Close Rolls, April 1236

Calendar of Close Rolls, Henry III: Volume 3, 1234-1237. Originally published by His Majesty's Stationery Office, London, 1908.

This premium content was digitised by double rekeying. All rights reserved.

'Close Rolls, April 1236', in Calendar of Close Rolls, Henry III: Volume 3, 1234-1237, (London, 1908) pp. 253-260. British History Online https://www.british-history.ac.uk/cal-close-rolls/hen3/vol3/pp253-260 [accessed 25 March 2024]

Image
Image
Image
Image
Image
Image
Image
Image

Close Rolls, April 1236

De nave deliberanda.—Mandatum est ballivis Suht' quod per visum mercatorum deliberari faciant navem Thome le Mascun quam Johannes Blancbuly cepit in mari et que arestata est apud Suht' per preceptum regis, accepta prius securitate a magistro ejusdem navis quod satisfaciet Johanni Salady et sociis suis, mercatoribus Rothomagensibus, quantum ad ipsum pertinet de expensis quas fecerunt circa navem illa[m] et res et mercandisas ejusdem navis perquirendas et de damnis ei illatis occasione illius captionis. Teste rege apud Kenyton', prima die Aprilis.

De capreolo dato.—Mandatum est Jacobo Hoes' quod in foresta de Selewud' faciat habere Luce de Drumar', qui infirmus est, unum capreolum, de dono regis. Teste rege ut supra.

[m. 14.]

Pro Galfrido Esturmy.—Mandatum est justiciariis ad custodiam Judeorum assignatis quod de debito quod Galfridus Esturmy debet Benedicto Crespin et sociis suis, Judeis, eidem Galfrido rationabiles terminos habere faciat. Teste ut supra.

Rex. De pluribus ornamentis ecclesie ad opus regis.—Mandatum est Willelmo de Haverhull' quod libros et ornamenta ecclesie subscripta emi faciat ad opus regis ponenda in capella regis apud Evereswell'(?), videlicet unum psalterium, (fn. 1) capitellarium, collectarium, ympnarium, breviarium, temporale scilicet et sanctorum, unum antiphonarium, unum missale, unum gradale, unum troparium et ordinale, et unam albam, amictum, stolam, manipulum, unam casulam, duo tualia Benedicto, unum manutergium, unum de canavazio ad coperiendum altare, phiolam et thurribulum, unum superaltarium, corperalia et pixidem, asserem ad pacem deferendum et duo candelabra. Et cum ea emerit, illa liberet custodi domorum regis apud Wudestok'. Teste rege apud Waltham, xxvi. die Marcii.

Libertas abbatis. Pro abbate Westmonasteriensi.—Rex vicecomiti Suht' salutem. Precipimus tibi quod non distringas tenentes abbatis Westmonasteriensis et homines ipsorum tenentium in balliva tua pro amerciamentis factis coram justiciariis nostris ultimo itinerantibus in comitatu tuo et finibus factis coram eisdem pro licentia concordandi et fine facto pro comitatu tuo, unde idem abbas quietanciam per cartam nostram quas eis inde fieri fecimus. Teste rege apud Kenyton', iiij. die Aprilis.
Eodem modo mandatum est vicecomiti Middels'. Teste rege ut supra.

De perdonatione.—Rex perdonavit Hugoni de Vivon' centum solidos quos barones de Scaccario ab eo exigunt per summonitionem Scaccarii regis pro evasione Johannis Russel, prisonis, a prisona de Chiweton', qui postea eodem die captus et suspensus fuit, ut dicitur. Et mandatum est predictis baronibus quod ipsum Hugonem de predictis centum solidis quietum esse faciant. Teste rege apud Kenyton, iiij. die Aprilis.

Pro fratribus predicatoribus Oxonie.—Mandatum est Johanni de Nevill', justiciario foreste, quod permittat fratres predicatores Oxonie libere et sine impedimento chiminachii abducere sex quercus qua (fn. 2) Willelmus Lungesp' eis dedit ad maeremium in bosco suo de Burecestr', qui est infra forestam regis. Teste rege apud Kenyton', v. die Aprilis.

De tradendo in ballium.—Mandatum est vicecomiti Noting' quod si Johannes de Plesset' et Willelmus de Ambervilla, capti et detenti in prisona regis apud Noting' pro roberia facta de rebus et catallis Robertini, mercatoris de Florentia, in partibus de Blya, invenerint ei salvos plegios qui manucapiant eos habere coram rege quando preceperit ad standum recto de roberia predicta unde rettati sunt, si quis inde versus eos loqui voluerit, tunc eos per plevinam predictam dimittat et a prisona regis deliberet. Nomina autem predictorum plegiorum, qui eos manuceperit (sic), regi scire faciat. Teste ut supra.

