Close Rolls, June 1264

Close Rolls, June 1264

Rex Ade de Gesmuth' salutem. Cum occasione turbacionis nuper habite in regno nostro terras quorundam magnatum nostrorum capi fecerimus in manum nostram, ac vos eadem occasione castrum Rogeri Bertram' de Mitford de Mitford et terras ejusdem de mandato nostro in manum nostram ceperitis custodienda ad voluntatem nostram: cumque pax in regno nostro divina mediante gracia de consilio nostro et baronum nostrorum ordinata sit et firmata, vobis mandamus quod eidem Rogero castrum et terras suas predictas sine dilacione restituatis una cum omnibus inde perceptis a tempore capcionis. (Cancelled) Vacat quod aliter inferius.

Rex Ade de Gesmuth salutem. Cum occasione turbacionis dudum habite in regno nostro castra et terras quorundam magnatum nostrorum capi fecissemus in manum nostram et vobis castrum, terras et tenementa dilecti et fidelis nostri Rogeri Bertram' de Mitford ea occasione in manum nostram capta commisissemus custodienda donec aliud inde perceperimus, ac pax in regno nostro divina mediante gracia inter nos et barones nostros jam formata sit et firmata, per quod eidem Rogero castrum terras et tenementa sua predicta restituimus, vobis mandamus quod eidem Rogero castrum, terras et tenementa predicta sine dilacione restituatis una cum omnibus inde perceptis a tempore capcionis eorundem in manum nostram. Teste rege apud Sanctum Paulum London xiiij. die Junii.

[m. 5d.]

Rex Johanni de Ballyoll' salutem. Cum jam sedata turbacione nuper habita in regno nostro pax inter nos et barones nostros divina cooperante gracia ordinata sit et formata, ac quedam ardua negocia nos et regnum nostrum tangentia vobiscum communicanda habeamus, que sine presencia vestra et aliorum fidelium nostrorum nequeunt expediri; vobis de consilio baronum nostrorum mandamus in fide et homagio quibus nobis tenemini firmiter injungentes quatinus statim visis litteris istis omnibus aliis pretermissis sitis ad nos London' sine armis cum summa festinacione veniatis nobiscum super premissis consilium vestrum impensuri. Et sicut nos et honorem nostrum necnon et tranquillitatem regni nostri diligitis nullatenus omittatis. Teste rege apud Sanctum Paulum London' iij. die Junii.
Eodem modo mandatum est Rogero de Clifford, Rogero de Leyburn', Hamoni Lestraunge, Roberto de Nevill' et Ade de Gesmuth'.

Rex Amicie comitisse Devon' et Isabelle filie sue comitisse Albemarl' salutem. Cum trescente marce de denariis Johannis Manselli nuper per Simonem, capellanum dilecti et fidelis nostri Ade de Novo Mercato, apud Ravensheyh' arrestate et sub sigillo suo consignate penes vos resideant, sicut per ipsum Adam intelleximus; vobis mandamus in fide et dileccione quibus nobis tenemini firmiter injungentes quatinus illas trescentas marcas una cum omnibus aliis denariis per vos et vestros in partibus borealibus arrestatis de denariis supradicti Johannis nobis per fratrem Ricardum de Merton', hospitalarium, una cum aliquo de vestris sine dilacione mittatis, nisi dictas trescentas marcas nuncio predicti Ade juxta suum mandatum liberaveritis. Nos enim tam de predictis trescentis marcis quam de aliis denariis, cum summam eorum sciverimus versus prefatum Johannem et quoscunque alios vos acquietabimus et indempnes conservabimus; et litteras nostras patentes vobis inde fieri faciemus. Teste rege apud Sanctum Paulum Lond' xiij. die Junii. Per ipsum regem, comitem Leyc', H. le Despenser, justiciarium, et Adam de Novo Mercato, Petrum de Monte Forti et alios de consilio.

Rex Rogero de Mortuo Mari salutem. Ex tenore litterarum vestrarum nobis directarum intelleximus quod Lewelinus filius Griffini terras nostras et terras vestras in partibus illis hostiliter occupare proponit, de quo vobis significavimus quod eidem Lewelino jam scripsimus quod ab hujusmodi nostra et vestra inquietacione penitus desistat. Quodsi hoc non obstante terras predictas aggredi presumat ut predictum est, id nobis sine more dispendio significetis, ut super hoc aliud remedium apponi faciamus. Et quia turbacio nuper habita in regno nostro, benedictus Altissimus, sedata est et pax ubique proclamata, et ex parte nostra et baronum nostrorum firmiter inhibitum ne quis super alium currat nec homicidia, incendia, depredaciones nec alia hujusmodi faciat enormia, nec cuiquam damnum inferat contra pacem nostram, vobis mandamus firmiter injungentes quatinus alicui dampnum vel gravamen non inferatis vel quantum in vobis est inferri permittatis, set omnes vos in pace teneatis. Teste rege apud Sanctum Paulum Lond' xv. die Junii.

Eustachius Duninge de Cantebr' recognovit se debere xl. solidos priorisse de Marcyate solvendos in festo Nativitatis beate Marie proximo venture. Et, nisi fecerit, concessit quod dicta pecunia levetur de terris et catallis suis in comitatu Cantebr'.

Ankerus de Freschenvill' recognovit se debere Petro de Monte Forti ix. libras xiij. solidos viij. denarios solvendos eidem, videlicet, unam medietatem in quindena Sancti Michaelis proximo ventura, et aliam medietatem in quindena Natalis Domini proximo sequenti. Et nisi fecerit concessit quod dicta pecunia levetur de terris et catallis suis in comitatu Not'.

Rex Anglie regi Norwagie salutem et sincere dileccionis affectum. Litteras vestre serenitatis per magistrum Adam canonicum Stawag', nuncium vestrum, nuper accepimus, continentes quod melice recordacionis H. pater vester, cujus anime propicietur Altissimus, nuper nature debitum persolvit, de cujus occasu tanquam nostri specialis amici turbati sumus non mediocriter et gravati. De aliis equidem in eisdem litteris contentis videlicet quod quidam mercatores regni vestri ad prefatum patrem vestrum venientes in hyeme jam preterita ex parte nostra sibi nunciarunt quod, si mercatores de terra vestra in terram nostram venientes dampnum vel injuriam passi essent, nos eis emendas fieri faceremus, dum tamen mercatoribus nostris in terram vestram venientibus per vos satisfieret vice versa, et quod nulla inde emenda hactenus est subsecuta; vestre serenitati significamus quod premissa perduci nondum poterant ad effectum tum propter turbacionem jam dudum habitam in regno nostro tum quia naves regni nostri in terram et potestatem vestram venientes arestari fecistis ad expugnandum Alexandrum regem Scotorum illustrem, generum nostrum, per easdem, quod nobis et predicto regi grave videbatur et molestum. Verum, quia ejusdem federis amiciciam, quam cum dicto patre vestro dudum contraximus, vobiscum in posterum continuare proponimus, dum tamen inter vos et prefatum regem pax habeatur et concordia; volumus et concedimus quod mercatores nostre potestatis et vestre cum suis navibus et mercandisis pari vicissitudine veniant in terram nostram et vestram et libere et absque aliquo impedimento inde recedant usque a festo Sancti Michaelis proximo venturo in unum annum completum; ita quod tractatus pacis inter vos et dictum regem interdum habeatur, ut si divina mediante gracia pacem illam intervenire contingat inter nos et vos et ipsum regem et successores nostros indissolubiliter federis amicitie propagentur augmenta. Teste rege apud Sanctum Paulum Lond' xxviij. die Junii.