Close Rolls, April 1237

Close Rolls, April 1237

De prisone custodiendo in prisona de Neugat'.—Mandatum est custodi gaiole de Neugat' quod Adam Alemannum, prisonem regis, quem rex ad eum mittit per Rogerum le Criur, ab eo recipiat et in prisona regis salvo custodiat donec rex aliud inde preceperit. Teste rege apud Kenynton', primo die Aprilis.

Pro Hereberto, persona capelle regis in castro de Notyngham'.—Rex vicecomiti Noting', salutem. Ostendit nobis Herebertus, persona capelle nostre in castro de Noting', quod antequam prostratum esset molendinum nostrum subtus castrum illud decimas ejusdem molendini nomine dicte capelle sue percipere consuevit; et cum idem molendinum jam de novo reedificetur, tibi precipimus quod decimas illas ei inde habere facias, sicut eas prius percipere consuevit. Teste rege ut supra.

De denariis liberandis, non obstante absentia thesaurarii et camerarii.—Mandatum est Galfrido de Wroxhill' quod denarios, quos liberari precepit rex secundum tenorem brevis regis de liberate quod thesaurario et camerario regis inde mittit rex, [liberet] nec remaneat occasione absentie predictorum thesaurarii et camerarii regis quin fiat liberatio predicta, dumtamen sit de aliis denariis thesauri regis quam de tallagio Judeorum. Teste rege apud Keneton', ij. die Aprilis.

De vinis retinendis ad opus regis.—Mandatum est ballivis Bristoll' quod de vinis melioribus Wasconie que nuper venerunt apud Bristoll' retineant ad opus regis triginta dolia vini, et ea salvo custodiant donec rex aliud inde preceperit. Teste rege apud Kenynt', iij. die Aprilis.

[m. 15.]

Pro Magistro Symone de Steyland'.—Mandatum est Johanni de Monem' quod habere faciat Magistro Symoni de Steiland' iiij. quercus, de dono regis, in propinquiore bosco manerii de Ringwud' ad molendina ejusdem manerii reparanda. Teste rege ut supra.

Pro rege, de vinis cariandis.—Mandatum est custodibus vinorum regis Westmonasterii quod, de vinis regis que sunt in custodia sua, sine dilatione faciant habere latori presentium, Willelmo de Collemer', vj. dolia vini Andegavie carianda apud regem apud Keneton'. Teste rege apud Keneton', iiij. die Aprilis.

Pro Ricardo de Gray.—Mandatum est Reginaldo de Albo Monasterio quod habere faciat Ricardo de Gray prope fluvium Tamisie duas bonas fagos ad focum suum, de dono regis. Teste rege ut supra.

De oleo cariando pro rege.—Mandatum est custodi manerii de Wodestok' quod ad denarios regis cariari faciat usque Keneton' oleum regis quod habet in custodia sua; ita quod ibidem sit hac instanti die Veneris ante Dominicam in Ramis Palmarum, et de denariis ei ibidem inde respondebit. Teste rege apud Kenet', v. die Aprilis.

Pro priore de Ipelepenn'.—Mandatum est baronibus de Scaccario quod rex perdonavit priori de Ipelepenn' iij. marcas que exiguntur ab eo per summonitionem Scaccarii regis de auxilio regis in Anglia generaliter concesso, et quod ipsum priorem de illis iij. marcis quietum esse faciant. Teste rege apud Keneton', vij. die Aprilis.
Idem mandatum est vicecomiti Devonie, et quod averia ipsius prioris ea occasione capta ei deliberari faciat. Teste rege ut supra.

Quod mercatum et feria teneantur apud Feckeham.—Rex vicecomiti Warr' (sic), salutem. Scias quod volumus quod singulis septimanis habeamus unum mercatum apud manerium nostrum de Feckeham per diem Jovis. Volumus etiam quod singulis annis habeamus in eodem manerio nostra de Feckeham unam feriam in vigilia et in die Nativitatis beati Johannis Baptiste et per duos dies sequentes. Et ideo tibi precipimus quod predictum mercatum singulis septimanis per diem Jovis et predictam feriam singulis annis in vigilia et in die Nativitatis beati Johannis Baptiste et per duos dies sequentes per totam balliam tuam clamari et teneri facias, sicut predictum est. Teste ut supra.
Eodem modo scribitur vicecomiti Warewic'. Teste rege ut supra.

