July 22. Truce and treaty of mercantile intercourse between the K. of England and Francis duke of Brittany until the decease of either. London.
O. xii. 303. H. v. p. iii. 175. |
Conventiones cum Duce Britanniae.
An. 1. H. 7. Ex Autogr.
Atous ceulx, qui ces Presentes verront ou orront, Jehan le Bouteillier Chivalier Seigneur de Maupartuys Chambellan, Jehan Troussier Chantre de Saint Malo, Rolland de la Villeeon Seneschal de Hennebout, & Francoys du Pou Secretaire, Conseilliers, Orateurs, & Ambassadeurs de Treshault & Puissant Prince Francois, par la Grace de Dieu, Duc de Bretaigne nôtre Souverain Seigneur, Salut.
Savoir faisons que Nous, Orateurs & Ambassadeurs dessus nommez, par vertu & Auctorite des Lettres de nôtre dit Prince a Nous baillees (la Teneur des quelles sera cy apres inseree de mot en mot) ayans Communication & Traicte avecques, Reverend en Dieu Honnorables Saiges & Discreetes Personnes, Jehan Evesque de Lincolne, Thomas Boteler Conte de Ormont Chambellan de la Royaume d'Angleterre, Maistres Henry Aynesworth Docteur es Loys Secundaire en l'Office du Prive Seel, & Jehan Bailli Chappelain du Roy & Chanoine de la Chappelle Royalle de Wyndesores, Conseilliers de Treshault, Tresexcellent, & Trespuissant Prince Henry, par la mesme Grace, Roy d'Angleterre, ses Commissaires & Deputez o toute Puissance & Commission par Lettres Patentes du dit Roy (la Teneur des quelles sera aussi Inseree cy apres de mot a mot) sur une Treue, Abstinence de Guerre, & Entrecours de Marchandise, qui devant ces heurs ont este prinses & accordees entre les ditz Princes d'une Coste & d'autre, a durer jusques a la fin d'un An des le Commencement d'icelles, qui n'est encores expire, & en quelle forme & maniere pour le Bien, Utilite, & Prouffit des ditz Princes leurs Paiis & Subgectz les dites Treues, & Abstinence de Guerre & Entrecours de Marchandise, puissent estre Prorogez ou Prinses de Nouveau, apres plusieurs Ouvertures & Communications en celle Matiere, ayans es gard & consideration aux bonnes & grandes Amour & Affection qui sont entre les ditz Princes, & aussi comment bonnes Treues, Abstinence de Guerre, & Entrecours de Marchandise, ont este ou temps passe entretenuz & gardez entre les Roys d'Angleterre & les Ducs de Bretaigne au Bien & Utilite Commun des dites Parties,
Pour celles & autres Causes, Nous mouvans, eu sur ce par entre Nous bon advis & meure deliberation, Nous & les ditz Commissaires avons par les vertuz des ditz Pouoirs, a Nous sur ce baillez de chascun de noz Princes Respectivement, si comme dessus est dit, Communique, Traicte, Appoincte, Accorde, & Conclud, sans Deroger ou Prejudicier a la Treue qui a present est, & dure jusques a temps a venir, une Treue, Abstinence de Guerre, & Entrecours de Marchandise de Nouveau entre les ditz Princes, pour Eulx, leurs Paiis, Terres, Seigneuries, & Subgectz, a durer jusques aux Termes qui sont declarez es Articles & Forme qui ensuivent,
Comme, pour obvier aux innumerables Maux & Inconveniens de la Guerre, soit necessaire d'avoir & tenir Treues & Entrecours de Marchandise entre le Royaume d'Angleterre & le Duche de Bretaigne, Accorde, Passe, & Conclud est que entre Treshault, Trespuissant, & Tresexcellent Prince Henry, par la Grace de Dieu, Roy d'Angleterre, pour Lui, son Royaume d'Angleterre, Seigneurie d'Yrlande, Ville & Marches de Calays, & autres ses Villes, Places, Terres, & Seigneures quelzconques a lui appartenans ou estans en son Obeissance Garde & Gouvernement, & generalement & especialement pour tous & chascuns ses Hommes, Vassaulx, Feaulx, Subgectz, Serviteurs, Paiis, Places, Terres, & Seigneuries, tant de la que deca la Mer, sur Mer & sur Riviere, en quelzconques Lieux qui soient situez & assiis, quelles il a de present ou pourra avoir cy apres d'une Part, & Treshault & Trespuissant Prince Francys, par icelle mesme Grace, Duc de Bretaigne, Conte de Montfort, de Richemont, d'Estampes, & de Vertuz, pour Lui, ses Paiis, Terres, Seigneuries, & Subgectz d'autre Part, soient Seur Estat, Treues, Abstinence de Guerre, & Entrecours de Marchandise, commencent au Jour & Dabte de ces Presentes, & a durer jusques a Temps & Terme qui sera dit cy apres; cestassavoir,
Quant aux Treues & Abstinence de Guerre, que le dit Duc de Bretaigne, durant les dites Treues & Abstinence de Guerre, ne fera, ne ne souffrera, ne ne permettre faire Guerre, Grief, Prejudice, ne Dommaige, per Mer ou par Terre, en maniere quelconque, par Lui, ses Hommes, Vassaulx, Feaulx, Serviteurs, & Subgectz au dit Roy d'Angleterre, ses Hommes, Vassaulx, Feaulx, Subgectz, & Serviteurs, Places, Paiis, Terres, & Seigneuries quelzconques, qu'il ayt tient a present, ou qu'il pourroit avoir cy apres en Garde & Gouvernement, ne a aucuns d'iceulx: & aussi se dit Duc ne soustendra souffrera ne permettra aucun ou aucuns, de quelque estat ou condition qu'ilz soient, en nulz de ses ditz Portz, Places, Villes, ne Forteresses, de ses dites Paiis, Terres, & Seigneuries, a lui appartenants ou estans en son Obeissance, Garde, & Gouvernement, ne ne baillera Gens a Personnes quelzconques, soit a la Querelle de Lui ou a Querelle d'autrui, pour faire Guerre, ne porter Grief, Prejudice, ou Dommaige, au dit Roy d'Angleterre, ses Hommes, Vassaulx, Feodaulx, Subgjetz, Serviteurs, Paiis, Terres, & Seigneuries, qu'il a de present & aura cy apres a lui appartenans ou estans en sa Garde & Gouvernement comme dit est; ne le dit Duc ne souffrera ne parmettra que aucuns de ses Cappitaines, Feaulx, Vassaulx, Subjectz, ou Serviteurs quelzconques, soit a la Querelle du dit Duc ou a Querelle d'autrui, facent Guerre, portant Grief, Prejudice, ou Dommaige au dit Roy, ne a ses ditz Hommez, Vassaulx, Feaulx, Subgectz, Serviteurs, Paiis, Places, Terres, & Seigneuries quelzconques a lui appartenants ou qui a lui appartendront ou seront en sa Garde & Gouvernement, ne a aucuns d'iceulx.