Pro Ada de Sancta Elena.—Mandatum est justiciariis ad custodiam Judeorum assignatis quod non obstante eo quod Adam de Sancta Elena terminos suos non servavit de fine quem fecit cum Elya Blundo, Elya filio Benedicti, Aaron filio Habrahe et Aaron Linc', Judeis regis, de debito in quo eis tenetur faciant ipsum Adam decetero terminos predictos habere et conservare. Teste rege apud Kenyton', vi. die Aprilis.

De extenta vadii Judeorum facienda.—Mandatum est eisdem quod terram Celestr' de Boleton' in Boleton', que est vadium Aaron et Salomonis et Joscei, Judeorum Lond', et per sacramentum proborum et legalium hominum extendi faciant quantum terra illa valeat in dominicis redditibus, assisis et aliis, et secundum extensionem illam predicte Celestr' rationabiles terminos de debito quod ipsa eis debet, habere faciant. Teste ut supra.
Eodem modo mandatum est eisdem de terra Gilberti de Totenham in Totenham extendenda, que est vadium Elye le Evesk' et Aaron filii Abrahe, Judeorum Lond'. Teste ut supra.

Pro Henrico de Hauvill.—Mandatum est vicecomiti Buk' quod non distringat Henricum de Hauvill' qui est in servitio regis per preceptum regis ad faciendum sectam ad comitatum suum. Et averia sua que occasione predicta [cepit] ei deliberari faciat. Teste rege apud Gingeston', viij. die Aprilis.

Pro Henrico de Trublevill'.—Mandatum est constabulario de Porecestr' quod faciat habere Henrico de Trublevill', senescallo Wasconie, sexaginta fusta in bosco Simonis de Monte Forti de dono ipsius Symonis infra forestam regis de Bere sparsim per loca ubi capi poterunt ad minus nocumentum bosci predicti carianda usque ad insulas regis Geres' et Gener'. Teste rege apud Kenyton', x. die Aprilis.

Rex. De vinis liberandis et cariandis.—Mandatum est custodibus celarii regis Westmonasterii quod de vinis regis que sunt in predicto celario liberent per visum Johannis de Colemere vicecomitibus regis London' sex dolia vini carianda usque Kenyton'. Liberent etiam predicto Johanni duodecim dolia vini de predicto celerio mittenda usque ad Turrim regis London', sicut rex ei precepit. Teste ut supra.
Mandatum est Johanni de Colemere quod de vinis regis que sunt in custodia sua apud London' liberet vicecomitibus regis Lond' tria dolia carianda usque Waltham, et quinque dolia carianda usque Havering', et decem et octo dolia vini que custodi (sic) celarii regis Westmonasterii ei liberabunt per preceptum regis, recipiat, de quibus eariari faciat usque Turrim London' duodecim dolia, et sex dolia liberet vicecomitibus London' carianda usque Kenyton', sicut rex eis precepit. Teste rege apud Kenyton', xi. die Aprilis.

Pro Magistro Symone de Langet', archidiacono Cantuarensi.—Mandatum est justiciariis ad custodiam Judeorum assignatis quod Aaron de Eboraco, Judeum, qui debita exigit a Magistro S. de Langeton', archidiacono Cantuarensi, pro Waltero de Langeton' fratre suo, cujus heres ipse est, coram rege venire faciant ab octabis Clausi Pasche in xv. dies cum omnibus cartis, talliis et aliis munimentis, per que debita illa ab eo exiguntur ut sciri possit quantum idem Aaron ab eo exigit pro predicto Waltero, sicut ipse debita illa recuperare voluerit. Et interim non permittant (fn. 3) aliquam de predictis debitis fieri districtionem. Teste rege ut supra.

De inquisitione de quodam mortuo.—Mandatum est vicecomiti Midd' quod, assumptis secum coronatoribus regis de comitatu suo et presente ballivo abbatis Westmonasteriensis, fieri faciat inquisitionem de morte Osberti Smud, qui interfectus est apud Westmonasterium, et mortuum sepeliri faciat, salva baronibus regis de civitate London' libertate sua et similiter predicto abbati libertate sua; ita quod per inquisitionem illam nullius juri aut libertati derogetur. Teste ut supra.

