Close Rolls, May 1256

Close Rolls, May 1256

Rex justiciariis suis proximo itineraturis in comitatu Westmer' salutem. Quia Robertus de Veteri Ponte, vicecomes Westmer', agit ad presens in Hybernia in servicio Edwardi filii nostri, nec dum ei vel ballivis suis constat de certo die itineracionis vestre in comitatu predicto, et nolumus quod per subrepcionem occasionetur aut gravetur,eo quod est in jam (sic) remotis partibus, vobis mandamus quod occasione communis summonicionis facte coram vobis de itinere vestro in comitatu predicto, dictus Robertus non ponatur in defaltam nec in aliquo sit perdens, quia absenciam suam quo ad hoc ei warantizamus; et ad respondendum pro eo coram vobis de hiis que ad officium suum pertinent Willelmum de Steynton', ballivum suum, loco suo recipiatis. Teste rege apud Windles' tercio die Maii.

Dicunt se gravatos archiepiscopus Tuamensis et sui suffragenei et eorum tenentes, eo quod ad loca remota trahuntur a suis comitatibus et provinciis ad litigandum.
Super hoc provisum est et concessum quod placita omnia in eorum comitatibus incipiantur, et que ad justiciam pertinent in eisdem placitentur, et terminentur, quatinus in eorum itinere secundum justiciam et legem terre terminari poterunt, exceptis causis que ad iter justiciariorum ex sui natura differri non possunt, velut assisa ultime presentacionis, et breve quod dicitur Quare impedit, et De dote unde nichil habet, et De proparte, quod dicitur Inter heredes, Nuper obiit, et De fine facto, et atachiamenta contra prohibicionem tam de vasto quam de placitis que sunt in curia Christianitatis et si qua sunt similia, velut Precipe in capite et Precipe de advocacione ecclesie. Et ista placita, licet extra suos comitatus incipiantur, tamen, cum justiciarii itinerantes ad illos comitatus venerint, ad eos remittantur.
Dicunt eciam se gravatos eo quod servientes domini regis faciunt atachiamenta et summoniciones in eorum terris et cogunt eorum tenentes exire et laborare donec graviter redemerint hujusmodi laborem.
Super hoc provisum est quod istud omnino prohibeatur. Et si deinceps hoc fecerint aut maliciose hujusmodi summonicionibus aliquos gravare presumpserint sine precepto superiorum suorum vel sine justa causa ex debito officii sui et de hoc per inquisicionem vel aliter convincantur, amoveantur a balliis suis et graviter redimantur.
Dicunt eciam se gravatos episcopi predicti eo quod pro timore gravis amerciamenti cum in misericordiam incidunt in curia domini regis non audent prosequi jura sua et ecclesiarum suarum.
Super hoc provisum est et concessum quod, si, ex simplicitate jura sua prosequentes bona fide non vexantes alios ex malicia, in misericordiam inciderint, mitius agatur cum eisdem quam ex rigore exposceret ordo juris, et hoc secundum qualitatem delicti et facultates suas et modum tenure sue, ita quod non nimis graventur.
Dicunt eciam se gravatos ex hoc; si aliquis tenentium suorum indictatus fuerit de crimine aliquo, licet ponere se velit inde super patriam, hoc tamen ei denegatur et quedam probaciones abusive contra eos admittuntur.
Super hoc provisum est et concessum quod cum se super crimine sibi imposito ponere velint se super patriam hoc eis non denegetur, nisi forte sit in casu aliquo ubi hoc de jure locum habere non possit.
Dicunt eciam se gravari ex eo quod implacitantur de terris quas ipsi et eorum antecessores pacifice tenuerunt tempore domini H. regis avi et a conquestu Anglicorum et eciam ante ipsorum adventum in Hiberniam.
Super hoc provisum est et statutum quod, si aliqui petentes narraverint de seisina suorum predecessorum ante tempus predicti H. regis avi et ante conquestum Anglicorum et de nulla seisina narraverint de tempore predicti avi nec post tempus dicti conquestus, eo ipso cadit a causa sua et a jure suo, et, si tenens in magnam assisam se posuerit cum mencione de tempore predicto et per recognicionem ejusdem assise constiterit quod petens vel ejus antecessores nunquam seisinam habuerint tempore dicti regis avi, seu post conquestum nec aliquando postmodum, tunc petens cadat a causa et tenens ab ejus impeticione absolvatur.
Breve quod dicitur Utrum concedatur archiepiscopis, episcopis, abbatibus, prioribus et capitulis habentibus ecclesias parrochiales sibi appropriatas de sanctuario ipsarum ecclesiarum parrochialium sicut conceditur aliis personis de sanctuario ecclesiarum suarum parrochialium quod tamen de feodis aliis non est concessum.

