Calendar of Close Rolls, Henry III: Volume 9, 1254-1256. Originally published by His Majesty's Stationery Office, London, 1931.
This premium content was digitised by double rekeying. All rights reserved.
'Close Rolls, July 1255', in Calendar of Close Rolls, Henry III: Volume 9, 1254-1256, (London, 1931) pp. 207-215. British History Online https://www.british-history.ac.uk/cal-close-rolls/hen3/vol9/pp207-215 [accessed 19 April 2024]
Close Rolls, July 1255
De denariis regi mittendis.—Mandatum est Henrico le Rus et Nicholao de Ebroic', militibus de comitatu Heref', quod cum summa festinacione deferant ad regem vel mittant omnes denarios quos habent de vendicione boscorum regis versus partes Notingh'. Et hoc non omittant. Et, si non faciant, quod vicecomes Heref' ipsos ad hoc distringat. Teste rege apud Geytinton' iiijto. die Julii.
Pro Willelmo de Valenc'.—Rex abbati Westmonasterii salutem. Cum prior et conventus de Stodleg' et H. de Cantilupo, archidiaconus Glovern', habeant in deposito quadringentas et lxa. et xij. libras, tres solidos et quatuor denarios et obolum de pecunia crucis Willelmo de Cantilupo defuncto per venerabiles patres Lincolnensem et Wigorniensem episcopos, tunc negocii crucis executores, in subsidium peregrinacionis ipsius Willelmi assignata, et eadem pecunia post mortem ejusdem Willelmi auctoritate apostolica et de voluntate nostra assignata fuerit dilecto fratri nostro Willelmo de Valenc' in subsidium peregrinacionis sue in Terram Sanctam, vobis mandamus rogantes quatinus pro predicta pecunia eidem fratri nostro reddenda talem districtionem auctoritate vobis commissa faciatis qualem pro vestris debitis propriis facere velletis. Teste rege apud Geytinton' vij. die Julii.
De vinis capiendis ad opus regis.—Rex J. de Gizorsiis,
camerario suo, salutem. Super eo quod nobis significastis quod
propter diversas quietancias a nobis factas diversis mercatoribus
Wasconie non potestis perficere mandatum nostrum quod vobis
fecimus de c. doliis vini capiendis ad opus nostrum et mittendis
per maneria nostra, et quod, ut creditur, pauca alia vina ventura
sunt hoc anno preter illa que jam venerunt, sciatis quod, cum
essemus in Wasconia, pro urgenti necessitate nostra et pro magno
defectu pecunie quem sustinuimus ibidem, cepimus a burgensibus
Burdegale denarios pro quietancia prise vinorum, et E., filius
noster, antequam posset ingredi villam de Briger', juravit et
concessit burgensibus de Brigerak consimilem quietanciam
vinorum suorum, quam nuper ad instanciam ipsius E. per cartam
nostram confirmavimus, unde periculosum nobis videretur
infringere eis concessionem predictam, cum quia multa vina
cepimus ab ipsis de Burdegala sine paga tum quia illi de Briger'
adhuc vacillantes sunt et debiles in fide nostra; et ideo vobis
mandamus firmiter injungentes quod predictos mercatores
vinorum coram vobis et Philippo Luvel, thesaurario nostro,
cui super hoc scribimus, venire faciatis, rogantes et diligenter
inducentes eosdem per pulcra et curialia verba quod ipsi vendant
nobis de vinis suis, ita quod qui habuerit c. dolia vendat nobis x.
dolia, qui vero pauciora vina habeat, secundum majus et minus,
prout vina habuerint, usque ad certum terminum circiter festum
Omnium Sanctorum, ut tunc eis sine ulteriori dilacione satisfiat;
ita prudenter vos habentes in hac parte, quod de vinis suis ad opus
nostrum retineatis et quod nullus eorum reputet se gravatum, nec
de nobis conqueri possint quod eis infregerimus cartam nostram per
quod occasionem habeant a fide nostra recedendi. Teste ut supra.
Et idem mandatum est Philippo Luvel.
Pro Matillide de Cantilupo.—Rex vicecomiti Buk' salutem.
