Close Rolls, March 1265

Close Rolls, March 1265

De damis datis.—Mandatum est Johanni de Eyvill', justiciario foreste ultra Trentam, quod in foresta de Sirewod' faciat habere Ricardo de Monte Forti, filio Simonis de Monte Forti comitis Leyc', decem damas et quinque damos vivos ad quendam parcum suum inde instaurandum de dono regis. Teste rege apud Westmonasterium secundo die Marcii. Per regem.

De roboribus datis.—Mandatum est constabulario castri de Wyndes' quod in foresta regis de Wyndes' faciat habere Fratribus Minoribus Lond' tria robora folia non ferentia ad focum suum de dono regis. Teste ut supra.
Mandatum est Ricardo de Munfichet, senescallo foreste Essex', quod in eadem foresta faciat habere eisdem fratribus tria robora folia non ferentia de dono regis. Teste ut supra. Per ipsum regem et Egidium de Argentenn'.

De diver sis mercimoniis ad opus regis capiendis.—Rex Simoni de Monte Forti juniori, constabulario castri sui de Porcestr', salutem. Quia vinis, pannis, cera et speciaria multum indigemus, ac hujusmodi mercimonia nuper usque villas de Portesmue et Suthampt' venerint ut accepimus, vobis mandamus quod mercimonia illa sine dilacione arrestari et salvo custodiri faciatis, donec inde capi fecerimus ad opus nostrum quantum necesse habuerimus. Teste ut supra. Per consilium.

De hominibus Rogeri de Mortuo Mari captis deliberandis.— Rex vicecomiti Hereford', salutem. Cum Rogerus de Mortuo Mari nuper ad pacem nostram venerit et propter hoc hominibus suis in guerra in regno nostro nuper mota secum existentibus graciam facere velimus, tibi precipimus quod omnes homines predictos, quos pro eo quod in guerra predicta cum ipso fuerunt capi vel attachiari fecisti, sine dilacione deliberari facias, nec ipsos decetero ob causam predictam occasionari facias, nisi ipsos pro aliquo delicto ante guerram vel post guerram predictam seu pacem nostram proclamatam ab eisdem commisso ceperis vel attachiari feceris, pro quo secundum consuetudinem regni nostri deliberari non debeant. Teste rege apud Westmonasterium iij. die Marcii. Eodem modo mandatum est vicecomiti Salop' pro hominibus ejusdem Rogeri. Per regem et consilium.

De allece cariando ad opus regis.—Preceptum est vicecomiti Norff' et Suff' quod de quinque lestis allecis quas rex nuper per ipsum emi precepit ad opus regis in balliva sua tres lestas ad regem usque Westmonasterium sub omni festinacione mitti faciat. Et rex custum quod ad hoc posuerit, cum illud sciverit. sibi faciet allocari. Residuas autem duas lestas salvo custodiri faciat donec rex aliud inde preceperit. Teste rege ut supra, Per regem et consilium.

De quercubus datis.—Mandatum est custodi foreste de Shirle quod in eadem foresta regis faciat habere ballivis et probis hominibus regis de Bruges sex quercus ad pontem ejusdem ville nuper confractum occasione turbacionis habite in partibus illis inde reparandum, de dono regis. Teste ut supra. Per regem.

Pro Ada de Tybetot.—Rex Nicholao de Hasting', custodi terrarum Roberti de Ferar' comitis Derb', salutem. Monstravit nobis Ada de Tibetot graviter conquerendo quod prefatus comes nuper occasione turbacionis habite in regno nostro manerium predicte Ade de Thorp' cum suis pertinenciis in comitatu Leyc' occupavit et sibi detinuit ad ejus grave dampnum et jacturam manifestam; quod quidem manerium una cum aliis terris prefati comitis nunc est in manu nostra, ut dicitur. Quia vero nostre numquam extitit intencionis aut baronum nostrorum quod alique mulieres et precipue vidue dampnum aliquod vel jacturam incurrere deberent occasione turbacionis predicte, nisi ille que turbacionis illius participes extiterint, vobis de consilio baronum predictorum mandamus quod inquisita super hoc plenius veritate, si prefatam viduam de manerio suo predicto per eundem comitem ejectam inveneritis ut predictum est, et si ipsa de predicta turbacione in nulla culpabilis extiterit, tunc eidem vidue de eodem manerio cum suis pertinenciis seisinam suam rehabere faciatis. Teste rege apud Westmonasterium iij. die Marcii. Per justiciarium, P. de Monte Forti, R. de Sancto Johanne et Adam de Novo Mercato.

De vino et frumento salvo custodiendis ad opus regis.—Cum rex nuper mandaverit vicecomiti Norff' et Suff' quod de decem doliis vini et de xl. quarteriis frumenti regi faceret provideri contra adventum regis in partes illas, ac rex partes illas ad presens adire nequeat, preceptum est vicecomiti quod, si predicta vina et bladum emerit juxta predictum mandatum regis, tunc ea salvo custodiri faciat donec rex aliud inde preceperit. Et, si predicta vina et bladum empta non sint, rex non vult aliquam inde providenciam regi fieri hac vice. Teste ut supra. Per ipsum regem, justiciarium et Adam de Novo Mercato.

[m. 8.]

Pro Beatrice de Turbervill'.—Rex justiciariis suis ad custodiam Judeorum assignatis, salutem. Cum Beatrix de Turbevill' diversis Judeis in pluribus debitis teneatur, ad quorum solucionem terre et tenementa sua non suffciunt ut accepimus, nos paupertati ipsius Beatricis compacientes, vobis mandamus quod facta extenta terrarum et tenementorum predictorum, videlicet quantum valeant per annum in dominicis, serviciis, redditibus, villenagiis et omnibus aliis exitibus terre, eidem Beatrici raciona biles terminos secundum extentam illam et consuetudinem Judaismi nostri, salvo contenemento suo, inde habere faciatis. Teste rege apud Westmonasterium iij. die Marcii. Per justiciarium.