Si ballivus vel alius de terris unde placitum fuit coram eis totum vel partem capiat pro auxilio vel favore prestando; et de hoc constare possit sufficienter, amoveatur ab officio suo et terram illam amittat et nichilominus graviter redimatur.

De perambulacione.—Mandatum est vicecomiti Lanc' quod fieri faciat perambulacionem inter terram Ade de Parva Levr' in Litlelevr' et terram Willelmi filii Henrici, Johannis filii Emme et Willelmi filii Thome in Magna Levr', quia posuerunt se etc. Teste rege apud (sic).

Pro Roberto de Ros.—Quia Robertus de Ros, senior, fuit in veniendo versus regem ad quindenam Pasche, quam rex ei prefixerat ad respondendum ei super hiis que erga eum habet, ita quod in crastino clausi Pasche proximo preterito coram justiciariis itinerantibus in comitatu Norhumbr' in itinere suo in comitatu predicto interesse non potuit, mandatum est eisdem justiciariis quod occasione generalis summonicionis facte coram eis de itinere suo in comitatu predicto dictus Robertus non ponatur in defaltam nec in aliquo sit perdens, quia rex absenciam suam quo ad hoc ei warantizat. Teste rege apud Windes' vj. die Maii.

Pro Humfrido de Boun.—Monstravit regi Humfridus de Bohun, filius comitis Hereford', quod cum predictus comes, pater ejus, et alii antecessores sui debuerint et consueverint habere amerciamenta de transgressionibus factis in foresta sua in comitatu Huntendon', barones de Scaccario de Waltero de Suyneshevet exigunt per summonicionem scaccarii regis dimidiam marcam, ad quam amerciatus fuit coram justiciariis regis ultimo itinerantibus ad placita foreste in comitatu Hunted' pro transgressione facta in foresta ipsius Humfridi de Kinebalton' in comitatu predicto. Et mandatum est eisdem baronibus quod scrutatis rotulis scaccarii super premissis diligenter, eidem Humfrido plenam justiciam exhiberi faciant. Teste rege apud Windes' vij. die Maii.

De modo surgendi de malo lecti.—Rex justiciariis suis de banco salutem. Sciatis quod, cum in regno nostro de anno et die qui languidis per breve nostrum de recto implacitatis prefigi consuevit, quomodo, scilicet, et a quo die anni precedentis in alium diem anni sequentis debuit ille dies et ille annus in anno bisextili accipi et computari diu extiterit dubitatum, nos volentes uniformitatem ubique in regno nostro super hoc observari et periculis litigantium precaveri, providimus et de consilio fidelium nostrorum statuimus, quod ad delendam decetero omnem super hoc ambiguitatem, computetur dies excrescens in anno bisextili in ipso anno, ita quod propter diem illum non occasionentur aliqui implacitati, set sit et habeatur de mense illo in quo excrescit et contineatur dies ille excrescens in integritate anni predicti et computentur dies ille et dies proximus precedens pro unico die, et ideo vobis mandamus quod hoc coram vobis publicari et decetero faciatis observari. Teste rege apud Wyndes' ix. die Maii anno regni nostri xl°. Istud breve provisum fuit et formatum in presencia regis, Ricardi comitis Corn', Ricardi comitis Glouc', Henrici de Bathon', Henrici de Mar', Henrici de Bratton', Walteri de Merton', et aliorum de consilio regis.

