Close Rolls, January 1268

Close Rolls, January 1268

1268.

Pro Jacobo de Paunton.—Rex justiciariis ad custodiam Judeorum assignatis salutem. Cum dilectus et fidelis noster Jacobus de Paunton tempore turbacionis habite in regno nostro magnam peccunie summam a Dyaye de Holm' et Sampsone fiz le Mestre, Judeis Stanf', et Benedicto de London', Judeo Linc', mutuo cepit ad sustentacionem suam in servicio nostro et Edwardi primogeniti nostri; nos, eidem Jacobo intuitu fidelis obsequii sui nobis et dicto filio nostro laudabiliter impensi graciam facere volentes specialem, perdonavimus ei centum marcas de mutuo predicto. Et ideo vobis mandamus quod ipsum Jacobum de illis centum marcis quietum esse faciatis et Judeos predictos venire faciatis coram vobis ad aliquem certum diem citra Purificacionem Beate Marie ad computandum coram vobis cum prefato Jacobo de residuo mutui predicti una cum usuris et penis ejusdem: et audito compoto illo de pecunia que solvenda restiterit tales ei terminos habere faciatis per quos non gravetur: et sic fieri et irrotulari faciatis. Teste rege apud Guldeford' primo die Januarii.

Pro Rogero de Somery.—Rex baronibus suis de scaccario salutem. Cum dilectus et fidelis noster Rogerus de Sumery teneat de nobis hundredum de Gosecote ad feodi firmam reddendo inde nobis centum solidos ad scaccarium nostrum [ut] accepimus, ac quidam inimci (sic) nostri tempore turbacionis predicte hundredum illud occupaverint et exitus ejusdem aliquamdiu subtraxerint: nos eidem Rogero super hoc graciam specialem facere volentes, vobis mandamus quod diligenter inquiratis per quantum temporis predicti inimci (sic) nostri hundredum illud sic occupatum detinuerunt et exitus ejusdem perceperunt et eidem Rogero subtraxerunt; et, cum per inquisicionem illam vobis constiterit quantum inde ei tempore predicto per ipsos subtractum fuerit, ipsum inde, cui redditum illum nobis debitum et sic ei subtractum perdonavimus, de tempore illo quietum esse faciatis. Teste rege apud Guldeford' ij. die Januarii.

De roba liberanda.—Mandatum est Ricardo de Ewell' et Hugoni de Turri, emptoribus garderobe regis, quod habere faciant uxori Elye de Roff', marescalli equorum regis, robam suam de instanti festo Natalis Domini, sicut eam prius habere consuevit, de dono regis. Teste rege apud Westmonasterium vj. die Januarii.

De uno dolio vini dato.—Mandatum est Reginaldo de Suff', camerario regis Lond', quod de vinis regis que sunt in custodia sua faciat habere Nicholao de Kigehou unum dolium vini de recta prisa de dono regis.

De terra replegianda.—Johannes Vygrus venit coram rege die Jovis in vigilia Epiphanie Domini et petiit terram Ricardi de Heyden' in Ardinton' et Beterinton' eidem Ricardo replegiari, que capta est in manum regis propter defaltam quam idem Ricardus fecit coram justiciariis de banco versus Hawisiam que fuit uxor Willelmi filii Mabille. Et mandatum est justiciariis de banco. Teste ut supra.
Johannes Emery venit coram rege die Jovis in vigilia Epiphanie Domini et petiit terram Agathe filie Johannis Emery in Tonshamsted' eidem Agathe replegiari, que capta est in manum regis propter defaltam quam eadem Agatha fecit versus Robertum le Tayllur. Et mandatum est justiciariis de banco etc. Teste ut supra.

Pro Willelmo atte Forde.—Rex baronibus de scaccario salutem. Sciatis quod pro diutino servicio, quod Willelmus atte Forde, custos dextrariorum nostrorum, nobis impendit, dedimus et concessimus eidem Willelmo illos tres obolos diurnos quos Elena la Lavender, nuper defuncta, ad vitam suam percipere consuevit ad scaccarium nostrum, habendos et percipiendos ad totam vitam ipsius Willelmi eodem modo quo predicta Elena eos in vita sua percipere consuevit, de gracia nostra speciali. Et ideo vobis mandamus quod prefato Willelmo dictos tres obolos diurnos habere, et sic fieri et irrotulari faciatis. Teste rege apud Westmonasterium vij. die Januarii.

