Close Rolls, May 1242

Close Rolls, May 1242

De forma pacis conservande.—Rex vicecomiti Wygorn', salutem. Scias quod ad pacem nostram firmiter observandam provisum est de consilio nostro quod vigilie fiant in singulis civitatibus, burgis et omnibus aliis villis comitatus tui a die Ascensionis Domini usque ad diem Sancti Michaelis, scilicet in singulis civitatibus ad singulas portas per sex homines armis munitos et in singulis burgis per xij^cim homines et in singulis villis integris per sex homines, vel quatuor ad minus, similiter armis munitos secundum numerum inhabitancium et vigilent continue per totam noctem ab occasu solis usque ad ortum; ita quod, si aliquis extraneus transitum per ipsos faciat, arestent ipsum usque mane et tunc, si fidelis sit, dimittatur et, si suspectus, vicecomiti liberetur, qui ipsum sine omni difficultate et dilacione recipiat et salvo custodiat. Si vero hujusmodi extranei transitum facientes se non permiserint arestari tunc predicti vigiles uthesium levent super illos undique et ipsos insequantur cum tota villata et vicinis villatis, cum clamore et uthesio, de villa in villam donec capiantur et tunc liberentur vicecomiti sicut predictum est: ita quod nullus occasione hujusmodi arestacionis vel capcionis extraneorum per vicecomitem vel ballivos suos occasionetur. Et singule civitates, burgi et ville, premuniantur ad predictas vigilias et sectas ita diligenter faciendas ne defectum illorum graviter punire debeamus. Provisum eciam est quod singuli vicecomites una cum duobus militibus ad hoc specialiter assignatis circueant comitatus suos de hundredo in hundredum et civitates et burgos et convenire faciant coram eis in singulis hundredis, civitatibus et burgis, cives, burgenses, libere tenentes villanos et alios, etatis xv. annorum usque ad etatem lx^a annorum, et assideri faciant et jurare omnes ad arma secundum quantitatem terrarum et catallorum suorum, scilicet, ad xv. libratas terre, unam loricam et unum capellum ferreum, gladium, cultellum et equum; ad x. libratas terre, unum haubergellum, capellum ferreum, gladium et cultellum; ad c. solidatas terre, unum purpointum, capellum ferreum, gladium, lanceam et cultellum; ad xl^a solidatas terre et eo amplius usque ad centum solidatas, gladium, arcum, sagittas et cultellum. Qui minus habent quam xl^a solidatas terre jurati sint ad falces, gysarmas, cultellos et alia arma minuta. Ad catalla sexaginta marcarum, unam loricam, capellum, gladium, cultellum et equum; ad catalla xl^a marcarum, unum haubergellum, capellum, gladium et cultellum; ad catalla xx. marcarum, unum purpointum, capellum, gladium et cultellum; ad catalla x. marcarum, gladium cultellum, arcum et sagittas; ad catalla xl^a solidorum et eo amplius usque ad catalla x. marcarum, falces, cultellos, gysarmas et alia arma minuta. Omnes eciam alii qui possunt habere arcum et sagittas extra forestam habeant; qui vero in foresta arcus et pilettos. Et in singulis civitatibus et burgis omnes jurati ad arma intendentes sint majoribus civitatum et prepositis et ballivis burgorum, ubi non sunt majores. In singulis vero villatis aliis constituatur unus constabularius vel duo secundum numerum inhabitancium et provisionem predictorum. In singulis vero hundredis constituatur unus capitalis constabularius ad cujus mandatum omnes jurati ad arma de hundredo suo conveniant et ei sint intendentes ad faciendum ea que spectant ad conservacionem pacis nostre. Omnes vero constabularii capitanei de singulis hundredis intendentes sint vicecomiti et duobus militibus predictis ad veniendum ad mandatum eorum et faciendum per preceptum eorum ea que spectant ad conservacionem pacis nostre. Clamari eciam faciant singuli vicecomites per civitates et burgos et omnia mercata ballivarum suarum quod nulli conveniant ad turneandum vel ad burdiandum vel ad alias quascumque aventuras; nec eciam aliqui incedant armati nisi specialiter fuerint ad custodiam pacis nostre deputati. Et, si aliqui inventi fuerint sic incedentes armati contra hanc provisionem nostram, arestentur et vicecomitibus liberentur; et, si se non permiserint arestari, tunc constabularii singulorum hundredorum et villarum et alii quicunque uthesium levent super eos undique et cum vicinis villatis de villa in villam ipsos insequantur donec capiantur et vicecomitibus liberentur sicut predictum est. Quotiens autem contigerit uthesium levari super quoscumque perturbatores pacis nostre, predones et malefactores in parcis et vivariis, statim super eos fiat uthesium et ipsos insequantur donec capiantur et liberentur vicecomitibus sicut de aliis predictum est. Et omnes vicecomites et eorum ballivi, constabularii, jurati ad arma, cives, burgenses, libere tenentes, villani et alii, talem sectam faciant post predictos malefactores ne predicti malefactores evadant, et, si per eorum defectum evaserint, hii, in quibus defectus inventus fuerit, sic per consilium nostrum puniantur quod pena illorum aliis metum incutiat et auferat materiam delinquendi. Suspectos autem de die per quoscumque arestatos recipiant vicecomites sine dilacione et difficultate et salvo custodiant, donec per legem terre deliberentur. Et ideo tibi precipimus quod, sicut corpus tuum et omnia que habes diligis, una cum dilectis et fidelibus nostris Willelmo Corbet et Petro de Wyk', quos tibi ad hoc associavimus, omnia predicta sub forma prescripta cum omni diligencia exequaris, ne pro defectu tui et predictorum fidelium nostrorum ad te et ad ipsos graviter nos capere debeamus. Returnum autem istarum litterarum sine dilacione habere facias omnibus libertatibus de balliva tua ut omnia predicta sub forma prescripta exequantur. Quod si non fecerint, non obstantibus libertatibus predictis, sine dilacione id fieri facias. Teste W. Eboracensi archiepiscopo, apud Westm', xx. die Maii.