Memorandum quod Jacobus de Audedeleg', Thomas le Bigod, et Thomas de Warblinton', sunt plegii Henrici de Hasting', videlicet, quilibet eorum in solidum, scilicet versus Galfridum de Lezign' de c. libris, versus Guidonem de Lezign' de c. libris, et versus Guidonem de Rupe Forti de xx. libris. Postea soluit idem Henricus pecuniam predictam eisdem Galfrido et Guidoni et Guidoni, et quietus est. Testificatur per Galfridum de Melates, vatlettum regis.

[m. 11d.]

Rex justiciariis suis proximo itineraturis ad placita foreste sue in comitatu Ebor', salutem. Sciatis quod, cum in estate proximo preterita dedissemus in mandatis dilecto et fideli nostro Rogero Bigot, comiti Nortf', marescallo Anglie, quod in forestis nostris de Galtris et de Pikering' caperet ad opus nostrum cervos et damos, idem comes associavit sibi Radulfum filium Ranulfi, Ranulfum fratrem ejus, Willelmum de Bovile, Robertum de Vallibus, Willelmum de Burgh', Henricum de Riveshale, Robertum Houel, Hubertum de Bavant, et Hugonem de Tudham, et Thomam Leneb' (fn. 1) ad eosdem cervos et damos capiendos, inter quos per canes suos capti fuerunt in foresta de Pikering' septem bise et unus feto, de quibus canes suos depasci fecerunt. Et ideo vobis mandamus quod ipsum comitem et alios prenominatos pro capcione fetonis et bisarum predictarum non occasionetis aut in aliquo gravetis. Teste me ipso apud Windes' x. die Maii anno regni nostri xl°.

Rex justicariis suis proximo itineraturis in comitatu Sumerset' salutem. Sciatis quod Walterus de Bello Campo venit coram nobis die Mercurii proximo post festum Sancti Johannis ante Portam Latinam, et petiit terram suam et terram prioris de Berkle, Alicie de Maydenbrok' Willelmi de Gaylard, Walteri de Godeton' et Alicie uxoris ejus et Ricardi de Wely in Chauton', Katicote, Godington', Madenbrok et Wyteges sibi replegiari, que capta est in manum nostram propter defaltam quam iidem Walterus, prior, Alicia, Willelmus, Walterus, Alicia, et Ricardus fecerunt coram justiciariis nostris de banko versus Beatriciam que fuit uxor Galfridi de Chauton': et hoc vobis significamus. Teste me ipso apud Windes' x. die Maii anno regni nostri xl°.

Pro Dunelmensi episcopo.—Rex baronibus de scaccario salutem. Quia diem prefiximus W. Dunelmensi episcopo in quindena Sancti Michaelis super sequestro ecclesiarum ad episcopum Karleolensem spectantium, que sunt infra diocesim dicti Dunelmensis episcopi, ita quod in prefata quindena Sancti Michaelis eidem episcopo Dunelmensi plenam justiciam super hoc exhibeamus, et quod predictum sequestrum interim in eodem statu in omnibus in quo nunc est remaneat sine aliqua immutacione facienda, vel sine aliquo de predicto sequestro hinc inde recipiendo, vobis mandamus quod predictum sequestrum in statu in quo nunc est esse permittatis in omnibus absque aliqua immutacione inde facienda, sicut predictum est. Nos autem hoc idem mandavimus vicecomiti nostro Norhumbr'. Teste ut supra.

