Close Rolls, August 1243

Close Rolls, August 1243

De perdonatione pro Ricardo de la Rokel'.—Rex perdonavit Ricardo de la Rokel' xx. libras quas recepit ad Scaccarium de prestito. Et mandatum est baronibus de Scaccario quod ipsum inde quietum ese (sic) faciant. Teste ut supra.

De damis datis.—Mandatum est Gilberto de Segrave, justiciario foreste, quod faciat habere Willelmo Lungesp' iiij. damis (sic) in forestis de Rokingh' et de Clive, de dono regis. Teste rege apud Burdegalam iiij. die Augusti.
Mandatum est eidem quod faciat habere Margerie, comitisse Penbrok' vj. damos in foresta de Brehull', de dono regis. Teste ut supra.

[In Schedule.]

Justiciariis suis ad custodiam Judeorum assignatis salutem. Sciatis quod concessimus dilecto et fideli nostro Henrico de Neketon' quod centum et decem marcas, quas debet Leoni de Eboraco, Judeo, de fine septies viginti marcarum quem cum eodem Judeo fecerat pro debitis in quibus ei tenebatur, de quo quidem fine terminos suos non servavit, et unde reddidit ei triginta marcas ad primum terminum, solvat eidem Judeo ad alios terminos subsequentes consimiles, quia volumus ipsum fidelem nostrum de terminis suis preteritis indempnem servare, et eciam de usuris de eisdem terminis non observatis esse quietum; et ideo vobis mandamus quod sic fieri et inrotulari faciatis. Teste me ipso apud Burdegalam, vj. die Augusti anno regni nostri xxvij.

[adbuc m. 5.]

Pro Runcino Bonacurci et aliis mercatoribus.—Mandatum est W. de Haverhull', thesaurario regis, quod in presencia baronum de Scaccario computari faciat cum attornato Runcini Bonacurci, Clar' de Palezoll', Runcini Simonete et Fuline Willelmi, mercatorum de Florencia, vel cum uno eorundem mercatorum, quantum scilicet posuerint in expensis attornati sui vel unius eorum in veniendo usque Lond' pro xx. marcis quas liberaverunt Bartholomei (sic) Pech' de prestito, quando rex eum ad dominum Imperatorem destinavit, et expensas rationabiles quas alter eorum monstrare poterit se fecisse post quindenam Pasche anno etc. xxvij. quousque predictas xx. marcas ad Scaccarium receperit, ei reddi faciat. Et cum rex sciverit quantum ei habere fecerit, breve de Liberate rex ei faciet habere. Teste rege apud Burdegalam, xj. die Augusti.

Pro hominibus Johannis de Burgo de Erleg'.—Mandatum est Gilberto de Sedgrave, justiciario foreste, quod demandam quam facit hominibus Johannis de Burgo de Erleg' pro expeditatione canum, ponat in respectum usque adventum regis in Angliam. Teste ut supra.

Littere directe W. Lungesp' pro negocio regis.—Mandatum est Willelmo Lungesp' quod viriliter se habeat in obsidione castri de Garro, quo capto illud muniri et salvo custodiri faciat, et statim se divertat usque Eustar' ad firmandum ibi castrum regis. Et interim rex mittet nuncios suos qui ei oretenus exponent totam intentionem regis super eo quod rex significavit de rege Navarre. Teste rege apud Burdegalam, xvj. die Augusti.

De damis datis.—Mandatum est Gilberto de Sedgrave, justiciario foreste, quod permittat Johannem filium Galfridi capere xx. damas vivas et iiij. damos vivos in foresta de Bernewude ad quendam parcum suum instaurandum, de dono regis. Teste ut supra.

De karettis faciendis et runcinis emendis in Anglia.—Mandatum est W. de Haverhull, thesaurario regis, quod per visum Ricardi Marescall' fieri faciat ad opus regis quinque longas karettas cum omnibus instrumentis et armamentis ad easdem pertinentibus. Et cum rex custum sciverit, illud ei reddi faciet. Teste rege apud Burdegalam, xviij. die Augusti.

Mandatum est custodibus nundinarum Sancti Egidii Wintonie quod acquietari faciant (fn. 1) x. bonos equos karettarios quos Ricardus Marescallus emet ad opus regis in nundinis Wintonie. (fn. 2) Et cum rex precium eorum sciverit, illud eis reddi faciet. Teste ut supra.

Et mandatum est Eboracensi archiepiscopo, Karleolensi episcopo et W. de Cantilupo, quod, si ad nundinas ipsas tempore competenti venire non possint, ipsi provideant eidem Ricardo de denariis, quibus emat eosdem carettarios. Teste ut supra.

Pro Willelmo de Berking' capellano.—Mandatum est fratri Johanni, elemosinario, quod inveniri faciat in hospitali Oxonie Willelmo de Berking', capellano ceco, necessaria, ut in victu et vestito, quamdiu vixerit. Teste rege apud Burdegalam, xx. die Augusti.

