. (fn. 5)

Henricus vj^tus natus vz., [vj.] die Decembris, hoc est die Sancti Nicholai episcopi, A° Domini M^liiij^exxj°.; Henricus quintus ultimo Augusti diem cla[u]sit e[xtre] mum. Et sic vixit post nativitatem fihij sui Ilenr[ici] vj^ti xxx ^et octo septimanas [e] fere duos dies.

This same yere on Seint Nicholas day Henry the kynges sonne was borne at Wyndsore, and in the monthe of Maye the Cite of Mewes in Brye was yolden to the kynge. Also the same monthe the quene shipped at Hampton, and so passed the see in to Fraunce. Also in this yere the last daye of August dyed Kynge Harry the v^th at Boys Vynsent with oute Parys, whos bonys the viij^th day of November at Westmester were enterred.

Henricus quintus ultimo Augusti dicm cla[u]site[xtre]mum. Et sic vixit post nativitatem filij sui Henr[ici] vj^ti xxx^ta ct octo septimanas [et] fere duos dies.

Footnotes