Close Rolls, June 1264

Calendar of Close Rolls, Henry III: Volume 12, 1261-1264. Originally published by His Majesty's Stationery Office, London, 1936.

This premium content was digitised by double rekeying. All rights reserved.

'Close Rolls, June 1264', in Calendar of Close Rolls, Henry III: Volume 12, 1261-1264, (London, 1936) pp. 344-347. British History Online https://www.british-history.ac.uk/cal-close-rolls/hen3/vol12/pp344-347 [accessed 28 March 2024]

Image
Image
Image
Image

Close Rolls, June 1264

[m. 5.]

Pro Willelmo filio Augustini de Hadestok'.—Rex ballivo Edmundi filii sui, custodis terrarum que fuerunt Rogeri de Thony, salutem. Cum prefato filio nostro concesserimus custodiam terrarum predictarum habendam usque ad legitimam etatem heredis predicti Rogeri nuper defuncti qui de nobis tenuit in capite, ac idem Rogerus dudum ante decessum suum dimisisset Augustino de Hadestok', civi Lond', manerium suum de Welkhamstowe cum pertinenciis ad firmam tenendum et habendum eidem Augustino et heredibus vel assignatis suis, videlicet, a crastino Sancti Egidii anno xlv. usque ad festum Sancti Michaelis proximo sequens et extunc in quatuor annos plenarie completos, ac nos postmodum dimissionem illam acceptaverimus et eam prefato Augustino per literas nostras patentes confirmaverimus, vobis mandamus quatinus Willelmo filio et heredi predicti Augustini manerium predictum restituatis, tenendum usque ad terminum predictum sicut predictum est. Teste rege apud Sanctum Paulum Lond' iiij. die Junii.

Pro Philippo Basset.—Rex Bartholomeo, custodi parci sui de Gyldeford, salutem. Cum licenciam dederimus dilecto et fideli nostro Philippo Basset quod in predicto parco nostro capere possit ad opus suum tres vel quatuor damos et de cuniculis nostris ibidem ad voluntatem suam; tibi precipimus quod, cum idem Philippus aliquos de suis ad hoc ibidem destinaverit, eis damos illos et cuniculos capere permittas et ipsis ad hoc consilium et auxilium impendas. Teste rege apud Sanctum Paulum London' vj. die Junii.

Pro abbate Westmonasterii.—Rex custodi foreste sue de Bernwude salutem. Cum per cartam nostram teneamur dilecto nobis in Christo abbati Westmonasterii singulis annis in octo damis, vobis mandamus quod in foresta nostra predicta facias habere predicto abbati octo damos de anno regni nostri quadragesimo septimo et duos damos de octo damis in quibus ei tenemur de anno regni nostri quadragesimo octavo. Teste rege apud Sanctum Paulum Lond' x. die Junii.

Pro Johanne le Naper.—Rex ballivo suo de Havering' salutem. Precipimus tibi quod demandam quam facis Johanni le Naper, servienti nostro, per summonicionem scaccarii nostri de quinque solidis annuis pro terra sua quam tenet de nobis in manerio predicto ponas in respectum usque ad festum Sancti Edwardi proximo venturum, ut interim per rotulos scaccarii predicti plenius inde certiorari valeamus. Teste rege ut supra.

Pro abbate Westmonasterii.—Rex Ricardo de Muntfichet, senescallo foreste sue Essex', salutem. Cum per cartam nostram teneamur dilecto nobis in Christo abbati Westmonasterii singulis annis in octo damis, vobis mandamus quod in foresta nostra de Hatfeld facias habere predicto abbati sex damos de octo damis in quibus ei tenemur de anno regni nostri quadragesimo octavo. Teste ut supra.

Pro Johanna que fuit uxor Alvredi de Linc'.—Rex eschaetori suo in comitatu Dorset' salutem. Sciatis quod commisimus dilecte nobis Johanne que fuit uxor Alvredi de Lincoln' nuper defuncti qui de nobis tenuit in capite, maneria de Akeford et Dunedish, que fuerunt predicti Alvredi, quondam viri sui, habenda in tenanciam donec eidem Johanne racionabilem dotem suam que eam contingit de omnibus terris et tenementis que fuerunt predicti Alvredi quondam viri sui secundum legem et consuetudinem regni nostri fecerimus assignari. Et ideo vobis mandamus quod eidem Johanne de maneriis predictis plenam seisinam habere faciatis tenendis sicut predictum est. Teste ut supra.

De cervis datis.—Mandatum est custodi foreste de Windesor' quod habere faciat Henrico de Hasting' in foresta de Colingrugg' duos cervos de dono regis. Teste ut supra.

De roboribus datis.—Mandatum est Ricardo de Munfichet, senescallo foreste Essex', quod in forinseco bosco de Havering faciat habere fratribus de Monte Carmeli de Lond' duo robora ad focum suum de dono regis. Teste rege apud Sanctum Paulum Lond' x. die Junii.

De cervis datis.—Mandatum est custodi foreste Salop' quod in eadem foresta faciat habere magistro Radulfo de Bohun tres cervos de dono regis. Teste ut supra.

De damis datis.—Mandatum est forestario de Feckam quod in eadem foresta faciat habere Hunfrido de Bohun, juniori, quatuor damos de dono regis. Teste ut supra.

