Close Rolls, November 1251

Close Rolls, November 1251

[m. 25d.]

Rex L. Dublinensi archiepiscopo, salutem. Nolentes graciam dilecto consanguineo nostro Stephano Lungesp' a summo pontifice concessam de pecunia illa, que de redempcione votorum crucesignatorum colligi posset in terra que Lagenia dicitur in Hibernia, subtrahere set pocius ampliare, paternitatem vestram rogamus quatinus non inpediatis vel inpediri permittatis prefatum consanguineum nostrum crucesignatum proponentem transire magnifice in Terre Sancte subsidium, vel assignatos suos, quin concessionem sibi a domino papa factam de redempcione votorum crucesignatorum in dicta terra Lagenie, sicut in literis papalibus plenius continetur, usque ad tempus illud quo nos fuimus crucis caractere insigniti integre colligere possint, restituentes eidem vel ejus procuratoribus si quid per vos vel per aliquem de terra predicta collectum fuerit vel in alios usus deputatum usque ad tempus predictum. Teste rege apud Wintoniam ix. die Novembris.

[m. 24d.]

Rex W. Sarisburiensi episcopo, et aliis executoribus testamenti W. quondam Wintoniensis episcopi, salutem. Cum post mortem W. quondam Wintoniensis episcopi, convencio verteretur inter monachos Wintoniensis ecclesie super electionibus et postulacionibus diversis, quarum occasione partes necesse habuerunt nuncios ad curiam destinare et expensas non modicas ibidem facere, unde pars una mutuo accepit mdccclxvij. marcas, ix. solidos et iiij. denarios, pars vero altera dec. et iiij^xx marcas, et tota pecunia illa sicut a viris fidedignis et discretis intelleximus de bonis episcopalibus solvi debeat; cum eciam predictus W. quondam Wintoniensis episcopus, cujus habetis execucionem faciendam, teneatur Wintoniensi ecclesie in d. et lxij. marcis, x. solidis, et iiij. denariis de pecunia legata ipsi ecclesie, quam predictus episcopus mutuo recepit, vobis mandamus quod predictas dcc. et iiij^xx marcas, que nobis racione mutui quod uni parti fecimus debentur, nobis vel attornato nostro in episcopatu Wintoniensi nomine nostro, residuum vero totum predicte pecunie dictis priori et conventui vel attornato eorum, persolvi faciatis, scituri pro certo quod bona et catalla que dicti W. episcopi fuerunt in manum nostram cepimus et precepimus retineri, nec permittemus quod aliquam inde habeatis administracionem ad execucionem sui testamenti faciendam, donec predicta pecunia fuerit persoluta. Teste rege apud Wintoniam, ix. die Novembris.

Quia, sicut rex intellexit, tallagium regis x. milium marcarum eo modo quo nunc talliatur effectum debitum sortiri non potest si aliquibus Judeis parcatur, mandatum est justiciariis ad custodiam Judeorum assignatis, in fide qua regi tenentur, quod licet aliquibus aliquo modo gracia exhibeatur, singulos tallient secundum summam catallorum suorum, exceptis Elya Le Veske et Aaron filio Abrahe, Judeis Londonie, qui frequenter regi serviunt, et regem premanibus ubere respexerunt; et quia Aaron de Eboraco, Judeus, nimis gravatus esset in instanti tallagio si foret ad duo milia marcarum talliatus, sicut fuit, sicut regi dixit, vult rex quantum modo predicto accrescit summa predictorum Judeorum, decrescat etiam summa tallagii ipsius Aaron de Eboraco, ut ei parcatur ad presens, ita tamen quod de tallagio x. milium marcarum nichil regi depereat, ita quod pro aliquo priori mandato regis nichil faciant nisi quod eis expresse injunctum est. Teste rege apud Clarend' xxiij. die Novembris.

Quia ballivi episcopi Lincolniensis non permittunt vicecomitem Oxonie ingredi villam de Bannebur' ad levandum c. solidos pro transgressione mensurarum, mandatum est vicecomiti Oxonie quod non obstante libertate ipsius episcopi eandem villam ingrediatur, ita quod denarios illos habeat in garderoba regis in crastino Sancti Thome Apostoli. Teste rege apud Clarend' xxvij. die Novembris.

Quia Johannes filius Thome moratur cum rege in Anglia per preceptum suum, mandatum est justiciariis itinerantibus in Hibernia quod apellum quod Blanchia que fuit uxor Alexandri de Rupe facit versus ipsum et homines suos coram eis ponant in respectum usque a die Pasche anno etc. xxxv. in unum mensem, ita quod apellum illud interim remaneat coram eis in eodem statu in quo nunc est. Hoc idem demandent vicecomites in quorum balliis apellum illud factum est. Teste rege apud Merleberge xiiij. die Novembris. Per J. Mansell'.

Quia vicecomes Northampt' exigit ab hominibus domini regis de Apethorp' centum solidos de eschapio cujusdam latronis, nec ad ipsum set ad justiciaries in itinere suo pertinet hujusmodi exactio, mandatum est eidem vicecomiti quod usque ad proximum adventum justiciariorum domini regis in partes illas ipsos homines pacem inde habere permittat. Teste rege apud Clarendon' xxix. die Novembris.