Close Rolls, November 1242

Close Rolls, November 1242

Pro Roberto Tregoz.—Mandatum est Eboracensi archiepiscopo, Karleolensi episcopo et W. de Cantilupo quod summoneri faciant omnes heredes Urselli, Judei Hereford', quod certis die et loco sint coram eis et coram justiciariis ad custodiam Judeorum assignatis ad computandum in presencia alicujus quem Robertus Tregoz loco suo miserit, et ad ipsos certificandos quantum idem Robertus ipsis heredibus debeat, tam de lucro (fn. 1) quam de sorte, de debito quod debuit predicto Ursello a tempore quo mutuum ab eodem Ursello recepit, usque ad festum Omnium Sanctorum anno etc. xxvij.; et taliter de quantitate debiti predicti eos certificent quod processu temporis recuperare non possint ipsi nec heredes sui vel alii pro ipsis, ad aliquid plus petendum quam coram eis probaverint sibi deberi, et ex quo iidem archiepiscopus etc., justiciarii Judeorum, certificati fuerint quantum idem Robertus debeat eisdem heredibus de toto debito predicto tam de lucro (fn. 1) quam de sorte, ipsum quietum esse, et eisdem heredibus illud allocari faciant in debito quod regi debent de fine quem dictus Ursellus fecit cum rege post mortem Hamonis, Judei Hereford', patris sui, pro tercia parte bonorum que fuerunt ipsius Hamonis. Tallias eciam et munimenta alia, siqua habent, eidem Roberto reddi faciant. Teste rege apud Silvam, j. die Novembris.

Pro Willelmo de Oddingeseles.—Mandatum est eisdem quod faciant habere Willelmo de Oddingeseles scutagium de omnibus feodis militum que tenet de Girardo de Lindes' et idem Girardus tenet de rege in capite. Mandatum est eisdem quod tam ipsi Willelmo quam predicto Girardo litteras de quietancia ejusdem scutagii quales viderint convenire habere faciant. Teste ut supra. [Cancelled.] Quia aliter inferius.

De perdonatione pro Gilberto de Saunford'.—Rex perdonavit Gilberto de Saunford' x. marcas quas predicti archiepiscopus, episcopus et Willelmus ei habere mutuo fecerunt contra transfretationem suam. Et mandatum est eisdem quod ipsum inde quietum esse faciant. Teste ut supra. Per J. filium Galfridi.

Pro Willelmo de Oddingeseles.—Mandatum est eisdem quod faciant habere Willelmo de Oddingeseles scutagium de omnibus feodis militum que Gerardus de Lindeseye tenet de rege in capite. Teste ut supra. Per eundem.

Pro quibusdam servientibus regis.—Mandatum est Ricardo Ruffo quod faciat habere Seneruns et aliis servientibus regis in constabularia sua existentibus solidos suos sicut aliis servientibus existentibus in servicio regis. Teste ut supra. Per ipsum regem.

De plumbo mittendo usque Regulam.—Rex W. Eboracensi archiepiscopo, W. Karleolensi episcopo et W. de Cantilupo, salutem. Mandamus vobis quod emi faciatis centum libratas plumbi apud Bristollum, et per primas naves, que de villa illa venture sunt pro vinis in Wasconiam, plumbum illud venire faciatis usque Burdegalam ad operationes castri nostri de Regula, sine quo salvo consistere non possunt. Teste rege apud Regulam, ix. die Novembris. Per ipsum regem.

De bremiis datis H. de Vivon'.—Mandatum est Petro de Wakering' (fn. 2) quod faciat habere Hugony de Vivon' x. matrices bremias in vivario de Taunton' de dono regis. Teste rege apud Regulam, viij. die Novembris.

Pro Johanne filio Galfridi.—Rex commisit Johanni filio Galfridi manerium de Waddon' cum pertinentiis quod H. comes Arundell' nuper regi reddidit et est de terris Normannorum, habendum et tenendum ad se sustentandum in servicio regis donec rex inquiri fecerit quantum manerium illud valeat per annum. Et mandatum est Eboracensi archiepiscopo, Karleolensi episcopo et W. de Cantilupo quod de predicto manerio cum pertinentiis plenam seisinam ei habere faciant. Teste ut supra.

