March 10. Treaty with the duke of Burgundy, count of Flanders, for mercantile intercourse. Additional articles of the treaty. Westm.
O. viii. 469. H. iv. p. i. 109. |
De Conventionibus cum Duce Burgundiae.
An. 8. H. 4. Ex. Rot. Fr. 5. H. 5. m. 12.
Henry, par la grace de Dieu, Roy d'Engleterre & de France, & Seigneur d'Irland, a toutz ceulx, que cestes Lettres verront ou orront, Salutz.
Come Nous aioms ordeignez & establiz, par noz Lettres Patentes, noz Ambassatours & Messages pur assembler ovesque les Commys, Deputes, & Messages de 'Duc de Burgoigne Count de Flaundres, a ceo suffisauntment de Poair funduz, & ovesque eux Treter & Accorder certein Trete & Accorde, pur Nous & nostre dit Roialme d'Engleterre, & noz autres Villes, Seigneuries, & Juredictions, d'une Partie, & le dit Duc pur Luy, & sa Paiis de Flandres, d'autre,
Et, par vertue du Poair & Auctorite, par Nous Commys a noz ditz Ambassatours, mesmes noz Ambassatours, & les Commys du dit Duc, tant par vertue des Licence, Poair, & Auctorite de nostre Adversaire de France son Soveraigne Seigneur, a luy attribut, pour Traiter ovesque Nous, & noz Ambassatours, & Deputees, come de Luy mesmes, ount assemblez & tenuez plusours Journees, en tant que par noz ditz Ambassatours aient este deliverez a les ditz Commys certains Pointes & Articles, les quelles les ditz Commys aient apportes au Court de nostre Adversaire de France,
Par Licence, Auctorite, & Poair de qui, le dit Duc de Burgoigne, par ses ditz Commys, a empris & commence le dite Traite,
Et en tant que les ditz Articles, par noz ditz Ambassiatours baillez, n'ome peu passer, sanz autre avis de ce prendre, pur aucuns causes & empeschement,
A Fin d'entretenir la dite Trete, & q'il ne perist, mye plusours Journees du dite Traite, depuis de nostre commandement, ount este tenuez, sur le dit Fait, ovesque les ditz Commys,
Et, tant a este en dit Traite procede entre eux, que pur, les Marchandises avoir Cours seurement entre nostre dit Roiaulme d'Engleterre, & noz autres Paiis, Villes, & Juredictions, & la dit Paiis de Flandres, & auxi pour Pilerins, d'une cost & d'autre, passer & faire leur Pellerinages, les Clerks de nostre dit Roialme d'Engleterre aler au Rome, & les Pescheurs generalment aler peschier sur Mer, le space d'un An durant apres la Publicacion de cest present Accorde, suppose & non obstant que la Guerre soit ou feust ouert entre Nous & nostre dit Adversaire de France,
Noz ditz Ambassatours de nostre Scen & Voluntee, & les ditz Commys par Licence, Poair, & Auctorite susditz, ount consentuz & accordez, chescun pur sa Partie, sicome par noz ditz Ambassatours nous a este Rapportee, les Pointes & Articles que s'ensuent,
Primerement, que toutz Marchantz, tant du Roialme d'Engleterre, de Caleis, d'Irland, & d'autres Paiis, Subgiez au Roy d'Engleterre, ou occupe par eux, come les Marchans de Flandres & d'autres Paiis du Roialme de Fraunce, & d'autres Paiis quelxconques (soient Marchans de Lains, de Cuirs, de Vitailles, ou de quelxconques autres Marchandises) & leurs Facteurs, & Familiers, puissent seurement aler par Terre, a Pie, a Chival, & autrement, & en passant en & oultre l'Eaue de Gravelinghes, de Caleis en Flandres, & de Flandres en Caleis, ensemble lours Biens & Marchandises, en tenant lour Chemyn entre la Mer & les Chasteux de Merke & d'Oye, & Marchander les uns avesque les autres de toutes maniers des Marchandises Viures & autres, & mener & ramener ou faire mener & remener de Caleis en Flandres, & de Flandres a Caleys, lours ditz Marchandises Viures, & autres (except Armiers, Artilleries, Canons, & autres choses semblables, & invasibles) & que les ditz Marchans, lours Facteurs, & Familiers, puissent, chescun d'eux a qui il serra necessare, Achatier, & avoir franchement de ceulx de l'autre cost des Viures, & les amener par Terre en & outre l'Eaue suisdite, les uns aux autres (c'estassavoir) ceulx de Caleys & autres de la Partie d'Engleterre en Flandres, & ceulx de Flandres & autres de la Partie de Fraunce a Caleys, par la chemyn dessuisdit, senz empeschement, destourber, ou defense quelconque, ne pur ceo encourrir en ascune Paine, & saunz ce estre Reprins de leurs Seigneurs, de l'une Partie ne de l'autre, ne de lours Officiers.
