Close Rolls, January 1265

Close Rolls, January 1265

1265.

Rex Hugoni de Erneham, forestario suo de Bakechete' salutem. Ex parte dilectorum nobis in Christo abbatis de la Hyde de Wyntonia et abbatisse Beate Marie Wyntonie nobis est ostensum quod tu et ballivi tui foreste predicte novas et indebitas exacciones ab eisdem facias, pro expeditacione canum suorum propriorum et eorum tenentium quos habent in maneriis suis in balliva tua, et ipsos ea occasione distringitis ad dandum tibi quandam pecunie summam, quod nuncquam retroactis temporibus a prefatis abbate et abbatissa aut eorum predecessoribus vel eorum tenentibus fieri consuevit. Et, quia nolumus quod, si aliquid ad nos vel ad te pro expeditacione canum predictorum pertineat, id nobis vel tibi subtrahatur, vel quod hujusmodi exacciones injuste fiant a prefatis abbate et abbatissa, ac nos in brevi missuri simus justiciarios nostros ad placita foreste ad partes illas, coram quibus volumus super premissis certiorari; tibi precipimus quod exacciones et districciones predictas ponas in respectum usque adventum justiciariorum nostrorum ad partes predictas, ut tunc tam nobis quam tibi quam eciam predictis abbati et abbatisse super hoc exhibeatur justicie complementum. Teste rege apud Westmonasterium xj. die Januarii.
Consimilem litteram habet abbas de Waverle predicto Hugoni et Ricardo de la Batayl, forestariis, directas (sic). Teste ut supra.
Consimilem litteram habet Johannes de Valletorta Johanni de Sancta Elena, subconstabulario castri Wyndes', directas (sic). Teste ut supra. Per regem, justiciarium et alios de consilio.

Rex ballivis et probis hominibus suis de Magna Gernemuth salutem. Monstraverunt nobis David le Tayllur et Adam Walys de Berewyk' super Twed', homines et mercatores carissimi filii nostri A. regis Scocie illustris, quod cum dudum frettassent in Scocia duas naves de Flandr' et eas diversis rebus et mercandisis carcassent, ad transfretandum versus partes transmarinas, et iidem David et Adam cum predictis navibus et rebus per portum vestrum transitum fecissent, vos predictas naves, cum rebus et mercandisis in eis contentis, occasione turbacionis tunc habite in regno nostro arrestastis, et res et mercandisas illas adhuc detinetis arrestatas. Et quia indempnitati hominum dicti regis in regno et potestate nostra existentium prospicere volumus, ut tenemur, vobis mandamus quod, accepta a prefatis David et Adam sufficienti securitate quod alibi quam ad partes Scocie se non divertent cum rebus et mercandisis suis predictis, tunc eis res et mercandisas illas per vos sic arrestatas sine diminucione restituatis, et eos cum rebus et mercandisis illis et duabus navibus quas de novo se dicunt in villa vestra de vobis fretasse, libere et sine impedimento versus Scociam sub securitate predicta redire permittatis, retentis nichilominus navibus de Flandr' supradictis, donec aliud inde a nobis habueritis in mandatis. Teste rege apud Westmonasterium xvj. die Januarii. Per regem, justiciarium et consilium.

Rex baronibus et ballivis portus sui de Sandwico salutem. Cum prelatos, magnates et nobiles regni nostri, tam pro negocio liberacionis Edwardi primogeniti nostri quam pro aliis communitatem regni nostri tangentibus, ad instans parliamentum nostrum, quod erit Lond' in octabis Sancti Hillarii, convocari fecerimus, ubi vestra et aliorum fidelium nostrorum presencia plurimum indigemus; vobis mandamus, in fide et dilectione quibus nobis tenemini firmiter injungentes, quod omnibus aliis pretermissis mittatis ad nos ibidem quatuor de legalioribus et discretioribus portus vestri, ita quod sunt ibi in octabis predictis, nobiscum et cum prefatis magnatibus regni nostri tractaturi et super premissis consilium impensuri. Et hoc sicut honorem nostrum et vestrum et communem utilitatem regni nostri diligitis nullatenus omittatis. Teste rege apud Westmonasterium xx. die Januarii. Similiter mandatum est singulis portubus per se.