Pro Sixto Romano.—Mandatum est majori et vicecomitibus London' quod appellum, quod Avicia Pech' facit versus Sixtum Romanum de raptu et pace regis fracta et unde idem Sixtus attachiatus est venire coram justiciariis regis itinerantibus apud Turrim Lond', ponant in respectum usque ad proximum adventum regis apud London', quia rex vult quod loquela illa coram eo sit deducta. Et habeant ibi hoc breve et aliud breve. Teste rege apud Windles' xi. die Aprilis.

De quodam prisone.—Mandatum est vicecomiti Suhampt' quod prisonem captum apud Portesm' pro falsa moneta, quem ballivi regis apud Portesm' ei liberabunt, recipiat et salvo custodiat, donec rex aliud inde preceperit. Teste rege ut supra.

Insule. De inquisitione de Geres'.—Mandatum est baillivo de Geres' quod per sacramentum proborum et legalium hominum de bailliva sua diligenter inquirat si Alesia et soror sua, filie Roberti Morin, fuerint seisite de octo acris terre in parochia Sancti Salvatoris ut de feodo die quo obierint, que quidem octo acre terre sunt in manu domini regis tanquam escaeta sua, ut dicitur, et si Willelmus Morin, qui dicit se esse heredem earum, sit propinquior heres earum; et si per ipsam inquisitionem constiterit ei ipsum Willelmum esse propinquiorem heredem earum tunc eidem Willelmo de predicta terra sine dilatione plenam seisinam habere faciat. Teste ut supra.

[m. 14.]

Pro ponte de Stanes.—Mandatum est constabulario Windes' quod habere faciat Radulfo le Punter, custodi pontis de Stances, quandam quercum ad reparationem predicti pontis in foresta de Windes', de dono regis. Teste rege apud Windes' xiij. die Aprilis.

Roma. Pro Johanne Saraceno.—Mandatum est justiciariis proximo itineraturis in comitatu Salopie quod loquelam que summonita est coram eis per breve regis inter Thomam Corbet, petentem, et Johannem Saracenum, tenentem, de una virgata terre et tribus solidatis redditus cum pertinentiis in Benetl' audiant et ad judicium proferendum non procedant donec de processu totius loquele predicte plenius regem certioraverint, quia loquela illa dominum regem tangit ratione prebende quam predictus Johannes habet de donatione regis, cujus quidem occasione prebende idem Johannes de predictis terra et redditu implacitatur. Teste ut supra.

Pro quibusdam hominibus comitisse Penbr' rettatis de morte hominis. —Rex justiciariis suis itinerantibus apud Cantuariam salutem. Monstravit nobis dilecta soror nostra A. comitissa Penbr' quod, cum Andreas le Scot, Osbertus Gendun et Ricardus de Werestam, homines sui de Kemesinges, accessissent ad parcum suum de Kemesing' et ipsi invenissent ibidem quosdam malefactores qui parcum illum fuerunt ingressi tandem ortum fuit inter homines ipsius comitisse et ipsos malefactores certamen quoddam in quo contigit unum ex malefactoribus illis ibidem fuisse interfectum, de cujus morte ipsi Andreas, Osbertus et Ricardus rettati sunt, ut dicitur. Et ideo vobis mandamus quod hujus rei veritatem diligenter inquiratis et, si predictos Andream, Osbertum et Ricardum inde culpabiles esse inveneritis, scire vos volumus quod ad instantiam dicte sororis nostre sectam que ad nos pertinet de morte predicta eis perdonavimus eo quod ille qui interfectus fuit in parcis malefactor extitit; ita tamen quod ipsi stent recto, si quis inde versus eos loqui voluerit. Teste rege apud Windes', xiiij. die Aprilis.

Pro Avicia que fuit uxor Ade filii Willelmi de Gossefeld'.—Mandatum est Ade filio [Willelmi] quod de terris et redditibus quos Adam filius Willelmi de Gosfeld' et Avicia uxor ejus tenuerunt de hereditate ipsius Avicie, et quos cepit in manum regis occasione mortis ipsius Ade, eidem sine dilatione plenam seisinam habere faciat. Teste ut supra.

Rex. De mensis in aula Turris Lond'.—Mandatum est H. de Patheshul?', thesaurario domini regis, quod faciat habere constabulario Turris London' denarios ad tabulas emendas ad mensas inde faciendas ad magnum deisium regis in magna aula ibidem et ex quo rex scierit quantum ei ad hoc liberaverit litteras regis de liberate ei habere faciet. Teste rege ut supra.

[m. 14.]