Item, que touz Marchanz d'Engleterre, de Caleys, d'Irland, & d'autres Paiis, Subgiez au Roy d'Engleterre, ou occupe par eux (soyent Marchans de Lains, de Cuers, Vitailles, ou de quelconques autres Marchandises) leurs Facteurs, & Familiers, & Maistres de Niefs, & Maroniers, puissent aler, passer, & repasser, converser, venir, estre, & demourer par Mer seurement ou dit Paiis de Flandres, & dedeins les Portes & Haures de celluy Paiis, avec leurs Biens, Marchandises, & Niefs, Marchander avec toutz Marchans de Flandres, & autres Marchans quelxconques, & leurs Facteurs, & Familiers, de touts maners de Marchandises, tant Viures come autres (excepte Armeurs, Artilleries, Canons, & autres Choses semblables, & invasibles) & en partir avec leurs dis Niefs, Biens, Marchandises, Viures, & autres, q'ils purront ramener & retourner seurement,
Et que pareillment touz Marchanz du dit Pays de Flandres, ou demourans en ycellui Paiis (soient Marchans de Lains, Cuirs, Vitailles, ou de quelxconques autres Marchandises) lours Facteurs, Familiers, Mestiers des Niefs, & Maroniers, puissent aler, passer, repasser, converser, estre, & demourir par Mer seurement, au Roialme d'Engleterre, a Caleys, & es autres Paiis Subgiez du dit Roialme d'Engleterre, ou occupe par eux, & dedeinz les Portes & Haures d'iceulx Roialmes d'Engleterre, de Cales, & autres Villes & Lieux, Subgiez ou occupez de la partie d'Engleterre, avec leurs Biens, Marchandises, & Niefs, & Marchander ovec touz Marchans Englois, & autres Marchans quelxconques, & leurs Facteurs, & Familers, de tous maneres de Marchandises, tant Viuers come autres (Except les ditz Armuers, Artilleries, Canons, & autres Choses semblables, & invasibles) & mener en Engleterre a Caleis, & es autres Villes & Lieux, Subgiez ou occupez de la dite partie d'Engleterre, leurs Biens propres, Viures & autres, & les Biens d'autres demourans ou dit Paiis de Flandres, & en partir & retournir seurement a tout leurs ditz Biens, Marchandises & Niefs,
Et auxi que les ditz Marchans, leurs Facteurs, & Familiers, puissent, chescun d'eux, a qi il sera necessaire, Achater, & avoir franchement de ceulx de l'autre Partie des Viuers, & les amener par Mer les uns aux autres (c'estassaver) eux d'Engleterre & de Caleys en Flandres, & ceulx de Flandres en Engleterre & a Caleis, sens en estre Reprins de leurs Seigneurs, de l'une Partie ne de l'autre, ne de leurs Officers,
Ne que par ceux de la Partie d'Engleterre aux Marchans de Flandres, ou demourans en Flandres, Domage, Empeschement, ne Destourbier soit fait, ne aussi par ceulx du dit Paiis de Flandres aux Marchans de la dite Partie d'Engleterre, par voie de fait, pour cause de Guerre, Pillerie, Robberie fait ou a Faire, ne autrement en aucune manere pur cause quelconque, en paiant d'une Partie ou d'autre les Toulieux & Devoirs duez & accustumez,
Par unceo que les ditz Marchans, d'une couste & d'autre, leurs Facteurs & Familiers, Maistres des Niefs, & Maroniers, aux queux serra bien loisible d'avoir avecques eux en leurs Niefs Armuers & Artilleries, pour la Garde & Sauvement de lours Corps & Biens, en alant par Mer, & ycelles amener avecques eux, en queconques Haures q'ils arriveront, a l'issu de leurs Niefs, laisseront leurs Armuers en leurs ditz Niefs ou Vesseaulx: Except Coutel, Dague, ou Espee qu'ils porront porter, se bon lour semble, jusques a lour Hostielx; ou ils serront tenuz de lassier leurs ditz Espees.