De maerennio ad opus regis.—Mandatum est Ricardo de Munfichet quod habere faciat servienti regis manerii regis de Feckeham in foresta regis de Feckeham grossum maerennium ad quandam grangiam faciendam in predicto manerio regis, longitudinis centum et l. pedum, per talliam inde factam inter senescallum foreste et predictum servientem de numero quercuum ad hoc liberatarum. Teste rege ut supra.

[m. 15.]

Pro abbate de Furnes'.—Mandatum est Rogero de Essex' quod de terra que fuit Michaelis le Flemeng' cum omnibus pertinentiis suis quam concessit Roberto, quondam abbati de Furnes', et monachis ejusdem, et ecclesie Furnes', tenendam de rege et heredibus regis reddendo inde regi et heredibus regis per annum x. libras per manum suam ad Scaccarium regis, et quam in manum regis cepit per preceptum regis per mortem predicti Roberti, quondum abbatis ejusdem loci, fratri Willelmo, nunc abbati ejusdem loci, sine dilatione plenam seisinam habere faciat. Teste rege apud Keneton', viij. die Aprilis.

Pro uxore Henrici de la Pumeray.—Mandatum est vicecomiti Devonie quod, assumptis secum quatuor de discretioribus et legalioribus militibus et aliis de comitatu suo, in propria persona accedat ad terras et tenementa que fuerunt Henrici de la Pumeraye et sunt in custodia regis in ballia sua, et per visum eorundem assignari faciat Margarete que fuit uxor ipsius Henrici vel certo nuncio suo, rationabilem dotem suam que ipsam contingit de eisdem terris et tenementis. Teste rege apud Kenynt', x. die Aprilis.
Eodem modo scribitur vicecomiti Cornubie de terris et tenementis que fuerunt ipsius Henrici in ballia sua. Teste rege ut supra.

De catallis que fuerunt Henrici predicti.—Mandatum est comiti Cornubie quod omnia catalla que fuerunt Henrici de la Pumeray in comitatu Cornubie, et que sunt in manu sua occasione mortis predicti Henrici, salvo custodiri faciat quousque rex cum eo colloquuim habuerit, ita quod nichil inde amoveatur. Teste rege ut supra.

Pro priore de Lentone.—Mandatum est Roberto de Ros quod residuum de xv. quercubus quod deest priori de Lenton', quas rex ei dedit ad infirmariam suam faciendam in bosco de Wyllegh', permittat ipsum priorem sine impedimento prosternere et abducere. Teste rege ut supra.

Pro rege, de piscibus capiendis.—Mandatum est Johanni le Flemeng' quod piscatori regis quem ad ipsum mittit ad capiendum per visum suum in vivario regis de Neuport lx. brennias et xl. lucios ad opus regis intendens sit ad hoc et auxiliano. Teste rege ut supra.

Pro Roberto de Muscegros'.—Mandatum est Ricardo de Wrotham quod habere faciat Roberto de Muscegros, de dono regis, per visum viridarii regis in foresta regis de Selewode maerennium ad xij. copulas faciendas ad reparationem domorum suorum de Cherleton'. Teste rege ut supra.

De damis capiendis.—Rex custodi parci sui de Havering', salutem. Mittimus ad te Hamonem filium Philippi ad capiendum in predicto parco xx. damas contra instans Pascha anno regni regis xxj. ad opus nostrum. Et ideo tibi precipimus quod ipsum eas ibidem capere permittas. Inveniri etiam facias eidem Hamoni cariagium ad venationem illam ad nos cariandam apud Westmonasterium, et similiter sal ad eam saliendam si necesse fuerit. Et custum quod ad hoc posueris, cum venatio illa illuc venerit, acquietari faciemus. Teste rege apud Merton', xij. die Aprilis.

De maerennio ad capellam in castro Wintonie.—Mandatum est custodi foreste de Bere quod habere faciat vicecomiti regis Suht' maerennium in foresta regis de Bere ad cheverones, gistas et planchias faciendos ad operacionem capelle regis Sancti Judocy in castro regis Wintonie faciendam. Teste rege ut supra.