Item, que, durant le temps des dites Treues & Abstinences, le dit Roy d'Angleterre ne le dit Duc ne pourront Prendre ne faire Prendre ne Conquerir l'un sur l'autre, par Force, Aquet, Eschelle, Siege, Assault, Deception, ou autre quelconque maniere, Places, Villes, Chasteaulx, ou Forteresses: Et, se les Cappitaines ou Manans ou Habitans d'aucunes Citez, bonnes Villes, Chasteaulx, Places, ou Forteresses d'aucunes des dites Parties, se vouloient Rendre & Bailler les dites Places & Retourner de leur propre voulente de l'un Party a l'autre, ilz ne seront a ce Receuz, ains seront & demourront ou mesme point & en l'estat qu'ils sont de present, ou qu'ilz estoient devant celle Prinse, Aquet de Siege, Eschelle, Assault, & Deception.
Item, que toutes manieres de Gens, tant d'Eglise Nobles que Bourgoys, Marchans, Mecanicques, Laboureux, & autres quelzconques, comprins en ces presentes Abstinences, pourront estre Demourer & faire leurs Labeurs, Marchandises, & autres Besongnes, & Aller & Venir en leurs autres singuliers Afaires en tous les Lieux de leur Parti, comprins en ces Presentes Abstinences de Guerre, Seurement & Sauvement; aussi pourront les Subgectz d'une Part & d'autre, avec leurs Navires, Biens, & Marchandises, Aller & Venir, par Mer, Rivieres, & Eaues doulces, en tous autres Paiis & Contrees ou ilz auront a Marchander, sans ce que ceulx d'un Parti soient Empeschez, Troublez, Vexez, ne Traveillez, par ceulx de l'autre Parti, en leurs Personnes, Navires, Bastiaux, Marchandises, ou autres leurs Choses & Biens quelzconques, par Prinsons, Appatiz, Coursses, Fourrages, ne autrement, en quelque maniere que ce soit ou puisse estre.
Item, que tous Ambassadeurs, Messagiers, & Transmis de l'un Parti en l'autre (c'estassavoir) du dit Roy d'Angleterre devers le dit Duc, ou du dit Duc devers le dit Roy, Armez ou Desarmez ainsi que sera necessaire ou prouffitable pour la seurte d'Eulx, ou de leurs Biens & Navires, Pourront, durant la dite Treue & Abstinence de Guerre, par Mer, par Terre, par Rivieres, & Eaues doulces, Aller, Venir, Sejourner, & Demourer es Paiis, & Obeissances de chascune des dites Parties, comprins es dites Abstinences de Guerre, ainsi qu'il leur plaira, pour Besongner es Ambassades, Messaiges, & Commissions qui leurs seront commises & ordonnees par les Princes de l'un Parti & de l'autre Respectivement, & eulx en Retourner en leur Parti quant il leur plaira seurement & sauvement, sans ce qu'il leur soit Besoing avoir autre Saufconduit ne Seurte de l'un Parti ne de l'autre, mais seulement qu'ilz monstrent porter Lettres ou Messaiges des Princes de l'un Parti ou de l'autre.
Item, s'il avenoit que, par aucun ou aucuns Subgectz du dit Roy ou du dit Duc, feust commise ou attempte aucune Chose contraire ou prejudiciable a ses dites Treues & Abstinences, feust par voye de Fait de Guerre, ou autrement, icelles Treues & Abstinences ne seront pour tant Rompues ne Enfraintes, mais les Infracteurs ou faisans Guerre seront tenuz & contrainctz de Reparer leurs
Attemptatz & Meffaiz qu'iz auront en ce commis: Et aussi seront ilz Puniz comme Infracteurs de Treues selon l'exigence des Cas (cestassavoir) les Hommes, Subgectz & Serviteurs du dit Roy Comprins en ces dites Abstinences par icellui Roy, & les Hommes, Serviteurs, & Subgectz du dit Duc comprins en ses dites Abstinences par icellui Roy, & les Hommes, Serviteurs, & Subgectz du dit Duc comprins en ses dites Abstinences par celui Duc; les quelles Abstinences, Treues, & Sur Estat, Seront & demouront en leur force, vertu, & valeur, depuis le Dabte de ces Presentes, la Vye durant des ditz Roy & Duc, & jusques au Decex avenu de celui d'eulx qui Premier Decedera,
Et, En Oultre, quant a l'Entreconrs, Communication de Marchandise, Pescherie de Mer, & autres Choses necessaires, Commencent au Jour & Dabte de ces dites Presentes, & a durer jusques au Temps & Terme qui sera dit cy apres, d'entre le dit Roy, ses Paiis, Seigneuries, & Subgectz d'une Parte, & le dit Duc, ses Paiis, Seigneuries, & Subgectz d'autre, a estre entre Nous Ambassadeurs & Deputex du dit Duc, & les ditz Commissaires & Deputez du dit Roy, & par vertu des Puissances a Nous donnees (dont les Teneurs seront cy apres Inserees de mot a mot ainsi que dit est) Appoincte, Passe, Conclud, & Accorde en la forme & maniere qui ensuit,
Premierement, que tous Marchans, tant du dit Royaume d'Angleterre, Seigneurie d'Irlande & de Calais, que autres Villes & Seigneuries du dit Roy, comme aussi les Marchans du dites Pais & Duche de Bretaigne, soient Marchans de Laynes, de Draps, de Toilles, de Vins, de Fruiz, de Cuirs, de Vitailles, de Harnoys, d'Armeures, d'Artillerie, de Chevaulx, ou d'autres Bestiaulx, ou de quelxconques autres Marchandises, leurs Facteurs ou Familiers puissent seurement Aller, par Mer, Rivieres, & Eauees doulces, & par Navire & par Terre, a Pie ou a Cheval, en passant & traversant d'icelui Paiis d'Angleterre, d'Irlande & de Calais, ou dites Paiis & Duche de Bretaigne, & du dit Paiis & Duche es dites Paiis d'Angleterre, d'Irlande, & de Calais, ou mesmes par les dites Paiis, tant d'un Parti que d'autre, ensemble leurs Biens & Marchandises, & Marchander les ungs avecques les autres de toutes manieres de Marchandises, tant Vivres, Armeures, Artillerie que autres: & Mener & Ramener ou faire Mener & Ramener d'Angleterre, Yrlande, ou Calays ou dit Duche, & d'icelui Duche ou d'autres Contrees en Angleterre, Yrlande, ou Calays, Vivres, Harnoys, Armeures, Artillerie, & autres Choses quelzconques; & que les ditz Marchans, leurs Facteurs & Familiers puissent, chascun d'eulx a qu'il sera necessaire, Achater & avoir Franchement de ceulx de l'autre Coste des Vivres, & les Mener par Mer, Rivieres, Eaues doulces, par Terre, en & oultre la Mer, les ungs aux autres; cestassavoir, ceulx d'Angleterre, Yrland, & Calays en Bretaigne: Et ceulx de Bretaigne es dits Paiis & Seigneuries d'Angleterre, Irlande, & Calays, sans Empeschement, Destourbier, ou Deffence quelzconques, ne pour ce encourir en aucune Paine, & sans en estre Reprins en aucune maniere des Seigneuries d'un Coste ne d'autre, ne de leurs Justiciers, Officiers, & Subgitz.