Item, que les ditz Marchanz de la Partie d'Engleterre, leur Facteurs, & Familiers, Maistres des Niefs, & Maroniers, puissent estre, converser, & demourer seurement ou Paiis de Flandres, & es Portes & Haures d'icelluy Paiis, avec leurs Niefs, Biens, & Marchandises quelxconques, Viuers, & autres, & semblablement les Marchans de Flandres, ou demourans en Flandres, & leurs Facteurs, & Familiers, Maisters des Niefs, & Maroniers, puissent estre, converser, & demourer seurement, en Roialme d'Engleterre, a Caleis, & as autres Villes & Lieux, Subgiez & occupiez des Englois, sanz ceo que par ceulx de Flandres, ne autres de la Partie de France, ou autres quelxconques, soit Mesfait, ou donne Empeschement, ne Destourbier as Marchans de la Partie d'Engleterre, ne par ceulx d'icelle Partie d'Engleterre, ou autres quelxconques, as Marchans de Flandres, ou demourans en Flandres, ne a leurs Facteurs & Familiers, Maisters des Niefs, & Maroniers, d'une couste & d'autre, par voie de Fait, pour cause de Guerre, Pillerie, Robberie fait ou a faire, ne autrement en aucune manere,
Purveux que les Merchans de France, & d'autres Paiis quelxconques, soient aussi seurement, a tout leurs Niefs & Biens, ou dit Paiis de Flandres, & es Portes & Haures d'icellui, sanz ce que par ceulx de la Partie d'Engleterre leur soit illoeques Mesfait ou donne Empeschement, ne Destourbier,
Et auxi que les ditz Marchans de la Partie d'Engleterre & de Flandres, leurs Facteurs, & Familiers, Maisters des Niefs, & Maroniers, puisfent ceulx de l'une Partie entrer es Villes Fermes de l'autre Partie, saunz en demaunder congie, fors le primer fois seulement a chescun venue q'ils feront de l'une Paiis en l'autre,
Pourveu que aux Portz des dites Villes, ou il sera Besoing aux ditz Marchans, leurs Fauteurs & Familiers, Maisters des Niefs, & Maroniers, de demander congie, soient mys certains Gents qui aient pouer de lour donner le dit Congie d'entrer,
Et, en Cas qu'ils ne trouueront aucuns tielx Gens aux ditz Portz, que eux purront licetement & saunz aucun empeschement entrer, chevancier, ou aler jusques a lours Hostielx, & illoeques demourer saunz partier, jusques a ceo que leurs Hostes auroient signifie lour Venue aux Capitains ou Officers des dites Villes,
Les quelles Hostes ou leurs Servans, apres ceo qu'ils en serront requis, serront tenuz tantost, sur la Venue des ditz Marchanz, de faire signifiance de lour Venue aux ditz Capitains ou Officers,
Et, en Cas que par Negligence ou autrement la dite Signifiance ne soit fait, que les Marchans, dedeins Deux Heures apres lour Venue, purront departer, aler, & passer avant sur lour Chemin & en leurs Afairs,
Et se eulx trouvoient aux ditz Portes aucune Persone ou Persones, & par lour Congie ils feussent entrez es dites Villes fermees, que eulx ne Forferont de riens, ja soit ceo que celluy ou ceux, que lour auraient donne le dit Congie, n'en eust aucune puissance, mais l'eust fait par simplice, fraude ou mal engyn,
Item, que toutz Pelerins, d'une couste & d'autre, en alant en Pelerinage, & auxi les Clercs de dit Roialme d'Engleterre, en alant vers la Court de Rome pour faire lour Besoingnes, puissent entrer par Mer, & auxi par Terre, a Pie, a Chival, ou autrement, ceulx de l'une Partie ou Paiis de l'autre Partie, & passer & repasser paisiblement par ycelx, & y estre Seurement & Franchement, & auxi aler, passer & repasser, par Terre, a Pie, a Chival, ou autrement, de Caleys en Flandres, & en oultre l'Eaue de Gravelinges, & de Flandres a Caleys, en tenant lour Chemyn entre la Mer & les ditz Chasteaulx de Merke & d'Oye, sanz ce que par ceulx de Flandres, ou autres de la Partie de France, ne autres quelxconques, soit Mesfait, ou donne Empeschement ne Destourber aux Pelerins ou Clercs de la Partie d'Engleterre, ne par ceulx d'icelle Partie d'Engleterre ne autres quelconques aux Pelerins de Flandres, ou demourans en Flandres, par voie de Fait, pour cause de Guerre, Pillerie, Robberie fait, ou a faire, ne autrement en aucune maniere,
Pourveu que, a l'entrer es Villes fermees, ils prendront Congies aux Gardes des Portes de y entrer, & ne demourent en une Ville ferme ou autre que un Nuyt, se n'estoit que pour Maladie, pur faut de Vent, ou de Navire, s'il advenoit sur Port ou Haure de Mer, ou pur faire ou recevoir les Changes de leur Argent, il leur convenist faire pluis longe Demour,
Et si mestier estoit, & en estoient requis, a l'entrer es dites Villes fermees, ceulx de l'une Partie feront seurement a l'autre Partie, que pour mal faire ou purchasser au Roy, ne a ses Roialme & Subgiez, ne as Villes, ou au Paiis, ils ne passent par ycelles,
Et Pourveu auxi que aux Portes des dites Villes fermes, ou il sera Besoing aux dites Pelerins & Clers de demander Congie, soyent mys certains Gens qui aient Pouvoir de leur donner le dit Congie d'entrer, & de rescevoir d'eulx, se mestier est, le Seurement par la maniere desuisdit,
Et, en Cas q'ils ne trouveront aucuns telles Gens aux dites Portes, que eux porront licitement & saunz aucun empeschement Entrer, Chevancer, ou Aler, jusques a lours Hostealx, & illoeques Demourers, sanz partir, jusques a ce que leurs Hostes auroient signifie lour Venue aux Capitaines ou Officers des dites Villes,
Les quelles Hostes ou lour Servans, apres ce q'ils en serront requis, serront tenuz tantost, sur la Venue de dites Pelerins & Clercs, de faire signifiance de lour Venue aux ditz Capitains ou Officers,
Et, en cas que, par Negligence, ou autrement, la dite Signifiance ne soit fait, que les dites Pelerins & Clercs, dedeins Deux Heures apres leur Venue, purront departier, aler, & passer avant sur lour Chemyn & en leurs Affaires,
Et se eulx trovoient aux dites Portes aucune Persone ou Persones, & par lour Congie ils feussent entrez es dites Villes fermees, que eulx ne forferont de riens, ja soit ceo que celuy ou ceulx, qui leur auroient donne le dit Congie, n'en eust aucune Puissance, mais l'eust fait par simplesse, fraude, ou mal engyn.