De respectu loquele.—Mandatum est justiciariis de Banco quod loquelam que est coram eis per breve regis inter Radulfum Pyrot et Magistrum Rogerum de Weseham et conjudices suos quare ipsi tenuerunt tamen (?) placitum in curia Christianitatis de laico feodo ipsius Radulfi contra prohibitionem regis, unde datus fuit eis dies a die Pasche in xv. dies, ponant in respectum usque in crastinum Sancte Trinitatis, ita quod loquela tunc sit ibi in eodem statu quo esse debuit a die Pasche in xv. dies, eo non obstante quod predictus magister et conjudices sui ad predictum diem coram eis non interfuerunt. Teste rege apud Windes', xiiij. die Aprilis.

Rex. De balistis.—Mandatum est H. Giffard', constabulario Turris London', quod de balistis regis que sunt in custodia sua habere faciat Amauro de Sancto Amando quatuor balistas de cornu ad duos pedes et decem balistas de ligno ad unum pedem ponendas in castris nostris Heref' et Sancti Briavelli. Teste rege apud Windes', xv. die Aprilis.

De hominibus de Scalleby.—Rex baronibus suis de Scaccario salutem. Monstraverunt nobis homines nostri de Scalleby quod, cum Hugo de Nevill', dum fuit justiciarius foreste nostre, dimisisset eis pasture (sic) haye nostre de Scalleby per xx. solidos annuos ad Scaccarium nostrum reddendos, et ipsi pasturam illam tenuissent usque ad tempus quo Brianus de Insula postea fuit justiciarius noster ejusdem foreste, qui eos inde disseisivit, vos nichilominus exigitis ab eis predictos xx. solidos annuos. Et ideo vobis mandamus quod sub sigillo Scaccarii nostri demandetis vicecomiti nostro Eboraci quod diligentem faciat inquisitionem per quantum tempus dicti homines nostri pasturam illam tenuerunt, ut inde certificati per inquisitionem illam de toto tempore illo quo non tenuerunt pasturam illam de annuo redditu predictorum xx. solidorum ipsos quietos esse faciatis et postea nichil ab eis occasione predicta exigatis. Teste ut supra.

Rex. Pro rege, de denariis ad expensas regis.—Rex significavit H. de Patheshull', thesaurario suo, quod iturus est ad partes de Rading' die Veneris post Clausum Pasche. Et mandatum est eidem thesaurario quod usque Rading' sub omni festinatione mittat centum libras ad expensas regis, et per litteras suas regi significet quantum receperit ad Scaccarium regis post (sic) anno etc. xx. in thesauro. Teste ut supra.

Rex. De forestis regis et domibus de Clarendon'.—Mandatum est vicecomiti Dors' quod coram Roberto de Aundely, cui rex manerium suum de Gyllingeham [commisit] cum domibus et parco regis et aliis pertinentiis suis, venire faciat viridarios partium illarum et xij. discretos et legales milites et alios de comitatu suo ad videndum in quo statu idem Robertus receperit forestam illam, et qualiter fuerit custodita de viridi et venatione; et postquam diligentem inde fecerint inquisitionem, sub sigillis predictorum viridariorum et militum et sub sigillo suo et predicti Roberti, scire faciat regi in quo statu forestam illam receperit. Teste ut supra.

[m. 14.]

Eodem modo scribitur vicecomiti Wiltes' quod venire faciat coram Waltero de Langeford' viridarios et xij. liberos et legales homines, tam milites quam alios, ad videndum in quo statu eas invenerit et qualiter fuerint custodite de viridi et venatione; et inquisitionem illam scire faciat regi, etc. ut supra.
Dominus rex commisit eidem Waltero domos suas de Clarendon' cum forestis Clarendon' et Graveling' custodiendas quamdiu ei placuerit. Et mandatum est Henrico filio Nicholai quod domos illas cum predictis forestis ei liberet. Teste ut supra.

Rex. De vinis ad opus regis.—Mandatum est ballivis Bristoll' quod de vinis Johannis Langbord que de novo venerunt apud Bristoll' eligi faciant viginti dolia vini ad os regis et ea liberari faciant constabulario Bristoll' ponenda in castro Bristoll' ad opus regis; et de denariis eorundem vinorum rex eis respondebit. Teste rege apud Windes', xxj. die Aprilis.