Item, que tous Marchans d'Angleterre, d'Irlande, & de Calays, soient de Laines, de Draps, de Toilles, de Vins, de Cuirs, de Vitailles, ou de quelzconques autres Marchandises, leurs Facteurs & Familiers, Maistres de Nefz & Mariniers, puissent Aller & Venir par Mer, Rivieres, & Eaues doulces, Passer, Repasser, Convenir, Venir, Estre, & Demourer seurement ou dits Paiis & Duche de Bretaigne, & dedans les Portz & Haures d'icelui, a tous leurs Biens, Marchandises, & Nefz & Marchandes, avec tous Marchans du dites Pais & autres Marchans quelzconques, & leurs Facteurs & Familiers, de toutes manieres de Marchandises, tant Vivres, Harnoys, Armeures, Artillerie, que autres Choses quelzconques, en partir avecques leurs dites Nefz, Biens, & Marchandises, Vivres & autres, qu'ilz pourront Ramener & Retourner seurement; & que pareillement tous Marchans du dites Pais & Duche de Bretaigne, soient Marchans de Laines, de Draps, de Toilles, de Vins, de Cuirs, de Vitailles, ou de quelzconques autres Marchandises, leurs Facteurs, Familiers, Maistres de Nefz, & Mariniers, puissent Aler, Passer, Repasser par Mer, Rivieres, & Eaues doulces, Converser, Estre, & Demourer, seurement ou dit Royaume d'Angleterre, en Yrlande, a Calais, & dedens les Ports & Haures d'iceulx Royaume Paiis & Villes, auctorisez par le dit Roy (cestassavoir es Ports & Haures, ou Coustumiers & autres Officiers sont par Lui ordonnez pour vacquer & entendre sur l'Entre & Yssue des Nefs & Marchandises, & non en autres) avecques leurs Biens, Marchandises, & Nefz, & Marchander avecques tous Marchans Angloys, & autres, & leurs Facteurs & Familiers de toutes Marchandises, tant Vivres, Harnoys, Armeures, Artillerie comme autres, en mener es Ports dessusditz en Angleterre,
en Yrlande, & a Calays, leurs Biens propres Vivres & autres, & les Biens d'autres du dites Paiis & Duche, & en Partir & Retourner seurement a tout leurs ditz Biens, Marchandises, & Nefz; & aussi que les ditz Marchans, leurs Facteurs, & Familiers puissent, chascune d'eulx a qui il sera necessaire, Achater & avoir franchement de ceulx de l'autre Parti, des Vivres & les amener par Mer, Rivieres, & Eaues doulces, les ungs aux autres; cestassavoir, ceulx d'Angleterre, d'Irland, & de Calays, ou dites Paiis & Duche de Bretaigne: & ceulx du dites Paiis & Duche en Angleterre, en Yrland, & a Calays, sans estre Reprins de ce qu'ilz auront ainsi fait des Seigneuries de l'un Parti ne de l'autre, ne de leurs Officiers; ne que par ceulx de la Partie d'Angleterre, aux Marchans du dites Paiis & Duche Dommaige, Destourbier, ne Empeschement soit fait, ne aussi par ceulx de Bretaigne aux Marchans de la Partie d'Angleterre, par voye de fait pour cause de Guerre, Pillerie, faicte ou a faire, ne autrement en aucune maniere, pour quelconque Cause, en gardant & payant, au Regard des Marchans d'Angleterre, d'Irland, & de Calais, ou dites Paiis & Duche des Marchandises qu'ilz Ameneront & Rameneront; & semblablement, au Regard des Marchans du dites Pais & Duche es ditz Royaume & Paiis d'Angleterre, d'Irlande, & de Calais, de Marchandises qu'ilz y Meneront & Rameneront, les Droiz, Coustumes, Tollieux, & Devoirs, a present & par cy devant deuz & acoustumez: Et, au Regard des Marchans d'un Coste & d'autre, touchant les Marchandises qu'ilz meneront & conduiront, chascun de son Party, ilz en paieront les Tollieux, Coustumes, & Devoirs a l'Ordonnence de leur Prince & Seigneur, selon qu'ilz auront cours en leurs Paiis: Et par ce n'est point entendu Prejudicier au Prince ou Seigneur d'une Part & d'autre, de mettre en ses Paiis & Seigneuries les Tollieus & Devoirs, au Regard de ses Subgectz, que bon lui semblera; parmy ce que les ditz Marchans, d'un Coste & d'autre, Facteurs & Familiers, Maistres de Nefz, & Mariniers, pourront & a eulx sera loisible d'avoir avecques eulx, en leurs Nefz, Armures, & Artilleries, pour la Garde & Sauvement de leurs Corps & Biens en alant par Mer, Rivieres, & Eaues doulces, & icelles amener avecques eulx en quelzconques Haures qu'ilz arrivent, les quelles Armeures a lysser de leurs Nefz ilz laisseront en leurs dites Nefz ou Vasseaulx, Excepte Coustel, Dague, ou Espee qu'ilz pourront porter si bon leur semble jusques a leurs Hostelz, ou ilz seront tenuz de laisser leurs ditz Espees: Et aussi pourront Porter & Rapporter les Harnoys, Armeures, & Artilleries, dont ilz se Marchanderont, en excercent & administrant le fait de leur Marchandise, & non autrement: Toutesvoyes pourra le Prince d'un Coste ou d'autre, pour Cause Raisonnable, comme pour necessite ou chierte de Vivres, faire Deffence, au Regard de telles manieres de Vivres, qu'il lui semblera estre a faire pour le Bien de Lui & ses Subgectz, non obstant ce present Accord: Et s'il avenoit que aucuns Nefz, par fortune de Mer ou par Chasse d'Ennemis, feussent contrainctz de prendre aucuns Portz ou Haures ou dit Royaume, qui ne seroient auctorisez comme dit est, en ce Cas elles pourront entrer & estre Seurement es Portz & Havres, sans ce que l'on puisse icelles esteans dites Havres & Portz charger mettre ne descharger quelzconques Denrees ne Marchandises, Vivres, & autres Choses, & s'en Retourner quant bon leur semblera.
