July 20. Confirmation of a treaty for the settlement of disputes with the Hanse Towns, dated Utrecht, Feb. 18, 1473–4. Westm.
O. xi. 793. H. v. p. iii. 36. |
Appunctuamenta Hanzae Teutonicae super Litibus & Querelis Pacificandis.
An. 14. E. 4. Franc. 14. E. 4. m. 16.
Rex, Universis & Singulis, Praesentia visuris seu audituris, Salutem & Fidem eisdem indubiam adhibere.
Cùm dudùm (Mense, videlicet, Februarii ultimò praeterito) Dilecti & Fideles nostri, Willielmus Hatteclyff Secretarius, Johannes Russell Decretorum Doctor Archidiaconus Berkshire in Ecclesia Sarisburiensi, Willielmus Rosse Vitellarius Villae nostrae Calesii, Oratores, Commissarii, Procuratores, Nuncii & Deputati nostri, in Civitate Trajectensi comparuissent, tuncque & ibidem cum, Spectabilibus & Circumspectis Viris, Domino Johanne Osthusen utriusque Juris Doctore, & Johanne Bersenbrugges, Secretariis Lubicen. Henrico Murmester Legum Doctore Proconsule Hamburgensi, ac Bernardo Powese Consule de Dantsirk, Communitatum Civitatum & Opidorum Hansae Teutonicae Oratoribus Nunciis Procuratoribus, unà cum aliis sibi adjunctis particularium, Civitatum, Communium, Opidorum & Burgorum Hansae Teutonicae Oratoribus infra nominatis, de Modis Viis & Formis, quibus Differentiae, Lites, Guerrae, Injuriae & Discordiae, inter Homines Partium praedictarum motae & pendentes, finaliter Pacificari, Aboleri, omnesque & singuli Homines utriusque Partis praedictae ad pristinam amicabilem & mutuam Communicationem & Conservationem liberumque Intercursum Mercandisandi Restitui & Reduci possent, abundè & cum matura Deliberatione Communicâssent & Tractâssent,
Ipsi tandem, cum Oratoribus Hansae supradictae, Appunctuârunt, Convenerunt, Concordârunt & Concluserunt, Vice & Nomine nostris, in omnibus & per omnia, prout in eorum Literis, Tenore subsequenti desuper expeditis, plenissimè continetur.
Universis et Singulis, Praesentium seriem inspecturis Nos,
Willielmus Hatteclyff Excellentissimi & Potentissimi Principis Domini Edwardi, Dei gratiâ, Regis Angliae & Franciae, & Domini Hiberniae Secretarius, Johannes Russell Decretorum Doctor Archidiaconus Barkshire in Ecclesia Sarisburiensi, ac Willielmus Rosse Vitellarius Villae Calesii, Oratores, Commissarii, & Procuratores ejusdem Domini Regis, ex unâ,
Ac Johannes Osthusen utriusque Juris Doctor, & Johannes Bersenbrugge, Secretarii Lubicenses, Hinricus Murmester Legum Doctor, Proconsul Hamburgensis, ac Bernhardus Pawest Consul de Danssirke, cum aliis adjunctis (videlicet) Spectabilibus & Circumspectis Dominis, Oratoribus, Cristoforo Hinpsteberch Proconsule Tremomensi, Hinrico Reutsunk Consule Menasteriensi, Magistro Johanne Marquardi, & Johanne Borieu, Proconsulibus, ac Magistro Stephano Yerwerd Secretario Davatriensi, Magistro Tidemanno de Veen, & Hinrico Knemetorff, Proconsulibus, & Magistro Jacobo Bundop Secretario Campen. Johanne Darkoep Aldermanno, & Magistro Gerardo Bruns Secretario Mercatorum Hansae in Bruggys, necnon Magistro Hermanno Wammaten Secretario Mercatorum Hansae in Londonia, Communium, Civitatum & Opidorum Hansae Teutonicae Oratores, Procuratores & Nuncii, ex altera Partibus,
Per Literas Superiorum nostrorum, quarum Tenores de verbo ad verbum inferiùs inseruntur, ad Infrascripta auctorisati & commissi,
Notum facimus quòd, post nonnullos Tractatus, per certos Angliae & Hansae Oratores in hac Civitate Trajectensi, Mensibus Julii & Septembris ultimò effluxis, de & super quamplurimis Differentiis, Litibus, Guerris, Injuriis, & Discordiis, inter Homines Partium praedictarum motis & pendentibus, Indiscussis, habitos atque factos, tandem, comparentibus Nobis, instanti Mense Februarii, in dicta Civitate Trajectensi, post maturam & plenam Deliberationem, super omnibus hincinde propositis habitam & observatam, inspirante Pacis Auctore, pro Pacificandis & Abolendis Differentiis, Litibus, Guerris, Inimicitiis, & Discordiis hujusmodi, atque pro Reducendo & Restituendo omnes & singulos Homines utriusque Partis praedictae ad pristinam amicabilem & mutuam Communicationem & Conversationem liberumque Intercursum Mercandisandi, Appunctuatum, Conventum, Concordatum & Conclusum est inter Nos, Vice Auctoritate & Nominibus Superiorum nostrorum, pro Se suisque
Successoribus & Subditis universis & singulis praesentibus & futuris, in modum subsequentibus & subscriptis Articulis comprehensum,
In primis, Appunctuatum, Conventum, Concordatum, & Conclusum existit quòd, ab hac Die imperpetuum, inter Serenissimum Regem Angliae suosque Haeredes & Successores ipsius, & eorum Ligeos atque Subditos, ex una, atque Communitates & Homines de Hansa Teutonica praesentes & futuros, ex altera Partibus, Cessabunt de caetero & penitùs Conquiescent ac finaliter Exterminabuntur omnes Bellorum Motus, Hostilitates atque Inimicitiae ubique, per Terram, Mare, & in Aquis dulcibus, ita quòd Homines utriusque Partis omnes & singuli possint & debeant liberè, tutè, & securè, ubique locorum, insimul aut separatim, ad eorum beneplacitum, Ire, Redire, Navigare, Morari & Conversari, absque eo quòd una Pars super alteram aliquod Dampnum, Gravamen, seu Molestiam, per Captiones Personarum, Navium, Mercium, Bonorum, seu Rerum quarumcumque, faciat seu attemptet facere quovis modo,
Item, Appunctuatum, Conventum, Concordatum, & Conclusum existit quòd, futuris perpetuis temporibus, Cessabunt inter Partes praedictas earum Subditos & Successores universos omnes Lites, Quaestiones, & Actiones, inter easdem Partes, & earum Successores, occasione & causâ Injuriarum, Litium, Discordiarum, Guerrarum, Captionum Personarum, Navium, Mercium, seu Rerum quarumcumque, sive in Mari publico sive in Portubus Maris aut quibuscumque tempore, hincinde exortae, intentatae, seu intentandae, etiam per viam Reprisaliarum aut aliter, coram quocumque Judice aut quibuscumque Judicibus in Regno Angliae, aut alibi institutae seu instituendae; Ita quòd omnis Processus, in quocumque statu fuerit, jam pendens, in Anglia aut alibi, coram quocumque Judice aut quibuscumque Judicibus, in Curiis aut Consiliis quorumcumque Principum aut Dominorum, inter Anglicos & Personas sive Loca quaecumque Hansae supradictae, & praesertim inter quosdam Anglicos & Opidum Campense, in Magno Concilio Domini Ducis Burgundiae &c. Necnon Arrestationes, & exinde subsequentes Promissiones, Obligationes, & Cautiones quaecumque, virtute quarumcumque Literarum Reprisaliarum, sive Arrestationis factae, Cessent, sint Abolitae, & penitùs Conquiescant; Nec alicui, cujuscumque Nationis, existat permittetur, in Regno Angliae aut alibi, per viam Reprisaliarum, aliasve vias, contra Subditos unius aut alterius Partis Procedere, ex eo forsan quod sibi Naves aut Bona, tempore aliquo praeterito, ablata aut aliàs Injuriae illatae sint; adeò quòd benè licebit tàm Anglicis quàm Hominibus Hansae praedictae Naves & alia Bona, usque in hunc Diem taliter Capta, in Regnum Angliae & alia Dominia Serenissimi Domini Regis atque alibi ubicumque libuerint securè & liberè Adducere, & ab hinc Educere, ac pro libito suo Vendere, Destribuere, & Alienare, absque eo quod Primi Domini Proprietarii aut Possessores eorumdem ipsa Vendicare aut Recuperare valeant; Quodque Excercitores, Capitanei Navium, eorum Familiares, Servitores, & alii quicumque, uni aut alteri Partium praedictarum tempore hujusmodi Guerrarum Adhaerentes, cum universis Rebus, ejusdem Discensionis occasione Captis, nullo modo per unam aut alteram Partem, in quacumque etiam Regione fuerint, ex Causis praedictis Arrestentur, Turbentur, Molestentur, aut quomodolibet Inquietentur.