Monstravit nobis Matillis de Cantilupo quod, cum teneat de
nobis in dotem terciam partem baronie de Oylly de dono Henrici
de Oyly, quondam viri sui, cum fidelitatibus et serviciis quorundam militum et aliorum libere tenentium in balliva tua, que ei
post mortem predicti Henrici assignata fuerunt in dotem illam,
Johannes de Plessetis, comes Warr', qui non est heres predicte
dotis, petit auxilium a militibus et libere tenentibus predictis ad
primogenitum filium suum militem faciendum, racione cujusdam
feofamenti quod de nobis habet, ut dicitur (de baronia predicta,
cancelled), et eos ad dandum ei auxilium illud occasione brevis
nostri, quod tibi detulit, de racionabili auxilio habendo de militibus
et libere tenentibus suis in balliva tua ad dictum filium suum
militem faciendum, injuste distringit; desicut ipsa Matillis
dotem illam non tenet de dicto comite nec de eo tenere clamat
nec milites et libere tenentes predicti de serviciis suis sunt intendentes comiti antedicto: et quia eadem Matillis itura est in
servicio nostro in partibus transmarinis per preceptum nostrum,
tibi precipimus quod exactionem predicti auxilii de militibus et
libere tenentibus predicte Matillidis de dote predicta in balliva
tua ponas in respectum usque ad Natale Domini proximo futurum,
ut tunc inde fiat quod fuerit faciendum, et districtionem, si que
eis occasione predicta facta fuerit, interim relaxes. Teste rege
apud Geydenton', ix. die Julii.
Eodem modo mandatum est vicecomiti Oxon' de serviciis
Rogeri de Oylly, Reginaldi filii Petri et Willelmi de Strafford'
et quorundam aliorum militum et libere tenentium in balliva
sua. Teste ut supra.
De respectu milicie.—Rex ad instanciam Eudonis de Shelfhanger, emptoris regine, dedit respectum Thome de Ikwurth'
de se milite faciendo usque a die Sancti Michaelis proximo futuro
in unum annum. Et mandatum est vicecomiti Suff' quod interim
ad arma militaria capienda non distringat. Teste ut supra.
Ad instanciam Theobaldi de Englechevyle rex concessit
consimilem respectum Willelmo de Pokebrok' usque ad eundem
terminum. Et mandatum est vicecomiti Norhamt' ut supra.
Teste ut supra.
De quadam extracta missa ad Scaccarium.—Memorandum quod die Sabbati proxima post festum Translacionis Beati Thome Martiris missa fuit extracta finium et amerciamentorum factorum coram justiciariis de Banco per Rogerum de Thurkelby, et eciam extracta americamentorum nondum taxatorum dividenda per diversos comitatus ad denarios levandos.
De providencia contra festum Sancti Eduuardi.—Quia rex nullam adhuc providenciam fecit contra instans festum Sancti Edwardi, mandatum est Philippo Luvel, thesaurario regis, quod in comitatibus, per quos itineraturus est ad inquisiciones faciendas, regi provideri faciat a vicecomitibus, ubi melius expedire viderit, de centum bobus, cc. multonibus et vjxx. porcis, bonis et pinguibus, contra festum predictum. Et hoc sicut regem et honorem suum diligit nullatenus omittat; ita quod rex illos habeat London' per viij. dies ante festum supradictum. Et rex allocacionem quam eis inde facere debebit ipsis vicecomitibus habere faciet. Teste ut supra.
Pro priore de Novo Burgo.—Johannes, prior de Novo Burgo, habet respectum usque ad quindenam Sancti Michaelis proximo venturam de decima ecclesiarum suarum domino regi concessa in subsidium Terre Sancte. Teste rege apud Croxton' xvj. die Julii.
Pro Hamone Crevequer.—Quia Hamo de Crevequer de speciali mandato regis nuper venit ad regem usque Clyve in comitatu Norhamt', mandatum est justiciariis itinerantibus in comitatu Kanc' quod idem Hamo propter absenciam suam in veniendo et redeundo ad partes Kanc' non occasionetur, nec in aliquo sit perdens, quia absenciam illam rex ei warantizat. Teste ut supra.
De atornato.—Alicia de Scalis ponit loco suo Radulfum de Wyrham et Willelmum de Whitewell', vel alterum eorum quem presentem esse contigerit, ad prosequendum jus ipsius Alicie versus regem quod eadem Alicia dicit se habere in manerio de Neuseles racione donacionis quam Petrus de Roffa ei inde fecit, et quod manerium rex capi fecit in manum suam occasione mortis predicti Petri. Teste rege apud Notingham xix. die Julii.