Item, que les dites Marchans d'Angleterre, leurs Facteurs, & Familiers, Maistres de Nefz & Mariniers, pourront estre converser & demourer seurement, ou du dit Paiis de Bretaigne, es Portz & Havres d'icelui, avec leurs Biens, Nefz, & Marchandises quelzconques, Vivres & autres: Et semblablement les Marchans du dit Paiis de Bretaigne, leurs Facteurs & Familiers, Maistres de Nefz & Mariniers, pourront estre & converser seurement ou dit Royaume d'Angleterre, en Yrlande, & Calays, es Portz & Havrees d'Angleterre, d'Yrlande, & de Calays, sans ce que par ceulx du dit Paiis de Bretaigne soit Meffait ou donne Empeschement ne Destourbier aux Marchans de la Partye d'Angleterre; ne par ceulx d'icelles Parties d'Angleterre, Yrlande, & Calays, aux Marchans du dit Paiis de Bretaigne, ne a leurs Facteurs, Familiers, Maistres de Nefz, & Mariniers d'un Coste & d'autre, par voye de Fait, par Cause de Guerre, Pillerie, Roberie fait ou a faire, ne autrement en aucune maniere; ne aussi que les Marchans de la Partie d'Angleterre & du dit Paiis de Bretaigne, leurs Facteurs & Familiers, Maistres de Nefz & Mariniers, pourront de l'un Partie entrer es Villes fermees de l'autre Partie, sans en demander Congie, fors pour la premier foiz seulement, a chascune venue qu'ilz feront de l'un Paiis en l'autre; Pourven que aux Portes des dites Villes, ou il sera besoing que les dits
Marchans, leurs Facteurs, & Familiers, Maistres de Nefz & Mariniers, demandent Congie, soient mys certaines Gens qui ayent Pouoir de leur donner le dite Congie d'entree: Et ou cas qu'ilz ne trouveront aucuns des Gens aus dits Portez, Ilz pourront licitement & sans aucun empeschement entrer, chevaucher, ou aller Jusques a leurs Hostelz & Logeix, & Illecques demourer sans partir Jusques a ce que leur Hostes ayent signiffie leur Venue aux Cappitaines ou Officers des dites Villes: Les qu'ilz Hostes ou leurs Servans, apres qu'ilz en seront Requis, seront tenuz, tantost sur la Venue des dits Marchans, de faire Signiffiance de leur Venue aus ditz Cappitains ou Officiers: Et ou cas que, par Negligence ou autrement, la dite Signiffiance ne seroit faicte, les dits Marchans, dedans deux Heurs apres leur Venue, pourront departir aller & passer avant sur leur Chemin en leurs Affaires; & s'ilz trouvoient aus ditz Portes aucune Personne ou Personnes, & par leur Congie Ilz entrent des dites Villes fermees, Ilz ne forferont Riens, Jaczoit ce que Icelui ou ceulx, qui leur auront donne le dit Congie, n'en eussent aucune Puissance; Mais l'eussent fait par simplesse fraude ou mal engin.
Item, que tous Pelerins d'un Coste ou d'autre en allant en Pellerinaige, ne aussi les Clercs d'Angleterre, d'Irlande, ou de Calays, ne autres de quelque condition qu'ilz soient, d'Eglise ou autres allans vers la Court de Rome, ou le Concile General, aux Estudes generalles, ou ailleurs, & en Retournant, puissent entrer par Mer Rivieres & Eaues doulces, & aussi par Terre a Pie & a Cheval, ou autrement, ceulx de l'une Partie au Paiis de l'autre Partie, Passer & Repasser paisiblement par Iceulx, & y ester surement & franchement, sans ce que par Iceulx du dite Duche soit en Icelui Duche Meffait donne Empeschement ne Destourbier aux Pellerins Clercs ou autres dessus declarez de la Partie d'Angleterre, ne par Iceulx du dite Paiis d'Angleterre aut Pellerins Clercs & autres du dites Paiis de Bretaigne, par voye de fait par Cause de Guerre Pillerie ou Roberie faicte ou a faire ne autrement en aucune maniere; Pourveu que, a l'entree des Villes fermees, Ilz prendront Congie aux Gardes des Portes pour y entrer; &, si mestier est & ilz en soient Requis es entrees des dites Villes fermees, ceulx de l'une Partie feront Serement a l'autre Partie que pour Mal faire ou pourchasser a l'autre Partie ses Subgectz Villes ou Pays, Ilz ne passent par Icelles; du quel Serement, sans autre Contraincte ou Empeschement, seront creuz: & pourveu aussi que es Portes des dites villes fermees, ou Il sera Besoing aus ditz Pellerins Clers & autres dessusditz de demander Congie, soient mys certains Gens qui auront le Povoir de leur donner Congie d'Entrer, & de Recevoir d'eulx le dit Serement se mestier est en la maniere dessus dites: Et ou Cas qu'ilz ne troveroient aucuns telz Gens aus ditz Portes, Ilz pourront licitement & sans aucun empeschement Entrer Chevaucher ou aller Jusques a leurs Hostelz, & Ilecques Demourer sans en partir Jusques a ce que leurs Hostes auront signiffie leur Venue aux Cappitaines ou Officiers des dites Villes: Les quelz Hostes ou leurs Servans, apres qu'ilz en seront Requis, seront tenuz tantost, sur la Venue des Pellerins Clercs ou autres dessus declairez, de faire Signiffians de leur Venue aus ditz Cappitaines & Officiers: Et ou Cas, que par negligence ou autrement la dite Signiffiance ne seroit faicte, les diz Pellerins Clercs ou autres dessus declairez, dedens Deux Heures apres leur Venue, pourront Departir Passer & Aller avant sur leur Chemin & en leurs Affaires; & s'ilz treuvent aus ditz Portes aucunes Personnes ou Personne, & par leurs Congie Ilz feussent entrez es dites Villes fermees, Ilz ne forferont Riens, Jacoit ce que celui ou ceulx, qui leur auront donne le dite Congie, n'en eussent aucune Puissance, mais l'eussent fait par simplesse fraude ou mal engin.