Item, que touz Pescheurs, tant d'Engleterre, de Caleys, & d'autres Paiis & Lieux Subgiez & occupiez par les Engloys, come de Paiis de Flandres, de Picardie, Normandie, Bretaigne, & generalment de tout le Roialme de France, porront paisiblement aler par tout sur Mer, pour Peschier & Gainer lour Viuer, sanz Empeschement ou Destourbier,
Et iavec ce, se fortune ou autre aventure chassoit ou amenoit les ditz Pescheurs d'Engleterre, & des autres Villes & Lieux occupez & tenuz par les Englois, en aucuns des Haures, Portes, Destrois, ou Daugiers des dites Paiis de Flandres, Picardie, Normandie, Bretaigne, & autres de Roialme de France, ou les ditz Pescheurs d'iceulx Paiis de Flandres, de Picardie, de Normandie, Bretaigne, & autres de Roialme de France, en aucuns des Portes, Haures, Destrois, ou Daugiers de Roialme d'Engleterre, de Caleis, & des autres Paiis & Lieux subgiez ou occupez par les Engloys, qu'ilz y soient paisiblement & franchement receuz & traitez raisonablement d'une couste & d'autre (en paiant es Lieux, ou ils arriveront, les Tonlieux & Devoirs auncienment accustumez) & d'illoeques puissent aler liberalment; Pourveu que par les dites Pescheurs d'une couste & d'autre ne soit commisse aucune fraude.
Item, que, es Portes & Haures de Flandres, aucuns Escumers, ne Gens labourans sur la Guerre, soient Francois, Flamens, ou d'autres Paiis quelxconques, ne serront soeffrez entrer, ne issir pur faire Grevance a Marchans, leurs Facteurs, Familiers, Maistres de Niefs, & Maroniers, Pelerins, Clercs, & Pescheurs, de la Partie de France, d'Engleterre, ne des autres Paiis quelxconques, ne a leurs Biens & Marchandises,
Et auxi que as Portes & Haures d'Engleterre, & de Caleys, aucuns Escumeurs, ne Gens labourans sur la Guerre, soient Engloys, Irlandois, ne d'autres Paiis quelxconques, ne seront suffrez entrer, ne issir, pour faire Grevance aux Marchans, leurs Facteurs, & Familiers, Maistres des Niefs, Maroniers, Pelerins, & Pescheurs de Flandres, ne a leurs Biens & Marchandises.
Item, se, durant le dit Terme, aucune Dommage (que Dieu ne vueille) estoit fait, d'une coste ou d'autre, contre ceste present Accord, par quoy il en convenist faire Requeste ou Poursieute, que la Persone ou Persones, de quelque Estat q'ils soyent, jusques au Nombre de Dix Persones, & au tant de Chevaux ou au dessoubz, qui de la Partie d'Engleterre (c'estassavoir) depar le Roy d'Engleterre, depar le Capitaine du Caleis, ou depar la Compaigne de l'Estaple au dit Lieux de Caleis, & de la Partie de France, ou de Flandres, depar le Roi leur Seigneur, depar le Duc de Burgoigne, ou depar les Quatre Membres du dit Paiis de Flandres, ou aucuns d'iceulx, seront pour celle Cause envoiez en Engleterre, a Caleys, en France, en Flandres, ou aillours d'une couste & d'autre, pourront passer par Terre & par Mer seurement, de demourer franchement, & entrer es Villes fermes, pareillement come desus est declare des Marchans, d'une couste & d'autre, & entendre a la pursuite de leur Besoignes, par vertue de cest present Accord, saunz Empeschement ne avoir pour ce autre Sauf conduit.
