Close Rolls, March 1258

Close Rolls, March 1258

[m. 11d.]

De perambulacione inter terram regis et terram episcopi Wigorniensis.—Rex Willelmo de Wilton' et Gilberto de Preston' salutem. Licet nuper preceperimus vicecomiti nostro Wigorn' quod assumptis secum xij. legalibus et discretis militibus de comitatibus Wigorn', Staff' et Warr' in propria persona accederet ad terram nostram de Bremesgrave et terram venerabilis patris W. Wigorniensis episcopi de Alviuechirch et per eorum sacramentum fieri faceret perambulacionem inter terram nostram de Bremesgrave et terram predicti episcopi de Alviuechirch; volumus tamen quod vos ipsi dictam perambulacionem per sacramentum predictorum militum faciatis: unde vobis mandamus quod ad diem quem duxeritis providere, conveniatis ad terras predictas ad predictam perambulacionem per sacramentum predictorum militum faciendam, ita quod ipsa perambulacio fiat per certas metas et divisas, quia tam nos quam predictus episcopus posuimus nos in perambulacionem illam. Et sine dilacione nobis scire faciatis sub sigillis vestris et per quatuor milites ex illis qui perambulacioni illi interfuerint per quas metas et divisas perambulacio illa facta fuerit: mandavimus enim vicecomitibus predictorum comitatuum quod ad diem quem eis scire facietis venire faciant coram vobis ad terras predictas predictos milites ad ipsam perambulacionem per sacramentum eorum sicut predictum faciendam. In cujus etc. Teste rege apud Westmonasterium vj°. die Marcii.

De expedicione Wallie.—Rex Radulfo Basset de Draiton salutem. Quia Leulinus filius Griffini terras nostras et Eduuardi filii nostri necnon et aliorum fidelium nostrorum hostiliter aggressus ipsas contra homagium et fidelitatem nobis debitam occupare et devastare nequiter presumpsit: et dum nuper essemus in partibus Wallie in expedicione nostra contra predictum Leulinum et complices suos, de consilio magnatum et fidelium nostrorum ibidem nobiscum existentium propter temporis tarditatem et hyemem supervenientem provisum fuit ut in estate futura cum pleno posse nostro ad expedicionem nostram ibidem revertamur: Vobis mandamus in fide qua nobis tenemini firmiter injungentes quatinus die Lune proxima ante festum Sancti Johannis Baptiste, scilicet per octo dies ante festum predictum ad ultimum, sitis ad nos apud Cestriam cum equis et armis et cum servicio vestro nobis debito, parati exinde nobiscum proficisci in expedicionem nostram contra predictum Leulinum et prefatos complices suos rebelles nostros. Et, quia auxilio vestro specialiter in instanti necessitate indigemus, vobis sub confidencia quam de vestra dileccione gerimus attente rogamus quatinus taliter et tam decenter ad nos veniatis in dictorum rebellium nostrorum versutia adeo potenter vestro et aliorum fidelium nostrorum auxilio reprimi valeat quod tam nobis quam vobis cedat ad honorem et nos vobis exinde perpetuo teneamur ad grates. Teste rege apud Westmonasterium xiiij. die Marcii.