Rex dilecto et fideli suo Willelmo Corbet, salutem. Sciatis quod assignavimus vos et dilectum et fidelem nostrum Petrum de Wyk' una cum vicecomite nostro Wygorn' ad arma juranda et assidenda in eodem comitatu et ad pacem nostram ibidem conservandam in forma plenius contenta in litteris nostris quas prefato vicecomiti nostro inde misimus vobis ostendendas. Et ideo vobis mandamus quatinus, sicut nos et honorem nostrum, diligitis, prefato negocio taliter et ita diligenter intendere curetis, quod operum probet effectus quam sincere nos et ea que pacis nostre sunt diligatis et quam illos habeatis exosas qui eandem pacem nostram nituntur perturbare. Et ut vobis inde teneamur ad speciales gratiarum actiones.

Eodem modo scribitur reliquis militibus in diversis comitatibus.

[Rex vic' erased] Mandatum est vicecomiti Kanc' quod Jocelinum de la Hok', Gilbertum de la Bisse, Thomam fratrem Roberti capellani de Notfeld', Galfridum de Molendino de Acsted', Willelmum filium venatoris et Adam de la Bure qui interfuerunt capcioni bestiarum regis in parco de Croynden' et interfectioni Johannis Marpot, servientis domini regis, ut dicitur, si inveniri possint in balliva sua, quod ipsos capiat et in prisona regis salvo custodiat, donec rex aliud inde preceperit. Et si in balliva sua inveniri non possint etc. ipsos interrogare faciat de comitatu in comitatum donec secundum regni [consuetudinem] utlagentur. Teste etc.
Eodem modo scribitur vicecomiti Surr' et Sussex'.