De denariis levandis.—Mandatum est vicecomiti Norhamt'
quod, sicut se et omnia sua diligit, levari faciat ad opus regis
omnia amerciamenta facta per Willelmum Beneyt et Radulfum
Lof, clericos regis, de perquisitis mercatorum in ultimo transitu
regis per partes illas; ita quod omnes illos denarios habeat in
garderoba regis in vigilia Assumptionis Beate Marie ad ultimum,
liberandos custodi garderobe predicte. Teste ut supra.
Eodem modo mandatum est vicecomiti Leycestr' de denariis
liberandis in garderoba regis ad eundem terminum de amerciamentis factis coram predictis Willelmo et Radulfo de perquisitis
mercati in transitu regis predicto. Teste ut supra.
Eodem modo mandatum est vicecomiti Oxon' de omnibus
amerciamentis factis coram eisdem Willelmo et Radulfo de
perquisitis mercatorum regis in ultimo transitu regis per partes
illas. Teste ut supra.
Eodem modo mandatum est vicecomiti Buk' de perquisitis
mercati regis in ultimo transitu regis per partes illas. Teste ut
supra. Solvit et quietus est.
De amerciamentis vicecomitum.—Et, quia predicti vicecomites
non solverunt dicto die predictos denarios in garderoba regis,
iterato mandatum est eis quod denarios illos habeant in eadem
garderoba in octabis Nativitatis Beate Marie proximo futuris
sine ulteriori dilacione; et quod quilibet vicecomitum predictorum habeat in eisdem octabis in garderoba predicta centum
solidos de se ipso, ad quos rex ipsum amerciavit pro eo
quod non solvit predictos denarios ad terminum sibi statutum.
Teste rege apud Alverton' xix. die Augusti.
Et, quia testificatum fuit postea coram rege per Wibertum
de Kancia quod portitor brevis cum extracta non pervenit ad
vicecomitem Buk' ante terminum solucionis eidem vicecomiti
statutum, rex remisit eidem vicecomiti illos centum solidos ad quos
rex amerciavit eum pro eo quod non habuit predicta amerciamenta
in garderoba regis ad terminum ei primo statutum. Teste etc.
De negocio Suec'.—Rex domino B. duci Sueorum salutem. Cum pro contrahendo inter nos et vos ac regem Sueorum, natum vestrum, perpetuo amicitiarum vinculo ad nos dudum vestros nuncios duxeritis transmittendos, nosque multiplici guerrarum discrimine turbati et plerisque negociis occupati nuncios a latere nostro ad vos pro statu et qualitate rerum investigandis, prout vobis scripsimus, eo tempore mittere nequiremus, ac per discretos et religiosos fratres priorem Bert' et Gommer' de ordine predicatorum, laudabilis industrie et sagacitatis viros, vestram denuo voluntatem nobis lucidius explicandam duxeritis et quomodo nobis pre ceteris mundi principibus vestra serenitas optarit copulari, nos vestre dilectioni proinde grates referimus speciales, discretos ac religiosos Gilbertum de Bello et Rogerum de Refham de ordine supradicto ad vos pro facto mittentes memorato et ad statum regni et qualitatem negocii per ipsos investigandos, quibus super hiis omnibus fidem adhibere et vestram inde voluntatem nobis per eosdem demandare velitis. Teste rege apud Notingham xxij. die Julii.
Pro Agnete de Weston'.—Rex justiciariis suis ad custodiam Judeorum assignatis salutem. Quia accepimus per inquisicionem, quam per Ricardum de la Rokele, senescallum Eduuardi filii nostri in Hybernia, fieri fecimus, quod nos tenemus quatuor carucatas terre cum pertinenciis in Ulveston' in Hybernia, que fuerunt magistri Roberti de Shardelowe et quas Agnes de Weston' ei dedit salvas et quietas de quolibet debito in escambium pro quatuor virgatis terre cum pertinenciis in Angodestorp' in comitatu Leyc' et undecim acris terre cum pertinenciis in Eston' in comitatu Derb', quas ipsa Agnes tenet, et de quibus exiguntur debita Judeorum per summonicionem Scaccarii nostri Judeorum, vobis mandamus quod exactionem illam ponatis in respectum usque ad festum Omnium Sanctorum proximo futurum, ut tunc per consilium fratris et fidelis nostri R. comitis Cornubie et aliorum de consilio nostro eidem Agneti fieri faciamus quod de jure fuerit faciendum. Teste.
