Extracts From the Records of the Burgh of Edinburgh, 1528-1557. Originally published by Scottish Burgh Records Society, Edinburgh, 1871.
This free content was digitised by double rekeying. All rights reserved.
4 January 1530–1.
The Sourteis of the broustaris that has falit, to be poyndit.
The quhilk day, the prouest ballies and counsall decernis and ordanis that all the souerteis of the broustaris that has falit and brokin the statutis of the toune sen thai fand the said souerte, that the souerteis be poyndit for xl s., and that the said poynd be delyuerit to the ballie of the quarter to be kepit be him apone the broustaris gude bering; and gif thai keip the statutis and falis nocht, the plegis to be deliuerit to thaim agane; and quhilk of thaim that brekis to be spanit the occupatione.
The quhilk day, the prouest ballies and counsall ordanis Johne Blakstok, as souirte for his wif, till deliuer ane plege in the ballies handis of xl s. for breking of the statutis of the toune, and that his wif forbere in tym to cum and keip the statutis, vnder the pain of spanyn fra the operatione for yeir and day.
The quhilk day, the prouest ballies and counsall ordanis Patrick Flemyn, souerte for his dochtir, to be poyndit for xl s. becaus scho brak the statutis, and chargis hir that scho brek nocht in tyme to cum, vnder the pane of spanyng the operation for yeir and day.
The prouest ballies and counsall ordanis Maister Robert Galbraith, as souerte for Heline Naper, to be poyndit for xl s. because scho brak the statutis of the tovne, and chargis hir that scho brek nocht in tyme to cum, vnder the pain of spanyng the operatione for yeir and day.
Selling of Leith aill.
The quhilk day, the prouest bailies and counsall ordanis Johne Andersone till decess and ses fra all maner of selling and tapping of ony Letht aill in tyme to cum.
Thir ar the namis of the brostaris of this toune in William Symmisquarter, viz. fra the vplie stane till Lord Borthikis cloise, quhilkis has brokin the statutis of the toune in brewing and tapping off xx d. ale the gallone sen thai fand thar souerteis abefore:—
William Symsoneis wyff.
[Here follow fifteen names.]
Thir ar the names of the broustaris that fand na souerte of befor, that hes fund souerte now till keip the statutis of the toune quhill Michelmes nixt to cum:—
Robert Wilsone is becumin souirte for Maiory Falconer, vnder the pane of xl s.
[Here follow twenty-three similar entries.]
Thir ar the personis that hes brokin the statutis of the toune in the bying of Leith aill and selling of the samyn agane for xx d. the gallone:—
Johne Archibaldis wiff.
[Here follow five names.]
Thir ar the namis of the broustaris of this tovne in Johne Mauchane quarter, viz. fra the west port till the Lord Borthikis clos, quhilkis has brokin the statutis of the toune in brewing and tapping of xx d. ale the gallone sene thai fand the souerteis of befor:—
Johne Brodderstanis wiff.
[Here follow ten names.]
Thir ar the namis of the brostaris that fand na souerte of befor that hes fund souerte now till keip the statutis of the tovne quhill Michelmes nixt to cum vnder the pane of xl s.
Litill James Johnesone souerte for Sanderis Andersonis wife vnder the pane of xl s.
[Here are twenty-two similar entries.]
22 March 1530–1.
Pro Margareta Murray.
