Close Rolls, October 1261

Close Rolls, October 1261

CLOSE ROLLS. 46 HENRY III.

1261.

[m. 19.]

Clause de anno regni regis Henrici filii regis Johannis quadragesimo sexto incipiunt hic ut patet inferius.

De Ada de Gesemuth'.—Rex ballivis suis Novi Castri super Tynam salutem. Mandamus vobis rogantes quod habere faciatis dilecto et fideli nostro Ade de Gesem', vicecomiti nostro Norhumbr', firmam ville sue de termino Sancti Michaelis proximo futuro ad quedam negocia nostra que ei injunximus inde expedienda. Et nos eam vobis faciemus allocari. Teste etc.

De executoribus Johannis de Langetoft.—Rex fratri Roberto thesaurario Novi Templi London' salutem. Quia per magistrum G. officialem venerabilis patris H. Londoniensis episcopi coram nobis constitutum accepimus quod executores Johannis de Langetoft, quondam clerici cancellarie nostre, coram ipso probaverunt predictum Johannem legitime testamentum suum condidisse, vobis mandamus quod depositum, quod idem Johannes habuit in domo vestra et quod nuper mandavimus per vos salvo custodiri donec aliud inde a nobis habueritis in mandatis, sine dilacione liberetis Thome de Langetoft, fratri ejusdem Johannis, et sociis suis executoribus predicti defuncti ad execucionem testamenti sui prout saluti anime dicti defuncti viderint expedire inde faciendam. Teste rege apud Turrim Lond' xxvij° die Octobris anno regni nostri xlvj^to.

Denarii mittendi ad regem.—Mandatum est Waltero de Burges et socio suo, custodibus episcopatus Wintoniensis, salutem. Mandamus vobis quod omnes denarios quos levare poteritis ad opus nostrum tam de vendicione bladorum quam de redditibus et aliis exitibus predicti episcopatus nobis habere faciatis de die in diem liberandos in garderoba nostra. Et hoc sub omni festinacione qua poteritis fieri provideatis. Teste ut supra.

De castro de Farnham instaurando et custodiendo.—Mandatum est Waltero de Burges, custodi episcopatus Wintoniensis, quod sine dilacione provideri faciat quod castrum de Farnham salvo et secure custodiatur et in municione et custodia castri ejusdem poni faciat de probis hominibus ville de Farnham et aliis tenentibus episcopatus Wintoniensis et omnia blada manerii ejusdem loci cariari et reponi faciat in ballio ejusdem castri. Et, si illi, qui in municione castri predicti extiterint, blada et alia bona sua ibidem collocare voluerint ad conservacionem et securitatem ipsorum, id fieri permittat. Teste ut supra.

De costera maris custodienda.—Mandatum est vicecomiti Kanc' quod costeram maris inter Quinque Portus regis salvo et secure, sicut custodiri debet et solet, per illos qui costeram illam debent custodire et solent, custodiri faciat, ita quod nullus extraneus per costeram illam ingrediatur regnum regis sine licencia vel mandato regis speciali. Teste rege apud Turrim Lond' xxviij° die Octobris.

Pro Johanne de Muscegros.—Rex baronibus suis de scaccario salutem. Sciatis quod, cum Johannes de Muscegros nobis solvisse debuisset triginta marcas in festo Sancti Michaelis proximo preterito ad scaccarium nostrum in partem solucionis debitorum que idem Johannes nobis debet, ac nos eidem Johanni viginti marcas in dictis xxx^ta marcis nuper fecerimus allocari super feodum suum de predicto termino Sancti Michaelis, nos de residuis decem marcis predictarum xxx. marcarum dedimus ei respectum usque ad festum Pasche proximo futurum. Et ideo vobis mandamus quod respectum illum ei habere permittatis. Teste rege apud Turrim Lond' xxix. die Octobris.

De quarrellis ponendis in castro de Monemuth'.—Mandatum est constabulario regis de Sancto Briavello quod de quarrellis regis qui sunt in custodia sua faciat habere constabulariis de Monemuth' et Bristoll' duo milia ad castra illa munienda, de dono regis. Teste ut supra.

Pro episcopo Londoniensi.—Mandatum est Petro de Gisorc', camerario regis Lond', quod de primis vinis que capturus est ad opus regis Lond' faciat habere episcopo Londoniensi xv. dolia vini pro quindecim doliis vini que rex ab eo cepit de prestito per manus Johannis de Somers', pincerne regis, quando rex ultimo fuit apud Sanctum Paulum Lond'. Teste rege apud Turrim Lond' xxx. die Octobris.