Pro Alienora consorti Edwardi primogeniti regis.—Rex Nicholao de Hasting', custodi suo terrarum Roberti de Ferar' comitis Derb', salutem. Cum Edwardus filius noster karissimus dudum ante turbacionem habitam in regno nostro manerium suum de Askeford' in Pecco cum pertinenciis Alienore consorti sue ad cameram suam assignaverit, quod quidem manerium prefatus comes occasione turbacionis predicte nuper occupavit, ac nostre numquam extitit intencionis vel baronum nostrorum quod mulieres, que participes non extiterint predicte turbacionis, dampnum vel jacturam aliquam debeant incurrere, cumque predicta Alienora in nullo culpabilis sit de turbacione predicta, vobis de consilio predictorum baronum mandamus quod eidem Alienore de manerio predicto, quod una cum predictis terris prefati comitis nunc est in manu nostra ut dicitur, seisinam suam rehabere faciatis. Teste rege apud Westmonasterium v. die Marcii. Per consilium.

De vinis capiendis ad opus regis.—Quia rex intellexit quod vina jam de novo applicuerunt in portu de Portesm', mandatum est Johanni de Swineford', captori vinorum regis per Angliam, quod preter vina que per se pridie rex emi precepit ibidem ad opus regis lx. dolia vini similiter capiat ad opus regis. Et hoc nullatinus omittat. Teste ut supra. Per W. de Crepping' senescallum.

De quercubus datis.—Mandatum est Nicholao de Segrave, custodi foreste inter pontes Oxonie et Stanford', quod in foresta regis de Roteland' faciat habere Willelmo le Blund' quinque quercus ad maeremium de dono regis. Teste rege apud Westmonasterium v. die Marcii. Per ipsum regem.

De roba data.—Mandatum est Hugoni de Turri et Roberti de Linton', emptoribus garderobe regis, quod faciant habere Johanni de Besevill', quondam marescallo hospicii regis, unam robam sicut uni de marescallis regis de dono regis. Teste ut supra. Per regem et Adam de Novo Mercato.

Pro Simone de Ardern'.—Rex justiciariis suis proximo iteneraturis (sic) ad placita foreste in comite Norhampt', salutem. Sciatis quod ad instanciam dilecti et fidelis nostri Radulfi de Cameys perdonavimus Simoni de Arderne transgressionem per ipsum factum in parco nostro Norhampt' nuper in societate Roberti de Ferr' comitis Derb' de venacione nostra et fractura ejusdem parci. Et ideo vobis mandamus quod predictum Simonem inde quietum esse faciatis. Teste rege apud Westmonasterium vij. die Marcii. Per regem et justiciarium.

De quercubus datis.—Mandatum est custodi foreste de Dene quod in eadem foresta faciat habere priori de Lantonay decem quercus aptas ad maeremium de dono regis. Teste ut supra. Per regem et P. de Monte Forti.

Pro Alina que fuit uxor Willelmi de Albiniaco.—Rex Willelmo de Wenling', escaetori suo citra Trentam, salutem. Mandamus vobis quod, facta extenta terrarum et tenementorum Willelmi de Albiniaco dudum defuncti qui de nobis tenuit de capite, Aline que fuit uxor Willelmi predicti racionabilem dotem suam que eam contingit de terris et tenementis predictis secundum legem et consuetudinem regni nostri assignari faciatis. Teste ut supra. Per justiciarium.

Pro Roberto de Grendon'.—Rex justiciariis suis ad custodiam Judeorum assignatis, salutem. Volentes pro laudabili servicio quod dilectus et fidelis noster Robertus de Grendon', qui diversis Judeis nostris in pluribus debitis tenetur, nobis impendit, et pro eo quod officium vicecomitis in comitatibus Salop' et Stafford' in se ad presens assumpsit, ei graciam facere specialem, vobis mandamus quod omnes terras et tenementa prefati Roberti per sacramentum proborum et legalium hominum per quos rei veritas melius sciri poterit extendatis, quantum videlicet valeant per annum in dominicis, serviciis, redditibus, villenagiis, et omnibus exitibus terre; et facta extenta terrarum et tenementorum predictorum eidem Roberto racionabiles terminos ad quos debita predicta, salvo contenemento suo racionabili, reddere possit secundum extentam illam et consuetudinem Judaismi nostri inde habere faciatis. Teste ut supra. Per totum consilium.

Pro fratre Ricardo de Gynges.—Rex majori et vicecomitibus Lond' salutem. Cum frater Ricardus de Gynges, capellanus in heremitorio nostro juxta Crepelgate, de licencia nostra solitarie vivere et Domino ibidem famulari, et in eodem recludi suo perpetuo specialiter desideret, ac ipse ut ei graciam super hoc faceremus nobis humiliter supplicaverit et devote, nos propter laudabile testimonium bone vite et honeste conversacionis quod fidedigni perhibent de eodem peticioni sue in hac parte honestatem continenti favorabiliter duximus annuendum. Et ideo vobis mandamus quod ipsum Ricardum in corporalem possessionem heremitorii predicti inducatis et inductum defendatis et protegatis. Teste ut supra. Per ipsum regem.

Pro Willelmo de Ebroicis.—Rex Rogero de Mortuo Mari salutem. Cum Adam le Despenser nuper captus in conflictu habito apud Norhampt' postmodum tanquam priso vester versus vos se redemerit et Willelmum de Ebroicis plegium suum redempcionis illius erga vos constituerit, qui quasdam terras suas vobis ob hoc in pignus obligavit, cumque nuper in adventu vestro ad nos apud Wigorn' de consilio nostro et assensu vestro provisum fuerit quod omnes prisones vestri qui capti fuerunt in conflictu predicto quiete et absque aliqua redempcione liberarentur, vobis mandamus quod omnes terras prefati Willelmi quas in pignus tenetis pro redempcione predicta eidem Willelmo sine difficultate aliqua restituatis. Teste rege apud Westmonasterium vj. die Marcii. Per P. de Monte Forti.