Item, Appunctuatum, Conventum, Concordatum, & Conclusum existit quòd, ad Majorem Securitatem Hominum Hanzae praedictae, providebitur Eis & eorum Successoribus, per Literas Domini Regis Angliae validas & efficaces, & per Actum Parliamenti, nè Ipsi aut eorum aliquis Graventur, Onerentur, seu Impediantur in futurum, in eorum Personis, Navibus, Bonis, Mercibus sive Rebus, occasione alicujus Sententiae latae, aut Judicii redditi, Reprisaliarumve concessarum & indultarum per dictum Dominum Regem & suum Concilium, in & adversus Nationem seu Personas ejusdem Hanzae quandocumque ante praesentem Diem; Ita quòd ab ulteriori Executione Sententiae & Judicii hujusmodi Supersederi debet omninò; Quódque simpliciter & omninò omnes & singulae Promissiones, Obligationes, & Fidejussiones, praetextu hujusmodi Sententiae aut Literarum Reprisaliarum, a Mercatoribus Hanzae, tunc in Anglia existentibus, factae, sint sublatae, & iidem Mercatores per Regiam Celsitudinem ab eisdem simpliciter Absoluti.
Item, Appunctuatum, Conventum, Concordatum & Conclusum est, inter Oratores praedictos, quòd omnes & singuli Mercatores, & alii Subditi & Ligei Domini Regis Angliae pro tempore existentes, cujuscumque Statûs fuerint, poterunt & possunt, totiens quotiens
eis libuerit & placuerit, salvò & securè Terram Pruciae & alia Loca Hanzae Intrare, ibidem Morari & Conversari, Exire & Redire, Emere & Vendere, cum quibuscumque Personis, ita & in eo modo ac adeò liberè, sicut umquam ante haec tempora Emere & Vendere, Intrare & Exire potuerunt & consueverunt; solutis Custumis & Deveriis, de Mercandisis suis debitis & consuetis; Quodque omnes & singuli Mercatores, & alii Subditi, & Ligei Domini Regis Angliae hujusmodi, in Terra Pruciae & aliis Locis Hanzae, omnibus & singulis illis Libertatibus & Liberis Consuetudinibus uti plenè debeant & gaudere, quibus unquam aliquo tempore rationabiliter usi sunt & gavisi: Nullaeque Prisae, Exactiones novae, seu Praestationes aliquae super eorum Personas vel Bona imponantur, aliter vel alio modo quàm ante Decem, Viginti, Triginta, Quadraginta, Quinquaginta, ymò & Centum Annos & ultra impositae sunt vel fuerunt: Simili modo quòd, versâ vice, omnes & singuli Mercatores & Homines de Hanza praedicta, praesentes & futuri, cujuscumque Statûs fuerint, poterunt & possunt, totiens quotiens eis libuerit & placuerit, Terram Angliae & Potestatem & Dominia Serenissimi Domini Regis Intrare, ibidem Morari & Conversari, Exire & Redire, salvò & securè Emere & Vendere, secundùm formam & tenorem Cartarum Privilegiorum eis seu eorum Praedecessoribus indultorum; solutis tamen Custumis & aliis Deveriis indè debitis, secundùm eorumdem Privilegiorum vim formam & effectum: Quodque iidem omnes & singuli Mercatores & Homines de Hanza praedicta, praesentes & futuri, quibuscumque Privilegiis & Libertatibus, ipsis aut eorum Antecessoribus per Reges Angliae indultis & concessis, uti plenè debeant & gaudere, prout unquam ante haec tempora eis rationabiliter usi sunt & gavisi: Nullaeque Prisae, Praestationes, Exactiones novae, aut aliqua Subsidia super eorum Personas vel Bona imponantur, ultra Vim atque Formam Privilegiorum eis ut praemittitur concessorum.
Et, ad omne Dubium, quod in Praemissis seu circa ea posset oriri, Removendum,
Nè, videlicet, occasione Guerrarum & Turbationum jam nuper contingentium, praetendi valeat tàm memorata Privilegia Hanzae in Regno & Dominiis Regis Angliae, quàm Libertates & Liberas Consuetudines Anglicorum supradictas in Terra Pruciae & aliis Locis Hanzae, tanquam Forisfacta seu Confiscata viribus vacuari, seu minoris roboris esseaut momenti,
Conclusum est quòd Providebitur tàm dictis Mercatoribus & Hominibus de Hanza, praesentibus & futuris, per Literas auctenticas & Patentes Domini Regis & per Actum Parliamenti, quàm Subditis & Ligeis Coronae Angliae praesentibus & futuris per Decreta & Literas auctenticas, Nomine & Auctoritate totius Hanzae, sub Sigillo Civitatis Lubicensis, prout moris est, validas & efficaces, de & super Confirmatione & Innovatione omnium & singulorum Privilegiorum, Libertatum & Liberarum Consuetudinum praedictarum, ad finem & effectum ut Ambae Partes suis hujusmodi Privilegiis, Libertatibus & Liberis Consuetudinibus, uti & gaudere de caetero possint, sicut usi & gavisi sunt, seu uti & gaudere debuissent, si Guerrae & Turbationes hujusmodi non contigissent: Et, cùm de Termino MORARI, qui persaepe in Praesentibus continetur, ante hac Disceptatio orta est, Concordatum est quòd nichil aliud in ejus Significatione contineat quàm aliquamdiu in aliquo Loco perseverare, non ut Civis aut Incola.