De respectu milicie.—Rex vicecomiti Kane'. Scias quod respectum dedimus Ade de Somery de armis capiendis et se milite faciendo usque ad festum Sancti Michaelis. Et ideo tibi precipimus quod respectum illum ei habere permittas, et districtionem, si quam propter hoc feceris, interim relaxes. Teste ut supra.
Idem mandatum est vicecomiti Hertford'.

Prohibicio transfretacionis.—Mandatum est baronibus Quinque Portuum quod Laurencium episcopum Roffensem, vel aliquem alium, transfretare permittant (sic), nisi prestito prius juramento quod nichil impetrabit contra regem vel regnum suum seu eciam contra factum Appullie.

De lectro cariando usque Westmonasterium.—Mandatum est Eduuardo de Westmonasterio quod lectrum quod rex fieri fecit apud Sanctum Albanum in cistis salvo venire faciat usque Westmonasterium; et quod emat unum pulcrum pannum de samito de quocumque colore poterit inveniri, ita quod illum habeat promptum in proximo adventu regis London' in instanti festo Pentechostes; et quod capa de samito, quam rex fieri precepit, parata sit contra adventum regis predictum. Et cum rex sciverit custum etc. faciet ei breve suum de Liberate. Teste rege apud Rading' xiiij. die Maii.

Pro rege. De denariis et auro solvendis in garderoba.—Rex Philippo Lovel, thesaurario suo, salutem. Sciatis quod villate subscripte debebant soluisse in garderoba nostra denarios subscriptos terminis subscriptis pro cartis libertatum quas eis concessimus, et nondum solverunt, videlicet, villata de Gernem' pro habenda libertate quod ipsi vel eorum bona non arestentur etc., et pro habendo returno brevium nostrorum, lx^a. marcas in quindena Pasche proximo preterita: villata de Norwic' pro eodem a die Pasche proximo preterito in unum mensem l^a. marcas; villata de Len pro eodem de anno preterito, iiij^xx. marcas; villata de Colecestr' pro bono adventu nostro ad partes illas, x. marcas, in festo Pentechostes proximo futuro. Et ideo vobis mandamus quod, si contingat aliquos decetero venire ad Scaccarium ad solvendum ibidem aurum vel denarios, per quos finem fecerunt nobiscum pro cartis, libertatibus vel respectu milicie habendis, ipsos nullatenus ad hoc admittatis, set eos statim ad nos remittatis ad solvendum predictos denarios et aurum in garderoba nostra, quia denarios illos et aurum una cum finibus predictarum villatarum assignavimus solvendos in garderoba predicta. Et si aliquos denarios vel aurum de finibus predictis ad Scaccarium nostrum receperetis, eos sine dilacione nobis remittatis liberandos in garderoba predicta. Et per breve nostrum de Scaccario distringi faciatis villatas predictas sine dilacione ad solvendum in eadem garderoba nostra denarios prescriptos qui solvi debebant in eadem terminis subscriptis. Et hoc nullatenus omittatis. Teste rege apud Rading' xv. die Maii.

Pro J. filio Galfridi.—Mandatum est magistro Roberto Anketyl, custodi archiepiscopatus Dublinensis, quod, quamdiu fuerit predictus archiepiscopatus vacans et in custodia sua, permittat Johannem filium Galfridi hospitari cum uxore et familia sua in duobus vel tribus maneriis predicti archiepiscopatus, que idem Johannes duxerit eligenda, et attractum suum in eis facere ad perhendinandum ibidem sumptibus propriis pro voluntate sua.

Pro fratribus Not'.—Mandatum est vicecomiti Not' quod permittat Fratres Minores Notingh' capere petrum in quarera regis Notingh' ad operaciones ecclesie sue, de dono regis. Teste ut supra.