Item, que, le dit terme durant, les Marchans de Brabant, de Holland, Zelland, d'Italie, & autres (qui ont accustume & frequenter l'Estaple des Lains a Caleys) purront, par Mer & par Terre, aler a dit Lieu de Caleys, & en retourner seurement a tout leurs Lains & Marchandises, & aussi aler & retourner en Flandres sanz Empeschement ne Destourbier: en paiant les Devoirs pour ceo duez & accustumez; par ainsi qu'ils ne mesnent ou portent Armuers, Artilleries, Canons, ou autres Choses semblables, & invasibles.
Item, s'il avenoit (que Dieu ne vueille) que, par aucune, de l'une couste ou de l'autre, aucune Chose fuisse fait ou attempte contre l'estat de cest present Accord & Seurtee, en quelconque Lieu ou par quelconque voie, ja pur tant cest Accorde ne serra tenu ne en-
tendue Enfraint, ne pour ceo Guerre, Arrest, ne Destourbier d'aucuns des Personnes, touchez en ceste Traitie, ne serra fait ne meu, mais sera le Fait Repairè par les Seigneurs de l'une & l'autre Partie, & mis en son primer Estat & deu.
Savoir faisons que Nous,
Eu sur les ditz Pointes & Articles deliberation, par l'avis de nostre Conseil, pour le bien & utilitie de la Cours & l'Avancement de les ditz Marchandises,
Tous les Pointes & Articles desfuis declarez & chescun d'icellui,
Les quelles, de nostre Commandement & Volunte, par noz ditz Ambassatours, ovesque les Commys du dit Duc, ount ainsi este Accordez,
Tant par nostre dit Roialme D'Engleterre, come pour Ville de Caleys, & pour touz noz autres Villes, Seignuries, & Lieux a nous appurtenans & obeissans, aians Agreables, ycelles avoms Loe, Approve, & Conferme, & par la tenure de ces Presens Leons, Approvons, & Confirmons,
Promettons en bone foie, & en parolle de Roy, a les tenir & faire tenir fermement & loialment saunz enfraindre, ne aler ou faire ou souffrer estre fait ou ale a l'encontre par Nous, noz Officers, Subgiz, Aliez, ou Bienvuellans quelxconques, durant le dit temps,
Si Donnons en Mandement a nostre Admiral de la Mer, a le Gardein de Cinque portes, & a tous Capitains, Viscountz, Maires, Baillifs, Conestables, Ministres, Gardeins des Portes, Villes fermes, & autres Forteresses queconques, & autres noz Foialx, Liges, & Subgiez a qi appertiendra, que le dit Traite & Accorde, assemble toutes & chescun des Choses, & Articles, & Pointz desusditz, teignent & gardent, facent tenir & garder, & en lassent, facent & soeffrent joyer & user paisiblement les Marchans, lours Facteurs, Familiers, Maisters des Niefs & Maroniers, Pellerins, Clers, Pescheurs, & autres designes en dit Traite & Accorde, & chescune d'eulx, d'une couste & d'autre, paissiblement & pleignement, durant le temps desusdite, tout solonc le Tenure des ditz Traitz & Accordez sanz Empeschement, ne faire ou aler, ne soeffrer estre fait ou ale a l'encontre en aucune manere,
Et les ditz Choses publient & facent publier en toutes les Villes, Portes, Haures, & autres Lieus ou l'en a accustume a faire Criez & Publications depar Nous, ou il appartiendra, & dont ils seront requis, affin que aucun n'en puisse pretendre ignorance,
Et les Transgresseurs, s'aucuns an ey a faisans au contraire, punissent vigoroussement come il appertiendra par raison, si que ce soit Exemple aux autres, & ovesque ce facent faire Restitution des Damages a celx, & par la manere qu'il appertiendra, sanz deport ou delaie, ne sur ceo attendre autre Mandement de Nous.
En Tesmoignance de quele Chose Nous avons fait faire cestes noz Lettres Patentes,
Don. soubz nostre Graund Seal, a nostre Paloys de Westm. le Disme jour de Marcz, L'An de Grace Mill. Quatrecens & Soyx, & de nostre Regne l'An Oeptisme.
Henry, par la Grace de Dieu, Roy D'Engleterre & de France, & Seigneur d'Irland, A tous ceulx, qui cestes verront ou orront, Saluz.