Dies datus est commune de Aldingebir' et Stephano de Segrave de loquela que est inter eos coram domino rege de consuetudinibus et serviciis a die Pasche in xv. dies coram eodem rege, quia . . . [Cancelled] Quia est in tergo rotuli istius.

Pro Luca de Drumare.—Mandatum est Ricardo de Munfichet quod habere faciat Luce de Drumar' in ballia Jacobi Hoes' duos damos, de dono regis. Teste rege apud Merton', xiiij. die Aprilis.

Rex baronibus suis de Scaccario, salutem. Sciatis quod perdonavimus Luce de Drumar' xx. solidos quos tailliatores dominicorum nostrorum in comitatu Wiltes' assederunt anno regni nostri xviij. super homines de Burton' quod est menbrum de Mer', una cum c. solidos quos dedimus eidem Luce de tallagio assiso super homines manerii de Mer' quod idem Lucas habuit de ballio nostro. Et ideo vobis mandamus quod ipsum Lucam inde quietum esse faciatis. Teste rege ut supra.
Et mandatum est vicecomiti Wiltes' quod de predictis xx. solidis ipsum Lucam pacem habere permittat et averia ipsius ea occasione capta ei deliberari faciat. Teste rege ut supra.

De consensu regis in electionem de Bikenacr'.—Rex electioni facte de fratre Andrea, quondam suppriore de Bykenacr', in priorem ejusdem loci, regium adhibuit assensum et favorem. Et mandatum est Willelmo filio Ricardi, quod ei de predicto prioratu et omnibus terris, tenementis et possessionibus ad ipsum prioratum pertinentibus plenam seisinam habere faciat. Teste rege apud Westmonasterium, xv. die Aprilis.

Pro priore et fratribus hospitalis extra Bisopesgate.—Rex perdonavit priori et fratribus hospitalis extra Bisopesgate quinque marcas ad quas amerciati fuerunt coram justiciariis de foresta ultimo itinerantibus in comitatu Essex'. Et mandatum est baronibus de Scaccario quod predictos priorem et fratrem de predictis v. marcis quietum esse faciat. Teste rege apud Westmonasterium, xviij. die Aprilis.
Et mandatum est vicecomiti Essex' quod pacem eis inde habere faciat, et averia ipsorum ea occasione capta eis deliberari. Teste rege ut supra.

[m. 14.]

Pro Ricardo Gubiun.—Rex concessit Ricardo Gubiun quod de debito in quo tenetur Jacobo Crespin et Samueli filio Aaron, Judeis Lond', habeat respectum usque in xv. dies a die Sancti Michaelis, anno regni regis xxj. Et mandatum est justiciariis ad custodiam Judeorum assignatis quod respectum illum eidem Ricardo inde habere faciant, et interim ipsum pro predicto debito distringi non permittant. Teste rege ut supra.

De quodam assignato ad custodiam operacionum castri Roffe.—Rex assignavit Willelmum balistarium ad custodiam operationum castri regis Roffe. Et mandatum est eidem Willelmo quod predicte operationi, una cum constabulario castri predicti, sit intendens. Teste rege ut supra.

De perdonatione transgressionis de venatione regis capienda.—Rex perdonavit Willelmo le Petit et Alexandro filio Symonis, transgressionem quam fecerunt de venatione regis capienda in foresta regis Windles', qui capti fuerunt cum filio Ranulphi del Broc occasione predicta quem deliberare fecit rex. Et mandatum est constabulario castri Windesor' quod predictos Willelmum et Alexandrum a prisona regis deliberari faciat. Teste rege ut supra.

Pro monialibus de Fosse extra Thorkeseye.—Mandatum est Warnero Engayne quod de septies viginti acris terre cum pertinentiis quas moniales de Fosse extra Thorkesseye habuerunt de dono H. regis, avi regis, in Thorkesseye et quas cepit in manum regis occasione precepti quod fecit rex de dominicis regis capiendis in manum regis talem seisinam inde eis habere faciat qualem prius inde habuerunt. Teste rege ut supra.