Item, Appunctuatum, Conventum, Concordatum & Conclusum est quòd in Causis & Querelis, movendis infra Regnum Angliae adversus Mercatores & Homines Hanzae praedictae, vel ab eis, ubi agitur de Contractu vel quasi, aut Delicto vel quasi, qui vel quod praetenditur initus seu factus initum seu factum, extra Corpus cujuscumq; Comitatûs Regni Angliae deputabuntur Auctoritate Regiâ Duo vel plures Judices, juxta quod Rei qualitas videbitur exigere, coram quibus & per quos hujusmodi Causae sive Querelae, Levato Velo, ac sine Strepitu & Figura Judicii, citiùs & compendiosiùs quo fieri poterit, Audiri debeant & Terminari; Si, videlicet, hoc ipsum petatur & requiratur a Mercatoribus aut Hominibus supradictis, per quos contigerit Actionem hujusmodi moveri vel attemptari: Et quod eo Casu nullus Mercator vel Nauta de Hansa Judicium Admirallitatis subire teneatur, nec ad hoc artetur quomodolibet in futurum: Et quod fiant Prohibitiones regiae Admirallo, & ejus Officiariis, ac alii vel aliis quibuscumque Judici vel Judicibus, prout opus erit, nè Se de vel in hujusmodi Causis seu Querelis intromittant vel interponant Partes suas quoquo modo; Consimili Provisione observanda Subditis Regis Angliae in Terris Hanzae & eorum districtibus quibuscumque.
Item, Appunctuatum, Conventum, Concordatum, & Conclusum est quòd,
confirmatis sive innovatis Cartis Privilegiorum & Concessionum, omnibus & singulis memoratis Dominiis Rex expediet per Cancellarium suum Literas, Brevia, & Mandata Edictaque & Proclamationes publicas ad omnes & singulos Portus atque Loca Regni Angliae de quibus videbitur expedire, ad finem ut dicta Privilegia ipsis Mercatoribus, juxta omnem vim, formam, & effectum eorumdem, conserventur, utque Abusionibus, Interruptionibus, & Impedimentis, olim per Officiarios Domini Regis, ut praetenditur, contra & adversus Tenores Privilegiorum hujusmodi Intervenientibus atque factis, de caetero efficaciùs obvietur; Et quòd totiens quotiens dictus Dominus Rex aut suus Cancellarius ad hoc per Mercatores fuerit requisitus.
Item, pariformiter Appunctuatum, Conventum, Concordatum, & Conclusum est, Casu quo Civitas, Villa, vel Opidum aliquod, vel Officialis aut Custumarius, vel alius Subditus quicumque Illustrissimi Domini Regis Mercatorem vel Nautam de Hansa in aliquo, contra Tenorem & Contenta Cartae Privilegiorum suorum, Gravare, Onerare, Arrestare, vel Molestare praesumpserit, extunc Dominus Cancellarius Angliae pro tempore oportuna Brevia concedet & dabit congrua Mandata ad illum vel illos sic Gravantem vel Gravantes, ut a talibus Oneribus, Gravaminibus, & Molestationibus sub Poena ad statim desistant. Et quod sub certa Poena Officiarii & Custumarii in futurum talia non temptabunt, & quòd ab eis desistent jam ceptis si qua fuerint.
Item, Appunctuatum, Conventum, Concordatum, & Conclusum est quòd Serenissimus Rex Angliae, ad uberiorem Satisfactionem & Recompensam omnium & singulorum Dampnorum, Injuriarum, & Contumeliarum, de quibus per Subditos Coronae Hominibus Hansae factis & perpetratis multipliciter querelatum est, praeter & ultra alias Recompensas quascumq; concordatas & advisatas, certas Domos & Mansiones, eis & eorum Successoribus imperpetuum possidendas & habendas, appropriabit seu appropriari faciet; videlicet, quandam Curiam Londoniae sitam vocatam Staelhoeff aliàs Stylgerd, cum eidem Adhaerentibus Aedificiis, & ejusdem universis Juribus, usque ad Guildehaldam Theutonicorum inclusivè se extendentem: Item, in Villa de Boston Curiam de Staelhoeff, aliàs dictam Stylierd: Et quòd in Villa de Lenna una Domus consimilis pro Usu & Utilitate dictorum Mercatorum Hanzae juxta Aquas ordinetur, ac similiter per eundem Dominum Regem eis & eorum Successoribus imperpetuum possidenda approprietur: Proviso quòd Onera perpetua, praedictae Domui (videlicet, Staelhoeff) cum sibi Adhaerentibus, petitis in Londonia ex antiquis Fundationibus, seu Christi Fidelium ultimis Voluntatibus, ad exhibitionem Personarum Ecclesiasticarum, seu ad alios Pios Usus annexa & incumbentia, per dictos Mercatores & eorum Successores agnoscantur, supportentur, & perimpleantur in omnibus & per omnia, prout Proprietarii earumdem moderni ipsa Onera agnoscere, supportare, & perimplere tenentur; ac proviso, per Literas Regias, quòd Mercatoribus Hansae praedictae & eorum Successoribus licebit supradictas Domos & Mansiones Regere & Gubernare, antiqua earumdem Tigna Submovere, & nova Injungere, ipsasque Domos & Mansiones, cum universis earum Aedificiis, in toto vel in parte simpliciter tollere, & alia pro sua Voluntate reaedificare, cum plenissima Potestate utendi & fruendi ad libitum suae voluntatis, absque alicujus novae Praestationis, ultra Praemissa, vel alterius cujuscumque Oneris impositione, Cumque Renunciatione & Cessione perpetuâ & irrevocabili eorum, ad quos ipsae Mansiones & Domus pertinebant; omnibus & singulis Statutis & Consuetudinibus Regni Angliae, caeterisque universis Exceptionibus tàm Juris quàm Facti, & dolo & fraude, quantum ad Praemissa, penitùs semotis & cessantibus, aliisque non obstantibus quibuscumque.
Item, Appunctuatum, Conventum, Concordatum, & Conclusum est quòd, in Satisfactionem omnium & singulorum Dampnorum, Mercatoribus & aliis Hominibus Hansae quibuscumque ab Anglicis usque in praesentem Diem illatorum, ac pro omnibus & singulis Odiis & Displicentiis de animis Hominum ipsius Hansae adversus Subditos Coronae Angliae extirpandis & abolendis, idem Dominus Rex, de sua Gratia & Munificentia sua Regia, largietur Civitatibus Hanzae, ultra Domos & Mansiones antedictas, certam Notabilem Summam Pecuniae Sterlingorum, quorum Solutionem consequi debent proximis futuris continuis Annis ex omnibus & singulis Custumis, ad Regem pertinentibus, de ipsorum Mercibus Licitis & non Prohibitis, quas in idem Regnum adduci seu ab eodem Regno educi contigerit, eo & tali modo quòd illas Custumas Mercatores Hanzae Londoniae Residentes in Solutionem praefatae Summae recipiant quousque ad integram Solutionem ejus per-
veniant; Proviso quòd nullum, qui non sit de eorum Guilda vel Societate, neque ipsius Bona advocent vel colorent aliquo modo.