De quercubus ad operaciones castri Wintonie.—Rex Simoni de Monte Forti juniori, constabulario castri sui de Porcestr', salutem. Cum nuper mandaverimus subconstabulario castri predicti quod in foresta nostra de Porcestr' habere faceret visoribus operacionum nostrarum castri nostri Wyntonie viginti quercus, ac ipse id facere hucusque distulerit ut accepimus, vobis mandamus quod, si ita est, tunc predictis visoribus de predictis viginti quercubus habere faciatis decem quercus in foresta predicta ad operaciones nostras predictas inde faciendas. Teste rege apud Westmonasterium ix. die Marcii. Per regem.
Mandatum est custodi foreste de la Bere quod in eadem foresta faciat habere visoribus operacionum castri Wyntonie decem quercus ad easdem operaciones inde faciendas. Teste ut supra.
Mandatum est custodi foreste de Chete quod in eadem foresta faciat habere predictis visoribus decem quercus ad predictas operaciones inde faciendas. Teste ut supra.

De homagio capto.—Quia rex accepit per inquisicionem, quam per Johannem de Plessetis de Henrico de la Val fieri fecit, quod Rogerus Bertramy de Bothal' dudum defunctus (qui cancelled) de rege tenuit in capite per baroniam et quod Robertus Bertrami filius predicti Rogeri, qui fuit in custodia regis, est propinquior heres ejusdem Rogeri et plene etatis, cepit homagium prefati Roberti de omnibus terris et tenementis que prefatus Rogerus pater suns tenuit de rege in capite et ei reddidit terras illas et tenementa. Et mandatum est vicecomiti Norhumbr' quod eidem Roberto de omnibus terris et tenementis predictis et de quibus prefatus Rogerus pater suus fuit seisitus in dominico suo ut de feodo die quo obiit et que occasione mortis sue capta sunt in manum regis plenam seisinam sine dilacione habere faciat. Teste rege apud Westmonasterium x. die Marcii. Per regem et justiciarium.

De roboribus datis.—Mandatum est custodi foreste de Shottor' quod in eadem foresta faciat habere Willelmo filio Willelmi de Albiniaco duo robora ad focum suum de dono regis. Teste rege apud Westmonasterium xiij. die Marcii.

De respectu habendo.—Mandatum est vicecomiti Buk' quod demandam quam facit Alicie de Bello Campo de centum solidis per summonicionem Scaccarii ponat in respectum usque ad quindenam Pasche proximo futuram. Teste ut supra.

Pro fratre Willelmo de Croc.—Mandatum est Henrico de Monte Forti, constabulario castri Dovor', quod permittat fratrem Willelmum de Corc una cum tribus garcionibus suis, quem prior hospitalis Sancti Johannis Jerusalem in Anglia mittit ad terram Sanctam pro negociis suis, per portum Dovor' libere transfretare et quod eisdem festinum passagium faciat habere. Teste rege apud Westmonasterium xiiij. die Marcii. Per consilium.

Pro Edwardo filio regis.—Mandatum est custodibus vinorum regis Norhampt' quod de melioribus vinis regis que sunt in custodia sua faciat Edward primogenito regis decem dolia vini de dono regis. Teste rege ut supra.

De passagio duorum monachorum de Evesham per portum Dovorr'.—Mandatum est Henrico de Monte Forti, constabulario castri Dovor', quod permittat duos monachos de domo de Hevesham cum tribus garcionibus suis per portum Dovor' libere transfretare et quod eisdem festinum passagium faciat habere. Teste ut supra. Per consilium.

Pro Petro nuncio archidiaconi Hunt' et aliis. De passagio.— Similiter mandatum est eidem de Petro nuncio archidiaconi Hunting', Simone de Lindes', clerico, Hugone de Gebenn' et Willelmo de Agnefeld', clerico archiepiscopi Cantuariensis, quod eos per portum Dovor' libere transfretare permittat et eis festinum passagium habere faciat. Teste rege ut supra. Per consilium.

De vinis ad municionem castri Northampt'.—Mandatum est custodibus vinorum regis apud Norhampt' quod quinque dolia vini, de illis viginti doliis vini que vicecomes Cantebr' eis per preceptum regis liberavit, faciant habere constabulario castri Norhamt' ad municionem ejusdem castri; ita quod de illis quinque doliis vini regi respondeat ad mandatum regis. Teste rege apud Westmonasterium xv. die Marcii.

De quercubus datis.—Mandatum est custodi bosci regis de Poysell' quod in predicto bosco regis faciat Johanni de la Haye decem quercus de dono regis. Teste rege apud Westmonasterium xv. die Marcii. Per regem.

De picheriis ad opus regis emendis.—Preceptum est ballivis de Kingeston' quod provideant regi de d. picheriis contra instans festum Pasche, et eos ad regem usque Westmonasterium cariari faciant, ita quod sint ibidem per duos dies ante festum predictum liberandi pincernis regis. Et hoc nullatinus omittat. Et, cum rex sciverit custum quod ad hoc posuerint, illud sibi reddi vel in firma ville sue predicte faciet allocari. Teste rege apud Westmonasterium xv. die Marcii. Per senescallum.

Pro Gars' Ern' mercatore.—Mandatum est constabulario castri Dovorr' vel subconstabulario suo ibidem quod, accepto sacramento consueto a Gars' Ern' mercatore Burdegale, ipsum per portum regis Dovorr' ad partes suas libere transfretare permittat. Teste ut supra. Per consilium.

De officio Judaismi tenendo in suspenso.—Ad instanciam Edwardi filii regis cui rex Judaismum suum dudum commisit, mandatum est justiciariis ad custodiam Judeorum assignatis quod in nullo quod ad officium suum in Scaccario Judeorum pertinet decetero se intromittant (fn. 1) donec rex aliud inde preceperit. Teste ut supra. Per totum consilium.