Rex ballivis et probis hominibus de Gypewic' salutem. Monstravit nobis Johannes de Gisorc', civis Lond', quod, cum quidam homines sui nuper carcassent quandam navem suam apud manerium ipsius Johannis de Mose blado, caseo et aliis rebus ducendis usque Lond', quidam malefactores navem illam in transeundo versus Lond' centum et sexdecim caseis et tribus summagiis frumenti depredati fuerunt, quos quidam malefactores unacum predictis caseo et blado in portu de Herewic' arestastis et ea adhuc die detinetis arestata. Et quia indempnitati predicti Johannis prospicere peroptamus, vobis mandamus quod, si vobis racionabiliter constare poterit predicta caseum et bladum esse Johannis supradicti, tunc ea ei sine diminucione aliqua restituatis, retentis et salvo custoditis predictis malefactoribus et eorum bonis, donec aliud inde a nobis habueritis in preceptis. Teste rege apud Westmonasterium xx. die Januarii.

Robertus Cornat venit coram rege apud Westmonasterium die Mercurii proxima post festum Sanctorum Fabiani et Sebastiani, et petiit terram Walteri de la Hide in Stowe eidem Waltero replegiari, que capta etc. propter defaltam etc. coram justiciariis de Banco etc. versus Matillem de Bello Campo, ut dicitur.

Rex ballivis et probis hominibus suis de Gyp' salutem. Monstravit nobis Drogo Malherb', burgensis Norhamt', quod, cum dudum carcari fecisset ad villam vestram lanas et quasdam alias res mercandisas suas mittendas versus partes transmarinas, ac idem Drogo occasione turbacionis nuper habite in regno nostro adhuc ausus non sit partes illas adire, propter quod timet ex eo quod lana illa tam diu jacuit ibidem grave dampnum incurrere; nos, indempnitati sue prospicere volentes, vobis mandamus quod ipsum Drogonem lanas et alias res et mercandisas suas in villa vestra existentes, quas suas esse coram vobis racionabiliter monstrare poterit, libere et sine impedimento per terram cariare in regno nostro Anglie et commodum suum inde facere prout sibi viderit expedire permittatis. Teste rege apud Westmonasterium xxj. die Januarii.

Willelmus le Veable recognovit se debere Nicholao de Siferwast sex marcas solvendas ad duos terminos, videlicet, unam medietatem ad festum Sancti Johannis Baptiste proximo futurum, et aliam medietatem ad festum Sancti Johannis Baptiste proximo sequens. Et, nisi fecerit, concessit quod predictum debitum levetur de terris et catallis suis in comitatu Suthamt'.

Walterus de Kinardel' recognovit se debere Johanni le Despenser quindecim marcas solvendas ad duos terminos, videlicet, unam medietatem in media Quadragesima et aliam medietatem in festo Sancti Michaelis proximo sequenti. Et, nisi fecerit, concessit quod predictum debitum levetur de terris et catallis suis in comitatu Surr'.

Philippus Keppyng' recognovit se debere Nicholao de Syferwaste quadraginta solidos solvendos ad duos terminos, videlicet, unam medietatem ad festum Sancti Johannis Baptiste proximo sequens, et aliam medietatem ad festum Sancti Michaelis proximo sequens. Et, nisi fecerit, concessit quod debitum predictum levetur de terris et catallis in Basingstok' in comitatu Suthamt'.

Rex baronibus suis de Scaccario salutem. Cum confirmaverimus civibus nostris Linc' per litteras nostras patentes cartam domini H. quondam regis Anglie, avi nostri, quod vicecomites et ministri sui de Lincolneshiry faciant forinsecos mercatores venire ad Linc' et ibi facere mercaturas suas ita racionabiliter et juste sicut facere solebant temporibus H. regis senioris, H. regis avi nostri necnon et Ricardi regis awnculi nostri et Johannis patris nostri, et eciam tempore nostro usque ad primam transfretacionem nostram in Brittaniam; vobis mandamus quod cartam illam coram vobis legi et articulos in eadem carta contentos inrotulari et firmiter teneri faciatis, prout in carta illa plenius continetur. Teste rege apud Westmonasterium xxiiij. die Januarii.