Eodem modo mandatum est:—
Nicholao de Crioll',
Rogero de Sumery,
Johanni Extraneo,
Radulfo de Camays seniori,
Thome de Gredley,
Willelmo Maudut de Hamslap',
Willelmo de Bello Campo de Bed',
Philippo Basset,
(fn. 1) S. de Monte Forti, comiti Leyc',
Reginaldo filio Petri,
Ricardo de Grey,
(fn. 1) Willelmo de Bello Campo de Eton',
(fn. 1) Guidoni de Rupe Forti,
Waltero de Dunestanvill',
(fn. 1) R. de Clar' comiti Glouc',
Nicholao de Bolevile,
Willelmo de Monte Acuto,
Willelmo (fn. 2) de Harecurt,
Roberto de Auguylun,
Radulfo Basset de Drayton',
Willelmo le Moyne,
Willelmo de Oddingeseles,
Thome Corbet,
Matheo de Luvayn,
Henrico Engaynne,
Philippo Marmyun,
Henrico de Novo Burgo,
Reginaldo de Pavelly,
(fn. 1) Rogero le Bigod comiti Norf',
(fn. 1) Ade de Novo Mercato,
Roberto de Tateshal',
Andree Peverel,
Roberto de Ros de Bello Vere,
(fn. 1) Waltero filio Roberti,
Henrico de la Pumerye,
Henrico de Pynkeny,
Roberto de Sancto Johanne,
(fn. 1) Elye de Rabayne,
Roberto de Bello Campo,
Willelmo Bardolf,
Ernulpho de Bosco,
Johanni filio Mathei,
Rogero de Monte Alto,
Waltero de Clifford,
Willelmo de Bello Campo de Elmel',
Egidio de Clifford,
Patricio de Chaurces,
Willelmo de Ebroycis,
Johanni de Baalum,
Ada le Despenser,
Johanni filio Philippi,
Roberto filio Pagani,
Griffino Wenunwen,
Radulfo Russel,
(fn. 1) Willelmo de Valenc',
Johanni de Wauton',
Roberto de Gurnay,
J. de Plessetis comiti Warr',
Nicholao de Poynz,
Baldewino de Insula,
Willelmo de Breuse,
Roberto de Canvill',
Johanni filio Johannis filii Galfridi,
Ricardo de Muntfichet,
Hugoni de Nevill',
Hugoni le Despenser,
Radulfo Basset de Sapecot',
Galfrido de Gyenvill',
Radulfo de Tryhampton',
Henrico de Tracy,
Roberto Tregoz,
Roberto filio Nicholai,
Galfrido de Maundevile,
Johanni de Warenn',
Jacobo de Aldedel',
Roberto de Stafford,
Hamoni Crevequer,
Rogero de Huntyngefeud,
Alvredo de Linc',
Johanni Giffard,
Willelmo de Muntcheynsi,
Guidoni de Briano,
Radulfo Sanzaveir,
Johanni de Curtenay,
Mauricio de Berkel',
Humfrido de Bohun comiti Heref',
Rogero de Mortuo Mari,
Radulfo le Butiller,
Fulconi filio Warini,
Johanni filio Alani,
Humfrido de Boun juniori,
(fn. 3) Roberto de Veteri Ponte.

Eodem modo mandatum est:—
abbati de Abbotesbur',
abbati Glaston',
abbati Muchelni,
abbati de Certes',
abbati Westm',
abbati Sancti Augustini Kant',
abbati de Hyda,
abbati de Winchecumb,
abbati de Persor',
abbati de Sancto Edmundo,
abbati de Tavistok',
priori de Coventr',
abbati de Abindon',
abbati Sancti Benedicti de Hulmo,
abbati de Cern',
abbati de Evesham,
abbati de Rames',
abbati de Sancto Albano,
abbati de Malmesbur'.
Et mandatum est abbatisse de Wilton' quod per viij. dies ante festum Sancti Johannis in estate futura habeat servicium suum regi debitum apud Cestriam paratum exinde proficisci cum rege in expedicionem suam, etc.
Eodem modo mandatum est abbatisse de Berking' et abbatisse de Shaftebir'.

Adhuc de exercitu.—Mandatum est vicecomiti Middlesex quod per totam ballivam suam clamari faciat quod omnes qui servicium regi debent sint ad regem cum servicio suo die Lune predicto apud Cestriam parati etc. ut supra.
Eodem modo mandatum est vicecomitibus Kanc', Linc', Essex, Hertf', Lanc', Warr', Leyc', Berk', Oxon', Cornub', Surr', Sussex', Heref', Rotel', Wigorn', Norhampt', Buck', Bed', Staff', Salop', Wiltes', Sumers', Dors', Norf', Suff', Glouc', Notingh', Derb', Devon', Cantebrig', Huntingd', Westmerl'.
Item. Modo supradicto mandatum est vicecomitibus Ebor', Cumberl' et Norhumberl', hoc addito:—Ita tamen quod si eorum aliqui per dilectos et fideles nostros Robertum de Nevill' et Willelmum le Latimer' requisiti fuerint ex parte regis ad eundum cum equis et armis in auxilium amicorum regis in partibus Scocie secundum formam litterarum regis patentium comitibus, baronibus et aliis fidelibus regis de comitatibus Ebor, Norhumbr' et Cumberl' directarum, illud occasione hujus mandati regis non omittant.

