Close Rolls, June 1265

Close Rolls, June 1265

Rex dilecto et fideli suo Rogero le Bygod', comiti Norff et marescallo Anglie, salutem. Cum de assensu et consilio Gilberti de Clar', comitis Glouc' et Hereford', quedam provisiones et ordinaciones super reformacione status regni nostri, nostro et Edwardi filii nostri interveniente consensu, acte fuerunt, ac nostro et ejusdem filii nostri necnon et prefati comitis et aliorum fidelium nostrorum juramento firmatum (sic) sicut nostis, idem comes, proprie salutis immemor et tanquam sacramenti ab ipso prestiti prevaricator, provisionibus et constitucionibus antedictis manifeste contraveniens, quosdam marchiones et alios rebelles nostros, complices suos, sibi jam in familiaritatem adjunxit, et, quod non sine cordis anxietate referimus, Edwardo filio nostro, quem ad credendum levem et ad circumveniendum facilem invenit, ad partem suam persuasionibus dolosis attraxit, nitens per suum et aliorum rebellium nostrorum predictorum auxilium constituciones et provisiones predictas, quod absit, penitus anullare, et pacem nostram, que post turbacionem nuper habitam in regno nostro mediante gracia divina provisa extitit et jam ubique fere firmata, de novo perturbare, pervento si quid hoc rumore ad partes vestras Norff' et Suff', quidam partium earundem dediti maligno spiritui turbacionem potius quam pacem desiderantes, quasdam inter se confederaciones jam facere et guerram suscitare molliuntur. Et quia veraciter scimus vos in partibus predictis talem et tantam habere potestatem quod hujusmodi rebellium insollenciam potenter reprimere valetis, si volueritis; vobis mandamus in fide et homagio quibus nobis tenemini firmiter injungentes quod, sicut tranquillitatem et pacem regni nostri diligitis, prefatos conspiratores a sua presumpcione temeraria sine mora penitus desistere et pacem nostram in partibus antedictis inviolabiliter observari faciatis; taliter vos habentes in premissis quod pacis nostre zelatores et turbatorum ejusdem expugnatores esse per evidenciam facti vos manifestare possitis. Teste rege apud Hereford vij. die Junii.

Rex ballivis et probis hominibus de Gernemuth' salutem. Cum vos res et mercandisas Godefridi de Dexemuth', mercatoris comitisse Flandrie, occasione cujusdam transgressionis quam Walterus Loddre, vallettus ipsius Godefridi, custos earundem rerum et mercandisarum, fecit in villa vestra predicta, arrestaveritis, ut accepimus; vobis mandamus quod res illas et mercandisas salvo custodiri faciatis, donec aliud inde preceperimus, non permittentes interim aliquam inde fieri distractionem. Teste rege apud Hereford' xvij. die Junii.

Rex ballivis et probis hominibus de Lenn' salutem. Mandamus vobis quod omnes res et mercandisas mercatorum comitisse Flandrie, quas occasione turbacionis nuper habite in regno nostro per preceptum nostrum in villa vestra predicta arrestari fecistis, salvo custodiri faciatis, donec aliud inde preceperimus, non permittentes aliquam inde fieri distractionem; vallettos autem dictorum mercatorum, custodes rerum et mercandisarum predictarum in villa vestra predicta, salvo et pacifice morari permittatis, non inferentes eis vel inferri permittentes molestiam aut gravamen. Teste ut supra.
Eodem modo mandatum est ballivis et probis hominibus Bristoll', Suthamt' et Sancti Botulfi pro mercatoribus predictis.

Sciant presentes et futuri quod nos frater Henricus, abbas de Dore, et ejusdem loci conventus reddidimus et quietem clamavimus pro nobis et successoribus nostris domino Henrico regi Anglie illustri et heredibus suis illa septem mesuagia cum pertinenciis que de eodem domino rege tenuimus in vico qui dicitur Kingestrete in suburbio Hereford', habenda et tenenda sibi et heredibus suis inperpetuum. Pro hac autem reddicione et quieta clamacione dedit nobis prefatus dominus rex decem marcas et decem solidos pre manibus. In cujus rei testimonium presenti carte sigillum capituli nostri apposuimus. Hiis testibus, Hugone le Despenser tunc justiciario Anglie, Petro de Monte Forti, Johanne filio Johannis, Egidio de Argentenn', Waltero de Crepp', Radulpho de Sandwic', Stephano Soudan, Bartholomeo le Bygod' et aliis.
Et memorandum quod xix. die Junii liberata fuerit carta illa in garderoba Radulfo de Sandwic', custodi ejusdem garderobe, custodienda.