Hec sunt nomina procuratorum regis in curia Romana constitutorum per P. Herefordensem episcopum; magister Robertus de Bar' et magister Finatus.
[m. 8d.]
Pro Adam Thalebot.—Rex perdonavit Ade Talebot amerciamentum in quod incidit coram justiciariis ultimo itinerantibus apud Wigorn' in loquela que fuit inter Radulfum filium Nicholai et eundem Adam de assisa ultime presentacionis de ecclesia de Pycheford; et, cum rex sciverit quantitatem predicti amerciamenti, rex faciet eidem Ade habere breve de quietancia predicti amerciamenti. Teste rege apud Notingham xxij. die Julii.
De terra replegianda.—Robertus de Tuyd venit coram rege die Sancte Margarete Virginis et petiit terram suam et Alex' uxoris ejus in Lefremere sibi replegiari, que capta etc. propter defaltam etc. versus Willelmum de Buscey. Et hoc mandatum est justiciariis de Banco.
(fn. 1)De excommunicato a prisona deliberando per caucionem.—Rex tali episcopo salutem. Ostensum est nobis ex parte Petri le Orfevre, quem ad instanciam vestram per corpus suum, tanquam claves ecclesie contempnentem, precipimus justiciari, quod, licet vobis frequenter obtulerit stare mandatis ecclesie, ut tenetur, vos tamen caucionem legitimam ab eo admittere recusistis, quod miramur; et ideo vobis mandamus quod hujusmodi caucione recepta prefatum Petrum a prisona liberari mandetis, scituri quod, si secus egeritis, nos quod nostrum est in hac parte exequemur. Teste rege apud Not' xxiiij. die Julii.
De auro emendo.—Rex vult quod denarii subscripti assignentur ad aurum inde emendum ad opus regis et quod in alios usus non convertantur, videlicet;—de comite Straern', c. libre solvende in festo Sancti Martini proximo futuri pro custodia et maritagio Murielle et Marie, filiarum suarum; de burgensibus Norhamt', pro quadam libertate habenda, xl. marce, unde reddent xx. marcas ad Scaccarium Sancti Michaelis proximo futurum et xx. marcas ad Scaccarium Pasche proximo sequens; de burgensibus de Len, pro eodem, iiijxx. marce, ad eosdem terminos; de burgensibus de Norwic', pro eodem, c. marce, de quibus solvisse debuerunt in festo Beate Marie Magdalene proximo preterito l. marcas et ad festum Sancti Michaelis proximo futurum solvent 1. marcas. Et mandatum est Philippo Luvel, thesaurario regis, et Eduuardo de Westmonasterio quod predictos denarios liberent Willelmo de Glouc' aurifabro terminis antedictis ad aurum inde emendum ad opus regis, prout rex ei injunxit. Teste ut supra.
De nunciis regis Castelle.—Quia electus Tolettanus et Garsyas Martini, sollempnes nuncii illustris regis Castelle, in brevi venturi sunt in Angliam, quos rex optat in terra sua plurimum honorari, mandatum est maiori et vicecomitibus London' et communitati ejusdem civitatis in fide qua regi tenentur quod, assumpta cum eis decenti comitativa concivium suorum London', prefatis nunciis extra civitatem predictam occurrant et eos curialiter recipiant et honorent et conducant eos usque novum Templum London', ubi ipsos hospitari rex precepit, dum moram ibi fecerint; et quod eis curialitates et honores intuitu regis impendant; publice eciam clamari faciant per totam civitatem predictam et firmiter ex parte regis inhiberi ne quis, sicut se ipsum diligit, prefatis nunciis aut hominibus suis vel aliis alienigenis cum ipsis venientibus aliqua proferat verba contumeliosa vel eos in aliquo molestare aut quantum in ipso fuerit offendere presumat; et, si quis contra hanc inhibicionem regis venire presumpserit, rex ad corpus suum et omnia bona sua taliter capiet quod inperpetuum sentiet se gravatum. Teste rege apud Not' xxvj. die Julii.
