Close Rolls, September 1264

Close Rolls, September 1264

De terris commissis.—Rex Johanni filio Johannis salutem. De consilio magnatum nostrorum qui sunt de consilio nostro vobis mandamus quatinus terras et tenementa que fuerunt Thome de Hopton' in Hopton', que fuerunt in manu Galfridi de Genvill', et que occasione turbacionis nuper habite in regno nostro occupastis et adhuc detinetis occupata ut dicitur, sine dilacione liberetis Katerine de Lascy, cui terras illas et tenementa custodienda commisimus quamdiu nobis placuerit ad opus Rogeri filii predicti Thome. Et hoc nullatinus omittatis. Teste rege apud Cantuariam primo die Septembris.

Ne aliqui transfretent per portum Dovor'.—Mandatum est baronibus et ballivis portus Dovor' quod non permittant aliquem equitem vel peditem per portum predictum transfretare sine mandato regis speciali vel Henrici de Monte Forti constabularii castri Dovor'. Teste rege apud Cantuariam j. die Septembris.

De sagittariis mittendis ad tuicionem portus de Wincheles'.— Rex Nicholao de Haudlo salutem. Cum nuper mandaverimus omnibus et singulis de portu de Wincheles' qui ad hoc sufficiunt quod cum toto navigio et posse suo accederent ad partes de Sandwic' ad defensionem maritime contra adventum alienigenarum, et oporteat partes de Wincheles' propter casus fortuitos gente muniri, ne per absenciam eorundem hominum de Winch' partibus illis dampnum vel periculum imineat; vobis mandamus quod ccc.^tos de melioribus sagittariis Waldensibus qui sunt super graveram maris inter Rom' et Wincheles' de constabularia vestra venire faciatis usque Wincheles' ad securitatem et defensionem ejusdem ville de Winch' et partium illarum. Et hoc nullatinus omittatis. Teste supra.

De damis datis.—Mandatum est Ricardo de Muntfichet, senescallo foreste Essex', quod faciat habere Galfrido de Scalariis, vadletto regis, unum damum de dono regis. Teste rege apud Cantuariam ij. die Septembris.
Mandatum est custodi foreste de Clyve quod in eadem foresta faciat habere magistro hospitalis Sancti Johannis Jerusalem in Anglia tres damos de dono regis. Teste ut supra.

De quibusdam terris qui fuerunt Thome de Opton' commissis.— Rex Johanni filio Johannis salutem. Cum quidam magnates nostri ad sedendam turbacionem in regno nostro habitam nuper essent a latere nostro ad partes marchie destinati, ac iidem magnates nostri terras et tenementa Galfridi de Genvill' in partibus Marchie, pro eo quod ad pacem nostram tunc non venit, ceperunt in manum nostram, inter que quasdam terras et tenementa que fuerunt Thome de Opton in Opton in manu ipsius Galfridi inventa una cum terris et tenementis ejusdem Galfridi similiter ceperint in manum nostram; que quidem terre et tenementa tam predicti Galfridi quam ipsius Thome ex commissione predictorum magnatum in manu vestra ad opus nostrum custodienda remanserunt; nos de consilio baronum nostrorum qui sunt de consilio nostro omnes terras et tenementa predicta que fuerunt predicti Thome commisimus Katerine de Lascy custodienda ad opus Rogeri filii dicti Thome quamdiu nobis placuerit. Et ideo vobis mandamus quod prefate Katerine terras et tenementa predicta liberetis custodienda sicut predictum est. Teste rege apud Cantuariam iij. die Septembris.

De manerio de Garthorp' extendendo.—Rex Willelmo de Wendling', escaetori suo citra Trentam, salutem. Mandamus vobis quod per sacramentum proborum et legalium hominum per quos etc. sine dilacione extendi faciatis manerium de Gartorp' in comitatu Leyc', quod fuit Willelmi de Gaugy nuper defuncti qui de nobis tenuit in capite, videlicet quantum valeat in dominicis, redditibus, villenagiis et omnimodis aliis exitibus ejusdem. Et extentam illam distincte et aperte factam sub sigillo vestro et sigillis eorum per quos facta fuerit habere faciatis dilecto et fideli nostro Petro de Monte Forti in octabis Nativitatis Beate Marie, quem ad partes predictas transmittimus ad assignandum secundum extentam illam Dionisie que fuit uxor predicti Willelmi racionabilem dotem suam que eam contingit de terris et tenementis que fuerunt ipsius Willelmi in manerio predicto. Et hoc nullatinus omittatis. Teste rege apud Cantuariam iij. die Septembris.

