1219, membranes 5d, 4d, 3d, 2d

1219, membranes 5d, 4d, 3d, 2d

1219.[m. 5d.]

Predicti magistri Johannes de Houton et Nicholaus de Evesham habent litteras directas omnibus amicis domini regis, per quorum terras et potestates ipsi transituri sunt, ut manuteneantur, protegantur etc. Et durabunt littere iste usque ad predictum terminum.

Rex venerabili patri in Christo H. eadem gracia Lincolniensi episcopo et sociis suis, justiciariis itinerantibus in comitatibus Lincolnie, Notinghamie, et Dereby, salutem. Monstratum est consilio nostro multis conquerentibus quod, cum plura brevia assisarum perquisita fuerint jam pridem et vicecomitibus porrecta, unde juratores electi fuerunt et visus terre factus fuerit, brevia illa postea deperdita sunt, propter quod multorum negocia differuntur. Et ideo vobis mandamus quod cum de hujusmodi brevibus deperditis querela coram vobis venerit, diligenter inquiri faciatis, per juratores assisarum illarum et per probos homines ejusdem visneti, si juratores assisarum illarum electi fuerint, et visus terre factus, sicut conquerentes dicunt; et si ita inveneritis, non obstante eo quod brevia illa deperdita sunt, assisas predictas capiatis per recordum et testimonium ipsorum juratorum. Teste domino P. Wintoniensi episcopo, apud Westmonasterium, xxiiij die Januarii, anno regni nostri tercio.

Eodem modo scribitur justiciariis itinerantibus in comitatibus Essexie et Bedefordie et Bukinghamie et Eboraci, et Norhumberlande et justiciariis itinerantibus in comitatu Suhamtonie et justiciariis itinerantibus in comitatu Cumberlande, et justiciariis itinerantibus in comitatu Kancie, et justiciariis itinerantibus in comitatibus Sumersete et Dorsete.

Venerabilibus patribus et amicis in Christo karissimis sancte Romane ecclesie cardinalibus, suus in omnibus H. Dei gracia, rex Anglie etc., salutem, et debitam sanctissimis patribus devocionem. Cum adhuc in nostris egerit partibus venerabilis pater G. tituli Sancti Martini presbiter cardinalis, merito nobis semper diligendus, de mandato domini pape Carleolensi ecclesie tunc vacanti pastorem prefecit idoneum, videlicet, H. quondam abbatem Belli Loci, virum utique in fidelitate nostra multipliciter expertum, sue perutilem ecclesie totique pariter regno nostro. Sane cum suam invenerit ecclesiam tantis tempore vacacionis sue possessionibus et honoribus mutilatam, videlicet ecclesiis de Novo Castro cum capellis et pertinenciis suis, et de Neuborn, et de Corbrigg, et de Roobiry, et de Wintingham, et de Penred, que sibi concesse fuerant in usus proprios in prima fundacione sua a rege Henrico primo, et aliis predecessoribus nostris, regibus Anglie, et per privilegia Romanorum pontificum confirmate, ut pontificali non sufficiant que sibi sunt reservata, de consilio nostro cui innotuerunt hec omnia, vestre duximus sanctitati devotissime supplicandum ut eidem episcopo, fideli nostro, cui multo tenemur debito, ac sancte Romane ecclesie devotissime ad reformacionem ecclesie sue diligencius aspiranti, si placet, assistere velitis in consiliis et auxiliis, quibus mediantibus, ea que dispersa sunt et ab ecclesia sua per incuriam et negligenciam habitancium in ea canonicorum alienata, sibi restituta fuisse gratuletur, ut suis sufficiat usibus episcopalis dignitas, que nunc quasi vilescere cogitur et egere. Et quia provectionem ejusdem episcopi, meritis fidelitatis sue multipliciter exigentibus, proprium reputamus, et reputare debemus honorem, vestram sibi gaudeat in hac parte diligenciam taliter affuisse ut ad obsequia et condignas devociones vobis diebus perpetuis artius teneamur obligati. Teste etc.

[m. 4d.]

Patentes de anno tercio.