Quam quidem Summam, licet olim ad Quindecim Milia Librarum Taxatam, attento quod per Oratores Angliae, ad instantiam Oratorum Hansae, jam Concordatum existit quòd Dominus Rex Angliae, sui Haeredes & Successores, omnes & singulos Mercatores & Homines Hansae manutenebunt & servabunt Indempnes, erga quoscumque Subditos suos, ab omni Actione, Quaestione, & Lite, quae occasione Injuriarum aut Captionis Personarum Navium Mercium seu Rerum quarumcumque, temporibus quibuscumque praeteritis, eis aut eorum alicui adversus ipsos de Hansa competebat seu competere potuit, dicti Oratores Hanzae moderârunt & taxârunt ad Summam Decem Milium Librarum Sterlingorum dumtaxat; quarum Decem Milium Librarum Retentionem & Solutionem ipsi Mercatores de eorum Custumis consequi & habere debent, Annis proximò futuris ut praefertur, Obligatione Regiâ in meliori & efficaciori formâ, per Literas suas Patentes, dictis Mercatoribus desuper faciendâ: In quo Casu & Praemissis benè & fideliter perimpletis, dicti Oratores Hanzae fatentur & recognoscunt, Nomine totius Hanzae, ipsum Dominum Regem, suosque Successores, Subditos, & Ligeos Coronae Angliae, praesentes & futuros, ab omnibus & singulis Dampnis, Injuriis, Spoliationibus, Rapinis, Incarcerationibus, Arrestationibus Personarum, Bonorum, & Mercandisarum, Alienationibus, Distributionibus, Partitionibusque eorumdem, in & adversus Mercatores & Homines Hanzae, per Regem & Reges Angliae, suosve Subditos, per viam Facti, per viam Judicii & Sententiae, seu Executionis, aut aliter quomodocumque Commissis seu Attemptatis, Exoneratos, Absolutos, & Quietos, ipsosque & eorum quemlibet, in eventum & casum supradictum, de eisdem acquietant & absolvunt firmiter per Praesentes.
Est insuper, pro majori certitudine Praemissorum, inter praefatos Oratores Dictum, Advisatum, & Concordatum quòd, in omnibus & singulis Portubus & Locis, sub Obedientia Domini Regis Angliae, ubi Mercatores Hansae Mercandisas suas adduxerint seu eduxerint, durante tempore quo in Satisfactionem Summae praedictae Custumas suas retinere debent ut praefertur, debeant fieri Scripta Indentata, de tempore in tempus, inter Officiarios Domini Regis, sive sint Custumarii sive alii, per Regem ad id deputandos ex una Parte & Mercatorem seu Mercatores Hanzae ex altera Parte, ad finem ut Dominus Rex possit, de Anno in Annum, super Summa antedicta, & quantum de eadem solvenda restiterit, Certificari ut est justum.
Item, Appunctuatum, Conventum, Concordatum, & Conclusum est quòd, ante omnia, Rex praefatus dictis Mercatoribus Solutionem faciet Quadringentarum Octuaginta quatuor Librarum Sterlingorum, quae dictos Mercatores, exclusis Coloniensibus, pro Ratâ suâ contingunt, quas suae Majestati novissimè in Angliae Carceribus Mancipati mutuo amicabili concesserunt, vel saltem eosdem assecuret de modo & formâ Solutionis hujusmodi faciendae, si & in quantum constiterit Pecuniam hujusmodi Mutuatam & non solutam.
Item, Appunctuatum, Conventum, Concordatum, & Conclusum est quòd, si quae Civitatum, Communitatum, aut Personarum quarumcumque Confoederationis Hanzae Theutonicae, per aliarum Civitatum & Communitatum ejusdem Hanzae Oratores, ex Causis eos moventibus, a caeteris Civitatibus & Locis Hansam facientibus Separata aut Dimembrata existat, aut futuris ullis temporibus separetur aut dimembretur; aut quae earumdem suâ sponte seipsam seperaret & dimembret, Dominus Rex Angliae, ad Certificationem & Requisitionem Oratorum earumdem Civitatum & Communitatum Hanzae hujusmodi, statim sine ulteriore Causae cognitione, totiens quotiens ipsam fieri contigerit, reputabit Civitates, Comunitates, aut Personas, sic sibi Certificatas, tanquam Alienigenas & Forenses, nulloque Privilegio munitas quoad Regnum suum Angliae, nec eisdem Nova Majora aut Similia Hanzae Privilegia Dabit, aut talibus in Regno Angliae gaudere permittet, donec per Literas Oratorum Hanzae de Civitatum, Communitatum, aut Personarum hujusmodi Reunione & Reconsiliatione Certioratus fuerit.
Item, Appunctuatum, Conventum, Concordatum, & Conclusum est quòd Civitas Londoniae acceptare debebit quoscumque Tractatus, Compacta, & Obligationes inter eundem Dominum Regem & Civitates & Oratores Hanzae intervenientes atque factos absque contradictione perpetuis temporibus observandos, necnon sub ejusdem Civitatis auctentico, & ad hujusmodi sufficienti Sigillo & Literis Patentibus, omnes & singulas Compositiones & Contractus antiquos, ac per eorum Consilium pro Mer-
catoribus Hansae quascumque latas Sententias renovare & reassumere, supradictos Mercatores illis omnibus, & aliis quibuscumque suis Libertatibus, & antiquis Consuetudinibus, quatenus per Dominum Regem modernum, Auctoritate Parliamenti sui aut aliter, quomodocumque innovatae & Confirmatae fuerint, etiam si aliquotiens per contrarium Actum ac aliàs Interruptae fuerint, Uti & Gaudere, prout ab antiquo consueverunt permittendo; non obstantibus aliquibus Privilegiis ipsis Londoniensibus concessis, quibus nec contra praefatos Mercatores gaudere debebunt.
Item, Appunctuatum, Conventum, Concordatum, & Conclusum est quòd Mercatores Hanzae Possessionem & Custodiam nanciscantur cujusdam Portae Londoniae, dictae vulgariter Bisshopisgate, juxta omnem vim, formam, & effectum Compositionis, inter eandem Civitatem & ipsos Mercatores quondam factae.
Item, Appunctuatum, Conventum, Concordatum, & Conclusum est quòd, cùm Mercatores Hanzae multipliciter se Gravatos in Angliâ & Laesos esse dicant in Judiciis certarum Curiarum, contra Tenorem certi sui Privilegii, incipientis, quòd in omnibus generibus Placitorum (salvo Casu Criminis pro quo infligenda sit Poena Mortis &c.) Dominus Rex providebit quòd non aliter debeant Conveniri neque Trahi ad Judicia, quàm juxta vim, formam, & effectum Privilegii antedicti.