De galea et magna navi London' usque Sandwic mittendis.— Rex majori et vicecomitibus suis Lond' salutem. Cum propter instantem adventum alienigenarum in regnum nostrum galea et magna navi que sunt apud Lond' quamplurimum indigeamus; vobis mandamus in fide et dileccione quibus nobis tenemini firmite injungentes quod statim visis litteris, omnibus aliis negociis pretermissis, predictas navem et galeam gente armata et balistariis bonis muniri et de stipendiis suis de communa civitatis predicte provideri et usque portum de Sandwic' mitti faciatis. Et hoc nullo modo omittatis. Et, si forte de expensis et aliis ei necessariis de communa civitatis ejusdem providere nequeatis, nihilominus tamen predictas navem et galeam cum gente predicta usque portum predictum quamcitius omni occasione postposita transmittatis. Et nos eis in adventu eorum de necessariis providere faciemus prout magis viderimus expedire. Teste ut supra.

De decima beneficiorum ecclesiasticorum mittenda ad regem.— Rex magistro Nicholao officiali L. Roffensis episcopi salutem. Cum nuper vobis per literas nostras mandaverimus quod decimam omnium fructuum et proventuum ecclesiasticorum in episcopatu Roffensi existentium colligi et ad nos mitti faceretis liberandam Hugoni le Despenser, justiciario nostro Anglie, prout inter nos et prelatos et barones nostros est provisum, ac vos id hactenus facere non curaveritis, de quo miramur plurimum et movemur; vobis mandamus quatinus de dicta decima sine dilacione habere faciatis Johanni de Weston' et Willelmo de Yatingd' vel eorum alteri has literas deferenti xx. libras ad quedam negocia nostra que eis injunximus inde expedienda, et residuum totius decime predicte ad nos habeatis apud Cantuariam hac instanti die Sabbati vel Dominica sequenti tempestive. Et hoc, sicut prefatum dominum vestrum et vos indempnes conservare volueritis, nullatinus omittatis, scituri quod, si id facere distuleritis, nos predictam decimam per vicecomitem nostrum Kancie levari faciemus. Teste rege apud Cantuariam iiij. die Septembris. Per A. de Novo Mercato, Egidium de Ergentem, R. de Cam'.

De pecunia levanda ad expensas hominum commorantium circa defensionem maris.—Rex vicecomiti Rotel' salutem. Cum de consilio baronum nostrorum nuper vocari fecerimus quosdam ad arma de comitatu predicto ut ad nos venirent ituri nobiscum versus mare ad defensionem regni nostri contra hostilem adventum alienigenarum; ita quod de expensis suis usque ad certum terminum de communi provideretur eisdem; cumque adhuc necesse sit propter casus fortuitos ad securitatem et tuicionem regni nostri defensionem habere promptam contra dictorum alienigenarum adventum; tibi precipimus quod de predicto communi sine dilacione levari faciatis expensas hominum predictorum usque ad octabas instantis festi Nativitatis Beate Marie; proviso quod, ubi singuli ipsorum per diem hactenus tres denarios perceperunt, ex nunc usque ad terminum predictum quatuor denarios percipiant propter caristiam temporis que pre nimia multitudine gentium ubi nunc agimus supervenit. Et tu ipse pecuniam istam tam fideliter per commune predictum assideri facias ne quis indebite gravetur, sciturus pro certo quod super colleccionibus tam harum quam priorum expensarum post paucos dies diligentem inquisicionem fieri faciemus. Pecuniam autem, quam ad hoc mandatum nostrum levari facies, Johanni de Kibworth latori presentium liberes deferendam hominibus supradictis, prout injunximus eidem xxix. die Augusti.

