Close Rolls, December 1251

Close Rolls, December 1251

Rex ballivis de Len, salutem. Precipimus vobis quod [si,] per sacramentum mercatorum Anglie et aliorum qui diversas terras noverint, inveneritis quod Alardus de Stavere non sit de districtu vel potestate domini terre illius cujus homines navem Hugonis de Swaves', mercatoris nostri, depredati fuerunt, nec illi interfuit depredacioni, tunc bona illius Alardi in villa predicta propter hoc arestata deliberetis. Teste rege apud Clarend' v. die Decembris.

[m. 23d.]

Mandatum est Eduuardo de Westmonasterio quod quandam albam, tunicam et dalmaticam festinanter fieri faciat secundum quod Johannes de Sumercot' ei ex parte regis intimabit. Teste rege apud Clarend' viij. die Decembris.

Quia rex frequenter scripsit Ramette que fuit uxor Everardi Teutonici, quod ad ipsum veniret colloquium habitura pro quodam negocio, nec venire voluit, set frequens mandatum regis contempsit, mandatum est vicecomiti Norhumbr' quod ipsam Ramettam ad regem venire in instanti festo Sancti Hillarii ubicumque tunc rex fuerit in Anglia per terras et catalla distringat. Teste rege apud Clarend' v. die Decembris.

Sussex'.—Henricus, vicarius de Ringmere, essoniavit se versus totum comitatum Sussex' de placito quod est inter ipsos coram rege de falso judicio per Nicholaum de Denton'. Et totus comitatus fecit defaltam.

Mandatum est ballivis de Portesmue quod non arestent aliquas naves venientes ad portum suum cum mercandisis de pondere nisi habuerunt aliquos pannos ad aurum vel aliquid jocale preciosum quod ad regem venire faciant per racionabile forum, et rex, prout alii dare noluerint, mercatoribus satisfieri faciet. Teste rege apud Clarend' ix. die Decembris.

Rex rogavit abbatem de Thorn' pro cignis et gruibus et alio genere volatili contra festum Sancti Eduuardi, quod erit in vigilia Epiphanie Domini.
Eodem modo rogavit abbates de Croiland', Rammes', Burg', et priorem de Spalding'.

Omnibus etc. H. de Erle, vicecomes Dorsete, salutem. Noveritis me recepisse duodecim libras argenti ad opus domini regis ab executoribus domini Roberti de Lexintona, in quibus idem Robertus regi tenebatur pro terra de Bere, quam habuit ad firmam de eo ad terminum vite sue, ita quod ego et heredes mei acquietabimus ipsum Robertum et heredes et executores suos de predictis xij. libris ad Scaccarium pro ultimo anno quo ipse prefatam terram tenuit ad firmam, et in quo mortuus, scilicet anno regis Henrici filii regis Johannis xxx° iiij^to, et ipsos erga dominum regem indempnes conservabimus; quod si non fecerimus, concessi pro me et heredibus meis quod compellamur ad hoc per terras et catalla nostra per districcionem domini regis. In cujus etc. has litteras meas patentes predictis executoribus commisi. Et quia amisi proprium sigillum huic scripto sigillum Galfridi de Laverton', socii mei, apposui. Datum apud Wintoniam in crastino Natalis Domini, anno regni regis H. filii regis Johannis xxxv^to.

[m. 22d.]

Cumberl'.—Willelmus de Poipe habet litteras regis de procteccione directa vicecomiti Cumb' super ecclesia sua de Bodecastr' et hominibus, terris, redditibus, et omnibus aliis possessionibus suis, hoc adjecto quod decetero ei vel hominibus suis aliquid dampnum vel periculum non imineat; sciturus quod si ipse vel homines sui de predicto redditu vel aliis possessionibus suis dampnum vel gravamen incurrerint pro defectu ipsius vicecomitis taliter rex se capiet ad eum quod se senciet non mediocriter gravatum. Teste rege apud Wintoniam xxvj. die Decembris.

Rex pape, salutem. Ex hoc quod venerabilis pater, W. Wigorniensis episcopus, tamquam inmemor fidelitatis nobis prestiti juramenti, placitum namii vetiti inter ipsum et dilectum et fidelem nostrum, Willelmum de Bello Campo, vicecomitem nostrum Wigornie, exortum, contra prohibicionem nostram sibi factam expresse tam viva voce quam litteris, prosequitur in curia nostra non sine lesione et nostre prejudicio dignitatis cum cordis turbacione; admiracio nobis crescit quamquam non de eodem placito set de sententia excommunicacionis quam ipsius occasione in dictum nobilem tulit se asserat agere coram vobis, unde de consilio magnatum nostrorum baroniam quam idem episcopus de nobis tenet in capite, sicut est legis et consuetudinis regni nostri, providimus capere in manum nostram; ipsam tamen capcionem ad instanciam R. comitis Cornubie, distulimus usque ad instans festum Purificacionis Beate Marie, si forte dictus episcopus a prosecucione prefata penitus duxerit desistendum. Igitur, ne paternitatem vestram, que omnia nostram coronam et dignitatem regiam tangencia semper voluit et vult illesa servari, decretum vestrum lateat in hac parte, presentes vobis litteras destinamus supplicantes attente, quatinus juxta quod vobis supplicavimus alias, eidem episcopo nullam prebere velitis audienciam in placito memorato seu aliis que nostrum forum et dignitatis nostre culmen tangere dinoscuntur. Teste etc.