Close Rolls, August 1262

Calendar of Close Rolls, Henry III: Volume 12, 1261-1264. Originally published by His Majesty's Stationery Office, London, 1936.

This premium content was digitised by double rekeying. All rights reserved.

'Close Rolls, August 1262', in Calendar of Close Rolls, Henry III: Volume 12, 1261-1264, (London, 1936) pp. 145-149. British History Online https://www.british-history.ac.uk/cal-close-rolls/hen3/vol12/pp145-149 [accessed 24 March 2024]

Image
Image
Image
Image
Image

Close Rolls, August 1262

Pro rege et comite Heref'.—Rex dilecto et fideli suo H. de Boun comiti Hereford' et Essex' salutem. Super eo quod receptis litteris nostris partes Wallie adivistis ad seisinam terrarum et castrorum que fuerunt comitis Glouc' in marchia Wallie in manum nostram capiendam sicut nuper vobis mandavimus regraciamur vobis quam plurimum, vos rogantes quatinus circa custodiam illam, sicut jam laudabiliter incepistis, efficaciter intendatis; ita quod vobis exinde fortius astringamur ad grates. Placet etiam nobis quod id quod de bonis et catallis dicti defuncti occasione predicte custodie, si opus habueritis, ceperitis in debitis ejusdem defuncti racionabiliter allocetur. Preterea mandamus dilecto et fideli nostro Rogero de Clifford' quod, si ipsius auxilio vel presencia quoad custodiam castrorum predictorum indigueritis, vobis viriliter assistat et faciat quod sibi in hac parte nomine nostro duxeritis injungendum, proviso tamen quod nulla sibi ballia de qua compotum reddere debeat committatur. Teste rege apud Sanctum Maurum de Fossatis iiij. die Augusti.

Pro rege. De damis.—Mandatum est Philippo Basset, justiciario Anglie, quod in forestis et parcis qui fuerunt R. de Clare comitis Glouc' ad opus regis sine dilacione capi faciat ducentos et quadraginta damos et in parcis episcopatus Lond' sexaginta damos et eos saliri et cariari faciat usque Turrim London' reservandos ibidem donec rex aliud inde preceperit, sicut constabulario dicte Turris mandavit. Teste ut supra.
Et mandatum est Ricardo de Tillebir', constabulario Turris predicte, quod damos illos recipiat et salvo custodiat donec etc.

Pro Petro de Tany. De quercubus.—Mandatum est Alano la Zuch', justiciario foreste regis citra Trentam, quod in bosco regis de Geytinton' faciat habere Petro de Tany, valletto regis, quatuor quercus ad maeremium de dono regis. Teste ut supra.

Pro archiepiscopo cantuariensi.—Rex Philippo Basset, justiciario suo Anglie, et W. de Merton', cancellario suo, salutem. De diligencia quam circa negocia nostra diligenter impendistis tam super facto de Tonebrug' quam aliis de quibus nobis scripsistis grates vobis scimus multimodis, vobis significantes quod, inspecto transcripto carte nostre, quod nobis misistis, super facto predicto, bene advertimus et recolimus nos cartam illam fecisse beato Edmundo quondam archiepiscopo Cantuariensi et quod idem archiepiscopus postmodum seisinam custodie dicti castri optinuit. Nolentes igitur prefato archiepiscopo super hoc injuriari vobis mandamus quod custodiam illam ei habere permittatis prout eam habere debuerit secundum tenorem carte predicte. Teste ut supra.

Pro Roberto Waleraund.—Mandatum est Alano la Zuch', justiciario foreste regis citra Trentam, quod in foresta regis de Chippeham faciat habere Roberto Waleraund quinque damos et in foresta regis de Gillingham quinque damos de dono regis. Teste ut supra.

Pro Mathia Bezill'.—Mandatum est custodi foreste de Cors' que fuit comitis Glouc' quod in eadem foresta faciat habere Mathie Bezill' quatuor damos de dono regis. Teste ut supra.

Pro abbatissa et conventu Fontis Ebraudi.—Rex W. de Merton', cancellario suo, salutem. Cum abbatissa et conventus Fontis Ebraudi ex concessione progenitorum nostrorum regum Anglie et nostra singulis annis percipere debeant ad scaccarium nostrum quater viginti et quinquaginta (sic) solidos de elemosina nostra constituta et ipse de quibusdam annis preteritis brevia sua de Liberate non habuerint, ut dicunt, vobis mandamus quod scrutatis rotulis cancellarie nostre breve suum de liberate eis habere facias de hoc quod eis aretro est de annis predictis usque ad instans festum Sancti Michaelis, quia volumus quod de predictis arreragiis eis ad Scaccarium nostrum plene satisfiat. Teste.
Et mandatum est thesaurio et camerariis quod scrutatis brevibus de Liberate annua arreragia que ei debentur ad scaccarium usque ad instans festum Sancti Michaelis eis de primis denariis venientibus ad idem scaccarium sine ulteriori dilacione persolvant. Teste ut supra.

[m. 3.]

Pro abbate de Becco Helluini.—Quia rex pro certo intellexit quod R. abbas de Becco Helluini sanus est et incolumis, mandatum est Philippo Basset, justiciario Anglie, quod omnes terras et tenementa ejusdem abbatis in Anglia que occasione mortis ipsius R. suggeste capta fuerunt in manum regis cum omnibus medio tempore inde perceptis eidem abbati vel certo attornato suo restitui faciat. Teste rege apud Sanctum Maurum de Fossatis vij. die Augusti.

Pro Henrico de Lichefeld.—Mandatum est justicariis proximo itineraturis in comitatu Hertf' quod occasione communis summonicionis facte de itinere suo in comitatu predicto Henricus de Lichefeld non ponatur in defaltam nec in aliquo sit perdens, quia rex absenciam suam quoad hoc ei warantizat. Teste ut supra.