Pro Johanne Pollard.—Rex Johanni filio Johannis, constabulario castri de Windesor', salutem. Cum subconstabularius vester castri nostri predicti Johannem Pollard, janitorem ejusdem castri, ceperit et in carcere ibidem detineat, pro eo quod quidam sinistra de ipso predicaverunt asserendo ipsum Johannem bona ad idem castrum spectantia elongasse ab eodem; volentes prefato Johanni intuitu laudabilis obsequii quod nobis impendit graciam facere, vobis mandamus quod, si predictus Johannes invenerit vobis duodecim probos et legales homines qui manucapiantipsum habere coram nobis ad mandatum nostrum ad respondendum nobis de bonis predictis, si que per ipsum fuerint elongata, et de omnibus aliis sibi impositis, tunc ipsum Johannem una cum terris, tenementis, bonis et catallis suis ea occasione detentis predictis duodecim per manucapcionem predictam deliberetis. Teste me ipso apud Cantuariam iiij. die Septembris.

De castro Windes' muniendo.—Cum rex nuper commiserit Johanni filio Johannis castrum de Windes' custodiendum quamdiu regi placuerit, et oporteat eundem Johannem occasione turbacionis in regno nostro castrum illud munire victualibus prout expedire viderit et poterit competenter, preceptum vicecomiti Oxon' et Berk' quod hujusmodi victualia, que per prefatum Johannem vel suos emi contigerit, de exitibus comitatuum eorundem quantum poteris acquietari facias et eciam ad victualia illa emenda et perquirenda consilium et auxilium tuum (sic) ei vel suis efficaciter impendat cum ab ipso fuerit requisitus. Et, cum sciverimus quantum de exitibus predictis ei ad hoc habere fecerit, illud sibi in eisdem exitibus allocari. Teste ut supra.

Pro Agnete uxore Willelmi filii Simonis.—Rex vicecomiti Cumbirl' salutem. Cum terre et tenementa ac catalla que fuerunt Willelmi filii Simonis sint in manu nostra occasione fuge quam idem Willelmus fecit pro morte Johannis de Scales unde rettatus est, ac Agnes uxor ipsius Willelmi puerorum multitudine sit onerata nec ipsa in bonis habeat unde se et pueros illos valeat sustentare ut accepimus, nos inopie ipsorum compatientes, tibi precipimus quod blada presentis autumpni de terris illis provenientia una cum catallis, que fuerunt predicti Willelmi et que sunt in manu nostra occasione fuge predicte, eidem Agneti ad suam et dictorum puerorum suorum sustentacionem habere facias de gracia nostra speciali; salvis tamen nobis anno die et vasto de terris et tenementis predictis, si ad nos debeant pertinere. Teste rege apud Cantuariam vj. die Septembris.

De damo dato.—Mandatum est custodi foreste de Wichewode quod in eadem foresta faciat habere Nicholao de Leukenor unum damum de dono regis. Teste ut supra.

[m. 2.]

De villa Oxonie custodienda et munienda.—Rex majori et ballivis Oxonie salutem. Cum pro certo intellexerimus quod quidam de villa vestra tam cum hominibus ejusdem ville quam aliis extra eandem villam conggreaciones (sic) et confederaciones illicitas de die in diem faciunt ad villam vestram et partes vestras perturbandas, et eciam quod Judeorum extraneorum multitudo in eandem villam jam ingressa est, per quod similiter de turbacione predicta non mediocriter timetur; vobis mandamus in fide et dileccione quibus nobis tenemini firmiter injungentes quod omnes et singulos de congregacione predicta et ejus auctores, si quos inveneritis, capiatis et salvo custodiatis, una cum bonis et catallis, donec aliud inde vobis mandaverimus; maxime cum ex hujusmodi turbacionibus non solum ville vestre verum eciam toti regno nostro periclum non modicum posset imminere; providentes eciam diligenter quod nulla congregacio de Judeis predictis fiat in eadem villa per quod consimile periclum possit evenire. Et tam diligenter vos habeatis in hac parte quod diligenciam vestram merito commendare debeamus. Mandavimus eciam vicecomiti nostro Oxon' quod, si opus fuerit, vobis in premissis consilium et auxilium impendat. Teste rege apud Cantuariam viij. die Septembris.
Mandatum est eciam vicecomiti quod eis assistat.