De Rogero de Shirland' veniendo ad regem.—Mandatum est Rogero de Shirlaund' in fide et dilectione quibus regi tenetur firmiter injungendo quod modis omnibus sine omni dilacione veniat ad regem, ita quod sit ad regem die Lune proxima ante instantem Dominicam Palmarum ad ultimum ubicunque tunc rex fuerit in Anglia cum rege locuturus. Et hoc nullo modo omittat. Teste rege apud Westmonasterium xvj. die Marcii.

De Guncelino de Badlimer' et aliis veniendis ad regem.—Eodem modo mandatum est Guncelino de Badilmer', Simoni de Creye et quibusdam aliis.

De responso J. de Brittann' facto.—Rex J. primogenito ducis Brittann', salutem. Auditis et plenius intellectis hiis que nuncii vestri, nuper cum litteris vestris de credencia ad presenciam nostram destinati, ex parte vestra proponere voluerunt coram nobis, super eisdem cum magnatibus terre nostre deliberatum consilium et tractatum habuimus diligentem. Porro in hoc nostra resedit deliberacio, ut nos, qui promissa nostra seu convenciones vobiscum habitas irritas facere non intendimus, non solum in hiis que juris vestri sunt vestra cum affectu exaudiamus desideria, set et ultro, cum facultas se optulerit, eciam de proprio graciam vobis facere debeamus specialem, ad que per filie nostre copulam affinitas dudum inter nos contracta necnon et vestre merita probitatis specialiter nos inducunt. In quo eciam affectionis nostre proposito predictos terre nostre magnates nobiscum consencientes invenimus et concordes, dum tamen regni nostri fidelem vos exhibere et ad ejusdem defensionem cum magnatibus nostris predictis manum viriliter extendere volueritis adjutricem, sicut predicti nuncii vestri vobis plenius referre poterunt viva voce. Ad quod negocium consummandum simul et roborandum vestram, prout citius hoc commode facere poteritis, desideramus presenciam nostras de securo conductu vobis literas transmittentes. Quod si quominus personaliter hoc facere possitis, quod nollemus, casu aliquo fueritis impediti, tales et tam sufficienter instructos loco vestri procuratores transmittatis, qui in omnibus que negocium requirit eandam quam si ibi presentes essetis a vobis habeant potestatem. Teste rege apud Westmonasterium xxvij. die Marcii. Per regem et totum consilium.
Idem Johannes habet literas de conductu prout patet in rotulo patentium sub eadem data.

Pro executoribus Rogeri de Quency.—Rex abbati de Leyc' salutem. Cum Rogerus de Quency quondam comes Winton' dudum ante mortem suam quasdam quietancias, tallias et alia instrumenta obligatoria in quadam cista sub sigillo suo in domo vestra predicta deposuerit salvo custodienda, ac sine eis execucio testamenti ipsius defuncti ad liberacionem anime sue et exoneracionem heredum suorum per executores suos ejusdem testamenti, prout eis incumbit, perfici non possit ut accepimus, vobis mandamus quod ad certum diem quem Radulfus Basset de Sapercote et Ricardus de Harmston' vobis scire facient una cum eis ad dictam cistam personaliter accedatis et, extractis et scrutatis talliis et aliis in eadem cista existentibus, ea que ad execucionem testamenti predicti et exoneracionem heredum predictorum necessaria inveneritis predictis executoribus liberetis. Alia vero, que ad eandem execucionem necessaria non fuerint, sub sigillo vestro et sigillis dictorum Radulfi et Ricardi ad opus dictorum heredum salvo custodiatis ibidem donec aliter inde fuerit ordinatum. Mandavimus enim eisdem Radulfo et Ricardo quod vobiscum assistant sicut predictum est. Teste ut supra. Per consilium.

[m. 7.]

De castro de Bamburg' regi reddendo.—Rex (fn. 2) de Clare comiti Glouc' et Hertford', salutem. Cum vos et Robertus de Nevill', cui castrum nostrum de Bamburg' cum pertinenciis dudum commisimus, in presencia nostra constituti promiseritis nobis bona fide reddere nobis castrum predictum ad mandatum nostrum, et predicto castro ad presens indigeamus, vobis mandamus in fide et dilectione quibus nobis tenemini firmiter injungentes quod statim visis litteris istis omnibus negociis pretermissis aliquem a latere vestro qui plenam habeat potestatem vice vestra et prefati Roberti reddere nobis castrum supradictum ad nos mittatis. Et hoc, sicut nos et honorem nostrum et vestrum diligitis, nullo modo omittatis, ita quod non oporteat nos super hoc amplius sollicitari et nos in hac parte invanum laborare. Teste rege apud Westmonasterium xix. die Marcii. Per comitem Leic' et ceteros de consilio.

Pro Thoma de Carl' et aliis in brevi.—Rex ballivis suis de Gernemuth', salutem. Monstraverunt nobis Thomas de Karl', Johannes le Flemmeng', Ricardus de la Haye et Thomas Thorald', burgenses nostri de Novo Castro super Tynam, quod, cum ipsi nuper apud Novum Castrum carcassent quendam navem quibusdam mercandisis suis ducendis ad partes transmarinas, et dicta navis cum mercandisis predictis applicuisset in portu vestro, vos dictam navem cum eisdem mercandisis, pro eo quod quidam homines de Flandr' inventi fuerunt in eadem, arrestastis et ipsam sic arrestatam adhuc detinetis ad grave dampnum ipsorum Thome, Johannis, Ricardi et Thome ut dicunt. Et ideo vobis mandamus quod, si ita est, tunc accepta a predictis Thoma, Johanne, Ricardo et Thoma sufficienti securitate quod cum predictis mercandisis ad partes transmarinas se non divertent sed commodum suum in regno nostro inde facient ipsas mercandisas eis deliberari faciatis ad faciendum inde commodum suum in regno nostro sicut predictum est. Teste rege apud Westmonasterium xviij. die Marcii. Per justiciarium, P. de Monte Forti et Adam de Novo Mercato.