De operationibus capelle regis Wind'.—Mandatum est Eboracensi archiepiscopo quod tam in hyeme quam in estate operari faciat, donec capella regis Windesor' perficiatur, et fieri faciat ibidem cumulum altum ligneum ad modum cumuli novi operis Lichfeld', ita quod appareat opus lapideum, cum bona lambruscura et pictura, et capellam illam plumbo cooperiri; et iiij. imagines fieri faciat in eadem capella deauratas, et eas assideri locis quibus prius hujusmodi imagines rex poni disposuerat et unam turellam lapideam ad frontem ejusdem capelle, in qua possint suspendi iij. vel iiij. campane. Teste ut supra.

Pro Judeo.—Mandatum est Eboracensi archiepiscopo, Karleolensi episcopo et W. de Cantilupo, quod faciant habere Benedicto Crespin, Judeo Lond', respectum de omnibus debitis, tam de tallagis quam aliis, et omnibus aliis demandis ipsum contingentibus usque adventum regis in Angliam. Teste ut supra.

Pro hominibus de Regula.—Mandatum est thesaurario et camerariis quod sine ulteriori dilatione liberent nuncio proborum hominum de Regula litteras regis deferenti, cccc. marcas quas rex eis liberari precepit ad clausuram ville sue de Regula per breve de Liberate, et si forte pecuniam illam promptam non habuerint, eam mutuo perquirant ad opus eorundem hominum. Teste ut supra.

Pro Radulfo de Hereford'.—Mandatum est justiciariis ad custodiam Judeorum assignatis quod extendi faciant totam terram Radulfi de Hereford', quantum scilicet valeat in dominicis, redditibus et omnibus aliis exitibus terre, de qua quidem terra plenam seisinam ei habere faciant, et secundum valorem terre sue faciant habere eidem Radulfo racionabiles terminos de debitis, in quibus tenetur Aaron de Eboraco, Annot filio David le Lumbard de Notingeham et Mossee fratri suo, Judeis, et allocent eidem Radulfo in debitis predictis quicquid per ballivos regis vel per ipsos Judeos captum fuerit occasione debitorum predictorum. Teste rege apud Burdegalam, xxij. die Augusti. Per Johannem filium Galfridi et pro R. filio Nicholai.

Pro Gwidone de Russilun, Petro Chaceporc et Nicholao Lungesp'.— Mandatum est Eboracensi archiepiscopo quod non obstantibus aliquibus litteris quas rex prius concessit alicui clericorum suorum de provisione eis facienda, excepto Gwidone de Russilun, Petro Chaceporc et Nicholao Lungesp' provideant (sic) pre omnibus aliis in forma qua eis (sic) alias scripsit pro eisdem; quia rex vult ipsos Petrum et Nicholaum et Gwidonem alii preferri in provisionibus predictis. Teste rege apud Burdegalam, xxiiij. die Augusti.

De maeremio capiendo.—Mandatum est forestario de Savernak quod permittat constabularium de Merleberg' capere maeremium sufficientem (sic) in foresta de Savernak per talliam et per visum forestariorum et viridariorum ad quandam domum ad stagium faciendum in castro de Merleberg', secundum quod rex ei injunxit. Teste rege ibidem, xxv. die Augusti.
Et mandatum est eidem constabulario quod maeremium illud ita capiat. Teste ut supra.

Pro Paulino Peyvr'.—Rex (fn. 3) Eboracensi archiepiscopo, Karleolensi episcopo et W. de Cantilupo, salutem. Sciatis quod concessimus Paulino Peyvr', cui aliquando commisimus maneria nostra de Linleg' et de Wilye ad se sustentandum, quamdiu nobis placuit, quod de maneriis illis habeat xx. libratas terre de dono nostro sibi et heredibus suis imperpetuum. Et ideo vobis mandamus quod maneria predicta extendi faciatis, quantum scilicet valeant per annum in dominicis, redditibus, villenagio et omnibus aliis exitibus terre, et ex quo de extenta inde facta certi fueritis, assignetis eidem fideli nostro manerium de Linleg' pro quanto fuerit extentum, et id quod ei defuerit de xx. libratis terre in Linleg', perficiatis ei in manerio de Wylye, ita quod plenarie habeat xx. libratas terre, et plenam ei inde seisinam habere faciatis, sicut predictum est. In eodem vero manerio de Wylye assignetis Hugoni de Botyun x. libratas terre, quas ei concessimus, et facta assignatione predicta, si quid residuum fuerit, illud in manu nostra retineatis, salvis eidem Paulino bladis et aliis rebus suis in eisdem maneriis existentibus et custo suo quod posuerit in terris illis warettandis, que non remanent in manu sua. Teste rege apud Burdegalam, xxvj. die Augusti.