De pecunia levanda ad expensas hominum commorantium circa tuicionem maris.—Rex majori et ballivis Bed' salutem. Cum de consilio baronum nostrorum nuper vocari fecerimus quosdam ad arma de communitate ville vestre ad nos venirent nobiscum ituri versus mare contra hostilem adventum alienigenarum, ita quod de expensis suis usque ad certum terminum de communi ejusdem ville provideretur eisdem: ac ipsi nobiscum moram traxerint ultra quod crediderunt, per quod expenses ibi provise jam deficiunt eisdem; cumque adhuc necesse sit nos propter casus fortuitos ad securitatem et tuicionem regni nostri defensionem habere promptam contra dictorum alienigenarum adventum; vobis precipimus quod de communitate ville vestre sine dilacione levari faciatis expensas hominum predictorum usque ad octabas instantis festi Nativitatis Beate Marie; proviso quod equites stipendia sua eo modo percipiant quo eis prius fuerint assignata; et quod, ubi singuli pedites per diem hactenus tres denarios perceperunt, ex nunc usque ad terminum predictum quatuor denarios percipiant propter caristiam que pro nimia multitudine ubi nunc agimus supervenit. Et vos ipsi pecuniam ipsam tam fideliter per communitatem predictam assideri faciatis ne quis indebite gravetur; sciturus (sic) quod super colleccionibus tam harum quam priorum expensarum post paucos dies diligenter fieri faciemus inquisicionem. Pecuniam autem quam ad hoc mandatum nostrum levari faciatis, Johanni Corey, latori presentium, liberetis deferendam hominibus predictis prout injunximus eidem. Teste ut supra.

Pro Matilli Coffyn.—Rex ad instanciam Johannis Gyffard remittit Matilli Coffyn totum servicium et servicium (sic) quod regi facere tenebatur contra instantem adventum alienigenarum in regnum regis. Et preceptum est vicecomiti Wiltes quod ipsam Matillem de predictis servicio et subsidio quietum esse permittat. Et districcionem, si quam ei occasione hujusmodi servicii vel subsidii, penitus relaxet eidem. Teste rege apud Cantuariam viij. die Septembris. Per ipsum regem, justiciarium et Egidium de Argentem.
Consimilem litteram habet eadem Matillis in comitatu Oxon' ad instanciam predicti Johannis: et per eosdem.

De ponendo per ballium.—Adam filius Mabillie, captus et detentus in prisona regis de Not' pro morte Willelmi Bertram' unde rettatus est habet breve vicecomiti Not' quod ponatur per ballium.

Pro mercatoribus de Portesmuth.—Rex vicecomitibus Lond' salutem. Cum Joel de Stok', pincerna nostra, nuper emerit ad opus nostrum quandam navatam vini apud Portesm', et idem Joel vina illa exinde cariari fecerit usque Westmonasterium, vos sicut intelleximus a mercatoribus vinorum illorum consuetudines exigitis pro vinis illis nobis venditis et in ipsos propter hoc ad dandum muragium in villa vestra distringitis. Et quia hujusmodi consuetudines de vinis aut aliis victualibus ad opus nostrum emptis extra villam et libertatem vestram, et maxime eorum que in usus nostros convertuntur, dari non debent nec consueverunt, vobis precipimus quod demandam seu districcionem quam predictis mercatoribus facitis occasione predicta eis sine dilacione relaxetis, ita quod non oporteat nos super hoc amplius sollicitari. Teste ut supra.

Pro abbate Sancti Petri de Burgo.—Cum rex per cartam suam teneatur abbati de Burgo Sancti Petri in decem damis per annum pro decima venacionis regis foreste de Rokingham, mandatum est Nicholao de Segrave, custodi foreste inter pontes Oxonie et Stanf', quod prefato abbati in foresta de Clive pro x. damis in quibus rex ei tenetur de anno presenti xiij. damas habere faciat pro decima predicta. Teste rege apud Cantuariam x. die Septembris.

De damis datis.—Mandatum est custodi foreste de Clive quod faciat habere Rogero de la Leye tres damas in eadem foresta de dono regis. Teste ut supra.

Pro Roberto Burre cive Cantuarie.—Mandatum est ballivis Cantuarie quod de firma ville sue faciant habere Roberto Burre, civi Cantuarie, centum et sex solidos et octo denarios pro cera ab eo capta ad opus regis apud Cantuariam et liberata in garderoba regis Henrico de Gaunt, custodi garderobe predicte, testificata per Adam de Novo Mercato senescallum regis. Teste ut supra.