De itinere justiciariorum in comitatu Dors'.—Rex vicecomiti Dorset' salutem. Quia dilectus et fidelis noster R. de Middeltone nondum venire potest ad partes illas, sicut intelleximus, nec volumus quod propter hoc itineracio justiciariorum nostrorum ibidem in crastino Sancti Hillarii differatur, tibi precipimus quod publice clamari facias ex parte nostra quod omnes et singuli illuc summoniti seu attachiati per preceptum nostrum propter absenciam dicti Ricardi non omittant quin coram aliis justiciariis nostris ibidem existentibus faciant et respondeant, prout in itinere justiciariorum nostrorum facere debent et solent. Teste rege apud Westmonasterium viij. die Januarii.

Pro Ricardo Whiting.—Mandatum est Reginaldo de Suff', camerario London', quod de vinis regis que sunt in custodia sua faciat habere Ricardo Whyting unum dolium vini pro uno dolio vini nuper ab eo capto ad opus regis apud (fn. 1) King . . . . per Willelmum de Leukenor', pincernam nostrum, testificato per Johannem de la Lynd, senescallum nostrum. Teste ut supra.

De robis datis.—Mandatum est Ricardo de Ewell' et Hugoni de Turri, emptoribus garderobe regis, quod Cecilie filie Willelmi de Fortibus, existenti in custodia Petri de Chaumpnent, et Isabelle domicelle ejusdem Cecilie faciant habere robas hac vice de dono regis. Teste rege apud Westmonasterium xj. die Januarii.

De maeremio liberando ad operaciones castri de Bruges'.— Mandatum est Rogero de Clifford, justiciario foreste citra Trentam, quod habere faciat Waltero de Upton', vicecomiti Salop' et Staff', viginti quercus ad maeremium in foresta nostra de Kenefar', et in foresta de Morf' viginti quercus, et in foresta de Shirle viginti quercus similiter, ad maeremium ad quandam cameram in castro nostro de Bruges' et alias operaciones regis ejusdem castri inde faciendas. Teste rege apud Westmonasterium ut supra.

De ponendo per ballium.—Henricus de la Graunge et Willelmus le Pestur, capti et detenti in prisona regis Sancti Edmundi pro morte Thome filii Roberti unde rettati sunt, habent litteras vicecomiti Suff' quod ponantur per ballium. Teste ut supra.

Pro Jousa que fuit uxor Ricardi de Muntfichet.—Mandatum est magistro Willelmo de Cliff', escaetori regis citra Trentam, quod, facta extenta omnium terrarum et tenementorum que fuerunt Ricardi de Muntfichet nuper defuncti, qui de rege tenuit in capite, Jouse que (fn. 2) fuit uxor predicti Ricardi racionabilem dotem suam, que eam contingit de terris et tenementis secundum legem et consuetudinem regni regis, faciat assignari. Teste ut supra.

De itinere justiciariorum in comitatu Somers'.—Quia Ricardus de Middelton' nondum venire potest ad partes Somers', sicut intellexit rex, nec rex vult quod propter hoc itineracio justiciariorum regis ibidem in crastino Sancti Hillarii differatur, preceptum est vicecomiti Somers' quod publice proclamari faciat ex parte regis quod omnes et singuli illuc sumoniti seu attachiati per preceptum regis propter absenciam dicti Ricardi non omittant quin coram justiciariis nostris ibidem existentibus faciant et respondeant prout in itinere justiciariorum regis facere debent et solent. Teste ut supra.

[m. 10.]

Pro Roberto de Haunton.—Rex thesaurario et baronibus de scaccario salutem. Sciatis quod pro laudabili servicio quod dilectus et fidelis noster Robertus de Haunton nobis in turbacione habita in regno nostro impendit, remisimus eidem quinque marcas, undecim solidos et octo denarios, qui nobis a retro sunt de annuo redditu quinque solidorum quem nobis debet de quadam domo in Karliolo dudum combusta, ob quod redditus ille levari non potuit, et qui ab eo exiguntur per summonicionem scaccarii nostri. Et ideo vobis mandamus quod ipsum Robertum de predictis quinque marcis, undecim solidis et octo denariis quietum esse faciatis. Teste rege apud Westmonasterium xix. die Januarii.

