Calendar of Close Rolls, Henry III: Volume 12, 1261-1264. Originally published by His Majesty's Stationery Office, London, 1936.
This premium content was digitised by double rekeying. All rights reserved.
'Close Rolls, May 1262', in Calendar of Close Rolls, Henry III: Volume 12, 1261-1264, (London, 1936) pp. 123-127. British History Online https://www.british-history.ac.uk/cal-close-rolls/hen3/vol12/pp123-127 [accessed 19 April 2024]
Close Rolls, May 1262
Rex vicecomiti Ebor' salutem. Cum nuper apud Oxoniam
per voluntatem baronum nostrorum ordinacionibus et consiliis
eorum supposuerimus nos et statum negociorum nostrorum et
regni nostri sub quibusdam condicionibus et promissionibus
nobis factis, quas minime nobis observarunt, ac ipsi postmodum
plura in prejudicium nostrum et depressionem potestatis regie
necnon in dampnum subditorum nostrorum et suorum attemptare
presumpserint, et colligaciones inter se fecerint, que in prejudicium et derogacionem juris regii et turbacionem pacis nostre
cedere perpendimus manifeste, propter quod ex forma nostre
concessionis eis ulterius ad observacionem premissorum non
tenemur, et, cum bone memorie Alexander papa quartus nos ab
observacione dicte concessionis nostre postmodum absolverit et
dominus papa Urbanus qui nunc est dicti predecessoris sui adherens vestigiis nos a juramentis et aliis dictas ordinaciones
seu statuta contingentibus absolutos denunciari et dictas colligaciones ordinaciones seu statuta dissolvi mandaverit, quod per
venerabilem patrem Norwicensem episcopum et discretum virum
Johannem Mansell' thesaurario Ebor' dicti mandati executores
interveniente insimul auctoritate venerabilis patris B. Cantuariensis archiepiscopi ipsorum college plenius est denunciatum, nos,
potestate nostra regia libere uti et singulis tam majoribus quam
minoribus prout ad nos pertinet justicie plenitudinem exhibere
volentes, tibi precipimus quod hec in pleno comitatu tuo et per
totam ballivam tuam publice facias denunciari, et scire facias
universitati comitatus predicti quod cum omni securitate et
confidencia justiciam optinendi jus suum tam contra majores
quam contra minores coram nobis et alibi auctoritate nostra
prosequantur, quia nulli eorum deesse volumus in sua justicia
quin tam contra majores quam contra minores coram nobis et
alibi auctoritate nostra prosequantur, quia nulli eorum deesse
volumus in sua justicia quin tam contra majores quam minores
plenam justiciam valeant optinere. Libertates insuper tam in
magna carta nostra quam in carta nostra de foresta contentas in
omnibus plene volumus observari. Et, si forte contingat quod
aliqui in balliva tua dictis colligacionibus adhereant aut contra
jus regalitatis nostre aut eciam contra execucionem tui officii
aliquid attemptare aut contra nos et honorem nostrum predicare
aut populo suadere presumpserint, eos arestari facias et custodiri
donec aliud a nobis super hoc habueris in mandatis. Teste
rege apud Westmonasterium ij. die Maii.
Eodem modo scribitur singulis vicecomitibus per Angliam.
Cum Ricardus de la Rokel' nuper dimiserit et concesserit Ricardo de Sancto Dionisio manerium de Wokindon', quod est infra metas foreste regis Essex', habendum et tenendum tota vita ipsius Ricardi de Sancto Dionisio cum omnibus libertatibus ad manerium illud pertinentibus, ac nos per nostras literas patentes dudum concesserimus prefato Ricardo de la Rokel' quod per totam forestam nostram predictam fugare possit leporem, vulpem, tessonem et catum et eos libere capere et asportare quo voluerit sine impedimento nostri vel ballivorum nostrorum foreste predicte ut dicitur, volentes prefato Ricardo de Sancto Dionisio graciam facere specialem vobis mandamus quod quamdiu idem Ricardus de Sancto Dionisio teneat manerium predictum ipsum libertatem predictam per totam forestam predictam Essex' secundum quod in predictis literis nostris patentibus continetur habere et ea uti permittatis sine impedimento vestri vel ballivorum nostrorum foreste predicte sicut predictum est, ac si idem Ricardus de la Rokel' manerium illud in manu sua teneret. Teste rege apud Westmonasterium iiij. die Maii.