Vicesimo secundo die mensis Martii anno Domini millesimo vc xxxmo, indictione quarta pontificatus domini nostri Clementis Pape septimi anno octauo, in mei notarii publici et testium subscriptorum presentia personaliter accessit honorabilis vir, Andreas Murray de Blakbarony, ad personalem presentiam Henrici Wardlaw, filii et apparentis heredis Johannis Wardlaw de Torry, et ibidem pronunciauit quandam scriptam siue contractum requirendo ipsum ad implendum eiusdem, inter ipsum et Margaretam Murray suum sororem factam, exeo quod ipse fuit promptus et paratus ad implendum eundem in omnibus punctus et articulis in eosdem contentis, cuius vero tenor scripture siue contractus sequitur et est talis:— [On the twenty-second day of the month of March, in the year of our Lord one thousand five hundred and thirty, in the fourth indiction, in the eighth year of the pontificate of our lord Pope Clement the Seventh, in presence of me, notary public, and witnesses subscribing, appeared personally an honourable man, Andrew Murray, of Blackbarony, in the personal presence of Henry Wardlaw, son and heir apparent of John Wardlaw of Torry, and there declared a certain writing or contract made between him and Margaret Murray, his sister, requiring him to implement the same, because he himself was ready and willing to implement the same in all the points and articles therein contained, of which writing or contract the tenor follows, and is thus.] I, Andro Murray of Blakbarony brother germane till Margaret Murray, in the said Margaretis name requiris yow Henry Wardlaw yonger lard of Corry till contract fulfill and complete mariage with my said sister solemnalie in face of halikirk conforme till the wedding maid betuix yow and hir of befor and the contract maid be your fader and yow and my moder and the said Margaret, quhairappone your fader has ressauit ellis ane grete sovme of money in part of pament of the tocher gud, and as for the rest I offer me reddy till mak sikker efter the forme of the said contract and as ony wyis men will devis be souerte or vther wayis for the paying and fulfilling of the said Margaretis part in all and sindre thingis concerning hir and my said moder sua that thar salbe na falt imput till hir in non fulfilling of hir pairt of the said contract: Protestand and ye mary vtherwais and mary nocht efter the forme of the said contract or failye in ony maner of poinct of the samyn for the said Margaretis actione, in that cais scho micht haue all dammage and enteress that scho has incurrit or may incur, and for all maner of expens and panis that scho may follow yow be the law, be reson of brekin of the said contract, considering my said sister and I ar reddy till fulfill the samyn in all poinctis for our pairt realie and in effect, efter the forme and tenour of that ilk. Super quibus omnibus et singulis predictus Andreas Murray nomine et exparte dicti Margarete sororis, petiit instrumentum. Acta erant coram altare sancti (blank) situate in ecclesia collegiata Sancti Egidii huiusmodi burgi hora vndecima aut eocirca. Testibus Michaele Cullous, Willelmo Watsoun, Jacobo Bikkertone, Alexandro Carmage alias Heche, et Edwardo Craufurd.
[Upon which all and sundry the said Andrew Murray, in the name and on the part of the said Margaret his sister, asked instruments. These things were done before the altar of St (blank) situated in the Collegiate Church of St Giles of the said burgh, at the eleventh hour or thereabout. Witnesses, Michael Cullous, William Watson, James Bikkertone, Alexander Carmage alias Heche, and Edward Craufurd.]
19 May 1531.
The quhilk day, in presens of Maister Adam Ottirburne prouest etc., Maister Adam Mwre, maister of the Hie Scule, oblist him to mak the bairnys perfyte grammariarris within thre yeris.
[Decree Arbitral between the Wobstaris, Walkaris and Scheraris, and Bonnetmakaris.]