De damis datis.—Mandatum est Nicholao de Segrave, custodi foreste inter pontes Oxonie et Stanford, quod in foresta de Bernewod faciat habere Hugoni le Despenser, justiciario Anglie, sex damos de dono regis. Teste rege apud Cantuariam xiiij. die Septembris.
Item mandatum est custodi foreste de Pamber' quod in eadem foresta faciat habere prefato Hugoni alios sex damos de dono regis. Teste ut supra.

De damis capiendis ad opus Alienore consortis Edwardi primogeniti regis.—Mandatum est Johanni de Somers' quod in foresta de Wichewod vel Brehull capiat sex damos ad opus Alienore consortis Edwardi primogeniti regis et eos sibi habere faciat de dono regis. Teste rege apud Cantuariam xv. die Septembris.

Pro decano et capitulo Eboraci.—Rex vicecomiti Ebor' salutem. Cum de consilio prelatorum et magnatum et cleri concorditer sit provisum quod beneficiis ecclesiasticis prebendalibus et aliis decima concedatur convertenda in utilitatem et defensionem regni nostri et ecclesie Anglicane, et decanus et capitulum Eboraci de beneficiis suis ecclesiasticis et prebendalibus predictam decimam jam solvere sint parati, convertendam in usus predictos; tibi precipimus quod, cum tibi constiterit ipsos decanum et capitulum decimam illam solvisse ut predictum est, tunc a districcione quam eis facis ad subsidium nobis prestandum de beneficiis suis ecclesiasticis et prebendalibus in balliva penitus desistas donec aliud inde tibi preceperimus; ita tamen quod milites, libere tenentes et alii homines eorundem decani et capituli pro terris et tenementis suis que tenent ad predictum subsidium nichilominus teneantur. Teste rege apud Cantuariam xiiij. die Septembris.

De damis datis.—Mandatum est custodi foreste de Bernewod quod in predicta foresta faciat habere Osberto Giffard quatuor damos de dono regis. Teste rege apud Cantuariam xv. die Septembris.

De ponendo per ballium.—Willelmus Blakeberd et Johannes frater ejus, capti et detenti in prisona de Kydeministr' pro morte Benedicti de Luttele unde rettati sunt, habent breve vicecomiti Wigorn' quod ponantur per ballium. Teste rege apud Cantuariam xvj. die Septembris.

De. auro ad picturam camere regis apud Westmonasterium.— Rex Willelmo de Gloucestr' civi Lond' salutem. Cum pro instanti festo Sancti Edwardi, quod celebraturi sumus apud Westmonasterium domino concedente, necesse sit quod camera nostra ibidem in qua hospitabimus, que jam depicta est, ad plenum perficiatur; ac jam auro ad perfeccionem ejusdem picture careamus ut accepimus; vobis mandamus in fide et dileccione in quibus nobis tenemini rogantes quod una cum dilecto clerico nostro Ada de Stretton' provideatis nobis de auro ad picturas nostras predictas inde perficiendas. Et hoc sicut nos et honorem nostrum diligitis nullatenus omittatis. Et, cum sciverimus custum quod circa aurum illud perquirendum posueris, vobis de primis exitibus cambiorum nostrorum vel de primis denariis ad scaccarium nostrum venturis reddi faciemus. Teste rege apud Cantuariam xvij. die Septembris.

Mandatum est custodi foreste de Wychewod quod in foresta illa faciat habere Osberto Giffard' quatuor damos. (Cancelled) vacat.

De quercubus datis.—Mandatum est custodi foreste de Wittlewod quod in eadem foresta faciat habere Osberto Giffard decem quercus ad maeremium de dono regis. Teste rege apud Cantuariam xviij. die Septembris. (Cancelled) vacat.
Mandatum est custodi foreste de Savernak' quod in eadem foresta faciat habere Philippo persone ecclesie de Hinton' octo quercus aptas ad maeremium de dono regis. Teste rege apud Cantuariam xxiij. die Septembris.
Mandatum est custodi foreste de Syrewod quod in eadem foresta faciat habere Roberto de Ros decem quercus aptas ad maeremium de dono regis. Teste rege apud Cantuariam xxiij. die Septembris.

De roboribus datis.—Mandatum est Nicholao de Segrave, custodi foreste inter partes Oxonie et Stanford, quod in foresta de Clive faciat habere Fratribus Predicatoribus de Stanford sex robora ad focum suum de dono regis. Teste rege apud Cantuariam xxx. die Septembris.