Sciant presentes et futuri quod ego Thomas Gredley dedi concessi et hac presenti carta mea confirmavi Petro Gredley, filio meo, et heredibus vel assignatis suis totum manerium meum de Mamecestr' cum advocacione ecclesiarum de Mammecestr' et de Childewell' et cum capellis de Aston' et Hale et de Garstan dictis ecclesiis pertinentibus et cum omnibus aliis pertinenciis dicto manerio de Mamecestr' infra villam et extra pertinentibus in dominicis, forestis, pratis, molendinis, stagnis, vivariis, aquis, boscis, parcis, pasturis, homagiis, releviis, wardis, escaetis, theoloniis et omnibus pertinenciis nominatis et non nominatis. Do eciam et concedo eidem Petro et heredibus vel assignatis suis manerium meum de Barton' cum omnibus pertinenciis in wardis, releviis, homagiis, escaetis, molendinis, aquis, pratis, pasturis et boscis sicut illud emi plenarius et liberius de domino Gilberto de Barton'. Do insuper et concedo predicto Petro et heredibus vel assignatis suis manerium meum de Kyuerdeleye cum omnibus pertinenciis in dominicis, in feodis, serviciis, planis, pratis, pascuis et pasturis, boscis, molendinis, aquis et omnibus aliis pertinenciis sicut illud manerium unquam plenarius et liberius tenui, tenenda et habenda dicto Petro et heredibus vel assignatis suis sine aliquo retinemento cum omnibus pertinenciis sicut ea unquam liberius et plenarius tenui libere quiete integre et pacifice, faciendo inde Roberto de Ferers filio domini Willelmi quondam comitis de Dereby et heredibus suis debita servicia que ego Thomas et antecessores mei dicto Roberto et antecessoribus suis pro predictis maneriis facere consueverimus. Ut igitur hec mea donacio, concessio et confirmacio robur perpetuum optineat, presentem cartam sigilli mei impressione roboravi. Hiis testibus domino Galfrido de Chetham, David de Hulton', Johanne de Birun, Roberto de Aston', Willelmo le Norais, Ricardo de Moston', Alexandro de Pilketon', Rogero de Penulbury, Matheo de Burch', Ricardo filio Ranulphi, Jordano filio Roberti, Ricardo de Boudon', Willelmo clerico et aliis.
Mandatum est constabulario castri de Windes' quod omnes
aerias falconum in foresta regis de Windes' capi et ad opus regis
salvo custodiri et ad regem quamcitius commode poterit mitti
faciat. Teste ut supra.
Eodem modo mandatum est constabulario castri de Corf'.
Mandatum est vicecomiti Cumbrl' quod omnes illos de balliva sua, qui habent xx. libratas terre vel feodum unius militis integrum valens xx. libras per annum et milites esse debeant et non sint, distringat ad arma militaria sine dilacione capienda, nisi a nobis respectum suum habuerint de milicia sua. Teste.
Mandatum est justiciariis itinerantibus apud Bed' quod in assisa ultime presentacionis quam prior de Dunstapl' arramiavit versus Radulphum Perot de ecclesia de Herlingdon' cum omni celeritate qua secundum legem et consuetudinem regni regis fieri poterit procedat, eo non obstante quod rex nuper eis mandavit quod in processu ejusdem supersederent. Teste etc.
Rex vicecomiti Devon' salutem. Precipimus tibi quod assumptis tecum quatuor discretis et legalibus militibus de comitatu tuo in propria persona tua accedas ad curiam Willelmi de Berkel' et Avicie uxoris ejus de Brampton' et in plena curia illa recordari facias loquelam que est in eadem curia per breve nostrum de recto inter Radulphum le Serjaunt et Agnetem uxorem ejus, petentes, et Willelmum de Berkel' et Aviciam uxorem ejus, tenentes, de quarta parte et medietatem quarte partis unius ferlingi terre cum pertinenciis in Brampton'. Et recordum illud una cum brevi originali venire facias coram nobis in octabis Sancti Johannis Baptiste ubicunque tunc fuerimus in Anglia sub sigillo tuo et sigillis predictorum quatuor militum, prefigens partibus eundem diem quod tunc sint ibi coram nobis in loquela illa prout justum fuerit processure. Et habeas ibi hoc breve. Teste rege apud Westmonasterium viij. die Marcii. Quia predicti Willelmus et Avicia qui deforciaverunt predictis Radulpho et Agneti predictam terram sunt domini manerii predicti et curie predicte nec ipsi per visum predicti vicecomitis et quatuor militum quos sepius ibidem misimus eis justiciam in loquela illa facere voluerint.