Item, Appunctuatum, Conventum, Concordatum, & Conclusum est quòd, ad finem ut occurratur pluribus Fraudibus, quibus Mercatores Hansae occasione Ponderationis & Staterae Se Dampnificatos conqueruntur, contra certi sui Privilegii Tenorem sequentem (videlicet) quòd ante Ponderationem Statera in Praesentia Emptoris vacua videatur, & extunc Ponderator ponderet in aequali, & cùm Stateram posuerit in aequali statim ammoveat Manus, ita quòd remaneat in aequali, &c. Dominus Rex mandabit hiis, qui Officium Ponderationis hujusmodi ex Donatione sua nunc habent, sub Poena Amissionis & Forisfacturae Officii hujusmodi, quòd Officium ipsum indifferenter justè & fideliter exequantur; Quòd si, post Monitiones legittimas, in ea parte Culpabiles inventi fuerint, Dominus Rex, pro Quiete Mercatorum Hanzae, aut providebit eis de singulari Ponderatore, aut de alio Remedio convenienti & rationabili, de quo debebunt meritò esse contenti; Proviso quòd Ligna Staterae ultra Longitudinem Pedis extendatur; hiis, quae de Officio Ponderatoris jam dicta sunt, ad Officium Mensuratoris Pannorum Lineorum extensis per omnia & de eodem pariformiter intellectis.
Item, Appunctuatum, Conventum, Concordatum, & Conclusum est quòd Dominus Rex, de tempore in tempus, providebit contra certum Gravamen, quo plurimùm gravantur per Custumarios dicti Mercatores, ratione Mercium suarum advenientium in Angliam, quas Anglici ipsos Mercatores, mora protractâ occasione statuendae Custumae, non permittunt pro sua Libertate commutare.
Item, Appunctuatum, Conventum, Concordatum, & Conclusum est quòd Dominus Rex providebit nè Scrutatores, qui nullum Defectum reperiunt circa Merces Mercatorum Hanzae, aliqua faciant Impedimenta quo minus ipsos Mercatores & Nautas sine aliquo Onere cum suis Bonis relinquant.
Item, Appunctuatum, Conventum, Concordatum, & Conclusum est quòd providebitur ne Mercatores Hanzae, a Litoribus per Terram venientes cum Federaturis aliisque Pretiosis Pellibus & Mercibus, graventur per Custumarios aut alios quoscumque ibidem ex Parte Regis aut aliorum existentes, praesertim in Civitate Cantuariensi aut Roffensi, aut in Villa de Gravesend, aut alibi, in Apertura Vasorum in quibus hujusmodi Pelles reponi contigerit, casu quo Federaturae & Bona praedicta, post praestitam Custumam, Sigillata ac Warantum desuper datum fuerint; attento quod Apertura hujusmodi sine magno Praejudicio & Notabili Dampno fieri non potest.
Item, Appunctuatum, Conventum, Concordatum, & Conclusum est quòd, Providebitur quòd Mercatores praedicti Exonerabuntur a quadam Exactione, vulgariter dicta Princemoney sive Luffkoep, & a Praestatione Quatuor Denariorum, per quendam Assertum Officiarium, vocatum le Prikker, ultra Custumas solitas illos extorquentes, si de Jure non debeant eos habere.
Item, Appunctuatum, Conventum, Concordatum, & Conclusum est, quòd Dominus Rex faciet Provisionem quòd Naves & Bona quibus onustantur, Naufragium in Anglia qualitercumque passa, saltem condignâ pro illis salvandis Mercede Laboris constitutâ, eis Restituantur quibus ante Naufragium pertinuerunt; dummodò aliquod Vivum Animal ex Navi hujusmodi periclitante, sit Homo, Canis, Gallus, Cattus, aut aliud Animal, ad Terram salvum adveniat.
Item, Appunctuatum, Conventum, Concordatum, & Conclusum est, quòd Providebitur, per totum Regnum Angliae, de hiis, qui Casu fortuito, ex aliqua Navi in Pellagiis Maris praecipitati, aut aliàs intra vel extra Navim, ex Conflictu vel alia Causâ quacumque Vulnerati vel Mortui fuerint, nè de eis aut aliis quibuscumque Causis, Mercatores tangentibus, Admirallus Cognitionem habeat aut Jurisdictionem excerceat, nec propterea Navis, Merces, & Bona in eadem Navi existentia in commissum cadant, neque Mercatores aliquod Dampnum vel Periculum patiantur aut sustineant; sed quòd, eo Casu & aliis quibuscumque, fiat Causae Cognitio prout singulari Statuto Provisum existit in Parliamento Domini Regis Ricardi Secundi apud Westmonasterium, Anno Regni sui Quintodecimo edito, quod incipit, Quòd de omnibus Contractibus, Placitis, & Querelis, & de omnibus aliis Rebus factis sive emergentibus, infra Corpora Comitatuum tàm per Terram quàm per Aquam, ac etiam Wreccum Maris &c.
Item, Appunctuatum, Conventum, Concordatum, & Conclusum est, quòd Dominus Rex adhibebit Diligentiam pro oportuna Provisione facienda circa Pannos Laneos Angliae, ut Defectus in eis reperti tàm in Qualitate Lanarum quàm in Pannorum Longitudine & Latitudine, possint reformari.
Item, Appunctuatum, Conventum, Concordatum, & Conclusum est, quòd Providebitur per Dominum Regem ut, sufficienti Cautione praestitâ de Stando Juri per Mercatores Hanzae, ex Causis quare Bonorum suorum Arrestationes fieri contigerit, ipsi Mercandisas suas liberè Consequantur, ac easdem Vendere proque suo libito Distribuere valeant.
Item, Appunctuatum, Conventum, Concordatum, & Conclusum est, quòd providebitur eisdem Mercatoribus quòd Vina Renensia minutatim & ad Retalliam futuris temporibus Vendere valeant, prout ab antiquo soliti sunt & consueti; & quòd ad illam Quotam, quam Major Civitatis Londoniae de Sale ibidem adducto capere consuevit, dicti Mercatores & sui Successores debent ab eadem imperpetuum exonerari.
Item, Appunctuatum, Conventum, Concordatum, & Conclusum est, quòd per dicta Appunctuata, Conventa, Concordata, & Conclusa nullae Obligationes, quae a Domino Rege Angliae, aut suis Praedecessoribus, Mercatoribus, aliisve aut particularibus Personis, erga Civitates Hanzae, ac earum Personas, etiam si Jure Depositi & bonâ Fide aut aliàs qualitercumque emanârunt, pro quibus non est Satisfactio plenaria in Articulis memoratis concordata, ac, vice versâ, quae a Civitatibus, Mercatoribus, aut aliis Personis Hanzae erga Dominum Regem Angliae, suosque Praedecessores & Subditos, similiter emanârunt (quarum occasione debita Jure Extincta aut ad Finem Prosecuta non sunt) Auferantur utrùm, potius in suis maneant Robore atque Firmitate.
Item, Appunctuatum, Conventum, Concordatum, & Conclusum est, quòd omnia Appunctuata, Conventa, Concordata, & Conclusa duntaxat ad Dominum Regem Angliae, suosque Ligeos & Subditos, ex una, ac Civitates Hanzae, earumque Mercatores & Homines, Partibus ex altera, se extendant; adeò quòd, si fortè alterutra Partium erga alios Principes Dominos aliosve quoscumque, qui sub antedicti Regis Angliae Ditione aut Civitatibus Hanzae non existant, aliquod sibi Jus aut Actionem competere ex eo quod, tempore praedictarum Guerrarum & Discensionum, aut earum occasione, quid ipsum per praedicta Appunctuata, Conventa, Concordata, & Conclusa minimè debet esse Ablatum, ymmò ut Partium unaquaeque suum Jus prosequi valeat & finire sit Permissum.