Pro Gilberto de Gaunt.—Quia Gilbertus de Gaunt firmiter asserit quod per preceptum regis liberavit R. le Bigod, comiti Norf', c. marcas, per quas idem Gilbertus finem fecit cum rege pro transfretacione sua in Wasconiam, et que modo exiguntur ab eodem Gilberto per summonicionem Scaccarii, mandatum est baronibus de Scaccario quod demandam illam predictarum c. marcarum ponant in respectum usque ad octabas Sancte Trinitatis. Teste ut supra.
(In margin.) Postea habuit aliud breve directum baronibus de Scaccario de respectu usque ad quindenam Sancti Michaelis sub eadem forma.

Pro abbate de Bukfestr'.—Mandatum est baronibus de Scaccario quod cartam de libertatibus, quam rex Ricardus, avunculus regis, fieri fecit abbati et conventui de Bukfestr', legi et eam in singulis articulis suis observari faciant, secundum quod iidem abbas et conventus eisdem libertatibus hucusque usi sunt. Teste ut supra. Et pro hoc brevi dant regi xxs.

De denariis mittendis ad regem.—Mandatum est vicecomiti Bedef' et Buk' quod, sicut se ipsum et honorem regis diligit, mittat ad regem centum marcas de exitibus predictorum comitatuum, liberandas in garderoba regis ad expensas regis inde aquietandas, et, si tantam summam pecunie ad manum non habuerit, mittat regi sub festinacione pecuniam illam per particulas sicut citius eam perquirere poterit, et, cum pecuniam illam ibidem liberaverit, rex faciet ei breve de Allocate. Teste rege apud Rading' xvij. die Maii.

Pro abbate de Certes'.—Quia abbas de Certes' clamat habere quietanciam per cartas predecessorum regis Anglie de quibusdam demandis que ei fiunt per summonicionem Scaccarii, mandatum est baronibus de Scaccario quod demandas illas ponant in respectum usque ad octabas Sancte Trinitatis proximo futuras. Teste.

De denariis mittendis ad regem.—Mandatum est vicecomiti Bedeford' quod habeat in garderoba regis in crastino Nativitatis Sancti Johannis proximo futuro de abbate de Wardon' l. marcas, ad quas amerciatus fuit coram rege pro falso clamore versus Willelmum de Bello Campo. Teste rege apud Windes xx. die Maii.
Eodem modo mandatum est vicecomiti Somersett' de l. marcis de episcopo Bathoniensi et Wellensi ad quas amerciatus fuit coram rege pro injusta detencione averiorum abbatis Glaston'.
Eodem modo mandatum est vicecomiti Cantebr' de xl. marcis de comitatu Cantebr', ad quas amerciatus fuit coram rege pro contemptu.
Eodem modo mandatum est vicecomiti Hereford' de xxx. marcis de comitatu Hereford' pro contemptu.

Quia abbates Cisterciensis ordinis per regnum et potestatem regis constituti reddunt se rebelles ad prestandum subsidium regi a sede apostolica concessum, mandatum est vicecomiti Cant' et Huntendon' quod eisdem abbatibus in agendis suis communem justiciam, quam rex vult nulli denegari, exhibeat, nullam eis graciam faciens sine mandato regis speciali. Et omnes illos de balliva sua qui habent xv. libratas terre et amplius, et tenent per servicium militare, et milites esse debent et non sunt, distringat ad se milites faciendos, sicut rex eidem vicecomiti alias mandavit; et sine dilacione scire faciat regi nomina omnium illorum una cum valore terrarum et tenementorum suorum in balliva sua. Teste ut supra.
Idem mandatum est singulis vicecomitibus Anglie. Teste ut supra.

De terra replegianda.—Alexander le Berker venit coram rege die Lune proxima ante Ascensionem Domini et petiit terram suam in Ikene sibi replegiari, que capta etc. propter defaltam etc. versus Margeriam de Orreford', ut dicitur. Et hoc mandatum est justiciariis de banco. Teste rege apud Westmonasterium xxiij. die Maii.
Eodem die venit Johannes filius Roberti de Orreford' et petiit terram suam in Ikene sibi replegiari, que capta etc. propter defaltam versus Margeriam de Orreford etc. Et hoc mandatum est eisdem justiciariis. Teste.