Come par le Traitie,
De nostre commandement & Ordinance, fait, par noz Ambassatours, pour Nous & nostre Roialme D'Engleterre, & noz autres Paiis, Seignuries, Villes, & Juredictions, ovesque les Commys & Messages du Duc de Burgoigne, Count de Flandres, des Licences, Povoir, & Auctorite de nostre Adversaire de France, son Soveraigne Seigneur, a Luy attribute, pour sa Paiis de Flandres,
Plusours Points & Articles aient este Passez & accordez, de nostre sceu & volunte, par noz ditz Ambassatours, ovesque les Commys le dit Duc, par vertue des Licences, Povoirs, & Auctoritee dessusditz, pour les Marchandises avoir Cours seurment entre nostre Roialme D'Engleterre & noz autres Seignuries, & Juredicions, & les dites Countee & Paiis de Flandres, par les Pelerins, d'une couste & d'autre, passes a Faire lour Pillerinages, les Clercs de nostre dit Roialme D'Engleterre aler a Rome, Et les Pescheurs generalment aler Pescher par tout sur Mer le space d'un An, durant apres le Publication du dit Accorde, suppose & non obstant que le Guerre soit ou fust overt entre Nous & nostre Adversaire de France,
Sicome par noz autres Lettres, de Confirmacion sur ceo faitz, peut apparere,
Et sil soit ainsi que pur les ditz Marchandises estre exerce pluys Seurement, & obvier as plusours Inconveniens, Griefs, Damages, & Perils, que autrement eussent peu & purroient ensuer as ditz Marchans, Pillerins, Clercs, & Pescheurs, tant en Corps, come en Biens, noz ditz Ambassatours, en outre & par desus les ditz Poins & Articles, comprisez en noz ditz autres Lettres, aient aussy, de noz Sceu, Volunte, & Commandement, accorde, depar Nous, ovesque les Commys du dit Duc les Pointes & Articles qui ensuient,
Premiers, que le dit Terme d'une An durant, par ceulx de la Partie d'Engleterre sur la Partie de Flandres, ne par ceulx de Flandres sur la Partie d'Engleterre, ne sera fait ascune Violence, Desaise, ou Dammage aux Marchans, Maistres des Niefs, Maronniers, Pelerins, Clercs, Pescheurs, d'une couste & d'autre, ne a leurs Facteurs, Familiers, ou Serviteurs, ne a leurs Biens ou Vasseulx, en queconque Lieu qu'ils trouvent sur Mer, ne de quelconque Partie q'ils veignent.
Item, par Escumers, ou autres Gens labourans sur la Guerre, aucuns Biens des Marchans, D'Engleterre, ou de Flandres, estoient prins sur Mer, & amenez en aucuns des Portes ou Haures de l'une Partie ou de l'autre, que icelx Biens ne purront illoeques estre Venduz ne Alienez sur Terre, ne mis a Terre:
Et, s'ils estoyent ainsi Venduz, Alienez sur Terre, ou mys a Terre, que Restitution Serra fait des ditz Biens, ou de leur Valeur, aux Marchans de qui on les auroit prins:
Et aurount les Officers des Lieulx Mandement expres, par Lettres Patentes, tel quel appertendra, de faire faire la dite Restitution, toutes les fois que le cas eschera, sur Paine de Recouvre sur eulx, se les diz Biens estoient ainsi Venduz, ou Alienez a Terre, ou mis a Terre de leur sceu ou sueffrance:
Et, avec ce, sera faite Deffense es Portes & Haures, d'une coste & d'autre, sur certeins & grosses Paines, que aucune, de quelconque Nacion qu'il soit, ne Achate a Terre, ne Pourmettre a Terre aucuns des ditz Biens.
Item, ques es Vitailles, Marchandises, & autres Biens, venians des Parties de l'Oist vers le Roialme D'Engleterre, ou a Caleys, ou devers Flandres, par quelxconques Persones, non Ennemis a l'une Partie ou a l'autre, & en quelxconque Vasseulx Ils soient menez, ne serra, par ceulx de l'une Parte ne de l'autre, mis Empeschement ne Destourbier en quelconque manere.
Item, se, durant le dit Terme d'un An, aucuns Vesseulx des Marchans, de la Partie D'Engleterre, ou de Flandres, non ordennez pour Guerre, chargiez, ou non chargiez, estoient, par fortune du temps, par force de Venns, ou autrement Chassiez, ceulx de l'une Partie, en aucuns des Ports ou Haures de l'autre Partie, que les ditz Vesseaulx, avec les Marchans & Marronniers, estans en yceulx, y seront receuz Seurement, & s'en pourront partir franchement, a tout lour Biens & Marchandises, sauns contredit ne destourbier, Purveu q'ils ne mettent a Terre, n'en autres Vasseulx, leurs dits Biens & Marchandises, sanz Congie & Licence des Officers du Prince du Paiis, ou d'autres aians Povoir a ce.