Pro Petro Johannis de Saubanak' mercatore de Baionia.— Rex baronibus et ballivis suis de Wincbeles' salutem. Cum aliegene nobis et regno nostro adversantes pluries rogaverint Paschasium de Pynu et Pelerinum de la Poynte, magistros nautarum et navium Baiocensium in partibus Flandr' anno preterito existentium, et ceteros fideles nostros de Wasconia ut eis ad impugnandum regnum nostrum cum navigio suo auxilium facerent, per quod eisdem magistris nautarum et navium predictarum mandavimus per litteras nostras patentes in fide et ligancia quibus nobis tenentur et sub periculo corporum suorum necnon amissione omnium que in districtu vel dominio nostro obtinent quod nullos cum equis et armis vel alios, per quos nobis vel regno nostro possit dampnum vel periculum imminere, in regnum nostrum ducere presumerent sine licencia et mandato nostro speciali, ac Petrus Johannis de Saubanak' de Baiona audito mandato nostro predicto a partibus Flandr' cum navi sua recesserit ut pro certo intelleximus, per quod ipsum ad pacem nostram suscepimus; vobis de consilio magnatum qui sunt de consilio nostro mandamus firmiter injungentes quod navem suam una cum bonis, mercandisis et armis suis in eadem navi existentibus, que nuper in portu vestro arestastis, eidem Petro sine dilacione restitui faciatis, non permittentes ipsum navem suam ad partes transmarinas vel alibi extra portum ducere donec aliud inde preceperimus. Teste rege apud Westmonasterium xviij. die Marcii. Per justiciarium, P. de Monte Forti et Adam de Novo Mercato.

De passagio Rogeri de Mortuo Mari in Hiberniam.—Rex Rogero de Mortuo Mari, salutem. Cum nobis nuper existentibus apud Wigorn' de consilio baronum qui sunt de consilio nostro prefixerimus vobis et aliis commarchionibus vestris vicesimum diem post festum Natalis Domini anno etc. xlix°. ad transfretandum in Hiberniam in forma per nos et barones nostros et vos provisa ibidem, et ob certas causas terminum illum post modum prorogaverimus de gracia nostra speciali usque ad mediam quadragesimam proximo sequentem, et similiter terminum dicte medie quadragesime prorogaverimus usque ad octabas Pasche proximo futuras, ita tamen quod tunc parati sitis proficisci ad partes Hibernie in forma supradicta; nos hiis que honorem et commodum vestrum contingunt prospicere cupientes in hac parte, vobis mandamus firmiter injungentes quod omnibus negociis pretermissis modis omnibus sitis apud Cestr' in octabis predictis parati proficisci ad partes Hibernie in forma supradicta. Et hoc sicut honorem vestrum diligitis nullo modo omittatis. Teste rege apud Westmonasterium xix. die Marcii. Per totum consilium.

De roboribus datis.—Mandatum est constabulario castri de Wyndes' quod in foresta regis de Windes' Gilberto Mubray duo robora folia non portantia ad focum suum de dono regis. Teste ut supra.

Pro Johanne de Sor et sociis suis mercatoribus.—Rex baronibus et ballivis de Rumenal' salutem. Ex gravi querimonia Johannis de Sor, Johannis Peris de Panpeluna et Eneto de Panpeluna accepimus quod, cum quedam navis de Dunwico, in qua ipsi quasdam mercandisas et alia bona et catalla sua habuerunt, nuper exposita esset periculo naufragii ante portum vestrum de Romenal', Willelmus Colebrand', Johannes Adam, Hamo Levyng, Hamo Kayse, Johannes Ate, Johannes Laurenz, Thomas Pot, Johannes Beket, Willelmus Sperneprud', Willelmus Coleman, Hugo de Kersingham, Willelmus Kynet et quidam alii de portu vestro predicto mercandisas et alia bona et catalla predictorum Johannis, Johannis et Eneto in eadem navi inventa in juste et contra voluntatem dictorum mercatorum in eadem navi existentium ceperunt, distraxerunt et ea adhuc eis detinent ad grave dampnum ipsorum Johannis, Johannis et Eneto ut dicunt. Et, quia dicti mercatores sunt ad fidem nostram et hujusmodi periculum wreccum maris dici non debet, vobis mandamus quod si ita est tunc accepta a prefatis mercatoribus sufficienti securitate quod cum dictis mercandisis et aliis bonis et catallis suis ad partes transmarinas se non divertent, set commodum suum inde facient in regno nostro, eisdem mercatoribus de predictis mercandisis et bonis et catallis suis plenam restitucionem habere faciatis sicut racionabiliter monstrare poterunt quod eam habere debeant ad faciendum inde commodum suum in regno nostro sicut predictum est. Et, si prefatos Willelmum, Johannem, Hamonem, Hamonem, Johannem, Johannem, Thomam, Johannem, Willelmum, Willelmum, Hugonem, Willelmum vel alios vobis super hoc resistentes inveneritis, tunc eos venire faciatis ita quod habeatis corpora eorum coram nobis a die Pasche in xv. dies ad respondendum nobis de contemptu predicto. Et habeatis ibi hoc breve. Teste ut supra. Per consilium.
Consimiles litteras habent predicti Johannes de Sor, Johannes Perys de Panpeluna et Eneto de Panpeluna baronibus et ballivis de Wincheles' directas de quibusdam mercandisis et aliis bonis et catallis ipsorum in quadam navi de Dunwico existentibus, que Henricus Poun, Gervasius Alard', Reginaldus Alard', Jacobus Paulyn, Henricus Brun, Matheus de Forn, Thomas Poun, Willelmus Mancard', Willelmus Batecac et quidam alii de portu de Romenal' ceperunt, distraxerunt et ea adhuc detinent ad grave dampnum ipsorum Johannis, Johannis et Eneto, ut dicunt. Teste supra.

De damis datis.—Mandatum est custodi foreste de Killingham quod in eadem foresta faciat habere Bathoniensi et Wellensi episcopo decem damas de dono regis. Teste ut supra.

