Extracts From the Records of the Burgh of Edinburgh, 1573-1589. Originally published by Scottish Burgh Records Society, Edinburgh, 1882.
This free content was digitised by double rekeying. All rights reserved.
1 April 1575.
[The bailies, and council] ordanis the acts of parliament tuiching the saillerris to Flandaris be keipit in all tymes cuming, and because the baillies ar faschit with the impertunite of cullorit and vnfre merchanttis, thay statute and ordane that fra this day furth that nowther passinger nor merchant have license to sale, accept the samyn be granttit in presens of the counsale, and vpoun counsale dayis allanerlie, and gyf ony baillie or vther granttis ony license in contrair this present ordinance, he to pay to the commoun wark the sowme of x lib., vnforgevin.
The baillies and counsale ordanis maister Mychaell Chesholme and James Ros, thesaurer, to pass this efternone to my Lord Regenttis and travell for the libertie of our nychtbouris wairdyt in Linlythgow, and to report his ansuer vpoun Wednisday nixt.
28 April 1575.
The baillies and counsale and dekynnis foirsaid, vnderstanding that Henry Kincaid had lauborit and sawin thair yairdis of the Senys, and put lokis vpoun the durris of the samyn without thair licence, menyng thairby to put him self in possesioun and appropriat thair landis to him; quhilk considerit, efter ripe avisement, ordanis the baillies, takand ane sufficient nomber with thame of nychtbouris, to pass to the said place of the Senys, tak of the saidis lokis, and cause thair thesaurer put on new lokis and keyis vpoun the saidis durris, in sing of thair possessioun and heritable rycht, and forther to cause big vp the sloppis of the saidis yaird dikis, and charge the said Henry he mak thame na siclik trouble in tymes cuming.
18 May 1575.
Townys writing, Fullertoun.
Adam Fullertoun, in presens of the baillies and counsale, producit and deliuerit the townys writingis following, quhilk he had in keiping, vizt.:—the gyft vnder the greit seill, dischargeing the customes of futfellis and schorlingis; the copy of the chart of the townys landis disponit to the Senys; the priuelege of the confrerie of the Hally blud; the chart of the curettis hous; the copy of the custome roll; the erectioun of the queyr; the papis confirmatioun vpoun Dumbarnye; the Bull of Dumbarnye: and vpoun the production thairof the said Fullertoun askit instrumentis, and protestit to be dischargit.
Reparing of the toure of the auld tolbuith.
[The bailies, council and deacons of craft] ordanis James Ros, thesaurer, with all diligence possebill, to tak doun the west gavill of the towre of the auld tolbuith quhilk is rottin and rewynus, for saifing of oure Souerane Lordis lieges frome the apperand danger thairof, and incontinent to reedifie and big vp the samyn agane in substantious maner, with all the housis within the said towre, reparell the samyn with ruf jeistis, lofting, and vther necessaris of the javillouris duelling houss and pressoun houssis, as thay war of auld; and the expenssis to be debursit thairvpoun salbe allowit in his compttis.
21 May 1575.
The baillies and counsale ordanis James Ros, thesaurer, to prepair the ovir hous of the turnepike aboue the entre of the Lordis counsale hous, for the Lordis interpretouris of the lawis; and the expenssis debursit thairvpoun salbe allowit in his compttis.
31 May 1575.
Ordour for the pure.
The baillies and counsale ordanis proclamatioun to be maid throughout the toun be sound of bell, chargeing all beggairis nocht borne within this toun, or that hes nocht had thair duelling within this toun be the space of sevin zeris, and nocht enrollit nor appoynttyt for the townys almous, that thay incontinent remufe thame selffis of this toun and boundis thairof, vnder the pane of scourgeing, banessing, and burnyng throuch the lug, but fauouris, because thay haue bene chargit heirto of before and refusit. And for serching and apprehending of the saidis beggarris, nominattis the personis vnderwrittin viz:—seirchouris of the beggaris nocht admyttit to the townys almous [follow names] and the seirchouris to serue for the first quarter allanarlie, and thairefter vtheris to be put in thair place, be the avise of the baillies and counsale. And to the effect that the beggaris apprehendit sall nocht eschew, the counsall foresaid ordanis James Ros, thesaurer, to graith the briddall hous of Sanct Mary Wynde, put on lokis, durris, and wyndois vpoun the samyn, for ane presoun hous to the saidis apprehendit beggarris, vagaboundis, and sic vtheris as sal be tane begand, to quhome the townys almous is gevin; and commandis the officiarris to obbey their serchouris during thair offices, as the baillies selffis.
The baillies, counsall, and dekynnis, efter consultatioun and rype avysement had for the ordour and sustentatioun of the pure, and for halding of thame in thair houssis, keping thame of the streitis and begging at mennis duris, ordanis, conforme to the act of secreit counsall laitlie proclamit and publescheit at the marcat cros of this burgh, that all the inhabitantis and vtheris induellaris in the samyn be taxtt and sett be the baillies and counsall, according to thair discretioun, euery persoun to ane certan oulklie dewtie for the said pure, to be collectit be the persones efter writtin euery Setterday efternone in Sanct Gelis Kirk, quhair the saidis collectouris sall convene, and sit vpoun the resauing thairof for tua houris quhill thrie houris efternone, all the quhilk tyme and bell sall ring for warning of the pepill to cum and delyuer thair almous to the saidis collectouris; quhilk being resauit, to delyuer the samyn incontinent to the dekynnis appoyntit be the kirk for distributing of the samyn to the pure admitted, and thir collectouris to serue for the first quarter allanerlie, and gif ony of thame be absent for causis necessar ane vther to be putt in thair place at the discretioun of the baillies during the tyme of thair absence. Followis the names of the collectouris. [etc.]