Pro priore Sancte Trinitatis Eboraci.—Mandatum est Roberto de Ros quod in foresta regis de Gauteriz faciat habere priori Sancte Trinitatis Eboraci quinquaginta quercus ad operationem ecclesie sue, de dono regis. Teste rege ut supra.

Pro abbate Westmonasteriensi.—Mandatum est majori et vicecomitibus Lond' quod loquelam que est coram rege inter abbatem Westmonasteriensem et ipsos de contentionibus quarumdam libertatum, ponant in respectum usque ad proximum adventum regis London in eodem statu in quo nunc est. Teste rege apud Keneton', xxj. die Aprilis.

Pro comite Lincoln'.—Mandatum est Roberto de Everingham quod libere permittat quod J. comes Linc' et constabularius Cestr', cariare faciat maerennium per forestam regis de Shirewod' sine disturbatione chimini quod in eadem foresta perquirere poterit ad se hospitandum apud manerium suum de Cneshal'. Teste rege ut supra.

Pro Johanna que fuit uxor Thome de Gorg'.—Rex concessit Johanne que fuit uxor Thome de Gorges xx. solidos quos Johannes de Purtun' regi debet de fine quem cum rege fecit pro quadam terra tenenda in manerio de Porstok'. Et mandatum est Waltero de Burgo quod illos xx. solidos eidem Johanne habere faciat, de dono regis. Teste rege apud Kenyt', xxij. die Aprilis.

De hogis in comitatu Cornubie fodendis.—Rex mandavit [comiti] Cornubie et Pictavie quod fodi faciat hogas in comitatu Cornubie ad thesaurum in eis querendum, sicut mandavit fieri de hogis in insula de Wicht'. Teste ut supra.

Pro Willelmo de Gardino.—Rex perdonavit Willelmo de Gardino viginti et v. solidos quos Urcellus Judeus Wintonie exigit ab eo pro debito Gilberti le Bret, cujus heres est in custodia ipsius Willelmi. Et mandatum est justiciariis ad custodiam Judeorum assignatis quod ipsum Willelmum de predictis xxv. solidis quietum esse faciant. Teste rege ut supra.

Pro Fratribus Minoribus de Collecestr'.—Rex concessit Fratribus Minoribus de Collecestr' in augmentum placie sue ubi manentes sunt quandam placiam regis contiguam placie predicte que estimatur ad valentiam duorum solidorum per annum in herbagio, sicut accepit rex per inquisitionem per vicecomitem Essex' factam per preceptum regis. Et mandatum est eidem vicecomiti quod de eadem placia eisdem Fratribus plenam seisinam habere faciat. Teste rege ut supra.

Pro Henrico de Ortiaco.—Rex concessit Henrico de Ortiaco quod boscum suum de Cury libere et sine impedimento claudere possit fossato et haia et parcum inde facere quietum de vasto et regardo et de omnibus que ad forestam regis pertinent, sicut plenius continetur in carta regis quam ei inde fieri fecit rex. Et mandatum est Ricardo de Wrotham quod ipsum Henricum boscum illum claudere et parcum inde facere permittat, sicut predictum est. Teste rege ut supra.
Eodem modo scribitur Ricardo de Munficheth. Teste rege ut supra.

Pro Nicolao de Molendinis.—Mandatum est Waltero de Burgo quod, preter illas quaterviginti et tres acras terre cum pertinentiis in Netham quas Johanni Kepping et Ele uxori ejus, Petro de Hyges, Radulfo Bastard' et Beatrici uxori ejus, Johanni de Arundel et Agneti uxori ejus reddi precepit rex, faciat habere Nicolao de Molendinis de terris et tenementis suis que de rege tenuit in capite in eodem manerio de Netham, que sunt de libero tenemento ipsius Nicolai ut dicit, talem seisinam qualem inde habuit antequam inde fuisset disseisitus occasione inquisitionis quam inde fieri fecit rex in quam idem Nicolaus se nondum posuit, non obstante seisina illa quam inde fieri precepit abbati de Waverleg', eo quod credebat rex de terra illa pro voluntate regis posse disponere. Teste rege ut supra.