Item, que tous Pescheurs, tant d'Angleterre, Yrlande, Calais, que Bretaigne, quelz qu'ilz soient, pourront paisiblement aller par tout sur Mer, pour gaigner leur Vivre sans Empeschement ne Destourbier de l'une Partie ne de l'autre, & sans qu'il leur soit Besoing sur ce Retenir ne Obtenir aucune licence Congie ne Saufconduit: Et avecques ce se fortune ou autre aventure chassoit ou amenoit les ditz Pescheurs de la Partie d'Angleterre en aucuns des Portz & Havres des Destroitz ou Dangiers du dite Duche; ou les Pescheurs du dite Duche, en aucuns des Portz & Havres ou Dangiers, du dites Royaume d'Angleterre, d'Irland, & de Calais, qu'ilz soient paisseblement & franchement Receuz & Traictez raisonablement d'une Couste & d'autre, en Payant aux Lieux ou Ilz arriveront Les Toileux Coustumes & Devoirs acouftumez; &
d'ilec puissent liberallement Retourner a tous leurs Nefz Apparelz & Biens sans Destourbier Arrest ne Empeschement; Pourveu que par les ditz Pescheurs d'ung Couste & d'autre ne soit commise aucune Fraude ne fait Dommaige.
Item, que es dites Portz d'Angleterre, d'Irland, & de Calais aucuns Escumeurs ne gens labourans sur la Guerre ne aussi Marchans Marriniers ne autres de quelque Condition, soient Angloys, Yrlandoys, Francois, ou autres de quelque Nation, ne seront souffertz Entrer ne Yssyr pour faire Grevance a Marchans, Facteurs, leurs Familiers, Maistres de Nefz, Mariniers, Pellerins, Clercs, & Pescheurs de Bretaigne, ne a leurs Biens & Marchandises, aincoys Gardera a son povoir le dit Roy les Marchans, Mariniers, & autres Gens du dit Paiis de Bretaigne, qui yront es dites Portz & Havres de toute Oppression & Dommaige que leur vouldroient faire les Subgectz du dit Roy, ou autres quelconques soient Ennemys du dite Paiis de Bretaigne, ou autres quelzconques; & aussi es Portz & Havres estans ou dite Pays de Bretaigne aucuns Escumeurs ne Gens labourans sur Guerre, ne aussi Marchans, Mariniers, ne autres de quelque condition, soient Bretons Francoys ou d'autres de quelque Natione ne seront souffers Entrer, ne Yssyr pour faire Grevance a Marchans Facteurs leurs Familiers Maistres de Nefz, Mariniers, Clercs, & Pescheurs de la partie d'Angleterre, ne a leurs Biens, & Marchandises, aincois seront Gardez le mieulx que faire se pourra ler Marchans, Mariniers, & Subgectz, du dite Party d'Angleterre, qui vendront es ditz Portz & Havres, de toute Oppression & Dommaige que leurs vouldroient faire les ditz Bretons, ou autres quelzconques soient Ennemys des Gens du Party d'Angleterre, ou autres.
Item, se, durant ce present Traicte, aucun Dommaige, que Dieu ne vuelle, estoit faict d'un Coste ou d'autre contre ce present Accord, Pourquoy Il convensist faire Requeste ou Poursuite que la Personne ou Personnes, de quelque Estat qu'ilz soient Jusques au Nombre de Dix Personnes & au tant de Chaulx ou au dessoubz, que de la Partie d'Angleterre (C'estassavoir) de par le dit Roy, ses Chancelier, Admiral, Tresorier, ou Chambellan qui pour lors seront; Et de la part du dit Duc, ses Chancellier, Mareschal, Admiral, & Grant Maistre, qui pour lors seront, Seront pour telles causes envoyez en Angleterre, Yrlande, a Calays, ou allieurs, d'un Coste, ou d'autre, pourront Passer par Terre, ou par Mer, Riviers, ou Eaues doulces seurement Entrer, & Demourer franchement es Villes fermees pareillement que dessus est declaire des autres Marchans d'un Coste & d'autre, & attendre a la poursuit de leurs Besognes par vertu de ce present Accord sans empeschement ne avoir pour ce autre Saufconduit.
Item, &, se par Escumeurs ou autres labourans sur la Guerre, aucuns Biens des Marchans de l'un ou autre Part, estoient Prins sur Mer ou Rivieres & Eaues doulces, & Amenez en aucuns des Portz & Havres d'un Partie ou de l'autre, que Iceulx Biens ne pourront Ilecques estre Venduz ne Aliennez sur Terre ne mys a Terre par les ditz Esscumeurs ou autres quelzconques, Amys ou Ennemys; Et s'ilz estoient ainsi Venduz, ou Aliennez sur Terre, ou mys a Terre, Restitution sera faicte des ditz Biens ou de leurs Valeurs Aux Marchans, Facteurs, ou Mariniers sur les quelz auront este Prins; Et auront les Officiers des Lieux Mandement, expres par Lettres patentes, tel quil appartendra de faire, faire la dite Restitution, toutes les foiz que le Cas y eschera, sur Paine de les Recouvrer sur eulx si les ditz Biens estoient ainsi Venduz ou Alienez a Terre ou mys a Terre de leur sceu ou souffrance; & avecques ce sera fait Deffence es Portz & Havres, d'un Coste & d'autre, sur certaines & grosses Paines, que aucune de quelque Nation qu'il soit ne Achate a Terre ne pour Mettre a Terre aucuns des ditz Biens.
Item, que es Victuailles Marchandises & autres Biens venans & alans du dit Paiis de Bretaigne ou de quelque Party que ce soit vers le dites Royaume d'Angleterre, Yrland, ou Calays, ou aussi venans du dite Paiis d'Angleterre ou de quelque autre Pays ou dite Pays de Bretaigne pour quelzconques Personnes, non Enemys a l'une Partie ne a l'autre, & en quelzconques Vaisseaux qui soient menez, ne sera par ceulx de l'une Partye ne de l'autre mys Empeschement ne Destourbier en quelconque maniere.
Item, Se, durant le temps de ce present Accord, aucuns Vasseaulz des Marchans, de la Partie d'Angleterre ou de Bretaigne, Chargez ou non Chargez, estoient par fortune de Tempest, par Force de Ventz, ou autrement Chassez, Ceulx de l'une Partie en aucuns des Portz & Havres de l'autre
Partie, les ditz Vasseaulx Avecques les ditz Marchans & Mariniers estans en Iceulx seront Receuz seurement & s'en pourront Partir franchement a tous leurs Biens & Marchandises sans contredit ne destourbier; Pourveu qu'ilz ne metteront a Terre, ne en autres Vaisseaux, leurs dits Biens, & Marchandises sans Congie & Licence des Officiers du Prince du Paiis ou autres ayans Povoir a ce.