De quercubus datis.—Mandatum est magistro Willelmo de Clifford, escaetori citra Trentam, quod in parco de Stansted, qui fuit Ricardi de Munfichet nuper defuncti, qui de rege tenuit in capite, et qui est in custodia sua, faciat habere Ricardo de Ewell', emptori garderobe regis, sex quercus ad maeremium ad domos suas nuper combustas tempore turbacionis habite in regno regis inde reparandas, de dono regis. Teste ut supra. Per regem.

Pro Imberto Gwy.—Rex vicecomiti Norhamt' salutem. Cum dudum per cartam nostram dederimus dilecto et fideli nostro Imberto Guy omnes terras et tenementa que fuerunt David' de Asseby inimici nostri in Esseby et Cheddeston', ac dilectus et fidelis noster Alanus la Zuch' racione cujusdam feodi et debiti, in quibus predictus David tenebatur magistro Elie filio Mossei, Judeo London', et que idem Alanus postmodum emit de predicto Judeo, seisinam terrarum et tenementorum illorum per breve nostrum a justiciariis nostris ad custodiam Judeorum assignatis tibi directum habeat pro feodo et debito predictis, cumque non sit juri consensum vel ex consuetudine Judaismi hactenus optentum quod aliqui feoffati de terris vel tenementis aliquorum per cartas suas a seisina sua pro debitis Judeorum destituantur, nisi sint principales debitores Judeorum illorum de debitis vel feodis que eis debentur: vobis mandamus quod, si ita est, tunc prefato Imberto seisinam de predictis terris et tenementis rehabere facias tenendis secundum formam donacionis nostre predicte una cum bonis et catallis in eisdem terris et tenementis tempore seisine predicto Alano inde facte inventis. Teste ut supra. Per consilium.

De ponendo per ballium.—Johannes Samps', captus et detentus in prisona nostra Wintonie pro morte Willelmi le Pypere unde apellatus est, habet litteras regis quod ponatur per ballium directas vicecomiti Suhampt'.
Mandatum est Alano la Zuch', constabulario Turris London', quod, si Danyel le Orbatur, qui captus est et detentus in prisona in Turri nostra predicta pro quibusdam transgressionibus sibi impositis tempore turbacionis habite in regno nostro, invenerit sibi duodecim probos et legitimos homines qui eum manucapiant habere coram rege ad mandatum regis ad standum recto, si rex vel alii de transgressionibus aliquibus versus eum loqui voluerint, tunc ipsum prefatis xij. tradat in ballium etc.

Pro abbate Sancti Augustini Cantuar'.—Rex baronibus suis de scaccario salutem. Sciatis quod abbas Sancti Augustini Cantuar' solvit in garderoba nostra die Lune in festo Commemoracionis Animarum anno regni nostri quinquagesimo, dilecto et fideli nostro Nicholao de Leuekenor', custodi ejusdem garderobe, sexaginta et sex libras, tresdecim solidos et quatuor denarios, per quos finem fecit nobiscum pro servicio suo quod nobis fecisse debuit in exercitu nostro anno regni nostri quinquagesimo (sic) octavo. Et ideo vobis mandamus quod predictum abbatem de predictis sexaginta et sex libris tresdecim solidis et quatuor denariis quietum esse faciatis. Teste me ipso apud Westmonasterium xxij°. die Januarii anno ut supra.

Pro Ricardo de Ewell.—Rex baronibus de scaccario salutem. Quia dudum testificatum fuit coram nobis per Albricum de Fiscampo et Petrum de Winton', tunc custodes garderobe nostre, quod Ricardus de Ewell, emptor garderobe nostre, expensas suas in servicio nostro tempore nundinarum in officio predicto factas in garderoba predicta non recepit; vobis mandamus quod eidem Ricardo in compoto suo ad scaccarium nostrum racionabiles expensas suas allocetis de toto tempore quo predicti Albricus et Petrus fuerunt custodes garderobe predicte et idem Ricardus stetit in officio supradicto. Teste ut supra.

Pro magistro et fratribus Sancti Antonini Vienensis diocesis.— Rex eisdem, et justiciariis ad custodiam Judeorum assignatis, salutem. Quia pro omnibus arreragiis viginti marcarum annuarum quas magistro et fratribus hospitalis Sancti Antonini Vienensis diocesis dudum concessimus percipiendas ad scaccarium nostrum de elemosina nostra ad sustentacionem pauperum degentium in eodem hospitali et que nobis remiserunt, jam concessimus eisdem magistro et fratribus ducentas marcas, de quibus eis assignavimus centum marcas de clarioribus debitis Judaismi nostri in thesauro nostro ad scaccarium predictum existentibus: vobis mandamus quod dictas centum marcas de debitis predictis sine dilacione levari et eisdem magistro et fratribus habere faciatis in partem solucionis predictarum ducentarum marcarum in quibus eis tenemur de arreragiis supradictis. Teste ut supra.