The nyntene day of the moneth of Maij the yeir of God ane thousand five hundreth thretty and ane yeir, in presens of ane honorabill man, Maister Adam Ottirburn of Aldham, provest ballies and counsall sittand in jugement, comperit Andro Michell, dekin of the craft of Wobstaris, and with him the haill brethir of the said craft on that ane pairt, Williame Steill, dekin of the Walkaris and Scheraris, and Andro Auld, hedisman of the Bonetmakaris, and with thame the haill brethir of Walkaris Scheraris and Bonetmakaris on that vthir pairt, and thare the saidis tua partiis has of thair awin fre motif willis submittit and oblist thame be the vphaldin of thare handis till abyde and fulfill the ordinance counsall and deliuerance of the provest ballies counsall communite and dekynnis of craftis that tyme beand gaderit and present in the Tolbuith, as jugis and amicabill compositouris evenlie chosin betuix thame, but appellatioun or reaclamatioun in tyme tocum, anent all and syndry debaitis contrauersiis actionis causis and querellis that athir of the saidis partiis has to say aganis vtheris ony tyme befor the day of the dait heirof, and in speciall anent the ordering of thame to pas in the processioun on Corpus Christi day and the octauis tharof, and all vthir generall processionis and gatheringis in all tymes tocum, and als anent the reule of the Bonetmakaris and remanying of thame with the Walkaris and Scheraris and paying of thare dewiteis till Sanct Markis altar; the richtis resonis and allegationis of baith the saidis partiis at lenth sene hard and vnderstandin, and tharwith beand ryplie auisit, the forsaidis prouest ballies counsall communite and dekynnis of craftis decernis ordanis and deliueris all in ane voce, for the pecifying und cessing of variance and discord betuix the saidis partiis and craftis in all tymes tocum, that the saidis dekin and brethir of the Wobstar craft sall ressaif and suffir the saidis dekin ouerman and brethir of the saidis Walkaris Scheraris and Bonetmakaris to resort and pas with thame all togidder in ane place on Corpus Christi day and octauis tharof, and in all vther generall processionis and gatheringis in all tymes tocum, without ony stop or impediment to be maid to thame tharintill, and als to spley and bere thar baneris ilkane with vtheris as the maner is in syk tymes, quhilk place and rovme salbe callit the Wobstaris place and rovme for euir, and the saidis Walkaris Scheraris and Bonetmakaris and thar successouris to be with thame in bretherheid and bruke the said place of licence and tollerance of the saidis brethir of Wobstaris and thare successouris in all tymes tocum, for the quhilk plesouris and tollerans aboue wryttin the saidis dekin and brethir of Walkaris Scheraris and Bonetmakaris and thare successouris sall content and pay to the saidis dekin and brether of the saidis Wobstaris and thare successouris the sovme of threttene schillingis and four penniis yeirlie ay and quhill thai content and pay the sovme of ten pundis vsuall money haill and togidder on ane day to the saidis brether of Wobstaris, and sua this ordour and reule to remane amangis the saidis craftis and thare successouris for euir but ony variance or discord in tyme tocum. Extractum de libro actorum curie consilii Burgi de Edinburgh per me Johannem Foular, notarium publicum, communem scribam dicti curie, sub meis signo et subscriptione manualibus, vnacum appensione sigilli commoni ad causas prefati burgi, in fidem robur et testimonium omnium et singulorum premissorum apud Edinburgh anno mense et die prescriptis. [Extracted from the book of the Acts of the Court of Council of the Burgh of Edinburgh, by me John
Foular, notary public, common clerk of the said burgh, under my sign and subscription manual, together with the appension of the common seal for causes of the said burgh, in faith, strength, and testimony of all and sundry the premises, at Edinburgh, the year month and day before written.]
1 July 1531.
The quhilk day, the prouest baillies and counsale, sittand in jugement, decernys and ordanis Dauid Gillaspye baxster, for braking of the statutis of the toun oft and sindrie tymes, baikand his breid vnsufficient stuf bayth of wecht and fynes, and wald nocht mend the samyn bot persaverit dalie thairintill, for the quhilk cause he sal pay to the commoun gude the sowme of ten pundis; and gyf he happinnis fale in tyme cuming anent the baiking of his breid, contrair the statutis of the toun, thay ordane he be spanyt the occupatioun of the baxter craft for all the dayis of his lyfe.
7 July 1531.
First warning a causis.
It is statute and ordanit be the prouest ballies and counsall for the eise and commoun weill of our Souerane Lordis liegis, and eschewin of expensis in tyme to cum, that quhat persone man or woman that is warnit be ane officiar of the toune till compeir befor thame at the instans of ony party, and thai compeir nocht the first warnyng at the officiar makis, thai personis sall pay ane vnlaw of viij s. vnforgevin, and the nixt warning salbe with certificatione and thai compeir nocht the prouest ballies and counsall proceid and minister justice to the pairtii complener with[out] ony langer delay in peyne of thar contumatione. (Nychtbourheid buik end.—Tr.)