Item, Appunctuatum, Conventum, Concordatum, & Conclusum est, quòd per Praemissa omnia & singula, in Praesentibus descripta & contenta, nullis Literis, Privilegiis, Libertatibus, Concessionibus, Indultis, Concordiis, & Tractatibus, ante tempora Datae Praesentium, per Illustrissimos Angliae Reges & alios quoscumque, Mercatoribus & Hominibus Hanzae Datis & Concessis, aut inter dictos Reges & alios ac Mercatores & Homines Hanzae qualitercumque factis & concordatis, Praejudicium aliquod generetur; sed quòd illa omnia & singula cum Praesentibus universis, & haec eadem cum illis, in suis permaneant Robore & Virtute; sic quòd Mercatores Hanzae comuniter, & singuli, praefatis Literis, Libertatibus, Concessionibus, Indultis, Concordatis, & Tractatibus, cum praesentibus Appunctuatis, Conventis, Concordatis, & Conclusis, in quibuscumque suis Articulis & Punctis, prout eis ad Utilitatem eorum meliùs & pertinentiùs interpretari, ac etiam ipsis liberiùs & utiliùs Valere & convenientiùs expedire poterunt, imperpetuum liberè & pacificè Frui debeant; contrariâ vel aliquâ aliâ Interpretatione circa ea minimè facien-
dâ, ac Contradictione cujuscumque non obstante.
Quae omnia et singula Nos, Oratores Angliae supranominati, Promittimus bonâ Fide, & Pollicemur per Metuendissimum Dominum nostrum Regem, suosque Haeredes & Successores, Ligeosque & Subditos Coronae Angliae, universos & singulos, praesentes & futuros, quoad ipsos concernunt aut concernere poterunt, Tenenda inviolabiliter imperpetuum pariter & Observanda, ac per Literas Auctenticas & Patentes ejusdem Domini Regis Ratificanda, Approbanda pariter & Confirmanda, Literis hujusmodi Confirmatoriis in Opido Burgensi, sub visu Aldermanni Mercatorum Hanzae ibidem, in manus ejusdem Aldermanni, aut alterius ad hoc Potestatem ex parte Hanzae habentis, Literas similes Confirmationis pro Parte Hanzae apportantis, & tunc cum effectu Nuncio regio ad hoc mittendo Tradere parati, primo Die Mensis Augusti proximò futuro deliberandis pariter & consignandis.
In quorum omnium & singulorum Testimonium atque Fidem has Literas, penes Oratores Hanzae supranominatos pro Parte Hanzae remanentes, Nos Willielmus Hatteclyff, Johannes Russel, & Willielmus Rosse, Oratores in Literis Procuratoriis infra insertis specialiter nominati, Sigillis, Nominibusque, & Signis nostris Manualibus subscriptis roborari faciemus pariter & communiri.
Tenores vero Literarum Procuratoriarum, de quibus supra fit mentio, sequuntur & sunt tales,
Edwardus, Dei Gratiâ, Rex Angliae & Franciae, & Dominus Hiberniae, omnibus, ad quos praesentes Literae pervenerint, Salutem.
Cùm in quadam Dieta, Mensibus Julii & Septembris ultimo elapsis, in Civitate Trajectensi, per Certos pro Parte nostra, & per Alios pro Parte Civitatum Hanzae Theutonicae Oratores, nonnulla Media Pacis & pristinae Amicitiae, inter Incolas & Subditos utriusque Partis Renovandae, Excogitata, Communicata, Tractata, & sub spe Conclusionis Appunctuata fuerunt, prout in Actis ejusdem Dietae, inter Oratores hincinde conscriptis, & per eos subscriptis, de Data in Civitate Trajectensi Decimo nono die Septembris, Anno Domini Millesimo, Quadringentesimo, Septuagesimo tertio, pleniùs continetur,
Sicque ipsa Dieta, primùm ad Quintumdecimum Diem Mensis Decembris, de inde ad Quintumdecimum Diem Mensis Januarii proximò extunc sequentem, continuata, ad finem ut tunc de & super Materiis & Rebus, remanentibus indiscussis, finalis Conclusio caperetur, Paxque firma & perpetua inter Partes componeretur & stabiliretur,
Hinc est quòd Nos, volentes Coepta hujusmodi debitum sortiri effectum,
De Fidelitate, Circumspectione, & Industria Dilectorum & Fidelium nostrorum, Johannis Scotte Militis Marescalli Villae nostrae Calesii, Magistrorum, Willielmi Hatteclyff Secretarii, Johannis Russel Archidiaconi Berks, Consiliariorum nostrorum, & Willielmi Rosse Vitellarii Villae nostrae Calesii, plenariè confidentes,
Ipsos nostros veros & indubitatos Ambassiatores, Commissarios, Procuratores, Deputatos, & Nuncios generales & speciales Constituimus, Deputavimus, & Ordinavimus, ac Tenore Praesentium Constituimus, Deputamus, & Ordinamus,
Dantes & Concedentes eisdem Ambassiatoribus, Commissariis, Procuratoribus, Deputatis, & Nunciis nostris, Tribus seu Duobus eorum (quorum praefatum Johannem Scotte, Willielmum Hatteclyff, aut Johannem Russel unum esse volumus) plenam & liberam Potestatem ac Mandatum generale & speciale, pro Nobis, Haeredibus, & Successoribus, Regnis, Terris, Dominiis, Subjectis, Amicis, Alligatis, Confoederatis, Faventibus & Adhaerentibus nostris quibuscumque, cum Spectabilibus & Egregiis Viris Gubernatoribus Patriarum & Civitatum Hanzae Theutonicae, seu eorum Ambassiatoribus, Commissariis, Procuratoribus, Deputatis, & Nunciis, sufficientem in ea parte Potestatem habentibus, ac etiam cum quibuscumque Universitatibus, Societatibus, Principibus, Dominiis, Gubernatoribus & Rectoribus, Terrarum, Patriarum, Civitatum, Opidorum, Villarum, & Dominiorum quorumlibet Terrae Almaniae, aut cum ipsorum Ambassiatoribus, Commissariis, Procuratoribus, Deputatis, & Nunciis Potestatem sufficientem habentibus, Conveniendi, Appunctuandi, Concordandi, & finaliter Concludendi de & super omnibus & singulis Differentiis, Litibus, Quaestionibus, & Discordiis,
Inter Nos nostrosque Subditos ex una Parte, & praefatos Honorabiles & Discretos Viros Gubernatores Patriarum & Civitatum Hanzae praedictae, ac etiam Universitates, Societates, Principes, Dominos, Gubernatores, & Recto-
res Terrarum, Civitatum, Opidorum, Villarum, & Dominiorum quorumlibet dictae Terrae Almaniae, Terras, Civitates, Opida, Villas, Castra, Patrias, & Dominia, Subditos, Amicos, Alligatos, Confoederatos & Adhaerentes suos quoscumque, ex Parte altera, pendentibus,
Indiscussis,
Ipsasque Differentias, Lites, Quaestiones, & Discordias Discutiendi, Determinandi, & finaliter omnibus modis, quibus ipsis videbitur, Pacificandi & Abolendi,