Pro Petro Dagun.—Mandatum est justiciariis ad custodiam Judeorum assignatis quod per sacramentum proborum et legalium hominum extendi faciat terras Petri Dagun quantum valeant in dominicis, redditibus, villenagiis, et omnibus aliis exitibus terre, et secundum valorem earumdem terrarum et quantitatem debitorum in quibus tenetur Aaroni filio Abraham', Elye le Eveske, Leoni de Milestrate (sic) et Aaron et Elye, fratri ejus, Judeis Lond', rationabilem finem et rationabiles terminos ei habere faciat. Teste rege ut supra.

De hogis in insula de Wyght'.—Rex comiti Cornubie salutem. Quia datum est nobis intelligi quod quidam de insula de Wight' foderunt hogas quasdam ibidem pro thesauro ibidem querendo vos attente rogamus quatenus festinetis quantum poteritis accedere ad partes illas et inquiratis diligenter de fossoribus predictis qui fuerint, et si quid in hogis illis invenerint; et illos attachiari faciatis ad respondendum coram nobis de facto suo quando preceperimus. Hogas illas etiam que nondum sunt fosse ibidem fodi faciatis ad videndum si thesaurus aliquis fuerit in eis absconditus, ut pro loco et tempore nos possitis inde certificare. Teste ut supra.

Pro Symone de Petra Ponte.—Mandatum est vicecomiti Sussex' quod, si Symon de Petra Ponte invenerit ei salvos plegios de stando recto quando et ubicumque preceperit rex de forisfacto foreste comitis Warenn' unde rettatus est, tunc ad ipsum vel ad catalla sua manum non apponat occasione precepti regis quod rex ei fieri fecit de arestandis illis quos ei constaret per inquistionem esse culpabiles de predicta foresta. Teste ut supra.

Pro Johanne Blundo, nuncio regis.—Mandatum est baronibus de Scaccario quod liberationem duorum denariorum in die quam Robertus de Alemannia quondam nuncius regis, qui mortuus est, percipere consuevit per manum vicecomitis Essex' de elemosina regis constituta, concessit rex Johanni Blundo, nuncio regis. Et mandatum est eisdem quod liberationem illam ei habere faciant, sicut predictus Robertus eam habere consuevit. Teste rege ut supra.

Pro Magistro Symone de Steilland'.—Mandatum est vicecomiti Suhampt' quod rex per cartam suam concessit dilecto clerico suo Magistro Symoni de Steiland' manerium suum de Ringwod' cum omnibus partinentiis suis, habendum et tenendum toto tempore vite sue, reddendo inde regi et heredibus suis singulis annis x. libras donec eidem magistro providerit rex in eschaetis ad valentiam xxx. libratarum terre, sicut plenius continetur in carta predicta; et quod de predicto manerio cum omnibus pertinentiis suis eidem Magistro sine dilatione plenam seisinam habere faciat, sicut predictum est. Teste ut supra.

(fn. 1) Henricus, Dei gratia rex Anglie, dominus Hibernie, dux Normannie et Aquitannie, comes Andegavie, baronibus suis de Scaccario, salutem. Sciatis quod per cartam nostram concessimus magistro Symoni de Steiland' manerium nostrum de Rinkewod' cum omnibus pertinentiis suis, habendum toto tempore vite sue reddendo inde per annum x. libras donec ei providerimus in escaetis ad valentiam xxx. libratarum terre, sicut plenius continetur in predicta carta. Et ideo vobis mandamus quod hoc ita inrotulari et teneri faciatis. Teste me ipso apud Keniton, xxiij. die Aprilis, anno regni nostri xxj.

De pannis emendis ad elemosinam regis.—Mandatum est Hugoni de Pateshull', thesaurario regis, quod emi faciat ccc. tunicas singulas de tribus ulnis ad opus pauperum, et similiter trescenta paria sotularium, et tam tunicas illas quam sotulares erogari faciat pauperibus contra instans festum Pentecostes ubi magis viderit esse necesse. Fieri etiam faciat duos calices aureos, utrumque pretii x. librarum, ita quod prompti sint et parati ante predictum festum, et similiter unam tunicam et unam dalmaticam de rubeo samicto ad capellam regis cum aurifragiis competentibus, que etiam ornate sint latis aurifragiis circa manicas ad manus; et tam calices illos quam tunicam et dalmaticam ad regem mittant ante festum predictum usque Glouc' vel alibi ubi tunc fuerit rex. De quibus omnibus, cum custum scierit, litteras regis de liberate ei habere faciet rex. Teste rege apud Kenynt', xxvj. die Aprilis.