12 August 1531.
Pro Roberto Grahame.
xii die mensis Augusti anno Domini jM vc xxxi, hora vii post merediem, indictione quarta, pontificatus Clementis Pape septimi anno octauo, personaliter constitutus [On the twelfth day of the month of August one thousand five hundred and thirty-one, in the seventh hour after noon, in the fourth indiction, and in the eighth year of the pontificate of Pope Clement the Seventh, personally appeared] viz. Alexander Levingtoun the son and air of vmquhile Johne Levingtoun, burges of Edinburgh, of his awin fre motif will giffs and grantis full faculte licence and tollerance till Robert Grahame burges of the said burgh, till mak ane squair wyndo in the south part of his nether hall quhare the round oo is now of his land liand within this burgh, within the tenement of vmquhile Nichol Spethy on the est syd, the said vmqhile John Levingtounis land, als heich and wyde and ot the samyn hall; and that for certane gratitudis done be the said Robert till the said Alexander; And heireapone the said Robert Grahame askit instrumentis: Acta erant hec infra burgum de Edinburgh in taberna Willelmi Vddert: Presentibus ibidem Georgeo Lausoun, Willelmo Tod, Johanne Park, et Johanne Anderson. [These things were done within the Burgh of Edingburgh, in the shop of William Vddert. Present, the said George Lausoun, William Tod, John Park, and John Anderson.]
19 October 1531.
Thir ar the names of the brousteris fra Alexander Cantis Clos at Leith Wynd on the north est quarter, of the quhilk Symon Prestoun is ballie, that has oblist tham till obserue and keip the statutis of the tovne that thai sall nother sell nor tap darrare aile than for xx d. the gallone in thair hous nor outwith in tyme cuming vnder the pane of spaning and vsing of the said operacione for ane yeir.
[Here follow the names of twenty-nine brousters, and obligations, by them and their sureties, to keep the statutes of the town.]
Thir are the names of the brosteris fra the Loplystane till Lord Boirthwikis clos of the south est quarter, [of the] quhilk Edward Kincaid is ballie, that has oblist thame till obserue and keip the statutis of the tovne that thai sall nother brew nor tap darrar aile than for xx d. the gallone in tyme tocum, vnder the pane of spaning fra the operacione for yere and day.
[Here follow the names of nine brousters, and obligations, by them and their sureties, to keep the statutes of the town.]
20 October 1531.
[Seal of Cause to the Tailors.]
Tyll all and syndry, quhais knawlege thir present letters sal cum, the provest, ballies, and counsall of Edinburgh, greting in God euerlesting: Wyt your vniuersite, that the day and the dait of the making of thir present letters, comperit befor ws counsally gaderyt, Thomas Stanhous, Kyrk-maister, Thomas Arthour, Andro Edgar, William Pacok, Alexander Frostar, Andro Persoun, Alexander Robesoun, Robert Spittal, Johne Cowpar, Johne Kraik, Johne Bayne, and Thomas Thomesoun, and the laif of the maisterys of the tailyeor craft within this Burgh, and present till ws thair supplicatioun, contenand certane statutis, articulis and reulis, dyuysyt be tham to be affirmyt be ws, for the loving of God Almyghty, the honour of the realme, the worshype and proffyt of thys gud tovne, and the proffyt of all oure soverane lordys liegis, and vtheris reperant thairto, and in exampell of vtheris, and for the agmentatioun of dyuyne seruice at the alter of Sanct An, situat within our College Kyrk of Santt Gele of the said Bnrgh, and thairfor desyryt that thai mycht haue thir statutis articulis and reulis followand grantyt and gevyn to the saidis brether and thair successouris be ws and our authorite, quhairthrow gud reule and gyding may be had amangis thame of the said craft, bayth maisterys and seruandys, and thair successouris thairof in tyme to cum, considering it is said be commonis authorite, that multitud but reule makys confusioun and for till eschew the vice thairof, and to be eschewyt in tyme to cum, the quhilk desyr we thocht consonant to resoun, and thairfor has grantyt and gevyn to the saidys brethir, and thair successouris, thir statutis, articulis and reulis followand: Item, in the first, that sen all entresment of verteu, practik and knawlege, standys in gud begynyng and fundiment, and fra thynfurth to continew in vse and perseuire till fynale end, that fra thyn furtht all