Item in forma qua mandatum est magnatibus supradictis mandatum est R. electo Karl', archiepiscopo Cantuariensi, Wigorniensi episcopo, Dunelmensi episcopo, episcopo Elyensi, et episcopis Sarr', Exon', Cicestr', Roff', Bathon' et Wellen', Coventr' et Lichef', Lond', Heref' et Norwic', et archiepiscopo Ebor' et electo Wintoniensi, et Lincolniensi episcopo.

De attornato magistri milicie Templi in Anglia.—Frater Haymo magister milicie Templi in Anglia attornavit loco suo Thomam le Hayward ad lucrandum vel perdendum in loquela que est coram domino rege per breve suum inter ipsum dominum regem petentem et predictum magistrum tenentem de quadam terra in Magna Lymberg' in comitatu Linc'.

De exercitu Wallie.—Item. Mandatum est baronibus et ballivis de Sandwic quod una cum aliis baronibus aliorum partium regni, quibus similiter rex hoc idem mandavit, conveniant ad providendum quod cum toto servicio quod regi debent et superplusagio usque ad cc. naves in universa, ita quod quelibet navis unius medietatis illarum cc. navium sit deferens xx. et iiij^or. equos et quelibet alterius medietatis sexdecim equos, sint ad regem per octo dies ante festum Sancti Johannis Baptiste in estate futura apud Cestriam parati exinde proficisci cum rege in expedicionem suam Wallie etc.
Eodem modo mandatum est baronibus et ballivis de la Rye, de Hasting', de Wincheles', de Dovor'.

De militibus alieni generis venturis ad regem.—Rex Ricardo de Munbiliard salutem. Quia Walenses a fide nostra recedentes contra homagium suum et fidelitatem nobis prestitam jamdiu hostiliter invaserunt nostras et Edwardi filii nostri et baronum nostrorum terras in marchia Wallie in nostri et nostrorum dedecus et contemptum et inestimable dispendium, propter quod oportet nos in hac estate ad partes illas cum exercitu nostro potenter accedere ad tantum dedecus et injurias et excessus intollerabiles nobis et nostris in hac parte illatos ulciscendos, de promptitudine et fidelitate vestra confidenciam gerentes specialem, vobis sub debito fidelitatis et homagii quibus nobis tenemini mandamus, rogantes quatinus, omnibus aliis pretermissis, sitis London' cum equis et armis in quindena Pentecostes proximo futura sine ulteriori dilacione, prompti et parati ad nos exinde ad partes predictas in expedicione predicta potenter venire. Et hoc sicut nos et honorem nostrum diligitis nullo modo omittatis. Et ad negocium istud penes vos exequendum mittimus ad hoc Hugonem Espaulard cui fidem super hoc adhibeatis. Teste etc.
Eodem modo mandatum est Henrico de Paygerne, Willelmo de Puntyller, Simoni de Genvyle, Johanni de Durnay, Guidoni de Reins, Petro, Aymoni et Guidoni de Chaunteny, Galfrido de Bolemont, Baldewino de Villa, Johanni de Dole, Stephano de Bues, Johanni de Chastillun.
Item. Mandatum est Willelmo de Pemes quod veniat incontinenti.