Pro hominibus prioris Sancti Johannis Jerusalem.—Mandatum est baronibus de Scaccario quod omnia amerciamenta que exiguntur per summonitionem Scaccarii regis de propriis hominibus prioris Sancti Johannis Jerusalem que quidem liquida sunt et de quibus nulla contentio est ad Scaccarium, habere faciant eidem priori. Teste ut supra.

Hybernia. Pro Henrico de Trublevill'.—Mandatum est justiciario Hybernie quod assisam mortis antecessoris que summonita est coram justiciariis regis apud Dublin' inter Willelmum filium Alani et Agnetem uxorem ejus, petentes, et Henricum de Trublevill', senescallum regis Wasconie, qui est in servicio regis in partibus transmarinis, tenentem, de manerio de Balimasdun' cum pertinentiis, ponat in respectum usque ad octabas Sancti Johannis Baptiste anno regni regis xxj. Teste rege apud Kenynt', xxvij. die Aprilis.

Pro Waltero King, nuncio regis.—Rex concessit Waltero King, nuncio regis, liberationem unius denarii in die quem Walterus Longus de Cern', quondam nuncius domini Johannis regis, patris regis, percipere solebat per manus ballivorum regis Wintonie de dono dicti patris regis de elemosina sua constituta. Et mandatum est baronibus de Scaccario quod ei liberationem illam habere faciant, sicut predictum est. Teste rege ut supra.

Pro Willelmo balistario.—Mandatum est constabulario Roffe quod loco Willelmi balistarii qui languidus est assignet aliquem fidelem et idoneum qui diligenter possit et sciat intendere operationibus castri regis Roffe, sicut predictus Willelmus ad hoc intendebat. Teste ut supra.

[m. 14.]

Pro vicecomite Hereford', de respectu compoti.—Rex dedit respectum vicecomiti Hereford' de compoto suo reddendo et visu faciendo usque in unum mensem a die Pasche anno regni regis xxj. Et mandatum est baronibus de Scaccario quod ita fieri et inrotulari faciant, in nullo occasionantes eum de absentia sua coram eisdem baronibus in crastino Clausi Pasche. Teste ut supra.

De episcopatu Dunholm'.—Mandatum est Johanni filio Philippi, custodi episcopatus Dunholm', quod sine dilatione plenam seisinam habere faciat Magistro Elye de Derham, Johanni de Rumeseye, Stephano de Burton' et aliis executoribus testamenti bone memorie R. quondam Dunholmensis episcopi, de omnibus bonis que fuerunt ejusdem episcopi per omnia maneria episcopatus Dunholm', tam in libertate quam extra libertatem, scilicet de bladis, instauris et omnibus aliis rebus que fuerunt ipsius episcopi, ad faciendam executionem testamenti sui, ad quod etiam ei sit consulens et auxilians modis quibus poterit, faciens eis habere commoditatem domorum et aliorum que necessaria fuerint ad executionem predictam faciendam. Distringi etiam faciat omnes de episcopatu illo qui arreragia debent de tempore prefati episcopi, tam in libertate quam extra libertatem, ad arreragia illa dictis executoribus reddenda. Teste rege apud Kenynt' xxviij. die Aprilis.
Et mandatum est Waltero de Burgo quod omnia bona que invenit in domibus bone memorie R. quondam Dunholmensis episcopi, apud Lond' quando eas in manum regis cepit sine dilatione et occasione et sine diminutione aliqua dimittat executoribus testamenti episcopi predicti ad executionem testamenti sui faciendam. Teste rege ut supra.
Mandatum est majori et vicecomitibus Lond' quod distringant omnes illos in ballia sua quos executores testamenti bone memorie R. Dunholmensis episcopi, ostendere poterunt habere de bonis que fuerunt ipsius episcopi ad bona illa dictis executoribus reddenda. Teste ut supra.