Ac de & super perpetua & reali Pace atque Concordia, tàm per Mare quàm per Terram, Flumina, & Aquas dulces, necnon Ligis, Amicitiis & Confoederationibus quibuscumque, inter Nos, Haeredes, & Successores nostros, ac Regna, Terras, Dominia nostri, Subditos, Amicos, Alligatos, Confoederatos, Faventes, & Adhaerentes nostros quoscumque, ex Parte una, & praefatos Egregios & Spectabiles Viros Gubernatores Patriarum & Civitatum Hanzae praedictae, ac etiam inter Universitates, Societates, Principes, Dominos, Gubernatores & Rectores Terrarum, Civitatum, Opidorum, Villarum, & Dominiorum quorumlibet dictae Terrae Almaniae, Terras, Civitates, Opida, Villas, Castra, Patrias & Dominia sua, Subditos, Amicos, Alligatos, Confoederatos, Faventes & Adhaerentes suos quoscumque, ex Parte altera, contrahendis, ineundis, & firmandis, Tractandi, Appunctuandi pariter & Concludendi,
Necnon Pacem & Concordiam, Ligas, Amicitias, & Confoederationes hujusmodi, viis & modis omnibus quibus expedire videbitur, Vallandi & Roborandi,
Communicationemque mutuam ac liberum Intercursum Mercandisarum, Securumque Statum pro Hominibus utriusque Partis praesentibus & futuris, tàm in Regnis, Patriis, Civitatibus, Dominiis & Locis unius & alterius Partis praedictae, quàm aliàs ubilibet tàm in Terra quàm in Mari, Fluminibus, & Aquis dulcibus, unà cum Treugis, Abstinentiis Guerrarum, aliaque Dieta, si ipsis visum fuerit, Appunctuandi, Concordandi, partier & Concludendi sub Modis, Formâ, & Conditionibus, de quibus inter dictos nostros Ambassiatores, Commissarios, Procuratores, Deputatos, & Nuncios, ac praefatos Spectabiles & Egregios Viros, ac etiam Universitates, Societates, Principes, Dominos, Gubernatores, & Rectores praedictos, seu ipsorum Ambassiatores, Commissarios, Procuratores, Deputatos, & Nuncios praedictos poterit concordari,
Caeteraque omnia & singula Faciendi, Excercendi, & Expediendi quae in Praemissis seu aliquo Praemissorum, seu circa ea conjunctim aut divisim necessaria fuerint seu quomodolibet oportuna, ac quae qualitas & natura hujusmodi Negotii exigunt & requirunt, & quae Nosmetipsi faceremus aut facere possemus si Praesentes personaliter essemus, etiam si talia forent quae de se Mandatum magis exigant speciale;
Promittentes, bonâ Fide & in Verbo Regio, Nos Ratum, Gratum, & Firmum habituros quicquid per dictos Ambassiatores, Commissarios, Procuratores, Deputatos, & Nuncios nostros, in forma praedicta, Actum, Gestum, seu Procuratum fuerit in Praemissis seu aliquo Praemissorum.
In cujus rei Testimonium has Literas nostras fieri fecimus Patentes.
Teste Meipso apud Westm. Vicesimo secundo die Decembris, Anno Regni nostri Tertiodecimo.
Per ipsum Regem, & de Data praedicta, Auctoritate Parliamenti.
Ive.
Universis & singulis, praesentes Literas inspecturis, lecturis seu legi audituris, Nos, Proconsules & Consules totius Consulatûs & Communitatis Imperialis Civitatis Lubicensis, caeterarumque Civitatum, Burgorum, Communitatum, Opidorum, Villarum, & Locorum totius Hanzae Theutonicae, Oratores & Nuncii, ad Communem earumdem Civitatum, Burgorum, Communitatum, Opidorum, Villarum, & Locorum dictae Hanzae, & ex eis ubicumque existentium Mercatorum & Personarum Quietem & Utilitatem Procurandum, in ipsa inclita Civitate Lubicensi specialiter constituti, Salutem in Domino & Praesentibus Fidem indubiam adhibere.
Cùm pridem,
Inter Excellentissimi & Potentissimi Principis ac Domini Domini Edwardi Angliae & Franciae Regis & Domini Hiberniae, Venerabiles & Egregios Viros, Dominos Willielmum Hatteclyff Secretarium, Johannem Russel Decretorum Doctorem Archidiaconum Berks in Ecclesia Sarum, & Willielmum Rosse Vitellarium Villae Calesii, Oratores, Commissarios, & Procuratores ex una,
Ac, Circumspectos atque providos Viros, Dominos Henricum Castrorum Proconsulem, Johannem Osthusen Doctorem utriusque Juris Secretarium, & Johannem Luneborg Consulem Concilii & Comunitatis Civitatis Lubicensis, cum aliis sibi adjunctis Spectabilibus & Circumspectis Dominis Oratoribus (videlicet) Bernardo Balcer Proconsule, Eylardo Lubberdes Consule, & Johanne Grove Secretario Bremen, Henrico Murmester Legum Doctore Proconsule, Henningo Burmgk Consule, & Laurentio Rotideker Secretario Hamburgen, Cristoforo Henxstenbrech Proconsule, Henrico Brake Consule Tremouien. Henrico Warendorum Proconsule, Henrico Rentzinck Consule, & Johanne Kakesbeke Secretario Monasterien, Bernhardo Pawese, Radulpho Velstede, Consulibus, & Magistro Johanne Lyndouble Secretario de Dantsuke, Johanne Marquardi, Johanne Borreu, Proconsulibus, & Magistro Stephano Yerlbert Secretario Davantrien. Tydmanno de Veen Proconsule, Henrico Kunerstorp Consule Campen, Johanne Durekop, Bertramo Berghoff, [Aldermannis] & Magistro Gerhardo Bruns Secretario ex parte Mercatorum in Brugges, Hermanno Wantuate Secretario Mercatorum Londoniae, & Domino Cristiano de Ghore Capellano & Secretario Mercatorum Bergen. in Norwegia, Communium Comunitatum & Opidorum Hanzae Theutonicae Oratores, Nuncios, & Procuratores, ex altera Partibus,
Post varios Tractatus, in Civitate Trajectensi, Mensibus Julii & Septembris, Anno Domini Millesimo, Quadringentesimo, Septuagesimo tertio, de & super plurimis Differentiis, Litibus, Querelis, Injuriis, & Discordiis, inter Homines Partium praedictarum motis & pendentibus, habitos atque factos,
Tandem, inspirante Pacis Auctore, pro Pacificandis & Abolendis Differentiis, Litibus, Guerris, Injuriis, & Discordiis hujusmodi, atque pro Reducendo & Restaurando omnes & singulos Homines utriusque Partis praedictae ad pristinam amicabilem & mutuam Comunicationem & Conversationem, liberumque Intercursum Mercandisandi, quaedam Concordata & Conclusa, quaedam verò per Modum Advisamentorum Appunctuata sunt, inter praedictos Oratores & Commissarios hincinde,
Et, eorum occasione, inter eosdem Oratores finaliter Conclusum & Concordatum existit quod, tàm praefatus Serenissimus Rex Angliae &c. quàm Civitatis Hanzae praedictae, utriusque suos Oratores & Ambassiatores, cum sufficienti Mandato & plena Instructione, in supradicta Civitate Trajectensi, Decima quinta Die Januarii proximò sequenti, habeant, ad omnia & singula supratractata Concludendum, ad Pacem firmam & perpetuam Stabiliendum, &c. in modis Patentibus & sigillatis eorumdem Oratorum & Commissariorum Literis, ipsis Oratoribus & Commissariis suprascriptis alterutrum exhibitis, & Dat. in Civitate Trajectensi Anno Domini Millesimo, Quadringentesimo, Septuagesimo tertio, Die verò Decimâ nonâ Septembris Dominicâ (quas hic pro insertis haberi placet) comprehensum.