Pro Willelmo Cissore de Leycestr'.—Rex vicecomiti Leycestr' salutem. Monstravit nobis Willelmus cissor de Leycestr' quod, cum solvisset ad Scaccarium nostrum per manum suam propriam xx. solvidos de debito Simonis et Jocei, Judeorum Leyc', et contratalliam ei inde factam tradidisset Roberto de Arnhale, clerico Philippi Marmyun, tunc vicecomitis nostri Leyc' et Warr', ut super compotum ejusdem vicecomitis ad dictum Scaccarium allocaretur, idem Robertus, antequam compotus ille redditus esset, decessit London' et in custodia sua amissa fuit tallia illa, per quod predicti xx. solidos nunc exiguntur a predicto Willelmo per summonicionem Scaccarii predicti; et ideo tibi precipimus quod, si ita est, exactionem illam ponas in respectum usque ad quindenam Sancti Michaelis proximo futuram, ut tunc per scrutinium rotulorum nostrorum Scaccarii inde fieri faciamus quod in hac parte de jure fuerit faciendum. Teste rege apud Not' xxvij. die Julii.
Pro Rogero comite Norf'.—Rex Ricardo de Rupella, senescallo Eduuardi filii sui in Hibernia, salutem. Monstravit nobis dilectus et fidelis noster Rogerus Bygod, comes Norf' et marscallus Anglie, quod cum habeat vicecomites et justiciarios suos excercentes jurisdicciones suas in terris suis Hibernie secundum leges et consuetudines regni nostri Anglie, per quos recorda de falsis judiciis, si que facta essent in curia ipsius comitis in Hibernia, coram vobis venire deberent et non per iiijor. milites, et Reymundus filius Griffini vobis conquestus fuerit falsum sibi factum fuisse judicium in curia dicti comitis de Katherlah' de loquela que fuit in eadem curia per breve ipsius comitis inter Johannem de Lascellis et Clariciam uxorem ejus petentes et predictum Reymundum tenentem, de feodis quinque militum cum pertinenciis in Kenb' et Finnon' et Fothord', unde placitum in predicta curia coram justiciariis ipsius comitis fuit deductum, vos ad querimoniam predicti Reymundi injuste mandastis venire coram vobis recorda predicte loquele per iiijor. milites et non per predictos justiciarios, sicut facere debuistis, et ideo vobis mandamus quod, si ita est, recordum predicte loquele coram vobis venire faciatis per predictos justiciarios ipsius comitis et non per iiijor. milites, sicut antea mandastis; et si inveneritis recordum illud et judicium in curia predicta coram prefatis justiciariis juste esse factum, tunc exequcionem illius judicii plenius fieri faciatis, et (si) (fn. 2) illud injuste factum fuerit, tunc illud retractari et emendari faciatis, secundum legem et consuetudinem regni nostri Anglie; ita quod pro defectu vestri decetero non audiamus inde querelam. Teste rege apud Notingham xxix. die Julii.
Hibernia.—Rex dilecto et fideli suo F. Ochonhour salutem.
Sciatis quod super eo quod dedimus dilecto fratri et fideli nostro
G. de Lezignan duo cantreda terre in Conac' nullam vobis credimus
injuriam fecisse, cum quidam parentes vestri, qui vestrum, ut
proprium, zelantur commodum et honorem, et de quibus non est
presumendum quod juri vestro, si quod in dictis terris haberetis,
vellent aliquatenus derogare, a nobis frequentius petierint de
dono nostro terras illas et nobis magnam pecuniam obtulerint
pro eisdem; verumptamen venturi sunt in brevi ad partes illas,
Domino permittente, dilectus filius noster Eduuardus primogenitus et heres et dictus Galfridus frater noster qui ita se habebunt
versus vos, sicut eis injunximus per literas nostras, quod nulla
vobis inde fiet injuria. Et ideo adhereatis fidei nostre et dilectioni
sicut prius fecistis, pro quo vos artius habere debemus recommendatos. Teste ut supra.
Rex Ricardo de Rupella, tenenti locum J. filii Galfridi,
justiciarii Hibernie, in Hibernia salutem. Quia datum est nobis
intelligi quod vos in loquela quam Thomas episcopus Cluanensis
sequitur coram vobis versus venerabilem patrem F. Thuamensem
archiepiscopum et suffraganeos et tenentes suos super quibusdam
terris in Con' pactum fecistis cum dicto episcopo de lucro participando, vobis mandamus firmiter injungentes quod dictam loquelam sine dilacione ponatis in respectum usque adventum dilecti
filii nostri Eduuardi primogeniti et heredis et dilecti et fidelis
nostri J. filii Galfridi, justiciarii Hybernie, in Hyberniam, ut tunc
coram eis loquela illa valeat terminari. Teste ut supra.