De Petro de Sabaudia, Johanne de Warrenna et aliis summonendis.—Rex vicecomiti Sussex' salutem. Summone per quatuor legales milites de comitatu tuo predicto Petrum de Sabaudia apud Pevens', Johannem de Warrenna apud Lewes, et Hugonem le Bigod apud Boseham quod sint coram nobis et consilio nostro in proximo parliamento nostro Lond' primo die Junii justiciam facturi et recepturi. Et in pleno comitatu proclamari facias quod quicunque ad opus predictorum Petri, Johannis et Hugonis interim procurare seu impetrare voluerit salvum et securum conductum ad nos veniendi, morandi et standi recto in curia nostra si quis versus eos loqui voluerit, secure veniat et nos conductum hujusmodi ei fieri faciemus. Et habeas ibi nomina predictorum quatuor militum et hoc breve. Teste rege apud Westmonasterium xix. die Marcii. Per totum consilium.
Eodem modo mandatum est vicecomiti Hertf' de summonendo W. de Valencia apud Brekendon'. Per totum consilium.

De vinis ad expensas hospicii regis.—Rex Reginaldo de Suff', camerario suo Lond', salutem. Mandamus vobis quod de vinis nostris que sunt in custodia vestra faciatis habere Willelmo de Leukenor' pincerne nostro sexaginta dolia vini de empto et duo dolia vini de recta prisa nostra ad expensas hospicii nostri. Teste rege apud Westmonasterium xx. die Marcii. Per senescallum.

De damis datis.—Mandatum est custodi parci de Petherton' quod in eodem parco faciat habere W. Batoniensi et Wellensi episcopo quinque damas de dono regis. Teste rege ut supra. Per regem.

Pro Eustachio de Balliolo constabulario castri Carl'.—Rex vicecomiti Cumbirl' salutem. Precipimus tibi quod assumptis tecum Willelmo de Acr', Roberto de Molecastr', Alano de Horton' et Roberto de Hampton', militibus comitatus predicti, in propria persona tua accedas ad castrum nostrum Karleol' et per sacramentum proborum et legalium hominum per quos rei veritas melius sciri poterit diligenter inquiras cujusmodi bona Eustachius de Bailoll', nuper constabularius ejusdem castri, dimisit in eodem castro et ad quorum manus bona illa devenerunt et utrum sint nostra an sua et quantum valeant. Et, si per inquisicionem illam inveneris dicta bona vel aliquem partem eorundem esse prefati Eustachii et non nostra, tunc ea sicut racionabiliter monstrare poterit sine diminucione (fn. 3) aliqua habere faciatis (sic). Teste rege apud Westmonasterium xxj. die Marcii. Per consilium.

De damis datis.—Mandatum est custodi foreste de Clyve quod in eadem foresta faciat habere Radulfo de Cameys decem damas et quinque damos vivos ad quendam parcum suum inde instaurandum de dono regis. Teste rege apud Westmonasterium xxij. die Marcii. Per ipsum regem et Egidium de Argentenn'.

Pro Bartholomeo Monac.—Rex Henrico de Monte Forti, constabulario castri Dovor', vel ejus subconstabulario, salutem. Cum Bartholomeus Monac lator presentium de licencia nostra profecturus sit ad partes transmarinas, vobis mandamus quod prestito ab eodem Bartholomeo coram vobis sacramento consueto ipsum cum duobus equis parvis, quodam garcione et rebus suis per portum nostrum Dovor' libere et absque impedimento transfretare permittatis ad partes predictas. Teste ut supra. Per consilium.

De passagio Fratrum Predicatorum per portum Dovor'.— Mandatum est eisdem constabulario et subconstabulario quod permittant fratres Rogerum de Lount' et Franciscum de ordine predicatorum et Johannem le Graunt capellanum absque impedimento per portum Dovor' transfretare. Teste ut supra. Per consilium.

Pro Johanne de Gisorz cive London'.—Rex ballivis et probis hominibus suis de Gypwico, salutem. Monstravit nobis Johannes de Gisorz civis noster Lond' quod, cum vos nuper quosdam homines cum quadam navi blado, caseo, butiro et aliis bonis ipsius Johannis carcata in transeundo per partes vestras versus Lond' pro suspicione arrestari feceritis, ac vos predictos homines sic arrestatos jam libere abire permiseritis et predicta bona et catalla ipsius Johannis adhuc detineatis ad grave dampnum ejusdem Johannis ut accepimus, nos indempnitati ipsius Johannis, quatinus fieri poterit, prospici cupientes in hac parte, vobis mandamus quod, si ita est, tunc predicto Johanni de bonis et catallis predictis, quatinus idem Johannes ea racionabiliter probare poterit sua esse, plenam restitucionem sine dilacione habere faciatis. Et ita vos habeatis in hac parte quod non oporteat nos amplius sollicitari propter quod ad hoc manum correctionis aliter apponere debeamus. Teste rege apud Westmonasterium xxiij. die Marcii. Per justiciarium.

De quercubus ad domos de Brehull' reparandas.—Mandatum est custodi foreste de Shottor' quod in eadem foresta vel in boscis regis propinquioribus manerii de Brehull', ubi cum minori dampno fieri poterit, faciat habere vicecomiti Buk' viginti quercus ad domos regis de Brehull et jarullium ibidem inde reparanda. Teste rege ut supra. Per regem et justiciarium.