Amicis suis karissimis majori et universitati Burdegale, major et universitas Londonie, salutem. Rogamus universitatem vestram, affectuose, quatinus ob honorem domini vestri et nostri H. illustris regis Anglie, et communem utilitatem parcium vestrarum, commodetis nobis ad opus ipsius domini vestri et nostri regis mille marcas, ad defensionem ville vestre et parcium vestrarum si necessitas emerserit, quas liberetis fratri G. Brochard magistro milicie templi Aquitanie et abbati de Silva, vel eorum alteri, si ambo présentes non fuerint, expendendas in defensionem terre domini regis infra festum Omnium Sanctorum anno regni ipsius domini regis quarto. Nos enim manucapimus quod cum ille mille marce liberate fuerint predictis fratri G. Brochard et abbati de Silva vel eorum alteri, si ambo ad hoc intendere non possint, et posite fuerint in defensionem terre domini regis si necesse fuerit, sicut predictum est, nos ad diem quem mandabitis per litteras vestras patentes simul cum litteris patentibus ipsorum fratris G. et abbatis de Silva vel alterius eorum, testificantibus se illas recepisse, inde vobis sine difficultate satisfaciemus, et ad hoc vobis nos et res nostras obligamus. In cujus obligacionis testimonium, has litteras nostras patentes, sigillatas communi sigillo civitatis Londonie, vobis transmittimus. Valete.

Eodem modo scribitur majori et universitati Rupelle de mille marcis liberandis fratri G. Brochard et abbati Sancti Johannis Angeliaci.

Rex vicecomiti Wiltesire, salutem. Sciatis quod constituimus Jacobum de Trewe, Hugonem de Druweis, Willelmum Gereberd, Willelmum de Nevill, Galfridum le Sauvage, et Willelmum filium Alani, clericum, inquisitores nostros per comitatum Wiltesire, ad itinerandum et ad inquirendum, per sacramentum viridariorum et forestariorum nostrorum de feodo, que essarta facta sunt et inbladata in comitatu Wiltesire post primam coronationem nostram sine precepto nostro, et quis ea essartavit, et quo waranto, et per quem, et quantum singula essarta teneant, distincte et aperte, per numerum acrarum, et quis ea inbladavit, et quantum valeant singula inbladamenta per se. Et ad inquirendum similiter que essarta facta sunt in eodem comitatu et nondum inbladata, et quis ea essartavit, et per quem, et quo waranto, et de cujusmodi vestitura vestita fuerunt singula essarta et non inbladata antequam fuerunt essartata, scilicet sive de grosso bosco, sive de riffleto, et que essarta facta sunt de dominicis boscis nostris, et que de boscis aliorum. Et ad capiendum in manus nostras omnia essarta predicta, tam inbladata quam non inbladata, et ad ponendum per vadia et salvos plegios omnes illos qui essarta predicta fecerunt, sicut predictum est, quod veniant coram H. de Burgo, justiciario nostro, et consilio, in crastino Assumpcionis beate Marie, ostensuri quo waranto ea fecerunt et inbladaverunt. Et ideo tibi precipimus quod, ab octabis apostolorum Pétri et Pauli in xv dies, predictis viridariis, forestariis et inquisitoribus occurras apud Wilton, et deinde cum eisdem eas per comitatum tuum, et diligenter et fideliter per sacramentum viridariorum et forestariorum inquisicionem fieri facias de essartis predictis, et de valore inbladamentorum, sicut predictum est, et distincte et aperte inrotulari facias nomina illorum qui essarta predicta fecerunt, et per quem, et quo waranto, et quantum valeant singula inbladamenta per se, et quantum singula essarta teneant, per numerum acrarum. Et inquisicionem inde factam, sub sigillo tuo et sigillis viridariorum et forestariorum et inquisitorum predictorum nobis scire facias. Litteras autem nostras quas mittimus viridariis et forestariis et inquisitoribus super negocio predicto sine dilacione eis mitti facias. Teste H. de Burgo, justiciario, apud Gloucestre, iiij die Julii. Per eundem, coram domino Wintoniensi.

Et mandatum est viridariis et forestariis quod ab octabis apostolorum Pétri et Pauli in xv dies predictis inquisitoribus et vicecomitibus occurrant apud Wilton, et deinde eant cum eisdem ad inquisicionem illam faciendam, et in fide qua domino regi tenentur eos per omnia essarta predicta fideliter ducant et ea eis ostendant et negocia domini regis diligenter et fideliter cum eis expediant, secundum quod predictum est, et sicut plenius continetur in litteris patentibus quas eidem vicecomiti inde dominus rex mittit, talem et tantam diligenciam ad hoc apponentes, ne pro defectu eorum ad eos inde dominus rex [se] capere debeat. [The last two entries are bracketed in the margin with the words "Littere iste patentes sunt."]