Rex Eduuardo, filio suo primogenito et heredi, salutem et
paternam benedictionem. Accedens nuper ad presenciam nostram
venerabilis pater F. Tuamensis archiepiscopus pro se et suffraganeis suis necnon et ex parte totius cleri Hibernie, una cum
episcopo Aladensi, coram nobis exposuit quedam gravamina
quibus Hybernicana ecclesia graviter opprimitur et enormiter
pregravatur; adjiciens eciam quod, nisi maturius hiis apponere
remedium curaremus, predicta ecclesia suis juribus et libertatibus
defraudata obprobriose corruet et viliter tendet in occasum.
Primo quidem queritur quod ipsi et tenentes eorum contra antiquas
libertates ecclesiarum suarum trahuntur in placitum coram justiciariis extra suos comitatus ad alias provincias, ita quod per
laborem nimium et expensarum defectum litibus cedere vel
dampnosas composiciones inire coguntur. Secundo quod quidam
justiciarii, vicecomites et alii ballivi nostri in loquelis coram eis
motis paciscuntur cum una parte de lucro participando, per quod
altera pars cito labitur in jacturam et jure suo legitimo defraudatur, quod quam graviter ferimus et moleste, cum non solum clericos
verum eciam universalem plebem Hybernie anxius angit hoc
gravamen. Tercio quod fiunt frequentius attachiamenta et
summoniciones in terris ipsorum sine waranto, que pecunialiter
coguntur redimere vel laborem et tedium de comitatu in comitatum
discurrendo subire. Quarto quod quidam barones Hybernie
impediunt quominus fideles Hybernienses de bonis suis testari
valeant et quominus crucesignati votum suum complere valeant
vel illud redimere cum voluerint. Quinto quod burgenses et
alii tenentes eorum distringuntur ad sequelas faciendas in causis
non tangentibus dictos episcopos vel se ipsos. Et quod hec
gravamina ecclesie Hybernicane inferuntur contra jura et
liberates suas, quibus eadem antiquitus est gavisa, unde, cum
nostram deceat regiam majestatem vestreque conveniat utilitati,
congruat et honori jura et libertates ecclesie defendere et potenti
patrocinio confovere, afflictisque compati et refrenare rebelles,
vobis mandamus firmiter injungentes quod, convocatis coram
vobis archiepiscopis, episcopis, abbatibus, baronibus, justiciariis
et omnibus magnatibus terre Hybernie, per consilium dilecti
et fidelis nostri Johannis filii Galfridi, justiciarii Hybernie, et
aliorum discretorum de consilio vestro, nec non et de consilio
magnatum predictorum, in premissis apponi faciatis celeriter
remedium oportunum, prout ecclesie indempnitati et vestre et
terre Hybernie utilitati et tranquilitati videritis convenire, quo
decus ecclesie crescat per vos et vestre novitatis principium
laudis suscipiat incrementum. Apposuissemus autem in premissis
remedium, nisi vester in Hiberniam presens fuisset accessus,
propter quod vobis et consilio vestro hoc negocium duximus
totaliter committendum. Teste rege apud Notingh' xxx. die
Julii.
Mandatum est Johanni filio Galfridi, justiciario Hibernie,
quod aut faciat archiepiscopo Tuamensi rationabile escambium
de terra in Con' pro villa de Enaudon' et ibidem firmet quoddam
castrum si sit ad profectum Eduuardi filii regis, prout pridem inter
ipsum Johannem et dictum archiepiscopum fuit proloqutum,
vel reddat dicto archiepiscopo villam suam antedictam solutam
et quietam. Teste ut supra.
De perambulacione.—Mandatum est vicecomiti Lanc' quod fieri faciat perambulacionem inter terram Thome filii Willelmi in Ryton' et terram Galfridi de Cheytham in Crampton', quia predicti Thomas et Galfridus posuerunt se coram rege in perambulacionem illam; et scire faciat justiciariis ad primam assisam etc. Teste ut supra.
De terra replegianda.—Alicia filia Edrici venit coram rege die Sabbati in vigilia Sancti Petri ad Vincula et petiit etc. terram suam in Colewell' sibi replegiari que capta etc. propter etc., quam fecit coram justiciariis de Banco versus Walterum Grobbe et Aviciam uxorem ejus, ut dicitur. Et hoc mandatum est justiciariis de Banco. Teste.