De quodam prisone pro alio redimendo.—Mandatum est Herberto filio Mathei et Nicholao de Mol' quod si aliquis serviens inter prisones de Munrevel cujus restitucio sufficiat ad redempcionem servientis Elye Viger capti et in prisona detenti apud Munrevel, tunc servientem illum, prisonem regis, liberari faciant Petro Willelmi, fratri predicti Elye, ad ipsum pro alio deliberandum. Et licet omnino tantum non valeat, ipsum tamen eidem fratri suo liberent. Teste rege apud Regulam, x. die Novembris.

De necessaria invenienda (sic) ad ingenia regis facienda.—Mandatum est maiori de Burdegala quod inveniat necessaria Gyrardo, carpentario regis, ut in maeremio, ferro et aliis ad ingenia regis facienda, et rex de custo ei satisfaciet. Teste rege apud Regulam, xij. die Novembris.

De perdonatione pro H. de Vivon'.—Rex baronibus de Scaccario, salutem. Sciatis quod de debito quod Hugo de Vivon' nobis debet ad Scaccarium nostrum pro debitis Willelmi Malet, de quo nobis reddidit x. marcas per annum, et de lx. libris quas nobis debet de prestito ei facto, perdonavimus ei quingentas marcas. Et ideo vobis mandamus quod ipsum inde quietum esse faciatis. Teste ut supra. Duplicatas habuit litteras.

De una roba data.—Mandatum est Rogero de Ros quod faciat habere Johanni de Blays unam robam de dono regis. Teste rege apud Regulam, xv. die Novembris.

De sellis ad summarios faciendis.—Mandatum est eidem quod fieri faciat xvj. sellas ad summarios regis ad harnesium regis deferendum; ita quod rex eas promptas habeat apud Regulam (fn. 3) hac die Jovis proxima sequenti. Teste rege apud Regulam, xvj. die Novembris. Postea mandatum est eidem quod eas fieri non faciat.

De mercimoniis retinendis.—Mandatum est Johanni filio Galfridi, Petro Chaceporc et Rogero de Ros quod de mercimoniis in navi de Cept' contentis, que nuper applicuit apud Burdegalam, retineant ad opus regis omnia de quibus stipendia militum et servientum reddere possint, et de precio predictorum ipsis mercatoribus plene erit satisfactum. Teste rege apud Regulam, xix. die Novembris.

De eisdem mercimoniis vendendis et denariis regi mittendis.— Postea mandatum erat Johanni Maunsel et Petro Chaceporc quod mercandisas de rebus contentis in navi predicta, que cicius vendi poterunt, per estimacionem proborum et legalium hominum (fn. 4) vendi faciant, si forte ille (sic) quorum mercandise ille sunt, id gratis et sponte sua permittere voluerint, et denarios quos inde receperint, regi mittant hac die Dominica in festo Sancti Andrei usque Silvam, simul cum denariis quos mutuo receperunt a Gailardo Culumb et aliis civibus Burdegale, et eciam quod omnem diligenciam quam poterunt, apponant ad plus mutuandum ad opus regis. Teste rege ibidem, xxiiij. die Novembris.

Pro Willelmo Lungesp'.—Mandatum est Petro Chaceporc quod de mercandisis contentis in predicta navi, et quas ad opus regis retinuit, faciat habere Willelmo Lungesp' ad valenciam centum librarum sterlingorum de dono regis. Teste ut supra.

Pro Johanne de Burgo.—Consimiles litteras habet Johannes de Burgo de xxx. marcis ei liberandis de prestito super stipendia sua.

De inquisicione facienda super mercandisis contentis in nave predicta.—Mandatum est eidem quod inquirat de nominibus singulorum mercatorum qui partem habent in mercandisis contentis in nave predicta, et quantum, et quid quisque habeat de mercandisis predictis, et quantum porcio singulorum valeat, et id imbreviari faciat ut rex scire possit et de quo et de quanto singulis eorum rex debeat respondere. Teste rege apud Regulam, xxv. die Novembris.

Pro Geraldo filio Mauricii.—Mandatum est Petro Chaceporc quod de mercandisis contentis in nave predicta faciat habere Geraldo filio Mauricii usque ad summam xl. marcarum de prestito. Teste rege apud Silvam, xxviij. die Novembris.