De ponendo per ballium.—Robertus de Garinges, Johannes Cok', Agnes Cok' et Johannes le Burser, capti et detenti in prisona regis Walingeford' pro morte Cecilie de la Wodelond' unde rettati sunt, habent litteras regis directas vicecomiti Oxon' quod ponantur per ballium.

Pro Hugone de Clohal'.—Mandatum est Alano la Zuch', constabulario Turris London', quod Hugonem de Clohal', captum et detentum in prisona regis in Turri predicta pro suspicione quarundam transgressionum sibi impositarum, sine dilacione et difficultate aliqua deliberari faciatis et quo voluerit abire permittatis. Teste rege apud Westmonasterium xxiij. die Januarii. Per consilium. Et Johannes de la Lind illud precepit.

Pro Dionysia de Monte Canis'.—Rex dilectis et fidelibus suis Gilberto de Preston et sociis suis justiciariis itinerantibus ad communia placita in comitatu Ebor' salutem. Cum dilecta nobis in Christo Dionysia de Monte Canis' it a inpotens sui existat quod coram vobis accedere non potest ad prosecucionem seu defensionem loquelarum et placitorum ipsam contingentium in itinere predicto, nos, indempnitati sue in hac parte prospicere volentes, vobis mandamus quod Adam le Fleming' et Johannem de Redeswell, quos eadem Dionysia coram vobis attornavit loco suo ad lucrandum vel perdendum in omnibus placitis et loquelis pro ipsa vel contra ipsam motis vel movendis coram vobis in itinere vestro in comitatu predicto, vel alterum ipsorum, si ambo interesse non possint, loco ipsius Dionysie ad hoc recipiatis. Teste me etc.

Pro Roberto de Nevill'.—Rex vicecomiti Linc' salutem, Precipimus tibi quod de finibus et amerciamentis faciendis coram dilecto et fideli nostro Roberto de Nevill' et sociis suis justiciariis ad placita de terris datis occasione turbacionis habite in regno nostro audienda assignatis in comitatu tuo, quorum extractas prefati justiciarii tibi per preceptum nostrum liberabunt, quinquaginta libras sine dilacione levari et eas prefato Roberto, uni de justiciariis predictis ad premissa facienda assignato, habere facias ad expensas suas. Et hoc non omittas. Et nos dictas quinquaginta libras tibi faciemus allocari. Teste me ipso apud Westmonasterium xxvij. die Januarii anno regno nostro lij°.

Pro magistro Godefrido Giffard'.—Rex vicecomiti Ebor' salutem. Cum assignaverimus dilecto clerico nostro magistro Godefrido Giffard omnes fines nobiscum factos pro brevibus habendis et omnia alia que continentur in extractis que vobis veniunt in summonicione scaccarii nostri in partem solucionis feodi sui quingentarum marcarum quod percepit ad scaccarium nostrum per annum ad sustentacionem suam et clericorum cancellarie nostre: tibi precipimus quod fines illas a debitoribus eorundem sine dilacione levari et denarios de eisdem provenientes sub omni festinacione qua fieri poterit mittatis ad scaccarium nostrum liberandos ibidem Simoni de Insula, clerico ejusdem scaccarii, ad opus prefati cancellarii nostri, prout dilectus clericus noster Hugo de Kendal, quem ad te pro eodem negocio specialiter destinamus, tibi dicet ex parte nostra: et, cum sciverimus quantum ibidem liberaveris, nos tibi plenam inde acquietanciam habere faciemus. Et hoc sicut te ipsum et omnia que in regno nostro tenes diligis nullatenus omittatis. (fn. 3) Teste ut supra.
Consimiles littere diriguntur vic ecomitibus.