Lond'.—Quia rex intellexit quod Radulfus Hardel, Nicholaus filius Jocelini, Nicholaus Bat, Johannes le Mynur, Mathias Bokerel, Henricus Walemund, Johannes Tolusan et Arnulphus Thedmar proponunt vendere domos et tenementa sua que habent in civitate Lond', mandatum est majori et vicecomitibus Lond' quod eos hoc facere nullatenus permittant, et, si quas domos vel tenementa sua jam vendiderint, ea sine dilacione capiant in manum regis et salvo teneant donec rex aliud inde preceperit. Teste rege apud Westmonasterium v. die Marcii.

De fine Galfridi de Lucy.—Memorandum quod dominus rex et Galfridus de Lezingn' per finem cc. et xl^a. librarum, quem Galfridus de Lucy fecit cum predicto Galfrido de Lezingn' pro terris suis habendis que fuerunt in custodia predicti Galfridi de Lezingn' die Dominica proxima in Passione Domini anno regni regis H. filii regis J. xlij°., reddiderunt predicto Galfrido de Lucy omnes terras suas que fuerunt in custodia predicti Galfridi de Lezingn' in eo statu in quo nunc sunt, et omnia blada seminata in terris predictis et tresdecim carucatas boum, ita quod ab eo die in antea idem Galfridus de Lucy recipiet omnes exitus et proventus terrarum et tenementorum predictorum, tam in escaetis wardis quam in omnibus aliis exitibus: et de predictis ccxl^a. libris reddet predicto Galfrido de Lezingn' iiij^xx. libras ad festum Nativitatis Sancti Johannis Baptiste anno etc. xlij. et ad festum Sancti Michaelis proximo sequens iiij^xx. libras, et ad festum Pasche proximo sequens iiij^xx. libras: et si in solucione dicte pecunie in aliquo terminorum defecerit, vul't idem Galfridus de Lucy ut vicecomites locorum in quibus terra sua consistit ipsum distringere possint per terras et catalla sua ad solucionem dicte pecunie et ad refundendum predicto Galfrido de Lezingn' dampna sua que occasione predicte pecunie non solute ad terminos suprascriptos incurreret, salvis predicto Galfrido de Lezingn' blado suo tam triturato quam triturando, instauro suo universo, suppellectilibus et omnibus aliis de dicta terra surgentibus usque ad proximam Dominicam Passionis preter ea que superius sunt expressa.

Pro hominibus de Kingeston'.—Memorandum quod mandatum fuit vicecomiti Surr' quod, cum homines de Kyngeston' solverint in garderoba regis l^a. marcas pro libertatibus habendis et idem vicecomes averia eorundem hominum que pro xiij. marcis et dimidia que de predictis l^a. marcis cepit et detinet, eis sine dilacione deliberaret: et quia mandatum regis in hac parte non exequtur, mandatum est eidem vicecomiti iterato quod idem mandatum exequatur alioquin compareat coram rege apud Westmonasterium in crastino Dominice Palmarum responsurus regi de contemptu illo et prefatis hominibus de transgressione predicta. Teste rege apud Westmonasterium x°. die Marcii.

Memorandum quod Willelmus de Insula, quondam vicecomes regis Norhamt', habet diem coram rege a die Pasche in xv. dies de transgressionibus ei impositis per ipsum dominum regem, ita quod loquela sua sit tunc in eodem statu in quo prius fuit, presentibus R. comite Glouc', Johanne Mansell', Philippo Luvel' et aliis de consilio regis.

De attornato.—Willelmus de Bello Campo junior ponit etc. Rogerum filium Simonis de Rokesden' in loquela que est coram rege versus vicecomitem Bedef' et Buk' de placito transgressionis.
Norhamt'.—Galfridus de Leueknor ponit etc. Willelmum Moryn in loquela que est coram rege inter eundem Galfridum et Philippum filium Roberti et alios de placito transgressionis.
Suhampt.—Johannes de Sancto Dionisio, persona ecclesie de Kemynton', ponit loco suo Ricardum Prouet in assisa nove disseisine, quam idem Johannes arramiavit versus Ricardum de Dunnemere coram rege in proximo adventu suo apud Winton' de tenemento in Kemynton'.