Item, que la dit Partie D'Engleterre sera designer Chemin, graunde & large, entre Caleis & Gravelynges, pour les Marchans d'une couste & d'autre, & autres comprins en ceste Seurtee, y aler, passer, & retourner seurment:
Et le dessusdit Duc de Burgoigne, pour la partie de Flandres, sera avoir & designer, pour les Marchans & autres Persones de la Partie D'Engleterre dessuis exprumez, Chemin, graunde & large assez pour aler, passer, & retourner Seurement, par les Dunes de Flandres, saunz y estre Arrestez ne Empeschez, par ainsi qu'ilz ne ameisnent avecques eulx aucuns leurs Chiens, ne facent aucuns Dommages ou prinse des Connis es ditz Dunes.
Item, en cas que aucuns Marchans, Maistre des Niefs, ou Maronniers, de la Partie d'Engleterre, ou de Flandres, estans es Portes & Haures de l'une Partie ou de l'autre, se traisissent a aucun Nief, venant de la haute Mer, pur parler a ceux de la dit Nief, avant que l'Officer du Prince, a qui il appertyent, y eust parle, que pour ce ils n'encurrent en aucune Forfaiture ou Amend.
Item, que les Marchans d'Engleterre & de Flandres, leurs Facteurs, Familiers, Maistres des Niefs, ne aucuns d'eulx, pur nul Trespas ou Depredation, qui eit este fait par l'une Partie a l'autre, sur Mer, ne sur Terre, par avant le temps de cest present Accorde, ne seront ceulx de l'une Partie ou Paiis de l'autre Grevez ne Desaisez en Corps n'en Biens, ne pour ceo eux, ne leurs Niefs, ou Biens Arrestez ne Traiez a Loi par aucuns Personnes de l'une Par-
tie ne de l'autre, ne autres quelxconques, par voi del Marque ou autrement.
Item, que les Villes de Calais & Gravlinghes seront Misez, Tenuez, & Gardez en telle Governance, & si loial & ferme Seurte, que les Marchans, leurs Facteurs, Familliers, Maistres des Niefs, Pelerins, & autres Personnes, comprisez en cest Seurtee, d'un coste & d'autre, y seront & porront estre amiablement & seurement receuz, en alant, demourant, & retournant en leurs Bosoignes.
Item, que par les Gens des Garnisons de Calais, & des autres Forteresses, Tenuez & Occupeez de la partie d'Engleterre, es Marches de Picardie, ne autres Gens de la partie d'Engleterre, en issant des ditz Forteresses, ou des Terres, Tenues & Occupees des Englois, es ditz Marches de Picardie, ne seront faites Courses, ne autre Fait de Guerre, sur la Paiis de Flandres;
Et Pareillement ne serront faitz Courses, ou autre Fait de Guerre, par aucuns de Paiis de Flandres, ou des Garnisons de Gravelinges, ou autres Forteresses de Flandres, ne aussi des Garnisons des autres Forteresses, Tenues de la partie de France, es ditz Marches de Picardie, en issant de Gravelinghes, ou d'autre Lieux de Flandres, sur les diz Forteresses & Terres, Tenuez & Occupez de la dite Partie d'Engleterre & Picardie, le dit An durant.
Item, que les Maistres des Niefs & Maroniers de la Partie d'Engleterre, a leur Venue es Portes & Haures de Paiis de Flandres, porront faire licitement Lier leurs Niefs, es dits Portes & Haures, par le maner que feront Francois, Hollandois, Zellandois, & Escochois, senz encourrir pour ce en aucune Forfaiture ou Amende:
Et semblablement pourront faire les Maistres des Niefs & Maronniers de Flandres, es Portes & Haures de la Partie d'Engleterre.
Item, que, le dit Terme d'un An durant, les Marchans, Maistres des Niefs, & Maronniers, de dit Paiis de Flandres, ou demourans en Flandres, ne amesront, pur fraude ne coleur quelconque, aucune Biens ou Merchandises des Ennemis des Englis par Mer, & en cas qu'ils en soient demandez par aucuns Escumers, ou autres Gens, de la Partie d'Engleterre, eulx en feront juste & pleine Confession,
Et que parellement les Marchans, Maistres des Niefs, & Marronniers, de de la partie d'Engleterre eulx en feront juste & plein Confession:
Et que parellement les Marchans, Maistres des Niefs, & Maronniers, de la Partie d'Engleterre, n'amesront, par fraude ne coleur quelconque, aucuns Biens ou Marchandises de Estrangiers Ennemis des Flammens, &, s'ils en estoient demandes par aucuns de Flandres, qu'ilz en feront juste Confession come dit est.
Item, que les Quatre Membres de Flandres, par l'Ordenance du dit Duc de Burgoigne, Conte de Flandres, se obligeront, par Lettres, seelles de leurs Sealx, de Tenir loialment & inviolablement tous les Poins de ceo present Traite, & chacune d'iceulx, qui tant par le Roy lour Seigneur Soverain come par le dit Duc serront accordez, & dont ils bailleront lours Lettres, sanz enfraindre ne aler ou faire a l'encontre.