Pro Hugone de Botyun.—Rex concessit Hugoni de Botiun x. libratas terre in manerio de Wylyes tenendas tota vita sua ad se sustentandum in servicio regis. Et mandatum est eisdem quod facta extenta de maneriis de Linleg' et de Wylye, et assignatis Paulino Peyvr' xx. libratis terre in eisdem secundum tenorem litterarum regis, prefato Hugoni vel certo nuncio suo, litteras regis deferenti, plenam seisinam habere faciant de predictis x. libratis terre in Wylyis, sicut predictum est. Teste ut supra.

[m. 4.]

Hybernia. De terris Ricardi de Burgo capiendis in manum regis. —Mandatum est M. filio Geroldi, justiciario Hybernie, quod capiat in manum regis castra, terras et omnia tenementa que fuerunt Ricardi de Burgo, de quibus fuit seisitus ut de feodo die quo obiit, et ea salvo custodiri faciat, donec rex (sic) aliud inde rex preceperit, salvo tamen inde estoverio Egidie, que fuit uxor ejusdem Ricardi, donec rationabilis dos ei fuerit assignata. Tres eciam prius genitos liberos ipsius Ricardi mittat in Angliam. Teste rege apud Burdegalam, xxviij. die Augusti.

Pro Herefordensi episcopo.—Mandatum est custodibus archiepiscopatus Cantuariensis quod domos de Lamheth' liberent nuncio P. Herefordensis episcopi ad opus ejusdem episcopi, quas rex ei accomodavit ad moram ibidem faciendam. Teste ut supra.

Pro Reginaldo de Drumar'.—Mandatum est W. de Haverhull', thesaurario regis, quod sine dilatione liberet Reginaldo de Drumar' vel certo nuncio suo x. libras de feodo suo, et xx. marcas quas rex ei concessit pro amissione equorum suorum in servicio regis, prout brevia sua de Liberate protestantur, ne oporteat ipsum Reginaldum redeundo ad regem laboribus fatigari et expensis. Teste ut supra.

Pro pluribus hominibus religiosis.—Mandatum est eidem quod nunciis decani et capituli Sancti Seuerini Burdegale, decani et capituli Sancti Andree, et episcopi, decani et capituli Baionensium, et abbatis Sancti Severi pecuniam quam eis dedit per brevia sua de Liberate, habere faciat, ita quod pecunia illa solvatur ante adventum regis in Angliam. Teste ut supra.

De vinis reponendis apud Westmonasterium.—Mandatum est custodibus vinorum regis Lond' quod de vinis regis que sunt in custodia sua, reponi faciant in celario abbatis Westmonasteriensis ad opus B. comitisse Provincie xx. dolia vini, et in eadem abbacia in domibus in quibus abbas Evesham jacere consuevit, duo dolia vini ad opus Johannis Maunsel. Teste rege apud Burdegalam, xxix. die Augusti.

De baudekinis et aliis.—Mandatum est W. de Haverhull', thesaurario regis, quod contra adventum regis arestari faciat aurum ad valenciam mille marcarum, et emi faciat xv. baudekinos auri pulcros, et tres et tres simul jungi faciat, ita quod de xv. baudekinis fiant v. panni ad oblationes regis et regine et liberorum suorum faciendas. Teste ut supra.

De quercubus (fn. 4) datis.—Mandatum est Walerando Teutonico quod faciat habere priori de Munemuth' x. quercus in foresta de Albo Castro de dono regis ad fabricam ecclesie sue. Teste rege apud Burdegalam, xxx. die Augusti.

De cereis et aliis.—Mandatum est Edwardo filio Odonis quod contra adventum regis apud Westmonasterium fieri faciat tot cereos quot ad festum Sancti Edwardi solent poni in ecclesia de Westmonasterio, et ibidem ardeant in adventu regis; et provideat quod magnum lampadarium, quod est in ecclesia predicta, tunc accendatur et ardeat. Et cum rex custum sciverit, illud ei reddi faciet. Teste ut supra.

De candelabris argenteis.—Mandatum est W. de Haverhull', thesaurario regis, quod fieri faciat iiij. candelabra argentea, et poni loco illorum iiij. qui sunt circa feretrum beati Edwardi Westmonasterii. Et cum rex sciverit custum, illud reddi faciet. Teste ut supra.

De vinis.—Mandatum est custodibus vinorum regis de Westmonasterio quod in domo Novi Templi Lond' de vinis regis poni faciant iiij. dolia vini ad opus archiepiscopi Ebredunensis, qui in eadem domo jacebit, et in domo que fuit Briani de Insula, iiij. dolia vini ad opus episcopi de Reth', qui in eadem domo jacebit. Teste ut supra.

De bacinis argenteis faciendis.—Mandatum est Bertramo de Cryoyl quod fieri faciat iiij. bacinos argenteos, et poni locis iiij. bacinorum ligneorum cereos ferencium, qui sunt ante feretrum Sancti Thome Martiris. Et cum rex custum sciverit, illud ei reddi faciet. Teste ut supra.