Close Rolls, June 1241

Close Rolls, June 1241

Rex Waltero de Clifford', salutem. Mandamus vobis quod, omnibus aliis negociis omissis, occurratis apud pontem de Maneford' hac instanti die Dominica venerabili in Christo patri H. Conventrensi et Lichefeldensi episcopo et dilectis et fidelibus nostris Johanni filio Galfridi et Henrico de Aldithl', arbitris una vobiscum substitutis venerabilibus patribus O. in Carcere Tulliano, diacono cardinali, et quondam legato, et W. Wigorniensi episcopo, ex parte nostra, et aliis arbitris ex parte David filii Leulini, quondam principis Northwallie, ad procedendum ad exhibitionem justicie in forma pacis inter nos et prefatum David facta, scilicet tam querentibus ex parte nostra quam ex parte ipsius David, ita quod pro defectu vestri non remaneat quin hinc inde querentibus justicia exhibeatur. Teste rege apud Glouc', xv. die Junii.

Rex Petro Grimbaud, salutem. Mandamus vobis quatinus omni dilatione et occasione postpositis, habeatis coram nobis a die Sancti Johannis in xv. dies ubicumque tunc fuerimus heredes Henrici de Ord', quorum custodiam novimus ad venerabilem patrem N. Dunholmensem episcopum pertinere, et quos occasione nostre concessionis vobis post confirmationem ejusdem episcopi facte detinetis, ut dicitur, nisi eos interim eidem episcopo sponte duxeritis restituendos; et prohibemus ne eos interim maritare permittatis. Teste rege apud Glouc', xiij. die Junii.

Rex constabulario Turris Lond', salutem. Precipimus tibi quod Pimentam uxorem Jacobi de Custances, Jacobum filium Jacobi, et Bescotam uxorem ejus, Judeos Bristoll', captos et detentos in prisona nostra predicte Turris pro morte Alicie filie Eve, cariari facias usque Bristoll' ad custum burgencium nostrorum Bristoll', ita quod sint ibi a die Sancti Johannis Baptiste in xv. dies ad standum inde recto coram justiciariis nostris ibidem in proximo itineraturis, eosdemque Judeos liberari facias constabulario castri nostri Bristoll' cui precepimus quod eos, cum ibidem venerint, recipiat. Teste etc.
Et mandatum est constabulario Bristoll' quod eos recipiat.

[m. 8d.]

Anno Domini MCCXLIJ die Dominica proxima ante Inventionem Sancte Crucis assignata David filio L. quondam principis Northwallie et marchionibus ad consentiendum in arbitros substituendos loco absentium et ad faciendam et recipiendam justiciam secundum formam pacis convente inter dominum regem et dictum David, conparueri[n]t Thuderius, senescallus ipsius David, Ennius Parvus, David cancellarius, et Philippus filius Ivor, clericus, ex parte David procuratores, ostendentes litteras ipsius David in quibus dictus David promittebat se ratum habiturum quicquid per ipsos fieret secundum formam pacis supradicte. Radulfus vero de Mortuo Mari, et R. senescallus Cestrie, et Griffinus pro se et aliis marchionibus conparuerunt petentes instanter quod secundum dicta testium predictorum coram domino S. de Segrave et conjudicibus suis, vicem domini regis gerentibus apud Salopiam, eisdem exhiberetur justicie conplementum. Set contra procuratores prefati D. asserebant dictos testes non esse receptos secundum formam pacis, quare secundum dicta eorundem non dicebat (sic) nec poterat judicari. Tandem, continuata die, et altercacione magna super hoc et aliis habita inter partes, forma pacis predicte producta in medio visaque et perlecta, loco absentium arbitrorum, scilicet domini O. Sancti Nicholai in Carcere Tulliano diacono cardinali, domini pape quondam legati in Anglia, Wigorniensis et Norwicensis episcoporum, subrogati sunt per dominum regem de consensu dictorum procuratorum episcopus Conventrensis, Johannes filius Galfridi, et Herebertus filius Mathei, et Walterus de Clifford', quibus data est eadem eadem (sic) potestas quam haberent absentes, si presentes essent, secundum formam pacis predicte, et assignata est dies partibus a die Pentecostes proximo in unum mensem apud pontem de Maneford' ultra Salopiam ad probanda hinc inde, sive per productos testes, non obstante productione jam facta, sive per alios, et quolibet probacionis genere, sive per instrumenta sive alio modo que voluerint et sibi noverint expedienda; et illa die dabitur alia ad judicium audiendum secundum probata coram eisdem arbitris juxta formam pacis superius prelibate.

Rex vicecomiti Stafford', salutem. Precipimus tibi quod non permittas quod prior de Stan' disseisietur de terra unde cyrograffum factum fuit inter Ranulfum, quondam comitem Cestr', et predictum priorem, et de qua idem prior fuit in seisina tempore Johannis, quondam comitis Cestr', die quo terras suas cepimus in manum nostram. Teste rege apud Merleb', xxij. die Junii.

Rex venerabili in Christo patri W. Eboracensi archiepiscopo, salutem. Mandamus vobis firmiter injungentes in fide qua nobis tenemini quatinus per litteras vestras, sine more dispendio, nobis significetis que et quanta beneficia clerici Romani et alii, tam Anglici quam ultramarini, habeant in diocesi vestra ex collatione vel provisione summi pontificis vel legati vel alterius provisoris auctoritate sedis apostolice, scilicet tam ecclesiastica quam alia beneficia prebendalia. Nomina etiam predictorum clericorum nobis scire faciatis. Teste rege apud Merleberg', xij. die Junii.
Eodem modo scribitur R. Lincolniensi, R. Londiniensi, W. Karleolensi, H. Elyensi, R. Roffensi, P. Herefordensi, N. Dunholmensi, R. Sarrisburiensi, H. Conventrensi et Licheffeldensi, archidiacono Cantuariensi, officiali Exoniensi, et officiali episcopatus Wintoniensis.

Eboracum.—Mandatum est vicecomiti Ebor' quod distringat Jordanum de Byngley per terras et catalla sua ad suscipiendum arma citra festum Sancti Jacobi Apostoli. Teste rege apud Merleberg', xxvij. die Junii.

Rex justiciario suo Cestr', salutem. Meminimus nos vobis alias mandasse quod arreragia dilecti et fidelis nostri Johannis de Lessint' et Simonis, clerici, quondam decani Cestr', de tempore quo fuerunt custodes comitatus Cestr' colligi faceretis per manum vestram ad respondendum inde super compotum predictorum J. et S. ad Scaccarium nostrum. Et quia predicti J. et S. compotum suum de predicto tempore reddiderunt, vobis mandamus quod arreragia predicta, si que restant colligenda, sine dilatione colligi et predicto J. liberari faciatis ad respondendum inde ad Scaccarium ipsum, talem ad hoc discretionem facientes ne pro defectu vestri ad vos capere debeamus. Teste rege apud Merlebe', xxvij. die Junii.

[m. 7d.]

Cumb'.—Wido de Bovill' habet respectum de armis capiendis usque ad Natale Domini anno etc. xxvj.