Calendar of Close Rolls, Henry III: Volume 4, 1237-1242. Originally published by His Majesty's Stationery Office, London, 1911.
This premium content was digitised by double rekeying. All rights reserved.
'Close Rolls, October 1242', in Calendar of Close Rolls, Henry III: Volume 4, 1237-1242, (London, 1911) pp. 532-533. British History Online https://www.british-history.ac.uk/cal-close-rolls/hen3/vol4/pp532-533 [accessed 18 April 2024]
Close Rolls, October 1242
Littere directe in Angliam pro rege.—Rex Eboracensi archiepiscopo,
salutem. Licet recenter per fratrem Hamonem, conversum de Bello
Loco, et postea per servientes nostros Hugonem le Porter et
Reginaldum le Rus vobis significaverimus statum nostrum et defectum
pecunie quem habemus in partibus transmarinis, et ex mandatis nostris
precedentibus de voluntate nostra vobis constare debeat, quia vero
desideranti nichil satis festinatur, dilectum nobis fratrem Walterum
le Butiler, elemosinarium nostrum, ad vos adhuc duximus transmittendum ut ex frequencia nunciorum necessitatis nostre magnitudinem attendatis, vobis mandantes quatinus totam pecuniam quam
promptam habetis sub omni festinacione ad nos mittatis et eam quam
perquirere poteritis ad nos successive venire faciatis et maxime id quod
ad Scaccarium nostrum venerit ad terminum Sancti Hyllarii, quia
nichil aliud nobis obstare credimus quin honorem de hereditate nostra
recuperemus nisi defectum pecunie; vos igitur una cum aliis fidelibus
nostris, collegis vestris custodie regni nostri deputatis, ea sollicitudine
intendatis pecunie ad opus nostram perquirende et ad nos, quociens
fieri poterit, mittende quod vobis imputare non debeamus, si pro
defectu pecunie de expedicione nostra comodum non reportemus
et honorem. Teste rege apud Silvam, xxv. die Octobris.
Eodem modo scribitur Willelmo de Cantil'.
Eodem modo scribitur Karleolensi episcopo, cum hac clausa;
Nec vos latere volumus quod vobis specialiter inputabimus et
quantumcumque personam vestram dilexerimus gravius erga vos
movebimur quam erga aliquem alium, nisi super pecunia nobis
uberius mittenda juxta mandatum nostrum nobis fuerit satisfactum.
Teste ut supra.
Pro Gwidone de Rocheford'.—Mandatum est R. de Solar', senescallo Wasconie, quod, de cc. marcis quas dominus rex ei mandavit mutuo accipere ad opus regis super vadia regis argentea que ei liberabit Johannes Maunsel, habere faciat Gwidoni de Rocheford' l. marcas quas rex ad presens ei dat. Teste ut supra.
Pro J. de Lessint'.—Rex vicecomiti Ebor' salutem. Precipimus tibi quod per probos et legales homines de visneto de Roderham, per [quos] rei veritas melius sciri poterit, diligenter inquiri facias quantum terre Matillis que fuit uxor Galfridi de Sausemar' teneat in dotem in Roderham de dono primi viri sui et quantum terra illa valeat per annum, et si terra illa post mortem predicte Matillidis debeat esse escaeta nostra tanquam terra Normannorum eo quod primus vir ejusdem Matillidis qui terram illam tenuit et de cujus dono dotata est Normannus fuit, ut dicitur. Et inquisitionem inde factam sub sigillo tuo regi etc. Teste ut supra.
De perdonacione pro Philippo Basset.—Rex perdonavit Philippo Basset lx. marcas quas Eboracensis archiepiscopus, Karleolensis archiepiscopus et W. de Cantil' ei concesserunt de prestito quando fuit in procinctu itineris veniendi ad regem ad partes transmarinas. Et mandatum est eisdem quod litteras regis de quietancia baronibus de Scaccario directas ei inde habere faciant. Teste rege apud Silvam, xxvj. die Octobris.
Mandatum est baronibus de Scaccario quod respectum habere permittant Herberto filio Mathei de debitis que regi debet et que ab eo exiguntur per summonitionem Scaccarii, quamdiu fuerit in servicio regis in partibus transmarinis. Teste ut supra.