Adhuc de exercitu.—Rex Hugoni de Bolebek salutem. Quia Lewelinus filius Griffini terras nostras et Edwardi filii nostri necnon et aliorum fidelium nostrorum hostiliter aggressus ipsas contra homagium et fidelitatem nobis debitam occupare et devastare nequiter presumpsit; et, dum nuper essemus in partibus Wallie in expedicione nostra contra predictum Lewelinum et complices suos, de consilio magnatum et fidelium nostrorum ibidem nobiscum existentium propter temporis tarditatem et hyemem supervenientem provisum fuit ut in estate futura cum pleno posse nostro ad expedicionem nostram ibidem revertamur; vobis mandamus in fide qua nobis tenemini firmiter injungentes quatinus die Lune proxima ante festum Beati Johannis Baptiste, scilicet per octo dies ante festum predictum ad ultimum, sitis ad nos apud Cestriam cum equis et armis et cum servicio vestro nobis debito parati exinde nobiscum proficisci in expedicionem nostram contra predictum Lewelinum et predictos complices suos, rebelles nostros, nisi interim per dilectos et fideles nostros Robertum de Nevill' et Willelmum le Latimer requisiti fueritis ex parte nostra ad eundum cum equis et armis in auxilium amicorum nostrorum in partibus Scocie secundum formam litterarum nostrarum patentium vobis et aliis fidelibus nostris de comitatibus Ebor', Norhumbr', Cumberland' directarum. Teste rege apud Merton xxviij. die Marcii anno regni nostri xlij°.
Eodem modo mandatum est:—
Rogero Bertram,
Rogero de Moubrey,
Edmundo de Lascy,
R. de Quency comiti Winton',
Willelmo de Creistok,
Willelmo de Ros',
Comiti Straern',
Henrico de Percy,
Nicholao de Bolteby,
Willelmo de Stutevill',
Thome filio Thome de Muleton,
Thome filio Lamberti de Muleton',
W. de Fortibus comiti Albemarl',
Waltero de Lindesey,
Adam de Everinecham,
Johanni de Bayllol,
Petro de Bruz,
Petro de Percy,
Rogero de Merk,
Willelmo de Huntercumbe,
Radulfus (sic) de Normanvill',

Scocia. (fn. 4) —Rex omnibus comitibus baronibus militibus et aliis fidelibus suis de comitatibus Ebor, Norhumbr' et Cumb' salutem. Satis intellexistis, ut credimus, quomodo quidam magnates Scocie nobis et dilecto filio et fideli nostro A. regi Scocie illustri et regine sue, filie nostre, et quibusdam amicis nostris de partibus Scocie, diu est, graves extiterint et infesti et adhuc, prout accepimus, multiplices injurias eisdem machinantur inferre; unde ad resistendum malicie ipsorum, cum opus fuerit, mittimus dilectos et fideles nostros Robertum de Neuvyle et Willelmum le Latymer ad partes Scocie, vobis mandantes in fide qua nobis tenemini rogando ut modis omnibus provideatis quod prompti sitis et parati cum equis et armis ad eundum ad partes predictas in auxilium et succursum predictorum amicorum nostrorum una cum prefatis Roberto de Neuvyle et Willelmo le Latymer vel eorum altero, cum ab eisdem Roberto et Willelmo, aut altero ipsorum, super hoc fueritis requisiti: ita quod, cum ab ipsis vel eorum altero vos requiri contigerit, illud, sicut de fidelitate et dileccione vestra confidimus, nullatenus efficere omittatis. In cujus etc. Teste rege apud Westmonasterium xxiij. die Marcii.