Pro rege, de scutagio.—Rex vicecomiti Ebor', salutem. Precipimus tibi quod de omnibus feodis militum que tenentur de tenentibus de nobis in capite in balliva tua et que ipsi de nobis tenent in capite qui quidem brevia nostra tibi non tulerint de habendo scutagio suo et similiter de feodis que tenentur in balliva tua de wardis que sunt in manu nostra, scutagium nostrum colligi facias; ita quod, sicut te ipsum et omnia tua diligis, illud habeas ad Scaccarium nostrum a die Sancti Michaelis in xv. dies, scilicet de scuto tres marcas pro excercitu nostro contra transfretacionem nostram in Wasconiam. Interim autem diligenter inquiras quot hujusmodi feoda teneantur in balliva tua de singulis tenentibus de nobis in capite et de wardis in manu nostra existentibus, tam de novo feoffamento quam de veteri, ut barones nostros de Scaccario ad prefatum terminum inde distincte et aperte possis certificare. Teste W. Eboracensi archiepiscopo, xix. die Maii.

Rex vicecomiti Linc', salutem. Bene recolere debes quomodo tibi precepimus quod summoneri faceres omnes tenentes de nobis in capite per servicium militare vel per sergantiam quod essent apud Winton' a die Pasche in xv. dies parati equis et armis ad transfretandum cum corpore nostro. Et quia plures de nobis tenentes in capite in balliva tua illuc non venerunt ad transfretandum nobiscum sicut summoniti fuerunt, tibi precipimus quod omnes tales distringas per terras et catalla quod sint apud Lond' a die Sancti Johannis Baptiste in tres septimanas parati ad transfretandum post corpus nostrum. Omnes eciam illos de balliva tua qui habent feodum unius militis integrum in dominico vel xx. libratas terre, tam de feodo militari quam de soccagio, et milites non sunt, distringas similiter quod sint ad eundem terminum coram consilio nostro ad ostendendum quare se milites fieri non fecerunt infra terminum a nobis ad hoc assignatum; et tam nomina omnium illorum qui de nobis tenent in capite in balliva tua et nobiscum non transfretaverunt quam eorum qui milites esse deberent, ut predictum est, et non sunt, distincte et aperte scire facias ad diem illum venerabili patri W. Eboracensi archiepiscopo, rectori regni nostri. Et habeas ibi hoc breve. Teste ut supra.
Eodem modo scribitur omnibus vicecomitibus tocius Anglie.

[Vicecomes Essex' erased] Willelmus filius Ricardi et Robertus le Butiller habent breve de perambulacione vicecomiti Essex' de terra predicti Willelmi in Elmested' et terra predicti Roberti in Aleford'. Teste etc.

[m. 9d.]

Rex vicecomiti Norff' et Surf', salutem. Precipimus tibi quod sis in auxilio episcopo Norwic' cum ex parte sua fueris requisitus ad distringendum milites suos quod reddant ei scutagium suum, scilicet de scuto tres marcas, pro auxilio quod nobis concessit contra transfretacionem nostram in Wasconiam. Teste W. Eboracensi, archiepiscopo, apud Westm', xxj^o die Maii.
Episcopus Sarisburiensis, in comitatibus Dors', Sumers', Berkes', Wiltes', Oxon'.
Episcopus Wygorniensis, in comitatibus War', Glouc', Wygorn'.
Episcopus Exoniensis, in comitatibus Devon', Cornub', Suhampton', Surr', Sussex'.
Episcopus Bathoniensis, in comitatibus Wiltes', Glouc', Sumers', Dors', Berkes'.
Episcopus Lincolniensis, in comitatibus Oxon', Linc', Leic', Bed', Buk', Norhampton', Huntindon', Cantebr', Notingh'.
Episcopus Cycestrensis, in comitatu Sussex'.
Abbas Westm', in comitatibus Surr', Glouc,' Oxon', Essex', Hertford', Buk', Wygorn'.