Mandatum est vicecomitibus Suhamtonie et Berkesire et viridariis et forestariis de feodo de eisdem comitatibus, ut eant cum dilecto et fideli suo Ingelardo de Cygony, per comitatus Suhamtonie et Berkesire in baillia ipsius Ingelardi, ad videndum essarta predicta, sicut predictum est, et quod una cum eodem Ingelardo, ad predictam inquisicionem faciendam per bailliam suam eant. Teste H. de Burgo, apud Westmonasterium, xxij die Julii. Per ipsum, coram domino Wintoniensi.

Mandatum est Willelmo de Sorewell, vicecomiti Suhamtonie, Mauricio de Turevill, Waltero de Rumese, Willelmo de Sancto Maxencio, clerico, et viridariis et forestariis de comitatu Suhamtonie, quod loco Rogeri de Scures, Ricardi de Terstewud, et Ricardi de la Bere, infirmorum, alios eligant fideles et ad hoc necessarios et auctoritate domini regis sibi adjungant, et de boscis in quibus potestatem habent viridarii et forestarii de feodo intelligenda est hujusmodi inquisicio debere fieri, et quod secundum hoc ad inquisicionem illam fideliter et diligenter intendant. Teste H. de Burgo, justiciario, apud Westmonasterium, xxij die Julii. Per ipsum et dominum Wintoniensem.

Littere iste misse fuerunt singulis inquisitoribus et sunt clause. Rex Jacobo de Trewe, salutem. Sciatis quod constituimus vos inquisitorem cum Hugone de Druweis etc. et cum viridariis et forestariis de feodo de comitatu Wiltesire ad itinerandum in eodem comitatu, ad inquisicionem faciendam, per sacramentum eorundem viridariorum et forestariorum, de essartis inbladatis et non inbladatis, factis in comitatu predicto post primam coronationem nostram sine waranto et precepto nostro, secundum formam litterarum nostrarum patencium, quam inde misimus vicecomiti Wiltesire et predictis viridariis et forestariis. Et ideo vobis mandamus quod ab octabis apostolorum Petri et Pauli in xv dies occurratis predictis inquisitoribus, viridariis et forestariis et vicecomiti apud Wilton, et deinde eatis cum illis ad inquisicionem illam faciendam, et negocia nostra diligenter et fideliter unacum illis, secundum quod predictum est, expedienda, sicut plenius continetur in predictis litteris nostris patentibus vicecomiti Wiltesire inde transmissis. Teste H. de Burgo etc. ut supra.

[m. 3d.]

[m. 2d.]

Patentes de anno domini H. regis tercio.

Rex vicecomiti Bedefordie et inquisi toribus essartorum ejusdem comitatus, salutem. Mandamus vobis quod,—acceptis salvis et securis plegiis ab illis, qui essarta fecerunt in comitatu Bedeford post primam coronationem nostram, et ea inbladaverunt, secundum inquisicionem inde factam a vobis et consilio nostro transmissam, quod a die Sancti Michaelis in unum mensem habebunt coram consilio nostro apud Westmonasterium precium bladorum, quibus inbladata sunt essarta illa, et quod eadem die ibidem respondebunt de ipsa transgressione essartandi, —eis blada illa dimittatis, diem predictum eis statuentes in forma predicta. Ab illis, autem, qui essarta fecerunt et non inbladaverunt, salvos plegios similiter capiatis ad respondendum ibidem eadem die de transgressione essartandi, et habeatis ibi nomina plegïorum et hoc breve. Teste H. de Burgo, justiciario nostro, apud Norhamton, xvij die Augusti, anno regni nostri tercio.

Eodem modo scribitur vicecomitibus et inquisitoribus Notinghamie, Dereby, Gloucestrie, Huntindonie, Oxonie, Bukinghamie, Norhamtonie, Essexie, Berkesire, Staffordie, Salopesire,Cumberlande, Rotelande, et Leicestrie.

Eodem modo scribitur vicecomiti et inquisitoribus essartorum comitatus Lancastrie, de essartis factis in dominicis boscis domini regis, hoc adjecto, quod essarta que milites et liberi homines ejusdem comitatus fecerunt post coronacionem domini regis in dominicis boscis eorum et in pace eis dimittant, secundum libertates eis concessas per cartam domini J. regis, quibus libertatibus hucusque usi sunt.

Mandatum est vicecomiti et inquisitoribus essartorum Wigornie sicut aliis, eo mutato, quod J. Marescallus capturus est securitatem istam et diem predictum eis statuet in predicta forma, et habeat ibi nomina plegiorum et breve, sicut per litteras domini regis clausas ei mandatum est.