Pro electo de Tavistok'.—Rex abbati de Burgo, thesaurario suo, et W. de Merton', cancellario suo, salutem. Cum prior et conventus de Tavistok' finem fecerint nobiscum pro habenda custodia domus sue hac vice et ipsi electum suum nobis apud Sanctum Maurum de Fossatis nuper presentaverint, ac electionem illam acceptantes significaverimus loci diocesano quod id quod suum est in hac parte exsequatur; nos eorum laboribus et expensis parcere volentes vobis mandamus quod, cum predictus electus a prefato loci diocesano confirmatus fuerit et de hoc vobis per litteras suas patentes nobis dirigendas plene constiterit, fidelitatem a prefato electo nobis debitam recipiatis vice nostra. Et vos W. de Merton' extunc eidem electo restitucionem temporalium domus sue habere faciatis de gracia nostra speciali prout moris est. Teste ut supra.

Pro Henrico filio regis Alemannie.—Mandatum est Alano la Zuch', justiciario foreste citra Trentam, quod in foresta regis de Graveling' faciat habere Henrico filio regis Alemannie duos cervos et in foresta regis de Corf alios duos cervos de dono regis. Teste ut supra.

Pro Michaele Maucundut.—Et mandatum est eidem Alano quod in foresta regis de Clive faciat habere Michaeli Maucundut duos damos de dono regis. Teste ut supra.

Pro Roberto de Stutevill'.—Rex Gilberto de Preston', salutem. Cum vos et abbatem de Burgo dudum assignaverimus ad assisam nove disseisine capiendam quam Robertus de Stotevill' arramiavit coram vobis per preceptum nostrum versus Johannem de Warenna et alios in brevi nostro originali contentos de tenemento in Weng', et idem abbas pro negociis nostris que ei injunximus capcioni illius assise personaliter intendere non possit, per quod assisa illa magnam cepit dilacionem, ut dicitur, nolentes propter hoc justiciam ulterius differri assignavimus dilectos et fideles nostros Philippum Basset, justiciarium nostrum Anglie, et W. de Wilton' una vobiscum cap' (sic), ita videlicet quod ipsi vel eorum alter ad diem quem ad assisam illam capiendam jam assignastis capcioni illius assise intersit. Unde vobis mandamus quod ipsos vel eorum alterum quem adesse contigerit ad hoc admittatis. Si vero neminem eorum ad diem illum venire contigerit, vos extunc non expectata eorum presencia ad assisam capiendam sine dilacione prout justum fuerit procedatis. Teste ut supra.
Et mandatum est eisdem Philippo et Willelmo quod ad diem quem prefatus Gilbertus ad assisam illam capiendam statuit capcioni illius assise intersint, et si predictus Philippus ad diem illum venire nequiverit quod mandet prefato Willelmo quod ad diem predictum capcioni illius assise modis omnibus intersit. Teste ut supra.

Wincheles'.—Rex ballivo suo de Wincheles', salutem. Quia intelleximus quod propter inundationem maris et incomoditatem loci ubi mercatum nostrum de Wincheles' tenetur oportet mercatum illud removeri, nos indepnitati nostre et ville predicte in hac parte providere volentes vobis mandamus quod habito super hoc consilio proborum hominum et discretorum ejusdem ville alium locum competentiorem ad mercatum illud tenendum et habendum provideri et assignari faciatis vice nostra prout utilitati nostre et ville predicte melius videritis expedire. Teste rege apud Sanctum Germanum de Pratis xviij. die Augusti.

Pro Johanne de Cokefeld.—Mandatum est Ricardo de Muntfichet senescallo foreste (sue cancelled) Essex' quod in foresta de Hatfeld faciat habere Johanni de Cokefeld tres damos de dono regis. Teste ut supra.

Pro Johanne Maunsell'.—Mandatum est Roberto de Nevill', justiciario foreste ultra Trentam, quod in foresta regis de Pikering' faciat habere J. Mansell', thesaurario Eboraci, sex cervos de dono regis. Teste ut supra.

Pro Ricardo de Tillebyr'.—Mandatum est Ricardo de Muntfichet, senescallo foreste Essex', quod in foresta regis de Hathfeld faciat habere Ricardo de Tillebir' quinque damos de dono regis. Teste ut supra.

Pro rege. De fructibus episcopatus Wyntonie.—Mandatum est Philippo Basset, justiciario Anglie, quod mediante consilio abbatis de Burgo, si presens fuerit, seu aliorum de consilio regis in Anglia, provideat et assignet aliquos fideles et discretos viros qui per sacramentum proborum et legalium hominum sine dilacione appreciari faciant omnes fructus et blada episcopatus Wintonie de autumpno presenti et secundum veram taxacionem et appreciacionem ipsorum fructus illos et blada venire patri J. episcopo Wintoniensi vel ejus certis attornatis vice regis dimittant et liberari faciant, accepta tamen prius ab eis sufficiente securitate de precio predictorum fructuum et bladorum regi reddendo ad scaccarium ad certos et competentes terminos sibi a nobis prefigendos. Teste rege apud Sanctum Germanum de Pratis xxixo. die Augusti.

Pro Johanne de Cokefeld'.—Mandatum est Roberto de Nevill', justiciario foreste ultra Trentam, quod in foresta regis de Lancastr' faciat habere Johanni de Cokefeld' clerico tres cervos de dono. Teste ut supra.

Pro Willelmo de Axemuth'.—Mandatum est Alano la Zuch', justiciario foreste citra Trentam, quod in foresta regis de Rokingham faciat habere Willelmo de Axemuth' duos damos de dono. Teste ut supra.