Close Rolls, June 1267

Close Rolls, June 1267

Rex dilecte sibi Isabelle comitisse Albe Marl' et Insule salutem. Auditis et intellectis hiis, que per fratrem Ricardum procuratorem de Lira et Johannem de Insula militem nobis significastis, responsum nostrum vobis tenore presentium intimamus, quod placet nobis ut supra receptamento Henrici Pecun et complicum suorum inimicorum nostrorum et transgressionibus et aliis dampnis vobis impositis per fideles nostros inquiratur, et quod nobis inde, si transgressiones et dampna aliqua per vos aut vestros nobis facta fuerint, plene fiant emende prout de jure et secundum legem et consuetudinem regni nostri fuerit faciendum, vobis mandantes quod castrum vestrum de Kerbrok' prefato Johanni liberetis custodiendum secundum tenorem litterarum nostrarum vobis inde directarum, et ita vos habeatis in hac parte quod istud mandatum nostrum indebitam non patiatur repulsam. Teste rege apud Stratford' iiij. die Junii.

Johannes filius Alani de Wlrinton' recognovit se debere Thome de Aldeham duodecim marcas et dimidiam, solvendas, unam medietatem in octabis Sancti Michaelis proximo futuris, et aliam medietatem in octabis Purificacionis Beate Marie proximo sequenti (sic) apud Novum Templum Lond'. Et, nisi fecerit, concessit quod dicta pecunia levetur de terris et catallis suis in comitatibus Northamt' et Buk'.

Rex L. filio Griffini salutem. Vobis evidenter liquere credimus qualiter inter nos et comitem Glouc' et illos de parte sua, qui cum ipso civitatem nostram Lond' nuper occuparunt, suborta fuit inde contencio, et quia inter nos et ipsos super dicta contencione pax ordinata et formata consistit, nos circa reformacionem et ordinacionem pacis illius et sedacionem discordie supradicte taliter extitimus occupati quod ad diem inter nos et vos per venerabilem patrem O. Sancti Adriani diaconum cardinalem, apostolice sedis legatum, nuper captum de pace tractanda accedere, nec eciam aliquem de secretariis nostris ibidem mittere, nequivimus, eo quod eorum consilio circa premissa facienda specialiter indiguimus et adhuc indigemus pro memorata pace taliter firmanda et assecuranda, ne, quod absit, infirmari valeat temporibus futuris, per quod aliquem de secretariis nostris ad vos ad tractatum aliquem vobiscum habendum adhuc destinare non valemus, verum quia mutuam pacem et concordiam nostram desideranter affectamus, dum tamen nostro et regni nostri commodo cedat et honori, in crastino diei Sancti Petri ad Vincula proximo futuri apud vadum de Muntgomery esse proponimus ad tractandum vobiscum de negociis nos et vos contingentibus, quod si aliquibus causis urgentibus prepediti dictis diei et loco interesse nequiverimus, pro certo vobis significamus quod aliquem de liberis nostris una cum quibusdam de consilio nostro ad eosdem diem et locum transmittemus, qui vice nostra plenam habebunt potestatem tractandi vobiscum de negociis predictis et ea firmandi pro parte nostra ac si presentes essemus ibidem; unde vos requirimus quatenus ad memoratos diem et locum una cum consilio vestro personaliter interesse velitis ad tractandum nobiscum vel cum hiis quos loco nostro ibidem invenietis de negociis antedictis. Et taliter erga nos et nostros vos interim gerere studeatis et vestros gerere faciatis quod meritis vestris exigentibus nos favorabiles et graciosos invenire debeatis. Responsum autem vestrum per latorem presentium significetis. Teste rege apud Sanctum Paulum London' xxiiij. die Junii.
Et mandatum est abbati Sancte Marie Sallop' quod litteras predictas recipiat et eas prefato Lewelino deferat ex parte regis, proviso quod rex responsum prefati L. super litteris predictis habeat ab instanti die Sancti Johannis Baptiste in tres septimanas apud castrum Oxonie, vel citius si poterit, ubi regem vel aliquem ex parte sua inveniet ad recipiendum responsum predictum.

Radulphus de Crumbwell' recognovit in cancellaria regis apud Sanctum Paulum Lond' se debere Johanni de Monte Alto lxx. marcas de quibus solvet eidem Johanni unam medietatem in festo Pasche proximo venturo et aliam medietatem in festo Pentecostes proximo sequenti. Et, nisi fecerit, concessit idem Radulphus quod dicta pecunia levetur de terris et catallis suis in comitatu Notingham'.

Walterus de Useflet recognovit in cancellaria regis apud Sanctum Paulum Lond' se debere Ricardo Foliot c. libras solvendas infra triennium ad duos terminos cujuslibet anni, videlicet a (sic) Natale Domini et festum Sancti Johannis Baptiste ad quemlibet terminum viginti et quinque marcas. Et, nisi fecerit, concessit idem Walterus quod dicta pecunia levetur de terris et catallis suis in comitatu Ebor'.

Simon de Cotes recognovit in cancellaria regis se debere Grimbaldo Pauncefot viginti et quinque marcas undet (sic) solvet ei x. marcas in xv. Sancti Michaelis proximo ventura et quinque marcas in quindena Pasche proximo sequenti et in quindena Sancti Johannis Baptiste proximo sequenti v. marcas (fn. 1) et in xv. Sancti Michaelis proximo sequenti v. marcas. Et, nisi fecerit, concessit quod dicta pecunia levetur de terris et catallis suis in comitatu Norhamt'. Et pro pecunia predicta remisit et quietum clamavit eidem Simoni totam terram quam idem Grimbaldus habuit de dono regis in Craneford'.

Rex concessit Rogero de Lanc' custodiam terre et heredum Henrici de Croft dudum defuncti, qui de rege tenuit in capite, habendam usque ad legitimam etatem predictorum heredum pro sexaginta libris solvendis magistro Ricardo de Clifford, escaetori nostri ultra Trentam, ad opus Johannis de Britannia apud Noting', per plegium Walteri de Wigeton' et Johannis de Lithegreynes, vicelicet unam medietatem ad festum Sancti Michaelis proximo futurum et aliam medietatem ad Natale Domini proximo sequens; quam quidem pecuniam nisi predictus Rogerus solverit terminis predictis, predicti Walterus et Johannes concesserunt quod pecunia predicta de terris et catallis suis levetur. Et habet idem Walterus in comitatu Cumb' et Johannes terras in comitatu Norhumbrie.

[m. 5d.]

Nicholaus de Lodewale (sic) venit coram rege apud Sanctum Paulum Lond' die Veneris proxima post festum Translacionis Sancti Thome Martiris et petiit terram suam et Margerie uxoris ejus in Yarkhull sibi replegiari, que capta est in manum nostram propter defaltam quam iidem Nicholaus et Margeria fecerunt coram justiciariis de Banco versus Constanciam que fuit uxor Fulconis filii Warini. Et mandatum est justiciariis de Banco.