De vinis cariandis.—Cum rex nuper dederit in mandatis Rogero le Flemmeng', custodi prise regis Suth', quod sine dilacione caperet ad opus regis ix^xx. xij. dolia vini, carianda per diversa loca, ad que rex post instans festum Pentecostes est diversurus, mandatum est vicecomiti Wiltes' quod statim levari faciat de melioribus et clarioribus finibus et amerciamentis presentis itineris justiciariorum in comitatu suo usque ad summam de qua vj^xx. dolia vini aquietari possint, et in propria persona accedat ad predictum Rogerum usque Suth' et per consilium suum et auxilium emat vj^xx. dolia vini de predictis ix^xx. xij. doliis cap' (sic) sub securitate sufficiente certos terminos cum mercatoribus vinorum illorum ad quos eis de custo vinorum illorum satisfacere possit de finibus et amerciamentis predictis per visum et testimonium predicti Rogeri, et, captis vinis illis, ea liberet una cum predicto Rogero ballivis regis Suth', carianda ad loca predicta, sicut rex eis injunxit. Et cum rex sciverit quantum ad aquietacionem vinorum illorum posuerit, illud ei faciet allocari. Teste.
Eodem modo mandatum est vicecomiti Suth' de lxxij. doliis vini aquietandis etc. ut supra. Teste.
Et mandatum est ballivis regis Suth' quod predicta ix^xxxij. dolia vini, que predictus Rogerus le Flemmeng eis liberabit, quamcitius eis liberata fuerint, cariari faciant ad loca ad que ab eis cariari rex nuper mandavit. Et ad accelerandum cariagium predictorum vinorum, mandatum est vicecomiti Suth' quod, cum a ballivis regis Suth' fuerit requisitus, carettas eis ad vina illa carianda ad loca predicta ad custum dictorum ballivorum habere faciat. Teste rege apud Westmonasterium xxvij. die Maii.

Pro fratre Milone.—Mandatum est baronibus et ballivis regis Dovor' quod fratrem Milonem, magistrum generalem milicie Sancti Lazari Jerusalem, et magistrum Willelmum de Hereford cum fratribus, hominibus, equis, et hernesio suo, in portu Dovor' libere transfretare permittant. Teste rege ut supra.

Pro monacho de Bek'.—Mandatum est eisdem ballivis quod fratrem Walterum, monachum del Bek', permittant transfretare in portu predicto una cum equis et garcionibus suis. Teste.

Pro monacho Cisterciensi.—Eodem modo mandatum est eisdem ballivis pro fratre Dionisio et socio suo, monachis Cisterciensibus.

[m. 10d.]

De providencia contra festum Pentecostes.—Mandatum est ballivo regis de Suwerk quod contra instans festum Pentecostes, quod rex celebraturus est apud Westmonasterium, provideat regi de centum gallinis, c. pullis, et eos venire faciat usque Westmonasterium, ita quod sint ibi in vigilia festi predicti ad tardius, liberandi puletario regis. Et, cum rex sciverit custum etc. faciet ei allocari. Teste etc.
Eodem modo mandatum est ballivis de Kingeston' de ccc. gallinis, cc. pullis. Teste ut supra.
Eodem modo mandatum est vicecomiti Essex' de d. gallinis, cc. pullis, quinque milibus ovorum. Teste ut supra.
Mandatum est ballivis de Wicumbe quod contra festum predictum fieri faciant in villa sua c. solidatas boni et pulcri panis, et iiij^or. panes ad denarium, et panem illum venire faciant usque Westmonasterium, ita quod sit ibi in vigilia predicta, liberandus custodi panetarie regis. Et rex tam custum panis illius quam cariagium ejusdem eis reddi faciet. Teste ut supra.
Eodem modo mandatum est vicecomitibus London' de xx. libratis panis. Teste.
Eodem modo mandatum est ballivis de Kingeston' de lx. solidatis panis. Teste.
Eodem modo mandatum est ballivis de Wautham de lx. solidatis panis. Teste.