Pro Johanne de Oxonia, converso.—Mandatum est Magistro W. custodi conversorum Lond', et Josceo filio Petri, quod Johanni de Oxonia, converso, quem ad eos rex mittit, ei sicut uni conversorum regis qui sunt in custodia sua necessaria inveniant. Teste ut supra.

Pro Engelardo de Cygoyny.—Mandatum est vicecomiti Glouc' quod quantum de jure poterit sit in auxilium Engelardo de Cygoigny ad jura Johannis de Berkel', nepotis sui, qui est in custodia sua de concessione regis, manutenenda in ballia sua, non permittens quod gravamen vel injuria ei inferatur; et si forte contingat ei inferri dampnum aut molestiam, id ei sine dilatione faciat emendari. Teste ut supra.
Mandatum est Johanni de Rumesye quod omnes armaturas tam haubergones, loricas, galeas, capellos ferreos, quam balistas et quarellos, qui fuerunt Ricardi secundi, quondam Dunholmensis episcopi, et quos idem Johannis de Rumesya, quondam senescallus ipsius episcopi, ei liberabit per preceptum regis per. [Cancelled.]

[m. 14.]

De episcopatu Dunholm'.—Mandatum est Johanni de Rumes', senescallo Ricardi secundi episcopi, quondam Dunholmensis episcopi, quod omnes armaturas, tam haubergones, loricas, galeas, capellos ferreos quam balistas et quarellos, quas predictus episcopus recepit post mortem Ricardi de Mariscis, predecessoris sui, Dunholmensis episcopi, per manum Magistri Stephani de Lucy, tunc custodis ejusdem episcopatus, sine dilatione deliberari Johanni filio Philippi, custodi episcopatus predicti. Ita quod inter eos de omnibus predictis quoddam scriptum conficiatur cujus pars penes ipsum Johannem de Rumes' et alia penes ipsum Johannem filium Philippi remaneat. Et mandatum est eidem Johanni filio Philippi quod omnia predicta, sicut predictum est, ab eo recipiat. Teste ut supra.
Et mandatum est eidem Johanni filio Philippi quod omnia predicta que per visum ejusdem Johannis de Rumes' et aliorum proborum et legalium hominum receperit ea omnia appreciari faciat ad opus regis, et precium eorundem ipsi Johanni de Rumes' et sociis suis, executoribus testamenti ejusdem episcopi, sine dilatione deliberari faciat ad excutionem illam faciendam; ita quod de omnibus que ei liberaverit quoddam scriptum inter ipsos fiat cujus unam partem retineat idem Johannes de Rumes' penes se et predictus Johannes filius Philippi alteram penes se. Teste ut supra.

De vinis capiendis ad opus regis.—Mandatum est Willelmo de Haverhull' quod de vinis que cepit ad opus regis de quadam navi que nuper venit London' vinis carcata liberari faciat vicecomitibus Lond' xij. dolia vini carianda usque Kenynton'. Teste rege apud Windes', xxviij. die Aprilis.

De perdonatione Anketillo Maleure.—Rex perdonavit Anketillo Maleure xx. et tres marcas xj. solidos et x. denarios, per quos finem fecit cum rege cum rex dedit ei manerium de Erleg' pro habendis bladis et instauris inventis in eodem manerio; quod quidem manerium H. de Burgo, comes Kancie, postea versus eum recuperavit per preceptum regis cum bladis et instauris inventis in eodem manerio. Et mandatum est baronibus de Scaccario quod ipsum inde quietum esse faciant. Teste ut supra. Per ipsum regem.

Pro Aufredo de Feringes.—Mandatum est vicecomiti Sussex' quod, si Aufredus de Feringes invenerit ei salvos plegios de stando recto quando et ubicumque preceperit rex de forisfacto foreste comitis Warenn' unde rettatus est, tunc ad ipsum vel ad catalla sua manum non apponat occasione precepti regis quod ei fieri fecit rex de arestandis illis quos ei constaret per inquisitionem esse culpabiles de predicta foresta. Teste rege apud Wind', xxx. die Aprilis.

Pro custode pontis de Stanes.—Mandatum est Reginaldo de Albo Monasterio quod habere faciat custodi pontis de Stanes quandam quercum in foresta regis de Windes' extra dominicum, ad reparationem ejusdem pontis, de dono regis. Teste ut supra.