Item, que les Maistres des Nefz, & Mariniers de la Partie d'Angleterre, a leur Venue, es Portz & Havres de Bretaigne, pourront faire licitement lyer leurs Nefz es ditz Ports & Havres, par la maniere que font les Bretons, sans encourir pour ce en aucune Forfaicture ou Amende, Sauf en ce qu'est les Places de Saint Mailo, Brest, & Tonq; es quelles ne feront Entree de leurs Navires, es Petitz Havres d'iceulx, sans le Congie des Cappitaines des Lieux, ou autres Officiers ayans Povoir a ce; Et semblablement le pourront faire les Maistres des Nefz, & Mariniers de Bretaigne, es Portz & Havres d'Angletere, sans & Excepte les Portz & Havres que Pareillement, par le Roy, seront Exceptez.
Item, durant ce present Traicte d'Entrecours, les Marchans, Maistres de Navires, & Mariniers du dite Paiis de Bretaigne ne ameneront par fraude ou couleur quelconque aucuns Biens, ou Marchandises, des Ennemis du dit Roy, ne de ses Subgitz par Mer; &, ou Cas qu'ilz en seront Interrogez par aucuns, Escumeurs ou autres Gens de la Partie d'Angleterre, Ilz en feront Juste & plaine Confession: Et pareillement les Marchans, Maistres de Nefz, & Mariniers de la partie d'Angleterre, ne ameneront par fraude ou couleur, quelconque aucunes Marchandises ne Biens des Estrangiers & Ennemys, des dite Paiis de Bretaigne; Et s'ilz en estoient Demandez ou Interrogez par aucunes du dite Paiis de Bretaigne, Ilz en feront Juste Confession, comme dit est; Et, par ce que dit est en ce present Traicte, n'est pas entendu que, si les Gens du dite Paiis de Bretaigne mettoient leurs Personnes, Biens, ou Marchandises, en Navires de Partie des Ennemis du dit Roy, non ayans Saufconduit de Lui, ne estans en Treues ne Abstinences de Guerre, avecqueques Lui que les Gens du dite Parti d'Angletere, ne peussent Prendre Acquerir a eulx les Personnes & Biens qu'ilz prendroient, dedens les Navires, Ennemys du dit Roy: Et aussi pourront les Gens de Bretaigne Prendre & Acquerir a eulx les Personnes & Biens du Partie d'Angleterre, qu'ilz trouveront en Navire Ennemis du dite Paiis de Bretaigne, non ayans Saufconduit du Duc, ne estans en Treue ne Abstinenee de Guerre avecques le dit Duc Ainsi qu'il est dit de ceulx du dite Party d'Angletere; Mais les Gens d'ung chascun Party pourront Mener & Ramener par Terre, par Mer, Rivieres & Eaues doulces, les ungs d'eulx ou Party de l'autre, & chascun d'eulx en son Party les Biens des Gens, qui ne seront Enemys de l'autre Party, sans qu'ilz en soient Empeschez, neque les Gens d'un Party ne de l'autre y Portent Dommaige en aucune maniere.
Item, Se, durant le temps de ce present Accord, aucune Nef ou Vasseau de la Partie d'Angleterre, Charges de Biens ou Marchandises par fortune Tempeste de Mer ou autrement, touchoit a Terre ou Perissoit, sur la Coste, ou Havre de Bretaigne, si en Icelle Nef ou Vasseau, demouroit Homme, Femme, Enfant, Chien, Chat, ou Coq vivant, les Hommes, Biens, ou Marchandises d'icelles demourront sauf a ceulx a qui Il appartendront en Payant Coustage raisonnable a ceulx qui les auront Sauvez, sans ce que les dits Biens puissent estre ditz Confisquez ne Parduz; Et aussi semblablement sera faict observe es Portz & Havres, & autres Parties d'Angleterre, Yrland, & Calays, au Regard des Navires de Bretaigne, qui par la maniere dessusdite toucheront a Terre ou Perilleront.
Item, que les Marchans d'Angleterre auront & pourront avoir & tenir es Villes de Bretaigne, Sauf es Villes de Saint Malo Brest & Toncq, es quelles n'auront nulle Demourence, se par les Cappitaines ou Gardes d'icelles Places n'estoit avise ou ordonne Hostelz pour eulx mesmes, & Joyront Illecques de toutes telles & pareilles, Franchises comme les autres Marchans Estrangiers qui ont Entrecours & Comunication de Marchans en Bretaigne, & seront Traictez aussi doulcement & gracieusement comme les autres Nations frecantans en Icellui Paiis Villes & Lieux d'icellui; Et pareillement les Marchans de Bretaigne auront & pourront avoir & tenir es Villes du dits Royaume d'Angleterre, Yrland, Ville & Marche de Calays, Sauf Semblablement es Villes, Lieux, & Places qui par les Lettres du Roy, en seront Exceptees, Hostelz pour eulx, & Joyront des dites Franchises & aussi seront Traictez comme dessus
est dit des dites Marchan d'Angleterre.
Item, Ou temps a venir ne sera parmis ne souffert, a nul quelconque Officier ou autre Personne, de la Partie d'Angleterre, a la Requeste de quelque Personne que ce soit, faire faire, ne suffrir estre fait aucun Arrest sur les Personnes de Subgectz du Duc, ne sur leurs Biens Navires ne Marchandises, pour quelque Cause que ce soit; Ne pareillement, ne sera souffert faire par les Officiers du Duc, sur les Subgectz du Roy, leurs Biens, Navires, ne Marchandises, Sans que tout premier, celui ou ceulx qui les vouldront ainsi Arrester apparoissent Mandement du Prince, ou qu'ilz ayant Commendement, Congie, & Licence de ceulx qui auront l'Administration de Justice sur les Lieux, Quelz, Justiciers, & Officiers, seront tenuz de prendre bonne & seure Caution de la Partie qui vouldront faire le dite Arrest, de Satisfaire la Partie, sur la quelle sera fait le dit Arrest, ou sur ses Navires, Biens, ou Marchandises de tous ses Interestz & Dommaiges, qu'il pourra avoir porte ou souffert, portera, ou soufferat a l'occasion d'icellui Arrest par autant qu'il sera de Raison, & sur Paine aus dits Officiers & Justiciers qui feront, ou souffreront estre fait, au contraire, d'en Respondre, Comme de leur propre Fait.