Pro Willelmo de Kalveleye.—Memorandum quod rex concessit Willelmo de Calveleye et Sarre, uxori ejus, quod, si contingat Rogerum de Thurk' itinerare ad primas assisas in comitatu Norf', dabitur predictis Willelmo et Sarre breve regis de faciendo venire ad bancum loquelam que atterminata est ad primam assisam etc. inter Ricardum de Poleham petentem et predictos Willelmum et Sarram tenentes, de duabus carucatis terre cum pertinenciis in Remerston', eo quod predictus Willelmus est vatlettus predicti Rogeri. Teste rege apud Westmonasterium xxix. die Maii. Per Walterum de Merton'.

De denariis levandis.—Mandatum est vicecomiti Norf' quod, non ostantibus (sic) libertatibus villarum de Len' et Gernem', statim eas personaliter ingrediatur ad levandum de burgensibus de Len' iiij^xx. marcas; de quibus solvisse debuerant in garderoba regis in festo Sancti Michaelis anno etc. xxxix. xl^a. marcas, et ad Pascha anno etc. xl°. quadraginta marcas, per quas finem fecerunt cum rege pro quadam carta habenda; et de villata de Gernem' lx. marcas, quas solvisse debuerat in predicta garderoba in quindena Pasche anno etc. xl°., in partem solucionis vj^xx. marcarum, per quas finem fecerunt pro quadam carta habenda in ultimo transitu regis per partes illas. Teste.

Pro Roberto de Haselingfeld.—Rex Ingeramo de Merk' salutem. Quia constat nobis per inquisicionem, quam per vicecomitem nostrum Essex' in pleno comitatu et in presencia coronatorum nostrorum et escaetoris nostri ejusdem comitatus fieri fecimus, quod Robertus de Haselingfeud' dudum dimisit Hugoni de Essex' triginta et unam acras terre, quinque acras prati et unam acram bosci cum pertinenciis in Renhale, habendas et tenendas eidem Hugoni et heredibus suis de predicto Roberto ad feodi firmam pro decem solidis eidem Roberto per annum reddendis, et quod post decessum ipsius Hugonis predictus escaetor noster predictam terram, pratum et boscum, una cum aliis terris et tenementis que idem Hugo tenuit de nobis in capite, cepit in manum nostram, quorum omnium custodiam vos habetis ex concessione nostra usque ad legittimam etatem heredis predicti Hugonis, nec est juri consonum quod predictus Robertus occasione custodie predicte firmam illam decem solidorum amittat; vobis mandamus precipientes quod a tempore quo custodiam predictam recepistis, quamdiu illam habueritis, singulis annis habere faciatis prefato Roberto decem solidos pro firma predicta de predictis terra, prato et bosco, pro certo scituri quod, nisi feceritis, nos ad hoc vos compelli faciemus. Teste rege apud Westmonasterium xxvij. die Maii. Per Henricum de Bathonia et alios justiciarios regis.
Et quia predictus Imgramus hoc facere distulit, postea mandatum fuit vicecomiti Essex' quod ipsum ad hoc moneret et induceret et, si necesse esset, quod ipsum ad hoc compelleret. Teste.

Memorandum quod Walterus de Baskervyle atornavit loco suo Baldewinum de Hagh' ad lucrandum etc. in loquela que est inter ipsum Baldewinum et Willelmum Pichard' et alios, et, quia ignoravit nomina adversariorum suorum, non habuit breve suum de atornato; et concessum est ei quod remittat ad curiam nomina adversariorum illorum et dabitur ei breve de atornato. Per Walterum de Merton' et Adelmum de Aston'.