maner of prentis [that] sall be tayne at the said craft sall stand in pryntischype for the space of sevyn yeris, and na less, without dispensatioun of the principall maisterys of the said craft, and specialye in fauours of the sonys of the said craft, and ilk prentis till pay at his entry to the reparationis and wphald of dyuyne seruice at thair said altar, or ony prentis be sett apoun the tailyeor burd, ten shillingis. Item, that na maister resaif ane seruand that hes nocht bene prentis within this Burgh with ane free maister of the said craft, without he pay ten shillingis to the said altar, and that he [be] bund prentis to the maister that resaiffis hym for ane certane of yeris, as the sayd maister and he can aggre. Item, that nane of thir saidys prentissis be ressauit, without the dekyn, the four kyrk maisterys and the chaplane that says prayers, till be for the tyme, be present for till put the saidys prentissis in thair prentis buk, and mak the indenturis of thair conditiouns amangys thame, under the payne of twenty schillingys, till be payt till Sanct Gelys werk, and twenty to the reparatioun of the said altar of Sanct An vnforgevyn als oft as thai brek ony puoct of the said act. Item, that nowthir thir prentisis, nor nane vther persoun of the said craft, be sufferyt till sett wp buyth within this said Burgh, nor wyrk of the said craft, bot with ane fre maister of the samyne, without he be sworn maister, and fund sufficient, habyll and worthy thairto in practik and vtherywayis, and admyttyt thairto first be the sworn maisterys of the said craft principall, and maid fre man and burgess of the said Burgh, and than for his wpset till pay fyf pundys to the reparatiouns and wphald of dyuyne seruice at thair said altar with an honest dennar to the sworne maisteryis thairof. Item, that na fre maister of the said tailyeor craft fie ane vther craftis man of ane vther craft to wyrk in his buyth, under pain of ten schillingys till be payit to Santt Gelys werk, and ten schillingys to Santt Annys altar, als oft as ony maister wses the samyne. Item, that na vnfreman of the said craft cum within the fredome of this towne that has ane buyth without the fredome of the samyne, till tak ony werk or stuff furth of the samyne till wyrk it, owder schappin or wnschappin, it sall be lesum till the dekyn and maisterys of the said craft for the tyme till tak the samyne werk fra thame, and gyf it be made werk, the price thairof till cum to the reparatioun of thair said altar of Sanct An, and gyf it be not maid, na fre maister of the said craft till mak the samyne to the persouns that the said stuf pertenys to, and take his price thairof, because the saidis vnfremen nowthir scottis, lottis, walkis nor wardis within our said fredome. Item, that na burgess, na fre man within this burgh, lord na lard, resaif ane vnfreman of the said craft in thair houses nor lugenys till wyrk quyetly or oppynly, in defraude of the said craft, without the pricys thairof be payit to the said dekyn and maisterys, to the reparatiouns of thair said altar, and quhay doys in the contrar, that officiaris of this gud tovne pas with the saidis dekyn and maisterys, and mak thame oppyne durris, and deliver the stuf that they fynd wrocht and vnwrought, being in the saidis vnfremens handys for the tyme, to the saidis dekyn and maisterys, and till remayne with thame quhill the pricys thairof be payit to the reparatioun of thair said altar, and gyf ony burgesses, lordis, lardis, or vthir fremen, induellars, or vnfremen within this burgh, uses the resett of sic vnfremen of the said craft in tyme cummyn, thai sall pay vnforgevyn twenty schillingys to Santt Gelys Werk, for ilk tyme thai be fund in thair forsaidys houses and lugenys, fra the first charge be gevyn be ane offycyar of this gud tovne, and to pay the officiaris for thair lawbouris, and ten schillingys to the said altar, for the costys and skayth it sustenys thairupon. Item, that [na] maister of the tailyeour craft ressaif nor resset ane vther maisterys servand nor prentis of the said craft within this burgh, without he haue maid compt and raknyn with the maister he cumys fra, and that he be contentyt thairof, vnder the payne of ten schillingys to be payit to the said altar quha dois the contrar vnforgevyn. Item, gyf ony fremaister of the said craft within this burgh brekis ony manys stuf