Close Rolls, February 1270

Close Rolls, February 1270

[m. 9.]

Pro Roberto Bloundel.—Rex vicecomiti Linc' salutem. Cum per inquisicionem quam per te fieri precepimus intellexerimus quod illa bona et catalla, que per fraccionem cujusdam navis in costera maris juxta Elmesdale in terra dilecti et fidelis nostri Roberti Blondel in vigilia Pentecostes proxima preterita tanquam wreccum inventa fuerunt et ad manus diversorum de partibus illis devenerunt, valent tantummodo sex libras et duos solidos, nos volentes eidem Roberto in hac parte ista vice graciam facere specialem concessimus ei id quod ad nos pertinet de bonis et catallis predictis, ita quod, si contigerit ea secundum legem et consuetudinem regni nostri vendicari, nobis inde respondeat ad mandatum nostrum. Et ideo vobis mandamus quod eidem Roberto ea que ad nos pertinent de bonis et catallis predictis sine dilacione liberari faciatis in forma predicta. Teste rege apud Westmonasterium xvij. die Februarii.

Pro Willelmo le Latimer.—Rex baronibus suis de scaccario salutem. Sciatis quod pro ducentis marcis quas dilectus et fidelis noster Willelmus le Latimer, filius et heres Willelmi le Latimer nuper defuncti, nobis habere faciet a die Pasche proximo futura in unum mensem et pro laudabili servicio quod predictus Willelmus pater suus nobis impendit, remisimus et perdonavimus eidem Willelmo et heredibus suis omnimodos compotus, arreragia et raciocinia in quibus predictus Willelmus, pater suus, nobis tenebatur de toto tempore quo fuit vicecomes noster Ebor', escaetor noster ultra Trentam, custos dominicorum nostrorum, vaccariarum et instauri, et de omnibus finibus quos nobiscum fecit tam pro custodia de Morewik' quam aliis custodiis, et eciam de omnimodis balliis quas idem Willelmus in vita sua de nobis habuit vel tenuit et de omnibus debitis que a prefato Willelmo de debitis predicti patris sui ex quacunque causa exigere possemus. Et similiter quietum clamamus eundem Willelmum et heredes suos de omnibus receptis, liberatis et expensis per predictum Willelmum patrem suum factis de quibus nobis vel heredibus nostris in aliquo posset teneri vel debere. Remisimus insuper eidem Willelmo et heredibus suis et omnibus ballivis qui per predictum Willelmum patrem suum in servicio nostro steterunt omnes calumpnias, occasiones, inquisiciones, querelas et demandas quas racione earundem balliarum et custodiarum aliquo tempore habere potuerimus, ita quod de eisdem pro nobis et heredibus nostris omnino quieti sint imperpetuum. Concessimus eciam eidem Willelmo quod ipse quantum ad nos pertinet quietus sit de omnibus prisis per eundem Willelmum patrem suum vel ballivos suos factis ad opus nostrum tempore supradicto. Et ideo vobis mandamus quod eundem Willelmum et heredes suos inde quietos esse faciatis in forma supradicta. Teste rege apud Westmonasterium xx. die Februarii.

Pro Willelmo de Sancto Leodegario.—Rex justiciariis suis ad custodiam Judeorum assignatis salutem. Sciatis quod de gracia nostra speciali perdonavimus dilecto et fideli nostro Willelmo de Sancto Leodegario centum solidos in quibus idem Willelmus tenebatur Samueli le Blunt quondam Judeo London' defuncto per cartam suam; et ideo vobis mandamus quod cartam per quam prefatus Willelmus tenebatur prefato Judeo in dictis centum solidis ab archa cirografariorum Judeorum nostrorum extrahi et prefato Willelmo liberari et ipsum Willelmum de eodem debito una cum penis et usuris ejusdem debiti quietum esse et sic fieri et irrotulari faciatis. Teste rege apud Westmonasterium xxj. die Februarii.

De quercubus datis.—Rex Henrico de Allem', senescallo foreste sue inter pontes Oxon' et Stamf', salutem. Mandamus vobis quod in foresta nostra de Wauberge habere faciatis dilecto valletto nostro Ricardo de Waldeshef tres quercus aptas ad maeremium cum eschaetis de dono nostro. Teste ut supra.

Pro Lucia (sic) de Sancto Edmundo.—Rex Johanni le Moyne, escaetori citra Trentam, salutem. Cum nuper commisissemus dilecto et fideli nostro Petro Everard' domos illas terras et tenementa cum pertinenciis in Cantebr' que fuerunt magistri Thome de Sancto Edmundo custodienda ad voluntatem nostram salvo jure cujuslibet, ita quod ea in manum nostram resumere et unicunque jus in eisdem vendicanti justiciam exhibere possemus; et nos domos, terras et tenementa predicta in manum nostram resumpserimus et ea Luce de Sancto Edmundo, ad quem domus terre et tenementa predicta post mortem predicti Thome reverti debent per finem inde factum in curia nostra quem inspeximus, reddiderimus; vobis mandamus quod eidem Luce de domibus, terris et tenementis predictis cum pertinenciis plenam seisinam habere faciatis in forma predicta. Teste rege apud Westmonasterium xxvj. die Februarii.

De quercubus datis.—Mandatum est custodi foreste de Gillingham' quod in eadem foresta faciat habere magistro Petro de Spineto sex quercus ad maeremium de dono regis.

Pro Ricardo de Suthcherche quondam vicecomite Essex' et Hertford.'—Rex thesaurario et baronibus suis de scaccario salutem. Quia accepimus per inquisicionem quam per vos fieri fecimus quod Ricardus de Suthcherche, quondam vicecomes noster Essex' et Hertf', impeditus fuit per Hugonem Peche, Radulfum Perot, Radulfum de Berners et David de Offinton' et quosdem alios tunc nobis resistentes quominus officium vicecomitis potuit excercere in comitatu Essex' a festo Pasche anno regni nostri l° usque ad festum Sancti Hillarii proximo sequens, et quod non tenuit nisi duos turnos suos in comitatu predicto per totum tempus predictum, unde dampnificatus fuit ad valenciam centum marcarum; et eciam quod idem Ricardus a festo Pasche predicto usque ad festum Sancti Michaelis proximo sequens et ab eodem festo usque ad ingressum Edwardi primogeniti nostri in insulam de Ely tenuit omnes comitatus Hertford' preter tres, ita quod non fuit dampnificatus nisi ad valenciam centum solidorum; et quod dictus Ricardus et ballivi sui receperunt per predictum tempus omnes res assisas et alios exitus ad vicecomitem pertinentes in predictis comitatibus preter predictas centum marcas et predictos centum solidos, de quibus idem Ricardus oneratur ad scaccarium predictum ac si eos recepisset: nos indempnitati sue ad instanciam Edwardi primogeniti nostri in hac parte prospicere volentes remisimus eidem Ricardo predictas centum marcas et predictos centum solidos quos nondum recepit et de quibus oneratur ad scaccarium predictum ut predictum est de gracia nostra speciali, et ideo vobis mandamus quod ipsum inde quietum esse faciatis. Teste rege apud Westmonasterium xxviij. die Februarii.