Michaelis de Columbariis recognovit se debere Rogero de Evesham viginti marcas solvendas ei unam medietatem in quindena Sancti Johannis Baptiste proximo ventura et aliam medietatem in quindena Sancti Michaelis proximo sequenti. Et, nisi fecerit, concessit quod dicta pecunia levetur de terris et catallis suis in comitatu Som'.
Rex concessit Matilli de Kymes qui (sic) in proximo profecturus est in Pictaviam pro hereditate filiarum suarum perquirenda dare possit potestatem Thome de Cyrencestr' faciendi attornatos pro ipsa et contra ipsam in omnibus curiis regis usque ad festum Sancti Michaelis proximo futurum.
Walterus de Vernun recognovit in cancellaria regis se debere Hugoni de Villdebuf' xxiij. solidos solvendos ei die Sancte Margarete Virginis proximo futura. Et, nisi fecerit, concessit quod dicta pecunia levetur de terris et catallis suis in comitatu Wigorn'.
Willelmus Burgeis de Eldestowe recognovit se debere Ricardo de Wy decem marcas solvendas ei vque. marcas in festo Sancti Michaelis proximo venturo et alias quinque marcas in festo Invencionis Sancte Crucis in Maio. Et, nisi fecerit, concessit quod dicta pecunia levetur de terris et catallis suis in comitatu Corn'.
Philippus de Den' venit etc. die Jovis proxima ante festum Sancti Dunstani et petiit medietatem unius mesuagii ipsius Philippi et Clemencie uxoris ejus in Nova Sarisburia eisdem replegiari, que capta etc. quam etc. coram justiciariis de Banco versus Ranulphum de Luton' et Anoram uxorem ejus ut dicitur.
Nicholaus de Basing' venit etc. die Martis proxima post Ascensionis Domini et petiit terciam partem duarum partium manerii de Heselbergh' Isabelle de Ringisdon' replegiari, que capta etc. propter defaltam quam eadem Isabella fecit coram rege versus regem ut dicitur.
Bedinton' quod Rogerus (fn. 1) Gacelyn tenet. (fn. 2)
[m. 10d.]
Die Sabbati post Ascensionem Domini anno regni regis H. filii regis Johannis xl. sexto liberata fuit litera regis Alemannie de dicto suo de comitatibus Anglie et eorum vicecomitibus ipsi domino regi in presencia Walteri de Merton', cancellarii, magistri Henrici de Gaunt, Imberti Pugeis, Aymonis Thurumberd' et Petri de Chauvent et reposita fuit in garderoba regis in quadam pixide in qua fuit compromissum inter regem et barones signatum sigillis W. Wigornensis et E. Sarisburiensis episcoporum et compromissum similiter inter regem et barones super sex electis qui dicerent dictum suum de comitatibus et eorum vicecomitibus signatum sigillis suis qui in unum consentire non poterant immo ab invicem in toto discordes recesserunt. Teste rege apud Windes' xx. die Maii.
Rex Roberto de Nevill', justiciario foreste sue ultra Trentam, et sociis suis justiciariis itinerantibus ad placita foreste in comitatu Not' salutem. Super eo quod a nobis certiorari petivistis utrum placita de transgressionibus foreste de Pecco quam dedimus Edwardo filio nostro placitare debeatis ad presens necne vobis significamus quod placet nobis quod placita ejusdem foreste placitetis et terminetis in presenti itinere vestro apud Not' sicut retroactis temporibus fieri consuevit, salvis tamen prefato filio nostro amerciamentis et aliis ad ipsum spectantibus in itinere predicto racione foreste sue predicte. Volumus eciam quod de transgressionibus vivariorum et parcorum in itinere vestro placitetis, si quis de transgressionibus hiis querimoniam coram vobis deponat. Teste ut supra.