De quercubus datis.—Mandatum est Nicholao de Segrave, custodi forestarum inter pontes Oxonie et Stanford quod in foresta de Clive sine dilacione faciat habere Ade de Cestreton' quindecim bonas quercus ad maeremium et escaetas earum ad carbonem inde faciendum de dono regis. Teste rege apud Sanctum Paulum Lond' xiij. die Junii.

De Guidone Gobaud.—Rex Willelmo de Grey salutem. Cum per nos et barones nostros sit provisum quod omnes qui nuper in conflictu habito apud Norhamt' ut prisones capti fuerunt ad nos ducantur usque Lond' in cujuscunque custodia consistant; vobis mandamus firmiter injungentes quatinus Guidonem Gobaud, qui est in custodia vestra, sub conductu dilecti et fidelis nostri Johannis de Grey, fratris vestri, qui de precepto nostro ad nos venturus est, ad nos sub omni festinacione mittatis. Et hoc nullatenus omittatis. Teste rege apud Sanctum Paulum Lond' xiiij. die Junii.

Pro Matilli que fuit uxor Alexandri de Beynflet.—Mandatum est Roberto de Ros, escaetori regis in comitatu Essex', quod secundum extentam quam nuper per preceptum regis fecit de terris et tenementis que fuerunt Alexandri de Beynflet nuper defuncti, qui de rege tenuit in capite, Matilli que fuit uxor ipsius Alexandri racionabilem dotem suam que eam contingit de terris et tenementis predictis sine dilacione faciat assignari prout secundum legem et consuetudinem regni regis fuerit faciendum. Teste rege apud Sanctum Paulum Lond' xv. die Junii.

De cera carianda ad regem.—Mandatum est ballivis regis Wintonie quod ceram regis, quam Martinus clericus regis, lator presentium, eis liberabit apud Wintoniam, ad regem usque London' sine dilacione cariari faciant, mittentes regi id quod regi aretro est de firma sua civitatis predicte. Et, cum rex sciverit custum cariagii illius et quantum regi liberaverint de firma predicta, rex breve suum de Allocate eis inde fieri faciet. Teste ut supra.

De damis datis.—Mandatum est Nicholao de Segrave, custodi forestarum inter pontes Staunford' et Oxonie, quod in foresta de Wauberg faciat habere Roberto de Insula tres damos de dono regis. Teste rege apud Sanctum Paulum London' xvj. die Junii.

De quercubus datis.—Mandatum est custodi foreste de Langwat quod in eadem foresta faciat habere Willelmo de Marers quatuor quercus ad maeremium de dono regis. Teste supra.
Mandatum est custodi foreste de Chete quod in bosco de Finkele, qui est infra forestam predictam, faciat habere Hunfrido de Bohun x. quercus ad maeremium de dono regis.
Mandatum est custodi foreste de Gillingham quod in eadem foresta faciat habere Hunfrido de Bohun x. quercus ad maeremium de dono regis.

De damis datis.—Mandatum est custodi foreste de Savernac quod in eadem foresta faciat habere Roberto Tregoz, seniori, tres damos de dono regis. Teste ut supra.

De quercubus datis.—Preceptum est custodi foreste de Alsisholt faciat habere Stephano de Croyden' duas quercus de dono regis. Teste rege apud Sanctum Paulum London xxx. die Junii.

De cervis et damis capiendis ad opus regis.—Rex mittit Henricum de Candover et Johannem Luvel, venatores suos, ad capiendum in foresta regis de Savernak' decem damos ad opus regis. Et preceptum est custodi ejusdem foreste quod ipsos Henricum et Johannem damos illos capere permittat et eis ad hoc consilium et auxilium impendas (sic). Teste ut supra.
Eodem modo mandatum est custodi foreste de Chete quod permittat predictos Henricum et Johannem capere ad opus regis quatuor cervos et decem damos in eadem foresta.
Eodem modo mandatum est custodi foreste de Wolvemer' quod permittat Ricardum de Candover' et Willelmum de Cand', venatores regis, capere in eadem foresta quatuor cervos ad opus regis.
Eodem modo mandatum est custodi parci regis de Gildeford quod permittat Johannem le Naper et Ricardum de Dichel', venatores regis, et Willelmum Bysset, vadlettum regis, capere in eodem parco octo damos ad opus regis. Teste ut supra.

De quercubus datis.—Mandatum est custodi foreste de Alsisholt quod in eadem foresta faciat habere canonicis Sancti Martini Magni London' duodecim quercus ad maeremium ad turrim ecclesie sue inde faciendam de dono regis. Teste ut supra.

De damis datis.—Mandatum est Nicholao de Segrave, custodi forestarum regis inter pontes Oxonie et Stanford, quod in eisdem forestis faciat habere Ade de Cestreton', clerico regis, duos damos de dono regis. Teste rege apud Sanctum etc. xxviij. die Junii.
Mandatum est Ricardo de Montfichet, senescallo foreste Essex', quod in eadem foresta faciat habere Guidoni de Monte Forti, nepoti regis, tres damos de dono regis. Teste rege apud Sanctum Paulum London' xxx. die Junii.