Item, s'il avenoit (que Dieu ne vuelle) que par aucune de l'une Coste, ou de l'autre aucune Chose feust faicte ou attemptee contre l'Estat de ce present Accord & Seurte en quelque Lieu ou Port par quelque voye, Ja pourtant ce present Accord ne sera tenu, ne entendu Enfraint, ne pour ce Guerre, Arrest, ne Destourbier d'aucun des Personnes, touchees en ce Traicte ne sera fait, ne meu; Mais sera fait Repare par le Segneur de l'un & de l'autre Partie, & mys en son premier, & deu Estat: Et est bien a savoir que, par ce present Traicte & Accord, ne pour riens qui soit contenu en ces Presentes, n'est aucunement contendu Prejudicier ne Desroger Aux Statuz, Constitutions, Ordonnences, Coustumes, Usaiges, Prohibitions, ne Deffences, faictes & establies avant ces heures, tant de la Partie du dit Roy, de ses Royaume & Paiis d'Angleterre, d'Yrlande, & de Calays, que aussi decelles du Duc Paiis & Duche de Bretaigne, si bien celles qui concernent l'Estapple de Calays, Comme autres quelzconques; Ains demourront les ditz Statuz, Coustumes, Usaiges, Prohibitions, Defences, & Establissemens, tant d'une Partie que d'autre en leur Vertue, & seront observees & gardees ainsi qu'ilz estoient paravant ces Presentes.
Les quelz Entrecours, Communication de Marchandise, Pescherie de Mer, & autres Choses necessaires dessus declarees, seront & demourront en leur force vertu & valeur, depuis le Dabte de ces Presentes, la Vye durant des ditz Roy & Duc, & par ung Au apres la Mort d'icelui des ditz Princes qui premier Decedera.
Toutes Les Quelles Articles & Points, Aussi bien des Treues & Abstinence de Guerre, Comme l'Entrecours, Communication de Marchandise, Pescherie de Mer, & autres Choses en la maniere & forme ce dessus contenuz & declairez, Nous les ditz Orateurs & Ambassadeurs du dit Duc, par vertu de nôtre Commission & par l'Auctorite & Puissance d'icelle, AVONS PROMIS & Promettons en bonne Foy ou Nom & pour la Part de notre dit Souverain Seigneur le Duc, qu'il Gardera & Observera, & fera Garder & Observer par ses Subgitz, en tant que a lui & a eulx touche & peult toucher, de Point en Point, Inviolablement sans Enfraindre tout ce que dessus selon que dit est; Et que notre dit Souverain Seigneur le Duc Ratiffiera & Confermera tout c'est notre Appointement, de mot en mot, par ses Lettres Patentes de Ratiffication & Confirmation, soubz son Grant Seel, & Icelles fera bailler & Delivrer, en la Cite de Londres, dedant le Jour & Feste de Toussains prochain venants, au dit Roy ses Commis & Depute, qu'el baillera & fera bailler & Delivrer le Semblable pour nôtre Souverain Seigneur le Duc.
Les Teneurs des quelles Commissions, dont cy dessus est fait mention, ensuivent, & sont telz.
Francois, par la Grace de Dieu, Duc de Bretaigne, Conte de Montfort, de Richemont, d'Estampes, & de Vertus; A tous ceulx qui ces presentes Lettres verront & orront, Salut.
Comme par cy devant, entre Treshault & Trespuissant Prince, mon Treshonnore Seigneur & Cousin le Roy d'Angleterre de present pour Lui ses Paiis & Subgetz d'une Part, & Nous &
les Nôtres d'autre, aient este prinses, accordees, & conclutes bonnes Treues, Abstinence de Guerre, & Entrecours de Marchandise, pour durer le temps & espace d'un An, qui de brief finira; Et icelui temps fini se pourroient faire Prinses & Pilleries a la Mer, & ailleurs des Subgetz de l'un Partye sur l'autre, qui pourroient estre cause de Guerre & Division entre mon dit Treshonnore Seigneur & Cousin ses Royaume, Paiis, & Subgetz d'une Part, & Nous, nôtre dit Duchie, Paiis, & Subgetz d'autre, qui Nous seroit a tresgrant Grief & Desplaisir,
Car Nous desirons de tout nôtre cueur vivre en bonne Amour & Union avecques mon dit Treshonnore Seigneur & Cousin, tant pour la grande & singuliere Amour que Lui portons a cause de la Noureture que par pluseurs Ans avons fait de Lui en nôtre Paiis & Duchie, que pour les Sceus, Honneurs, Prudence, & Vaillance qui habondent en sa Personne, aussi pour l'entretenement des bonnes Amittiez, Bienveillances, & Intelligences, que de long temps ont este entre feuz Princes de bonne memorie les Roys d'Angleterre Predecesseurs de mon dit Treshonnore Seigneur & Cousin leurs Royaume, Paiis, & Subgectz, & feuz Princes, de clere memoire, noz Predecesseurs Ducs de Bretaigne, a qui Dieu Pardoint, Nous nôtre Duchie, Paiis, & Subgectz d'autre,
Pourquoy savoir faisons que Nous,
A plain confians des Sceus, Loyaulte, Experience, & bonne Diligence de, noz bien Amez & Feaulx, Jehan le Bouteillier Chivalier Seigneur de Maupartnis, Maistres Jehan Troussier Chantre de Saint Malo, Rolland de la Villeeon nôtre Senneschal de Hennebend, noz Conseilliers & Chambellan, Maistre Francoys du Pou nôtre Secretaire,
Iceulx & Deux ou Trois d'eulx avons Fait, Institue, Estably, & Ordonne, & par ces Presentes Faisons, Instituons, Establissons; & Ordonnons, noz Procureurs, Orateurs, Ambassadeurs, & Espiciaulx Messaigiers,
Aus quelz & a Deulx ou Trois d'eulx avons Donne & Donnons par ces Presentes plain Povoir, Auctorite, Commission, & Mandement especial, de pour & ou Nom de Nous, noz Duchie, Paiis, & Subgectz, Traicter, Prendre, Accorder, & Conclure avecques mon dit Treshonnore Seigneur & Cousin le Roy d'Angleterre, ou ceulx qu'il lui plaira Commettre & Deputer, pour Lui, ses Royaume, Paiis, & Subjectz, Prorogation des dites Treues, Abstinence de Guerre, & Entrecours de Marchandise, jusques a tel temps quel par entre eulx sera avise, y Augmenter, les Interpreter, & Esclarsir, & de Nouveau, si mestier est, les Prendre, Acorder, & Conclure, s'ilz voient qu'il soit Requis pour le Bien de mon dit Treshonnore Seigneur & Cousin ses Royaume, Paiis, & Subgectz, & Nous & les Nôtres, ainsi qu'ilz verront l'avoir a faire,
Et generallement de faire en ce que dessus tout ce que ferions ou faire pourrions si presens estions; Pose que le Cas requiere Mandement plus especial, ou presence de Personne.