Pro Nicholao capellano ministrante in capella Sancti Jodoci in castro Wintonie.—Mandatum est vicecomiti Suhampt' quod de exitibus comitatus sui habere faciat Nicholao capellano mini stranti in capella Sancti Jodoci in castro nostro Wintonie, qui capit per annum quadraginta solidos pro stipendiis suis, arreragia stipendiorum suorum de tempore quo fuit in servicio nostroibidem, et sic deinceps singulis annis quadraginta solidos pro stipendiis suis quamdiu fueris vicecomes noster ibidem et predictus capellanus divina celebraverit in capella predicta. Et nos ea in exitibus predictis tibi faciemus allocari. Teste ut supra.

Pro Ada de Monte Gomery.—Rex perdonavit Ade de Monte Gomeri quatuor marcas, ad quas amerciatus fuit coram rege apud Salop' pro disseisina, quando rex ultimo fuit ibidem. Et mandatum est baronibus de scaccario quod predictum Adam de predictis quatuor marcis quietum esse faciant. Teste ut supra.

Pro Vives filio magistri Mossei Judeo London'.—Rex thesaurario et baronibus suis de scaccario et justiciariis suis ad custodiam Judeorum assignatis salutem. Cum nuper perdonaverimus dilecto et fideli nostro Stephano de Penecestr' quadraginta libras, in quibus tenebatur Vives filio magistri Mossei, Judeo nostro London', per cartam suam, et eciam perdonaverimus dilecto et fideli nostro Radulfo de Ginges quadraginta marcas in quibus prefatus Radulfus eidem Judeo tenebatur per cartam suam, de quibus eidem Judeo recompensacionem facere tenemur, nos, indempnitati prefati Judei in hac parte prospicere volentes, concessimus ei centum marcas de debitis Judeorum nostrorum in thesauro nostro existentium ad scaccarium predictum. Et ideo vobis mandamus quod eidem Judeo predictas centum marcas secundum legem et consuetudinem Judaismi nostri habere et sic fieri et irrotulari faciatis. Teste ut supra.

De ponendo per ballium.—Robertus Renyn, captus et detentus in prisona regis Wygorn' pro morte Roberti le Paumer unde rettatus est, habet litteras regis directas vicecomiti Wigorn' quod ponatur per ballium, etc.

Pro Reginaldo de Evermue.—Rex justiciariis suis ad custodiam Judeorum assignatis salutem. Sciatis quod pro laudabili servicio quod dilectus et fidelis noster Reginaldus de Evermuwe nobis impendit perdonavimus eidem Reginaldo quoddam debitum quindecim librarum in quo tenetur Gamalieli Oxon', Judeo London', per cartam suam, una cum usuris et penis in quibus eidem Judeo similiter tenetur occasione ejusdem debiti: quas quidem quindecim libras eidem Reginaldo mutuavit occasione servicii nostri ante bellum Lewense a Judeo supradicto. Et ideo vobis mandamus quod cartam predictam ab archa cirographorum Judeorum nostrorum extrahi et eidem Reginaldo liberari, et ipsum de debitis, penis et usuris predictis quietum esse, et sic fieri et irrotulari faciatis. Teste ut supra.

Pro Nicholao de Yatingeden'.—Rex vicecomiti Linc' salutem. Precipimus tibi quod de finibus et amerciamentis factis coram dilecto et fideli nostro Roberto de Nevile et sociis suis, justiciariis nostris in comitatu predicto assignatis, de quibus iidem justiciarii extractas tibi per preceptum nostrum liberarunt, quadraginta libras sine dilacione levari et eas dilecto et fideli nostro Nicholao de Yatingeden', uni justiciariorum predictorum, habere facias ad expensas suas in servicio nostro predicto: et nos eas tibi faciemus allocari. Teste ut supra.

De roba data.—Mandatum est Ricardo de Ewell' et Hugoni de Turri, emptoribus garderobe regis, quod habere faciant Willelmo de Pecco, servienti regis ad arma, unam robam hac vice de dono regis. Teste ut supra.

Pro abbatissa de Cadamo.—Rex vicecomiti Essex salutem. Quia pro certo intelleximus quod abbacia monialium de Cadamo de elemosinis predecessorum nostrorum regum Anglie fundata existit, et quod eodem moniales non tenent de nobis per baroniam, per quod marescallus palefridum aliquem ab abbatissa domus illius racione nove creacionis sue habere non debet, tibi precipimus quod districtionem quam abbatisse de Cadamo facis pro palefrido predicto penitus relaxes eidem: ita quod non oporteat nos super hoc amplius sollicitari. Teste ut supra.