Pro Alina que fuit uxor Willelmi Avenel.—Mandatum est constabulario de Sancto Briavello quod de terris que fuerunt Willelmi Avenel, que sunt in custodia sua, sine dilatione faciat habere Aline que fuit uxor ipsius Willelmi rationabilem dotem suam que ad eam pertinet de eisdem terris. Teste rege apud Windes', xxj. die Aprilis.
Eodem modo scribitur Roberto Fromund et sociis suis in comitatu Wigornie.
Quia rex accepit per inquisitionem etc., quod Alicia que fuit uxor Willelmi Wipetail Appellat Michaelem le Tanur, Arnewiz de Lancastr', Henricum le Turnur, Osbertum Ruffum et Willelmum filium Ascelini, captos et detentos in prisona regis de Hertford', de morte predicti Willelmi quondam viri sui odio et atia et non eo quod inde culpabiles sint; mandatum est vicecomiti Essex' quod si singuli eorum invenerint ei xij. probos et legales homines etc., qui manucapient eos habere coram justiciariis regis etc. ad primam assisam etc., tunc eos tradat in ballium etc. Teste rege apud Kenyton,' xxiij. die Aprilis.

Libertates. Pro priore de Magna Malvernia.—Mandatum est vicecomiti Glouc' firmiter injungendo etc. quod cartam regis de libertatibus concessis abbati et monachis Westmonasteriensibus et cellis suis firmiter in balliva sua teneri faciat; ita quod contra libertates predictas quas rex concessit (fn. 4) omnibus cellis suis non distringat priorem de Magna Malvernia, que est una de cellis suis, vel homines suos in balliva sua ad faciendam sectam ad comitatum et hundredum de qua quietanciam habent per cartam predictam. Teste rege ut supra.

[m. 13.]

De perdonatione facta Henrico de Trublevill'.—Rex baronibus suis salutem. Sciatis quod perdonavimus dilecto et fideli nostro Henrico de Trublevill', senescallo nostro Wasconie, ducentas marcas que exiguntur ab eo ad Scaccarium nostrum de prestito ei facto per Petrum de Rivall' apud Glouc', xxviij. die Decembris, anno regni nostre xviij. Perdonavimus etiam eidem Henrico centum libras que exiguntur ab eo ad Scaccarium nostrum de prestito ei facto per Robertum Passelew' apud Westmonasterium tertio die Februarii anno regni nostri xviij. Perdonavimus etiam eidem Henrico centum marcas que exiguntur ab eo ad Scaccarium nostrum de prestito ei facto apud Sanctum Neotum, xxiij. die Marcii, anno regni nostri xix. ad deferendum usque ad insulas nostras. Et ideo vobis mandamus quod de predictis trescentis marcis et centum libris ipsum Henricum quietum esse faciatis. Teste rege apud Kenyton', xxiiij. die Aprilis, anno regni nostri xx. Per ispum regem coram consilio suo. [Cancelled] Quia aliter inferius.

Pro magistro Alexandro le Seculer.—Mandatum est vicecomiti Hertf' (sic) quod sine dilatione plenam seisinam habere faciat Magistro Alexandro le Seculer de omnibus terris quas Nicholaus le Seculer pater suus, cujus heres ipse est, tenuit de rege in capite per soccagium in Irchenefeld,' Dunnemor' et Sutton,' ut idem Magister Alexander dicit, et de quibus seisitus fuit ut de feodo die quo obiit, salvo jure cujuslibet. Teste rege ut supra.

De perdonatione pro abbate de Melros'.—Mandatum est vicecomiti Norhumbr' quod de quadragesima quam exigit de abbate de Melros' occasione cujusdam pasture sue de Trothop', que est in balliva sua, ipsum quietum esse permittat, quia rex dictam quadragesimam ei perdonavit. Teste rege apud Westmonasterium, xxvij. die Aprilis.

Pro Henrico de Trublevill', de perdonatione.—Rex baronibus suis de Scaccario salutem. Sciatis quod perdonavimus dilecto et fideli nostro Henrico de Trublevill', senescallo nostro Wasconie, quadringentas et quinquaginta marcas que exiguntur ab eo ad Scaccarium nostrum de prestito ei facto de thesauro nostro per preceptum nostrum, videlicet, ducentas marcas quas habuit per manum Petri de Rivall' tempore quo fuit thesaurarius noster, et centum libras quas habuit per manum Roberti Passelewe tempore quo fuit thesaurarius noster, et centum marcas quas habuit per manum dilecti et fidelis nostri H. de Pathes', thesaurarii nostri, ad liberationem inde faciendam militibus et servientibus in insulis nostris de Gener' et de Gernes'. Et ideo vobis mandamus quod de predictis quadringentis et quinquaginta marcis ipsum Henricum quietum esse faciatis. Teste rege apud Westmonasterium, xxx. die Aprilis.

Footnotes

  • 1. MS. prealterium.
  • 2. Sic in MS.
  • 3. Permittat MS.
  • 4. concessit concessit. MS.