Promectons, en bonne Foy & Parolle de Prince, & par les Foy & Serment de nôtre Corps, avoir Ferme, Estable, & Agreable ce que par nos ditz Procureurs, Orateurs, Ambassadeurs, & Espiciaulx Messaigiers sera fait & Procure en ce que dessus, & le Ratiffier & en bailler noz Lettres Patentes lors que requis en serons.
En Tesmoing de ce Nous avons Signe ces Presentes & fait seeller de nôtre Grant Seel.
Donne en nôtre Ville de Nantes, le Cinquisme Jour de Juign, l'An Mille, Quatrecens, Quatrevingts Seix.
Henricus, Dei gratiâ, Rex Angliae & Franciae, & Dominus Hiberniae, omnibus, ad quos praesentes Literae pervenerint, Salutem.
Sciatis quòd,
Cùm Illustrissimus Princeps Consanguineus noster Carissimus Franciscus, eadem Gratiâ, Dux Britanniae, spectabiles & prudentes Viros, Johannem le Boutiller Dominum de Maupartuys Militem, Magistros, Johannem Troussier Praecentorem Ecclesiae Macloviensis, Rollandum de la Villeon Seneschallum de Hennebound, Consiliarios, ac Magistrum Franciscum du Pou Secretarium, suos Procuratores, Oratores, Ambassiatores, & Nuncios speciales ad Nos destinaverit, cum Potestate, Auctoritate, & Mandato speciali de & super Treugis, Guerrarum Abstinentiâ, & Mercium Intercursu, jam nuper pro uno Anno, in brevi expiraturo, inter Nos & dictum Consanguineum nostrum captis & conclusis, Nobiscum aut cum hiis quos deputare vellemus Tractandi, Accordandi, & Concludendi, ipsosque Treugas, Guerrarum Abstinentiam, & Intercursum, ad tale tempus, de quo inter Nos aut De-
putatos nostros ex unâ Parte, & dictos Ambassiatores ex alterâ Parte, poterit concordari, Prorogandi, Augmentandi, Interpretandi, & Declarandi, ac de Novo, si necesse fuerit, Capiendi, Concordandi, & Concludendi, prout ipsis Ambassiatoribus, Nobisque aut Deputatis nostris hujusmodi, pro Bono & Utilitate unius & alterius Partis faciendum videbitur, quemadmodum in Literis Patentibus dicti Consanguinei nostri, de Dato Quinti Diei Junii apud Villam de Nanntes, Anno instanti, haec & alia hujusmodi, Auctoritatem & Potestatem dictis Ambassiatoribus attributam concernentia, pleniùs continentur,
Nos,
Considerantes quàm Placitum sit Deo Auctori Pacis Principes & Populos Christianos Effusionem Christiani Sanguinis devitare, seseque amicabili Communicatione mutuò prosequi, ut sub bona & firma semper Securitate invicem conversentur, ipsius Illustrissimi Principis Ducis Britanniae Consanguinei nostri carissimi votivis Desideriis, pro more Antecessorum nostrorum Regum Angliae, qui cum, bonae memoriae, Britanniae Ducibus Tractatus amicabiles saepissimè iniêrunt, morem gerentes,
De Fidelitate igitur, Circumspectione, & Industriâ, Praedilectorum & Fidelium nostrorum, Venerabilis Patris Johannis Episcopi Lincolniensis, Thomae Boutiller Comitis de Ormont Carissimae Conthoralis nostrae Reginae Camerarii, Magistrorum, Henrici Aynesworth Legum Doctoris Canonici Lincolniensis in Officio Privati Sigilli nostri Secundarii, ac Johannis Bailli Capellani nostri ac in Capella nostra Regia de Windesore Canonici, Consiliariorum nostrorum, plenariè confidentes,
Ipsos nostros veros & indubitatos Procuratores, Commissarios, & Deputatos Facimus, Constituimus, & Ordinamus per Praesentes,
Dantes & Concedentes eisdem Procuratoribus, Commissariis, & Deputatis nostris, Tribusque aut Duobus eorum, plenam Potestatem, Auctoritatem, ac Mandatum speciale, pro Nobis & Nomine nostro, Regno nostro Angliae, Terris, Dominiis, & Subditis nostris quibuscumque, Tractandi, Concordandi, & Concludendi, cum Oratoribus & Ambassiatoribus dicti Illustrissimi Principis Francisci Ducis Britanniae Consanguinei nostri carissimi supranominatis, pro ipso Duce Ducatu suo Britanniae, Patriis & Subditis suis quibuscumque, de & super Treugis, Guerrarum Abstinentiâ, & Mercium Intercursu, adhuc inter Nos & dictum Consanguineum nostrum durantibus, Prorogandis, Augmentandis, Interpretandis, & Declarandis, & de Novo, si ita visum fuerit oportunum, Capiendis, Concordandis, & Concludendis usque ad tale Tempus de & super quo tàm nostri Commissarii quàm Ambassiatores Ducis antedicti inter se poterunt concordare, & sicut eis pro Bono & Utilitate utriusque Partis videbitur faciendum,
Et generaliter caetera omnia Faciendi in Praemissis, quae Nos faceremus seu facere possemus si Praesentes essemus, etiam si talia forent quae Mandatum magis exigant speciale;
Promittentes & Promittimus, bonâ Fide & in Verbo Regio, Nos Ratum, Gratum, & Firmum habituros quicquid per dictos nostros Commissarios, Procuratores, seu Deputatos in forma praedicta Actum, Gestum, seu Procuratum fuerit in Praemissis, aut aliquo Praemissorum, & quòd super hoc dabimus Literas nostras Patentes Confirmatorias quando ad id fuerimus debitè requisiti.
In cujus Rei Testimonium has Litteras nostras fieri fecimus Patentes.
Teste meipso apud Westmonasterium, decimo nono Die Julii, Anno Regni nostri primo.
En Tesmoing de quoy Nous les dites Orateurs & Ambassadeurs du dit Duc de Bretaigne nôtre Souverain Seigneur avons Signe ces Presentes de noz Signes Manuelz, & seellez de noz Seaulx en la Cite de Londres, le xxij Jour de Juillet, l'An Mille, Quatrecens, Quatrevings & Six, pour estre baillees & delivrees au Roy d'Angleterre.
I. Le Bouteillier.
J. Troussier.
R. De La Villeon.
F. Du Pou.
Sub Sigillis Duobus cerae rubrae, pendentibus a Caudis Pergamenae. |