Rex dilecto et fideli suo Roberto de Nevill' salutem. Dilectus et fidelis noster A. rex Scocie ad nos suos nuncios, abbatem videlicet de Jeddewurth et Willelmum de Kaya, nuper transmisit significans nobis per eosdem quod parleamentum suum usque Stryvelin a die Pasche in tres septimanas jam fecit convocare, rogavitque nos rex predictus ut aliquos de nostris magnatibus, providos et discretos, ad idem parleamentum mittamus, ut ipsis presentibus corrigantur et emendentur transgressiones nobis et regine nostre seu eciam dicto regi et regine sue filie nostre aut aliis amicis nostris illate. Verum quia propter temporis brevitatem et loci distanciam ad quem eciam facilis non patet accessus, et insuper quia interim colloquium nostrum pro variis et arduis negociis nostris habere nos oportet, non possumus de magnatibus nostris ad diem illum mittere quos vellemus, providimus quod dilectus nobis in Christo abbas de Burgo et dilecti et fideles nostri R. de Quency comes Winton, et Johannes de Baylol dicto parleamento intersint ad diem predictum et dictum regem ex parte nostra interpellent quod parleamentum aliud ad diem alium ad quem convenienter mittere possimus et ad aliquem locum competentem citra mare capiatur: ita quod predictis amicis nostris interim nulla molestia per partem adversam inferatur set pax omnimoda tam pro parte una quam pro parte altera interim conservetur: unde vobis mandamus quod, si forsitan pars adversa alicui de amicis nostris in Scocia guerram interim moveat, tunc cum omnibus militibus quos undique de balliva vestra habere poteritis, ad requisicionem predictorum vel alicujus illorum, sine more dispendio eis succursum faciatis una cum dilecto et fideli nostro Willelmo le Latimer, cui super hoc litteras nostras direximus, si forte presens affuerit; ita eciam quod hoc propter ejus absenciam, si interesse non possit, non omittatis, ita quod pro defectu nostri juvaminis predicti amici nostri non vituperantur vel parti adverse confederari cogantur: et ad hec facienda capiatis denarios de exitibus ballive vestre quotquot necesse habueritis quos vobis faciemus allocari. Scripsimus insuper comiti Aubermarl' quod de militibus ballive sue de Cumberland quotquot habere poterit succursum vobis habere faciat quandocunque a vobis fuerit requisitus. Si vero interim pacifice se habuerit pars adversa erga amicos nostros bonum nobis videtur quod similiter tam ipsi quam vos in pace vos teneatis usque ad aliud parleamentum, presenciam vestram nichilominus exhibentes apud Rokebur' ubi dicti amici nostri in tres septimanis post Pascha prout eis mandavimus convenient. Teste rege apud Westmonasterium xxv. die Marcii.

De facto Scocie.—Postea mandatum fuit eidem Roberto quod ad expensas tam persone sue quam aliorum quos secum duxerit in auxilium predictorum amicorum regis in Scocia sumat denarios de exitibus ballive sue et, cum rex sciverit etc. faciet ei allocari. Teste rege apud Merton' vj. die Aprilis.
Eodem modo mandatum est Willelmo le Latymer, vicecomiti Ebor'. Teste ut supra. Per Johannem Maunsell'.

Pro electo de Dun'.—Memorandum quod rex concessit magistro Reginaldo archidiacono Dun', electo ab abbatibus et clero Dun' in episcopum Dun', quod postquam archiepiscopus Armachanensis cognoverit de eleccione predicta et eciam de eleccione facta per priorem et conventum Sancti Patricii in Dun' de magistro Thoma Lydel in episcopum ejusdem episcopatus, si dictus archiepiscopus invenerit quod predictus archidiaconus extiterit in casu confirmacionis, rex per nuncium ejusdem electi deferentem regi litteras patentes prefati archiepiscopi per quas constare possit quod idem electus sit in casu predicto, regium assensum adhibebit eleccioni predicte de predicto archidiacono facte, et tunc demandebit justiciario Hibernie quod omnia temporalia ejusdem episcopatus eidem magistro Reginaldo electo restitui faciat post confirmacionem suam in episcopum dicti episcopatus. Teste rege apud Merton ij. die Aprilis. Per ipsum regem ad instanciam regine.