Pro Johanne de Gisorz, Luca de Batencurt et Thoma Box civibus London'.—Rex ballivis et probis hominibus suis de Gyppewico, salutem. Monstraverunt nobis Johannes de Gysorz, Lucas de Batencurt et Thomas Box, cives nostri Lond', quod vos quosdam homines cum quadam navi blado, caseo, butiro et aliis bonis ipsorum Johannis, Luce et Thome carcata in transeundo per partes vestras versus Lond' pro suspicione arrestari feceritis, ac vos predictos homines sic arrestatos purgata innocencia sua super suspicione predicta coram dilecto et fideli nostro Gilberto de Preston', justiciario nostro ad hoc assignato, jam libere abire permiseritis, vos predicta bona et catalla ipsorum Johannis, Luce et Thome adhuc detinetis in eorum non modicum dispendium et gravamen. Et quia indempnitati ipsorum Johannis, Luce et Thome quatinus fieri poterit prospici cupimus in hac parte, vobis mandamus quod, si ita est et detencionem illam ob aliam causam non feceritis, tunc eisdem Johanni, Luce et Thome de bonis et catallis predictis quatinus ipsi ea racionabiliter monstrare poterunt sua esse plenam restitucionem sine dilacione habere faciatis. Et ita vos habeatis in hac parte quod non oporteat nos amplius inde sollicitari per quod manum correctionis ad hoc aliter apponere debeamus. Teste rege apud Westmonasterium xxiiij. die Marcii, Per justiciarium.

Pro abbate et conventu de Alba Landa de Normannia.—Rex Nicholao de Hasting' custodi terrarum Roberti de Ferrariis comitis Derb', salutem. Ostensum est nobis ex parte abbatis et conventus de Alba Landa de Normannia quod, cum ipsi et predecessores sui a tempore cujus non extat memoria hucusque percipere consueverint singulis annis quatuor marcas de exitibus ville Staunford' per manus ballivi ejusdem ville qui pro tempore fuerit de antiqua elemosina constituta, et ipsi tam tempore nostro quam tempore Edwardi filii nostri predictas quatuor marcas per manus ballivorum nostrorum predicte ville perceperint, vos solucionem dicte pecunie eis facere recusatis, ut accepimus. Et, quia nolumus predictis abbati et conventui injuriari, vobis mandamus quod, si ita est, tunc eisdem abbati et conventui predictas quatuor marcas habere faciatis sicut eas temporibus retroactis consueverunt. Teste rege apud Westmonasterium xxiiij. die Marcii. Per justiciarium et R. de Sancto Johanne.

Pro Simone del Chokel et aliis in brevi.—Mandatum est Henrico de Monte Forti, constabulario castri Dovor', vel subconstabulario suo ibidem quod permittat Simonem del Chokel, Petrum de Hekeling', Egidium de Hekeling', Laurencium de Hungerfeld', Petrum de Furmerye et Matildem uxorem ejus per portum Dovor' libere transfretare. Teste rege apud Westmonasterium xxv. die Marcii. Per consilium.

De respectu habendo pro hominibus de Bringstok' et Stanere.— Rex vicecomiti Northampt', salutem. Ostensum est nobis ex parte hominum nostrorum de Brinkestok' et de Stanere quod, cum ipsi dudum solvissent ad scaccarium nostrum sexaginta marcas tam pro firma ville sue quam aliis amerciamentis et tallagiis suis et unde tallias ejusdem scaccarii nostri habent, ut dicitur, tu nichilominus per summonicionem scaccarii nostri easdem sexaginta marcas iterato exigis ab eisdem. Et, quia volumus super hoc plenius certiorari, tibi precipimus quod demandam quam eis facitis pro predictis sexaginta marcis ponas in respectum usque ad quindenam Pasche proximo venturam, ut tunc coram baronibus nostris de scaccario eis inde plena justicia exhibeatur ibidem. Et averia sua ea occasione capta eis interim faciatis deliberari. Teste rege apud Westmonasterium xxvj. die Marcii. Per justiciarium.

De pannis arestandis.—Rex ballivis suis de Sandwico, salutem. Precipimus vobis quod duodecim pannos de Stanford', qui sunt Gerardi Mawyn, mercatoris, et quos Henricus le Parker occasione turbacionis nuper habite in regno nostro arrestari fecit in villa predicta de Sandwico, in aliqua domo reponi et salvo custodiri faciatis donec aliud inde preceperimus. Teste ut supra. Per justiciarium.

De vinis cariandis ad opus regis.—Rex Reginaldo de Suff', camerario suo Lond' salutem. Mandamus vobis quod de vinis nostris que sunt in custodia vestra liberetis vicecomitibus nostris Lond' sexaginta dolia vini carianda quo eis injunximus. Teste ut supra. Per regem.

Pro Rogero Auuery.—Rex justiciariis suis ad custodiam Judeorum assignatis salutem. Compatientes paupertati Rogeri Auuery, qui Isaac filio Deulegard' Judeo Wynton' in pluribus debitis tenetur, ad quorum solucionem terre et tenementa sua non sufficiunt ut accepimus, vobis mandamus quod facta extenta terrarum et tenementorum predictorum, videlicet quantum valeant per annum in dominicis, serviciis, redditibus, villenagiis et omnibus exitibus terre, eidem Rogero racionabiles terminos secundum extentam illam et consuetudinem Judaismi nostri, salvo contenemento suo, inde habere faciatis. Teste rege apud Westmonasterium xxvij. die Marcii.

De damis datis.—Mandatum est custodi foreste de Braden' quod in eadem foresta faciat habere Roberto Tregoz sex damas de dono regis. Teste ut supra. Per regem.

Pro Nicholao de Herelach'. De respectu habendo.—Monstravit regi Nicholaus de Herelach' quod ipse xl. solidos, qui dudum ab eo exigebantur per summonicionem Scaccarii regis pro transgressionibus diversis quater exsolverit diversis vicecomitibus regis Norhampt' et ut asserit ab eisdem vicecomitibus tallias inde habeat; vicecomes Norhampt' nichilominus eosdem xl. solidos exigit ab eodem per summonicionem Scaccarii regis. Et mandatum est vicecomiti Norhampt' quod, si ita est, tunc demandam illam ponat in respectum usque ad quindenam Pasche proximo futuram. Et districtionem etc. Et, si demande predicte alia causa subsit, eam regi significet. Teste ut supra. Per justiciarium.

De roboribus datis.—Mandatum est custodi foreste de Shottor' quod in eadem foresta faciat habere Drogoni de Barentin quatuor robora folia non ferentia ad focum suum de dono regis. Teste ut supra.