Item, que totes les Choses, & chascun d'icelles, accordes par ce present Traite, seront Gardez & Observez pour la Partie d'Engleterre ou Roialme d'Engleterre, a Caleys, & en toutes les autres Villes, Seignouries, & Lieux, appurtenances & obeissans a Roy d'Engleterre, & pour la partie de Flandres, es Conte & Paiis de Flandres, & es autres Villes, Seignouries, & Lieux, appurtenans & obeissans au dit Duc de Burgoigne, entre Flandres & Couloigne sur le Rin, & y purront seurment les Marchans & autres Personnes, comprins en ce Traite, aler, converser, estre, demourer, & marchander, par la manere dessus dit, sanz Empeschement quelconque.
Item, que, pendant le dit Accort, l'en Proceder ou fait Principal du Traite, autres foiz en Commencie, sur le Cours de la Marchandise entre Engleterre & Flandres, & sur le fait de la Reparation de Exces, Prinses, & Dommages, qui par cy devant ont este fait de l'une Partie sur l'autre, dont l'en a autres foiz tenu Parlement a Traite; & sur ceo l'en prendra jour, d'estre ensemble en tiel Lieu, que l'en serra Accorde.
Item, sont d'Accorde les ditz Ambassatours & Commys que, s'il avenoit (que Dieu ne veulle) que, par aucuns de l'une coste ou de l'autre, aucune Chose feusse fait ou attempte contre l'estat de cest present Accorde & Seurte, en quelconque Lieu, ou par quelconque Voie, ja pour tant cest Accorde ne serra tenue ne entenduz Enfreinte, ne pour ce Guerre, Arrest, ne Destourbier d'au-
cuns des Personnes, touchez en cest Traitie, ne serra fait ne move, Mais serra le Fait Repaire par les Seigneurs de l'une & l'autre Partie, & mis en son primer Estat & deu.
Savoir faisons que Nous,
Eu sur les ditz Pointes & Articles deliberation,
Par l'avis de nostre Conseil,
Pour le bien & utillite de la Course & l'Avancement de la dite Marchandises,
Touz les Poins & Articles, desus declarez, & chescun d'icelles, les quelles, de nostre Commandement & voluntee, par noz ditz Ambassatours ovesque les Commys du dit Duc ount ainsi este accordez, tant pour nostre dit Roialme d'Engleterre, come pour nostre Ville de Caleys, & pour tous noz autres Villes, Seignuries, & Lieus, a Nous appurtenance & obeissans, ayans Agreables,
Ycelles avons Loe, Approve, & Confirme, &, par le Tenure de ces Presens, Loons, Approvons, & Confirmons,
Promettans, en bone foie, & en Parole de Roy, a les Tenir, & faire Tenir, firmement & loialment, sanz enfraindre, ne aler, ou faire, ou souffrer estre fait ou ale, a l'encontre par Nous, noz Officers, Subgiez, Alliez, ou Bienvueillans quelxconques, durant le dit temps,
Si donnons en Mandement a nostre Admirall de la Mer, a le Gardein des Cinque Portes, & a tous Capitains, Viscounts, Maires, Bailliffs, Constables, Ministres, Gardeins des Portes, Villes Fermes, & autres Forteresses queconques, & autres noz foialx Lieges & Subgiez, a qi appertiendra, que le dit Traitie & Accorde, assemble toutes & chescune des Choses, & Articles, & Points dessusditz, Teignent & Gardent, facent Tenir & Garder, & en lassent, facent, & soeffrent joyer & user paisiblement les Marchans, leurs Facteurs, Familiers, Maistres des Niefs & Maronniers, Pellerins, Clers, Pescheurs, & autres Designes en dit Traite & Accorde, & chescun d'eulx, d'une coste & d'autre paisiblement & pleignement, durant le temps desusdite, tout selonc le tenure des ditz Traitz & accordez sanz Empeschement, ne faire, ou aler, ne soeffrer estre fait ou ale, a l'encontre en aucune manere,
Et les ditz choses Publient, & facent Publier, en toutes les Villes, Portes, Haures, & autres Lieus, ou l'en a accoustume a faire Criez & Publications depar Nous, ou il appertiendra, & dont ils serront requis, a fin que aucun n'en puisse pretendre ignorance,
Et les Transgressours, s'aucuns en ey a faisans au contraire, puneissent vigoreusment, come il appertiendra par raison, si que ce soit Exemple aux autres, & ovesque ce facent faire Restitution des Dammages a celx, & par la manere qu'il appertiendra, sanz deport ou delaie, ne sur ceo attendre autre Mandement de Nous.
En Tesmoignance de quelle chose Nous avons fait faire cestes noz Lettres Patentes.
Don. sub nostre Graund Seal a nostre Paloys de Westm. le disme jour de Marcz, l'An de Grace Mille, Quatrecens & Soyx, & de nostre Regne l'An Oeptisme. |