Hinc est quòd, in Eventum & Finem praefatos,
De matura circumspectione & probitate Spectabilium & Circumspectorum Dominorum Civitatum & Opidorum (videlicet) Johannis Osthusen utriusque Juris Doctoris, & Johannis Bersenbengge, Secretariorum Lubicensium, Henrici Murmester Legum Doctoris Proconsulis, & Laurentii Rodtideken Secretarii Hamburgensis, ac Bernardi Pawese Consulis de Dantsuke, plenissmè confidentes,
Ipsos omnes, & eorum quemlibet in solidum, Praesentium exhibitores & exhibitorem (ita tamen quòd non sit melior conditio primitus Occupantis, nec deterior subsequentis, sed quod per unum eorum Inceptum fuerit alius prosequi valeat mediare & finire) omnibus melioribus modo, viâ, jure, causâ, stilo, & formâ, quibus meliùs & efficaciùs potuimus & debuimus, possimusque & debemus, quòd ad Praemissa omnia & singula, Fecimus, ac Praesentium Tenore Facimus, Constituimus, & Ordinamus nostros & praefatae Hanzae veros, certos, legittimos, & indubitatos Procuratores, Nuncios, & Oratores generales & speciales, sic tamen quòd generalitas specialitati non deroget, nec e contra,
Dantes & Concedentes eis omnibus, & eorum cuilibet in solidum, plenam & omnimodam Potestatem, Auctoritatem, Mandatum, & Facultatem, per se dumtaxat, aut unà cum aliis Honorabilibus quarumcumque Civitatum & Opidorum dictae Hanzae veris Oratoribus, Procuratoribus, sive Nunciis, ad Praemissa specialiter Deputatis vel Deputandis, in praefata Trajectensi Civitate praementionata, Decimâ quintâ Die Mensis Januarii, ac posteriùs quandocumque, se nostro & totius Hanzae praedictae Nomine Constituendi & Praesentias suas Exhibendi, ac cum universis & singulis supradicti Potentissimi & Excellentissimi Principis Domini Angliae & Franciae
Regis, &c. Venerabilibus & Egregiis Dominis, Oratoribus, Procuratoribus, & Nunciis specialibus, in ea parte Potestatem & Mandatum habentibus, eorum causâ & occasione, quae, ut praedicitur, inter praenominatos Oratores & Commissarios, sive per Modum Concordatorum & Conclusorum, sive per Modum Advisamentorum, Appunctuata sunt in eadem Civitate Trajectensi, Conveniendi & Comunicandi, ac de & super praefatis universis & singulis in Modo Avisamentorum Appunctuatis etiam Concordandi & Concludendi, prout haec & alia quaecumque, per utriusque Partis Oratores, Commissarios, atque Procuratores antedictos, in omnibus suis Punctis atque Causis, Appunctuata sunt, Concordata, Conclusa, & Avisata,
Ac etiam cum ipsis Regiis Oratoribus, Procuratoribus, sive Nunciis Conveniendi & Concordandi de Loco & Tempore ac Modo & Formâ convenientibus, quibus tàm ipsa praementionata Concordata & Conclusa, quàm adhuc Concordanda & Concludenda, postquam Concordata fuerint & Conclusa, necnon perpetua Pax & firma, futuris temporibus inviolabiliter observanda, approbari & ratificari per Principales Partium praedictarum Dominos constituentes, ac quoscumque alios quorum interest finaliter atque confirmari debeant, de & super Praemissis omnibus & singulis Patentibus atque Sigillatis Approbationis, Ratificationis, & Confirmationis, & aliis quibuscumque Literis, pro firmiori praetactorum perpetua observantia, Partibus, hincide, vel saltem earumdem veris Procuratoribus & Commissariis supradictis, vel aliis, ipso facto & realiter exhibendis,
Alique omnia & singula Faciendi, Dicendi, Gerendi, & Excercendi quae in Praemissis & circa ea necessaria fuerint seu quomodolibet opportuna, & etiam si Mandatum exigant magis speciale quàm superius est expressum,
Unum quoque vel plures Procuratorem vel Procuratores, Loco eorum & cujuslibet ipsorum, cum simili Potestate, Substituendi, & Substitutos aut Substituendos, totiens quotiens eis vel eorum alteri expediens videbitur, Revocandi, & alium vel alios iterum Substituendi,
Promittentes nichilominus, bonâ Fide, Nos & Mercatores, ac quoscumque alios Subditos nostros, perpetuò Firmum, Ratum, & Gratum habituros quicquid per eos, vel Substitutos aut Substituendos ab eis, Actum, Factum, Dictum, Conventum, & Conclusum, Gestumve fuerit in Praemissis, vel quomodolibet procuratum, dolo & fraude cessantibus penitùs & semotis.
In quorum omnium & singulorum Fidem & Testimonium praesentes Literas Sigillo Civitatis Lubicen. quo eisdem appendente ad praesens utimur, communiri fecimus.
Dat. in eadem Civitate Lubicensi Anno Domini Millesimo, Quadringentesimo, Septuagesimo quarto, Die Primâ Mensis Januarii.
Dat. in Civitate Trajectensi ultimo Die Mensis Februarii, Anno Domini secundùm Cursum & Computationem Ecclesiae Romanae Millesimo, Quadringentesimo, Septuagesimo quarto, Ecclesiae verò Anglicanae Anno &c. Septuagesimo tertio.
Nos igitur Edwardus Rex suprascriptus, habentes certam discretam & indubiam Notitiam de omnibus & singulis Tractatibus, Communicatis, Appunctuatis, Conventis, Concordatis, & Conclusis inter praefatos Oratores, Nuncios, & Procuratores nostros ex una Parte, ac Dilectos, Spectabiles, & Circumspectos Viros Oratores Hanzae ex altera, prout in Articulis memoratis seriosiùs est expressum, ea omnia & singula, Nomine nostro Facta atque Gesta, de certâ Scientiâ nostrâ, nullo Juris seu Facti Errore ducti, atque omnem quantum in Nobis est supplentes defectum, gratantes Acceptamus, Approbamus, Ratificamus, & Confirmamus, Volentes & Decernentes eadem per Nos, Haeredes & Successores nostros, quantum in Nobis est, necnon per Vassallos, Ligeos, & Subditos nostros, ac Successorum nostrorum quoscumque, perpetuis futuris temporibus, inviolabiliter observari deberi, nec eisdem aut eorum alicui Contraveniri ullo modo.
In cujus &c.
Teste Rege apud Westmonasterium, vicesimo die Julii.
Per ipsum Regem, & de Dat. &c. |