De vinis datis.—Mandatum est Johanni de Swineford', captori vinorum regis per Angliam, quod de vinis regis que nuper cepit apud Suthampt' ad opus regis faciat habere Drogoni de Barentin unum dolium boni vini de dono regis. Teste ut supra. Per regem, justiciarium, R. de Sancto Johanne et Egidium de Argentenn'.

De quibusdam mercandisis inimicorum regis vendendis.— Rex Simoni de Monte Forti juniori vel ejus attornato apud Portesm' salutem. Cum quedam navis cum rebus et mercandisis quorundam inimicorum nostrorum nuper applicuerit apud Portesm' et quedam bona et catalla in eadem navi contenta peritura sint ut dicitur nisi citius vendantur, vobis mandamus quod per visum et testimonium proborum et legalium hominum tam de Portesm' quam Suthampt' mercandisas illas perituras appreciari et vendi et denarios inde pervenientes salvo reponi faciatis donec aliud inde mandaverimus, salvis nobis hiis que ad opus nostrum inde capta fuerint, de quibus respondebimus prout debuerimus. Teste rege ut supra. Per justiciarium, P. de Monte Forti.

Rex Nicholao de Hasting', custodi suo terrarum Roberti de Ferr' comitis Derb', salutem. Cum in instantibus nundinis Stanford' capi fecerimus ad opus nostrum a quibusdam mercatoribus per Robertum de Linton' et Hugonem de Turri, emptores garderobe nostre, pannos et pelluras usque ad summam quadraginta et octo denariorum, vobis mandamus quod tam de exitibus nundinarum predictarum quam de firma ville predicte dictam pecuniam prefatis mercatoribus habere faciatis. Et nos eam in predictis exitibus et firma vobis allocari faciemus. Teste ut supra. Per regem, justiciarium et alios. (Cancelled) Vacat quia aliter inferius.

[m. 6.]

De castro de Mungomery Johanni Extraneo juniori liberando.— Rex Edwardo primogenito suo, salutem. Quia constabularius vester castri de Mungumery recusat idem castrum liberare dilecto et fideli nostro Johanne Extraneo juniori sine mandato vestro speciali, vobis mandamus et sub amissione nostre benedictionis firmiter injungimus quatinus statim visis litteris istis prefato constabulario mandetis et firmiter injungatis per litteras vestras patentes per aliquem de vestris sibi deferendas (fn. 4) quod castrum predictum cum omnibus suis pertinenciis prefato Johanni liberet absque mora in forma qua sibi super mandavimus. Et tenorem litterarum illarum nobis sub sigillo vestro mittatis. Vos autem ad nos sitis personaliter citra festum Pasche sicut nos diligitis. Teste rege apud Westmonasterium xxviij. die Marcii. Per comitem, justiciarium et alios.

Pro Alienora consorte Edwardi primogeniti regis.—Rex Gilberto de Clar', comiti Glouc' et Hertford', salutem. Cum karissima filia nostra Alienora consors Edwardi primogeniti nostri dudum habuerit custodiam Cecilie filie et unius heredum Willelmi le Fort dudum defuncti, qui de nobis tenuit in capite, ac eadem Alienora magnas impensas fecerit circa custodiam predicte Cecilie, per quod indempnitati prefate Alienore prospicere et sustentacioni ejusdem Cecilie providere volumus in hac parte, concessimus eidem Alienore omnes terras et tenementa ipsam Ceciliam jure hereditario contingentia de terris et tenementis que fuerunt predicti Willelmi patris sui, habendas ad sustentacionem ejusdem Cecilie quamdiu nobis placuerit. Et, quia manerium de Wedemerstorn' in comitatu Surr', quod fuit predicti Willelmi patris predicte Cecilie, dudum assignatum fuit eidem Cecilie in partem terrarum et tenementorum predictorum ipsam jure hereditario contingentium, et quod est in manu vestra occasione turbacionis nuper habite in regno nostro ut accepimus, vobis mandamus rogantes quatinus eidem Alienore dictum manerium cum pertinenciis liberetis, habendum ad sustentacionem ejusdem Cecilie sicut predictum est. Et hoc sicut nos diligitis nullatenus omittatis. Teste ut supra.
Eodem modo mandatum Johanni Giffard' pro manerio de Dunden'.
Eodem modo mandatum est Nicholao Poinz de tercia parte medietatis maneri de Dullingham' etc. Per regem, justiciarium et alios de consilio.

De ponendo per ballium.—Galfridus de Grafton', captus et detentus in prisona regis Linc' pro morte Nicholai de Langerisses unde rettatus est, habet litteras vicecomiti Linc' quod ponatur per ballium. Teste rege apud Westmonasterium xxix. die Marcii.
Robertus de Guldeford', captus et detentus in prisona regis de Guldeford' pro morte Ricardi le Sawyer' unde rettatus est, habet breve vicecomiti Surr' quod ponatur per ballium. Teste ut supra.

Pro priore et conventu de Whitteham.—Rex Waltero de Albiniaco, custodi terrarum Alienore consortis sue regine Anglie, salutem. Cum dudum concessissemus prefate regine custodiam terrarum que fuerunt Reginaldi de Mohun defuncti qui de nobis tenuit in capite, habendam usque ad legitimam etatem heredum predicti Reginaldi, ita quod solveret singulis annis priori et conventui de Witteham ordinis Cartusiensis quinquaginta marcas ad sustentacionem suam, quamdiu custodiam illam habuerit, de exitibus terrarum predictarum, ac quinquaginta marce eisdem priori et conventi (sic) aretro sint de anno preterito ut accepimus, vobis mandamus quod, si ita est, tunc eis predictas quinquaginta marcas habere faciatis de exitibus terrarum predictarum, sicut eas per manus vestras temporibus retroactis habere consueverunt, ita quod non oporteat nos super hoc amplius sollicitari. Et nos eas vobis in exitibus predictis faciemus allocari. Teste rege apud Westmonasterium xxix. die Marcii. Per regem et justiciarium.