vnordourly, or womanis, and spillis the samyne in his defalt of werkmanshype, the persoun that aw it sail cum to the dekyn and maisterys of the said craft for the tyme, and plenye thairupon, it beand seyn be ane certane of the said sworne maisterys, that the werkman thairof has falyeit in ony punct, the said dekyn and maisterys sail cause the said man till recompens the complenyear thairof, of the skayth he has sustenyt thairthrow, and that thair be certane maisterys of the said craft be sworn apon all sic caissis, or thai decerne in the samyne, that thai sail lelely and treuly, without feid, fawour, or prejudice of party, depone and deliuer in the samyne, and cause the complenyear till be payit of his skayth. Item, that na maister sail haue forman in his buyth till wyrk, bot ane allanerly within this fredome. Item, that na maister sail dissobey the dekyn and maisterys for the tyme, in the gatheryn in of the dewteis to thair said altar, vnder the payne of twa punddis of walx till be payt to the said altar als oft as thai dissobey vnforgevyn. Item, gyf thair be ony fremaister of the said craft that bydis away fra the quartar comptis, thai being lawfully warnyt be the seruand of the said craft, he sall pay ane pund of walx vnforgevyn, without he haue ane releuand excnsatione, and that it be oppynly knawn. Item, gyf ony maister of the said craft dissobeys the dekyn and the maisterys in ony thing that is for the commone weill of the samyne, quhairthrow they will not obey, without an officiar of this gud tovne he brocht to thame till pund for the samyne, thai sall pay twa schillingys to the officiar for his feys, and ane pund of walx with the dewteis that are awyn. Item, that ilk maister haldand butht within this burgh of the said craft, sall pay his wkly penny to the reparationis of the enhornamentys of the said altar, and susteyne the prestis meit thairof, as it cummys about, and that the said kyrk-maister, and ane certane of the principall maisterys of the said craft that sall happyn till be for the tyme, sall haue fulfeture, leif and preuilige, with ane officiar of the tovne till pas with tham for till pund and distrenye, gyf neid be, for the takyn, rasing, and inbringyn of the forsaids dewteis to the sustentatione and uphald of Godis seruice, as said is, but danger, stop, or impedyment. And attour, gyf it sall happyn ony maister or freman of the said craft, efter that he be maid maister to the samyne, abstrak him and disuse his said craft, and thairefter returne agane to the occupying of the samyn craft, that he sall pay all maner of dewteis bypast, sa he be thollyt till wyrk at the said craft, or ellis till pay his new upsett agane. Quhilkys statutis, articulis and reulis, with preuilygys aboue writtyn, we the saidis prouest, baleis and counsall for ws and our successors, gyffys and grantis to the saidis dekyn and maisterys, and affirmys, ratifys, approvis and confirmys the samyne, in all punctis and articulis to the saidis dekyn and maisterys, to be brukyt and josyt be thame and thair successors of the said craft, in perpetuall memoriall in tyme cummyn for euer mayr. And this till all quhom it efferys we mak knawyn be the tenor of thir oure letteris. In witnessing of the quhilk thing to thir our present letteris, oure commone seill of cause of our said burgh we haue gert append, at Edinburgh, the twenty day of the moneth of October the yeir of God ane thousand fyve hundreth and thretty ane zeris.
22 November 1531.
Mylnis, baxsteria, fyrmoraris.
The quhilk day, the provest baillies and counsale statutis and ordanis, for the commoun weill of thair mylnis and for stancheing of pley betuix the fermoraris and baxsteris, that in tyme to cum quhair ony baxsteris hes in the said mylnis ony quheit liand to grynd and will nocht cast on and grynd the samyn at all tymes quhen the mylnis ar rady thairto, that it sall be lefull to onye vther that is nixt to that rowme till cast vp his quheit and grynd his gyrst without stop or impedyment to be maid to him be that persoun that had his quheit lyand in the mylnis because he wald nocht grynd the samyn, sua that the saidis mylnis stand nocht idill for falt of stuf, and als the said prouest baillies and counsale assignis to the saidis fermoris ane of the saidis mylnis quhilk is werst to grynd malt vpoun continuallie, ay and quhill the hors myln be biggit.