Rex ballivis et probis hominibus suis Suthamt' salutem. Cum dilectus nepos et fidelis noster Simon de Monte Forti junior nuper arrestaverit in villa vestra quosdam homines pro eo quod iidem homines carcare fecerunt quasdam naves diversis rebus et mercandisis ducendis versus Hispanniam et alias partes transmarinas contra nostram et consilii nostri inhibicionem communem; vobis mandamus firmiter injungentes quod homines illos salvo custodiri faciatis donec aliud inde a nobis habueritis in preceptis. Et hoc sicut vos et vestra diligitis nullatenus omittatis. Teste ut supra.

Pro episcopo Norwycensi.—Rex vicecomiti Norff' salutem. Cum nuper mandaverimus S. Norwycensi quod decimas proventuum beneficiorum ecclesiasticorum in sua diocesi levari et ad nos mitti faceret convertendas in communem utilitatem regni nostri et ecclesie Anglicane, ac idem episcopus hoc ad (sic) mandatum nostrum facere distulerit, per quod tibi nuper precepimus quod septingentas marcas de bonis et catallis dicti episcopi sine dilacione levari et ad nos mitti faceres indilate, in parte solucionis decimarum predictarum; tibi precipimus quod demandam quam facias predicto episcopo pro decima predicta ponas in respectum usque ad Mediam Quadragesimam proximo futuram. Teste rege apud Westmonasterium xxviij. die Januarii. Per justiciarium et Willelmum de Saham, clericum suum.

De perambulacione.—Preceptum est vicecomiti Dors' quod assumptis secum xij. discretis et legalibus militibus ac comitatu suo in propria persona sua accedat ad terram prioris de la Grave in Netford' et terram Walteri Nonswych, in Notfordlocky et per eorum sacramentum fieri faciat perambulacionem inter terram predicti prioris in Netford' et terram prefati Walteri in Nottfordelocky, ita quod perambulacio illa fiat per certas metas et divisas, quia predicti prior et Walterus posuerunt se coram rege in perambulacionem illam: et scire faciat justiciariis regis ad primam assisam cum in partes illas venerint, sub sigillo suo et per quatuor legales milites ex illis qui perambulacioni illi interfuerint, per quas metas et divisas perambulacio illa facta fuerit. Et habeat ibi nomina predictorum quatuor militum et hoc breve. Teste rege apud Westmonasterium xxviij. die Januarii.

Rex Norwycensi episcopo salutem. Ostendit nobis Godefridus de Merk', persona ecclesiarum de Laneham et Aldeham, quod, cum ipse nuper pro ecclesiis suis predictis competens haberet subsidium in partibus maritime contra adventum alienigenarum in regnum nostrum, et magnas impensas ea occasione ibidem fecisset, vos ipsum sicuti et alios rectores ecclesiarum vestre diocesis, qui hujusmodi subsidium ad partes maritime non habuerunt, distringitis per beneficia sua predicta pro decima earundem ad subsidia predicta provisa. Et ideo vobis mandamus quod, si vobis constiterit predictum Godefridum pro beneficiis suis predictis prefatum subsidium in partibus predictis competenter habuisse, tunc ipsum a prestacione decime pro beneficiis suis predictis occasione predicta ab ipso a vobis exacte quietum esse faciatis. Teste rege apud Westmonasterium xxxj. die Januarii. Per episcopum Londoniensem.

[m. 10d.]

Rex ballivis et probis hominibus suis de Dunewic' salutem. Monstravit nobis Remundus de Ripell', mercator dilecti consanguinei nostri A. comitis Pictavie, quod, cum nuper applicuisset in portu vestro cum quadam navi carcata vino, vos occasione turbacionis nuper habite in regno nostro viginti et octo dolia vini de predicta navi cepistis et ea arrestata detinetis ad grave dampnum mercatoris predicti. Et, quia volumus prefato mercatori graciam facere specialem, vobis precipimus quod, si ita est, tunc eidem mercatori vina predicta sine diminucione aliqua restitui faciatis et ipsum mercatorem et homines suos cum vinis predictis abinde per terram recedere et vina predicta pro voluntate sua per terram nostram cariare et profectum suum inde facere, prout magis viderint expedire, permittatis. Teste rege apud Westmonasterium xxxj. die Januarii. Per justiciarium et Henricum de Monte Forti.